སྨན་པའི་མཆོག་ལ་ཕྱག་འཚལ་ལོ། །རྒྱུད་རྒྱལ་བདུད་རྩི་སྙིང་པོ་ལས། །གབ་ཡིག་གསལ་བར་ཤེས་བྱའི་ཕྱིར། །སྨན་མིང་སྒྲོན་མེས་བརྡ་སྤྲོད་བསྟན། །དེ་ལ་བརྡ་སྤྲོད་རྣམ་པ་ལྔ། །སྡེ་ཚན་མིང་དོན་བརྡ་སྤྲོད་དང་། །རྒྱ་སྐད་མིང་དོན་བརྡ་སྤྲོད་དང་། །གབ་ཡིག་མིང་དོན་བརྡ་སྤྲོད་དང་། །ངོ་བོ་མིང་དོན་བརྡ་སྤྲོད་དང་། །བཟང་ངན་མིང་དོན་བརྡ་སྤྲོད་དོ།།

བོད་ཀྱི་གསོ་རིག་གཞུང་ལས་ཡོངས་གྲགས་སུ་ངོས་འཛིན་གནང་བཞིན་པའི་ནཱ་ག་གེ་སར་ཞེས་པ་དེ་ ནི། ཤེལ་ཕྲེང་དང་བཻ་སྔོན་ལས། ཀླུ་ཤིང་སྟེ་ལོ་སྡོང་གཉིས་སྟར་ག་འདྲ་བའི་ཐོག་རྐང་ལ་ཚེར་མ་ཡོད་པ་དང་། དེའི་ལྡེབས་སུ་ཐེའུ་རྣམས་ཁ་ཕྱོགས་གཅིག་ཏུ་བལྟས་ནས་སྐྱེས་པའི་ཐེའུ་ཁ་མ་ཕྱེ་བ་སྐམ་ནས་ཟངས་གོག་བཅོམ་པ་འདྲ་བ་དེ་ལ་ནཱག་པུཥྤ་དང་།