ྋསྐྱབས་རྗེ་ཀིརྟི་རིན་པོ་ཆེའི་འཁྲུངས་སྐར་ཉིན་མོར་སྨན་སྦྱིན་སོགས་གཏང་རྒྱུ།

ཕྱི་ལོ་ ༢༠༢༤ ཟླ་ ༨ ཚེས་ ༨ རེས་གཟའ་ཕུར་བུའི་ཉིན་ྋསྐྱབས་རྗེ་ཀིརྟི་རིན་པོ་ཆེ་མཆོག་ཕྱི་ལུགས་དགུང་གྲངས་ ༨༢ ལ་ཕེབས་པའི་སྐུའི་འཁྲུངས་སྐར་ཉིན་མོར་འགྲོ་ཕན་བོད་ཀྱི་སྨན་རྩིས་ཁང་དབུས་དང་ཡན་ལག་སྨན་ཁང་ཁག་དང་། དེ་བཞིན་བདེ་ལེགས་སྨན་ཁང་དབུས་དང་ཡན་ལག་ཁག སྐལ་བཟང་སྨན་ཁང་ཕན་བདེ་གཅེས་སྐྱོང་ཁང་དང་། སྨན་པ་ཁྱུ་གསར་སྨན་ཁང་སོགས་སུ་བཅར་མཁན་ནད་པ་ཡོངས་རྫོགས་ཀྱི་སྨན་སྦྱིན་ཆ་ཚང་དང་། བདེ་ལེགས་སྨན་ཁང་གི་ཉལ་མུས་ནད་པ་དང་བྱམས་པ་གླིང་རྒས་གསོ་ཁང་གི་རྒན་བགྲེས་རྣམས་ལ་བཞེས་ལག་དང་ལག་དངུལ་སོགས་སྦྱིན་གཏོང་མཛད་རྒྱུའི་ཀིརྟི་དགེ་རྩ་ཚོགས་པ་དང་། ཀིརྟིའི་བྱེས་པ་གྲྭ་ཚང་དང་། ཀིརྟིའི་བྱེས་པ་གྲྭ་ཚང་གི་བླ་སྤྲུལ་ཐུན་མོང་ནས་གསལ་བསྒྲགས་ཤིག་སྤེལ་འདུག

དེ་ལྟར་རྣམ་དཀར་དགེ་བའི་ལས་ལ་རབ་ཏུ་མོས་པའི་གོང་གི་ཚོགས་པ་གསུམ་ནས་རིས་མེད་ཉམ་ཐག་ནད་པ་རྣམས་ལ་ལྷག་པར་བརྩེ་བས་ཀུན་ནས་སླང་སྟེ་ྋསྐྱབས་རྗེ་ཀིརྟིའི་རིན་པོ་ཆེའི་སྐུའི་འཁྲུངས་སྐར་གྱི་དགེ་བའི་ཉིན། ལོ་སྟར་ཆགས་བཞིན་འདི་ལོ་ཡང་སྨན་སྦྱིན་སོགས་བསོད་ནམས་ཀྱི་ཚོགས་རླབས་པོ་ཆེ་གསོག་པའི་ལས་ལ་གཞོལ་བར་ཡི་རངས་བསྔགས་བརྗོད་དང་སྦྲགས། ྋསྐྱབས་རྗེ་ཀིརྟི་རིན་པོ་ཆེ་མཆོག་གི་སྐུ་ཚེ་མི་འཇིག་རྡོ་རྗེའི་ཁམས་སུ་རབ་ཏུ་བརྟན་ཅིང་སྐུ་ཁམས་གསལ་ཐང་ངང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པའི་བསྔོ་སྨོན་ཤུགས་དྲག་ཞུ།།

མཐའ་མའི་འདོན་ཐེངས་།: 05.08.2024 ཉིན། 11:29 AM