༄༅། །སྨན་པ་སྐབས་ ༢༢ དང་སྐར་རྩིས་པ་སྐབས་ ༡༢ བསླབ་པ་མཐར་སོན་པ་རྣམས་ལ་
ཕོ་བྲང་དུ་མཇལ་ཁ་དང་བཀའ་སློབ་བཀྲིན་བསྐྱངས་པ།

འགྲོ་ཕན་བོད་ཀྱི་སྨན་རྩིས་ཁང་གི་སྨན་རྩིས་མཐོ་སློབ་ཁང་ནས་བསླབ་པ་མཐར་སོན་པའི་སྨན་རྩིས་པ་རྣམས་ལ་བཞུགས་སྒར་རྒྱལ་བའི་ཕོ་བྲང་དུ་སྤྱི་ནོར་ྋགོང་ས་ྋསྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་དམིགས་བསལ་དུ་གསེར་ཞལ་མཇལ་ཁ་དང་གསུང་གི་བདུད་རྩི་བཀའ་དྲིན་སྩལ་སྲོལ་ཡོད་པ་འདི་ནི་ཕལ་ཆེར་སྨན་རྩིས་པ་སྐབས་དང་པོ་ནས་བཟུང་འོ་ཅག་རྣམས་ཀྱི་བསོད་ནམས་ཀྱི་བགོ་སྐལ་དུ་གྱུར་ཡོད་པ་བཞིན། ད་ཐེངས་ཕྱི་ལོ་ ༢༠༢༥ ཟླ་ ༤ ཚེས་ ༡༦ ཉིན་རྒྱལ་བའི་ཕོ་བྲང་དུ་མི་མང་ལ་མཇལ་ཁ་བསྩལ་བ་དང་སྦྲགས་ལོགས་སུ་རང་རེའི་སྐབས་ཉེར་གཉིས་སྨན་པ་གྲངས་ ༢༤ དང་། སྐབས་བཅུ་གཉིས་ཀྱི་སྐར་དཔྱད་རྩིས་རིག་པ་གྲངས་ ༧ དེ་བཞིན་མཐོ་སློབ་ཀྱི་སློབ་སྤྱི་བཅས་ལ་བཀའ་དྲིན་དཔག་མེད་ཀྱི་སྒོ་ནས་བཀའ་སློབ་སྩལ་ཡོད་པ་མ་ཟད་སྐུ་པར་ཡང་བསྒྲོན་གནང་ཡོད།

ལྷག་པར་མཇལ་ཁའི་སྐབས་སློབ་ཐོན་སྨན་རྩིས་པ་རྣམས་ནས་ྋགོང་ས་མཆོག་ལ་མཎྜལ་དུ་སྐུ་རྟེན་སྒྲོལ་དཀར་དང་། གསུང་རྟེན་དུ་འཕགས་པ་བརྒྱད་སྟོང་པ། ཐུགས་རྟེན་དུ་རྣམ་རྒྱལ་མཆོད་རྟེན་བཅས་འདེགས་འབུལ་ཞུས་ཡོད། དེ་དུས་ྋགོང་ས་མཆོག་གིས་དགེ་སློབ་རྣམས་ལ་བཀའ་སློབ་གང་བསྩལ་བ་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བོད་ཡིག་དྲ་རྒྱ་ནས་འདིར་ཟུར་འདོན་ཞུས་ཡོད།

“རྒྱ་མིས་དབང་བསྒྱུར་བའི་ཐབས་ཤེས་མང་པོ་བྱས་ཀྱང་། བོད་པའི་སེམས་ཤུགས་ཁྱོན་ནས་རླག་གི་ཡོད་པ་མ་རེད། མཁྱེན་སོང་ངམ། སྔོན་མ་ངོས་རང་མའོ་ཙེ་ཏུང་ལ་ཐུག་པའི་སྐབས་སུ་མའོ་ཙེ་ཏུང་གིས་བསྟོད་ར་ལྟ་བུ་ཞིག་བཏང་རྗེས་བོད་པ་ཚོ་ཆོས་ལ་དད་པ་ཡོད་པ་ནི་ནོར་འཁྲུལ་རེད། གུང་ཁྲན་ཏང་ལ་ཡིད་ཆེས་བྱེད་པ་མ་གཏོགས་ཆོས་ལ་ཡིད་ཆེས་བྱས་ན་ནོར་འཁྲུལ་རེད་ཅེས་བཤད་སོང་། ངོས་ཀྱིས་ལན་གང་ཡང་མ་བརྒྱབ། གང་ལྟར་བོད་པ་ཚོའི་བསམ་བློའི་འགྲོ་སྟངས་ནི། ལོ་སྟོང་ཕྲག་རིང་ལ་གོམས་བསྡད་པའི་ཆོས་དང་རིག་གཞུང་ལ་སྙིང་ཁུངས་རུས་པའི་སྟེང་ནས་དགའ་ཞེན་ཡོད་པ་དང་། ཡིད་ཆེས་ཡོད་པ་ཞིག་ཆགས་ཡོད། བོད་པ་ཚོ་ཧ་ཅང་གྲུང་པོ་རེད།

ཆོས་ལ་དད་པ་ཤུགས་ཆེན་ཡོད་པ་དེས་ངོས་རང་ལ་ཆ་བཞག་ན་རྒྱ་མི་གུང་ཁྲན་གྱིས་སྐྱོན་བརྗོད་དང་དམའ་འབེབ་ག་རེ་བཏང་ཡང་། བོད་པའི་བསམ་བློའི་ནང་དུ་ྋརྒྱལ་བ་བསྟན་འཛིན་རྒྱ་མཚོ་བསམ་པའི་དད་པ་དང་མོས་པ་དེ་འགྱུར་བ་མེད་པ་རེད་འདུག ངོས་རང་ནས་བོད་ཀྱི་བསྟན་པ་དང་འགྲོ་བའི་དོན་ནམ་ཡང་བརྗེད་རྒྱུ་མེད། ངོས་ཀྱི་བསམ་བློའི་ནང་དུ་བྱང་ཆུབ་ཀྱི་སེམས་ཀྱིས་ཟིན་པའི་ཐོག་ནས་བོད་ཀྱི་སངས་རྒྱས་ཀྱི་བསྟན་པ་འདིས་འཛམ་གླིང་སྤྱི་ལ་ཕན་པའི་ཆེད་དུ། བསྟན་པ་འདི་ཡུན་རིང་དུ་གནས་པར་ཤོག་བསམ་པའི་སྨོན་ལམ་རྒྱག་བཞིན་ཡོད། དེང་སང་འཛམ་གླིང་འདིར་བོད་ཀྱི་ནང་ཆོས་ལ་དོ་སྣང་བྱེད་མཁན་ཤུགས་ཆེ་རུ་འགྲོ་བཞིན་འདུག སྔ་མོ་ཡིན་ན་བོད་ཀྱི་ནང་ཆོས་ཟེར་དུས་ལྷ་ཁང་ནང་དུ་འགྲོ་བ་ལྟ་བུ་དང་། མཆོད་འབུལ་བྱེད་པ་ལྟ་བུ་ལ་བསམ་བློ་འཁོར་གྱི་ཡོད། དེང་སང་འཛམ་གླིང་འདིར་དངོས་ཡོད་གནས་ཚུལ་ལ་དོ་སྣང་དང་སློབ་སྦྱོང་བྱེད་ཡོང་དུས། ཚན་རིག་པའི་ནང་ནས་ཀྱང་བོད་ཀྱི་ནང་ཆོས་ལ་དམིགས་བསལ་གྱིས་དོ་སྣང་བྱེད་མཁན་མང་པོ་ཡོང་གི་འདུག ངོས་རང་ཆོས་པ་རེད་མ་གཏོགས་ཚན་རིག་པ་མིན་ཀྱང་། ཚན་རིག་པ་མང་པོ་ཞིག་ངོས་ཀྱི་འཁྲིས་སུ་ཡོང་ནས་ནང་ཆོས་དང་ཚན་རིག་གི་འབྲེལ་བའི་སྐོར་ངོས་ལ་སྐད་ཆ་འདྲི་གི་འདུག

ངོས་རང་ལ་མཚོན་ན་སྔོན་མ་ལྷ་སར་ཧེན་རི་ཆ་ཧ་རེར་(Heinrich Harrer)ཡོད་པའི་སྐབས་ནས་ཨིན་ཡིག་ཏོག་ཙམ་སྦྱང་བ་དང་། ངོ་ཤེས་པ་ཁ་ཤས་ཀྱི་ས་ནས་ཚན་རིག་གི་ཀླད་པའི་འགྲོ་སྟངས་སོགས་སྦྱང་བ་དང་འབྲེལ་ནས་གོ་བསྡུར་བྱེད་དུས་ཧ་ཅང་དགའ་བོ་བྱེད་ཀྱི་འདུག  ངོས་རང་ཆོས་གོས་སྣམ་སྦྱར་གྱོན་ནས་བཅོམ་ལྡན་འདས་ཀྱི་རྗེས་འབྲང་དགེ་སློང་རྣལ་མ་ཞིག་ཆགས་ཀྱི་ཡོད། ཡང་ཚན་རིག་པ་དང་མཉམ་དུ་མང་པོ་ཐུག་པ་དང་། གོ་བསྡུར་མང་པོ་བྱས་ཏེ་ཚན་རིག་གི་ཐོག་ལ་ངོས་ཀྱི་བསམ་བློ་འདི་དགའ་རབ་རྒྱ་ཆེན་པོ་དང་རླབས་ཆེན་པོ་ཆགས་ཡོད། མཁྱེན་སོང་ངམ། ག་རེ་ཟེར་གྱི་ཡོད་པ་རེད་ཟེར་ན། ང་ཚོའི་བོད་ཀྱི་ཆོས་དང་རིག་གཞུང་འདི་ཧ་ཅང་རྒྱ་ཆེན་པོ་དང་གཏིང་ཟབ་པོ་ཞིག་ཡོད་པ་ཞིག་རེད། འདི་ལེགས་སྦྱར་ལྟ་བུའི་སྐད་ཡིག་ལ་བརྟེན་མི་དགོས་པར་སོ་སོའི་སྐད་ཡིག་གི་ཐོག་ནས་ཆ་ཚང་ཞིག་འགྲེལ་བཤད་རྒྱག་ཐུབ་ཀྱི་ཡོད། ང་ཚོ་བོད་ཀྱི་ཆོས་དང་རིག་གཞུང་ཧ་ཅང་རྒྱ་ཆེན་པོ་དང་གཏིང་ཟབ་པོ་རེད། དེར་བརྟེན། བློ་བདེ་བོ་བྱོས། ཐུགས་རྗེ་ཆེ།” ཞེས་བཀའ་སློབ་བཀའ་དྲིན་སྩལ་ཡོད།།

མཐའ་མའི་འདོན་ཐེངས་།: 17.04.2025 ཉིན། 4:29 PM