བོད་གངས་ཅན་གྱི་ལྗོངས་སུ་གཞན་དྲིང་མི་འཇོག་པའི་གཅེས་ནོར་ཏེ་ཕ་ཤུལ་བུ་ལ་བཞག་ཅིང་ཀུན་ལ་ངོམ་རན་ཆོག་པ་ཞིག་ཡོད་པ་ནི་སྔོན་བྱོན་མེས་པོ་དམ་པ་རྣམས་དང་ཁྱད་པར་དུ་ཆོས་རྒྱལ་ལོ་པཎ་བཀའ་དྲིན་ཅན་དག་གི་རྣམ་དཔྱོད་ཕུན་སུམ་ཚོགས་པ་ལས་འཁྲུངས་པའི་ཁྱད་ནོར་ཏེ། རིག་པའི་གནས་ཆེན་བཅུ་ཞེས་སྙན་པའི་གྲགས་པ་འཇིག་རྟེན་ཀུན་ལ་མངོན་པར་གྲགས་ཤིང་བསྟོད་པའི་མེ་ཏོག་ས་འཛིན་ཕང་བར་གཏོར་བ་འདི་ཉིད་ཡིན།

རིག་པའི་གནས་ཆེན་འདི་དག་གིས་བོད་སྲིད་པ་ས་ལ་ཆགས་པ་ནས་ད་ལྟའི་བར་གྱི་བོད་མི་རིགས་འདིའི་བླ་སྲོག་གི་རྒྱུན་རྩ་དམ་པོར་བཟུང་ཡོད་ལ་མ་འོངས་པའི་མི་རིགས་འདིའི་ཆགས་འཇིག་གི་གཞི་རྩའི་གནད་འགག་ཀྱང་འདི་ལ་ཐུག་ཡོད། དེའི་རྐྱེན་གྱིས་བོད་གངས་ཅན་ལྗོངས་སུ་སྔར་རྒྱུན་གྱི་ལམ་སྲོལ་བཟང་པོ་ཞིག་དར་ཁྱབ་བྱུང་ཡོད་པ་ནི་རིག་གནས་འདི་དག་གི་འཛིན་སྐྱོང་སྤེལ་གསུམ་ཆེད་སྡེ་ཚན་ཁག་བགོས་ཀྱིས་རིག་པའི་བསྟི་གནས་རེ་རེ་གསར་འཛུགས་བྱས་ཡོད་ཅིང་། དེ་ཁོངས་ནས་རིག་པའི་གནས་ཆེན་བཅུའི་ཡ་གྱལ་གཞན་རྗེས་སུ་འཛིན་པའི་རིག་པ་སྟེ་གསོ་བ་རིག་པ་དང་། ལེགས་ཉེས་བླང་དོར་རྣམ་འབྱེད་ཀྱི་རྩིས་རིག་པ་གཉིས་ནི་ལོ་རྒྱུས་ཀྱི་བྱུང་རབས་ནང་སྨན་རྩིས་ཁང་འདི་ཉིད་ནས་ལོ་ངོ་བརྒྱ་ཕྲག་རིང་གཞི་རྐང་དམ་པོར་བཟུང་ནས་འཛིན་སྐྱོང་སྤེལ་གསུམ་བྱེད་བཞིན་པ་ཞིག་ཡིན།

དེ་ཡང་བོད་གཞུང་སྨན་རྩིས་ཁང་འདི་ལའང་དུས་རབས་ཀྱི་འགྱུར་མཚམས་དང་ལོ་རྒྱུས་ཀྱི་འཕེལ་འགྲིབ་ནང་གཞིས་བྱེས་གཉིས་སུ་གྱེས་ཤིང་འཛིན་སྐྱོང་གི་གཞི་རྐང་ཡང་སོ་སོར་གནས་ཡོད་ཀྱང་སྨན་རྩིས་བསྟན་པའི་བྱ་བཞག་ལ་ལང་ཕྱོགས་གཅིག་ཏུ་གནས་ཡོད་པ་རེད། བཙན་བྱོལ་ནང་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཐུགས་བསྐྱེད་ཀྱི་གྲིབ་བསིལ་འོག་སྨན་རྩིས་ཁང་འདི་ཉིད་སྔར་མེད་པ་ནས་ཡོད་པ་དང་། ཡོད་པ་ནས་ཤེས་ཡོན་དང་དཔལ་འབྱོར་གཉིས་ཀ་རང་སྐྱ་འཕེར་བའི་ཚོགས་སྡེ་འདི་འདྲ་ཞིག་ལ་འཕེལ་རྒྱས་བྱུང་ཡོད་པ་ཀུན་ལ་སྙོན་དུ་མེད། ལྷག་པར་དུ་སྤྱི་ལོ་༢༠༡༡ལོ་འདི་ནི་བཙན་བྱོལ་དུ་བོད་གཞུང་སྨན་རྩིས་ཁང་བཙུགས་ནས་མི་ལོ་ལྔ་བཅུ་ཧྲིལ་པོར་འཁོར་གྱི་ཡོད་པའི་ལོ་རྒྱུས་ཀྱི་གལ་ཆེའི་ལོ་ཚིགས་ཀྱི་དུས་མཚམས་ཤིག་ཆགས་ཡོད།

དེ་ལ་བསྟུན་ནས་སྨན་རྩིས་ཁང་འཛིན་སྐྱོང་གི་སློབ་སྟོན་དང་ཐུགས་ཁུར་རྒྱབ་སྐྱོར་འོག་སྨན་རྩིས་རིག་གཞུང་ཞིབ་འཇུག་སྡེ་ཚན་ནས་<<སྨན་རྩིས་དྲ་བ་>>ཞེས་པའི་དྲ་ཚིགས་འདི་སྤྱིར་སྨན་རྩིས་རིག་པའི་བསྟན་པ་འཛིན་སྐྱོང་གོང་འཕེལ་གཏོང་ཐབས་ཀྱི་ཆེད་དང་། ཁྱད་པར་དུ་སྨན་རྩིས་རིག་པའི་གཞུང་ལུགས་ལ་དོན་གཉེར་ཅན་རྣམས་ཀྱིས་དེང་དུས་ཀྱི་འགྲོ་ལུགས་དང་མཐུན་པར་ཐད་ཀར་དྲ་ལམ་ནས་གཟིགས་བདེ་ཡོང་སླད་དང་། སྒོས་སུ་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་སྨན་རྩིས་ཁང་འདི་ཉིད་ལ་ཐོག་མར་མགོ་བཙུགས་པ་ནས་ད་ལྟའི་བར་དུ་ཐུགས་རྗེས་བཀའ་དྲིན་དུས་ནས་དུས་སུ་གནང་བའི་བཀའ་དྲིན་གྱི་ཆ་ཤས་ཕྲ་མོ་ཙམ་ཞིག་གསབ་པའི་ཆེད་དུ་ལས་གཞི་འདི་ཉིད་གསར་དུ་སྤེལ་བའོ།།

མཐའ་མའི་འདོན་ཐེངས་།: 22.03.2014 ཉིན། 2:25 PM