སྨན་རྩིས་གཉིས་ཀྱི་འབྲེལ་བའི་ངོ་སྤྲོད་མདོར་བསྡུས།

བོད་ཀྱི་སྨན་དང་རྩིས་ཀྱི་རིག་གནས་གཉིས་ནི་འཇིག་རྟེན་ཁམས་ཀྱི་ཉི་ཟླ་དང་འདྲ་བར་སྣོད་བཅུད་བརྟན་གཡོའི་དངོས་པོ་མཐའ་དག་གི་རག་ལས་སའི་རྒྱུ་རྐྱེན་གཙོ་བོ་ཞིག་དང༌། ཕྱི་ནང་རྟེན་ཅིང་འབྲེལ་འབྱུང་གི་བྱ་དངོས་ཁྲི་ཕྲག་དུ་མའི་གནད་འགག་ཐུག་ས་འབའ་ཞིག་ཡིན་སྟབས། གངས་ཅན་ལྗོངས་སུ་མིའི་འགྲོ་བ་ཆགས་པ་ནས་བཟུང་རང་ཉིད་འཚོ་སྡོད་ཁོར་ཡུག་སོགས་ཀྱི་གནོད་འཚེ་དང་ལུས་ཁམས་ཀྱི་ཟུག་རྔུ་སྣ་ཚོགས་བྱུང་བའི་རིགས་བཅོས་ཐབས་དང་འགོག་སྲུང་གི་ཐབས་ལམ་སྣ་ཚོགས་བཙལ་འཚོལ་བྱེད་པའི་ནང་ཟས་ཀྱི་ཕན་གནོད་དང༌། གནམ་གཤིས་ཚ་གྲང་སོགས་ཀྱི་ཆོས་ཉིད་རགས་པ་ནས་ཞིབ་པར་བརྒྱུད་དེ་མཐར་གཉའ་ཁྲི་བཙན་པོའི་སྐབས་ཕན་ཤེས་སྨན་དཔྱད་དང་བསྐོར་ཤེས་རྩིས་མཁན་ལྟ་བུ་སྨན་རྩིས་ཀྱི་ལས་རིགས་དོན་གཉེར་མཁན་གྱི་ཤེས་པ་ཅན་གྱི་མི་སྣ་ཐོན་པ་དང༌། ལྷག་པར་དུག་ལ་སྨན་ཡོད་པའི་རྒྱུ་མཚན་དྲངས་ཏེ་དུག་འཇོམས་དབང་རིལ་ཞེས་པ་ཐོག་མར་གསར་རྙེད་བྱུང་ཡོད། དེ་རྗེས་བོད་རྗེ་བྱ་ཁྲི་བཙན་པོའི་སྐབས་ལྷོ་ཁ་ཡར་ལུང་དུ་རྒན་མོ་བལ་མའི་ཟླ་རྩིས་ཞེས་པ་བྱུང་སྟེ་མཐོ་བའི་ཟླ་བའི་འཕེལ་འགྲིབ་གཙོ་བོར་བྱས་ཏེ་ལོ་འཁོར་དུས་བཞིའི་ངོས་འཛིན་དང་ཕྱོགས་མཚུངས་ཉི་མའི་ལྷོ་བྱང་གི་འགྲོས་ལ་བརྟེན་ནས་དབྱར་དགུན་གྱི་མཚོན་རྟགས་ངོས་འཛིན་བྱེད་པའི་རིག་པ་རྙེད་པའི་ཁར་དམངས་ཁྲོད་དུ་དར་ཁྱབ་ཆེ་བའི་བརྟག་པ་སྣ་ཚོགས་དཔེར་ན་བྱ་དང་ཤིང་ལ་བརྟག་པ་ལྷོ་མོན་རྩིས་སྐར་དང་རླུང་ལ་བརྟག་པ་བྱང་པའི་རྩིས། གངས་དང་འཁྱགས་ལ་བརྟག་པ་སྟེང་པའི་རྩིས། རི་ཕྱུགས་མཚོ་ལ་བརྟག་པ་གམ་འབྲོག་རྩིས། ཉི་ཟླའི་འགྲོ་ལམ་བརྟག་པ་བོན་ཞང་རྩིས་ཞེས་པ་སོགས་གནམ་རིག་སྐར་རྩིས་ཀྱི་ནང་དོན་ཇེ་ལེགས་ཇེ་བཟང་དུ་གྱུར་པ་དང༌། ལྷ་ཐོ་ཐོ་རི་གཉན་བཙན་སྐབས་སྨན་པ་དུང་གི་ཐོར་ཅོག་ཅན་བོད་དུ་བྱོན་ནས་གསོ་དཔྱད་བསྟན་པ་དར་རྒྱས་ཀྱི་ཕྱོགས་སུ་འགྲོ་བའི་འགོ་བརྩམས། གནམ་རི་སྲོང་བཙན་སྐབས་རྒྱ་ནག་ནས་རྩིས་ཀྱི་རིག་པ་ཐོག་མར་བོད་ཡུལ་དུ་ཁྱབ་པ་དང༌། ལྷག་པར་ཆོས་རྒྱལ་སྲོང་བཙན་གྱི་སྐུ་དུས་རྒྱ་ནག་རྒྱལ་པོའི་སྲས་མོ་སྟེ་རྒྱ་བཟའ་ཀོང་ཇོ་བོད་དུ་ཕེབས་སྐབས་སྤོར་ཐང་རྩིས་ཀྱི་དཔེ་ཆ་ཁག་གཅིག་བསྣམས་པ་ཕེབས་པ་དང་། རྒྱ་བཟའ་གྱིམ་ཤིང་ཀོང་ཇོས་བསྣམས་པའི་སྨན་དཔྱད་ཟླ་བའི་རྒྱལ་པོ་དང་སྨན་རྒྱལ་གཡུ་ཐོག་པས་མཛད་པའི་གསོ་རིག་རྒྱུད་བཞི་གཉིས་ཀྱི་ནང་དུ་སྨན་དཔྱད་དང་སྤོར་ཐང་རྩིས་རིག་གི་ནང་དོན་ཡང་མཉམ་དུ་འདྲེས་ཡོད། རྒྱུ་མཚན་དེ་ལ་བརྟེན་ནས་སྨན་རྩིས་མཁས་དབང་དཔལ་སྤུངས་དབོན་ཀརྨ་ངེས་ལེགས་བསྟན་འཛིན་གྱིས་བརྩམས་པའི་རྩིས་གཞུང་ཉེར་མཁོ་བུམ་བཟང་ལས། །གཞན་ཡང་མཁས་གྲུབ་གཡུ་ཐོག་པས། །འཕགས་ཡུལ་རྒྱ་ནག་ཆུ་བཞིན་ཉུལ། །ཀུན་གྱི་བཅུད་བསྡུས་རྒྱུད་བཞི་བརྩམས། །ཁྱད་པར་ཕྱི་རྒྱུད་རྩ་ཆུའི་སྐབས། །ཚོན་ཀན་ཆག་གི་མིང་སོགས་དང༌། །མ་བུ་དགྲ་གྲོགས་སྐོར་འགོ་དང༌། །ཆུ་ནི་སྲིད་པའི་རུས་སྦལ་སོགས། །རྒྱ་ནག་ལུགས་ཉིད་སོར་བཞག་ནས། །དུས་བརྒྱད་གཟེར་བཞིའི་གཏན་ཚིགས་བཀོད། །འདི་ལ་རྒོལ་དུ་གཞན་མ་ནུས། །གསོ་དཔྱད་ལོ་འགོ་ཞེས་ཏེ་བཅུག །ཅེས་གསུངས་པ་དང༌། སྨན་དཔྱད་ཟླ་བའི་རྒྱལ་པོའི་ནང་དུའང་དུས་རྩའི་མཚན་ཉིད་མ་བུ་དགྲ་གྲོགས་ཀྱི་སྐོར་འགོ་བརྩི་སྟངས་འཁོད་ཡོད། རབ་བྱུང་དང་པོའི་མེ་ཡོས་སྤྱི་ལོ་༡༠༢༧ ལོར་དཔལ་དུས་ཀྱི་འཁོར་ལོ་བོད་དུ་དར་ནས་སྨན་རྩིས་གཉིས་ཀྱི་གོ་དོན་ཟབ་མོ་རྟོགས་པར་བྱེད་པའི་རྒྱུད་འགྲེལ་མན་ངག་དང་བཅས་པ་རྭ་འབྲོ་ཤོང་སོགས་ཀྱི་དྲིན་ལས་དར་སྤེལ་བྱུང་ཞིང་ཁྱད་པར་ཕྱི་དང་ནང་གི་དུས་ཀྱི་འཁོར་ལོ་ནི་རྟེན་ཅིང་འབྲེལ་འབྱུང་གི་ཚུལ་དུ་གནས་པའི་སྐོར། ཇི་ལྟར་ཕྱི་རོལ་དེ་བཞིན་ནང་། །ཞེས་དང་། རྟེན་ཞེས་ཆོས་ཉིད་མི་དོར་ལ། །འབྲེལ་ཞེས་འཇིག་རྟེན་ཚུལ་དང་མཐུན། །ཞེས་གསུངས་ཡོད། 

གསོ་བ་རིག་པ་ལེགས་པར་ཤེས་པར་བྱེད་པ་ལ་རིག་པའི་གནས་གཞན་དག་བསླབས་ཤིང་ཤེས་དགོས་པར་མ་ཟད། རྩིས་ཀྱི་རིག་པ་ནི་དེ་བས་ཀྱང་ངེས་པར་དུ་ཤེས་དགོས་པ་ཞིག་ཡིན་ཏེ། སྨན་པས་རྩ་དང་ཆུ་ལ་བརྟེན་ནས་ནད་བརྟག་པའི་སྐབས་དང༌། ནད་གསོག་ལྡང་ཞི་གསུམ་གྱི་དུས་མཚམས་ངེས་པར་བྱེད་པ། ནད་སྔོན་འགོག་བྱེད་པ། དུས་སུ་སྤྱོད་པའི་སྤྱོད་ལམ་གྱི་སྐབས་རྣམས་སུ་དུས་མི་འགྱུར་བའི་གཟེར་ཤེས་པར་བྱེད་པ་སོགས་སྐབས་མང་པོ་ཞིག་གཙུག་ལག་རྩིས་ཀྱི་རིག་པ་ལ་བརྟེན་ནས་ཤེས་དགོས་ཀྱི་ཡོད་པའི་ཕྱིར་ནའོ།།

དེ་ཡང་རེག་པ་རྩ་ལ་བརྟེན་ནས་ནད་བརྟག་པའི་སྐབས་རྩ་མདོ་ལས། དུས་བཞི་ཁམས་ལྔའི་འབྱུང་བ་བརྩི་བ་ནི། །དང་པོ་དུས་དོན་ཁམས་དང་རྩ་རུ་སྦྱར། །མ་བུ་དགྲ་གྲོགས་བཞི་ཡིས་སྐོར་འགོ་བརྩི། །ཞེས་བསྟན་ཡོད། དེ་ནི་དཔྱིད་ཀ་ལ་སོགས་པའི་ཕྱིའི་དུས་བཞི་དུས་མཚམས་བཅས་ལྔ་དང༌། མཆིན་པ་ལ་སོགས་པའི་ནང་གི་དོན་ལྔའི་ཁམས་རྣམས་རྩའི་འཕར་སྟངས་དང་ལྷན་ཅིག་ཏུ་སྦྱར་ནས་རྒྱུན་རྩ། དུས་རྩ། ནད་རྩ་བཅས་སོ་སོར་ངེས་པར་བྱེད་དགོས་པའི་དོན་ཏེ་དཔྱིད་དབུགས་ཐོབ་པ་ནས་བཟུང་ཕྱིའི་རང་བྱུང་ཁམས་ཀྱི་འབྱུང་བ་ཤིང་རྩི་ཁ་འབུས་པ་སོགས་ཀྱི་ཆོས་ཉིད་དང་མཐུན་པར་ནང་གི་འབྱུང་བ་ཤིང་ཁམས་མཆིན་རྩ་ཕྲ་ལ་གྲིམས་པར་འཕར་བ། དེ་བཞིན་དུ་དབྱར་ས་ཟླའི་དབུགས་ཐོབ་པ་ནས་བཟུང་ཕྱི་འབྱུང་བ་འདབ་རྒྱས་ཆར་དུས་ཀྱི་ཆོས་ཉིད་དང་མཐུན་པ་ནང་གི་མེ་ཁམས་སྙིང་རྩ་སྦོམ་ལ་རིང་བར་འཕར་བ་དང༌། སྟོན་དུས་ཞག་བདུན་ཅུ་དོན་གཉིས་རིང་ལ་ལྕགས་ཁམས་གློ་རྩ་ཐུང་ལ་རྩུབ་པར་འཕར་བ། དགུན་དུས་ཞག་བདུན་ཅུ་དོན་གཉིས་རིང་ལ་ཆུ་ཁམས་མཁལ་རྩ་འཇམ་ལ་དལ་བར་འཕར་བ། དུས་མཚམས་བཅོ་བརྒྱད་ཕྲག་བཞི་སྟེ་ཞག་བདུན་ཅུ་དོན་གཉིས་རིང་ལ་ས་ཁམས་མཆེར་རྩ་ཐུང་ལ་འཇམ་པར་འཕར་བ་བཅས་ཀྱི་ཚུལ་འདི་དག་དུས་བཞི་སོ་སོར་ཕྱིའི་འབྱུང་བའི་ཁམས་མི་འདྲ་བ་རེ་ཡོད་པ་བཞིན་དུ་ནང་གི་དོན་ལྔའི་རླུང་ཁྲག་གི་རྒྱུ་བའང་མི་འདྲ་བ་རེ་འགྱུར་འགྲོ་གི་ཡོད་པའི་རྐྱེན་གྱིས་རྩའི་འཕར་སྟངས་ཀྱང་མི་འདྲ་བ་རེ་ཡོང་གི་ཡོད་པ་རེད། འདི་ནི་ཕྱི་ནང་གི་འབྱུང་བ་རྣམས་ངོ་བོ་བདག་ཉིད་གཅིག་ཏུ་འབྲེལ་བའི་རྟེན་འབྲེལ་ལས་འབྱུང་བ་ཞིག་ཡིན་ཞིང༌། གནད་འདི་ཞིབ་ཕྲ་ཤེས་པར་བྱེད་པ་ནི་སྐར་རྩིས་ཀྱི་གཞུང་ནས་བསྟན་པའི་ཟླ་བ་སོ་སོའི་དབུགས་ཐོབ་སྒང་ཚད་ཁྱིམ་སླེབས་སོགས་དུས་བཞི་མི་འགྱུར་བའི་གཟེར་ལ་བརྟེན་ནས་དཔྱིད་དབྱར་སྟོན་དགུན་གྱི་དུས་མཚམས་རྣམས་ལེགས་པར་ངོས་ཟིན་པ་ལ་རག་ལས་པ་ཞིག་ཡིན། གནད་འདི་ལེགས་པར་མ་རྟོགས་ན་རྒྱུན་རྩ་དང༌། དུས་རྩ། ནད་ཅན་དང༌། ནད་མེད་ཀྱི་རྩའི་དབྱེ་བ་འབྱེད་མི་ཐུབ་ལ་འབྱུང་བ་རྣམས་ཀྱི་མ་བུ་དགྲ་གྲོགས་ཀྱི་སྐོར་འགོ་ལེགས་པར་མ་ཤེས་ན་ངོ་མཚར་རྩ་བདུན་སོགས་ཀྱང་བརྟག་མི་ཤེས་ཤིང་ནད་ངོས་ཀྱང་ལེགས་པར་ཟིན་པར་དཀའ། ནད་ངོས་ལེགས་པར་མ་ཟིན་ན་བཅོས་ཐབས་གནད་ལ་འཁེལ་བ་ཞིག་ག་ལ་ཡོང་ཐུབ། དེས་ན་དེ་དག་ཤེས་པའི་ཆེད་དུ་གཙོ་ཆེར་འབྱུང་རྩིས་ཀྱི་རིག་པ་ལ་བརྟེན་ནས་དུས་བཞི་ཁམས་ལྔའི་འབྱུང་བ་བརྩི་བ་མ་བུ་དགྲ་གྲོགས་ཀྱི་སྐོར་འགོ་བརྩི་ནས་ཤེས་དགོས་པས་རེག་པ་རྩ་ལ་བརྟེན་ནས་ནད་བརྟག་པའི་ཐབས་འདི་ནི་གཙུག་ལག་རྩིས་ཀྱི་རིག་པ་དང་འབྲེལ་བ་ཆེས་ཆེ་བ་ཞིག་ཏུ་གྲུབ་པར་མ་ཟད། ཆུ་དེ་སྲིད་པའི་རུས་སྦལ་གན་རྐྱལ་གནས། །ཞེས་པའི་སྐབས་སོགས་ཆུ་ལ་བརྟག་པའི་ཚེའང་རྩིས་ཀྱི་རིག་པ་ལ་བརྟེན་ནས་རྟོགས་དགོས་པ་འགའ་ཞིག་ཡོད་ལ། ནད་གསོག་ལྡང་ཞི་གསུམ་གྱི་དུས་མཚམས་ངེས་པར་བྱེད་པ་དང༌། དུས་བཞི་མི་འགྱུར་བའི་གཟེར་རྣམས་ཚུལ་བཞིན་ཤེས་པ་ལ་རག་ལས་པ་ཞིག་ཡིན། ཡང་བཤད་པའི་རྒྱུད་དུ། སྐད་ཅིག་ལ་སོགས་ཐང་ཅིག་ཡུད་ཙམ་སྟེ། །ཉིན་ཞག་ཟླ་བ་དུས་དང་ལོར་འགྱུར་ཏེ། །ཉི་མ་བརྒྱད་གསུམ་དབྱར་དགུན་དབུས་སུའང་ལྡོག །གསུམ་ནི་ལྷོ་དང་བྱང་དུ་འགྲོ་ཞེས་བྱ། ཞེས་པ་སོགས་ནད་སྔོན་འགོག་བྱེད་པ་དུས་སུ་སྤྱོད་པའི་སྤྱོད་ལམ་གྱི་སྐབས་འདིར་ནི་ཕྱི་རྒྱུད་རྩ་མདོའི་སྐབས་འབྱུང་རྩིས་ལྟར་དུས་བཞི་ལ་རབ་འབྲིང་ཐ་མའི་རྣམ་བཞག་མཛད་པ་དང་མི་འདྲ་བར། དགུན་སྟོད་དགུན་སྨད་དཔྱིད་དང་སོ་ག་དང༌། །དབྱར་སྟོན་དགུན་ཟླ་ར་སོགས་གཉིས་རིམ་བཞིན། །ཞེས་འདུལ་མངོན་ལྟར་དུས་དྲུག་གི་རྣམ་བཞག་མཛད་པ་དང༌། ལོ་འགོ་ཡང་མཆུ་ཟླ་བ་ནས་མི་འཛིན་པ་དང༌། དེ་ནས་དགུན་ཟླ་ཐ་ཆུང་ལ་སོགས་པ། །ཉི་མ་བྱང་དུ་འགྲོ་བའི་དུས་ཀྱི་ཚེ། །ཞེས་སོགས་མར་ངོ་སྔོན་འགྲོ་མཛད་པ་སོགས་སྤྱིར་རྒྱུད་གོང་འོག་ཅུང་ཟད་མི་འདྲ་བའི་སྣང་ཚུལ་ཡོད་པ་དེ་དག་གི་རྣམ་བཞག་ཞིབ་ཕྲ་ཤེས་པ་དང༌། བྱེ་བྲག་ལྡོག་གཉིས་མཉམ་གཉིས། འབྲུག་སྒྲ་སྒྲོགས་ཆད་སོགས་ཟླ་བ་སོ་སོའི་དུས་གཟེར་གྱི་ཞིབ་ཆ་རྣམས་སྐར་རྩིས་ཀྱི་རིག་པ་ལ་བརྟེན་ནས་ཤེས་དགོས་པ་ཤ་སྟག་ཡིན། གཞན་ཡང་སྨན་སྦྱོར་དང༌། སྨན་གཏོང་བ། དཔྱད་བྱེད་པའི་དུས་སོགས་སུ་ཉེ་བར་མཁོ་བ། སྨན་སྦྱོར་བྱ་ལ་ཉི་སྐར་ནས། །སྨན་པ་སྨན་ཐུར་སྨན་ཕོར་བཅས། །ནད་པ་རྣམས་ལ་བདུན་བདུན་ཏེ། །ཟླ་བའི་སྐར་མ་གར་གནས་བརྟག ཅེས་དང༌། མཚོ་དྲག་སྐྱོན་དང་དེ་ཉིད་ཕྱི། །ཀླུ་ཚེས་ལག་མིག་བུག་ཟུང་སྔ༌། །ཞེས་པ་སོགས་གསོ་རིག་གཞུང་གི་སྐབས་དོན་མང་པོ་ཞིག་རྩིས་ཀྱི་རིག་པ་ལ་བརྟེན་དགོས་པ་ཡིན་སྟབས་སྨན་པ་རྣམས་ཀྱིས་སྨན་སློབ་པའི་ཚེའང་རྩིས་ཀྱི་རིག་པ་འདི་ལ་མ་བརྟེན་ཐབས་མེད་པ་ལྟ་བུ་ཞིག་ཡིན། དེ་བཞིན་དུ་རྩིས་པ་ཞིག་ཡིན་ནའང་གསོ་རིག་གི་སྐབས་ནས་བཤད་པའི་མིའི་ལུས་ཀྱི་ཆགས་ཚུལ་དང༌། ཆགས་ཟིན་པའི་མིའི་ལུས་ཀྱི་རྩ་དང་རླུང་ཁྲག་རྒྱུ་བའི་གནས་ལུགས་སོགས་ལེགས་པར་ཤེས་ན། ཕྱི་ནང་གི་འབྱུང་བ་རྣམས་ངོ་བོ་བདག་ཉིད་གཅིག་ཏུ་འབྲེལ་བའི་རྒྱུ་མཚན་གྱིས། རྩིས་ཀྱི་སྐབས་ནས་བཤད་པའི་ཟླ་བ་སོ་སོའི་དབུགས་སྒང་ཁྱིམ་སླེབས་སོགས་དུས་གཟེར་གྱི་གནད་དང༌། ཕྱི་དུས་བཞིའི་འགྱུར་བ་དང༌། ནང་མིའི་ལུས་ཀྱི་རྩ་རླུང་གི་རྒྱུ་བ་རྣམས་ཕན་ཚུན་ཇི་ལྟར་འབྲེལ་བའི་ཚུལ། ཉི་ཟླ་ལ་སྒྲ་གཅན་འཇུག་པའི་རྒྱུ་མཚན་བཅས་ལ་གོ་དོན་ངེས་ཅན་ཞིག་སྟེར་ནུས་པ་ཡིན། དེ་ལྟར་བཅུ་ཕྲག་རིག་པའི་གནས་རྣམས་ནི་ཕནཚུན་གཅིག་ལ་གཅིག་བརྟེན་དང༌། གཅིག་ཕན་གཅིག་གྲོགས་ཀྱི་ཚུལ་དུ་འབྲེལ་བ་ཞིག་ཡིན་ལ། ལྷག་པར་དུ་སྨན་རྩིས་གཉིས་ནི་ཁ་བྲལ་ཐབས་མེད་པའི་འབྲེལ་བ་ཞིག་གྲུབ་ཡོད་སྟབས་དུས་ནམ་ཡང་མཉམ་སློབ་མཉམ་སྤྱོད་བྱེད་དགོས་ཀྱི་ཡོད་པ་རེད།

སྨན་རྩིས་གཉིས་མཉམ་དུ་དར་རྒྱས་བྱུང་བའི་བརྒྱུད་རིམ།

རང་རེ་བོད་ཀྱི་མེས་པོ་རྣམས་ཀྱི་སྐུ་དུས་ནས་གསོ་དཔྱད་ཀྱི་ལག་ལེན་བྱུང་བ་དང་ཆབས་ཅིག་ཏུ་གནམ་རིག་སྐར་རྩིས་བེད་སྤྱོད་དང་ཞིབ་འཇུག་བྱས་པའི་ལོ་རྒྱུས་ནི་ཧ་ཅང་རིང་པོ་ཞིག་ཡོད་པ་རེད། བོད་རྗེ་གཉའ་ཁྲི་བཙན་པོའི་དུས་སུ་སྨན་དཔྱད་ཀྱི་ལག་ལེན་ཡོད་པའི་ལོ་རྒྱུས་ཡོད་ལ། དེ་ནས་རིམ་བཞིན་འཕེལ་རྒྱས་བྱུང་བའི་ལོ་རྒྱུས་ཡོངས་སུ་གྲགས་པ་འདི་བཞིན། ད་ལྟའི་སྐར་རྩིས་རིག་པ་འདི་མ་དར་བའི་ལོ་ངོ་ཉིས་སྟོང་ལྷག་ཙམ་གྱི་སྔོན་ནས་ལས་ལ་བརྩོན་ཞིང་ཤེས་རབ་ལྡན་པའི་བོད་རིགས་མི་དམངས་ཀྱིས་གནམ་གྱི་སྐར་མ་ལ་བརྟག་པའི་རྩིས་དང༌། བར་སྣང་གི་སྤྲིན་དང་རླུང་ལ་བརྟག་པའི་རྩིས། བྱ་དང་ཤིང་ལ་བརྟག་པའི་རྩིས། མཚོ་དང་ཆབ་རོམ་ལ་བརྟག་པ་སོགས་དུས་བརྟགས་ཀྱི་རྩིས་རིག་སྣ་ཚོགས་ཉམས་མྱོང་གི་སྒོ་ནས་འཚོལ་སྡུད་བྱས་པ་དང༌། དེ་ནས་རིམ་གྱིས་འཕེལ་ཏེ་ཉི་ཟླ་སྐར་གསུམ་འཁོར་བགྲོད་ཀྱི་ཆོས་ཉིད་འཚོལ་ཞིབ་བྱེད་པའི་ནང་ཉི་མའི་འགྲོ་ཕྱོགས། ཟླ་བའི་འཕེལ་འགྲིབ། ལོ་ཟླ་ཞག་གསུམ་བརྩི་སྲོལ་གྱི་སྒྲོམ་གཞི་ཆགས། ལྷོ་ཁ་གཡའ་བཟང་གི་གམ་འབྲོག་པ་ལྷ་རྒྱལ་གྱི་སྒྲུང་དེབ་ནང༌། ཟླ་བའི་འཕེལ་འགྲིབ་དང༌། དུས་ཚིགས་ཀྱི་འགྱུར་བ། དངོས་པོ་དང་གནམ་གཤིས་ཀྱི་འབྲེལ་བ་བཅས་བཀོད་ཡོད། དེ་རྗེས་ཆོས་རྒྱལ་སྲོང་བཙན་སྒམ་པོའི་སྐུ་རིང་ལ་རྒྱ་ནག་ནས་འུན་ཤིང་ཀོང་ཇོ་ཁབ་ཏུ་བསུས། དེས་སྨན་རྩིས་ཀྱི་གཞུང་ལུགས་ཁག་གཅིག་བསྣམས་ཕེབས་པ་བོད་སྐད་དུ་བསྒྱུར། རྒྱ་གར། རྒྱ་ནག ཏ་ཟིག་གསུམ་ནས་སྨན་པ་སྤྱན་དྲངས། ཐུན་མོང་དུ་མི་འཇིགས་པའི་མཚོན་ཆ་ཞེས་བྱ་བ་ལུགས་ཆེན་གསུམ་གྱི་གཞུང་དུ་གྲགས་པ་བརྩམས། ཁྲི་ལྡེ་གཙུག་བརྟན་གྱི་སྐུ་དུས་སུ་མེས་རྒྱལ་ནས་གྱིམ་ཤིང་ཀོང་ཇོས་བསྣམས་ཕེབས་པའི་རྒྱ་ནག་ལུགས་ཀྱི་སྨན་རྩིས་ཀྱི་གཞུང་འགའ་ཞིག་བསྒྱུར་ཐོག་མཉམ་དུ་དར་སྤེལ་བཏང་ནས་སྨན་རྩིས་ཀྱི་གཞུང་ལུགས་དར་རྒྱས་འགྲོ་བའི་ཐབས་ལམ་རྒྱ་ཆེར་བཏང༌། ཆོས་རྒྱལ་ཁྲི་སྲོང་ལྡེའུ་བཙན་གྱི་དུས་སུ་རྒྱ་གར། རྒྱ་ནག ཏ་ཟིག་བཅས་ནས་རིམ་བཞིན་དྷརྨ་རཱ་ཛ། མཧཱ་ཀྱིན་ད། ཙན་པ་ཤི་ལ་ཧ་བཅས་བོད་དུ་ཕེབས་ནས་རྒྱལ་ཁམས་སོ་སོའི་ལུགས་དང་བསྟུན་པའི་སྨན་དཔྱད་ཀྱི་བསྟན་བཅོས་རིན་ཆེན་སྤུངས་པ་ཞེས་པ་བརྩམས། རྒྱ་ནག་ནས་རྩིས་ཀྱི་སློབ་དཔོན་དུ་ཧར་ནག་པོ་བོད་དུ་ཐེངས་འགའ་ཕེབས། སྔ་རབས་བོད་ཀྱི་བརྩི་སྲོལ་གྱི་སྟེང་མཧཱ་ཙི་ནའི་ལུགས་ཀྱི་ཧོང་ལེ་བརྩི་བའི་དར་སྲོལ་ཡང་ཆགས། ལོ་ཆེན་བཻ་རོ་ཙཱ་ནས་རྒྱ་གར་ནས་སྨན་རྩིས་ཀྱི་གཞུང་ཁ་ཤས་བསྒྱུར། སྨན་པའི་རྒྱལ་པོ་གཡུ་ཐོག་ཡོན་ཏན་མགོན་པོས་གསོ་རིག་སྨན་དཔྱད་ཀྱི་ཕྱག་ལེན་རྒྱ་ཆེར་གནང་བ་དང་ཆབས་ཅིག་སྐར་རྩིས་རི་བོ་རྡུལ་འབེབས། ནག་རྩིས་འཁོར་འདས་གཏན་འབེབས་སོགས་ཀྱི་གཞུང་ལུགས་འགའ་ཞིག་སློབ་སྦྱོང་དང་འཆད་སྤེལ་གནང་ཐོག ཀོང་པོ་སྨན་ལུང་དུ་སློབ་གྲྭ་བཙུགས་ནས་སྨན་རྩིས་རབ་འབྱམས་པ་མང་པོ་གསོ་སྐྱོང་གནང་སྟེ་སྨན་རྩིས་ཟུང་འབྲེལ་གྱི་རྒྱུན་སྲོལ་དར་སྤེལ་བཏང་བར་གྲགས། དེ་སྔོན་མདོ་སྡེ་ཕལ་པོ་ཆེའི་བྱེ་མ་རྡུལ་རྩིས་སུ་གྲགས་པ་དང༌། རྒྱ་ཆེར་རོལ་པར་རྩིས་ལ་སྦྱོང་བའི་ཚུལ་བསྟན་པ་སོགས་ལས་བརྩམས་ཏེ་གྲངས་དང་རྩིས་ཀྱི་རིག་པ་རྣམས་བོད་ཀྱི་མཁས་པ་རྣམས་ཀྱིས་ལག་ལེན་ཅི་རིགས་གནང་གི་ཡོད། དེ་སྐོར་ནས་སྙེ་བོ་ལོ་ཙཱ་བ་དབྱིག་གི་རིན་ཆེན་གྱིས་སྨན་གཞུང་ཡན་ལག་བརྒྱད་པའི་སྙིང་པོ་བསྡུས་པ། རང་འགྲེལ་བཅས་བསྒྱུར་སྤེལ་བྱས། ལོ་ཆེན་རིན་ཆེན་བཟང་པོས་ཡན་ལག་བརྒྱད་པ། འགྲེལ་ཆེན་ཟླ་ཟེར་སོགས་བསྒྱུར་བཤད་དར་སྤེལ་བཏང༌། དེ་བཞིན་ད་ལྟ་འདི་ནས་ཡར་བརྩིས་པའི་ལོ་༩༥༨ པ་སྟེ་སྤྱི་ལོ་༡༠༢༧ རབ་བྱུང་དང་པོའི་ཐོག་མ་མེ་ཡོས་ལོར་རྭ་འབྲོ་ཙ་མི་པཎ་ཆེན་སོགས་ཀྱིས་དཔལ་དུས་ཀྱི་འཁོར་ལོའི་རྒྱུད་འགྲེལ་པ་དང་བཅས་པ་བོད་སྐད་དུ་བསྒྱུར་གནང་མཛད། དེ་ནི་སྐར་རྩིས་རིག་པའི་གཞུང་རྩ་བ་ཡིན་ལ་གསོ་བ་རིག་པའི་གཞུང་ལུགས་ཀྱང་ཡིན། དེའི་ནང་དུ་ཕྱི་དུས་ཀྱི་འཁོར་ལོ་གནམ་སའི་གོ་ལ་གཏན་ལ་ཕབ་སྟེ། གནམ་ལ་ཉི་ཟླ་གཟའ་སྐར་གྱི་འགྲོས་དང༌། ས་ལ་དུས་བཞིའི་མངོན་རྟོགས་ཇི་ལྟར་ངོམ་པའི་ཚུལ་གྱི་རྣམ་བཞག་རྒྱ་ཆེར་བསྟན་ཡོད་པས་ལོ་ཐོ་རྩོམ་སྒྲིག་སོགས་ད་ལྟའི་སྐར་རྩིས་ཀྱི་ལག་ལེན་རྣམས་དེ་ལ་བརྟེན་ནས་འཕེལ་རྒྱས་བྱུང་བ་ཞིག་ཡིན། དེ་བཞིན་དུ། ནང་མིའི་ལུས་ལ་ཐོག་མར་རྩ་དང་རླུང་སོགས་ཇི་ལྟར་ཆགས་པའི་ཚུལ་དང༌། བར་དུ་ཇི་ལྟར་འཕེལ་ཞིང་རྒྱས་ལ་གནས་པའི་ཚུལ། ཐ་མ་ལུས་ལ་ནད་ཇི་ལྟར་འབྱུང་ཞིང་མཐར་འཇིག་པའི་ལྟས་སོགས་ཀྱི་རྣམ་བཞག་མང་དུ་བསྟན་པར་མ་ཟད། ནད་གསོ་བའི་ཟས་དང་སྨན་གྱི་ཚུལ་བསྟན་ཡོད་ལ། ལྷག་པར་དུ་རིན་ཆེན་དངུལ་ཆུའི་སྦྱོར་བ་སོགས་ཀྱི་གཞུང་རྩ་བའང་ཡིན་པ་བཅས་དུས་ཀྱི་འཁོར་ལོའི་རྒྱུད་ལས་ཀྱང་སྨན་རྩིས་གཉིས་ཟུང་འབྲེལ་གྱི་ཚུལ་དུ་བསྟན་ཡོད། དེར་བརྟེན་བོད་ཀྱི་མཁས་པ་རྣམས་ནས་དུས་ཀྱི་འཁོར་ལོའི་འཇིག་རྟེན་ཁམས་ལེར་གནམ་ས་གོ་ལའི་ངེས་པ་རྒྱ་ཆེར་བསྟན་པ་དེ་དག་རྩ་བར་བཟུང༌། སྔ་རབས་ཀྱི་དུས་བརྟག་གནམ་དཔྱད་ཀྱིས་ཟུར་བརྒྱན་ཏེ་ལོ་རེའི་གནམ་སའི་འགྱུར་ལྡོག་དང༌། ལེགས་ཉེས་བླང་དོར་གང་ལ་ཇི་འོས་གསལ་པོར་སྟོན་ཐུབ་པའི་ལོ་ཐོ་རྩོམ་སྒྲིག་བྱེད་པ་སོགས་ལ་བརྟེན་ནས་སྔར་ཡོད་ཀྱི་སྐར་རྩིས་རིག་པ་དེ་ཚན་རིག་གི་རང་བཞིན་དང༌། ཕྱོགས་ཡོངས་ཀྱི་རང་བཞིན་ལྡན་པའི་སྒོ་ནས་ཕུན་སུམ་ཚོགས་པའི་དུས་རིམ་འདི་འདྲ་ཞིག་ལ་འཕེལ་རྒྱས་བྱུང་བ་རེད། དུས་མཚུངས་སུ་སྨན་རྒྱལ་གཡུ་ཐོག་ཡོན་ཏན་མགོན་པོའི་ཐུགས་རྗེའི་འཕྲིན་ལས་ལས་བྱུང་བ་གསོ་དཔྱད་ཀུན་གྱི་རྒྱལ་པོ་དཔལ་ལྡན་རྒྱུད་བཞི་ཡང་སྙན་བརྒྱུད་སློབ་བཤད་ནས་རིམ་པར་ཚོགས་བཤད་ཀྱི་སྒོ་ནས་དར་རྒྱས་བྱུང་བའི་རྒྱུན་ལས། བྱང་ཟུར་མཁས་པའི་བཀའ་སྲོལ་གྱི་ཆུ་བོ་ཆེན་པོ་གཉིས་བརྒྱུད་ནས་ད་ལྟ་འདི་བཞིན་འཕེལ་རྒྱས་བྱུང་བ་ཞིག་ཡིན།། །།

མཐའ་མའི་འདོན་ཐེངས་།: 16.11.2013 ཉིན། 4:30 PM