སྨན་རྩིས་ཁང་འགན་འཛིན་མཆོག་གི་གསུང་བཤད།

༄༅། །ྋརྒྱལ་དབང་ྋསྐུ་ཕྲེང་བཅུ་བཞི་པ་ཆེན་པོ་མཆོག་ལ་ཨ་རིའི་གྲོས་ཚོགས་གསེར་གྱི་གཟེངས་རྟགས་ཕུལ་བའི་ཉིན་མོ་སྲུང་བརྩི་ཞུ་རྒྱུ་དང་།  ྋརྒྱལ་དབང་ྋསྐུ་ཕྲེང་བཅུ་གསུམ་པ་ཆེན་པོ་མཆོག་ནས་བོད་ཀྱི་རྒྱལ་ས་ལྷ་སར་སྨན་རྩིས་ཁང་གསར་འཛུགས་བསྐྱངས་ཏེ་ལོ་ངོ་ ༡༠༤ འཁོར་བ། བྱེས་སུ་ྋརྒྱལ་དབང་ྋསྐུ་ཕྲེང་བཅུ་བཞི་པ་ཆེན་པོ་མཆོག་ནས་འཕགས་ཡུལ་དྷ་རམ་ས་ལར་སྨན་རྩིས་ཁང་བསྐྱར་འཛུགས་བསྐྱངས་ནས་ལོ་ངོ་ ༥༩ འཁོར་བ་བཅས་ཀྱི་དུས་དྲན་སྲུང་བརྩིའི་མཛད་སྒོའི་སྟེང་
༢༠༢༠ ཟླ་ ༡༠ ཚེས་ ༡༧ ཉིན་གྱི་མཛད་སྒོའི་སར་སྨན་རྩིས་ཁང་
འགན་འཛིན་གྱི་གསུང་བཤད།

            ཆིབས་བསྒྱུར་བསྐྱངས་པའི་མགྲོན་གྱི་གཙོ་བོ་སྨན་རྩིས་ཁང་འགན་འཛིན་ལྷན་ཚོགས་ཀྱི་ཚོགས་གཞོན་དཔལ་ལྡན་བོད་མིའི་སྒྲིག་འཛུགས་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་མཆོག་དང་།  སྨན་རྩིས་ཁང་འགན་འཛིན་ལྷན་ཚོགས་ཀྱི་ཚོགས་མི་རྣམ་པ། ྋསྐུ་བཅར་སྨན་པ།  ཚོགས་པ་ཁག་གི་སྐུ་ཚབ་རྣམ་པ།  གསར་འགོད་པ་རྣམ་པ། དེ་བཞིན་སྨན་རྩིས་ཁང་གི་ལས་བྱེད་དང་ལས་མི།  སྨན་རྩིས་སློབ་ཕྲུག་བཅས་ལ་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན།

            ྋརྒྱལ་དབང་ྋསྐུ་ཕྲེང་བཅུ་བཞི་པ་ཆེན་པོ་མཆོག་གི་ྋསྐུའི་འཕྲོད་བཞེས་ཞབས་ཞུ་ལས་ལྷག་པ་མ་མཆིས་སྟབས། སྐུའི་འཕྲོད་བཞེས་ཞབས་ཞུ་སྨན་པ་རྣམས་ནས་མགོན་པོ་གང་ཉིད་ཀྱི་ྋསྐུའི་འཕྲོད་བཞེས་དང་མཐུན་པའི་ལྗགས་སྨིན་གསོལ་སྨན་ཁག་རྒྱུད་གཞུང་མན་ངག་དང་མཐུན་པར་སྦྱོར་འབུལ་ཞུ་བཞིན་པ་དང་། སྐར་དཔྱད་རྩིས་རིག་སྡེ་ཚན་ནས་སྐུ་ཡི་དགུང་ཀེག་ཀེག་རྩིས་རིགས་ཀྱང་འཚེམས་ལུས་མེད་པར་འབུལ་ལམ་ཞུ་བཞིན་པ་ཡིན།  ྋརྒྱལ་བའི་སྐུ་བཅར་སྨན་པ་རྣམ་དང་སྐར་རྩིས་པ་གཙོ་བོ་ཙམ་མིན་པ་སྡེ་ཚན་མང་པོའི་ལས་བྱེད་མང་པོར་དགའ་ལྡན་ཕོ་བྲང་གི་ཕྱག་ལས་ཐོག་རམ་འདེགས་ཞུ་རྒྱུའི་གོ་སྐབས་མང་པོ་ཡོད་པ་དགའ་ངོམས་དགོས་པ་ཞིག་ཡིན

མི་ཤུགས་གོང་སྤེལ་སྡེ་ཚན་ཁོངས་ལས་བྱེད་དང་། ལས་མི། སློབ་ཕྲུག་བཅས་ཀྱི་རྣམ་གྲངས།།  

            ད་ལྟའི་ཆར་སྨན་རྩིས་ཁང་དུ་ངོ་བོ་དང་ལས་འགན་གྱི་ཐོག་ནས་འཛིན་སྐྱོང་ཁོངས་སྡེ་ཚན་ཁག་ ༡༡ དང་། རིག་གཞུང་ཁོངས་སྡེ་ཚན་ ༡༤ བཅས་སྡེ་ཚན་ ༢༥ དང་།  འཛིན་སྐྱོང་ཚགས་ཚུད་དང་མཉམ་རུབ་ཆེད་སྒྲིག་གསལ་ལས་ཀའི་ངོ་བོའི་ཆ་ནས་དབང་ཚད་བགོ་འགྲེམས་བྱས་པའི་ཚོགས་ཆུང་ཁག་ ༡༨ བཅས་ཡོད།

སྨན་སྦྱིན་ཞབས་ཞུ།
            སྨན་རྩིས་ཁང་ནས་ཉམ་ཐག་དང་། ལོ་ན་ ༦༥ ཡན། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད། བོད་ནས་གསར་དུ་འབྱོར་བ། སྨན་རྩིས་ཁང་གི་ལས་བྱེད་དང་སྡོད་གཅིག་ནང་མི། ནད་གཞི་འབྲས་ནད། གློ་གཅོང་། གཉན་ནད་རེག་དུག མཆིན་ནད་དུག་ཐབས་བཅས་ལྕི་བོ་ཡོད་པའི་ནད་པ། བོད་མི་སྒྲིག་འཛུགས་ཀྱི་འཕྲོད་བསྟེན་བལྟ་སྐྱོང་ཆེད་སྨན་རིན་བརྒྱ་ཆ་ ༡༠། ཆག་ཡང་།  གྲྭ་བཙུན། སློབ་ཕྲུག་བཅས་ལ་སྨན་སྦྱིན་ཕྱེད་བཅག་ཕུལ་བ་ཆ་སྙོམས་བྱས་ན་ཟླ་རེར་ཧིན་སྒོར་འབུམ་ ༢༨ ཙམ་གཏོང་བཞིན་ཡོད་པ་དེ་དག་གཙོ་བོ་ྋརྒྱལ་དབང་ྋསྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་རྗེ་བཀའ་དྲིན་དང་། ཡང་སྒོས་རྒྱ་གར་གྱི་གྲོང་ཁྱེར་ཆེ་ཁག་ནང་ཡོད་པའི་སྨན་རྩིས་ཁང་ལ་བསྟེན་གཏུགས་བྱེད་མཁན་གྱི་རྒྱ་གར་ནད་པའི་ཞལ་འདེབས་དང་སྨན་རིན་སོགས་ལ་བརྟེན་ནས་བྱུང་བ་ཡིན།

            ཉམ་ཐག་གི་ཐོ་གཞུང་འདེམ་སྒྲུག་ལ་མཚོན་ནའང་། བོད་མིའི་སྒྲིག་འཛུགས་ཀྱི་ནང་སྲིད།  ཤེས་རིག  འཕྲོད་བསྟེན་གསུམ་གྱི་ཉམ་ཐག་འདེམ་སྒྲུག་སྲིད་ཇུས་ལས་གུ་ཡངས་པ་ཡོད་པས་སྨན་སྦྱིན་ཞུ་མཁན་གྱི་གྲངས་ཐོ་ཡང་མང་བ་ཡོད། སྨན་རྩིས་ཁང་ལ་མཚོན་ན་ས་གནས་འགོ་འཛིན་སོ་སོས་ཟླ་བ་གསུམ་རེའི་མཚམས་སུ་གནང་བའི་ཐོ་གཞུང་རང་ལ་སྨན་རྩིས་ཁང་ནས་རྩ་འཛིན་བྱེད་བཞིན་ཡོད། ད་དུང་གལ་ཏེ་ཐོ་གཞུང་ཁོངས་མ་ཚུད་པའི་ཉམ་ཐག་ལྷག་བསྡད་རིགས་ཡོད་ན། དེ་ནི་ས་གནས་འགོ་འཛིན་སོ་སོས་འཐུས་ཤོར་དང་ལྷོད་ཡངས་སུ་བཏང་པར་ངོས་འཛིན་ཞུ་རྒྱུ་ཡིན་ཞེས་ངོས་འགན་འཛིན་ས་གནས་ཁག་ལ་རྟོག་ཞིབ་ཏུ་བསྐྱོད་སྐབས་བརྗོད་ཀྱི་ཡོད། 

སྨན་དང་། ཐོན་སྐྱེད་ཀྱི་སྤུས་ཚད་སྟངས་འཛིན་ཚོགས་ཆུང་། 

            སྨན་རྩིས་ཁང་ལ་ཁྲིམས་དང་བཟང་སྤྱོད་གཉིས་ཀྱི་འགན་ཡོད་པའི་ཐོག་སྨན་རྩིས་ཁང་གི་སྨན་དང་ཕྱིར་ཚོང་ཐོན་སྐྱེད་ལ་རྒྱ་ཆེ་མང་ཚོགས་ནས་ཡིད་ཆེས་དང་ཆེ་མཐོང་ཆེན་པོ་གནང་བཞིན་ཡོད་སྟབས། སྨན་རྒྱུའི་རིན་འབབ་ལ་མ་བལྟས་པར་སྨན་རྒྱུ་སྤུས་ལེགས་མཁོ་སྒྲུབ་དང་། སྦྱོར་བཟོ་རྣམས་སྨན་གྱི་གཞུང་ལུགས་ལྟར་ཚད་ལྡན་དགོས་པ་གཞིར་བཞག་སྟེང་། སྤུས་ཚད་སྟངས་འཛིན་ཚོགས་ཆུང་ཞེས་སྨན་པ་གཙོ་བོ་ཚོགས་གཙོར་ཡོད་པའི་ཐོག་སྨན་སྦྱོར་འགན་འཛིན་དང་། སྨན་རྫས་འགན་འཛིན། ཉམས་ཞིབ་འགན་འཛིན། སྔོ་སྦྱོར་འགན་འཛིན། ཐད་སྤྱོད་སྨན་གྱི་སྡེ་ཚན་གྱི་འགན་འཛིན། ཚན་རིག་པ་བཅས་ལས་གྲུབ་པའི་སྤུས་ཚད་སྟངས་འཛིན་ཚོགས་ཆུང་ནི་གལ་ཆེའི་ཚོགས་ཆུང་ཞིག་ཡིན།

            བླ་བྲང་དང་།  གྲྭ་ཚང་ཁག་ནས་སྨན་རྩིས་ཁང་ལ་རེ་བ་དང་ཡིད་ཆེས་ཆེན་པོས་གསོལ་སྨན་དང་སྨན་པའི་མཐུན་སྦྱོར་རེ་སྐུལ་ཞུ་མཁན་མང་དུ་འགྲོ་འདུག  སྨན་དང་སྨན་པ་གཉིས་ཀ་སྨན་རྩིས་ཁང་ནས་གཏོང་གནང་ཡོང་བའི་རེ་སྐུལ་ཞུ་མཁན་ལ་ངོས་ལེན་དང་མཐུན་སྦྱོར་གང་ཐུབ་ཞུ་བཞིན་ཡོད་ལ།  སྨན་གཞན་ནས་མཁོ་སྒྲུབ་དང་སྨན་པ་རྒན་པ་ཞིག་སྨན་རྩིས་ཁང་ནས་གཏོང་གནང་ཡོང་བ་དང་།  ཡང་།  སྨན་དེ་སྨན་རྩིས་ཁང་དང་སྨན་པ་ང་ཚོར་ཡོད་ཞུ་མཁན་རིགས་ལ་ཁས་ལེན་ཞུས་མེད།

རིན་ཆེན་རིལ་བུའི་སྐོར། 

            སྨན་རྩིས་ཁང་ནས་བཟོ་སྐྲུན་ཞུས་པའི་རིན་ཆེན་རིལ་བུ་ཁག་བརྒྱད་ཡོད། བོད་རིགས་མང་ཚོགས་ལ་རིན་ཆེན་རིལ་བུའི་ཚོང་སྒྱུར་བྱེད་ལུགས་ད་ལྟ་ཡག་པོ་འགྲོ་བཞིན་པ་འདི་མུ་མཐུད་རྒྱུན་འཁྱོངས་དགོས་གལ་ཆེ། འགྲོ་ལུགས་དེ་ལྟར་བཟོས་དགོས་པའི་རྒྱུ་མཚན་ཡང་བར་སྐབས་དངུལ་རྐྱང་ཁོ་ན་མ་གཏོགས་མི་སེམས་པའི་རང་རིགས་ཚོང་པ་ཁག་གཅིག་གིས་ཐབས་ལམ་སྣ་ཚོགས་བེད་སྤྱོད་བྱས་ནས་སྨན་རྩིས་ཁང་གི་རིན་ཆེན་རིལ་བུ་འབོར་ཆེན་ཐོབ་པར་བྱས་ཏེ་བོད་དུ་བཏང་ནས་སྨན་རིན་ལྡབ་མང་པོ་ལེན་བཞིན་པའི་གནས་ཚུལ་ཡོང་འདུག་པ་དང་། བཙན་བྱོལ་ནང་གི་རང་རིགས་ལ་རིན་ཆེན་རིལ་བུ་མ་ལྡེང་བའི་རྒྱུ་མཚན་གཅིག་དེར་ཐུག་ཡོད། དེར་བརྟེན་མང་ཚོགས་ཀྱིས་ཀྱང་ཧམ་སེམས་ཆེ་བའི་ཚོང་པ་དག་གི་བེད་སྤྱོད་ལོག་པའི་འོག་མི་ཚུད་པ་བྱ་རྒྱུ་གལ་ཆེ། གང་ལྟར་རིན་ཆེན་རིལ་བུ་ཚོང་སྒྱུར་ཐད་གནས་སྟངས་ཇི་འདྲ་ཞིག་ཡོད་ཀྱང་སྨན་རྩིས་ཁང་གི་ཡན་ལག་སྨན་ཁང་ཁག་གི་ནང་དུ་སྨན་པས་བརྟག་དཔྱད་བྱས་རྗེས་ནད་པ་གང་ཞིག་ལ་རིན་ཆེན་རིལ་བུ་གང་དང་ཐུན་གྲངས་ཇི་ཙམ་གཏོང་དགོས་རིགས་སྨན་པར་འགན་དབང་ཆ་ཚང་ཡོད་པས་ནད་པའི་ཆེད་དུ་རིན་ཆེན་རིལ་བུ་མ་རག་པའི་སྐད་ཆ་སྦྲང་སྐད་ཙམ་ཡང་མེད་པ་དགོས་རྒྱུ།

གསོ་བ་རིག་པ་ལ་བོད་སྨན་ Tibetan Medicine ལབ་ཆོག 

            གཡུ་ཐོག་ཡོན་ཏན་མགོན་པོས་རྩོམ་སྒྲིག་བྱས་པའི་དཔལ་ལྡན་རྒྱུད་བཞི་དང་། དེ་བཞིན་བོད་གངས་ཅན་ལྗོངས་ཀྱི་མཁས་པ་རྣམས་ཀྱིས་མཛད་པའི་སྨན་གཞུང་རྣམས་གཞི་རྩར་བཞག་སྟེ་སློབ་གཉེར་བྱེད་པ་དང་། གཞུང་དེ་དག་ནང་བསྟན་པའི་བརྟག་ཐབས་རིག་པ་དང་། སྨན་རྫས་མཁོ་སྒྲུབ། སྨན་སྦྱོར་ལག་ལེན་བཅས་ཀྱི་སྒྲོམ་གཞི་དེ་ལ་བསྟན་བཅོས་ཀྱི་ཐ་སྙད་དུ་བོད་ཀྱི་གསོ་བ་རིག་པ་ཞེས་པ་དང་། ཡོངས་གྲགས་དམངས་ཁྲོད་དུ་བོད་སྨན་ཞེས་ Tibetan Medicine གྲགས་ཡོད། བོད་ཀྱི་ཁྱིམ་མཚེས་ཀྱི་ཡུལ་ལུང་འབྲུག་དང་། བལ་ཡུལ། སོག་པོ་ལ་སོགས་པའི་ནང་དུ་ལག་བསྟར་བཞིན་པའི་སྨན་གྱི་རིག་པ་དེ་ང་ཚོའི་བོད་ཀྱི་གསོ་བ་རིག་པའི་སྒྲོམ་གཞི་དེ་ཉིད་དང་གཅིག་མཚུངས་ཤིག་ཡིན་ན་དེ་ལའང་བཟང་སྤྱོད་སྒོ་ནས་བོད་སྨན་ Tibetan Medicine ཞེས་འབོད་དགོས་པ་ཡིན། དེང་སང་བོད་ཀྱི་གསོ་བ་རིག་པ་ལ་གསོ་རིག་ཁོ་ན་མ་གཏོགས་བོད་དང་བོད་སྨན་ཞེས་པའི་ཐ་སྙད་ཙམ་ཡང་བེད་སྤྱོད་གནང་བདེ་མེད་པའི་གནས་བབ་འདི་ཆབ་སྲིད་ཀྱིས་རིག་གཞུང་བྱེ་བྲག་པ་ཞིག་གི་འབྱུང་ཁུངས་ལ་རྩིས་མེད་གཏོང་བའི་རང་གཤིས་ལས་མ་འདས། འོན་ཀྱང་ང་ཚོ་བོད་མིས་ད་དུང་ཡང་བོད་སྨན་ལ་བོད་སྨན་ཞེས་འབོད་པ་འདི་ང་ཚོའི་ལྷན་སྐྱེས་སུ་ཡོད་པའི་ཐོབ་ཐང་ཞིག་ཡིན། དཔེར་ན།  ང་ཚོ་བོད་པས་དུས་ད་ལྟའི་བར་དུ་དཔལ་ནཱ་ལེན་དྲའི་ཆོས་བརྒྱུད་དྲི་མ་མེད་པར་ཐོས་བསམ་སྒོམ་གསུམ་གྱི་སྒོ་ནས་ལུང་རྟོགས་ཀྱི་བསྟན་པ་འཛིན་སྐྱོང་བྱས་པ་ན་བོད་ཀྱི་ནང་ཆོས་ཞེས་འཛམ་གླིང་ཡོངས་ལ་གྲགས་ཤིང་དེ་ལྟར་འབོད་པ་ལ་དཀའ་ངལ་གང་ཡང་མེད། དེ་བཞིན་དུ་ང་ཚོའི་མེས་པོ་དམ་པ་རྣམས་ཀྱིས་བོད་ཀྱི་གསོ་བ་རིག་པའི་ཁྱད་ནོར་ལ་གཅེས་སྤྲས་བྱས་པ་དེ་ལའང་མུ་མཐུད་ནས་བོད་སྨན་ Tibetan Medicine ཞེས་འབོད་པར་དཀའ་ངལ་གང་ཡང་འཕྲད་དགོས་དོན་མེད།

བོད་སྨན་གྱི་ཡར་རྒྱས་དང་ཉེན་ཁ། 

            སྨན་རྩིས་ཁང་དང་། སྨན་རྩིས་ཁང་གིས་བཟོ་སྐྲུན་བྱས་པའི་སྨན་རིགས། སྨན་རྩིས་ཐོན་དོངས་བཅས་ལ་རྒྱ་གར་ཙམ་དུ་མ་ཟད་བོད་དུ་རང་རིགས་རྣམས་ཀྱིས་ཀྱང་ཡིད་ཆེས་དང་གདེང་འཇོག་ཆེན་པོ་གནང་བཞིན་ཡོད། དེ་ནི་གཙོ་བོ་ྋརྒྱལ་དབང་ྋསྐུ་ཕྲེང་བཅུ་བཞི་པ་ཆེན་པོས་བཀའ་སློབ་ལམ་སྟོན་གང་ཕེབས་པ་སྙིང་ལ་བཅངས་པའི་སྒོ་ནས་གོམ་པ་མདུན་སྐྱོད་ཀྱིས་ཡར་རྒྱས་ཀྱི་འབྲས་བུ་ཞིག་ཡིན། ཡར་རྒྱས་གོང་འཕེལ་དང་ལྷན་དུ་གདོང་ལེན་བྱེད་དགོས་པའི་ཉེན་ཁ་ཞིག་ཀྱང་ཡོང་བཞིན་པ་ནི། ལོ་ཤས་སྔོན་ནས་སྨན་རྩིས་ཁང་གི་མིང་བེད་སྤྱོད་ལོག་པ་བཏང་སྟེ་སྨན་དང་རིན་ཆེན་རིལ་བུ། བདུག་སྤོས་སོགས་སྨན་རྩིས་ཁང་གི་མ་ཡིན་བཞིན་དུ་སྨན་རྩིས་ཁང་གི་ཡིན་ཁུལ་བཤད་པ་དང་། སྨན་རྩིས་ཁང་གི་མིང་དུ་བརྫུས་ཏེ་སྨན་རིགས་མང་པོ་བོད་དུ་བཏང་ཡོད་པའི་གནས་ཚུལ་རབ་དང་རིམ་པ་མང་པོ་བྱུང་ཡོད། བོད་རིགས་མང་ཚོགས་ནས་མི་ངན་དག་གི་བསླུ་བྲིད་འོག་མི་ཚུད་པའི་ཆེད་དུ་སྨན་རྩིས་ཁང་ནས་དེ་སྔ་གསར་འགོད་གསལ་བསྒྲགས་ཤིག་ཀྱང་སྤེལ་ཡོད། དེ་ལྟར་རང་རིགས་མི་ངན་ཉུང་ཤས་ཤིག་གི་བྱས་ཉེས་དབང་གིས་སྨན་རྩིས་ཁང་དང་བོད་སྨན་ལ་མཚན་ཤས་བཟོ་བའི་ཉེན་ཁ་ཡོད་མུས་སྟེང་། བོད་རིགས་མ་ཡིན་པ་ནས་དེ་ལྟའི་ཉེན་ཁ་མེད་པའང་མ་ཡིན། ཡང་།  ཚད་ལྡན་གསོ་རིག་མཐོ་སློབ་ཁང་ནས་སློབ་ཐོན་བྱུང་བའི་སྨན་པ་མ་ཡིན་པའམ། ནུས་པ་ཕྱོགས་བསྡུས་ལྟ་བུར་བལྟས་ཏེ་བོད་སྨན་ཉམས་ལེན་བྱེད་པས་བོད་སྨན་སྤྱི་ལ་མིང་ཆད་ངན་པ་འཕོག་སྲིད་པ་ཡིན། ལྷག་པར་སངས་རྒྱས་ན་བཟའ་བཞེས་མཁན་ནུབ་ཕྱོགས་སོགས་ཕྱི་རྒྱལ་ཡུལ་ཕྲུ་ཁག་ཏུ་སླེབ་སྐབས་སྐུ་ཚབ་དོན་གཅོད་སོགས་བོད་མིའི་གནས་ཡོད་དབུ་ཁྲིད་མི་སྣ་རྣམས་ཀྱིས་ངེས་པར་དུ་དོ་དམ་ཡིད་གཟབ་གནང་རོགས་ཞེས་འབོད་སྐུལ་ཞུ་རྒྱུ་ཡིན།

Covid-19 གཉན་རིམས་དུས་སྐབས་སྨན་རྩིས་ཁང་གི་ཞབས་ཞུ།

            སྔ་ལོའི་ལོ་མཇུག་ཙམ་རྒྱ་ནད་ Covid-19 གཉན་རིམས་ཀྱི་ནད་གཞི་འཕོག་བཞིན་ཡོད། དེ་ལྟར་གཉན་འཕྲང་ཅན་གྱི་དུས་སུ་སྨན་རྩིས་ཁང་གིས་ཐོག་མ་ཉིད་ནས་བོད་ཀྱི་གསོ་བ་རིག་པའི་ལུགས་གཞིར་བཟུང་རིམས་སྲུང་རིལ་བུ་སོགས་རང་རིགས་མང་ཚོགས་ལ་མཁོ་འདོན་ཆ་ཚང་ཞུས་ཡོད་ལ། གཞན་ཡང་སྨན་རྩིས་ཁང་གི་དྲ་རྒྱའི་ནང་དུ་ཀོ་ཝིཌ་ ༡༩ ནད་ལ་ཕན་པའི་ཁ་ཟས་དང་། སྨན་གྱི་ཐོ་གཞུང་། ཟུངས་གསོ་བའི་གསོ་རིག་ཐོན་དངོས་སྐོར། བླ་གཉན་ནད་ཡོད་པ་དང་ན་ཚོད་རྒན་གྲས་རྣམས་ཀྱིས་གཟབ་ནན་དགོས་པའི་སྐོར་གནས་ཚུལ་ཞིབ་གསལ་བཀོད་གནང་ཡོད། རྒྱ་གར་ནང་དུ་ Covid-19 ནད་པ་ཉིན་རེ་བཞིན་ཇེ་མང་འཕེལ་བཞིན་པའི་སྐབས་སུའང་སྨན་རྩིས་ཁང་གིས་འབྲེལ་ཡོད་ཨཱཡུཥ་ལྷན་ཁང་ལ་བོད་ཀྱི་གསོ་བ་རིག་པའི་སྒོ་ནས་གདེང་སྤོབས་ཆེན་པོས་སྨན་བཅོས་ཞབས་འདེགས་ཞུ་ཐུབ་པ་དང་ཞུ་ཆོག་པའི་ཕྱག་བྲིས་༢༠༢༠ ཟླ་ ༤ ཚེས་ ༤ དང་ ༨ སོ་སོར་ཕུལ་ཡོད། Covid-19 གཉན་རིམས་ཀྱི་དུས་སུ་སྨན་རྩིས་ཁང་ནས་ནད་པའི་དངོས་ཡོད་དཀའ་ངལ་སེལ་བར་ལས་གཞི་གལ་ཆེ་བསྒྲུབས་པ་འགའ་ཞིག་ཡོད།  ཡང་།  རྒྱ་གར་དཔོན་རིགས་ཤིག་ནས་ལྡི་ལི་སྐུ་ཚབ་དོན་གཅོད་མཆོག་ལ་བཀའ་མངགས་གནང་དོན་ལྟར་ ཟླ་ ༧ ཚེས་ ༡ ཉིན་རྒྱ་གར་འཕྲོད་བསྟེན་བློན་ཆེན་ Dr. Harsh Vardan མཚན་ཐོག་ཕྱག་བྲིས་ཕུལ་ཡོད།

རྒྱང་རིང་སྨན་པ་བསྟེན་གཏུགས་ (Tele-Consultation) ཀྱི་ཐབས་ལམ་ལག་བསྟར་གནང་བ།
            དེ་ཡང་བོད་ཀྱི་གསོ་རིག་ལུགས་ཀྱི་སྨན་བཅོས་ཞབས་ཞུ་གང་ལེགས་ཞུ་ཕྱིར་ཆེད་བཙུགས་གནང་བའི་ (MEET: Men-Tsee-Khang External Emergency Team) སྨན་རྩིས་ཁང་གི་ཕྱི་རོལ་ཛ་དྲག་ཚན་ཁག་ཅེས་པ་དེའི་བརྒྱུད་ནས། Covid-19 ནད་པ་དང་སྨན་པ་གཉིས་དངོས་སུ་ཐུག་འཕྲད་ཀྱི་གོ་སྐབས་མེད་པའི་སྐབས་བོད་སྨན་བསྟེན་འདོད་ཡོད་པའི་རིས་མེད་ནད་པ་སུ་ལའང་གསོ་རིག་སྨན་བཅོས་ཞབས་འདེགས་སྒྲུབ་པར་རྒྱང་རིང་སྨན་པ་བསྟེན་གཏུགས་ཀྱི་ཐབས་ལམ་ལག་བསྟར་གནང་བ་ནི། དམིགས་བསལ་རྒྱ་གར་དུ་མངའ་སྡེ་ ༡༧ ནང་ང་ཚོའི་ཡན་ལག་སྨན་ཁང་ ༢༧ གྱི་སྨན་པ་གྲངས་ ༥༢ ཡི་མཚན་དང་། ས་གནས། ལག་ཐོགས་ཁ་པར་ཨང་གྲངས་བཅས་འཁོད་པའི་གསལ་བསྒྲགས་སྤེལ་ནས་རྒྱང་རིང་སྨན་པ་བསྟེན་གཏུགས་ཀྱི་ཞབས་འདེགས་གང་ལེགས་ཞུས་དང་ཞུ་བཞིན་ཡོད། སྨན་པ་དེ་དག་ལ་སྔ་དྲོ་ཕྱག་ཚོད་ ༨ ནས་དགོང་དྲོ་ཆུ་ཚོད་ ༨ བར་ཉིན་ལྟར་ Covid-19  ནད་དང་འབྲེལ་བའི་སྨན་བཅོས་དང་དོགས་འདྲི་ཆེད་དུ་འབྲེལ་ལམ་ཞུ་ཆོག  གཞན་དུ་སྨན་རྩིས་ཁང་གི་ཡན་ལག་སྨན་ཁང་སྤྱི་ཡོངས་ནས་རྒྱུན་ལྡན་གྱི་ནད་པར་སྨན་བཅོས་ལྟ་རྟོག་ལས་གཞི་འགྲོ་མུས་ཡིན།

Covid-19 ལ་ཉམས་ཞིབ་ལས་གཞི།  

            སྨན་རྩིས་ཁང་ནས་གཉན་རིམས་འདི་ལ་བོད་སྨན་གྱི་ཕན་སྐྱེད་འབྱུང་ཚུལ་བདེན་དཔང་ར་སྤྲོད་ཐུབ་པའི་ཉམས་ཞིབ་ངེས་པར་དགོས་གལ་གཟིགས་ཡོད། དེའི་སླད་དུ་ Covid-19 ནད་པ་ཉམས་ཞིབ་འདིའི་ནང་མཉམ་ཞུགས་གནང་འདོད་ཡོད་པ་རྣམས་ལ་ནད་འདི་སེང་དྲག་མ་ཕྱིན་བར་དུ་བོད་རིགས་ལྟ་ཅི་རྒྱ་གར་ནད་པ་ལའང་སྨན་བཅོས་ཆ་ཚང་རིན་མེད་གནང་རྒྱུའི་མཐུན་རྐྱེན་སྦྱར་ཡོད། དེ་ལ་ཉམས་ཞིབ་ལ་དགོས་ངེས་ཀྱི་དོན་ཚན་བདུན་ཞིག་བཏོན་གནང་ཡོད་པ་དེ་ངེས་པར་ཚང་དགོས།  

ལུས་སེམས་ནུས་གསོའི་གསོལ་སྨན་མཐུན་འགྱུར། 

            བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ Covid-19 གཉན་རིམས་ཛ་དྲག་ངལ་སེལ་ཚོགས་ཆུང་གིས་ཟླ་ ༣ པའི་ཟླ་མཇུག་ཙམ་ནས་བོད་རིགས་འགྲུལ་པ་འགོག་དབྱེ་ཟུར་འཇོག་ཁང་དུ་བཞག་པ་རྣམས་དང་། རང་ལོ་ ༦༥ སོན་པའི་རྒན་གྲས། སྨན་ཞབས་པ་དང་འཕྲོད་ལས་པ་བཅས་ལ་ལུས་སེམས་ནུས་གསོའི་གསོལ་སྨན་རིན་མེད་བགོ་འགྲེམས་གནང་བཞིན་ཡོད་པའི་རིན་འབབ་ཐད། གསུམ་ཆ་གཉིས་བོད་མིའི་སྒྲིག་འཛུགས་དང་སུམ་ཆ་གཅིག་སྨན་རྩིས་ཁང་ནས་མཐུན་འགྱུར་གནང་བཞིན་ཡོད།

རྒྱལ་ས་དིལླིར་རྒྱ་གར་ཡུལ་མི་ Covid-19 ནད་པར་རིན་མེད་སྨན་བཅོས་ཞབས་ཞུ། 

            སྨན་རྩིས་ཁང་གི་ (MEET Team) ཕྱི་རོལ་ཛ་དྲག་ཚན་ཁག་གི་དང་ཐོག་སྨན་པ་གཉིས་དང་། སྨན་སྤྲོད་དང་ཁ་ལོ་བ་བཅས་ཡོད་པ་དེ་བཞིན་ཟླ་ ༧ པ་ནས་ ༡༠ ཟླ་བ་གསུམ་རིང་རྒྱ་གར་གྱི་རྒྱལ་ས་དིལླིར་རྒྱ་གར་ཡུལ་མི་ Covid-19 ནད་པ་གང་ཞིག་བོད་སྨན་བསྟེན་འདོད་ཡོད་པ་རྣམས་ལ་གཉན་རིམས་ནད་གཞི་ཕོག་པ་འདི་སེང་དྲག་མ་འགྱུར་བའི་བར་དུ་རིན་མེད་སྨན་བཅོས་ཞབས་འདེགས་ཞུ་དགོས་པ་གལ་ཆེན་ཡིན་པ་ལྟར་ཞུ་བཞིན་ཡོད། ལས་གཞི་འདི་ལ་ཕྱི་རྐྱེན་གང་ཅིར་དཀའ་ངལ་འཕྲད་སྲིད་པར་གདོང་ལེན་བྱེད་ཐབས་ཀྱི་གྲ་སྒྲིག་ཀྱང་སྔ་ས་ནས་བྱས་ཡོད། ང་ཚོའི་ལས་བྱེད་བཞུགས་གནས་ཁང་བདག་ནས་ཁང་གླ་མེད་པ་སླར་ཡང་ཞལ་བཞེས་གནང་སྟབས་ལྡི་ལི་ MEET ལས་གཞི་ཕྱི་ཟླ་ ༡༡ ཟླ་མཇུག་བར་མུ་མཐུད་རྒྱུ་ཡིན།

སྨན་རྩིས་མཐོ་སློབ་ཁང་གི་གནས་ཚུལ།
སྦེང་ལོར་སྨན་རྩིས་མཐོ་སློབ་ཁང་། 

            སྤྱི་ལོ་ ༢༠༡༦ ཟླ་ ༡༢ ཚེས་ ༡༤ རེས་གཟའ་ལྷག་དཀར་གྱི་ཉིན་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ཏཱ་ལའི་བླ་མའི་མཐོ་སློབ་ཀྱི་ཉེ་འགྲམ་དུ་སྨན་རྩིས་མཐོ་སློབ་ཁང་གི་རྨང་གཞིའི་རྡོ་ཆེན་ྋརྒྱལ་དབང་ྋསྐུ་ཕྲེང་བཅུ་བཞི་པ་ཆེན་པོ་མཆོག་ནས་འཛུགས་འཇོག་དང་འབྲེལ་བྱིན་འབེབས་ཐུགས་སྨོན་མཚམས་སྦྱོར་གྱི་བཀའ་དྲིན་བསྐྱངས་གནང་མཛད་པ་དང་། སྔ་ལོ་སྦེང་ལོར་སྨན་རྩིས་མཐོ་སློབ་གསར་རྒྱག་གི་ལས་གཞི་གྲུབ་ནས་འདི་ལོ་ཟླ་ ༣ ཚེས་ ༡ ཉིན་སྨན་རྩིས་མཐོ་སློབ་ལས་ཁུངས་དབུ་འབྱེད་ཞུས་ཡོད། ད་ལྟ་མཐོ་སློབ་དེར་སྨན་སློབ་སྐབས་ ༢༢ དང་ ༢༣  ལ་སློབ་མ་ཕོ་གྲངས་ ༢༢ དང་མོ་གྲངས་༢༥ བཅས་བསྡོམས་ ༤༧ དང་། དེ་བཞིན་རྩིས་སློབ་སྐབས་ ༡༢ དང་ ༡༣ བཅས་ལ་སློབ་མ་ཕོ་གྲངས་ ༩ དང་མོ་གྲངས་ ༡༤ བཅས་ ༢༣ ཡོད།  དེར་སྨན་རྩིས་དགེ་རྒན་དང་འཛིན་སྐྱོང་ལས་བྱེད་ཁྱོན་བསྡོམས་ ༢༩ ཡོད།  སྨན་རྩིས་མཐོ་སློབ་ཁང་དེ་བཞིན་མངའ་སྡེ་ AYUSH ལྷན་ཁང་ནས་ལམ་སྟོན་གནང་དོན་ལྟར་ཀརྣཱཊ་ཀ་མངའ་སྡེའི་རཱཇཱིབ་གཱཾདྷཱི་འཕྲོད་བསྟེན་ཚན་རིག་གི་གཙུག་ལག་སློབ་གཉེར་ཁང་གི་ (RGUHS: Rajiv Gandhi University of Health Sciences) འབྲེལ་ཁོངས་ངོས་ལེན་ཐོབ་ཐབས་བྱེད་མུས་ཡིན།  སྦེང་ལོར་དུ་ད་ལྟའི་ཆར་སྨན་རྩིས་མཐོ་སློབ་ཁང་དང་། དེ་བཞིན་སྐར་དཔྱད་རྩིས་རིག་སྡེ་ཚན། དེབ་འགོད་བྱེད་ཟིན་པའི་མཐོ་སློབ་ཀྱི་ནད་པ་བརྟག་དཔྱད་ཁང་ཞིག་ཀྱང་ཡོད། འབྱུང་འགྱུར་དབུས་ནས་ལུས་སེམས་སྲོག་དང་སེམས་ཁམས་འཕྲོད་བསྟེན་སྡེ་ཚན་གནས་སྤོས་ཞུ་འཆར་ཡོད།   སྦེང་ལོར་ཏཱ་ལའི་བླ་མའི་མཐོ་རིམ་སློབ་གཉེར་ཁང་གི་ལས་འཆར་དང་སྨན་རྩིས་ཁང་གི་ལས་འཆར་དང་།  རྡ་ས་བོད་ཀྱི་དཔེ་མཛོད་ཁང་གི་ལས་གཞི།  མངའ་སྡེ་དེར་གདན་ས་ཁག་ཡོད་སྟབས་ཐུགས་རེ་གནང་དོན་ལྟར་འབྲེལ་ཡོད་སྡེ་ཚན་ཚང་མར་དགེ་ཕན་ལྡན་པ་ཡོང་རྒྱུར་ཐེ་ཚོམ་མེད།

བཞུགས་སྒར་སྨན་རྩིས་མཐོ་སློབ་ཁང་།
            ད་ལྟ་སྨན་སློབ་སྐབས་ ༢༠ དང་ ༢༡ རྩིས་སློབ་སྐབས་ ༡༡ བཅས་ཁྱོན་སློབ་མ་ ༥༩ སློབ་གཉེར་བྱེད་མུས་ཡིན། སྨན་རྩིས་སློབ་མ་དེ་དག་བསླབ་པ་མཐར་སོན་མཚམས། བཞུགས་སྒར་སྨན་རྩིས་མཐོ་སློབ་ཁང་འདི་ཡོངས་སུ་བོད་རིགས་མ་ཡིན་པའི་སློབ་མ་རྣམས་ཀྱི་ཆེད་དུ་སྨན་པ་དཀའ་བཅུ་པའི་སློབ་གཉེར་བྱེད་ས་ཞིག་ཏུ་འགྱུར་རྒྱུ་ཡིན། ད་ལོ་ང་ཚོས་རྒྱལ་ཁབ་ཁག་ India, Russia, Mongolia, Taiwan, USA, Singapore, Germany, Kyrgyzstan  བཅས་ནས་བོད་ཀྱི་གསོ་བ་རིག་པར་དོན་གཉེར་ཡོད་པའི་སློབ་མ་ ༢༧ འདེམས་སྒྲུག་བྱས་ཟིན་པ་འདི་བོད་རིགས་མ་ཡིན་པའི་སྨན་སློབ་སྐབས་དང་པོ་དེ་ཆགས་ཡོད།

མ་ཎི་པུར་རྒྱལ་སྤྱིའི་གཙུག་ལག་སློབ་གཉེར་ཁང་དང་སྨན་རྩིས་ཁང་གཉིས་ཀྱི་བར་ཟུང་འབྲེལ་ལས་གཞི།
            འདི་ལོའི་ཟླ་ ༢ ཚེས་ ༡༢ ཉིན་ཚོགས་ཁང་འདི་ཉིད་ནང་དུ། རྒྱ་གར་བྱང་ཤར་ཁུལ་གྱི་མ་ཎི་པུར་མངའ་སྡེའི་མ་ཎི་པུར་རྒྱལ་སྤྱིའི་གཙུག་ལག་སློབ་གཉེར་ཁང་ Manipur International University (MIU) གི་རིགས་བདག་ Dr. Harikumar Pallathadka མཆོག་དང་། ངོས་སྨན་རྩིས་ཁང་གི་འགན་འཛིན་གཉིས་ཀྱི་དབར། སྒྲིག་འཛུགས་གཉིས་ནས་མོས་མཐུན་གན་ཡིག་ (MoU) སྟེ་མཉམ་སྦྲེལ་གྱི་གྲོས་མཐུན་དང་མཛའ་འབྲེལ་གྱི་ཆིངས་ཡིག་ལ་མཚན་རྟགས་བརྒྱབ་ཡོད། དེ་ནི་དོན་དངོས་ལ་ལོ་རྒྱུས་རང་བཞིན་ལྡན་པའི་བྱུང་བ་ཞིག་ཡིན། དེ་ཡང་མ་ཎི་པུར་རྒྱལ་སྤྱིའི་གཙུག་ལག་སློབ་གཉེར་ཁང་དུ་བོད་ཀྱི་སྨན་རྩིས་རིག་པའི་སློབ་གཉེར་ཚན་པ་ཞིག་གསར་འཛུགས་གནང་རྒྱུ་རེད་ལ། གཙུག་ལག་སློབ་ཁང་དེ་ནས་བོད་ཀྱི་གསོ་བ་རིག་པར་བསླབ་པ་མཐར་སོན་རྗེས་སྨན་པ་དཀའ་བཅུ་པ་དང་། སྨན་རམས་པའི་ལག་ཁྱེར་སྤྲད་རྒྱུ། དེ་བཞིན་ཉམས་ཞིབ་དང་། སྨན་སྦྱོར་ཁང་། སྐར་རྩིས་སྡེ་ཚན་སོགས་གསར་འཛུགས་བྱ་རྒྱུ་ངེས་ཡོད། དེའི་ཐོག་མ་ཎི་པུར་རྒྱལ་སྤྱིའི་གཙུག་ལག་སློབ་གཉེར་ཁང་ནས་ས་ཁྱོན་ཨེ་ཀར་ ༢,༥༠༠ དང་དཔལ་འབྱོར་འགྲོ་གྲོན་ཆ་ཚང་མཐུན་འགྱུར་གནང་རྒྱུ་ཡིན་པ་དང་། སྨན་རྩིས་ཁང་ནས་དེ་ལ་དམིགས་བསལ་ཆེད་ལས་མི་སྣ་མཐུན་འགྱུར་སྦྱར་རྒྱུ་ཐག་གཅོད་བྱུང་བ་རེད།  ང་ཚོ་སྒྲིག་འཛུགས་གཉིས་ཀྱི་ཐོག་མའི་འབྲེལ་བ་འབྱུང་སྟངས་ནི། གཙོ་བོ་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༧ ལོར་མ་ཎི་པུར་མངའ་སྡེའི་རྒྱལ་ས་ཨིམ་ཕཱལ་དུ་ཆིབས་བསྒྱུར་བཀའ་དྲིན་བསྐྱངས་སྐབས་གཙུག་ལག་སློབ་ཁང་དེ་དང་ཐོག་མར་འབྲེལ་བ་ཆགས་པ་ཞིག་ཡིན། དེ་རྗེས་ ༢༠༡༩ ཟླ་ ༥ ཚེས་ ༢༣ ཉིན་བཀའ་ཡིག་གནང་།  དེ་ནས་ངོས་སྨན་རྩིས་ཁང་འགན་འཛིན་སྔ་ལོ་ཕྱི་ཟླ་ ༡༡ ནང་དུ་ (MIU) འཛིན་སྐྱོང་འགོ་ཁྲིད་པ་དང་མཉམ་དུ་གྲོས་མོལ་ཆེད་དུ་དེ་གར་བཅར་བ་ཡིན། དེ་མཚུངས་འདི་ལོའི་ཟླ་ ༢ པའི་ནང་དུ་གཙུག་ལག་སློབ་གཉེར་ཁང་གི་རིགས་བདག་མཆོག་དང་འགོ་ལས་པ་འགའ་ཞིག་ཀྱང་སྨན་རྩིས་ཁང་དུ་ཕེབས་ཡོད། སྤྱིར་འདས་པའི་ལོ་དྲུག་བཅུ་ཙམ་གྱི་ནང་སྨན་རྩིས་ཁང་དང་རྒྱལ་སྤྱི་རྒྱལ་ནང་གི་ཚོགས་སྡེ་ཆེ་ཆུང་ཁག་དང་ཟུང་འབྲེལ་གྱི་ལས་གཞི་ཆེ་ཕྲ་མང་པོ་ཞིག་སྤེལ་ཐུབ་པ་བྱུང་ཡོད་ཀྱང་། ད་ཐེངས་ཀྱི་ཟུང་འབྲེལ་ལས་གཞི་འདི་ལྟ་བུ་གཞི་རྒྱ་ཆེ་ཞིང་ཕུགས་རྒྱང་རིང་པོའི་ཕན་ནུས་གདོན་ཐུབ་པ་དེ་སྔ་བྱུང་མྱོང་མེད།

ཡན་ལག་སྨན་ཁང་གསར་པ་དབུ་འབྱེད་ཞུས།   
            དེ་ནས་བར་སྐབས་ཟླ་ ༣ ཚེས་ ༡ ཉིན་མངའ་སྡེའི་རྒྱལ་ས་ཨིམ་ཕཱལ་དུ་ཡན་ལག་བརྟག་དཔྱད་སྨན་ཁང་གསར་པ་ཞིག་དབུ་འབྱེད་གནང་བ་རེད། ད་ལྟ་སྨན་རམས་པ་ཆོས་ཉིད་བསམ་གྲུབ་ལགས་ས་གནས་མི་མང་ལ་དངོས་སུ་བོད་ཀྱི་གསོ་རིག་སྨན་བཅོས་ཞབས་འདེགས་ཞུ་མུས་རེད།  Covid-19 ཛ་དྲག་ཆེ་བའི་དུས་སྐབས་སུའང་མ་ཎི་པུར་ས་གནས་མང་ཚོགས་ཀྱི་འཕྲོད་བསྟེན་གཅེས་སྲུང་ལ་དམིགས་ཏེ་མ་ཎི་པུར་ཡན་ལག་སྨན་ཁང་དང་མ་ཎི་པུར་རྒྱལ་སྤྱིའི་གཙུག་ལག་སློབ་གཉེར་ཁང་ཟུང་འབྲེལ་ཐོག་ཟླ་ ༧ ཚེས་ ༡༦ ནས་ཟླ་གཅིག་གི་རིང་རིན་མེད་ཐོག་བརྟག་དཔྱད་སྨན་བཅོས་དང་ཟས་སྤྱོད་སློབ་སྟོན་གྱི་ཞབས་འདེགས་གང་ལེགས་ཞུས་ཡོད།

ཕྱི་ནང་རྒྱལ་ཁབ་ཁག་ཏུ་སྨན་རྩིས་སྐོར་བསྐྱོད་ལས་རིམ།

ཕྱི་རྒྱལ་ཁག་ཏུ་སྐོར་བསྐྱོད་ལས་རིམ།

            ཤར་ནུབ་རྒྱལ་ཁབ་ཁག་ལ་སྨན་སྐོར་དང་གཏམ་བཤད། འགྲེམས་སྟོན། རིག་གཞུང་སྤེལ་རེས་བྱེད་རྒྱུ་ནི་བོད་ཀྱི་གསོ་བ་རིག་པ་དང་རྩིས་ཀྱི་རིག་པ་གཉིས་ཀྱི་བསྟན་པ་འཛམ་གླིང་ཡོངས་ལ་རྒྱས་ཐབས་དང་། སྨན་རྩིས་ཁང་ལ་དཔལ་འབྱོར་གྱི་རྒྱབ་རྟེན་འཚོལ་སྒྲུབ་ཀྱི་ཐབས་ཤེས་ཀྱི་ཆ་ཤས་གལ་ཆེན་ཞིག་ཡིན་པས་ངོས་ནས་སྨན་རྩིས་ཁང་གི་འགན་འཛིན་ལས་ཁུར་ལོ་དགུ་ཞུས་པའི་རིང་སྨན་རྩིས་པ་སྐོར་བསྐྱོད་ཀྱི་གྲངས་འབོར་དེ།  དེ་སྔའི་འགན་འཛིན་རིམ་པ་བཞི་ཡིས་ལོ་བཅོ་ལྔ་རིང་ལས་ལྡབ་བཞི་ཡི་མང་བ་བྱུང་ཡོད་ལ། 

ཕྱི་ལོ་ ༢༠༢༡ ཟླ་ ༤ ཙམ་ནས་ལོ་འཁོར་གཅིག་གི་ནང་དུ་ Europe, South America, South Africa, USA East Coast, USA West Coast, Australia, Lithuania, Russian Federation བཅས་ཡུལ་གྲུ་ཁག་གི་གྲོང་ཁྱེར་མང་དག་ཅིག་ལ་སྨན་རྩིས་སྐོར་བསྐྱོད་ཆེད་དུ་རུ་ཁག་བརྒྱད་ཀྱི་མི་འགྲོ་གཏན་ཁེལ་ཟིན་ཏེ་མཐོང་མཆན་ཝི་ས་སོགས་རག་ཐབས་ཀྱི་ལས་འགུལ་གང་མྱུར་བརྩམ་རྒྱུ་ཡིན།

རྒྱ་གར་ནང་དུ་སྐོར་བསྐྱོད་ལས་རིམ།  
            བོད་མིའི་སྒྲིག་འཛུགས་དཔལ་ལྡན་བཀའ་ཤག་ནས་ཕྱི་ལོ་ ༢༠༢༠ ནི་གཞུང་མང་གཉིས་ནས་ྋསྤྱི་ནོར་ྋགོང་ས་སྐྱབས་མགོན་ྋསྐུ་ཕྲེང་བཅུ་བཞི་པ་ཆེན་པོ་མཆོག་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་རྒྱུ་གསལ་བསྒྲགས་སྤེལ་གནང་ཡོད། འདི་ག་སྨན་རྩིས་ཁང་ནས་ཀྱང་རྩིས་ལོ་ ༢༠༢༠ འདི་ལྷ་ལྡན་སྨན་རྩིས་ཁང་དབུ་བརྙེས་ནས་ལོ་ངོ་ ༡༠༤ འཁོར་བའི་དུས་དྲན་མཚོན་ཆེད་དམིགས་བསལ་རྒྱ་གར་ནང་དུ་<<ལུས་བདེ་སེམས་སྐྱིད་>>ཅེས་པའི་བརྗོད་གཞི་ཐོག་རྒྱ་གར་ས་གནས་མང་ཚོགས་ལ་དམིགས་ཏེ་འཕྲོད་བསྟེན་ཞབས་འདེགས་སྐོར་བསྐྱོད་དང་། དེ་བཞིན་ྋགོང་ས་སྐྱབས་མགོན་ཐམས་ཅད་མཁྱེན་པ་མཆོག་ལ་ཐུགས་རྗེ་ཆེ་ཞུའི་མཛད་སྒོ་གཉིས་ལྷན་ཅིག་སྲུང་བརྩི་ཞུ་རྒྱུ་ཡིན། ང་ཚོས་གཏན་ཁེལ་ཟིན་པའི་རུ་ཁག་ ༡༣ ནས་ས་གནས་ Shimla, Bangalore, Mysore, Tawang, Jaigaon, Kolkata, Gangtok, Manipur, Mumbai, Ahmadabad, Jaipur, New Delhi, Chennai, Pondicherry, Ladakh, Secunderabad, Bhubaneswar, Dekyiling  བཅས་གྲོང་ཁྱེར་ ༡༨ ནང་དུ་བོད་ཀྱི་གསོ་བ་རིག་པའི་བརྟག་དཔྱད་སྨན་བཅོས་དང་། ངག་ཐོག་རྩིས་འབྲས་འདོན་པ། བོད་ཀྱི་སྨན་རྩིས་རིག་པའི་བརྗོད་བྱ་སྣ་ཚོགས་ཐོག་གཏམ་བཤད་དང་ཟབ་སྦྱོང་། སྨན་རྩིས་ཐོན་དངོས་ཀྱི་འགྲེམས་སྟོན་སོགས་ལས་རིམ་སྣ་མང་ལྡན་པའི་ཞབས་འདེགས་བསྒྲུབ་པར་གྲ་སྒྲིག་ཨང་གསར་གནས་ཡོད།

            སྨན་རྩིས་ཁང་གི་སྒྲིག་འཛུགས་འདི་ནི་ྋརྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་རྗེའི་གྲིབ་བསིལ་འོག་ཏུ་འཚར་ལོངས་བྱུང་བ་དང་། ད་ལྟའི་ཆར་སྨན་རྩིས་ཁང་གི་ཕྱིའི་སྣོད་ཀྱི་བཀོད་པའང་རྒྱ་སྐྱེད་འགྲོ་བཞིན་ཡོད། དེ་ཡང་ལོ་རེ་སྨན་རྩིས་གཉིས་ཀྱི་སློབ་མ་གསར་བསྡུ་ཐུབ་པའི་གནས་སྟངས་དང་། ལོ་ལྟར་སྨན་རྩིས་སློབ་མ་སློབ་ཐོན་བྱེད་བཞིན་པ། ལས་བྱེད་དང་ལས་མིའི་གྲངས་འབོར་སོགས་གནས་སྟངས་གང་ཅིར་བཟང་ཕྱོགས་ཀྱི་རྣམ་པ་མངོན་ཐུབ། ལྷག་པར་སྨན་རྩིས་ཁང་འཛིན་སྐྱོང་དང་ཆེད་ལས་པ་གཉིས་ཀར་འོས་འགན་དམིགས་བསལ་བ་རེ་ཡོད་གཤིས། འཛིན་སྐྱོང་ནི་མིག་ལྟ་བུ་ཡིན་ལ། སྨན་རྩིས་ཆེད་ལས་པ་ནི་ཡུལ་གྱི་ཕྱོགས་སུ་སོང་སྟེ་དངོས་སུ་བྱ་བ་བྱེད་མཁན་རྐང་པ་ལྟ་བུ་དེ་ཡིན། སྒྲིག་འཛུགས་ཤིག་གི་ནང་དུ་དེ་གཉིས་ནི་གཅིག་ལ་གཅིག་རྟེན་ཚུལ་དུ་གནས་ཡོད་པ་དང་། ལས་དོན་གང་ཞིག་གྲུབ་པའམ། ཡར་རྒྱས་གོང་འཕེལ་འགྲོ་བར་ནུས་པ་མཉམ་སྤུངས་དགོས་པ་ཚང་མས་དགོངས་པར་འཇགས་དགོས་པ་གལ་ཆེ། ད་ལྟའི་བར་དུ་སྨན་རྩིས་ཁང་གི་ལས་བྱེད་ལས་མི་སློབ་ཕྲུག་ཡོངས་ཀྱིས་རང་འགན་ངོས་ཟིན་པའི་སྒོ་ནས་བྱེད་སྒོ་སྒྲུབ་པ་བཞིན་འབྱུང་འགྱུར་ཡང་བག་མེད་ཀྱི་གནས་སུ་མ་སོང་བར་སྔར་ལྷག་ནུས་པ་མཉམ་རུབ་ཡོང་བའི་སྐུལ་འདེབས་ཞུ་རྒྱུ་ཡིན།

བཀའ་དྲིན་རྗེས་དྲན། 

            སྨན་རྩིས་ཁང་ནི་ྋརྒྱལ་དབང་ྋསྐུ་ཕྲེང་བཅུ་བཞི་པ་ཆེན་པོ་མཆོག་གིས་ཕྱག་བཏབ་ཅིང་། དུས་ནས་དུས་སུ་བཀའ་སློབ་ལམ་སྟོན་ཕེབས་པར་བརྟེན། ད་ལྟའི་ཆར་སྨན་རྩིས་ཁང་སྤྱིའི་གནས་སྟངས་ཡར་རྒྱས་གོང་འཕེལ་གྱི་རྣམ་པ་གསལ་པོ་ཡོད་ཀྱང་། བོད་ཀྱི་སྲོལ་རྒྱུན་གྱི་སྨན་རྩིས་རིག་པའི་ཤེས་བྱ་ཁོ་ནར་ཡིད་ཚིམ་ནས་མ་བསྡད་པར་ལུགས་གཞན་དང་འབྲེལ་འདྲིས་སྒོ་ནས་གསར་གཏོད་དགོས་པ་དང་། སྒྲིག་འཛུགས་འདི་ཉིད་གཞན་ལ་དངོས་སུ་ཞབས་འདེགས་ཞུ་མཁན་ཞིག་ཡིན་པའི་ཆ་ནས་སྨན་རྩིས་ཁང་རྒྱ་སྐྱེད་དགོས་པ་སོགས་ྋརྒྱལ་བའི་དགོངས་པ་སྒྲུབ་པར་ཕྱོགས་ཡོངས་ནས་འབད་བརྩོན་གནང་དགོས། སྨན་རྩིས་ཁང་ལ་ྋམགོན་པོ་གང་ཉིད་ཀྱི་བཀའ་དྲིན་ཤིན་ཏུ་ཆེ་ཞིང་།  ཐོག་མར་ཕྱག་བཏབ་པ་ནས་བཟུང་། བོད་ཀྱི་སྨན་རྩིས་རིག་པའི་སྐོར་རྒྱལ་སྤྱིའི་ནང་དུ་དྲིལ་བསྒྲགས་མཛད་པ་དང་། ཡར་རྒྱས་ཀྱི་རྣམ་པ་མངོན་གྱུར་བྱུང་སྐབས་བསྔགས་བརྗོད་དང་། འཐུས་ཤོར་འགྲོ་སྐབས་བཀའ་སློབ་ལྗིད་མོ་ཕེབས་སྟེ་མཛུབ་སྟོན་མཛད་པ་དང་། དགོས་མཁོ་ནམ་བྱུང་ལ་དཔལ་འབྱོར་མཐུན་འགྱུར་ཟམ་མ་ཆད་པ་བསྩལ་བ་སོགས་བཀའ་དྲིན་དཔག་མེད་བསྐྱངས་དང་སྐྱོང་བཞིན་པ་ལ་ང་ཚོ་སྨན་རྩིས་ཁང་གི་འགོ་ལས་ཡོངས་ནས་དུས་རྟག་ཏུ་ཐུགས་རྗེ་ཆེ་ཞུ་བ་དང་།  ངེད་ཅག་འགོ་མང་ཡོངས་ཀྱིས་བཀའ་དགོངས་ལམ་སྟོན་འགལ་མེད་སྙིང་བཅངས་རང་ནུས་ཅི་ཐུབ་ལྷག་བསམ་རྣམ་དག་ཧུར་བསྐྱེད་ཞུ་རྒྱུའི་དམ་བཅའ་འབུལ་རྒྱུ་ཡིན། 

སྨན་རྩིས་ཁང་གི་འགན་འཛིན་ནས་སྤྱི་ལོ་ ༢༠༢༠ ཟླ་ ༡༠ ཚེས་ ༡༧ ལ།།

འདིར་ནོན།   སྨན་རྩིས་ཁང་གི་འགན་འཛིན་གྱི་གསུངས་བཤད།  PDF

མཐའ་མའི་འདོན་ཐེངས་།: 23.10.2020 ཉིན། 9:52 AM