སྨན་རྩིས་ཁང་དུ་དཔལ་ལྡན་སྲིད་སྐྱོང་མཆོག་གི་འཚམས་གཟིགས།

ཕྱི་ལོ་ ༢༠༢༡ ཟླ་ ༧ ཚེས་ ༥ སྔ་དྲོ་བཞུགས་སྒར་སྨན་རྩིས་མཐོ་སློབ་ཚོགས་ཁང་དུ་བོད་མིའི་སྒྲིག་འཛུགས་ཀྱི་དཔལ་ལྡན་མི་རྗེ་སྲིད་སྐྱོང་སྤེན་པ་ཚེ་རིང་མཆོག་ཇི་ལྟར་གདན་ཞུས་ལྟར་དབུས་སྨན་རྩིས་ཁང་དུ་འཚམས་གཟིགས་སུ་ཕེབས་བསྟུན་སྨན་རྩིས་ཁང་གི་རིག་གཞུང་སྡེ་ཚན་ཁག་དང་འཛིན་སྐྱོང་སྡེ་ཚན་ཁག་གི་འགན་འཛིན་རྣམས་ནས་སྡེ་ཚན་སོ་སོའི་ངོ་སྤྲོད་སྙིང་བསྡུས་རེ་བྱས་སོང་།

དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྲིད་སྐྱོང་དམ་འབུལ་ཞུས་རྗེས་གཞུང་འབྲེལ་ཐོག་སྨན་རྩིས་ཁང་དུ་ཞབས་སོར་འཁོད་པ་ཐེངས་དང་པོ་དེ་ཆགས་ཡོད། དེ་ཉིན་གྱི་མཛད་སྒོའི་སྐུ་མགྲོན་གཙོ་བོ་དཔལ་ལྡན་མི་རྗེ་སྲིད་སྐྱོང་སྤེན་པ་ཚེ་རིང་མཆོག་དང་། དེ་བཞིན་སྐུ་ངོ་བཀའ་དྲུང་ཚེ་རྒྱལ་མཆོག  སྨན་རྩིས་ཁང་གི་འགན་འཛིན་བཀྲིས་ཚེ་རིང་མཆོག ྋསྐུ་བཅར་སྨན་རམས་པ། གསར་འགོད་པ་རྣམ་པ། སྨན་རྩིས་ཁང་གི་སྨན་རྩིས་པ་དང་། ལས་སློབ། ལས་མི་བཅས་ཁྱོན་ཚོགས་མི་བརྒྱ་སྐོར་ཙམ་ས་གནས་སྲིད་གཞུང་གི་བཀའ་ཁྱབ་ལྟར་ཁ་རས་གྱོན་ཞིང་ཁྲིམས་མཐུན་ཐོག་ལྷན་འཛོམས་གནང་ཡོད།

ཐོག་མར་སྨན་རྩིས་ཁང་གི་དྲུང་ཆེ་ལས་ཚབ་དང་། དྲུང་ཆེ་ལས་རོགས། ྋསྐུ་བཅར་སྨན་རམས་པ། དེ་བཞིན་སྡེ་ཚན་ཁག་གི་འགན་འཛིན། ལས་བྱེད་རྣམས་ནས་དཔལ་ལྡན་སྲིད་སྐྱོང་མཆོག་ལ་ཕེབས་བསུའི་འཚམ་འདྲི་མཇལ་དར་ཕུལ།

དེ་ནས་སྨན་རྩིས་ཁང་གི་འགན་འཛིན་མཆོག་གི་གསུང་བཤད་གནང་དོན།  “སྐུ་ངོ་མཆོག་སྲིད་སྐྱོང་ལ་ཕེབས་ཏེ་དེ་རིང་ཆིབས་བསྒྱུར་ཐེངས་དང་པོ་གནང་བར་ངས་སྨན་རྩིས་ཁང་གི་འགོ་ལས་གྲངས་ ༨༨༥ ཡོངས་ཀྱི་ཚབ་ཞུས་ཏེ་འཚམ་འདྲི་བཀྲིས་བདེ་ལེགས་ཞུ་རྒྱུ་ཡིན། སྲིད་སྐྱོང་མཆོག་གི་ད་ལྟ་ཕྱག་རོགས་བཀའ་བློན་རྣམ་པ་མཛད་འགན་བཞེས་མ་ཐུབ་པའི་སྐབས་འདིར། སྲིད་སྐྱོང་མི་གཅིག་གི་ཐོག་ལ་བབ་ཡོད་དུས་ལུས་སེམས་ངལ་བ་ཇི་ཙམ་ཡོད་པ་ང་ཚོ་ཚང་མས་ཚོད་དཔག་གནང་ཐུབ་ཀྱི་རེད། ད་ལྟ་སྐུ་ངོ་སྲིད་སྐྱོང་མཛད་བྲེལ་ཧ་ཅང་ཆེ་བ་ཡོད་པའི་དུས། སྨན་རྩིས་ཁང་ནས་དུས་ཡུན་རིང་པོ་མ་འགོར་བར་གང་མདོར་བསྡུས་གནང་རྒྱུ་ཡིན།   སྤྱིར་སྐུ་ངོ་དྷ་སར་ལོ་མང་བཞུགས་མྱོང་ཡོད་པ་དང་། སྨན་རྩིས་ཁང་སྤྱི་ཡོངས་ཀྱི་ཕྱག་ལས་རྣམས་མཁྱེན་བཞིན་ཡོད།  འོན་ཀྱང་དེ་རིང་ང་ཚོའི་སྡེ་ཚན་སོ་སོའི་ལས་ཀའི་ངོ་བོ་ཙམ་ངོ་སྤྲོད་ཞུ་རྒྱུ།” ཞེས་གསུངས། འགན་འཛིན་མཆོག་གི་མུ་མཐུད་ནས་གསུངས་གསལ། “སྐུ་ངོ་དེ་སྔ་སྲིད་སྐྱོང་འོས་མིར་བཞེངས་པའི་སྐབས་ནས་རྒྱ་ནད་ཀོ་ཝིཌ་ ༡༩ རྐྱེན་གྱིས་མང་ཚོགས་ཀྱི་འཕྲོད་བསྟེན་ལ་དགོངས་པ་ཆེ་བཞེས་གནང་སྟེ། ས་གནས་སོ་སོར་མ་ཕེབས་པར་དྲ་ཐོག་རང་ནས་མཛད་འཆར་བཀའ་སློབ་གནང་བའི་བརྒྱུད་རིམ་དེ་ལ་ཐུགས་རྗེ་ཆེ་ཞུ་རྒྱུ་ཡིན། དེ་མཚུངས་ཕྱི་ལོ་ ༢༠༢༡ ཟླ་ ༥ ཚེས་ ༢༧ སྔ་དྲོ་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་མདུན་ནས་ལས་ཁུར་དང་གསང་རྒྱའི་དམ་འབུལ་ཞུས་པ་དང་། དེ་ནས་སྲིད་སྐྱོང་གསར་རྙིང་བར་བཀའ་དམ་སྲིད་ཞི་སྡེ་བརྒྱད་མ་རྩིས་འབུལ་རྩིས་བཞེས་གནང་སྟངས། དེ་དུས་ྋགོང་ས་མཆོག་དྲ་ཐོག་ཕེབས་ཏེ་ཐུགས་ཞིབ་ཇི་ལྟར་གནང་བ་དེ་ལ་ང་རང་མཚོན་ན་ཚོར་བ་ཡག་པོ་བྱུང་སོང་། དེ་ནས་སྲིད་སྐྱོང་མཆོག་དམ་འབུལ་མ་དེབ་ཏུ་མཚན་རྟགས་གནང་བ་དེ་ཡང་བང་སྒྲིག་པོ་དང་། དམིགས་བསལ་ྋརྒྱལ་དབང་ྋསྐུ་ཕྲེང་བཅུ་བཞི་པ་ཆེན་པོ་མཆོག་དྲ་ཐོག་ཏུ་ཆིབས་བསྒྱུར་བསྐྱངས་ཏེ་སྲིད་སྐྱོང་གསར་རྙིང་ལ་འཚམ་འདྲི་དང་ཐུགས་རྗེ་ཆེ་ཞུས་པའི་བཀའ་སློབ་གནང་བ། དེའི་རྗེས་སུ་སྐུ་ངོ་སྲིད་སྐྱོང་མཆོག་གི་ཕྱག་ལས་བང་སྒྲིག་ཚུལ་སོགས་ལ་ཡི་རངས་བསྔགས་བརྗོད་དང་ཐུགས་རྗེ་ཆེ།”ཞེས་ཞུས་སོང་།

དེ་རྗེས་གཤམ་གསལ་སྨན་རྩིས་ཁང་གི་རིག་གཞུང་སྡེ་ཚན་ཁག་སྟེ། དྷ་ས་དང་སྦེང་ལོར་སྨན་རྩིས་མཐོ་སློབ་སྡེ་ཚན་དང་། སྨན་སྦྱོར་སྡེ་ཚན། སྐར་དཔྱད་རྩིས་རིག་སྡེ་ཚན། སྔོ་སྦྱོར་ཉམས་ཞིབ་སྡེ་ཚན། སྨན་རྫས་ཉམས་ཞིབ་སྡེ་ཚན། ཉམས་ཞིབ་སྡེ་ཚན། དཔེ་དེབ་ཞིབ་འཇུག་དང་པར་སྐྲུན་སྡེ་ཚན། དེ་ནས་ཅོན་ཏ་ར་ནས་དཔེ་ཐོག་ཞིབ་འཇུག་དང་པར་སྐྲུན་སྡེ་ཚན་དང་། སྨན་རྩིས་ཁང་གི་རྒྱ་ཡིག་སྡེ་ཚན། སྨན་རྩིས་ཁང་པར་སྐྲུན་དང་ཚོང་འབྲེལ་སྡེ་ཚན། ཅོན་ཏ་ར་གསོ་བ་རིག་པ་སློབ་གཉེར་དང་ཞིབ་འཇུག་སྡེ་ཚན། བདེ་སྐྱིད་གླིང་གསོ་བ་རིག་པ་སློབ་གཉེར་དང་ཞིབ་འཇུག་ཁང་བཅས་ཡིན། དེ་བཞིན་སྤུས་ཚད་སྟངས་འཛིན་སྡེ་ཚན་དང་། སྔོ་སྨན་འདེབས་ལས་སྡེ་ཚན། སྐར་རྩིས་སྐོར་སྐྱོད་དང་རྒྱ་སྐྱེད་སྡེ་ཚན། ཐད་སྤྱོད་སྨན་གྱི་སྡེ་ཚན། སེམས་ཁམས་འཕྲོད་བསྟེན་སྡེ་ཚན་བཅས་ཀྱིས་སྡེ་ཚན་སོ་སོའི་ངོ་སྤྲོད་སྙིང་བསྡུས་རེ་གནང་།

དེ་བཞིན་སྨན་རྩིས་ཁང་གི་འཛིན་སྐྱོང་སྡེ་ཚན་ཁོངས་ནས། དྲུང་ཆེ་ལས་རོགས་འཛིན་སྐྱོང་ཁོངས་ཀྱི་ཚན་པ་ཁག་དང་། དེ་ནས་དབུས་ཡན་ལག་སྡེ་ཚན། དངུལ་རྩིས་སྡེ་ཚན། ནང་ཞིབ་སྡེ་ཚན། མི་ཤུགས་གོང་འཕེལ་སྡེ་ཚན། སྨན་མཛོད་དང་སྨན་ཚོང་སྡེ་ཚན། རྒྱ་སྐྱེད་དང་སྐོར་སྐྱོད་སྡེ་ཚན། Job Pool སྡེ་ཚན་བཅས་ནས་ཀྱང་ངོ་སྤྲོད་གནང་སོང་།

མཐར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་བའི་ནང་དུ་སྨན་རྩིས་ཁང་དང་འབྲེལ་བའི་སྐོར་གསུངས་དོན་དུ། “ད་བར་སྨན་རྩིས་ཁང་ཡར་རྒྱས་ཇི་ཙམ་ཕྱིན་ཡོད་མིན་དེ་རིང་གི་ལས་བསྡོམས་སྙིང་བསྡུས་དེ་རང་ནས་སྡེ་ཚན་སོ་སོའི་སྐོར་གོ་ཡོང་དུས་བོད་མིའི་སྒྲིག་འཛུགས་ལས་སྨན་རྩིས་ཁང་རྒྱ་ཆེ་བ་འདུག་བསམ་པ་བྱུང་། སྤྱི་ཡོངས་ནས་ནད་པའི་ལུས་སེམས་ལ་ཕན་ཐོགས་ཡོད་པ་མ་ཟད་སྒྲིག་འཛུགས་རང་ནས་ལས་བྱེད་ ༨༨༥ ལ་ཕྱག་ལས་གནང་ཡོད་པ་དང་འཚོ་བའི་མདུན་ལམ་ལ་ཐུགས་ཕན་གསོས་ཡོད་པ་དེས་ཕན་ཐོགས་ཆེན་པོ་གྲུབ་ཡོད། ” ཅེས་གསུངས། ལྷག་པར་སྲིད་སྐྱོང་མཆོག་གིས་མུ་མཐུད་ནས་གསུངས་པ། “  སྨན་རྩིས་ཁང་ལ་ངའི་ངོས་ནས་བསམ་ཚུལ་ཡོད་པ་དེ་སྔ་མ་ནས་སྨན་སྦྱོར་དང་འབྲེལ་བའི་སྐོར་ཡིན། སྤྱིར་རྣམ་པ་ཚོས་སྨན་དང་རྩིས་ཀྱི་གཞུང་བཤད་སློབ་ཁྲིད་དང་། ནད་པ་བརྟག་དཔྱད་སོགས་ཧུར་ཐག་གནང་བ་ལ་བརྟེན་ནས་སྒྲིག་འཛུགས་ཁོ་རང་འཕེལ་རྒྱན་ཕྱིན་ཡོད་པ་གསལ་པོ་ཆགས་ཡོད། མ་འོངས་པར་སྨན་པ་མང་པོ་ཡོད་ཀྱང་སྤྲོད་རྒྱུའི་སྨན་མེད་པ་ཡིན་ན་བྱེད་ཐབས་གང་ཡང་མེད་སྟབས།  སྔོ་སྨན་འདེབས་ལས་ཐད་ད་ལྟ་ལས་བསྡོམས་ནང་གསལ་བ་བཞིན་འགོ་འཛུགས་ཟིན་ཙམ་ཡིན་ས་རེད། དེ་ཚོ་ལོ་བཅུ་བཅོ་ལྔ་སྔོན་ལ་འགོ་ཚུགས་པ་ཞིག་དགོས་ཡོད། གང་ལྟར་མ་འོངས་པར་སྨན་རྩ་འདེབས་ལས་ལ་སོགས་པའི་སྨན་སྦྱོར་རྒྱུ་ཆ་ཚད་ལྡན་དགོས་པ་དང་། དེའི་ཆེད་དུ་ད་ལྟ་ནས་གོམ་པ་ཆེན་པོ་ཞིག་རྒྱག་དགོས།  རྒྱ་གར་རྒྱ་གཏིང་དང་ཚ་བའི་ལུང་པར་འདེབས་འོས་པ་ཡིན་ན་ང་ཚོ་བོད་པའི་གཞིས་ཆགས་ཁག་ཏུ་སྨན་རྩ་འདེབས་ལས་ཀྱི་ཞིང་ཁའི་དཀའ་ངལ་གང་ཡང་མེད། འདིའི་ཐད་བོད་མིའི་སྒྲིག་འཛུགས་ངོས་ནས་དགོས་མཁོའི་མཐུན་རྐྱེན་སྦྱར་ཆོག་གི་རེད།  དེ་དང་ཚན་རིག་དང་མཐུན་པའི་ཉམས་ཞིབ་བྱེད་ཐབས་ཀྱི་དོན་ཚན་དེ་གཉིས་ཐོག་ཤུགས་རྒྱག་ཐུབ་པ་ཡིན་ན་ཕན་ཐོགས་ཡོད་རེད་བསམ་གྱི་འདུག” “ཁ་སང་ཉིན་གཉིས་རིང་དིལླི་ཕྱིན་པའི་སྐབས་གནད་ཡོད་དཔོན་རིགས་ཚོར་མཇལ་བ་ཡིན། དེ་དང་མཉམ་དུ་ཕྱི་སྲིད་ལས་ཁུངས་སུ་ཨཱཡུཥ་སྐོར་ཞུ་རྒྱུ་བྱུང་། དེ་ཡང་སྨན་རྩིས་ཁང་ལ་ཆེ་མཐོང་དགོས་པ་དང་རྒྱ་གར་གཞུང་གི་ངོས་ནས་རྒྱ་སྐྱེད་གཏོང་བ་དང་མཐུན་རྐྱེན་སྦྱོར་སྤྲོད་དགོས་པ་ཞུས་པའི་སྐབས་ཁོང་ཚོས་དེའི་ཐོག་ཏན་ཏན་བསམ་ཞིབ་བྱེད་ཆོག་གསུངས་བྱུང་། སྤྱིར་སྨན་རྩིས་ཁང་ནས་དེའི་ཐོག་སྐུ་ངལ་མ་བསྐྱོན་པ་མ་རེད་ཀྱང་བོད་མིའི་སྒྲིག་འཛུགས་ངོས་ནས་སྨན་རྩིས་ཁང་འདི་ཨཱཡུཥ་ཁྱབ་ཁོངས་གནས་སྟངས་ཆགས་པའི་འོག་ནས་རྒྱ་གར་གཞུང་གིས་གཟིགས་སྐྱོང་དང་། མཐུན་རྐྱེན། གོ་སྐབས་གཅིག་མཚུངས་ཤིག་གནང་དགོས་པ་ཞུས་ཡོད། མ་འོངས་པར་དེ་ལྟ་བུ་ཞུ་དགོས་འབྱུང་ན་སྨན་རྩིས་ཁང་འགན་འཁྱེར་མཁན་མཉམ་དུ་བཀའ་མོལ་ཞུས་རྗེས་བྱེ་བྲག་གང་གི་ཐོག་ལ་རོགས་པ་དགོས་པ་ཡིག་ཐོག་ཕུལ་ནས་རིམ་པས་དེ་དག་མངོན་དུ་གྱུར་ཐབས་འབད་བརྩོན་གནང་གི་ཡིན།” ཞེས་དང་། གཞན་ཡང་སྨན་རྩིས་ཁང་གི་འགན་འཛིན་མཆོག་གི་སྐོར་ལ་གསུངས་དོན། “ད་བར་སྨན་རྩིས་ཁང་དུ་འགན་འཛིན་རབ་དང་རིམ་པ་ཕེབས་ཡོད། ད་ལྟའི་འགན་འཛིན་ཚེ་རིང་བཀྲིས་ལགས་ཡིན་ན་ལོ་གང་འཚམ་འདིར་བཞུགས་ཡོད། མཚམས་རེ་མཁྲེགས་པོ་ཡོད་ཀྱང་ལས་དོན་ཐོག་ལ་འཕྱུགས་མེད། དེ་སྔའི་སྨན་རྩིས་ཁང་འགན་འཛིན་མང་པོས་ཨའུ་ཙི་སྡུག་པོ་དེ་འདྲ་བཏང་ཡོད། ཉེ་བའི་ཆར་སྨན་རྩིས་ཁང་སྐོར་ལ་གཅིག་དང་གཉིས་ཞེས་གོ་རྒྱུ་མེད་པ་དེ་ལེགས་པའི་ཆ་རེད། འཛིན་སྐྱོང་འགྲོ་སྟངས་སོགས་འདོད་པ་ཁེངས་པོ་ཡོད་པའི་རྣམ་པ་བཟོ་འདྲ་འདུག འོན་ཀྱང་སྔོག་ན་གང་ཡོད་མི་ཤེས།” ཞེས་གསུངས།

སྲིད་སྐྱོང་མཆོག་ནས་ད་ལྟའི་གནས་སྟངས་སྐོར་ལ་དུས་ཚོད་འདང་མིན་གྱི་དཀའ་ངལ་ཕྲན་བུ་ཙམ་ཡོད་པ་མ་གཏོགས་ལུས་སེམས་དང་ལས་ཀ་བྱེད་ཡག་ལ་དཀའ་ངལ་གང་ཡང་མེད་སྐོར། དེ་བཞིན་ད་ལྟ་ཕྱག་ལས་གནང་བཞིན་པའི་སྐོར། ལྷག་པར་ཁོང་གིས་གསུངས་དོན། “བོད་རྒྱའི་དཀའ་ངལ་སེལ་ཐབས་ཐོག་བཀའ་ཤག་སྐབས་ ༡༦ པའི་ལངས་ཕྱོགས་གཙོ་བོ་དེ་ྋརྒྱལ་བ་རིན་པོ་ཆེའི་དགོངས་པ་གང་ཡོད་དེ་ཉིད་གཞིར་བཞག་ནས་ཡོང་དགོས། དེ་དང་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་སྲིད་བྱུས་དབུ་མའི་ལམ་གཞིར་བཞག་ཐོག་འགྲོ་དགོས། རྒྱ་ནག་ང་ཚོའི་ཁ་གཏད་ཆགས་ཡོད་ཀྱང་སྐད་ཆ་མ་བཤད་དབར་དུ་བོད་པའི་དཀའ་རྙོག་སེལ་ཐབས་མེད་པ་དེ་གསལ་པོ་རེད། དེ་བོད་པ་ཚང་མས་ཤེས་དགོས།” ཞེས་དང་།  དེ་བཞིན་གསུང་བཤད་འདིའི་ནང་དུ་གཤམ་གསལ་ནང་དོན་ཁག་གི་སྐོར་གསུངས་པ་ནི།  ྋགོང་ས་ྋསྐྱབས་མགོན་ཆེན་པོ་མཆོག་རྒྱ་ནག་རི་བོ་རྩེ་ལྔ་ལ་གནས་མཇལ་བསྐྱོད་ཐུབ་པའི་ཐུགས་རེ་དང་། དེ་བཞིན་ྋསྐུའི་འཁྲུངས་ཡུལ་སྟག་འཚེར་དང་། ལྷ་ས་ལའང་ཆིབས་སྒྱུར་གནང་ཐུབ་རྒྱུའི་ཐུགས་དགོངས་བཞེས་བཞིན་ཡོད་སྐོར། བཙན་བྱོལ་བ་རྣམས་ཚད་ལྡན་མགྲིན་ཚབ་པ་ཡོང་བའི་ཆེད་བོད་ནས་གནས་ཚུལ་མཁོ་སྒྲུབ་བྱེད་དགོས་ཚུལ། བཙན་བྱོལ་བོད་མིའི་སྤྱི་ཚོགས་སྲ་བརྟན་གནས་དགོས་པའི་སྐོར། གཞོན་སྐྱེས་ཚོས་དྭང་བླངས་སྒོ་ནས་བོད་དོན་ཐོག་ཕྱག་ལས་གནང་རྒྱུའི་གོ་སྐབས་ཡོད་སྐོར། བོད་རྒྱ་གྲོས་མོལ་གྱི་སྒྲོམ་གཞི་གསར་བཟོ་བྱས་པའི་སྐོར། བཙན་བྱོལ་བོད་མིའི་གྲངས་ཐོ་ཚད་ལྡན་བསྡུ་རུབ་བྱ་འཆར་སྐོར། མ་འོངས་གནས་སྟངས་ལ་གཞིགས་པའི་གཞིས་ཆགས་ཆེ་ཆུང་ཟླ་སྒྲིལ་གཏོང་ཐབས་སྐོར་དང་། དེ་བཞིན་སློབ་གྲྭ་ཁག་ཟླ་སྒྲིལ་གཏོང་ཐབས་སྐོར། ད་ལྟའི་བཙན་བྱོལ་བོད་མིའི་ཏོག་དབྱིབས་གཉན་རིམས་ ༡༩ དང་སྔོན་འགོག་སྨན་ཁབ་རྒྱག་ཟིན་པའི་གནས་སྟངས་སྐོར། ད་བར་ལྷན་ཁང་སོ་སོར་ཡིག་མཛོད་ཡོད་པ་དེ་དག་ཤོག་མེད་ E-Governance བཟོ་དགོས་པ་གལ་ཆེན་ཡིན་སྐོར། སྒྲིག་འཛུགས་སོགས་ལ་དཀའ་ངལ་འཕྲད་སྐབས་གདོང་ལེན་བྱ་ཐབས་སྐོར། ཆོལ་ཁ་སོ་སོའི་ལོ་རྒྱུས་ཤེས་དགོས་པའི་སྐོར་སོགས་རྒྱས་པར་གསུངས་གནང་བ་གཤམ་གསལ་སྦྲེལ་ཐག་སོ་སོར་ནོན་ན་གསུང་བཤད་ཆ་ཚང་གསན་ཐུབ་པ་ཡིན།།

འདིར་ནོན།   སྨན་རྩིས་ཁང་གི་འགན་འཛིན་མཆོག་གི་གསུང་བཤད་གསན།

འདིར་ནོན།   དཔལ་ལྡན་མི་རྗེ་སྲིད་སྐྱོང་སྤེན་པ་ཚེ་རིང་མཆོག་གི་གསུང་བཤད་ཆ་ཚང་གསན།