སྦྱོར་བ་བརྒྱ་པ།

༄༅། །རྒྱ་གར་སྐད་དུ། ཡོག་ཤཏཀ   བོད་སྐད་དུ། སྦྱོར་བ་བརྒྱ་པ།

          སངས་རྒྱས་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་ལ་ཕྱག་འཚལ་ལོ།། འཕགས་པ་ཀླུ་སྒྲུབ་ལ་ཕྱག་འཚལ་ལོ།། རིང་དུ་གྲགས་པའི་གསོ་དཔྱད་ནས།། མཐའ་ཡས་རྒྱུད་ཀྱི་གཅེས་པ་བླངས།། སྨན་པ་མཁས་པར་རབ་མཆོད་པའི།། སྦྱོར་བ་བརྒྱ་ཡིས་བཅིང་བར་བྱ།། བདུད་རྩི་ལྟ་བུའི་སྨན་སྦྱོར་གྱིས།། ལུས་ནི་ནད་མེད་འགྱུར་བ་ཡིན།། གསོ་དཔྱད་ཤེས་པའི་སྨན་པ་ཡིས།། ནད་རྒྱུ་མཚན་ཉིད་ཡོངས་སུ་བརྟག། སླེ་ཏྲེས་གླ་སྒང་བྱི་ཚེར་བཅའ་སྒ་དང་།། བྱི་ཚེར་གླ་སྒང་ཏིག་ཏ་པརྤཏ།། བ་ཤ་ཀ་བྱི་ཚེར་བཅའ་སྒ་གླ་སྒང་རྣམས།། བསྐོལ་ཐང་བད་ཀན་རིམས་ལ་བཏུང་།། ཀྵུ་ཏྲ་སླེ་ཏྲེས་བཅའ་སྒ་པུཥྐརོ།། བསྐོལ་བའི་ཐང་བྱས་བད་ཀན་རླུང་མཆོག་ལ།། ལུད་པ་དབུགས་མི་བཅས་དང་ག་མེད།། གཞོགས་གཟེར་ཉེས་གསུམ་ལ་བྱུང་རིམས་ལའང་བསྔགས།། དོང་ག་དྲོད་སྨན་ནར་རྩ་གླ་སྒང་དང་།། ཧོང་ལེན་ཨ་རུ་ར་རྣམས་བསྐོལ་བའི་ཐང་།། གཟེར་བཅས་ཚད་འཁྲུ་བད་རླུང་ལྡན་རིམས་ལ།། ཕན་ནོ་དྲོད་སྐྱེད་བཞུ་བ་བྱས་པས་ཀྱང་།། རྒུན་འབྲུམ་གླ་སྒང་ཧོང་ལེན་ཨ་རུ་ར།། དོང་ག་པརྤ་ཏ་ཀའི་ཐང་བྱས་ལ།། མཁྲིས་བྱུང་རིམས་དང་བླ་འཆོལ་བརྒྱལ་བ་དང་།། མགོ་འཁོར་ཚ་སྐམ་སྐོམ་དད་ལྡན་རྣམས་ཕན།། ཀཎྜ་ཀ་རི་བཅའ་སྒ་སླེ་ཏྲེས་བསྐོལ།།  དྲོད་སྨན་ནར་མོ་བསྲེས་པའི་ཐང་འཐུངས་པས།། གསུས་གཟེར་ལུད་པ་ཚད་རྙིང་དང་ག་མེད།། ཕོ་བའི་ནད་ཆམ་དབུགས་མི་བདེ་རྣམས་འཇོམས།། བྱི་ཚེར་པརྤ་ཏ་ཀཨ་རུ་ར།། བ་ཤཧོང་ལེན་ཏིག་ཏ་པྲི་ཡངྐུ།། ཀ་ར་ཆེར་བཏབ་བསྐོལ་བའི་ཐང་འཐུངས་པས།། སྐོམ་དང་ཁྲག་མཁྲིས་རིམས་དང་ཚད་ལྡན་འཇོམས།། རིམས་ནད་གསོ་བའི་དཔྱད་དོ།།

          སྐྱེར་རྩ་འབྲས་བུ་གསུམ་དང་བཱི་ཤཱ་ལ།། སྐྱེར་རྩ་ཕྱེ་མར་བྱས་ལ་ངེས་པར་བསྐོལ།། ཐང་ལ་སྦྲང་རྩི་ལྡན་པ་འཐུངས་པ་ཡིས།། གཅིན་ཁ་སྙི་བའི་ནད་སྐྱེས་མ་ལུས་འཇོམས།། ཨུ་དི་ཅྱ་དང་ཀ་བེད་བོང་ང་དཀར།། གླ་སྒང་དུག་མོ་ཉུང་བཅས་ཐང་བྱས་པ།། ཚད་པ་གཟེར་བཅས་ཁྲག་འཁྲུ་དང་བཅས་པ།། ཡུང་རིངས་ཞུགས་པའི་འཁྲུ་བ་རྣམས་ལ་ཕན།། གླ་སྒང་བཅའ་སྒ་བོང་ང་དཀར་པོ་བཅས།། སླེ་ཏྲེས་ཆ་སྙོམས་ཆུ་ལ་བསྐོལ་འཐུངས་པས།། མེ་དྲོད་ཞན་པའི་རྒྱུན་གྱི་ནད་རྣམས་དང་།། ཚད་ཟིན་འཁྲུ་བའི་ནད་ཀྱང་སེལ་བར་འགྱུར།། ལྤགས་ནད་ལྟོ་བ་ན་དང་སྐྱ་རྦབ་ནད།། སྦོས་དང་ཆམ་པ་བད་ཀན་མགུལ་འགགས་ལ།། པུརྞ་རྣ་བ་ཐང་ཤིང་ཨ་རུ་ར།། སླེ་ཏྲེས་བ་གཅིན་གུ་གུལ་ལྡན་པ་བཏུང་།། གླ་སྒང་ཤི་ཀྲུ་ཐང་ཤིང་དནྟྰི་འབྲས།། བྱི་དང་དྲོད་སྨན་ནར་ཕྱེ་བཅས་ཐང་གིས།། རྒྱུན་དུ་ཁ་རྐུབ་ནས་འབྱུང་སྲིན་བུ་དང་།། སྲིན་ལས་སྐྱེས་པའི་ནད་ཀྱང་འཇོམས་པར་འགྱུར།། སུཀྵྨེ་དྲོད་སྨན་ཤིང་མངར་ན་ལེ་ཤམ།། ཨསྨབྷེ་དང་ཨེརཎ་བ་ཤ་གཟེ།། བྲག་ཞུན་གཙོ་ཆེར་བསྐོལ་བའི་ཐང་འཐུངས་ན།། རྡེའུ་གསེག་མ་དང་བཅས་གཅིན་སྲི་སེལ།། བྲག་ཞུན་ཨསྨབྷེ་དང་སུཀྵྨེ་དང་།། དྲོད་སྨན་ཕྱེ་མ་འབྲས་བཀྲུས་ཆུ་བཏབ་བཏུང་།། ཡང་ན་བུ་རོམ་དང་བཅས་འཐུངས་གྱུར་ན།། གཅིན་སྲི་འཆི་ལ་ཐུག་པའང་འཚོ་བར་འགྱུར།། དོང་ག་དང་ནི་གཟེ་མ་ཨ་རུ་ར།། བྱི་ཚེར་ཨསྨབྷེ་དང་བ་ཤ་ཀ། བསྐོལ་བའི་ཐང་ལ་སྦྲང་རྩི་ལྡན་འཐུངས་ན།། ཚ་ཞིང་གཟེར་བཅས་གཅིན་སྲི་གྲོལ་བར་འགྱུར།། དོང་ག་དང་ནི་སླེ་ཏྲེས་བ་ཤ་རྣམས།། ཨེརཎ་མར་ཁུ་ལ་བསྐོལ་ཐང་འཐུངས་ན།། རླུང་བྱུང་རྣམ་འགྱུར་མ་ལུས་ཁྲག་གི་ནད།། སྟེང་འོག་ལུས་ཀུན་ནས་འཛག་རིམ་པས་འཇོམས།། ཏཎྜུལི་ཀའི་རྩ་བ་ལིག་བུ་མིག། འབྲས་ཀྱི་ཆུ་ལ་སྦྲང་རྩི་ལྡན་འཐུངས་ན།། ཀུན་གྱིས་བསྐྱེད་པའི་ཁྲག་ནད་ངེས་པར་འཇོམས།། དབུགས་མི་བདེ་ལ་བྷཱ་རྒཱི་བཅའ་སྒས་སོ།། བྲི་ཧ་ཏི་གཉིས་ཨེརཎ་ཀ་པེད་དང་།། མ་ནུ་ཨསྨ་ཀྵ་ར་ཤིང་ཀུན་གཟེ།། སན་དྷེ་ཨེ་རཎ་མར་ཁུར་བསྲེས་བྱས་ཐང་།། རྐེད་པ་སྙིང་ནུ་ཕོ་མཚན་གཟེར་བས་གདུང་།། ཤིང་ཀུན་ཤུ་དག་ཁ་རུ་བཅའ་སྒ་དང་།། གོ་སྙོད་ཨ་རུ་པུཥྐར་རུ་རྟ་རྣམས།། ཕྱི་མའི་ཆ་འཕེལ་ཕྱེ་མར་བྱས་རྣམས་ཀྱིས།། ལྟོ་སྐྲན་རིམས་རྙིང་གསུད་ནད་རྣམས་ལའོ།། བཅའ་སྒ་ཤིང་ཀུན་རུ་ཚ་ཆ་སྙོམས་ཕྱེ།། སྒ་ཆུ་ལ་བསྐོལ་བད་ཀན་རླུང་བྱུང་དང་།། རྩིབ་ལོགས་སྙིང་རྒྱབ་གསུད་གཟེར་གསུད་རྣམས་ལ།། བཏུང་ངོ་དེ་བཞིན་ནས་ཁུས་རྟུག་འགགས་ལའོ།། འཇམ་འབྲས་ལོ་མའི་བཱི་ཤཱ་ལཱ་ཙ་བྱ།། ཙི་ཏྲ་ཚ་གསུམ་ལན་ཚྭ་གཙོ་ཆེར་བརྩེགས།། བསྲེགས་པའི་ཐལ་བ་ཞོ་ལ་སྦྱར་འཐུངས་པས།། དམུ་སྐྲན་སྐྱ་རྦབ་རྐུབ་ཀྱི་ནད་རྣམས་སེལ།། ཤིང་ཀུན་ཤུ་དག་བཅའ་སྒ་ས་རྫི་ཀ། ཁ་རུ་ཕྱི་མ་ཉིས་འགྱུར་ཕྱེ་མར་བྱས།། ཆུ་དྲོན་བཏབ་འཐུངས་སྣ་ཚོགས་གསུད་གཟེར་དང་།། སྙིང་ནད་སྐྲན་དང་སྲོད་དུ་རླུང་འཚངས་འཇོམས།། ཤྲིང་གི་ཚ་གསུམ་འབྲས་གསུམ་ཀཎྜ་ཀ། བྷཱརྒཱི་པུཥྐར་ཛ་ཊཱ་ཚ་སྣ་ལྔ།། ཕྱེ་མ་ཆུ་དྲོན་བཏབ་འཐུངས་སྐྱིགས་བུ་ལུད།། དང་ག་མེད་ཆམ་སྟོད་རླུང་མི་བདེ་འཇོམས།། ཛམ་བུ་དུག་ཉུང་ཡརྐ་ཤི་ཀྲུ་སྣུ་ཧ་ལེ་ཤིང་བྱ་ཀྲི་པྲི་ཧ་ཏི།། པ་རི་ཀ་པེད་ཚོས་ཤིང་ཛ་ཊ་ཨ་པ་མརྒ་ནིམྦ་ཙེ་ཏྲ་ཀ། བ་ཤ་པུཥྐར་པ་ཊ་ལ་དང་སནྡྷེ་ལྡན་པ་བསྲེགས་ཐལ་བསྐོལ་བ་ལ།། སྔར་བཤད་ཤིང་ཀུན་ལ་སོགས་བཏབ་པའི་ཁུ་བ་ལྟོ་སྐྲན་བད་ཀན་ནད་ལ་བཏུང་།། ཙ་བྱ་སྟར་བུ་ཚ་གསུམ་བསེ་ཡབ་བཅས།། བ་ལུ་ཛཱི་ར་ཅུ་གང་ཙི་ཏྲ་ཀ། ཕྱེ་མ་ཆ་མཉམ་བུར་བསྲེས་དྲི་གསུམ་ལྡན།། གྲེ་མཛེར་ཆམ་བད་དང་ག་མེད་ལ་བསྔགས།། བ་ལུ་ཙ་བྱ་ན་ཤམ་མཚུངས་གཉིས་པ།། མྰུ་ལ་ཅུ་གང་དྲོ་ཙའོ་སྒ་སུམ་འགྱུར།། བུ་རམ་སུམ་འགྱུར་དྲི་བཟང་རི་ལུ་བྱས།། གྲང་གཞི་གློ་རིམས་གཟེར་བའི་གཞང་འབྲུམ་སེལ།། སྒ་དྲོས་ནལ་ཤམ་ནཱ་ག་འདབ་ཤིང་ཚ།། སུཀྵྨེ་མཐའ་རིམས་གང་འཕེལ་ཕྱེ་མར་བྱས།། འདི་དག་ཆ་འདྲའིི་ཀར་འགམ་གཞང་མེ་ཞན།། དབུགས་དང་མི་བདེ་སྐྲན་འགུལ་སྙིང་ནད་ལའོ།། སེནྡྷེ་ཤིང་ཀུན་འབྲས་གསུམ་ལ་ལ་ཕུད།། ཚ་གསུམ་བུ་རམ་ཆ་རྣམས་རིལ་བུར་བྱས།། དེ་རྣམས་མུར་ཞིང་མྱངས་པས་ཚིམ་ཐོབ་ཅིང་།། མེ་དྲོད་ཞན་ལས་རབ་ཏུ་བྱུང་བའང་སེལ།། ལྕགས་ཕྱེ་ཚ་གསུམ་རྒྱ་ཤུག་ཆ་ཐམས་ཅད།། མཱཀྵི་ཕྱེ་མ་དང་མཉམ་དེ་རྣམས་གཟའ།། རྒུན་འབྲུམ་ལྡན་པའི་རྗེས་སུ་དར་འཐུངས་པས།། སྐྱ་རྦབ་ནད་ལ་ཕན་ཞིང་རིང་དུ་འགྲོ།། བུ་རམ་ལྡན་པའི་བཅའ་སྒའི་དྲོ་སྨན་ནར།། གསུམ་པ་ཨ་རུ་རའམ་བལ་པོའི་སེའུ།། བད་ཀན་ཚད་རྙིང་གཞང་འབྲུམ་ནད་རྣམས་དང་།། རྟུག་པ་འགག་པ་རྣམས་ལའང་རྟག་ཏུ་བྱ།། བཅའ་སྒ་གླ་སྒང་ཨ་རུ་ར་ཕྱེ་མ།། བུ་རམ་ལྡན་པ་ལ་ནི་རི་བུ་བྱ།། ལུད་པ་དབུགས་མི་བདེ་དང་ཚོ་ཆེས་རྣམས།། ཁ་རུ་རི་ལུ་མུར་བས་བཟློག་པར་འགྱུར།། ནྱ་གྲོ་ཨུཏྤལ་རུ་རྟ་མཱ་ཀྵི་ཀ། ཕྱེ་མ་འབྲས་ཕྱེ་བཅས་པ་རིལ་བུ་བྱ།། སྲ་བ་ཁ་རུ་མུར་བས་སྐོམ་དད་དང་།། རབ་ཏུ་འཕེལ་བ་མྱུར་དུ་འཇོམས་པར་འགྱུར།། ལྡོང་རོས་དྲོད་སྨན་ནར་མོ་ན་ལེ་ཤམ།། ཕྱེ་མ་ཀ་པིངྠ་སྐྱུར་ཁུ་བར་ལྡན།། འབྲས་ཕྱེ་ཆ་མཉམ་མཱཀྵི་ཀ་བསྲེས་པའི།། ནུས་པས་ལན་ཅིག་མ་ཡིན་སྐྱུག་པ་འཇོམས།། སྣ་ཁྲག་འཛག་ལ་དྰུརྦའི་ཁུ་བའམ།། བལ་སེའུ་མེ་ཏོག་ཁུ་སྦྱར་དེས་པར་བསྟེན།། བུད་མེད་ནུ་ཞོ་རྒྱ་སྐྱེགས་ཁུ་བའམ།། བི་ར་མྰཀྵི་ཀས་ཀྱང་ཨི་ཀུ་འཇོམས།། སྐྱུ་རུ་སྤོས་དཀར་ཁུ་བ་ཁ་རུ་ཚ།། དེ་རྣམས་བསྲེས་པ་སཽ་བི་རིལ་བཏགས།། དེས་འདིར་མྱུར་བར་གཞི་ནས་མེད་བྱད་ཅིང་།། ཇི་ལྟའི་སྐྱིགས་བུ་སླར་མི་འབྱུང་བ་ཡིན།། དྰུརྦ་སེནྡྷེ་ཐལ་ཀ་ཨ་རུ་ར།། ཀུ་ཐེ་ར་ཀྰ་ཀཉྫི་ཀ་དར་བཏགས།། གསུམ་པོས་བྱུགས་པའམ་ནུ་མའི་འོག་བཏགས་པས།། ཤུ་བ་དང་ནི་གཡན་པ་རྣམ་པར་འཇོམས།། སྣུ་ཧ་ཙི་ཏྲ་བྲིཾ་ག་ཨརྐ་དང་།། མྱ་ངན་མེད་ཤུན་རུ་རྟ་ཚ་བ་གཅིན།། བཅོས་པའི་མར་ཁུས་ཤུ་བ་མཛེ་གླང་ཤུ།། གདུག་པའི་རྨ་དང་ཟ་འབྲུམ་སེར་ཁ་འཕྲོག། གུ་གུལ་མིག་སྨན་སྦྲ་ཚིལ་སིནྡྷུར།། སྤངས་མ་ཆ་མཉམ་ཚ་བའི་མར་ཁུས་བཙོ།། ཁྱི་རྔོ་ཟ་ཙག་གིས་ནི་ལུས་སྐམས་ལ།། ལན་ཅིག་བྱུགས་པའི་ནུས་པ་གཞི་ནས་འདོན།། པུརྩི་ཀཱ་རུ་རྟ་མུརྦ་སྒ།། རྒྱ་སྐྱེགས་དང་ནི་བཙོད་དང་ཡུང་བ་རྣམས།། དྲུག་འགྱུར་དར་བ་ལ་བསྐོལ་གྲུབ་པ་ན།། བྱུགས་པས་གྲང་དང་ཚ་བའི་རིམས་འཇོམས་སོ།། ཀནྜ་ཀ་རི་སླེ་ཏྲེས་བ་ཤ་ཀ། ཕྱེ་མ་ཞུན་མར་ལ་བསྐོལ་གྲུབ་པ་དེ།། འཐུངས་པས་ཚད་རྙིང་ལུད་གཟེར་དབུགས་མི་བདེ།། མེ་དྲོད་ཞན་པའི་ཕོ་བའི་ནད་ལ་ཕན།། བ་ཤསེང་ལྡེང་པ་ཊ་ལ་པ་ཏྲ།། ནིམྦ་ཤིང་ཚ་སླེ་ཏྲེས་ཏ་མ་ལ།། ཀི་ཕྱེ་མར་སར་ལ་བསྐོལ་མྱུར་གྲུབ་ན།། མེ་དབལ་མཁྲིས་སྐྲན་མཛེ་ལས་རྒྱལ་བར་འགྱུར།། དྲུག་པས་ཁྲག་དང་བཅས་པ་བརྒྱ་ཡི་སྐྱོན།། རབ་འཁྲུགས་ལས་སྐྱེས་ཡན་ལག་ལུས་ཀུན་གཟེར།། བྱེ་བྲག་མེ་དབལ་ཆང་གིས་ར་རོ་བ།། རྨོངས་པ་ཆང་འཐུངས་ལས་སྐྱེས་རྣམ་འགྱུར་ལ།། ཀཎྜ་ཀ་རི་ནིམ་པ་པ་ཊ་ལ།། སླེ་ཏྲེས་འབྲས་གསུམ་འཇམ་འབྲས་བ་ཤ་ཀ། ཕྱེ་ཆུ་མར་རྙིང་ལ་ནི་ཆོ་གས་བཙོ།། མྱུར་དུ་གྲུབ་འདིས་མཛེ་ལས་མྱུར་དུ་རྒྱལ།། ཀར་ཀུ་ཤྨཎྜ་ཆོ་ག་བཞིན་དུ་བཙོས་སྐམས་ནས།། མར་བསྐོལ་ཀར་བཏབ་ཚ་གསུམ་དྲི་གསུམ་ཟི་ར་ལྡན་པར་བཙོ།། འདི་བསྟེན་བྱིས་རྒན་ཁྲག་འཛག་རླུང་འཇོམས་བུད་མེད་ལ་ཕོད་ཅིང་།། ཟས་སྐོམ་ལུད་ཁྲག་མཁྲིས་སྐྱུགས་དབུགས་མི་བདེ་དང་གཞང་འབྲུམ་འཇོམས།། བ་གཅིན་སྐྱུ་རུ་མཱ་ཀྵི་ཀ་དྲོད་སྨན།། ཁ་རུ་པོ་སོན་དུ་བ་དནྟྰི་དང་།། རུ་རྟ་རྣམས་བཙོ་རེང་བུ་མཐེ་བོང་འདྲ།། མར་བསྐུས་རྐུབ་བཅུག་དེ་ཡི་ནད་འཕྲོག་བྱེད།། ལུས་གསོ་བའི་དཔྱད་རྫོགས་སོ།།

          ཀར་བཅས་གུར་གུམ་ཆ་མཉམ་མར་ལ་བཙོས།། ཆོ་ག་བཞིན་བླུགས་རླུང་ཁྲག་ལས་བྱུང་བའི།། སྨིན་མ་མུར་འགྲམ་རྣ་མིག་མགོ་བོ་ཡི།། ཕྱེད་གཟེར་ཉི་འཁོར་ལས་བྱུང་ནད་འཇོམས་སོ།། ཨ་རུ་བ་རུ་སྐྱུ་རུ་ནང་ས་བོན།། སུམ་གཉིས་གཅིག་གམ་ཆ་རྣམས་ཞོ་ལ་བཏགས།། མིག་སྨན་དེ་ཡིས་མཆི་མ་མང་བྱུང་ཞིང་།། མིག་ཚ་རབ་ཏུ་འཁྲུགས་པའང་འཇོམས་པར་འགྱུར།། ཨ་རུ་སེནྡྷེ་བ་དང་ལིག་བུ་མིག། བཙག་ཡུག་དང་བཅས་ཆུ་ལ་བསེས་བཏགས་ཏེ།། མིག་གི་ཕྱི་རོལ་རབ་ཏུ་བྱུགས་བྱས་པས།། འདི་ཡིས་མིག་གི་ནད་ཀུན་ཞི་བར་འགྱུར།། སོོ་བྷི་ལ་སེནྡྷེ་སེང་ཕྲོམ་བཏགས།། དེ་ནས་མར་བཙོས་རས་དཀར་པོ་ལ་བཙགས།། དེ་ཡིས་མིག་ལ་བྱུགས་བྱས་མཁྲིས་སྐྱེད་ནད།། དམར་ཚག་དང་ནི་ཤ་མཛེར་ངེས་པར་འཇོམས།། ཁྲག་སྐྱེད་ཀ་ར་རྒྱ་མཚོའི་ལྦུ་བས་འཇོམས།། འབྱུང་དྲོད་སྨན་ནར་མོ་སྲོད་ལོང་ལའོ།། ལིག་མིག་ཚ་བ་གསུམ་གྱིས་མིག་འགྲིབ་ལ།། ལིང་ཏོག་དཀར་ལ་མཱ་ཀྵི་སྦྲང་རྩིས་སོ།། ནག་ཚུར་ལིག་མིག་དཀར་བཅས་རྒྱ་མཚའི་ཝུ།། ནལ་ཤམ་སམ་ཁ་སེནྡྷེ་བཙག་ཡུག་དང་།། ལྡོང་རོས་ཆ་མཉམ་མཱཀྵི་ཀ་བསྲེས་བཏགས།། རབ་རིབ་ཁུས་བསྐྱེད་རྫི་ནད་ཚག་པོ་འཇོམས།། སླེ་ཏྲེས་པུ་ཤེལ་ལྕགས་ཕྱེ་དུག་ཉུང་ནལ་ཤམ་སེནྡྷེ་ཀངྤལ།།  ལིག་མིག་རྡོ་དྲེག་སྤང་སྤོས།། ཡུང་བ་སྤངས་མ་སམ་ཁ་རྒྱ་མཚོའི་ཝུ།། མཚུངས་པ་ཕྱེ་མ་ལྕགས་སྣོད་དུ་བཞག་སྦྲང་རྩི་ལྡན་པས་ཤ་མཛེར་དང་།། རབ་རིབ་ལིང་ཏོག་ཁྲག་འབུར་མིག་ཤའི་ནད་ལ་ཉེ་བར་བྱུགས་པའང་བསྔགས།། ཤིང་མངར་ཨུཏྤལ་རྒྱ་མཚའི་ལྦུ་བ་ཤིང་ཚ་པུ་ཤེལ་གྷི་ཝང་བཙོད།། སྤང་སྤོས་ཙནྡན་སམ་ཁ་བཙག་ཡུག་བ་ལུ་ལིག་མིགནག་ཆུར་འདབ།། དེ་ལྟར་ཐམས་ཅད་ཆ་མཉམ་མིག་སྨན་འདི་ཡིས་མིག་འབྲུམ་མིག་ནག་ཚ།། མཆི་ཁྲག་སྐྱ་རིབ་མིག་ཤ་གཟེར་ནས་འཕྲོགས་ལ་བསྔགས་པས་རྟག་ཏུ་བྱུག། མིག་གི་སྨན་དཔྱད་དོ།།

          ཐང་ཤིང་བོང་ང་དཀར་པོ་སླེ་ཏྲེས་བཅས།། དུག་ཉུང་ཧོང་ལེན་མ་ནུ་པ་ཐའི་ཐང་།། བ་གཅིན་ལས་གྲུབ་སྦྲང་རྩི་དང་ལྡན་པ།། མགྲིན་པའི་ནད་དང་ཀུན་ལ་བཏུང་བར་བྱ།། ཀྵར་ཏེཛ་བཏི་པ་ཐ་དང་།། ལིག་མིག་སྐྱེར་རྩ་ཡུང་བ་དྲོད་སྨན་ནར།། རིལ་བུ་སྦྲང་རྩི་ལས་བྱས་ཁ་ནང་དུ།། མུར་བར་བྱ་ཡི་མགྲིན་པའི་ནད་ཀུན་ལ།། སྐྱེར་རྩ་གླ་སྒང་ཛཱ་ཏིའི་མེ་ཏོག་དང་།། ལོ་གསར་རྒུན་འབྲུམ་དུག་ཉུང་འབྲས་གསུམ་བསྐོལ།། སྦྲང་རྩི་ལྡན་པས་ལུས་ཀྱི་ཁ་སྒོའི་ནད།། ལྕེ་ཡི་ནད་རྣམས་དུས་སུ་ཞི་བར་བྱེད།། རུ་རྟ་དང་ནི་སྐྱེར་པའི་རྩ་བ་སེང་ཁྲོམ་བཙོད།། ཡུང་ཧོང་གླ་སྒང་པ་ཐ་ཏེ་ཛ་ནི།། ཞིབ་བཏགས་སོ་རྣམས་ལྡེག་པར་བྱེད་པ་དང་།། གཟེར་ཞིང་འཁྱུགས་ལ་ནང་ཁྲག་འབྱིན་པར་བྱེད།། སཽ་བི་ར་ཅུཀྲ་སྒེའུ་གཤེར་མ་ཏུ།། ཁུ་བ་ཤ་རྣམས་གུ་གུལ་སེནྡྷེ་རྣམས།། གང་ཞིག་ཚ་བའི་མར་ཁུ་ལ་བསྐོལ་ཏེ།། རྣ་བར་བླུགས་པས་རྣ་བའི་ཟུག་རྔུ་སེལ།། བ་ཤ་ནིམྤ་པཊོ་ལ་དང་པརྤ་ཏ་ཀ་བེ་ཛྠ་ཙ་བྱ་སྐྱེར་རྩ་དང་།། གླ་སྒང་ཏིག་ཏ་པུ་ཤེལ་བྱི་ཚེར་ཚ་གསུམ་ཏྲ་ཡནྟི་ཀ་ཙནྡན་རྣམས།། ཞུན་མར་ལས་གྲུབ་སྟེང་འོག་ནས་སྐྱེས་རྣམ་འགྱུར་སྣ་དང་མིག་གི་གཟེར་ལ་སོགས།།    ལྤགས་ནད་རིམས་དང་ཁོང་འབྲས་རྨ་ཡི་ཟུག་རྔུ་མིག་ནད་སྐྱ་རིབ་རྣམས་ལ་བསྔགས།། སྐྱེར་རྩ་དུག་ཉུང་ནིམྦ་པརྤ་ཏ་དང་དྲོད་སྨན་བྱི་ཚེར་ཤིང་མངར་དང་།། ཏྲ་ཡནྟྰི་ཧོང་འབྲས་གསུམ་ཏིགྟ་བྲི་ཤ་པ་ཊོ་ལ་དང་གླ་སྒང་དམར།། དེ་རྣམས་ཕྱེ་མར་བསྐོལ་བ་ཞུན་མར་ལས་གྲུབ་འདི་ནི་མིག་ལ་ཕན་ཡིན།། མཁྲིས་པ་ཁྲག་ལས་བྱུང་དང་སྐྱ་རིབ་རབ་རིབ་རྣམས་དང་སྟོད་ཀྱི་ནད་རྣམས་ལའོ།། ཨེརནྜ་དཀར་པོ་ཡི་རྩ་བ་དང་ནི་ཤུ་དག་དང་།། ཤ་ཏ་པུཥྤ་བྲི་ཧ་ཏིའི་འབྲས་བུ་གཞན་ཡང་།། སྟར་གའི་འབྲས་བུ་འོ་མར་བཅས་པ་ལས་གྲུབ་པ།། རབ་རིབ་སྟོད་དང་གཙོ་ཆེའི་ནད་དང་གཞན་པའང་འཇོམས།། ཟུག་རྔུ་ཟད་པར་བྱེད་པ་གཉིས་པ་རྫོགས་སོ།།

          དུང་དང་མུཤྒཀ་དག་མེ་ལྕེས་བསྲེགས་པའི་ཐལ་བ་སྣོད་དུ་བླུགས་བྱས་ཏེ།། དེ་ཉིད་དུ་སླར་ཆུ་ལ་བཙོ་ཞིང་བསྐོལ་བའི་ཐལ་བ་མར་ཁུའི་ཆོ་ག་རྣམས།། སྦྱོར་བ་དེ་ཡིས་བདུགས་པས་རྨ་དང་།། རྨ་ཚ་སྐྲངས་འབུར་རྩ་ཡི་ནད་རྣམས་དང་།། རྣམ་པ་སྣ་ཚོགས་མཚན་བར་རྡོལ་བའི་ལྤགས་ནད་ཡུན་རིང་མགུལ་པའི་ནད་རྣམས་ལ།། ཤིང་མངར་དང་བཅས་སྐྱེར་རྩ་ཤུག་པ་ཨུཏྤལ་དང་།། པྲི་ཡངྐུ་དང་སེང་ཁྲོམ་དཀར་པོ་ཙནྡན་རྣམས།། མར་ཁུ་དང་ནི་འོ་མར་བཙོ་ཞིང་སྦྱར་བར་བྱ།། རྨ་རྣམས་དང་ནི་གཟེར་དང་ཚ་བ་འཇོམས་པར་འགྱུར།། ཛཱ་ཏི་ནིམྦ་པ་ཊོ་ལ་དང་པ་ཊ་ཧོང་ལེན་སྐྱེར་རྩ་ཡུང་བ་དང་།། བཙོད་དང་ཐལ་ཏྲེས་ཨ་རུ་པུ་ཤེལ་སྤྲ་ཚིལ་སྤངས་མ་ཤིང་མངར་འཇམ་འབྲས་རྣམས།། མར་ལས་གྲུབ་པ་འདི་ཡིས་ཁ་ནད་ཕྲ་མོ་དང་ནི་གནད་གཟེར་རྩ་ཡི་ནད།། ནད་དམ་གཟེར་བཅས་འཕོ་ཞིང་འབྱུང་བའི་རྨ་ཡི་ནད་རྣམས་དང་ནི་འབྱང་བ་འབྱིན།། ཟུག་རྔུ་ཟད་བྱེད་གསུམ་པ་རྫོགས་སོ།།

          ནལ་ཤམ་དཀར་པོར་ཤི་རི་ཥའི།། མེ་ཏོག་ཁུ་བས་བརྒྱ་ཕྲག་བསྒོ་བར་བྱ།། སྦྲུལ་གྱི་སོ་བཏབ་བརྒྱལ་བར་གྱུར་པ་ལ།། རབ་ཏུ་སྦྱར་བྱ་བཏུང་དང་མིག་སྨན་ལ།། རྨ་བྱའི་མཁྲིས་པ་ཏནྡུ་ལཱི་ཡ་ཀ། ཀཱ་ཀནྜ་བཅས་མི་ཉུང་འཐུངས་བྱས་པས།། འགྲོ་བའི་དུག་དང་བརྟན་མཆོག་དུག་གི་ནི།། འཚེ་བ་དང་བཅས་མྱུར་དུ་འབྱིན་པར་བྱེད།། ཏིལ་བཏགས་མར་ཁུ་ལ་ནི་བུ་རམ་དང་།། དེ་བཞིན་ཨརྐའི་ནི་ལོ་མ་ཆ་མཉམ་བཏུང་།། སྤྲིན་གྱི་ཚོགས་ལ་འཕྲལ་དུ་རླུང་བྱུང་ལྟར།། ཁྱི་སྨྱོའི་དུག་མཆོག་མྱུར་དུ་འབྱིན་པར་འགྱུར།། ཁང་པའི་དུ་བ་གུ་གུལ་དང་ལྡན་པ།། བཱ་ཛི་གྷནྡྷ་ཏནྡུ་ལཱི་ཡ་བཅས།། བ་ཡི་གཅིན་ལ་བཏགས་བྱས་སྙིང་ནད་དང་།། བརྟན་མཆོག་འགྲོ་བའི་དུག་རྣམས་འཁྲོག་པར་འགྱུར།། སྤང་སྤོས་པུ་ཤེལ་བ་བླ་ཀཽནྟི་ཛ་ལ་སླེ་ཏྲེས་ལྡོང་རོས་གི་ཝང་པརྨ་ཀེ་ཤི་དང་།། སྤྲིཀྐཱ་ཙནྡན་ཡུང་བ་རུ་རྟ་ཀ་ར་ལ་རྟ་རྡོ་དྲེག་སུཀྵྨེ་གུར་གུམ་ཤིང་ཤུག་པ།། ཆ་མཉམ་ཉུངས་ཀར་བརྒྱད་ཚ་ན་ག་གེ་སར་མེ་ཏོག་ཆ་བཞིའི་ལྡེ་གུས་ཀུན་ཏུ་ལོངས་སྤྱོད་ཅིང་།། ཕུན་སུམ་ཚོགས་བྱ་ཤ་ཟ་རིམས་དང་དུག་གི་ནད་རྣམས་འཇོམས་འགྱུར་ཟླ་བ་ཤར་བ་ལྟ་བུར་གྲགས།། དུག་ནད་སེལ་བའི་རྒྱུད་བཞི་པ་རྫོགས་སོ།།

          ཉུངས་ཀར་འབྲས་གསུམ་ཤིརྵ་ཀ་ཊ་བྷཱི་ཤེ་འཇམ་འབྲས་སླེ་ཏྲེས་དང་།། བཙོད་དང་སེར་པོ་གཉིས་དང་ཚ་བ་གསུམ་དང་སྤང་སྤོས་ཤུ་དག་ཤིང་ཀུན་རྣམས།། ར་ཡི་གཅིན་ལ་བཏགས་བྱས་འཐུངས་སོགས་བརྟེན་པས་སྦྲུལ་གྱི་སོས་བཏབ་གདོན་ཀུན་དང་།། གཤེད་བྱེད་སྨྱོ་བྱེད་ཤ་ཟ་དང་ནི་སྲིན་པོ་འཇོམས་ཤིང་རླག་པར་བྱེད་པར་འགྱུར།། ཀརྤཔ་ཡི་རུས་པ་དང་ནི་རྨ་བྱའི་འདབ་མ་བྲི་ཧ་ཏི་རྣམས་དང་།། ནིརྨལྱ་པོ་སོན་ཆ་ཤིང་ཚ་ཅུ་གང་བྱི་ལའི་རྟུག་པ་བ་ཤ་ཀ་དང་ཀེ་ཤ་སྦྲུལ་ལྤགས་དང་།། གླང་པོའི་སོ་དང་ཤྲིང་གཤིང་ཀུན་ནལ་ཤམ་དཀར་པོ་ཆ་མཉམ་བདུག་བྱས་པས།། གཤེད་བྱེད་སྨྱོ་བྱེད་ཤ་ཟ་སྲིན་པོ་ལྷ་རྣམས་ཞུགས་པའི་རིམས་ནི་འཇོམས་པར་དྲན།། ཚ་བ་གསུམ་དང་ད་ལ་གུར་གུམ་དྲོད་སྨན་ནར་མོའི་རྩ་བ་ཀྵྰ་ར་སིང་ཧི་ཡུང་བ།། རུ་རྟ་ཉུང་དཀར་གཉིས་དང་ཨམྦུ་དུག་ཉུང་ཀ་ར་སྒོག་སྐྱ་འབྲས་བུ་གསུམ་དང་པུ་ཤེལ་ཙེ་དང་ཧོང་ལེན་ཤུ་དག་སྤངས་མ་ཤིང་མངར་བཱལ་དམར་པོ་ལྡོང་རོས་ཤུག་པ་ཞེས་གྲགས་པ།། དདྷི་རྒྱ་སྤོས་མདྷྰུ་ཀ་སཱ་པྲི་ཡངྐུ་དང་བོང་ང་དཀར་པོ་ལིག་བུ་མིག་དང་ཙ་བྱ་ཐང་ཤིང་བཅས་པ་ཕྱེ་མར་བྱས་པ་མར་དང་སྲོག་ཆགས་བརྒྱད་ཀྱི་གཅིན་གྱི་ཆུ་ལ་བསྐོལ་བཤད་འཐུངས་པས་འབྱུང་པོ་འབྲོས་ཤིང་དེ་ཡིས་གདོན་རྣམས་མཆོག་ཏུ་འཇོམས་པ་འགྱུར།། རྒྱ་སྤོས་ཤིང་མངར་འཇམ་འབྲས་རྒྱ་སྐྱེགས་པ་ཊོ་ལ་ཡི་ལོ་མ་རཀྟ་པཏྲིཀཤུ་དག་པ་ཏྲ་ལ་དང་ཤིང་ཀུན་ཉུངས་ཀར་སིཾ་ཧི་སེར་གཉིས་ལ་ཏཱ་ཧོང་ལེན་དང་།། པོ་སོན་ཚ་གསུམ་ཀཱ་ཀཎྜ་ཐང་ཤིང་པི་དང་ཨང་གནྡྷ་མ་རཱ།། ཨརྐོཊ་དང་ཀོཥཏ་ཀཱིན་ཤམ་ནིམྦ་སླེ་ཏྲེས་དུག་མོ་ཉུང་།། རུ་རྟ་ཤུ་ཀ་ཏ་རུ་པུཥྤ་བཱ་ལ་ཤིང་མངར་ཨ་པ་ར་ཛི་ཏ།། དནྡཱི་ཙི་ཏྲ་ཀ་པེད་ཆ་མཉམ་ཕྱེ་མ་གཅིན་གྱི་སྡེ་དང་མར་ལ་བསྐོལ།། ཡུན་རིང་དུ་གཞག་ཀུན་གྱིས་རིམ་པར་སྦྱོར་བས་མྱུར་དུ་འཇོམས་པར་འགྱུར་བ་ཡིན།། འབྱུང་པོ་ཆེན་པོའི་གདོན་ཀུན་དང་ནི་སྨྱོ་བྱེད་དེས་བྱས་མཛེ་རིམས་ཞི་བར་བཤད།། འབྱུང་པོ་ཞི་བར་བྱེད་པའི་རྒྱུད་ལྔ་པ་རྫོགས་སོ།།

          སྐྱེར་ཡུངས་དུག་མོ་ཉུང་གིས་ས་བོན་དང་།། སིང་ཧི་དང་ནི་ཤིང་མངར་ཆ་མཉམ་པོ།། དེ་རྣམས་ཐང་བྱས་བུ་ཆུང་མ་ཡི་ནི།། བུ་ནད་དང་ནི་འཁྲུ་བ་ཀུན་ལ་ཕན།། ཀ་པེད་པུཥྤ་དཏ་ཀི་ཛ་ལ།། སེང་ཕྲོམ་དང་བཅས་ག་ཛ་པི་པཱ་ལཱི།། ཐང་ལ།མཱཀྵི་ཀ་བསྲེས་བྱུགས་པ་དང་།། འཁྲུ་བ་རྣམས་ལ་བྱིས་པ་ལ་སྦྱར་བྱ།། ཤྲིང་ག་དྲོད་ནར་བོང་ང་དཀར་པོ་ཕྱེ་མར་བྱས།། གློ་རིམས་སྐྱུག་པའི་ནད་རྣམས་འཇོམས་པ་ལ།། མཱཀྵི་ཀ་བཅས་བོང་དཀར་དེ་བཞིན་གཅིག། བྱིས་པའི་ནད་སེལ་བའི་རྒྱུད་དྲུག་པ་རྫོགས་སོ།།

          སྐྱུ་རུ་ར་ཕྱེ་དྲུག་ཅུ་རྩ་བཞིའི་སྲང་ལ་རང་གི་ཁུ་བསྒོས་སྦྲང་རྩི་མར་དང་ཆ་མཉམ་ཞིང་།། དྲོད་སྨན་ནར་མོ་སྲང་བརྒྱད་ཀ་ར་ཉིས་འགྱུར་ཆ་ལྡན་ཐལ་བའི་ཕུང་པོའི་ནང་དུ་གཞག་པར་བྱ།། དབྱར་གྱི་མཐའ་རུ་དེ་བསྟེན་སྐྲ་དཀར་དང་བྲལ་གཟུགས་དང་ཁ་དོག་དང་ནི་སྤོབས་པ་དང་ལྡན་ཞིང་།།  ནད་མེད་བློ་དང་ཡིད་གཞུངས་དྲན་པ་ཚིག་གསལ་སྟོབས་དང་ལྡན་ཞིང་སེམས་སྟོབས་ལྡན་པར་འགྱུར་བ་ཡིན།། ཤིང་མངར་དང་ནི་སྦྲང་རྩི་མར་དང་ནི།། འོ་མ་དང་སྦྱར་རྗེས་སུ་བསྟེན་པ་ཡིས།། ལུས་པོ་རྒྱགས་པ་རབ་ཏུ་ཐོབ་གྱུར་ནས།། དགའ་ཞིང་འཁྲིགས་པ་ཡང་ཡང་ནུས་པར་འགྱུར།། ཤིང་མངར་ཅུ་གང་སེནྡྷེ་དྲོད་སྨན་ནར།། ཀ་ར་དང་ནི་འབྲས་བུ་གསུམ་རབ་ལྡན།། ཚེ་སྦྱིན་རོ་ཙ་ཤིན་ཏུ་ཡིད་གཞུངས་ཤིང་།། རྒས་དང་ནད་རྣམས་རྣམ་པར་འཇོམས་པར་འགྱུར།། གཟེ་མ་སྐྱུ་རུ་སླེ་ཏྲེས་ཕྱེ་མར་བྱ།། སྦྲང་རྩིའི་མར་དང་ལྡན་པ་བསྟེན་པ་ཡིས།། རོ་ཙ་བསྟེན་ཞིང་སྡུག་བསྔལ་རྣམ་འགྱུར་ཞིང་།། སྐྲ་གནག་ཚེ་ལོ་བརྒྱར་ནི་འཚོ་བར་འགྱུར།། ནིམྦའི་མར་ཁུ་རང་བཞིན་གནས་བྱས་པ།། ཆོ་ག་ཇི་ལྟ་བ་བཞིན་བཏུང་བ་དང་།། འོ་མ་མར་དང་རབ་སྦྱར་དེ་ཟླ་བས།། སྐྲ་དཀར་དང་ནི་རྒས་པ་རྣམ་པར་འབྱིན།། གཟེ་མ་ཀྵུ་ར་དང་ནི་རྩ་བ་བརྒྱད།། བཱན་རྰིནཱ་ག་བ་ལཱ་བ་ལཱ།། ཕྱེ་མ་འོ་ཐུག་བྱས་འདི་བཏུང་བར་བྱ།། དེ་ཡི་འཁྲིག་པ་ལན་བརྒྱར་ནུས་ཡིན།། རྟ་ལྟར་བྱེད་པ་བདུན་པ་རྫོགས་སོ།།

          ཤིང་མངར་ཐང་བསྐོལ་སེནྡྷེ་བ་ལྡན་ཞིང་།། དུག་ཉུང་དྲོད་ནར་པོ་སོན་ཕྱེ་མར་བསྲེས།། སྦྲང་རྩི་བཅས་པ་འདི་དག་སློན་ལ་སྦྱར།། མགྲིན་ནད་ཁ་དང་གྲེ་འགགས་ནད་རྣམས་ལའོ།། སཽབཱིརལ་ཨ་རུ་ར་ཐང་བསྐོལ།། དྲོད་ནར་ཁ་རུ་དནྡི་ཕྱེད་ཕྱེ་ལྡན།། ཨེརཎ་མར་ཁུ་དང་བཅས་འཁྲུ་ལ་དེ།། བཤལ་གྱི་སྦྱོར་བས་ནད་རྣམས་འཇོམས་པར་འགྱུར།། ར་སྣ་པོ་སོན་ཆ་དང་འབྲས་གསུམ་སླེ་ཏྲེས་རྩ་བ་བཅུ་དང་བཱ་ལཱ་དང་།། མར་ཁུ་སེནྡྷེ་བ་བཅས་པ་ལ་མམ་སི་བཙོས་ལྡན་སྦྲང་རྩི་བུ་རམ་བཅས།། ཤ་ཏ་པཥྤ་སླེ་ཏྲེས་རུ་རྟ་ཀ་པེད་པྲི་ཡངྐུ་དང་དྲོད་སྨན་ནར།། ཤུ་དག་ཕྱེ་མ་ཀཉྫི་བ་འོ་གཅིན་བཅས་མས་གཏོང་རླུང་ནད་རྣམས་ལ་ཕན།། བ་ལ་ཕྱེ་མ་མར་ཁུ་ལ་བསྐོལ་དྲི་བཟངས་དང་།། བཅུད་གྲུབ་པ་དང་འོ་མ་ཞོ་དང་སྐྱུར་ཆུ་རྣམས།། དེ་བཞིན་ས་ཧཱ་ར་ཛ་ར་སྣ་སླེ་ཏྲེས་དང་།།  བ་རི་རེ་རེར་བསྐོལ་བས་རླུང་འཇོམས་སོ།། སྦྱར་བར་བྱའོ་བཅའ་སྒའམ་བུ་རམ་ལ།། ཡང་ན་སེནྡྷེ་བ་བཅས་དྲོད་ནར་ལའོ།། སྣ་ཁ་མཇིང་པ་འགྲམ་པ་དཔུང་པ་དང་།། རྒྱབ་དང་མགོ་མིགམགུལ་འགགས་ནད་རྣམས་ལ།། ལས་ལྔའི་ལེའུ་བརྒྱད་པ་རྫོགས་སོ།།

          རིམས་ལ་གཙོ་ཆེར་པརྤ་པ་ཊ་སྦྱར་བྱ་སྐོམ་དད་ཆེ་ལ་སྐྱུ་རུ་ར་དང་སྐྱུགས་པ་ལ།། ཚ་བ་ལྔ་སྐྱེས་གཟེར་ལ།འཇམ་རྩི་རེངས་ལ་གི་རི་ཛ་དང་གཅིན་སྙི་སྐྱུ་རུའི་ཁུ་བས་སོ།། རླུང་གི་ནད་ལ་ར་སྣ་དམུ་རྫིང་མཆེར་པའི་ནད་ལ་བ་གཅིན་ཆམ་པ་ལ།།  དྲོད་ནར་འཕྱོ་ལ་བི་དང་དུག་ལ་ཤུ་ཀ་རྟ་རུ་སྐྲངས་ལ་གུ་གུལ་ལོ།། བ་ཤ་ཀ་ཡིས་ཁྲག་མཁྲིས་དུག་ཉུང་གིས།།  འཁྲུ་ལའོ་བསེ་ཤིང་ཧེ་མམ་ལྕི་གཟེར་ལ།། སྦོས་ལ་ཐང་ཤིང་སྲིན་ནད་བྱི་དང་གས།། སྐྱ་རྦབ་ཨ་རུ་ར་དང་འབྲུ་གཞན་གྱིས།། ཟད་བྱེད་ནད་ལ་འབྲས་བུ་གསུམ་བཤད་གཟེར་བ་ཀུན་ལ་དེ་ལྟར་ཁུ་བས་སོ།། མཛེ་ལ་རྟག་ཏུ་སེང་ལྡེང་ཁུ་བ་གློ་ལ་ཀཎྜ་ཀ་རི་དང་།། ཚིགས་བཅད་གཟེ་མ་མུར་གཤེད་བྱེད་ན་ག་བཱ་ལཱ་བ་ལས་སོ།། བཅུད་ལེན་ཀུན་ལ་སྐྱུ་རུ་ལྷ་བཅས་གདོན་གྱི་ནད་ལ་བྲག་ཞུན་བཤད།། རྒྱུད་ཕྱི་མའོ།།

          རབ་ཏུ་གྲུབ་པའི་སྦྱོར་བའི་ཆོ་ག་རྫོགས་པར་བྱས།། གྲུབ་པའི་དོན་རྣམས་རྟོགས་པའི་སྨན་པ་མཁས་རྣམས་ཀྱིས།། རྟོགས་པའི་སྨན་པ་མེད་པར་སུ་ཡིས་སྦྱོར་བ་མཐོང་།། འདི་དོན་སླར་ཡང་འདིར་ནི་ཅུང་ཟད་བཤད་པར་བྱ།། ཤུགས་བཀག་མ་ཟོས་གཉིད་ཆགས་སྐད་ཆེས་རྩོལ་བ་དྲགས།། བཞོན་པ་ལ་ཞོན་ཚ་བ་ཁ་བསྐ་རྩུབ་བ་རྣམས།། སེམས་གཟུང་འཁྲིག་དང་འཇིགས་དང་སྨྱུང་གནས་མྱ་ངན་དྲངས།། དབྱར་གྱི་དུས་སུ་རླུང་ནི་རབ་ཏུ་འཁྲུགས་པར་འགྱུར།། ཚ་སྐྱུར་ཆང་དང་ལན་ཚྭ་རྣོ་དྲོ་ཏིལ་མར་ཁུ།། ཁྲོ་དང་གདུང་བ་ལོ་མ་སྐམ་པ་འཇིགས་ངལ་རྣམས།། ཐལ་སྨན་ལ་སོགས་མ་ཞུ་མ་འཕྲོད་ཟས་ཟོས་པ།། སྟོན་གྱི་དུས་སུ་མཁྲིས་པ་རབ་ཏུ་འཁྲུགས་པར་འགྱུར།། ཉིན་གཉིད་མངར་དང་གྲང་ཆེས་ཉ་ཤ་ལྕི་བ་དང་།། ཤིང་ཏོག་འོ་མ་བུ་རམ་ཤིང་གི་རྣམ་འགྱུར་རྣམས།། སྣུམ་བག་འགྲངས་ཆེས་ཟོས་དང་ལན་ཚཱ་བུར་ཆུ་རྣམས།། དཔྱིད་ཀྱི་དུས་སུ་བད་ཀན་རབ་ཏུ་འཁྲུགས་པར་འགྱུར།། དེ་ལྟར་འདི་རྣམས་རིམ་པས་བྱེ་བྲག་སྐྱོན།། གདུག་པ་ཀུན་ནི་ལྡན་པ་བརྒྱད་དུ་ཤེས།། སྣ་ཚོགས་ནད་ནི་ལུས་ཀྱི་གྲངས་བཞིན་དུ།།  མིང་རྣམས་མ་ལུས་རྗེས་སུ་རྟོགས་པར་བྱ།། རྩུབ་འཁུམས་ཕོ་ཞིང་གཟེར་དང་སྔོ་བསངས་མདོག། ཡན་ལག་ཟུག་ཆེ་ཡན་ལག་བརྐྱང་བསྐུམ་བྱེད།། ཤེས་རྨོངས་དྲང་ཞིང་གྱོང་ལ་སྐོམ་པ་རྣམས།། རླུང་གི་ལས་སུ་མཁས་པས་རབ་ཏུ་བསྟན།། འཛག་ཅིང་རྔུལ་འབྱུང་ཚ་ཞིང་འདོད་ཆགས་སྐྱེ།། དྲི་ང་རྣག་དང་འཇུ་དང་ཁྲོ་བ་དང་།། བླ་འཆོལ་བརྒྱལ་དང་མགོ་འཁོར་ལུས་མདོག་སེར།། མཁྲིས་པའི་ལས་སུ་མཁས་པས་རབ་ཏུ་བསྟན།། ཁ་མིག་སྣ་ཆུ་གྲང་ལྕི་ལུས་གཡའ་རྔུལ།། ཤེས་པ་རྨོངས་ཤིང་སྣ་ཚོགས་འགགས་པ་དང་།། ཚོ་ཆེས་མཆིལ་སྣབས་ཡུན་རིངས་འབྱུང་བྱེད་རྣམས།། བད་ཀན་ལས་སུ་མཁས་པས་རབ་ཏུ་བསྟན།། དེ་རྣམས་ཀྱིས་བྱས་འདི་དག་རྟོགས་རྣམས་ནི།། ནད་ཀུན་མིང་ནི་དུ་མའི་རྣམས་པ་ཡང་།། བྱེ་བྲག་ཁ་ཅིག་སྐྱེ་བའི་དབང་གིས་འགྱུར།། གང་གིས་འདི་རྣམས་མིང་གཞན་ཀུན་དུ་འགྲོ།། རྒྱུད་ནི་ལེ་ལོ་ཡིད་ནི་རྣམ་མ་དག། སྐྱོན་ནི་རབ་འཇུག་བཀྲེས་དང་གཅིན་ཡང་འབྱུང་།། གསུས་ལྕི་ཤེས་པ་རྨོངས་ཤིང་དང་ག་མེད།། དེ་རྣམས་ནད་ལྡན་དེ་ལ་ནད་འབྱུང་འགྱུར།། བཅུད་དང་དྲོད་དང་བརྟན་དང་རོ་ཙ་སྟོབས་སྐྱེད་ལན་ཚྭ་མངར་སྐྱུར་མར་ཁུ་དང་།། ཁྲུས་དང་དྲོད་བསྟེན་མས་གཏོང་ཤ་དང་སྟན་བསྟེན་ཡན་ལག་ཀུན་ལ་དྲིལ་ཕྱིས་དང་།། སྣུམ་གྱི་དུགས་དང་འཇམ་རྩིས་ཞི་བྱས་བསྐུ་བྱུག་ཉེ་བར་བསྟེན་པ་ལ་སོགས་པ།།  བཟའ་དང་བཏུང་བ་གནས་དང་སྨན་འདི་རྣམས་ཀྱིས་རླུང་ནི་རབ་ཏུ་ཞི་བར་འགྱུར།།  ཁ་མངར་བསྐ་བ་གྲང་དང་རླུང་ཡབ་མཆན་མོ་ཟླ་བའི་ཟེར་ལ་གནས་པ་དང་།། ས་ཡི་ཁང་པ་ཆུ་ཡི་འཁྲུལ་འཁོར་ཆུ་ལ་རྩེ་ཞིང་བུད་མེད་ལུས་ལ་རེག། མར་སར་ཀྵིར་དང་པོར་ལུས་ལ་བསྐྲུ་སྨན་དང་ནི་ཁྲག་གི་གཏར་དཔྱད་བྱ།། བཟའ་དང་བཏུང་བ་གནས་དང་སྨན་འདི་རྣམས་ཀྱིས་མཁྲིས་པ་རབ་ཏུ་ཞི་བར་འགྱུར།། རྩུབ་དང་ཀྵ་ར་བསྐ་ཁ་ཚ་བ་དང་ནི་འབད་རྩོལ་དྲག་དང་ངར་རྣབས་སྦྱོང་།། བུད་མེད་བསྟེན་ཞིང་ངལ་དུབ་གཉིད་བཅག་ཆུ་ལ་རྩེ་ཞིང་རྐང་པ་འཆག་པར་བྱ།། རེང་བུའི་དུད་བསྟེན་མགོ་བསྲོ་ཁྲུས་དང་སྐྱུག་སྨན་དུགས་དང་མས་གཏོང་ལ་སོགས་པ།། བཟའ་དང་བཏུང་བ་གནས་དང་སྨན་འདི་རྣམས་ཀྱིས་བད་ཀན་ཉེ་བར་ཞི་བར་འགྱུར།། འཕྲོད་ཟས་སྨྱུང་དང་ཚ་བའི་ཆུ་བཏུང་ཞིང་།། ཟས་དང་བྱ་ན་ཡང་ཞིང་ཁ་བའི་བཅུད།། རྩུབ་བྲལ་དུགས་དང་འཇུ་བ་བསྟེན་པ་དང་།།  དེ་བཞིན་ལུས་ཀྱི་སྟེང་འོག་སྦྱང་བར་བྱ།།  དགུན་སྟོད་དབྱར་དང་དགུན་སྨད་རླུང་གི་དུས།། མཁྲིས་པ་སྟོན་དང་སོ་ག་ཚ་བའི་དུས།། བད་ཀན་དཔྱིད་ཀ་མེ་ཏོག་འོང་དུས་འཁྲུགས།། དེ་ལ་དེ་བཞིན་ཕན་པའི་སྨན་བསྟེན་བྱ།། བད་ཀན་འཁྲུགས་ལ་སྐྱུག་སྨན་སྦྱར་བར་བྱ།། མཁྲིས་པའི་རྣམ་འགྱུར་བྱུང་ལ་བཀྲུ་སྨན་བཏང་།། རླུང་གི་བདག་ཉིད་འཇམ་རྩིས་འཇོམས་པར་འགྱུར།། འདུ་འཕྲོད་སྐྱེས་ལའང་འདྲེས་མ་དེ་དག་གོ།། རླུང་ལ་སྐྱུར་དང་མར་ཁུ་ལན་ཚྭ་དང་།། མངར་བའི་བཟའ་དང་བཏུང་བ་རྣམས་ཀྱིས་སོ།། མཁྲིས་པ་ལ་ནི་དེ་བཞིན་མངར་བ་དང་།། ཁ་དང་བསྐ་བ་གྲང་བ་རྣམས་ཀྱིས་སོ།། བད་ཀན་ལ་ཡང་ཁ་དང་ཚ་བ་དང་།། རྩུབ་དང་བསྐ་བ་རྣོ་བའི་རོ་རྣམས་ཀྱིས།། དེ་རྣམས་བཟའ་བས་ཉེ་བར་འགྲོ་འགྱུར་བ།། ནད་ནི་རབ་ཏུ་ཞི་བར་འགྱུར་བ་ཡིན།། བློ་གཞན་ཉིད་ཀྱིས་གང་དེ་མ་བསྟན་གང་ཞིག་བསྟན།། ནད་རྣམས་རང་གིས་ཡང་དག་རྟོགས་ནས་ཇི་ལྟའི་ཚུལ།། སྨན་རྣམས་བློ་གྲོས་ཆུང་བ་རྣམས་ལ་བྱས།། བསྟན་བཅོས་སུ་ནི་ཅུང་ཟད་གཏན་ཕབ་འབྲས་བུར་བྱས།། ཡོན་ཏན་ལྷག་ཅན་སྦྱོར་བ་བརྒྱ་པ་བརྗོད་པ་ཡིས།། བསོད་ནམས་བླ་མེད་པ་བདག་གིས་གང་ཐོབ་པ།། དེ་ཡིས་རྣམ་པ་སྣ་ཚོགས་ནད་ཀྱིས་གཟིར་གྱུར་པ།། མཐའ་ཡས་འགྲོ་བ་རྣམས་ཀྱི་ནད་ནི་མེད་གྱུར་ཅིག། སྦྱོར་བ་བརྒྱ་པ་ཞེས་བྱ་བའི་སྨན་གྱི་གཞུང་འཕགས་པ་ཀླུ་སྒྲུབ་ཞབས་ཀྱིས་མཛད་པ་རྫོགས་སོ།།

          བལ་པོའི་པཎྜིཏ་ཆེན་པོ་བྲམ་ཟེ་ཛེཏ་ཀརྞའི་ཞལ་སྔ་ནས་དང་པོ་རྩ་འགྲེལ་ལན་ཅིག་གསུངས་ཤིང་། དུས་ཕྱིས་རྒྱ་གར་ཤར་ཕྱོགས་ཀྱི་པཎྜིཏ་བུདྡྷ་ཤྲི་ཛྙཱནའི་ཞལ་སྔ་ནས་སྟོད་ཅུང་ཟད་གསུངས་ནས། གྲུབ་པའི་ཞིང་སྐྱིད་རོང་འཕགས་པ་འཇིག་རྟེན་དབང་པོའི་གཙུག་ལག་ཁང་ལ་ཅུང་ཟད་ལས་མི་རིང་བ། ཆེན་པོའི་ཆེན་པོ་རྣམས་ཀྱི་གདན་ས་དཔལ་ཤེལ་གྱི་གཙུག་ལག་ཁང་དུ་སྡོམ་བརྩོན་དམ་པ་སྡེ་སྣོད་གསུམ་དང་། རྒྱུད་དང་རྒྱུད་ཀྱི་ཡན་ལག་རྣམས་ལ་ལེགས་པར་འདྲིས་ཤིང་། ཁྱད་པར་དུ་ཚེའི་རིག་བྱེད་ཡན་ལག་བརྒྱད་པའི་སྙིང་པོ་བསྡུས་པའི་གཞུང་དོན་ལེགས་པར་རྟོགས་པ་དགེ་སློང་ཨམོགྷའི་གསུང་གིས་བསྐུལ་ནས། མང་དུ་ཐོས་པའི་ལོ་ཙྖ་བ་ཤཱཀྱའི་དགེ་སློང་དཔལ་ཉི་མ་རྒྱལ་མཚན་བཟང་པོས་འགྲེལ་པ་གསུམ་དང་བསྟུན་ཏེ་བསྒྱུར་ཞིང་ལེགས་པར་གཏན་ལ་ཕབ་པ།།  

གསོ་དཔྱད་གཞུང་ལུགས་བརྒྱ་ཕྲག་དུ་མའི་གནས།། སྣ་ཚོགས་མངོན་བརྗོད་ཐ་དད་སྡེབ་སྦྱོར་ཅན།།

ཡ་མཚན་བརྒྱན་ལ་ལེགས་སྦྱར་ཚིག་གིས་སྤེལ།། གང་འདི་བསྒྱུར་དགེས་ནད་རྣམས་ཞི་བར་ཤོག། །།

མཐའ་མའི་འདོན་ཐེངས་།: 10.08.2021 ཉིན། 11:29 AM