སྨན་རྩིས་དྲ་བ། - ྋགོང་ས་མཆོག་གི་བཀའ་སློབ།

སྤྱི་ལོ་ ༡༩༧༨ ཟླ་ ༦ ཚེས་ ༡༥ ཉིན་དགེ་སློབ་ཚོར་སྩལ་བའི་བཀའ་སློབ།
བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 01.03.2011
ྋགོང་ས་མཆོག་གི་བཀའ་སློབ། >> སྤྱི་ལོ་ ༡༩༧༨ ཟླ་ ༦ ཚེས་ ༡༥ ཉིན་མཇལ་བཅར་སྐབས་སྩལ་བའི་བཀའ་སློབ།

སྤྱི་ལོ་ ༡༩༧༨ ཟླ་ ༦ ཚེས་ ༡༥ ཉིན་སྐབས་གསུམ་པའི་སློབ་ཐོན་སྨན་པ་རྣམས་མཇལ་བཅར་སྐབས་སྩལ་བའི་བཀའ་སློབ། སྨན་སློབ་སྐབས་གཉིས་པ་དང་ཁོང་ཚོའི་བར་ལ་ཁྱད་པར་འདུག་གམ། གང་དེ་ཡག་ག་འདུག ཅེས་བཀའ་རྩད་གནང་བར། སློབ་དགེ་བར་ཞི་ཕུན་ཚོགས་དབང་རྒྱལ་ལགས་ནས་སྨན་སློབ་སྐབས་གཉིས་པ་རྣམས་བརྩོན་འགྲུས་ཆེན་པོ་ཡོད། ད་ལྟའི་སྨན་སློབ་འདི་ཚོ་བསམ་བློ་གུ་ཡངས་པོ་ཞེ་དྲག་ཡོད་ཅེས་ཞུས། བཀའ་སློབ་གནང་དོན། ད་ཁྱེད་ཚོ་ལོ་ལྔ་སློབ་སྦྱོང་བྱས་ནས་ཐོན་པ་རེད། གཞི་རྩ་སློབ་སྦྱོང་འདིའི་ཐོག་ཉམས་མྱོང་ཡག་པོ་གསོག་དགོས། གཙོ་ཆེ་ཤོས་ཉམས་མྱོང་རེད། དཔེར་ན་སློབ་སྦྱོང་འདི་སྒོ་ལྕགས་ལྟ་བུ་དང༌། ཉམས་མྱོང་ལྡེའུ་མིག་འདྲ་བས་རིམ་པས་སྒོ་ཕྱེ་གྱིན་ཕྱེ་གྱིན་འགྲོ་དགོས་པ་དང༌། ད་ལྟ་བར་སློབ་སྦྱོང་བྱས་པ་དེ་མ་བརྗེད་པའི་ཐོག་ཕྱག་དཔེ་མང་པོ་ཀློག ཐོས་རྒྱ་མཐོང་རྒྱ་ཆེ་ཙམ་བྱེད་དགོས་པ་མ་ཟད་ཉམས་མྱོང་མང་ཙམ་གསོག་དགོས། ངས་བལྟས་ན་ཕྲུ་གུ་རིག་པ་བཀྲ་བ་འགའ་ཤས་ནས་ཕྱི་ལུགས་ཁབ་རྒྱག་རྒྱུ་སོགས་ལ་དོ་སྣང་འདྲ་བྱས། འགའ་ཤས་ཀྱིས་ཧིན་རྡི་སྐད་ལ་ཡང་དོ་སྣང་བྱས་ནས་ཨ་ཡུར་ཝེ་དྷའི་ལེགས་ཆ་གང་ཡོད་བླང་ཐུབ་ན་བསམ་པ་འདུག རྩ་བའི་ང་རང་ཚོའི་སྨན་འདི་གཞི་ལ་བཞག་པའི་ཐོག་ཕྱི་ནས་ལེགས་ཆ་གང་ལེན་ཐུབ་ཐུབ་བྱས་ན་ཡག་པོ་འདུག མ་འོངས་ང་རང་ཚོའི་རིག་གཞུང་མ་ཉམས་པ་འཛིན་རྒྱུ་གལ་ཆེན་པོ་རེད། བསམ་བློ་གུ་ཡངས་པོ་བྱས་ན་ཡག་ཤོས་དེ་རེད། ཅེས་བཀའ་སྩལ།

མཐའ་མའི་འདོན་ཐེངས་།: 01.03.2011 ཉིན། 11:16 PM

<< སྔ་མ།