སྤྱི་ལོ་ ༡༩༦༩ ཟླ་ ༨ ཚེས་ ༤ ཉིན་བོད་གཞུང་སྨན་རྩིས་ཁང་དུ་ཆིབས་བསྒྱུར་བསྐྱངས་སྐབས་དགེ་སློབ་རྣམས་ལ་སྩལ་བའི་བཀའ་སློབ། ཐོག་མར་ད་ཕན་སློབ་གཉེར་ཇི་བྱས། དཔེ་ཁྲིད་ཇི་སོང༌། དཔེ་ཆ་བློ་འཛིན་བྱ་རྒྱུར་དཀའ་ངལ་ཡོད་མེད་སོགས་བཀའ་འདྲི་གནང༌། ང་རང་ཚོའི་བོད་ཡུལ་དུ་དཔེ་ཆ་བློ་འཛིན་བྱ་རྒྱུའི་གོམས་སྲོལ་དར་པོ་ཡོད། ལྷག་པར་མཚན་ཉིད་ལྟ་མཁན་ཚོ་ནི་དཔེ་ཆ་ཤིན་ཏུ་འབོར་ཆེན་བློ་འཛིན་བྱེད་དགོས། ཡང་འདོན་ཆོག་འགའ་ཞིག་བློ་འཛིན་བྱས་པའི་ཚིག་དོན་མ་ཤེས་ན་དགོས་པ་དེ་ཙམ་མེད་ཀྱང་དོན་དག་རྣམས་ལེགས་པོ་ཤེས་ན་ཡུན་རིང་པོའི་ཆ་ནས་ཕན་ཐོགས་ཡོད་པ་ཞིག་རེད། གཞུང་ཚིག་རྣམས་རང་གི་ཡིད་ཐོག་ཏུ་ཡོད་ན་དེའི་དོན་མི་བརྗེད་པ་དང༌། ཚིག་གནད་ཕྲ་མོའི་སྤུ་རིས་འབྱེད་མཚམས་ཀྱི་ཞིབ་ཆ་བྱེད་པར་ཕན་ཁྱད་ཡོང་གི་རེད། ད་ལྟ་འདིར་མཐུན་རྐྱེན་མ་འཛོམས་པ་དང༌། འཚོ་བའི་ཐོག་དཀའ་ངལ་ཡོད་ཤག་ཀྱང་དེ་ཚོ་རིམ་པས་སེལ་ཐུབ་ཀྱི་རེད། ཁྱེད་རང་ཚོ་རང་རང་འདོད་མོས་ཀྱིས་བོད་སྨན་སློབ་རྒྱུའི་ཆེད་དུ་འདི་གར་འབྱོར་ནས་སློབ་སྦྱོང་འགོ་འཛུགས་བྱེད་བཞིན་དུ་ཡོད་ཀྱང༌། རྩ་བའི་སློབ་ཚན་གསར་པ་ཞིག་ལ་སློབ་སྦྱོང་སྤྲོད་སྟངས་ཀྱང་ད་ཕན་བོད་ནང་གི་ལུགས་སྲོལ་ལྟར་སློབ་ཁྲིད་བྱེད་ཀྱི་ཡོད་ཤག དེ་གཅིག་བྱས་ན་ཁྱེད་རང་ཚོར་དཀའ་ངལ་དང༌། བློ་སྦུག་དོག་སྣང་ཡོང་གི་མེད་དམ་བསམས་བྱུང༌། ཁྱེད་རང་ཚོའི་སློབ་ཚན་འདི་ནི་རིག་གནས་ཆེ་བ་ལྔའི་ནང་གསེས་གསོ་བ་རིག་པ་ཞེས་རང་རེ་བོད་ཀྱི་ཤེས་རིག་གལ་ཆེན་པོ་ཞིག་རེད། འདི་ནི་ཤེས་བྱའི་རྣམ་གྲངས་ཙམ་མ་ཡིན་པར་སེམས་ཅན་མང་པོར་ཁ་ཡོད་ལག་ཡོད་ཀྱི་ཕན་ཐོགས་ཡོད་ཅིང༌། བོད་སྨན་འདི་རྒྱ་ཆེ་གཏིང་ཟབ་ཅན་ཞིག་ཡིན་ཚོད་འདུག ནུབ་ཕྱོགས་པའི་སྨན་སྣས་མ་ཕན་པའི་ནད་རྙིང་འགའ་ཤས་བོད་སྨན་གྱིས་ཕན་པའི་ལོ་རྒྱུས་ཡོང་གི་འདུག་པ་དང༌། ཕྱི་རྒྱལ་གྱི་ཨེམ་ཆི་མང་པོས་ཀྱང་དོ་སྣང་དང་ལག་ལེན་བྱ་འདོད་བྱེད་ཀྱི་འདུག དེང་བོད་སྨན་གྱིས་རང་གཞན་མང་པོར་ཕན་ཐོགས་རྒྱ་ཆེན་ཡོང་ངེས་མ་ཟད། འདི་བརྒྱུད་ནས་རྒྱལ་བའི་བསྟན་པ་རིན་པོ་ཆེ་ལའང་ཞབས་འདེགས་བསྒྲུབ་ཐུབ་པ་ཡོང་རྒྱུ། ནང་པ་སངས་རྒྱས་པའི་ཆོས་ནས་བཤད་ན་སྨན་སྦྱིན་ནི་གཞན་ཕན་མཆོག་ཏུ་དགེ་བ་ཞིག་ཡིན་ཞིང༌། ལྷག་པར་བྱང་ཆུབ་སེམས་དཔའི་བསླབ་བྱའི་ཁོངས་སུ་ཡོང་རྒྱུར་ཁྱེད་རང་ཚོས་བོད་སྨན་གྱི་ཐོག་ནས་རང་གཞན་གྱི་དོན་གཉིས་འགྲུབ་པའི་ཐབས་ཚུལ་ལ་གཞོལ་དགོས། བོད་སྨན་སློབ་སྦྱོང་བྱེད་སྐབས་ད་ཕན་རང་རེའི་གོམས་སྲོལ་ལ་སངས་རྒྱས་ཀྱི་གསུང་ལ་དད་པའི་རྗེས་འབྲངས་ཀྱི་ཡིད་ཆེས་ཀྱིས་རང་ངོས་ནས་རྒྱུ་མཚན་བརྟག་ཞིབ་ཞིབ་མོ་མི་བྱེད་པར་མཐོང་བ་བརྒྱུད་པའི་ལག་ལེན་བྱེད་སྲོལ་ཙམ་གྱིས་ཚིམས་ནས་བསྡད་པས་ནམ་ཞིག་རྒྱུ་མཚན་འགྲེལ་བཤད་རྒྱག་དགོས་སྐབས་སངས་རྒྱས་ཀྱིས་གསུངས་ཚུལ་ཙམ་དང༌། ལྷ་རྗེ་ན་རིམ་གྱི་མཐོང་བརྒྱུད་ཕྱག་བཞེས་རེད་ཟེར་རྒྱུ་ཙམ་མ་གཏོགས་མ་བྱུང་ན་མི་འགྲིག དེས་ན་སངས་རྒྱས་ཀྱི་བཀའ་ལ་ཡིད་ཆེས་སྐྱེ་ཚུལ་ཡང་རྒྱུ་མཚན་མཐོང་བའི་སྒོ་ནས་ངེས་པ་རྙེད་པའི་ཡིད་ཆེས་དགོས་པ་དང༌། མཐོང་བརྒྱུད་ཕྱག་སྲོལ་གྱི་གནད་འགག་རྒྱུ་མཚན་ཤེས་པ་ཞིག་བྱས་ཏེ། དེ་ཡང་དངོས་ཡོད་གནས་ཚུལ་འགྲོ་སྟངས་དེང་དུས་ཚན་རིག་པས་བཤད་པ་རྣམས་དང་སྦྲེལ་ནས་རང་རེའི་སྨན་གཞུང་རབ་འབྱམས་ལ་དཔྱད་པ་དང༌། རང་གཞན་གྱི་མཐོང་ཆོས་ཉམས་མྱོང་སོགས་སྒོ་མང་པོ་ནས་དཔྱད་བརྟག་ཞིབ་མོ་བྱེད་དགོས། དེ་འདྲ་བྱུང་ན་རྒྱུ་མཚན་འདི་ལ་དེ་བརྟེན་གྱི་སྒོ་ནས་འགྲེལ་བཤད་མཐའ་མ་འགག་པ་རྒྱག་ཐུབ་རྒྱུར་སངས་རྒྱས་བཅོམ་ལྡན་འདས་ཀུན་མཁྱེན་དུ་ཁས་ལེན་པ་དང་མི་ལེན་པ་སུ་འདྲ་ཞིག་གི་ངོར་ཡང་བོད་སྨན་གྱི་ཕན་ནུས་ཁུངས་སྐྱེལ་དག་འབུད་བྱེད་ཐུབ། དེ་མིན་དེང་དུས་ཀྱི་མི་རབས། ཚན་རིག་འཕྲུལ་ཐབས་ཡར་རྒྱས་གོང་མཐོར་སོང་སྟེ་ཟླ་བའི་སྒང་ལ་འགྲོ་བའི་སྐབས་ལ་དབང་བརྟུལ་དད་པའི་རྗེས་འབྲང་གི་ཡིད་ཆེས་ཙམ་གྱིས་མི་ཆོག དཔེར་ན་འཛམ་བུ་གླིང་ཧྲིལ་མོ་ཡིན་པ་མཐོང་ཆོས་སུ་ཡོད་བཞིན་པར་མཛོད་ཀྱི་བཤད་ཚུལ་ལྟ་བུའི་འཛམ་གླིང་ལེབ་མོ་ཡིན་ལུགས་གཞུང་ནས་གསུངས་པ་ཙམ་རྒྱུ་མཚན་དུ་བྱས་ཏེ་གླེན་པ་ཨུ་ཚུགས་བྱས་པས་མི་འགྲིག རིལ་པོ་དང་ལེབ་མོ་ཞེས་པའང་ལྟོས་ས་བལྟོས་འཇོག་གིས་བཞག་པས་ལྟོས་ས་སོ་སོ་ལ་བལྟོས་ཏེ་རིལ་པོ་དང་ལེབ་མོའི་རྣམ་གཞག་འབྱེད་ཐུབ་པ་སོགས་འགྲེལ་བཤད་རྒྱག་དགོས་པ་བཞིན་ཡིན། ཡང་བོད་སྨན་རྩ་བཤད་སོགས་ཀྱི་གཞུང་ནས་གསལ་འཁོད་ཡོད་ཀྱང་བར་ལམ་ལག་ལེན་མེད་པའི་སྨན་བཅོས་གཤག་ལས་སོགས་ལག་ལེན་བྱེད་སྲོལ་མེད་པས་བསྐྱུར་རྐྱང་མིན་པར་ནུབ་ཕྱོགས་ཀྱི་གཤག་བཅོས་ལག་ལེན་དང་གོ་བསྟུན་ནས་སླར་ལག་ལེན་བསྒྲུབ་ཐབས་དང༌། གཉན་ནད་གསར་ཐོན་རིགས་ཀྱི་སྨན་སྣ་བར་ལམ་ལག་ལེན་མེད་པ་གསར་སྦྱོར་བྱ་རྒྱུ་ཡོད་ངེས་པས་དེ་རིགས་དུས་བསྟུན་གསར་སྦྱོར་བྱེད་འོས་རིགས་ཀྱང་བསམ་གཞིགས་ནན་ཏན་བྱ་དགོས། རིམ་པས་མཐུན་རྐྱེན་དང་བསྟུན་རིལ་བུ་དང་ཐང་སོགས་སྨན་སྦྱོར་བྱེད་སྟངས་སྨན་རྒྱུའི་ཉིང་ཁུ་བཏོན་ཏེ་དྭངས་མ་བཟོ་འདོན་ཐུབ་པའི་ཐབས་ཤེས་བྱུང་ན་སྨན་ཐུན་ཆུང་ལ་ནུས་པ་མྱུར་བ། མིག་སྔར་མཛེས་པ་སོགས་ཕྱི་རྒྱལ་སྨན་ལྟར་སྨན་བྱང་དང་འབྲེལ་ཚོང་འགྲེམ་རྒྱ་ཆེ་ཐུབ་ཐབས་ཀྱང་བསམ་བློ་གཏོང་དགོས། ཕྱོགས་མཚུངས་དེང་དུས་ནུབ་ཕྱོགས་པའི་སྨན་བཅོས་ཀྱང་ཤེས་ཐབས་ཀྱིས་བོད་སྨན་དང་ཟུང་འབྲེལ་ཕན་ཚུན་ལེགས་ཆ་སྣོན་སྤེལ་བྱེད་རྒྱུ་བྱུང་ན་ཧ་ཅང་ལེགས་པོ་ཡོང་རེ་དང༌། རྒྱ་གར་གྱི་གནའ་བོའི་སྨན་བཅོས་རིགས་ཀྱང་དེང་སང་ཉམས་མེད་ཡོད་འདུག འདི་དང་བོད་སྨན་བུ་སྤུན་ལྟ་བུར་བརྟེན་ཕན་ཚུན་ལེགས་ཆ་ཕྱོགས་བསྡུས་བྱེད་རྒྱུ་ངེས་པར་ཡོང་རྒྱུར་ད་ལྟ་རྒྱ་གར་འཕྲོད་བསྟེན་ལས་ཁུངས་ལ་འབྲེལ་བ་ཞུ་མུས་ལྟར་རང་རེའི་སློབ་ཕྲུག་འགའ་རེ་ཚུད་ལེན་ཐུབ་ཐབས་བགྱིད་མུས་བཅས། འདིར་ཁྱེད་རང་ཚོ་བསམ་བློ་གུ་ཡངས་པོའི་ཐོག་ནས་གཞན་ཕན་གསོ་བ་རིག་པའི་སྲོལ་བཟང་མི་ཉམས་གོང་འཕེལ་ཡོང་བ་ཅིས་ཀྱང་བྱེད་དགོས། བཀྲ་ཤིས་བདེ་ལེགས། ཞེས་བཀའ་སྩལ།མཐའ་མའི་འདོན་ཐེངས་།: 23.09.2013 ཉིན། 4:38 PM
<< སྔ་མ།