༄༅། །མཉམ་མེད་ཤྰཀྱའི་རྒྱལ་པོ་མངོན་པར་སངས་རྒྱས་པའི་དུས་ཀྱི་ཟླ་འཛིན་རྒྱ་རྩིས་ཡར་སློག་

རི་མོའི་ལམ་ནས་གསལ་བར་བཀོད་པ་ཕུག་པའི་དགོངས་རྒྱན་

ཞེས་བྱ་བ་བཞུགས་སོ།།

མཁས་དབང་ཚེ་ཏན་ཞབས་དྲུང་ངམ་

འཇིགས་མེད་རིག་པའི་བློ་གྲོས་ཀྱིས་བརྩམས།

ཁོང་གི་གསུང་འབུམ་ལས་བཏུས།

༄༅།།འཛམ་བུའི་གསེར་གྱི་རི་དབང་ལྷུན་སྟུག་དཔལ་ལས་མཛེས།།

དྲི་ཟ་རྣམ་པར་མྱོས་པའི་འགྱུར་ཁུགས་དབྱངས་ལས་སྙན།།

མཐའ་བྲལ་ཁྱོན་ཡངས་ཆུ་གཏེར་ཆེན་པོའི་འཇིངས་ལས་ཟབ།།

རྣམ་འདྲེན་ཤཱཀྱ་སེང་གེའི་སྐུ་གསུང་ཐུགས་ལ་འདུད།།

སོ་གཉིས་ཕྱེད་དུ་གཏུབས་པའི་ན་ཚོད་ལྡན།།

མཁྱེན་རབ་སྣང་བའི་ཉིན་བྱེད་འོད་དུ་འཚེར།།

ཟབ་གསལ་མྱུར་བའི་བློ་གྲོས་མཆོག་སྦྱིན་མཁན།།

འཇམ་དཔལ་རྡོ་རྗེ་རྣོན་པོ་མཆོད་པའི་ཞིང༌།།

ཡོན་ཏན་འབུམ་དགུའི་རི་མོ་ཡེ་ཤེས་ཀྱི།།

མེ་ལོང་གཅིག་ཏུ་ཆུབ་པའི་ཡོ་ལང་གིས།།

བདག་བློ་རིག་པའི་གཏེར་དུ་སྒྲུབ་མཛད་མཁན།།

ཡོངས་འཛིན་རྣམ་པའི་ཞབས་པད་གཙུག་ན་ལྷམ།།

རིག་པའི་ཆུ་གཏེར་མ་དྲོས་ཀླུང༌། །འདོད་འཇོའི་རིན་ཆེན་བྱེ་བས་གཏམས། །ཕན་བདེ་གྲུ་ཆར་འབེབས་པའི་དཔྱིད། །སྟོན་ཁའི་སྤྲིན་གྱིས་རོལ་བར་ལྟ། །རྩིས་རིག་མན་ཤེལ་དྭངས་མའི་ཁམས། །ཉི་ཟླ་ཁྱིམ་དང་གཟའ་སྐར་གྱི། །གོ་ལར་བག་ཡངས་རྩེན་པའི་གར། །མཐོང་བའི་འཕྲུལ་འདེགས་གཅིག་པུར་སྙེམས། །ཁྱད་པར་ཙྰི་ནའི་རྩིས་ཀྱི་འཕྲུལ། །བསྲེགས་བཅད་བརྡར་བའི་གསེར་གྱི་རྒྱན། །འཁྲུལ་མེད་དབྱིག་གི་སྙིང་བོ་རུ། །རྩོད་མེད་མཁས་རྣམས་མགྲིན་གཅིག་བསྔགས། །དེ་ཕྱིར་ཐུབ་ཆེན་མངོན་འཚང་རྒྱའི་ཚེ། །གཟའ་འཛིན་བྱུང་ཚུལ་ལུང་ལས་གསུངས་པའི་དོན། །སྔོན་མེད་རིག་འཕྲུལ་བཀྱེས་ཏེ་རྒྱ་རྩིས་ཀྱི། །ཡར་སློག་རི་མོའི་ལམ་ནས་བདག་གིས་དབྱེ། །

འདིར་བདག་ཅག་གི་འདྲེན་པ་བླ་ན་མེད་པ་མཉམ་མེད་ཤཱཀྱའི་རྒྱལ་པོ་དེ་ཉིད་སྐུ་བལྟམས་པ་དང༌། ཁབ་ནས་བྱུང་བ་དང༌། མངོན་པར་སངས་རྒྱས་པ་དང༌། དུས་འཁོར་གྱི་རྩ་རྒྱུད་གསུངས་པ་དང༌། མྱ་ངན་ལས་འདས་པའི་ཚུལ་བསྟན་པ་རྣམས་ཀྱི་ལོ་ལ་མི་མཐུན་པ་མང་དུ་བྱུང་བ་ལས། འདིར་དཔལ་ལྡན་ཕུག་པ་ཡབ་སྲས་ཀྱིས་སྟོན་པ་དགུང་ལོ་སོ་ལྔ་བ་ཤིང་རྟ་ལོའི་ས་གའི་ཉ་ལ་སངས་རྒྱས་ཤིང་དེའི་ཚེ་གཟའ་འཛིན་བྱུང་བའི་ཚུལ་པད་དཀར་ཞལ་ལུང་མ་བུ་དང༌། དྲི་མེད་འོད་རྒྱན་རྣམས་སུ་ལུང་དང་རིག་པ་བརྒྱ་ཕྲག་གིས་གཏན་ལ་ཕབ་པའི་རྗེས་སུ་ཞུགས་ཏེ་སྨྲ་བའི་ལམ་ཡངས་པོར་བྱས་ན། ཐོག་མར་སངས་རྒྱས་པའི་དུས་དེར་ཟླ་འཛིན་ཡོད་པར་གསུངས་པའི་ཁུངས་འགོད་པ་ནི། འདུལ་བ་ལས། བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་བརྙེས་པ་ན་གྲགས་འཛིན་མ་ལའང་ཁྱེའུ་ཞིག་བཙས་སོ།། ཟླ་བའང་སྒྲ་གཅན་གྱིས་ཟིན་ཏོ།། ཞེས་དང༌། འདི་བཙས་པ་ན་ཟླ་བའང་སྒྲ་གཅན་གྱིས་ཟིན་པས་དེ་བས་ན་ཁྱེའུའི་མིང་སྒྲ་གཅན་ཟིན་ཞེས་བཏགས་སོ།། ཞེས་པ་དང༌། མངོན་པར་འབྱུང་བའི་མདོ་ལས་ཀྱང༌། དེ་ནས་རྒྱལ་པོ་ཟས་གཙང་ལ་རང་གི་སྐྱེས་བུ་རྣམས་ཀྱིས་ལྷ་དགྱེས་པ་བསྐྱེད་དུ་གསོལ། གཞོན་ནུས་བླ་ན་མེད་པའི་ཡེ་ཤེས་བརྙེས་སོ།། དེ་ཐོས་པ་དང་ཉི་མ་དེ་ཉིད་ལ་གྲགས་འཛིན་མ་ལ་ཡང་ཁྱེའུ་ཞིག་བཙས་སོ།། བདུད་རྩི་ཟས་ལ་ཡང་ཁྱེའུ་ཞིག་བཙསས་སོ།། དེ་ཉིད་ཀྱི་ཉིན་མོ་ཟླ་བ་ཡང་སྒྲ་གཅན་གྱིས་ཟིན་ཏོ།། ཞེས་པ་རྣམས་སོ།། དེ་ཡང་སྐར་རྩིས་ཀྱི་སྟེང་ནས་ཡར་སློག་གཟའ་འཛིན་གྱི་རི་མོ་གང་ཤར་ཕུག་པ་ཡབ་སྲས་ཀྱི་ལེགས་བཤད་རྣམས་སུ་གསལ་བ་ལ་དེ་ལྟ་མོད། ད་ལྟ་རྒྱ་བོད་ཀྱི་ཡུལ་གྲུ་ཀུན་ཏུ་གཙིགས་པར་བྱེད་པ་རྒྱ་རྩིས་ཀྱི་སྟེང་ནས་ཡར་སློག་གི་རྩིས་བྱས་ནས་སྟོན་པ་སངས་རྒྱས་པའི་དུས་ཀྱི་གཟའ་འཛིན་རི་མོ་སུས་ཀྱང་བཀོད་པ་མི་སྣང་བས། འདིར་ཚུལ་དེ་ཉིད་ལས་བརྩམས་ཤིང་དུས་འཁོར་བསྟན་རྩིས་ཀྱིས་ཁོག་ཕུབ་ནས་ཡར་སློག་གི་ལོ་དང་ཟླ་བ་དག་པ་དང༌། རྩ་བའི་དྷྲུ་ཝ་རྣམས་ཇི་ལྟར་བཙལ་བ་དང༌། ལོ་དེའི་སྒང་གི་རི་མོ་བྲིས་པའི་སྟེང་ནས་ཟླ་ཤོལ་ཡོད་མེད་བརྟགས་ཏེ་མི་འཆུག་པའི་གཟེར་བཏབ་པ་དང༌། ཚུལ་དེ་དག་གི་སྒོས་གཟའ་འཛིན་བཙལ་ཏེ་ཟླ་བའི་ཆ་ཅི་ཙམ་བསྒྲིབས་པ་དང༌། དུས་ཚོད་གང་ལ་འཛིན་གཏོང་བྱེད་པ་རྣམས་རིམ་པར་དགོད་པར་བྱ་ཡི། རྩིས་རིག་སྨྲ་བའི་དཔྱོད་ལྡན་རྣམས་ཀྱིས་ཡུད་ཙམ་གཟིགས་པར་ཅི་གནང༌། དེ་ཡང་དཔའ་རིའི་སེར་ཆེན་ཞབས་དྲུང་གི་རྒྱ་རྩིས་བསམ་འཕེལ་དབང་རྒྱལ་རྩོམ་ལོ་རབ་བྱུང་བཅུ་བཞིའི་ཤིང་བྱའི་སྔར་ལོ་ཆུ་ཕག་ནས་རབ་བྱུང་དང་བོའི་མེ་ཡོས་བགྲངས་པའི་བར་གྱི་ལོ་ལ་བརྒྱད་བརྒྱ་སོ་བདུན། དེ་ནས་རིགས་ལྡན་བཅུ་བ་དང་བཅུ་གཅིག་པ་གཉིས་ཀྱི་ལོ་མེ་མཁའ་རྒྱ་མཚོ། དེ་ནས་རིགས་ལྡན་ཐོག་མ་འཇམ་དབྱངས་གྲགས་པའི་བར་རིགས་ལྡན་དགུ་དང༌། ཆོས་རྒྱལ་ཟླ་བཟང་ལ་ཐུག་གི་བར་ཆོས་རྒྱལ་དྲུག་པོ་རྣམས་ལ་ལོ་བརྒྱ་རེ་སྟེ་སྟོང་དང་ལྔ་བརྒྱ། སྟོན་པ་མྱ་ངན་ལས་འདས་པའི་ལོ་ལྕགས་འབྲུག་དང་བཅས་པའི་ཟླ་བཟང་གི་ལོ་བཞི། དེ་ནས་སྟོན་པ་དགུང་ལོ་སོ་ལྔ་བ་སངས་རྒྱས་པའི་ཤིང་རྟ་བཅས་བགྲངས་པས་ལོ་ཞེ་དྲུག་སྟེ་ཉིས་སྟོང་བདུན་བརྒྱ་དགུ་བཅུ་ནི་སེར་ཆེན་རྩིས་གཞུང་སྟེང་ནས་སངས་རྒྱས་པའི་བར་དུ་སློག་པའི་ལོ་དག་པའོ།། ལོ་དག་དེ་ག་བརྩི་གཞིར་བཀོད་དེ་སྐར་རྩིས་ཀྱི་དྷྲུ་ཝ་ཡར་སློག་གི་འགྲོས་བཀབ་ནས་བྲིས་པའི་ཟླ་དག་དང་། རྩ་བའི་དྷྲུ་ཝ་ལྔ་དང༌། སྒང་གི་ཚད་ཁྲའི་སྟེང་ནས་སངས་རྒྱས་པའི་ལོར་རྒྱ་རྩིས་ལུགས་ཀྱིས་གསུམ་པ་ལ་ཤོལ་བྱུང་ཚུལ་དང༌། དེ་ནས་ས་གའི་ཉིན་རྩིས་བྲིས་ཏེ་གཟའ་འཛིན་བྱུང་ཚུལ་རྣམས་ནི་རེའུ་མིག་ཏུ་བཀོད་ན་ལྟ་བདེ་ཞིང་རྟོགས་སླ་བས་འདི་མན་རེའུ་མིག་ཏུ་འགོད་པར་འདོད་དོ།།

༄༅། །བི་ཛ་ཡནྟུ། བདག་བློའི་ཨུཏྤལ་འདབ་ཡངས་རིག་པའི་ཉིན་བྱེད་སྟོང་གིས་གཟིགས། །ལན་བརྒྱར་གྲོལ་བ་ལས་འོངས་མཁས་རྣམས་མྱོས་པ་སྦྱིན་པའི་བཅུད། །སྔོན་མེད་རོ་མཆོག་བྲོ་བ་བློ་གསལ་བུང་བའི་དགའ་སྟོན་ཆེར། །རྣམ་པར་སྤེལ་བ་འདི་ཀོ་རིག་གཞུང་མཛེས་པའི་རྒྱན་གྱུར་ཅིག །ཅེས་བྱ་བ་ནི་བྷོ་ཊའི་ལྗོངས་ཀྱི་རྩིས་རིག་སྨྲ་བ་ངག་དབང་དབྱངས་ལྡན་རིག་པའི་འདོད་འཇོ་ཞེས་བྱ་བས། བུ་ལུགས་ཀྱི་བཞེད་པ་གཞིར་བཞག་པའི་སྟེང་ནས་སྟོན་པ་འཚང་རྒྱ་དུས་ཀྱི་གཟའ་འཛིན་ཡར་སློག་གི་རི་མོའང་འབད་རྩོལ་ཆེན་པོས་བྲིས་ཀྱང༌། རྒྱ་རྩིས་དང་བསྟུན་ན་ཕུག་པའི་བཞེད་པ་ཉིད་རྒྱུད་སྡེར་གསུངས་པའི་ཕྱིའི་མངོན་བྱང་གི་དུས་ཁྱད་པར་ཅན་དང༌། མདོ་སྡེའི་ལུང་སྔར་དྲངས་པ་དག་དང་མཐུན་ཞིང་གཙིགས་པར་མཐོང་ནས། དེའི་ལུགས་ཀྱི་སྟོན་པ་ཐུབ་པའི་དབང་བོ་འདས་ནས་ལོ་ཉིས་སྟོང་བརྒྱད་བརྒྱ་སུམ་ཅུ་བ། རབ་བྱུང་བཅུ་དྲུག་པའི་བགྲང་བྱ་ཉེར་གསུམ་པ་ས་མོ་གླང་གི་ལོའི་དགུན་གྱི་དུས་སུ། རིག་པའི་འབྱུང་གནས་ཨེ་ཝཾ་དགའ་ཚལ་གྱི་གཙུག་ལག་ཁང་ཆེན་པོའི་བྱ་འདབ་ཏུ་ཚུལ་འདིའི་རི་མོ་ལག་ལེན་དུ་འདེབས་སྐབས་རང་གི་སློབ་བུ་སྨྱུག་ཐོགས་པ་ཟུང་གིས་ཀྱང་རི་མོ་འབྲི་བའི་རོགས་རམ་གང་ལེགས་བགྱིས་པའི་ངོས། ཡིད་བརྟན་དུ་རུང་བར་བཀོད་པ་བློ་གསལ་ཡོངས་ཀྱི་དགའ་སྟོན་དུ་གྱུར་ཅིག། །།

མཐའ་མའི་འདོན་ཐེངས་།: 31.12.2014 ཉིན། 4:27 PM