སྔོན་འགྲོའི་སློབ་ཚན་ཟབ་ཁྲིད་དབུ་འཛུགས་ཞུས།

ཕྱི་ལོ་ ༢༠༢༣ ཟླ་ ༣ ཚེས་ ༡ ཉིན་དྷ་ས་སྨན་རྩིས་མཐོ་སློབ་ཁང་གི་ཚོམས་ཆེན་དུ་སྔ་དྲོ་ཆུ་ཚོད་༩:༣༠ ཐོག ཕྱི་ལོ་ ༢༠༢༢ - ༢༠༢༣ ཤེས་ཡོན་སློབ་ཐུན་གྱི་གསོ་བ་རིག་པའི་སྨན་པ་དཀའ་བཅུ་པའི་སློབ་གཉེར་བ་གསར་པ་གྲངས་བཅོ་ལྔ་ཡོད་པ་རྣམས་ལ་ཉིན་བཅོ་ལྔའི་རིང་སྔོན་འགྲོའི་སློབ་ཚན་ཟབ་ཁྲིད་དབུ་འཛུགས་ཀྱི་མཛད་སྒོ་ཚོགས་གནང་སོང་། མཛད་སྒོའི་ཐོག་མར་རྟེན་འབྲེལ་གྱི་གྲོ་མ་འབྲས་སིལ་དང་བོད་ཇ་འདེགས་འབུལ་ཞུས་རྗེས་དྷ་ས་སྨན་རྩིས་མཐོ་སློབ་ཁང་གི་སློབ་སྤྱི་སྨན་པ་ངག་དབང་བཟོད་པ་ལགས་ནས་འགྲོ་ཕན་སྨན་རྩིས་ཁང་གི་ལོ་རྒྱུས་མདོར་བསྡུས་དང་དགེ་རྒན་དང་སློབ་གཉེར་བ་རྣམས་ངོ་སྤྲོད་གནང་། དེ་ནས་སྐུ་མགྲོན་གཙོ་བོ་སྨན་རྩིས་ཁང་གི་འགན་འཛིན་ཐུབ་བསྟན་ཚེ་རིང་མཆོག་དང་། ཆེས་མཐོའི་སྨན་རྩིས་རིག་གཞུང་ལྷན་ཚོགས་ཀྱི་ཚོགས་གཙོ་ྋསྐུའི་བླ་སྨན་པ་ཚེ་དབང་རྟ་མགྲིན་མཆོག་རྣམ་གཉིས་ནས་སློབ་མ་རྣམས་ལ་འགྲོ་ཕན་སྨན་རྩིས་མཐོ་སློབ་ཁང་དུ་དགའ་བསུ་དང་འབྲེལ་བོད་ཀྱི་གསོ་བ་རིག་པའི་ཤེས་ཡོན་ལ་ཧུར་སྐྱེད་གནང་དགོས་ཚུལ་སོགས་གསུང་བཤད་བཀྲིན་བསྐྱངས་རྗེས་སློབ་གཉེར་བ་རྣམས་དང་དགེ་ལས་རྣམས་ཕན་ཚུན་དབར་ཆེད་ལས་སློབ་ཐུན་ནམ་ཆེད་སྦྱོང་དང་པོའི་སློབ་ཚན་སྐོར་ལ་གོ་བསྡུར་བྱས་ཡོད། མཐར་སློབ་སྤྱི་གཞོན་པ་སྨན་པ་རྣམ་གྲོལ་ལྷ་མོ་ལགས་ནས་སྔོན་འགྲོའི་སློབ་ཚན་ཟབ་ཁྲིད་ཀྱི་ཉིན་དང་པོའི་ལས་རིམ་ཀྱི་མཇུག་སྡོམ་གཏམ་བཤད་ཐོག་མཉམ་རུབ་འདྲ་པར་བླངས་པ་བཅས་མཛད་སྒོ་རྒྱལ་ཁའི་ངང་གྲོལ།

ཕྱི་ལོ་ ༢༠༢༢ - ༢༠༢༣ ལོའི་ཆེད་སྦྱོང་དང་པོའི་སྔོན་འགྲོའི་སློབ་ཚན་ཟབ་ཁྲིད་འདི་ནི་རྒྱ་གར་རྒྱལ་ཡོངས་སྨན་གྱི་ལྷན་ཚོགས་ཀྱིས་བཀོད་ཁྱབ་གཞིར་བཟུང་སྒྲིག་པ་ཞིག་རེད།

དེ་བཞིན་འགྲོ་ཕན་སྨན་རྩིས་ཁང་གི་སྦེང་ལོར་སྨན་རྩིས་མཐོ་སློབ་ཁང་དུའང་འདི་ལོའི་ཟླ་༣ ཚེས་ ༢ ཉིན་ནས་བཟུང་ཉིན་བཅོ་ལྔའི་རིང་སྔོན་འགྲོའི་སློབ་ཚན་ཟབ་ཁྲིད་དབུ་འཛུགས་ཞུས་ཡོད། དེ་ཡང་ཕྱི་ལོ་ ༢༠༢༢ - ༢༠༢༣ ཤེས་ཡོན་སློབ་ཐུན་གྱི་གསོ་བ་རིག་པའི་སྨན་པ་དཀའ་བཅུ་པའི་སློབ་གཉེར་གསར་པ་གྲངས་བཅུ་བཞི་ཡོད་པ་རྣམས་ལ་དེ་གའི་སློབ་སྤྱི་སྨན་པ་རྡོ་རྗེ་རབ་བརྟན་ལགས་ནས་དགེ་ལས་ལྷན་འཛོམས་སྟེང་སྦེང་ལོར་སྨན་རྩིས་མཐོ་སློབ་ཀྱི་ངོ་སྤྲོད་དང་སྦྲགས་དགའ་བསུའི་གསུང་བཤད་གནང་ནས་མཛད་སྒོའི་དྲན་རྟེན་དུ་འདྲ་པར་བླངས་པ་བཅས་མཛད་སྒོ་ཚགས་ཚུད་ངང་གྲོལ།

མཐའ་མའི་འདོན་ཐེངས་།: 28.03.2023 ཉིན། 10:28 AM