ད་ནི་སྐབས་བརྒྱད་པས་སྒྲ་གཅན་གྱི་ངེས་པ་བཤད་པ་ལ་གསུམ་སྟེ། ཟླ་བ་ཕྱེད་པ་དང༌། ཉིན་རེའི་དང༌། ཟླ་བའི་སྒྲ་གཅན་ནོ། །དང་པོ་ནི། བྱེད་པ་དང་གྲུབ་པའི་སྒྲ་གཅན་གང་རུང་ཞིག་རྩི་འདོད་པའི་སྐྱེ་བོས། བློ་ངན་འདས་ལོར་བྱས་པའི་བྱེད་གྲུབ་གང་བྱེད་དེའི་ཟླ་བ་དག་པར་འབྱུང་འདོད་དེ་ཆིག་བརྒྱ་སོ་ལྔ་བསྲེ་བ་ནི་རྩིས་འཕྲོའོ། །དེ་ཉིད་མིག་གིས་བསྒྱུར་བ་ནི་ཟླ་བ་ཕྱེད་པའི་ཕུང་པོར་བྱས་པའོ། །ཉའི་སྒྲ་གཅན་རྩི་ན་གཟུགས་དང་སྟོང་ལ་མིག་གིས་བརྒྱན་པ་ནི་ཕྱོགས་གཉིས་བསྲེས་པའོ། །དེ་ལ་མཁའ་དུས་རྒྱ་མཚོ་སྟེ་བཞི་བརྒྱ་དྲུག་ཅུས་བགོ་བ་ནི་སྒྲ་གཅན་གྱིས་ཟླ་བ་ཕྱེད་པ་དེ་ཙམ་ན་རྒྱུ་སྐར་འཁོར་བའི་ཕྱིར་རོ། །དེས་ཐོབ་པའི་ནོར་ནི་འཁོར་ལོ་འཁོར་བའི་གྲངས་ཡིན་པས་དོར་ཏེ། ལྷག་མ་སྐར་མ་སྟེ་ཉེར་བདུན་དང་མཁའ་རོ་དང༌། མཁའ་རོ་དང༌། དུས་དང༌། མེ་མིག་རྣམས་ཀྱིས་རིམ་པར་བསྒྱུར་བ་ལ་མཁའ་དུས་རྒྱ་མཚོས་རིམ་པར་བགོས་པའི་ཐོབ་ནོར་བརྩེགས་པ་ནི། སྒྲ་གཅན་གྱི་གདོང་མཇུག་གི་གཞིར་གྱུར་པས་རྩ་བའམ། དལ་ལོངས་ཀྱི་དོད་ཡིན་པས་བུལ་བ་ཞེས་བྱ་སྟེ། དེས་ནི་སྒྲ་གཅན་གདོང་ནམ་གྲུ་ནས་གཡས་སུ་བསྐོར་བའི་སྐར་མ་གང་གི་སྟེང་ན་ཡོད་ཤེས་པར་བྱེད་ལ། གདོང་གི་སྐར་མ་དེ་ནས་གཡས་བསྐོར་དུ་རྒྱུ་སྐར་ཕྱེད་དང་བཅུ་བཞི་ཕྱིན་པ་ན་དུས་མེ་ཡོད་པའང་ཤེས་པར་འགྱུར་རོ། །བུལ་པ་དེ་ལ་ཁ་ཅིག་ལས། མུན་ཅན་འདས་པ་ཞེས་ཟེར་ཏེ། གང་རྩིའི་ཚེས་དེ་རྫོགས་པ་ཡན་ལ་སྒྲ་གཅན་གྱིས་སྤྱད་ཟིན་པའི་ལོངས་སྤྱོད་འཆར་བ་ཡིན་ནོ། །རྩ་བའི་ལོངས་སྤྱོད་ལ་གང་ཤར་བ་དེ་རྣམས་ཀྱིས་རྒྱུ་སྐར་འཁོར་ལོ་ཉི་ཤུ་རྩ་བདུན་ལ་སྦྱངས་པའི་ལྷག་མས་ནི་སྒྲ་གཅན་གདོང་ཐ་སྐར་ནས་གཡོན་བསྐོར་དུ་སྐར་མ་གང་གི་སྟེང་ན་ཡོད་ཤེས་པའི་ཆེད་དེ། སྒྲ་གཅན་ནི་ཁྱིམ་གྱི་རླུང་འགྲོས་བཞིན་དུ་རི་རབ་ལ་གཡས་བསྐོར་དུ་རྒྱུ་བས་སོ། །གདོང་གི་རི་མོ་དེ་ལ་རྒྱུ་སྐར་གྱི་འཁོར་ལོ་ཕྱེད་དེ་སྐར་མ་བཅུ་གསུམ་དང༌། ཆུ་ཚོད་སུམ་ཅུ་བསྲེས་པ་ནི་སྒྲ་གཅན་གྱི་མཇུག་མའམ་དུས་མེ་ཐ་སྐར་ནས་གཡོན་བསྐོར་གྱིས་སྐར་མ་གང་གི་སྟེང་ན་ཡོད་ཤེས་པའི་ཆེད་དེ། སྒྲ་གཅན་གྱི་ལུས་ཀྱིས་རྒྱུ་སྐར་འཁོར་ལོའི་ཕྱེད་ཁྱབ་པའི་ཕྱིར་རོ། །དེ་ལྟར་གདོང་མཇུག་གི་སྐར་མ་དེའི་ལོངས་སྤྱོད་རྣམས་ནི་རྒྱུ་སྐར་དེའི་ཐོག་ནས་སྤྱོད་འགྱུར་གྱི་ལོངས་སྤྱོད་དག་པར་འགྱུར་རོ། །དེ་ནི་ཟླ་བ་ཕྱེད་པ་སྟེ་དཀར་ནག་གི་ཕྱོགས་རེའི་སྒྲ་གཅན་གྱི་རྩི་ཚུལ་ཡིན་ནོ། །གཉིས་པ་ཉིན་རེའི་སྒྲ་གཅན་ནི། ཟླ་བ་དག་པར་འབྱུང་འདོད་བསྲེས་པའི་ཚོགས་མཁའ་མེ་སྟེ་སུམ་ཅུས་བསྒྱུར་བ་ནི་ཚེས་ཟླ་ཉིད་ཚེས་ཞག་གི་ཕུང་པོར་གསིལ་བའི་དོན་ནོ། །གང་རྩིའི་ཚེས་གྲངས་བསྲེ་བ་ནི་ཟླ་བ་དེའི་ཐོག་ནས་ཇི་ཙམ་སོང་བའི་ཞག་སྤྱོད་བཞིན་པ་དང་བཅས་པ་སྦྱིན་པའོ། །དེ་ལ་སྒྲ་གཅན་ཞག་གི་འཁོར་ལོ་མཁའ་མཁའ་བུག་རོ་སྟེ་དྲུག་སྟོང་དགུ་བརྒྱས་འཁོར་ལོ་ལོངས་པའི་གྲངས་དོར་བའི་ལྷག་མ་འཁོར་ལོ་དང་མཁའ་རོས་བསྒྱུར་བ་སོགས་རྩ་བ་དང༌། དེ་ལ་གདོང་མཇུག་གི་ཆོ་ག་རྣམས་གོང་བཞིན་བྱས་པས་སྒྲ་གཅན་གདོང་མཇུག་གིས་ཚེས་ཞག་གི་གྲངས་རེ་བཞིན་དུ་ཡུལ་སྟེང་ནས་སྤྱོད་པ་ལས་གང་ལས་འཕོས་པ་རྟོགས་པར་འགྱུར་རོ། །གསུམ་པ་ནི། ཟླ་བའི་རི་མོ་བྱ་བར་འདོད་ན། ཟླ་བ་དག་པར་འབྱུང་འདོད་བསྲེས་པའི་ཚོགས་ལ་སྒྲ་གཅན་གྱི་ཚེས་ཟླའི་འཁོར་ལོ་མཁའ་མེ་ལག་པ་སྟེ་ཉིས་བརྒྱ་སུམ་ཅུས་དོར་བའི་ལྷག་མ་སྐར་མས་བསྒྱུར་ལ་དེ་ཉིད་ཀྱིས་བགོ་བ་སོགས་སྔར་བཞིན་བྱས་པས་ཟླ་བ་རེ་བཞིན་ཡུལ་སྟེང་ནས་སྤྱོད་པ་རྟོགས་པར་འགྱུར་རོ། །དེ་ལྟར་བསྒྲུབས་པའི་སྒྲ་གཅན་གྱི་ཕྱོགས་ཞག་ཟླ་བའི་ངེས་པ་དེ་རྣམས་ཀྱི་སྟེང་དུ་དབྲི་བསྣན་གྱི་ལས་ཀྱིས་ཕྱི་མར་འཕོ་བའི་མགྱོགས་རྩིས་ནི། དབྱུག་གུར་མེ་དང་སྲང་གཟུགས་མེ། དབུགས་སུ་བསེ་རུ་ཉེར་གསུམ་ཆར། བུག་པ་ཟླ་བ་བུལ་བར་སྦྱིན། གདོང་མཇུག་གཉིས་ལ་ཕྲི་བ་ཡིས། ཟླ་བ་ཕྱེད་ཕྱེད་སྒྲ་གཅན་འཕོ། །ཆུ་སྲང་མཚོ་གཟུགས་ཉི་མའི་ཆ། །རྩ་བར་སྦྱིན་ཞིང་གདོང་མཇུག་ལ། །ཕྲི་བས་ཉིན་རེའི་སྒྲ་གཅན་འཕོ། །དབྱུག་རི་སྲང་མིག་དབུགས་ཡོན་ཏན། །ཚེས་ཀྱི་ཆ་རྣམས་བུལ་བར་བསྣན། །གདོང་མཇུག་གཉིས་ལ་སྦྱངས་བ་ཡིས། །ཟླ་རེའི་སྒྲ་གཅན་འཕོ་བར་འགྱུར། །ཞེས་སྨྲས་པ་ཡང་ཁོང་དུ་ཆུད་པར་བྱོས་ཤིག །རྩིས་ཀྱི་མན་ངག་ཉིན་བྱེད་སྣང་བ་ལས། སྒྲ་གཅན་གྱི་ངེས་པ་བཤད་པའི་སྐབས་ཏེ་བརྒྱད་པའི་འགྲེལ་པའོ། །ཞེས་སྐབས་བསྡུས་སོ།། །།

མཐའ་མའི་འདོན་ཐེངས་།: 17.12.2013 ཉིན། 10:57 AM