ད་ནི་སྐབས་བཅོ་ལྔ་པས་དུས་སྦྱོར་བཤད་པ་ལ་གཉིས་ཏེ། ཁྱིམ་སོ་སོ་དང་སྦྱར་ཏེ་དུས་སྦྱོར་གྱི་ཆོ་ག་བསྟན་པ་དང༌། དུམ་བུ་དྲུག་གི་དུས་སྦྱོར་བསྟན་པའོ། །དང་པོ་ལའང་གཉིས་ཏེ། རགས་པའི་དུས་སྦྱོར་གྱི་རྩིས་དང༌། ཕྲ་བའི་དུས་སྦྱོར་གྱི་རྩིས་སོ། །དང་པོ་ལ་གཉིས་ཏེ། ཁྱིམ་སོ་སོའི་ཉིན་མཚན་གྱི་ཚད་བསྟན་པ། འདས་ཁྱིམ་འདས་ཞག་འཕེལ་འགྲིབ་དང་བཅས་བརྟག་པའོ། །དང་པོ་ལའང་བསྟན་བཤད་གཉིས་ལས་དང་པོ་ནི། ལོ་རེ་ལ་ཉི་མ་ལྷོར་བགྲོད་པ་དང༌། བྱང་དུ་བགྲོད་པ་གཉིས་དང་ལྡན་པས། ཞག་རེ་བཞིན་ལྷོ་བགྲོད་ལ་མཚན་མོ་འཕེལ་ཞིང་ཉིན་མོ་འགྲིབ་པ་དང༌། བྱང་བགྲོད་ལ་མཚན་མོ་འགྲིབ་ཅིང་ཉིན་མོ་འཕེལ་བར་འགྱུར་བའི་ཕྱིར་ཐོག་མར་ཉིན་མཚན་གྱི་འཕེལ་འགྲིབ་བཤད་པར་བྱ་ཞེས་ཁས་བླངས་པའི་སྒོ་ནས་མདོར་བསྟན་པའོ། །གཉིས་པ་ལ་གཉིས་ཏེ། ཡུལ་དྲུག་གི་འཕེལ་འགྲིབ་སྤྱིར་བཤད་པ། ས་འདིའི་འཕེལ་འགྲིབ་བྱེ་བྲག་ཏུ་བཤད་པ། དེ་ལ་བརྟེན་ནས་ས་འདིར་འོས་པའི་ཉིན་མཚན་གྱི་ཚད་བཤད་པའོ། དང་པོ་ནི། སྔར་བཤད་པ་ལྟར་ལྷོ་གླིང་དབུས་མའི་ཕྱེད་བྱང་མ་ལ་ཆ་མཉམ་པའི་ཡུལ་དྲུག་ཏུ་ཕྱེ་བ་བཞིན། དུམ་བུ་ལྷག་མ་བཅུ་གཅིག་པོ་རྣམས་ལ་ཡང་དེ་དང་ཁྱོན་མཚུངས་པའི་ཡུལ་དྲུག་གི་རྣམ་གཞག་བྱས་ཏེ། ལྷོ་གླིང་དབུས་མའི་དབུས་དྲང་པོར་ཉི་མའི་བགྲོད་པའི་དབང་གིས་ཉིན་མཚན་རིང་ཐུང་མི་འདྲ་བར་འགྱུར་བ་ལྟར་དུམ་བུ་གཞན་རྣམས་ཀྱིའང་དེ་དག་དང་ཁྱོན་མཚུངས་པའི་ས་རྣམས་སུ་ཡང་ཉིན་མཚན་རིང་ཐུང་ཤེས་པར་བྱའོ། །དེ་ཡང་འགྲེལ་ཆེན་ལས། ཀཻ་ལ་ཤའི་བྱང་གི་ཆ་ཁ་བ་ཅན་གྱི་བར་དུ་སྟེ། ཉིན་ཞག་སོ་སོ་ལ་དབུགས་བཞི་དང༌། ཆུ་སྲང་གསུམ་བགྲོད་པའི་ཡན་ལག་གིས་འཕེལ་ཞིང་འགྲིབ་བོ། ཞེས་དང༌། ཉིན་ཞག་སོ་སོ་ལ་ཉིན་མོ་དང་མཚན་མོ་འཕེལ་བའམ་འགྲིབ་པ་ནི་དབུགས་གཉིས་དང་ཆུ་སྲང་གསུམ་མོ། ཚད་འདི་ནི་ཀཻ་ལ་ཤའི་དུམ་བུ་ལ་ཡིན་གྱི། འཕགས་པའི་ཡུལ་ལ་སོགས་པར་མ་ཡིན་ནོ། འཕགས་པའི་ཡུལ་དུའང་ཉིན་མཚན་སོ་སོ་ལ་ཆུ་སྲང་གཉིས་འཕེལ་བའམ་འགྲིབ་པར་རིག་པར་བྱ་སྟེ། ཞེས་ཀཻ་ལ་ཤའི་ལྷོ་བྱང་དང་འཕགས་ཡུལ་གྱི་འཕེལ་འགྲིབ་དངོས་སུ་གསུངས་པས་གཞན་རྣམས་ཤུགས་ལ་ཤེས་པར་འགྱུར་བ། འདི་ལྟར་ཆུ་སྲང་གསུམ་དང་དབུགས་རྒྱ་མཚོ་སྟེ་བཞི་ནི་གངས་ལྡན་ཡུལ་གྱི་འཕེལ་འགྲིབ་ཀྱི་ཚད་ཡིན་ལ། དེ་ལས་རིམ་བཞིན་དབུགས་གཉིས་གཉིས་དམན་པས་སོ་སོའི་འཕེལ་འགྲིབ་ཀྱི་ཚད་དུ་འགྱུར་ཏེ། ཡུལ་སོ་སོའི་འཕེལ་འགྲིབ་ཀྱི་ཚད་ལ་དབུགས་གཉིས་གཉིས་སུ་ངེས་པའི་ཕྱིར་རོ། །དེ་ལྟར་ན་གངས་ལྡན་གྱི་ཚད་དེ་ལས་དབུགས་གཉིས་ཕྲི་བས། ཆུ་སྲང་གསུམ་དང༌། དབུགས་གཉིས་ཀྱིས་ཤམྦྷ་ལར་འཕེལ་འགྲིབ་བྱེད་དོ། །དེ་བཞིན་དུ་དབུགས་གཉིས་རེས་ཕྲི་བས། རྒྱ་ནག་ཏུ་ཆུ་སྲང་གསུམ་དང༌། ལི་ཡུལ་དུ་ཆུ་སྲང་གཉིས་དང་དབུགས་བཞི། བོད་དུ་ཆུ་སྲང་གཉིས་དང་དབུགས་གཉིས། འཕགས་ཡུལ་དུ་ཆུ་སྲང་གཉིས་རྣམས་ཀྱིས་ཉིན་མོའམ་མཚན་མོ་འཕེལ་བའམ་འགྲིབ་པའི་རྣམ་གཞག་མ་འདྲེས་པ་ལེགས་པར་རྟོགས་པར་འགྱུར་རོ། །གཉིས་པ་ནི། དེས་ན་བོད་འདིར་སོགས་དང་ཚད་དེའི་གནས་གཉིས་ཀ་སུམ་ཅུས་བསྒྱུར་ནས་དྲིལ་བས། ཟླ་བ་རེའི་འཕེལ་འགྲིབ་ཀྱི་ཆ་གཟུགས་དབྱུགས་ཏེ་ཆུ་ཚོད་གཅིག་དང༌། ཆུ་སྲང་ཕྱོགས་ཏེ་བཅུའོ། །གསུམ་པ་ནི། འཕེལ་འགྲིབ་བྱེད་པ་ཞེས་སོགས་ཏེ། ཉི་བར་ཉ་དང་བུ་མོའི་ཁྱིམ་ན་གནས་པའི་ཚེ་ཉིན་མཚན་ཆུ་ཚོད་སུམ་ཅུར་མཉམ་ལ། དེ་ནས་ཟླ་རེའི་འཕེལ་འགྲིབ་ཀྱི་ཚད་ཆུ་ཚོད་གཅིག་དང་སྲང་བཅུ་པོ་དེས་ཉའི་ཚད་སུམ་ཅུ་ལ་ཕྲི་བས་ཆུ་ཚོད་གཟུགས་མེ་སོགས་ལུག་སེང་ཚད་འཆར། དེ་བཞིན་སྔ་མ་སྔ་མ་ལ་བསྣན་པས་ཆུ་ཚོད་སོ་གཉིས་སོགས་གླང་དང་ཀརྐ་ཊ་དང་འཁྲིག་པའི་ཉིན་ཚད་ཀྱི་བར་དུ་འཆར་བ་ཡིན་ནོ། །ཡང་བུ་མོའི་ཚད་སུམ་ཅུ་ལ་ཟླ་རེའི་འཕེལ་འགྲིབ་ཀྱི་ཚད་ཀྱིས་ཕྲི་བས། ཆུ་ཚོད་ཀླུ་ལག་སོགས་བུམ་སྲང་གི་ཉིན་ཚད་དང་། དེ་བཞིན་དུ་རིམ་པར་འཕྲི་བས་ཆུ་ཚོད་འཁོར་ལོ་སོགས་ཆུ་སྡིག་གཞུ་རྣམས་ཀྱི་ཉིན་ཚད་འཆར་ལ། ཉིན་ཚད་དེ་རྣམས་ཀྱིས་ཞག་གི་ཚད་ཆུ་ཚོད་མཁའ་རོར་ཕྲི་བའི་ལྷག་མ་ནི་སོ་སོའི་མཚན་མོའི་ཚད་དུ་འགྱུར་ཏེ། ཉིན་ཞག་ཕྲུགས་གཅིག་ལ་ཆུ་ཚོད་དྲུག་ཅུ་རེར་ངེས་པའི་ཕྱིར་རོ། །གཉིས་པ་ལ་བསྟན་བཤད་གཉིས་ལས། དང་པོ་ནི། དེ་ནས་འདས་པའི་སོགས་སོ། གཉིས་པ་ལ་བཞི་སྟེ། ཁྱིམ་ཟླ་ཇི་ཙམ་འདས་བརྟག་པ། ཁྱིམ་ད་ལྟ་བའི་སྟེང་ནས་ཞག་ཇི་ཙམ་འདས་བརྟག་པ། བགྲོད་པའི་འཕེལ་འགྲིབ་ཀྱི་མཚམས་བཟུང་བ། རྩི་བཞིན་པའི་ཞག་དེའི་ཉིན་མཚན་གྱི་ཚད་བཤད་པའོ། །དང་པོ་ནི། གྲུབ་མཐའི་ཆོ་གས་དག་པར་བསྒྲུབས་པའི་ཉི་མའི་དལ་བ་བར་པའི་སྐར་གནས་མཁའ་རོས་བསྒྱུར་བ་ལ་འོག་གི་ཆུ་ཚོད་ཀྱི་གནས་ལ་དུ་ཡོད་སྟེང་དུ་གཞུག་ཏེ་ཆུ་ཚོད་ཀྱི་ཕུང་པོར་བྱས་པ་ལ་ཁྱིམ་རེའི་ཡུལ་གྱི་ཆུ་ཚོད་མདའ་ཡོན་ཟླ་བས་བགོས་པས་ཐོབ་པ་དུ་བྱུང་བ་ནི་ལུག་གི་ཁྱིམ་ནས་འགོ་བཟུང་སྟེ་གང་རྩིའི་ཟླ་བ་དེ་ཡན་ལ་འདས་པའི་ཁྱིམ་ཟླའི་གྲངས་ཡིན་ནོ། །གཉིས་པ་ནི། ཉི་བར་གྱི་ཆུ་སྲང་གི་གནས་ན་གང་འདུག་མཁའ་མེས་བསྒྱུར་བར་བྱས་ལ་མཁའ་རོས་བགོས་པས་ཐོབ་པའི་ནོར་གང་ཡིན་པ་དེ་ཉིད་སྟེང་མ་མདའ་ཡོན་ཟླ་བའི་ལྷག་མ་དེ་མཁའ་མེས་བསྒྱུར་བ་ལ་སྦྱིན་པ་ནི་བགོད་བྱེད་བརྒྱ་སོ་ལྔ་ཉི་མའི་ཁྱིམ་ཞག་རྟག་ལོངས་སུམ་ཅུའི་བར་བརྩེགས་པའི་གྲངས་ཡིན་པས་དེ་དང་ཤེད་མཚུངས་པར་བྱ་བའི་ཕྱིར་ཆུ་ཚོད་ཀྱི་ཚོགས་རྣམས་སུམ་ཅུ་ཆར་གསིལ་བའོ། །ཡང་ན་ལྷག་མ་ཆུ་ཚོད་ཀྱི་གནས་ན་གང་འདུག་སུམ་ཅུས་བསྒྱུར་བ་ལ་ཆུ་སྲང་ལ་གཉིས་ཀྱིས་བགོས་པའི་ཐོབ་ནོར་བསྲེས་ཀྱང་དོན་འདྲའོ། །ཆུ་ཚོད་སུམ་ཅུ་ཆའི་ཕུང་པོར་བྱས་པ་དེ་ལ་མདའ་ཡོན་ཟླ་བས་ཐོབ་པའི་ནོར་ཇི་ཙམ་བྱུང་བ་དེ་ནི་རྩི་བཞིན་པའི་ངོ་ཐོག་གི་ཞག་འདི་ཐེ་བ་དང་བཅས་པའི་ད་ལྟའི་ཁྱིམ་གང་ན་གནས་པའི་ཁྱིམ་ཟླ་དེ་ཉིད་ཀྱི་སྟེང་ནས་འདས་པའི་ཁྱིམ་ཞག་གི་གྲངས་ཡིན་ཏེ་ཡུལ་ཁྱོན་གྱི་སྟེང་ནས་དུས་ཀྱི་ཆ་རྣམས་བཙལ་བའོ། །དེ་ལྟར་བསྒྲུབས་པ་དེ་ནི། ཁྱིམ་བཅུ་གཉིས་པོ་ངེས་པ་ཅན་འཕོ་བའི་རི་མོ་སྟེ། དེའི་ཕྱིར་དོན་གྱི་ཁྱིམ་འཕོ་ཞེས་གསུངས་པ་ཡིན་ནོ། ཁྱིམ་རྩིས་ཀྱི་སྐབས་འདིར་ཉི་བར་ལ་བརྟེན་པ་དང་ཉི་དག་ལ་བརྟེན་པའི་ཕྱོགས་གཉིས་ལས། འདིར་ཉི་བར་ལ་བརྟེན་པའི་རྒྱུ་མཚན་ནི། ཞལ་ལུང་ལས། ཉི་མ་ཁྱིམ་གང་ན་ཡོད་བརྟག་པའི་ཚེ་ནི་ཉི་དག་ལ་བསྟེན་པ་དང༌། དཔྱིད་མཉམ་སོགས་བརྟག་པའི་ཚེ་ཉི་བར་ལ་བསྟེན་པ་ཉིད་ཀྱི་རྩིས་ཚུལ་སྟོན་པར་བྱེད་པའི་གཞུང་ཚད་ལྡན་རྣམས་ཀྱི་དོན་དུ་མཐོང་བས་ན་ཡི་གེ་འདི་དང་གཞན་དུའང་དེ་ལྟར་བཀོད་ཀྱི། ཞེས་གསུངས་པའི་དགོངས་པ་སྟེ། གལ་ཏེ་སྐབས་འདིར་ཉི་དག་ལ་བྱས་ན། རྒྱུད་ལས་འཁྲིག་གཞུ་གཉིས་རྫོགས་མཚམས་བགྲོད་པ་མཐར་ཐུག་དང༌། ཉ་དང་བུ་མོའི་ཁྱིམ་རྫོགས་མཚམས་མཉམ་གཉིས་འབྱུང་བར་གསུངས་པའི་རི་མོའི་ངེས་པ་རྣམས་འཆར་བ་མི་སྲིད་པའི་ཕྱིར་རོ། །གསུམ་པ་ནི། དེ་ཡང་འདིར་གཞུའི་ཁྱིམ་གྱི་ཁྱིམ་ཞག་བརྒྱད་པ་ལ་དགུན་ཉི་ལོག་པས་དེའི་ཕྱི་ཉིན་ཁྱིམ་ཞག་དགུ་པ་ནས་གཞུ་སོགས་བྱང་བགྲོད་ལ་ཉིན་མོ་རིང་བའི་འགོ་རྩོམ་པའི་གནད་ཀྱིས་བགྲོད་པ་གཉིས་ལ་ལྟོས་ནས་ཁྱིམ་ཟླ་བཅུ་གཉིས་པོའི་ཉིན་མཚན་རིང་ཐུང་དུ་འགྱུར་བའི་འཕེལ་འགྲིབ་ཀྱི་མཚམས་རྣམས་ཁྱིམ་ཟླ་རང་རང་གི་ཁྱིམ་ཞག་བརྒྱད་པ་ནས་འཛིན་དགོས་ལ། དེའི་མཚམས་བདེ་བླག་ཏུ་ཤེས་པར་བྱ་བའི་ཕྱིར་དུ་འདས་ཞག་སྟེང་ནས་རི་སྟེ་བདུན་སྦྱང་ཞིང་གལ་ཏེ་སྦྱང་དུ་མ་ལྡང་ན་འདས་ཁྱིམ་གྱི་གནས་ནས་གཅིག་ཕབ་སྟེ་ཞག་སར་སུམ་ཅུར་བྱས་ལ་བདུན་པོ་དེས་སྦྱང་ཞིང༌། དེ་ལྟར་སྦྱངས་པའི་ལྷག་མ་ནི་འདས་པའི་ཁྱིམ་ཟླའི་གྲངས་དང༌། ཁྱིམ་ད་ལྟ་བའི་སྟེང་ནས་འདས་པའི་ཞག་ཆད་པ་དང་བཅས་པའི་གྲངས་ཡིན་ནོ། ཇི་ལྟར་འཆད་ན། འདས་ཞག་གི་སྟེང་ནས་བདུན་སྦྱང་དུ་མ་ལྡངས་ན་ཁྱིམ་ད་ལྟ་བའི་སྟེང་ནས་བདུན་འཆད་ལ། མ་ལྡངས་པ་ན་ཁྱིམ་འདས་པའི་སྟེང་ནས་ཀྱང་གང་མ་ལྡངས་པའི་ཆ་ཙམ་ཞིག་ཆད་པ་ཡིན་ཏེ། དཔེར་ན། ཁྱིམ་གྱི་གནས་སུ་གཅིག་དང༌། འདས་ཞག་ཏུ་ལྔ་ཙམ་ཡོད་ན་ལུག་ཁྱིམ་རྫོགས་ཏེ། གླང་ཁྱིམ་དུ་སླེབ་ནས་ཞག་ལྔ་དོན་ལ་སོང་མོད། འོན་ཀྱང་ཁྱིམ་གཅིག་པོ་ཕབ་སྟེ་སྦྱངས་པས་ལུག་ཁྱིམ་རྫོགས་པ་ལ་ད་དུང་ཞག་གསུམ་ཙམ་དགོས་པའི་རི་མོ་ཤར་བས། དེ་ལྟར་ཤར་བའི་ངོ་ཐོག་གི་ཁྱིམ་དེ་རེ་ཞིག་རང་གི་ཁྱིམ་ད་ལྟ་བར་བཏགས་ནས་འཛིན་པ་དེ་ནི་ས་འདིར་འོས་པའི་ཉིན་མཚན་གྱི་འཕེལ་འགྲིབ་སོགས་དུས་ཀྱི་གཟེར་རྣམས་ཀྱི་བརྟག་པ་འཆུག་མེད་དུ་བྱེད་པ་སླ་བའི་ཕྱིར་ཡིན་གྱི། དོན་གྱིས་འཕོ་བར་མི་བཟུང་ངོ༌། །བཞི་པ་ནི། རི་ཡིས་སྦྱངས་པའི་ཞག་ལྷག་དེ་ཉིད་གནས་གཉིས་སུ་བཞག་པའི་སྟེང་འོག་གཉིས་ཀ་མིག་གིས་བསྒྱུར་བ་ནི་གོང་དུ་བཤད་པ་ལྟར་བོད་དུ་ཉིན་རེ་བཞིན་ཆུ་སྲང་གཉིས་དང༌། དབུགས་གཉིས་ཀྱི་འཕེལ་འགྲིབ་བྱེད་པས་སོ། །འོག་མར་རོས་ཐོབ་ནོར་གནས་སྟེང་མ་ལ་སྦྱིན། དེ་ལ་མཁའ་རོས་ཐོབ་པའི་ནོར་ཆུ་ཚོད་ཀྱི་གནས་སུ་བཞག་པ་རྣམས་བྱེད་པ་སླ་བའི་ཁྱིམ་དེ་འཁྲིག་པ་དང་ཀརྐ་ཊ་དང་སེང་གེ་དང་བུ་མོ་དང་སྲང་དང་སྡིག་པ་སྟེ་ལྷོ་བགྲོད་ཀྱི་ཁྱིམ་དྲུག་པོ་གང་ཡིན་ཀྱང༌། སྐབས་སུ་བབས་པའི་ཁྱིམ་རང་རང་གི་ཉིན་ཚད་ཀྱི་ཆུ་ཚོད་དང་ཆུ་སྲང་གི་སྟེང་ནས་གནས་མཚུངས་ཀྱིས་སྦྱང་བར་བྱ་ཞིང༌། གལ་ཏེ་གཞུ་དང་ཆུ་སྲིན་དང་བུམ་པ་དང་ཉ་དང་ལུག་དང་གླང་སྟེ་བྱང་བགྲོད་ཀྱི་ཁྱིམ་དྲུག་ལ་བབས་ན་རང་རང་གི་ཉིན་ཚད་ཀྱི་དབྱུག་སྲང་ལ་གནས་མཚུངས་སུ་སྦྱིན་པར་བྱས་པ་དེ་དག་ནི་གང་རྩི་བཞིན་པའི་ཞག་དེའི་ཉིན་ཚད་ཡིན་ལ། དེ་རྣམས་ཀྱིས་མཁའ་རོར་སྦྱངས་པའི་ལྷག་མས་ནི་ཁྱིམ་སོ་སོའི་གང་རྩིའི་ཞག་དེའི་མཚན་མོའི་ཚད་དུ་འགྱུར་རོ། གཉིས་པ་ཕྲ་བའི་དུས་སྦྱོར་གྱི་རྩིས་ལ་གཉིས་ཏེ། ཐུར་མ་ལ་བརྟེན་ནས་སྔ་ཕྱིའི་དུས་བརྟག་པ་དང༌། མི་མཉམ་པའི་དུས་སྦྱོར་སོ་སོའི་སྲང་ཚད་བཤད་པའོ། །དང་པོ་ནི། དེ་ནས་ཐུར་མ་སོགས་ཏེ། ཆ་བདུན་ཐུར་མའི་བགོད་གཞི་ལ་ཕྲ་རགས་གཉིས་ལས། དང་པོ་ནི། ཉི་བར་བྱེད་སླ་བའི་ཁྱིམ་གང་དུ་གནས་པའི་ཁྱིམ་ཟླ་དེའི་ནང་གི་གང་རྩི་བཞིན་པའི་ཞག་གི་ཉིན་ཚད་གོང་དུ་བཤད་པ་དེ་ཕྱེད་མར་བཅད་པ་ནི་སྔ་ཕྱིའི་ཚད་དེའི་བསྒྱུར་གཞི་ཡིན་ལ། དེ་ཉིད་རང་རང་རྩི་བཞིན་པའི་ཞག་དེའི་ཉིན་ཕྱེད་ཀྱི་དུས་ཀྱི་ཐུར་ཤིང་གྲིབ་མར་བཅས་པས་བསྒྱུར་བ་དེ་ནི་ཁྱིམ་སོ་སོའི་ཞིབ་མོའི་བགོད་གཞི་ཡིན་ནོ། །གཉིས་པ་ནི། ཞིབ་མོའི་ཆོ་ག་དེ་ལྟ་བུ་མ་འགྲུབ་ན་དེ་ནས་རགས་པའི་ཞེས་སོགས་ཏེ། རང་ཅག་རྣམས་གནས་པའི་ས་འདིར་བྱང་བགྲོད་མཐར་ཐུག་པའི་ཉིན་ཕྱེད་ཀྱི་དུས་སུ་ཐུར་ཤིང་བཙུགས་པས། རྩ་བར་གྲིབ་མ་ཅུང་ཟད་ཙམ་ལུས་ཀྱང་དེ་ཙམ་གྱིས་ཉེས་པ་ཆེ་བ་མི་སྐྱེད་ཅིང་ཆུ་སྲང་སོགས་སུ་གསིལ་ན་འཇུག་པ་མི་བདེ་བས་བྱ་སླ་བའི་ཕྱིར་གྲིབ་མ་མེད་པའི་དབང་དུ་བྱས་ལ། དེ་ནས་བྱེད་པ་སླ་བའི་ཁྱིམ་ལྷོ་བགྲོད་དྲུག་པོར་གྲིབ་མ་རེ་རེ་འཕེལ་ཏེ། ཇི་ལྟར་ན། འཁྲིག་མཐའ་ཞེས་སོགས་ཚིགས་བཅད་ཕྱེད་དང་གཉིས་སོ། །དེ་ནས་བྱང་བགྲོད་རྣམས་ལ་གྲིབ་མ་རེ་རེ་འགྲིབ་ཏེ། ཇི་ལྟར་ན། གཞུ་མཐའ་ནས་བཟུང་ཞེས་སོགས་ཚིགས་བཅད་གཅིག་གོ། གྲིབ་མ་དེ་རྣམས་དང་རགས་པ་ཁྱིམ་ཟླའི་ཉིན་ཚད་ལ་བརྟེན་ནས་བློ་དམན་རྣམས་ཀྱི་དོན་དུ་དབྲི་བསྣན་དང་བཅས་པའི་ལས་ཕྲན་ཚེགས་ཀྱི་རྟག་ཏུ་བགོད་གཞི་འོང་བ་རགས་པའི་ཆོ་ག་ནི། ཆུ་སྲང་མཁའ་མཁའ་མཁའ་བུག་ལ་ཞེས་པ་དབྲི་བསྣན་བྱ་བའི་གཞི་དང༌། དབྲི་བསྣན་བྱེད་པ་པོ་ནི་ལུག་སེང་མདའ་ཀླུ་སོགས་རྐང་པ་བདུན་ཏེ་དེ་ལྟར་དབྲི་བསྣན་བྱས་པ་དེ་ནི་སོ་སོའི་བགོད་གཞི་རགས་པ་ཡིན་ནོ། །འོ་ན་བགོད་གཞི་རག་པ་དེ་ལྟར་འོང་བའི་རྒྱུ་མཚན་གང་ཞེ་ན། ས་འདིར་ལུག་དང་སེང་གེའི་ཉིན་ཚད་ལ་ཆུ་ཚོད་སོ་གཅིག་དང་ཆུ་སྲང་བཅུ་ཡོད་ལ་ཕྱེད་མར་བཅད་པ་ལ་དབྱུག་གུར་ཚེས་དང་སྲང་དུ་སོ་ལྔ་ཡོད་པ་ཆུ་སྲང་དུ་གསིལ་བས་འབྱུང་མེ་བུག་ཡོང་དེ་ཉིད་ཁྱིམ་དེ་གཉིས་ཀྱི་ཉིན་ཕྱེད་ཀྱི་གྲིབ་མ་གཉིས་དང་ཐུར་མའི་བདུན་སྡོམ་པའི་གྲིབ་མ་དགུས་བསྒྱུར་བས་ཚེས་ཆུ་གདེངས་ཀ་འབྱུང་ལ། ཆུ་སྲང་མཁའ་མཁའ་སོགས་མདའ་ཀླུ་དབང་པོས་ཕྲི་བས་ཀྱང་རི་མོ་དེ་དང་གཅིག་ཏུ་འཆར་བའི་ཕྱིར་རོ། །དེ་བཞིན་ཁྱིམ་གཞན་རྣམས་ལའང་བློས་དཔགས་ཏེ་རང་རང་གི་ཉིན་ཚད་ཀྱི་ཕྱེད་དེ་ཉིད་ཁྱིམ་དེ་དང་དེའི་ཉིན་ཕྱེད་ཀྱི་ཐུར་ཤིང་གྲིབ་བཅས་ཀྱིས་བསྒྱུར་བ་དང༌། ཆུ་སྲང་མཁའ་མཁའ་མཁའ་བུག་ལ་གླང་ཀར་མཁའ་མཚོ་སོགས་ཁྱིམ་རང་རང་གི་མི་འདྲ་བའི་དབྲི་བསྣན་གྱི་ཆོ་ག་བྱས་པ་གཉིས་རི་མོ་གཅིག་ཏུ་འཆར་ཏེ་ལག་ཏུ་བླངས་པས་ཤེས་སོ། །ཐུར་མ་ལ་ཆ་བདུན་དུ་བྱེད་པའི་རྒྱུ་མཚན་ཡང༌། ཁྱིམ་སོ་སོའི་ཉིན་ཕྱེད་ཀྱི་གྲིབ་མ་འཕེལ་བ་དྲུག་དང་འགྲིབ་པ་དྲུག་སྟེ་གཉིས་ཀ་རྩ་བའི་གྲིབ་མ་དང་བཅས་པས་བདུན་བདུན་ཡོད་པའི་གནད་ཀྱིས་སོ། །དེ་ལྟར་ན་སོ་སོའི་བགོད་གཞི་ཕྲ་བའམ་མ་འགྲུབ་ན་རགས་པ་ལེགས་པར་བཟོས་པ་དེ་ལ་རྩི་བཞིན་པའི་ཉིན་མོའི་སྐབས་ཇི་ལྟར་རུང་བར་ཆ་བདུན་དང་ལྡན་པའི་ཐུར་མའི་ཤིང་བུ་བཙུགས་པ་ན། ཐུར་མ་རང་གི་ཆ་བདུན་དང༌། ཤིང་བུའི་གྲིབ་མ་ལ་ཇི་ཙམ་བྱུང་བ་དང་བཅས་པ་གཅིག་ཏུ་བསྡོམས་པའི་གྲངས་ཀྱིས་བགོས་པས་ཐོབ་པ་ཆུ་སྲང་དང༌། ལྷག་མ་རོས་བསྒྱུར་ལ་ཐུར་ཤིང་གྲིབ་བཅས་ཀྱིས་ཐོབ་པ་དབུགས་ཀྱི་གནས་སུ་འགྱུར་ཞིང༌། ཆུ་སྲང་གི་གནས་དེ་ལ་མཁའ་རོས་བགོས་པས་ཐོབ་པའི་ནོར་ཆུ་ཚོད་ཀྱི་གནས་སུ་བཞག་པ་དེ་རྣམས་སྔ་དྲོ་ཡིན་ན་གང་རྩི་བཞིན་པའི་དུས་དེ་ཡན་ཆད་ལ་འདས་པའི་ཆུ་ཚོད་དང་སོགས་ཁོངས་ནས་སྲང་དབུགས་རྣམས་འཆར་ལ། གལ་ཏེ་ཕྱི་དྲོའི་དུས་ཡིན་ན་མ་འོངས་པའི་ཆུ་ཚོད་སོགས་འཆར་ཞིང༌། སྔ་ཕྱིའི་ཆུ་ཚོད་སོགས་གང་ཤར་བ་དེ་ཡིས་ཞག་དེའི་ཉིན་མོའི་ཚད་ལ་ཕྲི་བའི་ལྷག་མ་དེས་སྔ་དྲོ་ཡིན་ན་མ་འོངས་པ་དང་ཕྱི་དྲོ་ཡིན་ན་འདས་པའི་ཆུ་ཚོད་ལ་སོགས་པ་འཆར་རོ། །གཉིས་པ་མི་མཉམ་པའི་དུས་སྦྱོར་སོ་སོའི་སྲང་ཚད་ནི། མི་མཉམ་དུས་སྦྱོར་ལ་སོགས་པས་མདོར་བསྟན་ནས། འབྱུང་མཁའ་མེ་ནི་ཉ་བུམ་ཚད། ཅེས་བྱ་བ་ལ་སོགས་པ་རྐང་པ་དྲུག་གོ། །དེ་ལྟར་སྲང་ཚད་རེ་རེ་ལ་ཁྱིམ་གཉིས་གཉིས་ཡོད་པའི་ཉ་ལ་སོགས་པས་ལུག་གླང་འཁྲིག་པ་ཀར་སེང་དྲུག་ནི་ལུགས་འབྱུང་ཡིན་ལ། བུ་མོ་ལ་སོགས་པས་སྲང་སྡིག་གཞུ་ཆུ་བུམ་རྣམས་ནི་ལུགས་ལས་ལྡོག་པ་ཡིན་ནོ། །འདིར་ཉ་ཁྱིམ་ཐོག་མར་བྱེད་པའི་རྒྱུ་མཚན་ནི་ས་དུམ་བུ་གང་དང་གང་ཡིན་ཀྱང་རང་རང་གི་དཔྱིད་མཉམ་འཕོག་པའི་ཁྱིམ་དེ་ཐོག་མར་བྱེད་དགོས་པས་སོ། །དེ་ཡང་ཆུ་སྲང་འདི་དག་ནི་ས་འདིའི་དུས་སྦྱོར་རང་རང་གི་འཆར་ཡུན་གྱི་ཚད་དེ། འགྲེལ་ཆེན་ལས། འདིར་ལུག་གི་དུས་སྦྱོར་ལ་དང་པོར་ཤར་བ་ནས་དུས་སྦྱོར་ཕྱི་མ་འཆར་བའི་བར་གྱི་དུས་ལ་ཆུ་སྲང་གི་ཚོགས་མཁའ་བུག་ལག་སྟེ་ཞེས་པ་དགུ་བཅུ་ལྷག་པའི་ཉིས་བརྒྱར་འགྱུར་རོ། །ཞེས་ལུག་ལ་ཉིས་བརྒྱ་དང་དགུ་བཅུ། གླང་ལ་ཉིས་བརྒྱ་དང་དྲུག་ཅུ་སོགས་གསུངས་པའི་མཐར། ཞེས་པ་ནི་ཀཻ་ལ་ཤའི་ཡུལ་དུ་ངེས་པའོ། །ཞེས་ཀཻ་ལ་ཤའི་དུམ་བུ་ལ་སྦྱར་བས་དུམ་བུ་གཞན་ལྔ་ལ་ཡང་སོ་སོའི་འཆར་ཚད་སྦྱར་དགོས་པར་མཚོན་ནུས་པའི་ཕྱིར་རོ། །དེ་ལྟར་ན་ཆུ་སྲང་མང་ཉུང་སྣ་ཚོགས་པར་གྱུར་ཀྱང་ཁྱིམ་དྲུག་གི་ཚད་ཉིན་མོ་འཆར་བ་དང༌། དྲུག་གི་ཚད་མཚན་མོ་འཆར་བའི་ཚུལ་གྱིས་ཉིན་མཚན་རིང་ཐུང་གང་ཡིན་ཀྱང་རྣམ་པ་ཀུན་ཏུ་འགྲིག་པ་ཡིན་ཏེ། དེའི་རྒྱུ་མཚན་ནི། ཁྱིམ་རྣམས་རང་རང་གིས་ཐོག་མ་བྱས་ཏེ་ཁྱིམ་དྲུག་གི་ཆུ་སྲང་གི་གྲངས་བསྡོམས་པས་རང་རང་སོ་སོའི་ཉིན་མོའི་ཚད་འབྱུང་བ་དང༌། དེ་ལྟར་བགྲངས་པའི་ལྷག་གིས་ཁྱིམ་དྲུག་པོ་བསྡོམས་པས་རང་རང་སོ་སོའི་ཉིན་མོའི་ཚད་འབྱུང་བ་དང༌། དེ་ལྟར་བགྲངས་པའི་ལྷག་གིས་ཁྱིམ་དྲུག་པོ་བསྡོམས་པས་རང་རང་སོ་སོའི་མཚན་མོའི་ཚད་དུ་འགྱུར་ཏེ། དཔེར་ན། ཉ་ནས་སེང་གེའི་བར་བསྡོམས་པས་ཉའི་ཉིན་ཚད་ཆུ་ཚོད་སུམ་ཅུ་དང༌། དེ་ལྷག་བུ་མོ་ནས་བུམ་པའི་བར་དྲུག་བསྡོམས་པས་ཉའི་མཚན་ཚད་ཆུ་ཚོད་སུམ་ཅུ། དེ་བཞིན་དུ་ལུག་ནས་བཟུང་བའི་དྲུག་བསྡོམས་པའི་ལུག་གི་ཉིན་ཚད། སྲང་ནས་ཉའི་བར་བསྡོམས་པས་ལུག་གི་མཚན་ཚད་འཆར་བ་སོགས་ཐམས་ཅད་ལ་འགྲེའོ། །གཞན་ཡང་བོད་དུ་ཁྱིམ་ཟླ་རེའི་འཕེལ་འགྲིབ་ཀྱི་ཆ་ལ་ཆུ་སྲང་བདུན་ཅུ་སྟེ་ཆུ་ཚོད་དུ་དྲིལ་ན་ཆུ་ཚོད་གཅིག་དང་སྲང་བཅུ་ཡོད་པ་དེས་བགྲོད་པ་གཉིས་ཀྱི་མཚམས་ནས་བཟུང་སྟེ་ཁྱིམ་ཟླ་རེ་ལ་འཕེལ་འགྲིབ་བྱེད་པ་ཡིན་ཏེ། རྒྱུ་མཚན། འཁྲིག་པ་ལ་སོགས་པ་ལྷོ་བགྲོད་ཀྱི་ཁྱིམ་དྲུག་ལ་གནས་པའི་ཚེ། སྔ་མ་སྟེ་འཁྲིག་པ་ནས་བགྲངས་པའི་དྲུག་གི་ཆུ་སྲང་བསྡོམས་པ་ལ། ཕྱི་མ་སྟེ་ཀརྐ་ཊ་ནས་བགྲངས་པའི་དྲུག་གི་ཆུ་སྲང་བསྡོམས་པ་དེས་ཕྲི་བས་ལྷག་མར་ཆུ་སྲང་བདུན་ཅུ་འབྱུང་ཞིང༌། དེ་བཞིན་དུ་ཀརྐ་ཊ་ནས་བགྲངས་པའི་དྲུག་ལ་སེང་གེ་ནས་བགྲངས་པའི་དྲུག་གིས་འཕྲི་བ་སོགས་ལྷོ་བགྲོད་ཀྱི་ཁྱིམ་དྲུག་ཀ་ལ་སྦྱར་བས་ཚད་དེ་འབྱུང་ལ། ཡང་གཞུ་སོགས་བྱང་བགྲོད་ཀྱི་ཁྱིམ་དྲུག་པོ་ལ་གནས་པའི་ཚེ། སྔ་མའི་ཁྱིམ་གཞུ་ལྟ་བུ་ནས་བགྲངས་པའི་ཁྱིམ་དྲུག་གི་ཆུ་སྲང་དྲུག་བསྡོམས་པར། ཕྱི་མའི་ཁྱིམ་ཆུ་སྲིན་ནས་བགྲངས་པའི་ཁྱིམ་དྲུག་གི་ཆུ་སྲང་བསྡོམས་པ་སྦྱིན་པས་ཀྱང་ཆུ་སྲང་བདུན་ཅུ་འབྱུང་བའི་ཕྱིར་ཏེ། ཆུ་སྲང་འདི་རྣམས་ནི་བོད་དང་བསྟུན་པའི་ཆུ་སྲང་ངོ༌། །དེ་བཞིན་དུ་ས་དུམ་བུ་གཞན་རྣམས་ལའང་མི་འདྲ་བའི་ཚུལ་ཤེས་པར་བྱའོ། །དེ་ལྟར་ན་ས་དུམ་བུ་བཅུ་གཉིས་དང་ཡུལ་དྲུག་སོ་སོའི་དུས་སྦྱོར་རྣམས་ཀྱི་འཆར་ས་ཡང་སྣ་ཚོགས་པ་ཞིག་འབྱུང་ལ། དེའི་དབང་གིས་འཆར་ཡུན་མི་འདྲ་བ་དང༌། དེ་ལས་ཉིན་མཚན་རིང་ཐུང་སྣ་ཚོགས་པ་དང་ཁྱིམ་སྐར་དེའི་སྟེང་ན་གནས་པའི་ཉི་མ་ཡང་ཁྱིམ་དེའི་འཆར་ས་ནས་འཆར་དགོས་པས་ཡུན་དང་འཆར་ནུབ་ཀྱི་ས་སྣ་ཚོགས་པ་ཞིག་འབྱུང་སྟེ། འགྲེལ་ཆེན་ལས། དུས་སྦྱོར་འཆར་བའི་དུས་ཀྱི་དབང་གིས་ཉིན་མོ་དང་མཚན་མོ་དམན་པ་དང་ལྷག་པར་འགྱུར་ཏེ། ཉི་མ་ཡང་དག་པར་རྒྱུ་བའི་དབང་གིས་སོ། །ཞེས་གསུངས་སོ། །གཉིས་པ་དུམ་བུ་དྲུག་གི་དུས་སྦྱོར་ལ་གཉིས་ཏེ། མི་མཉམ་པ་དང༌། མཉམ་པའོ། །དང་པོ་ལ་གསུམ་སྟེ། རྩ་བ་རང་གི་ཆུ་སྲང་གིས་འདས་མ་འོངས་བརྟག་པ། རྩིས་གཞི་ཏཏྐཱལ་ལ་ངོས་བཟུང་སྟེ་གནས་ལྔར་བཤད་པ། དུམ་བུ་དྲུག་ཕྱེ་སྟེ་བཤད་པའོ། དང་པོ་ནི། རྩ་བ་རང་གིས་ཞེས་སོགས་ཏེ། རི་ཡིས་ཕྲི་བའི་ལྷག་མའི་འདས་ཞག་རྣམས། བྱེད་པ་སླ་བའི་ཁྱིམ་རང་རང་གི་ཆུ་སྲང་གི་ཚད་ཀྱིས་བསྒྱུར་བ་ལ་ཉི་བར་ཁྱིམ་རེར་སྡོད་པའི་ཞག་གྲངས་མཁས་མེས་བགོས་པས་ཐོབ་པའི་ནོར་གང་བྱུང་བ་ནི། རང་གི་ཁྱིམ་གང་ཡིན་པ་དེའི་གོང་མའི་ཞག་ལ་འདས་པའི་ཆུ་སྲང་གི་གྲངས་ཡིན་ཞིང༌། འདས་སྲང་དེ་ཡིས་ཁྱིམ་རང་རང་གི་ཆུ་སྲང་ལ་ཕྲི་བའི་ལྷག་མས་རང་ཉིད་གང་རྩི་བའི་ཐོག་མ་ནས་འཆར་རྒྱུའི་མ་འོངས་པའི་ཆུ་སྲང་ཤེས་སོ། །གཉིས་པ་ནི། དེ་ནས་རྩི་གཞི་སོགས་ཏེ། རྩི་བཞིན་པའི་སྐབས་དེའི་ཐུར་མ་གྲིབ་བཅས་ཀྱིས་བཙལ་བའི་ཆུ་ཚོད་ཀྱི་ཚོགས་རྣམས་སྔ་དྲོ་དང་ཕྱི་དྲོའི་ཁྱད་པར་གྱིས་འདས་མ་འོངས་གང་ཡིན་བརྟག་པར་བྱས་ལ། འདས་པའི་ཆུ་ཚོད་ཀྱི་གནས་མཁའ་རོས་བསྒྱུར་ཏེ་ཆུ་སྲང་དུ་གསིལ་བ་ལ་འོག་གི་ཆུ་སྲང་ཡོད་ན་བཅུག་པའི་ཚོགས་དེ་ལ་ཁྱིམ་རང་རང་གི་ཆུ་སྲང་མ་འོངས་པས་ཐོག་མར་བྱས་ནས་རིམ་པ་བཞིན་དུ་ཉ་སོགས་ཏེ་ལུག་གླང་འཁྲིག་ཀར་སེང་གེ་དྲུག་ལ་ལུགས་འབྱུང་གི་ཚུལ་གྱིས་དབྲི་ལ། བུ་མོ་ལ་སོགས་ཏེ་སྲང་སྡིག་གཞུ་ཆུ་བུམ་དྲུག་ལ་ལུགས་ལས་ལྡོག་སྟེ་ཕྲི་བས། གང་གི་ཚེ་དབྲི་བར་མ་ལྡངས་པ་དེའི་ཚེ་ཁྱིམ་ཆུ་བུམ་དྲུག་ལ་ལུགས་ལས་ལྡོག་སྟེ་ཕྲི་བས། གང་གི་ཚེ་དབྲི་བར་མ་ལྡངས་པ་དེའི་ཚེ་ཁྱིམ་དེའི་དུས་སྦྱོར་གྱི་དུས་ཡིན་པས། ཏཏྐཱལ་ཞེས་པའང་བོད་སྐད་དུ་དེའི་དུས་ཞེས་པའོ། །དེ་ལྟར་ཕྲི་བའི་ལྷག་མ་ཏཏྐཱལ་དེ་ཉིད་གནས་གཉིས་སུ་བྱས་པའི་གཅིག་མཁའ་མེས་བསྒྱུར་ནས་སུམ་ཅུ་ཆར་བཏང་བ་དེ་ལ་ཏཏྐཱལ་གང་ལ་བབས་པའི་ཆུ་སྲང་གིས་བགོས་པས་རྙེད་པ་ནི། ཏཏྐཱལ་དེའི་སུམ་ཅུའི་ཆ་ཤས་ཡིན་པས་ཏཏྐཱལ་གནས་གཅིག་ཤོས་དེའི་འོག་ཏུ་བཞག་གོ། །ལྷག་རྣམས་མཁའ་རོ་སོགས་ཀྱིས་རིམ་པར་བསྒྱུར་བ་ལ་ཏཏྐཱལ་ཆུ་སྲང་གིས་རིམ་བཞིན་བགོས་པས་ཐོབ་པའི་རྙེད་པ་རྣམས་ཆ་ཤས་དེའི་ཡང་འོག་ཏུ་བརྩེགས་ཏེ་བཞག་པར་བྱས་ལ། དེ་ལྟར་ན་ཏཏྐཱལ་དང་དེའི་སུམ་ཅུའི་ཆ་ཤས་དང༌། དེའི་དྲུག་ཅུ་ཆ་ལ་སོགས་པའི་དབྱུག་གུ་དང༌། སྲང་དང༌། དབུགས་རྣམས་ལ་དུས་སྦྱོར་གྱི་ནི་གནས་ལྔར་ལྷ་ཆེན་པོ་དག་བཞེད་ཅེས་གྲག་གོ། གསུམ་པ་ལ་བསྟན་བཤད་གཉིས་ལས། དང་པོ་ནི། མི་མཉམ་པ་དང་ཞེས་སོགས་རྐང་པ་ཕྱེད་དང་ལྔའོ། གཉིས་པ་ལ་དྲུག་སྟེ། དུས་སྦྱོར་གཅིག་དང༌། ཕྱེད་པ་དང༌། སུམ་ཆ་དང༌། དགུ་ཆ་དང༌། བཅུ་གཉིས་ཆ་དང༌། སུམ་ཅུ་ཆའོ། །དང་པོ་ནི། མི་མཉམ་པའི་གཅིག་པའི་དུས་སྦྱོར་བརྟག་པའི་ཕྱིར་ཞེས་བྱ་བ་ལ་སོགས་པའོ། །གཉིས་པ་ནི། དུས་སྦྱོར་ཕྱེད་པ་བལྟ་བའི་ཕྱིར་ཞེས་བྱ་བ་ལ་སོགས་པའོ། གསུམ་པ་ནི། གསུམ་ཆ་བརྟག་ཕྱིར་ཞེས་སོགས་ཀྱིས་རི་མོའི་བྱ་བ་དང༌། གཅིག་ནི་ཏཏྐཱལ་ཞེས་སོགས་རྩི་ཚུལ་དེ། ཏཏྐཱལ་ལུག་ཡིན་པའི་ཚེ་གཅིག་བྱུང་ན་ལུག་གི་ཞིང་བདག་མིག་དམར་དང༌། གཉིས་བྱུང་ན་ ཏཏྐཱལ་ནས་བགྲངས་པའི་ལྔ་པ་སེང་གེའི་ཞིང་བདག་ཉི་མ་དང༌། གསུམ་བྱུང་ན་ ཏཏྐཱལ་ནས་དགུ་པ་གཞུའི་ཞིང་བདག་ཕུར་བུའི་འབྲས་བུ་འབྱུང་བ་བཞིན་ནོ། །བཞི་པ་ནི། དགུ་ཆའི་ཆེད་དུ་ཞེས་སོགས་ཀྱིས་རི་མོའི་བྱ་བ། ཏཏྐཱལ་གང་ཡིན་ཞེས་སོགས་ཀྱིས་རྩི་ཚུལ་དང་ཏཏྐཱལ་གང་ལ་བབས་པ་དེའི་ཚེ་གང་ནས་འགོ་བཟུང་སྟེ་རྩི་ཚུལ་ནི། ལུག་སེང་ཞེས་སོགས་ཏེ། དཔེར་ན། ལུག་སེང་གཞུ་གསུམ་ལ་ཏཏྐཱལ་བབས་ཤིང༌། དགུ་ཆའི་ཐོབ་ནོར་ལ་དྲུག་ལྟ་བུ་བྱུང་ན་ལུག་ནས་བགྲངས་པའི་དྲུག་པ་བུ་མོའི་ཞིང་བདག་ལྷག་པའི་འབྲས་བུ་འབྱུང་བ་བཞིན་ནོ། ལྔ་པ་ནི། བཅུ་གཉིས་ཆ་ལ་སོགས་ཀྱིས་རི་མོའི་བྱ་བ། ཏཏྐཱལ་ནས་སོགས་ཀྱིས་རྩི་ཚུལ་ཏེ། དཔེར་ན། ཏཏྐཱལ་ལུག་ལ་ཡོད་ཅིང་ཐོབ་ནོར་བཅུ་བྱུང་ན་ལུག་ནས་བགྲངས་པའི་བཅུ་པ་ཆུ་སྲིན་གྱི་ཞིང་བདག་སྤེན་པའི་འབྲས་བུ་འབྱུང་བ་བཞིན་ནོ། །དྲུག་པ་ནི། སུམ་ཅུ་ཆ་ལ་སོགས་ཀྱིས་རི་མོའི་བྱ་བ། དམར་སྤེན་སོགས་ཀྱིས་རེའུ་མིག་བཀོད་ཚུལ། ལུག་སོགས་མི་མཉམ་སོགས་ཀྱིས་རིམ་རིམ་མིན་གྱི་རྩི་ཚུལ་ཏེ། དཔེར་ན། ཏཏྐཱལ་ལུག་ལ་ཡོད་ཅིང་ཐོབ་ནོར་དུ་ཉེར་བདུན་ལྟ་བུ་བྱུང་ན་དབུས་ཀྱི་བདག་པོ་པ་སངས་ཀྱི་འབྲས་བུ་འབྱུང་སྟེ། དེ་ཡང་ཉེར་བདུན་གྱི་ཐོག་མའི་ལྔ་ལ་མིག་དམར་དེ་ནས་རིམ་པར་ལྔ་ལ་སྤེན་པ། བརྒྱད་ལ་ཕུར་བུ། བདུན་ལ་ལྷག་པ། དེ་ནས་པ་སངས་ཀྱི་སྟེང་ནས་ཆ་ཤས་གཉིས་འདས་གསུམ་ལུས་པ་ལྟ་བུའོ། །ཡང་ ཏཏྐཱལ་གླང་ལྟ་བུ་མི་མཉམ་པ་ལ་ཡོད་ཅིང་ཐོབ་ནོར་བཅོ་བརྒྱད་ལྟ་བུ་བྱུང་ན་ལུགས་ལྡོག་གིས་ལྔ་དང་བདུན་དང་བརྒྱད་ཀྱི་སྟེང་ནས་དྲུག་རྣམས་བགྲངས་པས་ཕུར་བུའི་འབྲས་བུ་འབྱུང་བ་ལྟ་བུའོ། །དེ་དག་ནི། མི་མཉམ་པའི་དུམ་བུ་དྲུག་གི་དུས་སྦྱོར་ཏེ། ལེགས་པར་བརྩིས་ནས་ཐོག་མར་ཏཏྐཱལ་དུས་སྦྱོར་གཅིག་པའི་གཟའ་བཞག དེའི་འོག་ཏུ་རིམ་པར་ཕྱེད་པ་དང༌། སུམ་ཆ་དང༌། དགུ་ཆ་དང༌། བཅུ་གཉིས་ཆ་དང་སུམ་ཅུ་ཆ་རྣམས་བཞག་ལ་དགེ་མི་དགེའི་ལུང་བསྟན་པར་བྱ་སྟེ། དབྱངས་འཆར་བའི་རྒྱུད་ལས། དུམ་དྲུག་བདག་པོའི་གཟའ་རྣམས་ནི། རིམ་པ་བཞིན་དུ་བཞག་པ་ལ། དགེ་དང་མི་དགེའི་མཚན་མ་བརྟག ཅེས་སོ། །གཉིས་པ་མཉམ་པའི་དུམ་བུ་དྲུག་ནི། མཉམ་པ་ཉིན་ཞག་ཕྲུགས་གཅིག་ལ་དུས་སྦྱོར་ཉིན་ཞག་དྲུག་དང་མཚན་དྲུག་སྟེ་བཅུ་གཉིས་འཆར་ཞིང༌། དེའི་ནང་ནས་དུས་སྦྱོར་གཅིག་འཆར་བའི་ཚད་དང༌། དེ་བཞིན་དུ་གཅིག་གི་ཕྱེད་ཆ་དང༌། སུམ་ཆ་སོགས་དུམ་བུ་དྲུག་པོ་སོ་སོའི་ཚད་ཀྱི་ཆུ་ཚོད་ལ་སོགས་པའི་ལོངས་སྤྱོད་གྲངས་རྣམས་བཤད་ཅེས་མདོར་བསྟན་ནས། དེ་ཡང་ཉིན་ཞག་གཅིག་གི་དབུགས་ཉི་ཁྲི་ཆིག་སྟོང་དྲུག་བརྒྱ་ལ། ཞག་གཅིག་ལ་འཆར་བའི་དུས་སྦྱོར་གཅིག་པའི་གྲངས་ཉི་མ་སྟེ་བཅུ་གཉིས་ཀྱིས་བགོས་པའི་ནོར་ལ་དབུགས་སྟོང་བརྒྱད་བརྒྱ་འབྱུང་བ་ནི་དུས་སྦྱོར་གཅིག་གི་ཚད་དང༌། ཚད་དེ་ལ་མིག་དང་མེ་སོགས་ཀྱིས་བགོས་པས། ཐོབ་ནོར་ལ་རིམ་བཞིན་ཕྱེད་པ་ལ་དགུ་བརྒྱ། སུམ་ཆ་ལ་དྲུག་བརྒྱ། དགུ་ཆ་ལ་ཉིས་བརྒྱ། བཅུ་གཉིས་ཆ་ལ་བརྒྱ་ལྔ་བཅུ། སུམ་ཅུ་ཆའི་ལོངས་སྤྱོད་ལ་དབུགས་དྲུག་ཅུ་སྟེ། དེ་དག་རོ་དང་མཁའ་རོ་སོགས་རང་རང་གི་འཁོར་ལོས་སྟེང་དུ་ཕུད་པས་དུམ་བུ་གཅིག་པ་ལ་ཆུ་ཚོད་ལྔ་འབྱུང་བ་སོགས་རང་རང་གི་ཆུ་ཚོད་ལ་སོགས་པའི་གནས་སུ་འགྱུར་ཏེ། དེ་ནི་མཉམ་པའི་དུམ་བུ་དྲུག་གོ། དེ་ལྟར་སྟོང་བརྒྱད་བརྒྱ་ལ་སོགས་པའི་དབུགས་ཀྱི་ཚད་འདི་ནི་གོང་གི་དུམ་བུ་སོ་སོའི་བགོད་བྱེད་དང་མིང་གྲངས་མཐུན་ཀྱང་དོན་མི་འདྲ་བས་སྔར་གྱི་བགོད་བྱེད་རྣམས་ཀྱི་རྒྱུ་མཚན་འདི་ལྟར་གོ་དགོས་ཏེ། དུམ་བུ་དྲུག་པོ་ཐམས་ཅད་ཀྱི་རྩ་བ་གནས་ལྔ་རྩི་བའི་ཚེ་ཆ་ཤས་ཀྱི་འཁོར་ལོ་སུམ་ཅུ་དང༌། ཆ་ཤས་ཀྱི་དྲུག་ཅུ་ཆའི་ཆུ་ཚོད་ཀྱི་འཁོར་ལོ་སྟོང་བརྒྱད་བརྒྱར་བྱས་པ་ལས། སྐབས་འདིར་བགོད་གཞི་ཆུ་ཚོད་དུ་གསིལ་བས་ཤེད་མཚུངས་ཀྱི་ཕྱིར་བགོད་བྱེད་ཀྱང་ཆུ་ཚོད་ཀྱི་འཁོར་ལོ་སྟོང་བརྒྱད་བརྒྱས་བྱས་ཤིང༌། དེ་ཉིད་རང་གི་མིང་གྲངས་ཀྱིས་ཕྱེ་བས་ཕྱེད་པ་ལ་སོགས་པའི་དུམ་བུ་གཞན་རྣམས་ཀྱི་བགོད་བྱེད་འཆར་བ་ཡིན་ནོ། །དེ་ལྟར་དུམ་བུ་དྲུག་གི་དུས་སྦྱོར་འདི་རྣམས་རྒྱས་པར་བཤད་ན་ལག་རྩིས་པ་རྣམས་ལ་ཉེ་བར་མཁོ་མོད་ཀྱི། འོན་ཀྱང་གཙོ་བོའི་དོན་འཆད་པ་ལ་གེགས་སུ་འགྱུར་བར་སྣང་བས་མ་སྤྲོས་སོ། །རྒྱས་པར་ཕྱི་རྒྱུད་ཀྱི་ཡི་གེ་རྣམས་སུ་བལྟ་བར་བྱའོ། །རྩིས་ཀྱི་མན་ངག་ཉིན་བྱེད་སྣང་བ་ལས། དུས་སྦྱོར་མ་ལུས་པར་བཤད་པའི་སྐབས་ཏེ་བཅོ་ལྔ་པའི་འགྲེལ་བའོ། །ཞེས་སྐབས་བསྡུས་སོ།། །།

མཐའ་མའི་འདོན་ཐེངས་།: 17.12.2013 ཉིན། 10:08 AM