༈ དེ་ནས་ཉི་མ་ཟླ་བ་དང་། །སྒྲ་གཅན་གདོང་མཇུག་གཟའ་ལྔ་ཡི། །ཡུལ་དུས་ལོངས་སྤྱོད་སྒྲིག་ཐབས་བཤད། །རང་རང་དཀྱིལ་འཁོར་མཁའ་རོས་བསྒྱུར། །རྒྱུ་སྐར་ཆུ་ཚོད་ཀྱིས་ཐོབ་དབྱུག །ལྷག་རྣམས་མཁའ་རོ་དུས་རང་ཆས། །བསྒྱུར་ཐོབ་ཆུ་ཚོད་བསྒྱུར་གཞིའོ། །དེ་ཉིད་གནས་གཉིས་ཕྱོགས་གཅིག་ལ། །མཁའ་རོས་རིམ་ཕྱེ་སྲང་བསྒྱུར་གི། །གནས་གཉིས་ཕྱོགས་གཅིག་དུས་དང་ནི། །དེ་ནོར་ཕྱོགས་གཅིག་རང་ཆ་ཡིས། །སོ་སོར་ཐོབ་པ་དབུགས་ཆའི་གཞི།། ༈ དེ་ནས་སྐབས་བབས་གཟའ་སོ་སོའི། །དལ་བ་བར་པའི་ཆུ་ཚོད་དང་། །སྲང་དབུགས་ཆ་ཡིས་བསྒྱུར་གཞི་རྣམས། །སོ་སོའི་གནས་རྣམས་ཆའི་བར་བསྒྱུར། །གནས་མཚུངས་བསྲེས་ལ་རང་འཁོར་གྱིས། །བསྒྲིལ་བས་དུས་ཀྱི་ལོངས་སྤྱོད་འཆར།། ༈ ཉི་ཟླ་དག་དང་སྒྲ་གཅན་གྱི། །ལོངས་སྤྱོད་གཟའ་ལྔའི་དལ་དག་དང་། །མྱུར་བ་དག་རྣམས་ཉིན་ཞག་ལ། །རྩིས་པའི་ཞག་རེའི་ལོངས་སྤྱོད་དེ། །གནས་རྣམས་རིམ་བཞིན་མཁའ་རོས་ཕྱེ། །དེ་ནོར་སྔ་མ་སྔ་མ་ལ། །མཁའ་རོ་དུས་དང་ཆས་ཕྱེ་བའི། །ནོར་རྣམས་གང་རྩིའི་དུས་དེ་ཡི། །འདས་དབྱུག་སྲང་དབུགས་ཆས་རིམ་བཞིན། །སོ་སོའི་གནས་རྣམས་ཐམས་ཅད་བསྒྱུར། །བསྲེས་ལ་རང་འཁོར་བསྒྲིལ་བ་ཡིས། །དུས་དེའི་ཚེ་ན་ཡུལ་སྟེང་ནས། །གང་སྤྱད་བདེ་བླག་རྟོགས་པར་འགྱུར། །རྩིས་ཀྱི་མན་ངག་ཉིན་བྱེད་སྣང་བ་ལས། །གཟའ་རྣམས་ཀྱི་ཡུལ་དུས་སྒྲིག་པའི་གནད་རགས་ཞིབ་བཤད་པའི་སྐབས་ཏེ་བཅུ་དྲུག་པའོ།། །།

མཐའ་མའི་འདོན་ཐེངས་།: 03.12.2024 ཉིན། 11:12 PM