ད་ནི་སྐབས་ཉེར་གཉིས་པས་མགྱོགས་རྩིས་ལ་བརྟེན་ནས་ལི་ཐུ་སྦྱོར་དགྲོལ་བཤད་པ་ལ་བསྟན་བཤད་བསྡུ་གསུམ་ལས། དང་པོ་ནི། ད་ནི་བསྐལ་ལིའི་རེའུ་མིག་ལ་ཞེས་སོགས་སོ། གཉིས་པ་ལ་གཉིས་ཏེ། ལི་ཐུ་སྦྱོར་བ་དང༌། འགྲོལ་བའོ། དང་པོ་ལ་ལྔ་སྟེ། ལྔ་བསྡུས། སྒྲ་གཅན། དུས་གཟེར། གཟའ་ལྔ། རྩིས་ཕྲན། བཤད་པའོ། དང་པོ་ལ་གཉིས་ཏེ། སྦྱོར་བ་སྤྱི་ནུར་བཤད་པ་དང༌། དངོས་གཞི་རེའུ་མིག་ཟིན་ཏེ་སྒྲུབ་པའོ། དང་པོ་ནི། ཐོག་མར་ཞེས་སོགས་ཏེ། འདི་ལ་རགས་ཞིབ་གཉིས་ལས། དང་པོ་ནི། ལོ་གང་ནག་པའི་ཞེས་སོགས་སོ། འདི་ལ་ལག་རྩིས་པ་ཁ་ཅིག་ན་རེ། སྐར་གནས་སྟོངས་ཤིང་ཆུ་ཚོད་དུ། གསུམ་ལས་མང་བ་མེད་གྱུར་ན། ཉི་མའི་རགས་པ་འཁྲུལ་མེད་ཡིན། ཞེས་ཟེར་ཡང༌། རྟག་ཏུ་དེ་ལྟར་མ་ངེས་ཏེ། ཉི་རགས་སྟོངས་པའི་ཕྱི་ལོའི་དུས་ཀྱི་རགས་པ་དེ་ལ་ཆུ་ཚོད་བཞི་དང༌། སྲང་གཅིག དབུགས་བཞི། རེ་བདུན་ཆ་ལྔ་བཅུ་རྣམས་འོང་སྟེ། རྒྱུ་མཚན་ཚེས་ཞག་སུམ་བརྒྱ་དོན་གཉིས་གནས་ལྔར་བཞག་པ་ཉི་མའི་རྟག་ལོངས་ཀྱིས་བསྒྱུར་ཏེ་དྲིལ་བས་དེ་ལྟར་འབྱུང་བས་ན་ཆུ་ཚོད་བཞི་ཤར་ཡང་ཆུ་སྲང་ལ་སོགས་པ་རྗེས་འབྲང་རྣམས་མ་ལོངས་པས་ཀྱང་འགྲུབ་པའི་ཕྱིར་རོ། །གཟའ་རགས་ནི། གཟའ་དྷྲུར་ཉི་རགས་ཟིན་པ་དང་སོགས་སོ། །གཟའ་ཉིའི་སྤྱི་ནུར་རགས་པ་གཉིས་པོ་དེ་ཇི་ཙམ་ན་ཟིན་པའི་ཚོད་འཛིན་པ་ནི། དེ་ཡང་སྔ་ལོ་ཟིན་པ་ནས་ཞེས་སོགས་སོ། འདིར་སྔ་ལོའི་རགས་པ་རྣམ་དག་ལ་དབྲི་བསྣན་གྱི་ལས་ཀྱིས་ཕྱི་ལོའི་རགས་པ་འཆར་བའི་མགྱོགས་རྩིས་ནི། སྔ་ལོའི་སྤྱི་ནུར་རགས་པ་ལ་ཞེས་སོགས་སོ། །གཉིས་པ་ཞིབ་མོའི་སྤྱི་ནུར་ཆོ་ག་ནི། བྱེད་གྲུབ་གང་བྱེད་ཉི་རགས་དེ་ཞེས་སོགས་ཀྱིས་ཉི་མའི་རྐང་འབྲས་གསུམ་དང༌། དེ་ནས་བྱེད་གྲུབ་གང་བྱེད་ཀྱི་ཞེས་བྱ་བ་ལ་སོགས་པས་སྤྱི་ནུར་ཁྱིམ་དྲུག་མ་སྒྲུབ་པའོ། གཉིས་པ་དངོས་གཞི་ལ་བཞི་སྟེ། གཟའ་ཉི་དག་པ། རེས་འགྲོགས་ཟླ་སྐར། སྦྱོར་བ། བྱེད་པའོ། དང་པོ་ལ་གཉིས་ཏེ། གཟའ་ཕྱེད་ཉི་མ་རྣམ་དག་ཏུ་སྒྲུབ་པ་དང༌། རེས་གཟའ་རྣམ་དག་ཏུ་སྒྲུབ་པའོ། །དང་པོ་ནི། དངོས་གཞི་རེའུ་མིག་སོགས་ཏེ། གང་རྩི་སོགས་ཀྱིས་རེའུ་མིག་འཛིན་པ་དང༌། དེ་ལྟར་ཟིན་པའི་སོགས་ཀྱིས་སྤྱི་ནུར་ཁྱིམ་དྲུག་མ་སྦྱིན་པའི་ལས་ཀྱིས་ཉི་མ་རྣམ་དག་དང་གཟའ་ཕྱེད་དག་ཏུ་སྒྲུབ་པའོ། །གལ་ཏེ་བྱེད་པའི་རེའུ་མིག་འཛིན་པའི་ཚེ་ཉ་ཁྱིམ་དུ་སྔ་ལོའི་རེའུ་མིག་ལྷག་ལུས་ན་སོགས་ཏེ་གོང་མའི་མྱོང་རྩིས་སོ། གཉིས་པ་ནི། ཆ་ཤས་དྷྲུ་ཝ་དང་མཐུན་པའི་སོགས་ཀྱིས་ཟླ་རྐང་གི་ལོངས་སྤྱོད་བྱིན་དོར་གྱིས་རེས་གཟའ་རྣམ་དག་ཏུ་སྒྲུབ་པའོ། གཉིས་པ་རེས་འགྲོགས་ཟླ་སྐར་ནི། ཉི་དག་གནས་གཉིས་སོགས་སོ། གསུམ་པ་སྦྱོར་བ་ནི། ཉི་ཟླ་སོགས་སོ། བཞི་པ་བྱེད་པ་ནི། བྱེད་པ་ཚེས་གྲངས་སོགས་སོ། གཉིས་པ་སྒྲ་གཅན་གྱི་རེའུ་མིག་འཛིན་པ་ནི། སྒྲ་གཅན་བློ་ངན་སོགས་སོ། །གསུམ་པ་དུས་ཀྱི་གཟེར་སྒང་དབུགས་ཁྱིམ་སླེབ་གསུམ་འཚོལ་བའི་ལག་ལེན་ལ་གསུམ་སྟེ། འཚོལ་བའི་ལག་ལེན། བཙལ་བྱའི་ཚད། བགྲོད་འཕོའི་དུས་སོ། །དང་པོ་ནི། སྒྲ་གཅན་གྱི་རེའུ་མིག་འཛིན་ཚུལ་བཤད་པའི་རྗེས། དེ་ནས་དབུགས་ཐོབ་སྒང་ཚད་དང་ཞེས་སོགས་རྐང་པ་དགུས་བསྟན་ཏེ། སྒང་དབུགས་ནི་ན་ནིང་དབོ་ཟླའི་ཚེས་གང་ལ་ཟིན་བལྟས་ལ། ཚེས་གྲངས་དེ་ལས་རིམ་པར་རེ་རེ་ཕྱིར་ནུར་བའི་གྲུབ་རྩིས་ཀྱི་ཉི་བར་ལ་བཅུ་གསུམ་ཆ་དང་ལྔ་ཆ་གང་འགབ་བལྟས་ཏེ་སྦྱིན་པས་འཆར་རོ། །དེ་ཡང་བཅུ་གསུམ་ཆ་ནི་ཐོག་མར་གང་འགབ་བལྟ་དགོས་དེ་ནས་ལུགས་ལྡོག་ཏུ་བགྲང༌། ལྔ་ཆ་ནི་གཅིག་པའི་ལོངས་སྤྱོད་ཁོ་ན་སྦྱིན་པས་འོང་བ་མྱོང་རྩིས་སོ། ཁྱིམ་སླེབ་ནི། གོང་མའི་མན་ངག་རྩ་ཐོར། སྐྱེས་ཁྱིམ་མདའ་དུས་སྦྱངས་པ་ཡིས། །ཉི་དག་སྐར་དབྱུག་ཁྱིམ་འཕོ་ལྟོས། །ཞེས་འབྱུང་བའི་སྐྱེས་ཁྱིམ་སྦྱོང་ལུགས་དེ་ནི་སྔར་བཀག་ཟིན་མོད། དེ་ལྟ་ནའང་ཉི་མའི་སྐྱེས་སྐར་ལག་མ་ཡིན་པའི་ཕྱིར་སྐྱེས་ཁྱིམ་སྦྱོང་བ་དངོས་བསྟན་མ་ཡིན་ཡང་ཉི་ལྡོག་ལ་མན་ངག་ཟུར་པ་མི་དགོས་པ་སོགས་ཀྱི་དགོས་པ་ཕྲ་མོ་འགའ་ཞིག་ནི་ཡོད་དོ། །འདིར་ཁྱིམ་སླེབ་བརྟག་པ་ལ་ནི་ལི་ཐུའི་གྲུབ་རྩིས་ཀྱི་ཉི་དག་ཁོ་ན་ལ་བལྟས་པས་ཤེས་པར་འགྱུར་ལ། གལ་ཏེ་མི་ཤེས་ན་གྲུབ་རྩིས་ཀྱི་རི་མོ་དེས་ཉི་མ་སྐར་མ་སོ་སོའི་སྟེང་དུ་སླེབས་པ་ཙམ་ཡང་མི་ཤེས་པར་འདོད་དགོས་ཏེ། བཞི་ཆ་གཅིག་དང་བཅས་པའི་སྐར་མ་གཉིས་རེ་ལ་ཁྱིམ་རེར་བཞག་པ་ཡིན་པའི་ཕྱིར་རོ། །གཉིས་པ་ནི། བཙལ་བྱའི་སོ་སོའི་ཚད་ནི་འདི་ཞེས་སོགས་རྐང་པ་གསུམ་དང་བཅས་པའི་ཚིགས་སུ་བཅད་པ་བཅུ་བཞིས་བསྟན་ཏེ། ཚད་འདི་ལྟར་རིགས་པའི་རྒྱུ་མཚན་ལེའུ་བཅུ་བཞི་བར་བཤད་ཟིན་ཏོ། །གསུམ་པ་ནི། སྒང་དབུགས་ཁྱིམ་སླེབ་གསུམ་ཚད་ཇི་ལྟ་བ་བཞིན་དུ་ཤར་བའི་ཚེ། རང་དང་ཤེད་མཉམ་པའི་ཚེས་གཟའི་ལོངས་སྤྱོད་རྫོགས་མཚམས་སུ་ལྷོ་བྱང་གི་བགྲོད་པ་མཐར་ཐུག་སྟེ་ཉི་མ་ལྡོག་པ་དང་ཉི་མས་ཁྱིམ་འཕོ་བ་སོགས་ཀྱི་དུས་མཚམས་གཟུང་བར་བྱའོ། །འོ་ན་རང་དང་ཤེད་མཉམ་པའི་ཚེས་གང་ཞེ་ན། སྒང་དབུགས་གཉིས་ཀྱི་གཟའ་ནི་གང་རྩིའི་གཟའ་དྷྲུ་ལ། ཉི་མ་གང་ལ་ཟིན་པའི་ཚེས་དེའི་རྟག་ལོངས་དང་བཅུ་གསུམ་ཆ་དང་ལྔ་ཆ་ཡང་ཉི་མ་གང་ཟིན་གྱི་གྲངས་དང་མཉམ་པ་དེ་ཉིད་བསྣན་པས་འཆར་ལ། ཁྱིམ་སླེབ་ཀྱི་ཚེས་གཟའ་ནི་དེ་ཉིན་གྱི་ལི་ཐུའི་གྲུབ་རྩིས་ཀྱི་རེས་གཟའ་དེ་ཀའོ། འོན་ཀྱང་ཁྱིམ་སླེབ་ཚད་བཞིན་མ་ཤར་བ་ཞེས་སོགས་ཏེ། དེ་ཡང་ཁྱིམ་གྱི་རྫོགས་ཚད་དེ་རྣམས་ཁྱིམ་ཞག་སུམ་ཅུ་པའི་ཉི་བར་དེ་ཉིད་ཡིན་ལ། འདིར་ཁྱིམ་འཕོ་བརྟག་པའི་ཚེ་ཉི་དག་ལ་བྱས་པའི་དབང་གིས་ཚད་ཇི་ལྟ་བ་བཞིན་མ་ཤར་བ་མང་ལ། དེའི་ཚེ་གང་མང་ཡིད་ཀྱིས་བསྒྱུར་བ་སོགས་ཀྱིས་ལག་ལེན་བྱས་ཏེ་ཞག་སྔ་མ་ལ་སླེབ་ཚད་རྒྱག་པ་ནི་ཉི་མའི་ལོངས་སྤྱོད་ཀྱི་ཡུལ་དུས་སྒྲིག་པའི་ཆོ་གས་འགྲིག་མཚམས་ཀྱི་འཕོ་དུས་ངོས་བཟུང་ནས་ཁ་དམར་འདོགས་པ་སྟེ། རྒྱུ་མཚན་ཉི་མའི་ཡུལ་ལོངས་ཆུ་ཚོད་བཞི། ཆུ་སྲང་ཉེར་གཅིག་གི་ཆུ་ཚོད་ཀྱི་གནས་ཡིད་ཀྱིས་བསྒྱུར་བ་ལ་ཆུ་སྲང་རོས་ཐོབ་པ་བསྲེས་པས་ཉི་མའི་དུས་ཀྱི་རྟག་ལོངས་ཆུ་ཚོད་ང་དགུ་དང་ཆུ་སྲང་གསུམ་འཆར་བའི་ཕྱིར། ཡུལ་ལོངས་འདས་པའི་ཆ་དེས་དུས་ལོངས་ཀྱི་སྟེང་ནས་ལྷག་པའི་ཆ་ཕྲི་བས་གསལ་བར་སྟོན་པའི་གནད་ཀྱིས་སོ། བཞི་པ་ནི། ད་ནི་གཟའ་ལྔའི་སོགས་ཏེ། འདི་ལ་གསུམ། སྦྱོར་བ་སྤྱི་སྒོས་ཀྱི་ཞག་སོགས་སྒྲུབ་པ། དངོས་གཞི་རེའུ་མིག་ལ་བརྟེན་ནས་དལ་མྱུར་གྱི་ལས་དག་པར་བྱེད་པ། རྗེས་འགྲོས་བཞི་ངོས་བཟུང་བའོ། དང་པོ་ལ་ལྔ་སྟེ། སྤྱི་ཞག སྒོས་ཞག ཉིན་ཞག་ཉི་དྷྲུ། ཉི་རགས། ཞི་གཉིས་ཀྱི་སྤྱི་ནུར་རོ། དང་པོ་ནི། དང་པོ་སྤྱི་ཡི་གསལ་ཞག་དེ་ཞེས་སོགས་སོ། གཉིས་པ་ནི། ནག་ཟླའི་བཅོ་ལྔའི་སྤྱི་ཞག་ལ་ཞེས་སོགས་སོ། གསུམ་པ་ནི། ཉིན་ཞག་ཉི་མའི་སོགས་ཀྱིས་གསལ་ཞག་དང༌། ནག་ཟླའི་གསལ་ཞག་སོགས་ཀྱིས་དེ་ལས་ཉི་དྷྲུ་སྒྲུབ་པའོ། བཞི་པ་ནི། དེ་ནས་ཉིན་ཞག་སྤྱི་ནུར་སོགས་སོ། ལྔ་པ་ནི། དེ་ནས་ལྷག་པ་པ་སངས་དོན་ཞེས་སོགས་སོ། གཉིས་པ་དངོས་གཞི་ལ་གཉིས་ཏེ། གཟའ་ལྔ་སོ་སོའི་དལ་དག་མྱུར་བར་དང་བཅས་པ་སྒྲུབ་ཚུལ་དང༌། མྱུར་དག་སྒྲུབ་ཚུལ་ལོ། དང་པོ་ནི། དེ་ནས་རེའུ་མིག་བཟུང་བྱ་སྟེ། ཞེས་སོགས་ཀྱིས་ཐུན་མོང་གི་རེའུ་མིག་ཟིན་ལ། དེ་ལྟར་ཟིན་པའི་སོགས་ཀྱིས་ཞི་གཉིས་ཀྱི་དལ་དག་སྒྲུབ་པ་དང༌། གང་ཟིན་རེའུ་མིག་སོགས་ཀྱིས་དྲག་གསུམ་གྱི་རྐང་འཛིན་སྒྲུབ་པའོ། དེ་ནས་དྲག་གསུམ་དལ་དག་སོགས་ཀྱིས་དྲག་གཟའི་དལ་དག་དང༌། ཞི་གཉིས་མྱུར་བར་སོགས་ཀྱིས་ཞི་གཉིས་ཀྱི་རྐང་འཛིན་གྱི་རེའུ་མིག་རྒྱས་བསྡུས་གང་རུང་འཛིན་ཚུལ་ལོ། །ལོངས་ན་སྟེང་དུ་དྲིལ་བྱེད་ཀྱི་སོ་སོའི་འཁོར་ལོ་ནི། དེ་ལྟར་ཞི་གཉིས་སོགས་སོ། །གཉིས་པ་ནི། མྱུར་རྐང་རེའུ་མིག་ཅེས་སོགས་སོ། རྗེས་འགྲོས་བཞི་ངོས་བཟུང་བ་ནི། རིམ་པའི་སྔ་རྐང་མྱུར་འགྲོས་ཤར་ཞེས་བྱ་བ་ལ་སོགས་པའོ། ཡང་གཟའ་ལྔའི་རེའུ་མིག་བསྡུས་པ་འཛིན་ཚུལ་ནི། ཡང་གཅིག་དྲག་གསུམ་ཞེས་སོགས་སོ། ལྔ་པ་ནི། དེ་ནས་རྩིས་ཕྲན་ཞེས་སོགས་ཏེ། འདི་ལ་གཉིས། རྒྱལ་བློན་གྱི་རྩིས་དང༌། ཆར་སོགས་ཀྱི་བརྟག་པའོ། དང་པོ་ནི། ལྕགས་བྱ་ལ་སོགས་འདས་པ་ཡི་ཞེས་སོགས་སོ། གཉིས་པ་ལ་གཉིས་ཏེ། ཆར་སོགས་ཀྱི་བརྟག་པ་དང༌། ཆར་ཁོ་ནའི་བརྟག་པའོ། དང་པོ་ནི། མེ་མཁའ་དུས་གཟུགས་སོགས་སོ། །གཉིས་པ་ནི། ཤ་ཀ་དྲག་སྦྱངས་སོགས་སོ། གཞན་ཡང་ཕྱི་རྒྱུད་དབྱངས་འཆར་གྱི་ཡིག་ཕྲན་རྣམས་སུ་ཆར་སོགས་བརྟག་པའི་རྩིས་མང་དུ་མཐོང་མོད་ཀྱི། ངེས་པ་མེད་པའི་ཕྱིར་འདྲི་བའི་སྤྲོས་པ་མ་བྱས་ལ། འོན་ཀྱང་འདིར་བཀོད་པ་འདི་ཙམ་ཞིག་དེང་སང་ལག་རྩིས་པ་ཕལ་ཆེ་བའི་ལག་ལེན་དུ་འདེབས་ཀྱིན་གདའ་བས་མཁོ་བར་བསམ་ནས་བྲིས་སོ། གཉིས་པ་ལི་ཐུ་དགྲོལ་བ་ནི། དེ་ལྟར་རི་མོའི་བྱ་བ་རྣམས་ཞེས་སོགས་ཏེ། འདི་ལ་གསུམ། ལོ་བཤད། ཟླ་བཤད། ཕྱེད་དགྲོལ་དངོས་སོ། དང་པོ་ལ་སྦྱོར་དངོས་གཉིས་ལས། སྦྱོར་བ་ལ་གཉིས་ཏེ། མཆོད་བརྗོད་དང༌། དམ་བཅའ་བའོ། དང་པོ་ནི། རྣམ་དཀར་ཞེས་སོགས་སོ། །གཉིས་པ་ནི། བརྩོན་པའི་ཞེས་སོགས་སོ། གཉིས་པ་དངོས་གཞི་ལ་བཞི་སྟེ། འདས་ལོ་རྟོགས་ཐབས་བསྟན་རྩིས། ད་ལྟའི་ལོ་རྩིས། དེའི་འབྲས་བཤད། ཟླ་ཤོལ་བཤད་པའོ། དང་པོ་ནི། འདས་ལོའི་གནས་རྣམས་སོགས་སོ། །གཉིས་པ་ལ་གཉིས་ཏེ། ནག་རྩིས་པའི་ལུགས་དང༌། སྐར་རྩིས་པའི་ལུགས་སོ། དང་པོ་ནི། ལོ་རྒན་དྲུག་ཅུའི་ཞེས་སོགས་རྐང་པ་གཅིག་དང་བཅས་པའི་ཚིགས་སུ་བཅད་པ་གསུམ་གྱིས་བསྟན་ཏེ་ཤོག་ཁྲའི་རེའུ་མིག་བལྟས་པས་ཤེས་པའི་ཕྱིར་མ་བཀྲོལ་ལོ། གཉིས་པ་ལ་གསུམ་སྟེ། ལོ་གཟའ་དང༌། ལོ་སྐར་དང༌། བྱེད་ལོ་རྒྱལ་བློན་དང་བཅས་པའོ། དང་པོ་ནི། ཉི་མ་ཉ་རྫོགས་ཞེས་སོགས་ཏེ། དུས་བསྟན་མེ་ལོང་ལས། དེ་ལས་དཔྱིད་འབྲིང་ངམ་ར་བ་ལ་ཁྱིམ་ཉ་ནས་ལུག་ཏུ་འབྱུང་བའི་ཚེ། རེས་གཟའ་གང་གིས་སྤྱོད་པ་དེའམ། ཐུབ་པའི་རྒྱུད་ལ་ངོས་བཟུང་བས་ལོའི་བདག་པོར་གྱུར་བའི་འབྲས་བུ་ལ་ལོངས་སྤྱོད་པར་འགྱུར་ཏེ། ཞེས་པའི་དོན་ནོ། གཉིས་པ་ནི། ལུག་ཏུ་སླེབ་པའི་ཞེས་སོགས་ཏེ། དུས་བསྟན་ལས། དྲང་སྲོང་ཕུར་བུ་ཉ་སྤངས་ཏེ་འཆར་བ་དེའི་ཚེའམ། དཔྱིད་འབྲིང་གི་ཚེས་གཅིག་ལ་ཕུར་བུས་བལྟས་ཏེ། གང་ལ་ལོངས་སྤྱོད་པའི་རྒྱུ་སྐར་དེ་ནི་ལོ་ཟླའི་བདག་པོའི་སྐར་མར་འགྱུར་རོ། ཞེས་པའི་དོན་ནོ། གསུམ་པ་ནི། བྱེད་པའི་ཞེས་སོགས་སོ། གསུམ་པ་ནི། བཀོད་ལ་དེ་རྣམས་འབྲས་བུ་ནི་ཞེས་སོགས་ཏེ། འདི་དག་འོག་ཏུ་འབྲས་རྩིས་སྣ་ཚོགས་པའི་རབ་བྱེད་དུ་འཆད་དོ། དེར་མ་ཟད་གཞན་ཡང་ཞེས་སོགས་ཏེ། ཇོ་བོ་ཆོས་སྐྱོང་དང་ནམ་བཟང་སོགས་ཀྱིས་བསྒྱུར་བའི་ཀ་ར་མྱང་རྩིས་དང༌། ཤ་ཀ་དྲག་སྦྱངས་སོགས་ཀྱང་འདྲི་བ་ཕྱག་ལེན་དུ་སྣང་ཞིང༌། གོང་མའི་ཕྱག་ཐོ་ལ་ལར། གཟའ་ལྔའི་ཕྱིར་ལྡོག་འབྲས་བུ་སོགས་ཀྱང་འགོད་པར་མཛད་དེ། སྤྲོ་ན་འོག་ཏུ་འབྲས་རྩིས་ཀྱི་རབ་བྱེད་བཅུ་གཉིས་པར་བཤད་ཡོད་པས་དེར་ལྟའོ། བཞི་པ་ཟླ་བཤོལ་ནི། ལོ་དེར་སོགས་ཏེ། ལོ་བཤད་གྲུབ་རྗེས་ཟླ་བ་འདི་བཤོལ་ཞེས་འདྲིའོ། འོ་ན་ཟླ་བཤོལ་འདོན་ཚུལ་ཇི་ལྟར་ཞེ་ན། སྤྱིར་ཟླ་བཤོལ་འདོན་ཚུལ་ལ་བཞེད་ལུགས་མང་སྟེ་འདུལ་བ་ལུང་ལས། བཅོམ་ལྡན་འདས་འོད་མའི་ཚལ་ན་བཞུགས་པའི་ཚེ། དགེ་སློང་རྣམས་ལ་ལོ་ལྔ་ལྔ་ན་བཤོལ་དོར་ཅིག ཅེས་བཀའ་སྩལ་པ་ལྟར་ལོ་ལྔ་ལྔ་ན་བཤོལ་དོར་བ་ན། རྒྱལ་པོ་རྣམས་ལོ་གསུམ་གསུམ་བཞིན་བཤོལ་འདོན་པ་མ་མཐུན་ནས་བློན་པོ་རྣམས་འཕྱ་བ་ན། བཅོམ་ལྡན་འདས་ལ་གསོལ་པས། བློན་པོ་རྣམས་འཕྱ་བ་ནི་ཡུས་ཏེ། དེ་ལྟ་བས་ན་རྒྱལ་པོའི་གཞུང་བཞིན་དུའང་གྱིས་ཤིག ཅེས་རྒྱལ་པོ་དང་མཐུན་པར་ལོ་གསུམ་གསུམ་ན་བཤོལ་འདོར་བར་གནང་ངོ༌། དེ་ལྟ་མོད་ཀྱི། བོད་ཁ་ཅིག་ཀྱང༌། ལོ་རེའི་ཞག་མི་ཐུབ་དྲུག་པོ་བསགས་ཏེ་ལོ་ལྔ་ན་བཤོལ་དོར་ཟེར་རོ། དེ་ནི་དུས་འཁོར་དུ་མ་ཟད། མཛོད་དང་ཡང་མི་མཐུན་ཏེ། ཡུད་ཙམ་ཉིན་ཞག་ཟླ་གསུམ་ནི། གོང་ནས་གོང་དུ་སུམ་ཅུ་འགྱུར། ཞེས་ཟླ་བ་རེ་ལ་ཉིན་ཞག་སུམ་ཅུ་རེ་ཡོད་པར་གསུངས་ཤིང༌། ལོ་རེ་ལ་ཉིན་ཞག་སུམ་ཅུ་རེ་ལ་ཟླ་བར་བྱས་པའི་ཟླ་བ་བཅུ་གཉིས་པོའི་སྟེང་དུ་ཞག་མི་ཐུབ་དྲུག་བསྣན་ཏེ་ཉིན་ཞག་སུམ་བརྒྱ་དྲུག་ཅུ་རྩ་ལྔ་རེ་དགོས་པར་བཞེད་པས་སོ། །དེ་སྐད་དུའང༌། ཞག་མི་ཐུབ་དང་བཅས་པ་ཡི། ཟླ་བ་བཅུ་གཉིས་ལ་ལོ་གཅིག ཅེས་སོ། །ཡང་བོད་སྔ་མ་ཁ་ཅིག་རྟ་བྱ་བྱི་བ་ཡོས་ལ་བཤོལ། སྟོན་དགུན་དཔྱིད་དབྱར་འབྲིང་པོ་གཉིས། ཞེས་འདོད་པ་དང༌། རྒྱ་རྩིས་པ་ཁ་ཅིག ཀོང་ཙེའི་ཞུ་ལན་དུ། གདུག་པ་ཅན་གྱི་ལོ་དག་ལ། གདུག་པ་ཅན་གྱི་ཟླ་བ་བཤོལ། ཞེས་གསུངས་པས་སྟག་སྦྲུལ་སྤྲེའུ་ཕག་བཞི་ལ་རང་རང་གི་ཟླ་བ་བཤོལ་ཟེར་རོ། ལུགས་དེ་གཉིས་ཀ་ཟླ་བ་སོ་དགུ་རེ་ན་ཟླ་བཤོལ་འདོན་པར་བཞེད་པས་ལོ་བཅུ་གཉིས་ལ་ཟླ་བཤོལ་བཞི་དང་དྲུག་ཅུ་སྐོར་རེ་ལ་ཟླ་བཤོལ་ཉི་ཤུ་རེ་འོང་སྟེ་རགས་རྩིས་ལའང་མི་འགྲིག་པས་མི་ལེགས་སོ། ཡང་སྨན་པ་ཁ་ཅིག་ན་རེ། ཟུར་བློ། རྒྱུད་ཆུང་ལས། ལོ་གསུམ་དག་ན་ཟླ་བཤོལ་རེ། གདུག་པ་བཞི་ལ་རང་ལོ་བོར་ཞེས་གཤེད་བཞིའི་ལོ་ལ་རང་ཟླ་བཤོལ་བ་རགས་རྩིས་དང༌། སོ་མ་རཱ་ཛཱ་ལས། མོ་དྲུག་ཉི་ཤུ་རྩ་དགུ་ལ། ཕོ་དྲུག་སུམ་ཅུ་དག་ཏུའོ། དེ་ལྟར་བརྩིས་པའི་ལོ་གཅིག་ལ། ཞག་ནི་ལྔ་ལྔ་བཅུ་ཡིན་ཏེ། ལོ་ནི་གསུམ་གསུམ་དག་ལའང༌། ཟླ་བ་ལྷག་པ་དག་ཡིན་ནོ། །ཞེས་པ་སྔ་མ་ལས་ཅུང་ཟད་ཞིབ་པའི་དབང་དུ་བྱས་པར་འདོད་དོ། དེ་ནི་མི་རིགས་ཏེ། སོ་མ་རཱ་ཛཱ་ལུང་འདིའི་ཟླ་བཤོལ་རྩོམ་བྱེད་མོ་ཟླ་དྲུག་ལ་དོར་བའི་ཞག་མི་ཐུབ་དྲུག་གིས་བྱས་པར་སོང་ལ། དེ་ལྟར་ན། ལོ་ལྔ་ལ་ཐོན་གྱི། གསུམ་པ་ལ་མི་ཐོན་པའི་ཕྱིར་དང༌། ལུང་དེའི་རྐང་པ་བཞི་པ་དང་ལྔ་པ་གཉིས་ཁོ་ནར་བལྟས་ནས་ཁྱོད་ཀྱིས་བཤད་པ་བྱས་མོད་ཀྱི། རྐང་པ་གཉིས་པོ་དེ་ནི་ཡི་གེ་མ་དག་པར་གསལ་བའི་ཕྱིར་དང༌། གལ་ཏེ་ཡི་གེ་མ་དག་པ་མ་ཡིན་ན་རྐང་པ་དང་པོ་གསུམ་དགོས་མེད་དུ་སོང་སྟེ། དེ་ལྟར་བརྩིས་པའི་ལོ་གཅིག་ལ་ཞག་ལྔ་ལྔ་སྟེ་བཅུ་མི་འོང་བའི་ཕྱིར་ཏེ། མོ་ཟླ་དྲུག་གི་མི་ཐུབ་ཆ་བསགས་པས་ཞག་དྲུག་ལས་མེད་པའི་ཕྱིར་རོ། གལ་ཏེ་ཕོ་ཟླ་དྲུག་གི་སྟེང་ནས་ཟླ་བ་བཞི་རྩ་དགུ་ཟླ་བར་བྱེད་དོ་ཞེ་ན། ཕོ་དྲུག་སུམ་ཅུ་དག་ཏུ་ཡོད་པ་དང་འགལ་ལོ། དེས་ན་ལུང་འདིའི་ཡི་གེའི་བཞུགས་ཚུལ་ལ་བལྟས་ན་ལོ་ལྔ་རེ་ལ་བཤོལ་འདོན་པའི་ལུགས་སུ་འདུག་པས་རྒྱུད་ཆུང་གི་ལུགས་དེ་ལས་རྩིང་བ་ཡིན་པས་རགས་ཞིབ་གང་ལ་ཟེར་གྱི་འཇིག་རྟེན་པའི་ཐ་སྙད་ཙམ་ཞིག་ལ་ཐོག་མར་བློ་སྦྱོང་བ་གཅེས་སོ། །དེ་ལྟ་ནའང༌། དཔལ་ལྡན་དུས་ཀྱི་འཁོར་ལོའི་རྒྱུད་འགྲེལ་གྱི་ལུགས་འདི་ལ་ཟླ་བ་ཕྱེད་དང་བཅས་པའི་སུམ་ཅུ་སོ་གཉིས་ན་ལྷག་པའི་ཟླ་བར་འགྱུར་ཞེས་གསུངས་ཏེ། ཇི་ལྟར་ན། ལོ་རེ་ལ་ཁྱིམ་ཚེས་ཀྱི་བར་ཁྱད་ཞག་བཅུ་གཅིག ཆུ་ཚོད་བཞི། སྲང་སོ་དྲུག དབུགས་ལྔ། འདོད་ཆ་བདུན་རྣམས་ཡོད་པ་དེ་རིམ་པར་བཅུ་གཉིས་ཀྱིས་ཕྱེ་བས་ཁྱིམ་ཟླ་རེ་དང༌། ཚེས་ཟླ་རེའི་བར་ཁྱད་ལ་དུས་ཀྱི་ཆུ་ཚོད་ལྔ་བཅུ་ང་ལྔ༌། ཆུ་སྲང་ཉེར་གསུམ། དབུགས་ཐིག འདོད་ཆ་དྲུག་རྣམས་འོང་ལ། དེའི་གནས་ཐམས་ཅད་རེ་ལྔས་བསྒྱུར་ཏེ་རིམ་པར་གཉིས་ཀྱིས་ཕྱེ་བའི་ནོར་རྣམས་ཞག་སར་གྲིལ་བས་ཞག་སུམ་ཅུ་འབྱུང་སྟེ་ཟླ་བར་ལོངས་བའི་ཕྱིར་རོ། དེ་ལྟར་ཟླ་བ་ཕྱེད་བཅས་སོ་གཉིས་ཏེ་ལོ་གཉིས་དང་ཟླ་བ་ཕྱེད་དང་དགུ་ན་བཤོལ་འོང་ལ། འདོན་ཚུལ་ལ་ཟླ་དག་འཕར་བ་ལས་འདོན་པ་དང༌། ཟླ་བའི་སྒང་ཚད་ལས་འདོན་པའི་ལུགས་གཉིས་ལས། དང་པོ་ནི། དེས་ན་ལོ་ནི་རེ་ལྔ་ལ་ཟླ་བཤོལ་ཉི་ཤུ་རྩ་བཞི་འཁོར་བས་ཚུལ་འདི་ཉིད་དཀའ་བ་མེད་པར་བདེ་བླག་ཏུ་རྩི་བར་འདོད་ན་འདི་ལྟར་ཤེས་པར་བྱ་སྟེ། ལོ་གང་དང་གང་གི་གྲུབ་མཐའི་ནག་པའི་ཟླ་བཤོལ་གྱི་རྩིས་འཕྲོར་ཞེ་བརྒྱད་ང་ལྔ་སོགས་བྱུང་ན། རིམ་བཞིན་དུ་མགོ་དང་གྲོ་ཞུན་སོགས་བཤོལ་ཏེ། དེ་ཡང་ནག་ཟླའི་མདའ་རོ་ལྷག་ལ་ཞེ་བརྒྱད་བྱུང་བ་དེའི་ཚེ་ཧོར་ཟླ་བཅུ་གཉིས་པ་རྒྱལ་ཟླའི་ཟླ་དག་འཕར་ཞིང་མདའ་རོའི་ལྷག་ཏུ་གཅིག་འབྱུང་བས་དེའི་ཟླ་བ་ཧོར་ཟླ་བཅུ་གཅིག་པ་མགོའི་ཟླ་བ་ལྷག་ཅིང༌། ལྷག་མར་གཅིག་ལུས་ནས་ཟླ་དག་འཕར་བའི་ཚེ་ཟླ་བཤོལ་དོན་ནས་ཟླ་བ་ཕྱེད་སོང་བ་ཡིན་པས་དབུས་ནས་འདོན་པ་ཞེས་ཐ་སྙད་མཛད་ལ། དེ་བཞིན་དུ་ནག་ཟླའི་མདའ་རོའི་ལྷག་ང་ལྔ་ཡོད་པའི་ཚེ་ཧོར་ཟླ་བརྒྱད་པ་ལ་ཟླ་དག་འཕར་ཞིང་མདའ་རོའི་ལྷག་སྟོངས་པས་དེའི་ཚེ་ཧོར་ཟླ་བདུན་པ་གྲོ་ཞུན་གྱི་ཟླ་བ་ལྷག་ཅིང༌། མདའ་རོའི་ལྷག་སྟོངས་པས་ཟླ་དག་འཕར་ཚེ་ཟླ་བཤོལ་རྫོགས་གྲུབ་པ་ཡིན་པས་མཐའ་ནས་བཤོལ་བ་ཞེས་ཐ་སྙད་མཛད་དོ། དེ་བཞིན་དུ་ནག་ཟླའི་མདའ་རོའི་ལྷག་རེ་གཉིས་ལ་ས་ག་ཟླ་བ་དབུས་ནས་བཤོལ་བ་སོགས་ཟླ་བཤོལ་དབུས་མཐའ་རེ་མོས་ཀྱིས་འདོན་པ་ཟླ་ལྷག་ཉེར་བཞི་པོ་ཐམས་ཅད་ལ་འདྲ་ཞིང་དེ་ལྟར་ན་ལོ་རེ་ལྔའི་མཐར་ལོ་མཚམས་སུ་འཁོར་ཞིང་དེ་ཉིད་ལན་བཅུ་གཉིས་སུ་བཟློས་པ་བདུན་བརྒྱ་བརྒྱད་ཅུའི་མཐར་དྲུག་ཅུ་སྐོར་རེའི་མཚམས་སུ་འཁོར་བ་སོགས་བསྐལ་པའི་བར་དུ་ཡང་དེ་ཁོ་ན་ལྟར་འཁོར་ཞིང་འཁོར་བ་མ་གཏོགས་པ་རྣམ་པ་གཞན་དུ་འགྱུར་བ་མི་སྲིད་པ་ཉིད་དོ། བྱེད་རྩིས་ཀྱི་ཟླ་ལྷག་ནི་སྔར་བཤད་པ་ལྟར་རྩིས་ལོ་ཉིས་བརྒྱ་ཉེར་གཅིག་གི་ཐོག་མའི་མེ་ཁྱི་དེ་ལ་ས་ག་བཤོལ་དུ་འོང་རྒྱུར་ཟླ་བ་གཉིས་ཀྱིས་སྔ་ནུར་ཏེ་ཤིང་བྱའི་མཐའི་དབོ་ཟླ་བཤོལ་དུ་མཛད་པའི་དབང་གིས་གྲུབ་མཐའི་ཟླ་བཤོལ་ལས་བྱེད་པའི་བཤོལ་ཟླ་བ་གཉིས་རེས་སྔ་བ་རྣམ་པ་ཀུན་ཏུའོ། གཉིས་པ་ནི། ཁྱད་པར་གནད་ཀྱི་སོགས་ཏེ། འདིར་སྔར་བཤད་པའི་སྒང་ཚད་ཀྱི་ཁྱིམ་ཞག་གི་རི་མོ་དེ་ཉིད་ཚེས་ཟླས་ཁྱིམ་ཟླའི་དོད་མ་ཐུབ་པའི་དབང་གིས་ཕྱི་འགྲོས་སུ་ནུར་བས་ཟླ་བ་སྔ་མའི་སྒང་ཚད་གནམ་སྟོང་དང་ཕྱི་མའི་སྒང་ཚད་ཚེས་གཅིག་ལ་བྱུང་བའི་ཚེ་དེ་གཉིས་ཀྱི་བར་དུ་ཟླ་བ་གཅིག་ཐེབ་ལ་འདོན་དགོས་ཏེ། ཟླ་བ་སྔ་མའི་ཁྱིམ་ཞག་བརྒྱད་པ་ནས་ཕྱི་མའི་ཁྱིམ་ཞག་བརྒྱད་པའི་བར་ཁྱིམ་ཞག་སུམ་ཅུ་འོང་བ་གྲུབ་པའི་མཐའ་ལ་རྒོལ་དུ་མེད་པའི་ཕྱིར་རོ།  དེ་ལྟ་བུའི་ཁྱིམ་ཞག་བརྒྱད་པའི་ལག་ལེན་དང་བསྟུན་པའི་ཟླ་བཤོལ་དེ་བྱེད་རྩིས་པའི་ཟླ་དག་འཕར་བའི་བདུན་ཟུར་དང་འགྲིགས་ལ། དེ་ལས་ཀྱང་ཟླ་བ་གཉིས་ཀྱི་འཕྱི་བ་ན་གྲུབ་རྩིས་པའི་ཟླ་དག་འཕར་བའི་ཟླ་བཤོལ་འོང་བ་ཡིན་ནོ། དེ་ལ་འདི་སྙམ་དུ། གྲུབ་རྩིས་ཀྱི་ཟླ་དག་འཕར་བའི་ཟླ་བཤོལ་དང༌། ཁྱིམ་ཞག་བརྒྱད་པའི་རི་མོས་བཏོན་པའི་ཟླ་བཤོལ་གཉིས་རགས་ཞིབ་གང་དང་གང༌། དང་པོ་ཞིབ་མོའི་ཆོ་ག་ཡིན་ན་ནི་བྱ་སླ་ལ་ཞིབ་པའི་ཆོ་ག་དེ་དོར་ནས་ཁྱིམ་ཞག་བརྒྱད་པའི་རི་མོ་སོགས་ཟླ་བཤོལ་གྱི་མན་ངག་ཟུར་པ་བྱས་པ་ལ་དགོས་པ་ཅི། ཕྱི་མ་ཞིབ་མོའི་ཆོ་ག་ཡིན་ན་ནི་རང་ལུགས་ཀྱི་གྲུབ་མཐའི་རྩིས་འདི་སྐྱོན་ཅུང་ཟད་ཀྱང་མེད་པར་འདོད་པའི་གཏམ་གོང་འོག་ཀུན་དུ་བཟླས་པ་དང་འགལ་ལོ་ཞེ་ན། དོགས་པ་དེ་སྐྱེ་བ་བདེན་མོད་ཀྱི། དེ་ལྟ་ནའང་རྟོགས་པ་དང་དཔྱོད་པའི་རྟ་མཆོག་གི་ཁ་ལོའི་ཆེད་དུ་རིགས་པའི་སྲབ་སྐྱོགས་འདི་ལྟ་བུ་ཞིག་འཇུག་སྟེ། འདི་ལྟར་བྱེད་པ་དང་གྲུབ་པའི་ཟླ་བཤོལ་འདོན་ཚུལ་གསུམ་པོ་དེ་གང་ཡིན་ཡང་རང་རང་གི་ཟླ་བཤོལ་གཅིག་ནས་བཟུང་སྟེ་ཕྱེད་བཅས་སོ་གཉིས་ཀྱི་མཚམས་སུ་ཐོན་པ་ལ་འདྲ་བས་རྒྱུད་འགྲེལ་གྱི་བཤད་པ་དང་སྒྲིག་པར་ནུས་མོད། འོན་ཀྱང་བྱེད་པའི་ཟླ་བཤོལ་ནི་ཟླ་བ་གཉིས་ཀྱི་སྔ་ནུར་བར་རྩིས་འགོའི་ངེས་པས་བསྟན་པའི་ཕྱིར་ན་མ་དག་པས་དོར་ལ། འདིར་གྲུབ་རྩིས་ཀྱི་ཟླ་དག་འཕར་བ་ལས་བཏོན་པ་ནི་ཞིབ་རྩིས་ཀྱི་ཟླ་བཤོལ་ཡིན་ལ། ཁྱིམ་ཚེས་ཀྱི་བར་ཁྱད་འདོན་པའི་ཆོ་ག་རྣམ་དག་གིས་བཏོན་པའི་ཕྱིར་དང༌། གྲུབ་མཐའི་ཟླ་བཤོལ་གྱི་རྩིས་འཕྲོ་དག་པའི་སྟོང་རྩིས་ཀྱི་འཁོར་ལོ་དྲུག་ཅུ་རྩ་ལྔའི་རེའུ་མིག་ལ་བལྟས་པས་གྲུབ་པའི་ཕྱིར་རོ། འོ་ན་དིང་སང་སྒང་ཚད་ལ་འདོན་པ་ཉིད་ཕྱག་ལེན་དུ་མཛད་པ་གང་ཞེ་ན། འདི་ནི་སྐར་རྩིས་དང་ནག་རྩིས་ཟུང་འབྲེལ་གྱི་ལི་ཐུ་འཛིན་པའི་དབང་གིས་རྒྱ་རྩིས་པ་དང་བསྟུན་པ་ཡིན་ལ། དེ་ལྟར་ནའང་གྲུབ་མཐའ་དང་མི་འགལ་ཏེ། སྔར་བཤད་པ་ལྟར་གྲུབ་མཐའི་ཁྱིམ་ཞག་རྟག་ལོངས་ཀྱི་རེའུ་མིག་བལྟས་པས་གྲུབ་པའི་ཕྱིར་རོ། འོན་ཀྱང་སྔ་མ་ལས་འདི་ཉིད་ཅུང་ཟད་རྩིང་སྟེ་ཁྱིམ་ཟླ་ཕྱེད་བཅས་སོ་གཉིས་ན་ཚེས་ཟླ་ཕྱེད་བཅས་སོ་གསུམ་འོང་བའི་གནད་ཀྱིས་ཁྱིམ་ཞག་བཅོ་ལྔ་པ་རྫོགས་མཚམས་སུ་འདོན་རིགས་པ་ལས་ཞག་བདུན་སྔ་བསྣུར་ནས་བཏོན་པས་སོ། འོ་ན་རྒྱ་རྩིས་པ་དང་བསྟུན་པ་གང་གིས་ཤེས། བསྟུན་པ་ལ་དགོས་པ་ཅི་ཞིག་ཡོད་ཅེ་ན། དང་པོའི་ལན་ནི། དཔལ་མགོན་འཕྲིན་ལས་པའི་དགོངས་པ་ལྟར་ཆོས་རྫོང་རབ་འབྱམས་པས་བྲིས་པའི་མན་ངག་རྩ་ཐོར། ད་ལྟ་རྒྱ་ནག་ཆེན་པོའི་ཡུལ། རྒྱལ་པོའི་བཀའ་ཡིས་བཅད་པའི་ཁྲིམས། འདི་ནི་རྒྱ་ནག་རྩིས་པའི་ལུགས། ཕོ་བྲང་ནང་གི་ཁྱིམ་རྩིས་ཀྱི། ལི་ཐུར་བརྗོད་པ་མངོན་སུམ་མཐོང༌། སྔོན་མེད་གསར་པ་ངོ་མཚར་རྨད། ཅེས་དང༌། ཕུག་པ་ཀུན་དགའ་དཔལ་བས་ཀྱང༌། ནམ་ཞིག་ཚེས་ཟླས་ཁྱིམ་ཟླ་མ་ཐུབ་པས། ཟླ་འཐེབ་ཅེས་བྱ་ཚེས་ཟླ་ལན་གཉིས་འཆར། ཟླ་འཐེབ་གསལ་བྱེད་དུས་འཁོར་གྲུབ་པའི་ལམ། སྐར་ནག་དགོངས་པ་གཅིག་ཏུ་འཆད་ཤེས་པ། ད་ལྟའི་རྒྱ་ནག་ལག་ལེན་དང་མཐུན་པའི། ཡ་མཚན་ཞིབ་མོ་ཁོ་བོས་གཞན་དུ་བཤད། ཅེས་པའི་ལག་ལེན་གཞན་དུ་བཤད་པ་ལ་ཁ་འཕང་བའང་འདི་ཉིད་ཡིན་པར་གདོན་མི་ཟ་ཞིང༌། སྤྱན་རས་གཟིགས་དབང་རྗེ་རྒྱལ་བའི་དབང་པོའི་གསུང་ལས་ཀྱང༌། ཁོ་བོས་ཀྱང་ཤར་ཕྱོགས་གོང་མའི་རྒྱལ་ཁབ་ཏུ་བགྲོད་ཚེ་ལི་ཐུ་ཚར་གཉིས་ཙམ་མཐོང་བར་ཚེས་ཀྱི་ཆད་ལྷག བཤོལ་སོགས་ཐམས་ཅད་གྲྭ་ཕུག་ལུགས་ཀྱི་ཕྱག་ལེན་དང་ཞུ་དག་ཕེར་བར་སྣང་ངོ༌། ཞེས་གསུངས་པས་སོ། གཉིས་པའི་ལན་ནི། སྐར་རྩིས་པའི་ཟླ་བཤོལ་ལ་སྔ་ཕྱི་ཅུང་ཟད་ནུར་ཡང་སྐྱོན་མེད་དེ། གཟའ་སྐར་གྱི་ལི་ཐུ་ཆུ་བབས་སུ་འབབས་པས་ཟླ་བའི་མིང་གི་ཐ་སྙད་ཙམ་ལས་ཁྱད་པར་མེད་པའི་ཕྱིར་རོ། ནག་རྩིས་པའི་ཟླ་བཤོལ་ལ་སྔ་ནུར་ཕྱི་ནུར་བྱུང་ན་ལག་ལེན་ཕྱི་ཅི་ལོག་ཏུ་འགྱུར་བ་ཡིན་ཏེ། ཟླ་བ་གང་བརྩེགས་དེའི་ཕྱི་མ་ལ་ཉི་མ་སོགས་སྔ་མ་དེ་ག་ལྡབས་ཏེ་ལུང་སྟོན་དགོས་པའི་ཕྱིར་རོ། དེས་ན་དགོས་པ་དེ་ཉིད་གཟིགས་ནས་གོང་མ་རྣམས་ཀྱིས་རྒྱ་རྩིས་པ་དང་བསྟུན་པའི་བཤོལ་འདོན་པར་མཛད་པ་ཡིན་ལ། དེར་མ་ཟད་ལག་ལེན་འདི་ལ་དགུན་ཉི་མགོ་ཟླ་དང་དབྱར་ཉི་སྣྲོན་ཟླ་ལས་མི་འདའ་བ་སོགས་དུས་ཀྱི་གཟེར་རྣམས་མི་འཆུག་པའི་དགོས་པའང་ཡོད་དེ། ཀུན་དགའ་དཔལ་བའི་དུས་བཞི་གསལ་བྱེད་ལས། འབྱུང་རྩིས་པ་རྣམས་དཔྱིད་ར་སྟག་ཟླ་བ། སྐར་མ་མགོ་ཡི་ཉ་བའི་ཟླ་བ་ཡིན། དེ་ཡི་བརྒྱད་ལ་དགུན་ཉི་ལྡོག་པས་ཁྱབ། དེ་ཡང་གོང་དུ་ཞིབ་པར་བཤད་པ་བཞིན། ཁྱིམ་ཟླ་འདི་ལ་ཟླ་བའི་ངེས་པ་དང༌། སྐར་རྩིས་གྲུབ་མཐའ་ཀུན་གྱི་རྩ་བ་ཡིན། ནམ་ཟླ་གྲང་དྲོ་དུས་ཀྱིས་འཆར་བ་རྣམས། འདི་ཉིད་ཁོ་ན་གཅེས་པར་འཛིན་པ་ཡིན། ཞེས་སྒྲོག་པ་བཞིན་ནོ། གཉིས་པ་ཟླ་བཤད་ནི། ལོ་བཤད་རྫོགས་པའི་རྗེས་དེ་ནས་ཟླ་བཤད་སོགས་ཏེ། འདི་ལ་བརྒྱད་དེ། ཟླ་བ་སོ་སོའི་དབང་ཐང་དང་ཆེ་ཆུང༌། དུས་གཟེར། དུས་ཆེན། ནག་རྩིས་པའི་རྩིས་ཕྲན་འགའ། ཚེས་ཀྱི་ཆད་ལྷག གཟའི་དར་གུད། དབང་ཕྱུུག་མཇལ་འཕྲད། གཟའ་ལྔ་ལ་སོགས་པའི་རི་མོའོ། དང་པོ་ནི། གསུམ་པ་ལ་སོགས་བརྗོད་པའི་མཐར་ཞེས་སོགས་སོ། གཉིས་པ་ནི། དེ་རྗེས་ཟླ་བ་སོ་སོའི་སྒང་དབུགས་ཁྱིམ་སླེབ་གསུམ་གང་སྔ་བ་དེ་ནས་རིམ་པར་བྲི་བར་བྱའོ། དེ་ལྟར་བྲིས་ནས་རྒྱ་རྩིས་པ་དང་རྒན་རྩིས་པ་རྣམས་ལ་གྲགས་པའི་སྒང་དབུགས་གཉིས་སོ་སོའི་དུས་གཟེར་གྱི་རྩིས་ཕྲན་རྣམས་དང་ཁྱིམ་སླེབ་ཀྱི་འབྲས་བུ་སོགས་རང་རང་གི་རྗེས་དེ་གར་འདྲི་སྟེ། འདི་ལྟར། གསུམ་པའི་དབུགས་ཐོབ་ནམ་མཁའ་ཡི། ཞེས་སོགས་ཀྱིས་ཟླ་བའི་དབུགས་ཐོབ་ཀྱི་གཟེར་རྣམས་དང༌། གསུམ་པའི་སྒང་ལ་འབྲུ་ཡི་ཆར། ཞེས་སོགས་ཀྱིས་སྒང་གི་གཟེར་རྣམས་འདྲིའོ། གཞན་ཡང་སྒང་གི་དུས་འདི་ལ་ནག་པ་སོགས་གང་ཉའི་སྐར་མ་དང་སྔར་ལེའུ་གཉིས་པར་བཤད་པའི་རགས་པ་ཟླ་བ་ལ་འཆར་བའི་རྟེན་འབྲེལ་རྣམས་བྲི་བར་བྱ་ཞིང་ཁྱིམ་སླེབ་ལས་བཞི་སོགས་ཀྱིས་ཁྱིམ་བཅུ་གཉིས་པོ་སོ་སོའི་ལས་བཞིའི་འབྲས་བུ་དང༌། དབྱངས་འཆར་བ་ལ་གྲགས་པའི་དྲག་མོ་སོགས་ཁྱིམ་དག་གི་ལྷ་དང༌། ཉི་མ་ཁྱིམ་གང་དུ་ཡོད་བརྩིས་པའི་བུམ་སྟོང་རྣམས་ཀྱང་འདྲིའོ། ཞར་བྱུང་བདུན་པ་སོགས་ཀྱིས་རྐྱང་ལྷགས་སོགས་དུས་གཟེར་ཕྲན་ཕྲན་རྣམས་ཀྱང་སྤྲོས་པ་ལ་དགའ་བས་འདྲི་འདོད་ནའང་སྐབས་དེ་དང་དེར་བཀོད་པས་ཆོག་སྟེ་བཀག་པ་མེད་དོ། གསུམ་པ་ནི། དེ་རྗེས་བསོད་ནམས་ཚོགས་རྟེན་གྱི། རྒྱལ་བའི་དུས་ཆེན་རྣམས་བཞི་འདྲི། ཞེས་བྱ་བ་ལ་སོགས་པ་སྟེ། འདི་ནི་ཁ་ཆེ་པཎ་ཆེན་གྱིས་མཛད་པའི་དུས་ཆེན་ངོས་འཛིན་ལ་བརྟེན་ནས་གནམ་རྟགས་ཉ་སྐར་དང་ཉི་ཁྱིམ། བར་རྟགས་སེམས་ཅན་བཞིའི་སྒྲ་སྐད་འབྱིན་པ། ས་རྟགས་མེ་ཏོག་བཞི་ཁ་འབུས་པ། དུས་མཆོད་གང་དུ་དར་བའི་ཡུལ། ཁུངས་ཀྱི་མདོ་དང་བཅས་པ་ལ་དུས་ཆེན་གྱི་ཚེས་གྲངས་སོགས་འགའ་ཞིག་རང་གིས་འཐད་ཕྱོགས་བཟུང་ནས་བཞག་པ་དང༌། ཞར་བྱུང་དགེ་བའི་འགྱུར་ཁྱད་སོགས་ཀྱིས་ཀྱང་བརྒྱན་ཏེ་བཤད་དོ། འདིར་མཁས་པ་དག་ཨུ་དུམྦཱ་ར་གནས་སྐབས་གཞན་དུ་མི་འབྱུང་ཞིང་སིང་མ་སོགས་ངེས་པའི་རྟགས་སུ་མི་སྣང་ཡང༌། རེ་ཞིག་དད་པའི་ཡུལ་དུ་བྱས་ནས་བཤད་ཅེས་གསུངས་ཏེ་ཐུག་པ་མེད་དོ། བཞི་པ་ནི། དེ་ནས་ཉི་ནག་གི་འབྲས་བུ་ཧོར་ཟླ་གསུམ་པ་ལ། བཅུ་དྲུག་ལ་བྱང་དུ་རྟ་མི་རྒྱུག ཅེས་སོགས་དང༌། དེ་རྗེས་སོགས་ཀྱིས་གཞན་ཡང་ཟླ་ནག་དང༌། སྐྱོར་ཁ་དང༌། ཐེབས་ལྡོག་དང༌། ཀླུ་ལྡོག་དང༌། ལྷ་ལྔ། ལྷ་དགུ་རྣམས་རིམ་པར་འདྲི་སྟེ། ཟླ་བཤད་ཀྱི་ལག་ལེན་འདི་རྣམས་ཕལ་ཆེར་ཤོག་ཁྲ་ལས་བཤུས་པ་རང་གིས་ཆོག་པ་ཡོད་པས་རྒྱ་མ་བསྐྱེད་དོ། ལྔ་པ་ནི། དེ་དག་གི་རྗེས་སུ་ཚེས་འདི་ཆད། འདི་ལྷག་ཅེས་འདྲི་སྟེ། འདི་ལ་བཞི་སྟེ། ཆད་ལྷག་འདོན་ཚུལ། ཆད་ལྷག་གི་རྒྱུ་མཚན། ཆད་ལྷག་གི་རྒྱུ། ལྷག་པ་སྔ་མའི་ལི་ཐུ་སྒྲུབ་པའོ། དང་པོ་ནི། རེས་གཟའ་ལན་གཉིས་སོགས་སོ། གཉིས་པ་ནི། དོན་དུ་ཚེས་ལ་ཞེས་སོགས་ཏེ། དཔེར་ན་ཆད་པའི་ཚེ་ཚེས་གཅིག་ལ་གཟའ་གནས་སུ་ཐིག ཆུ་ཚོད་དུ་གཅིག ཚེས་གཉིས་ལའང་གཟའ་གནས་སུ་ཐིག ཆུ་ཚོད་དུ་ང་ལྔ་ལྟ་བུ་བྱུང་བའི་ཚེ། ཚེས་གཅིག་གི་མིང་ཅན་གྱི་ཉིན་ཞག་སྤེན་པས་བདག་བྱས་པ་དེའི་སྟེང་ནས་ཆུ་ཚོད་གཅིག་པོ་རྫོགས་པ་དང༌། ཚེས་ཞག་གཉིས་པའི་ཆུ་ཚོད་ང་བཞི་སྟེ། ཚེས་གཉིས་ཀྱི་མིང་ཅན་གྱི་ཉིན་ཞག་དེ་ལའང་སྤེན་པ་བྱུང་བས་དེའི་སྟེང་ནས་ཆུ་ཚོད་ང་ལྔ་པོ་རྫོགས་སོ། ཚེས་གསུམ་གྱི་སྟེང་ནས་ཀྱང་ཁ་ལོངས་ཆུ་ཚོད་ལྔ་བླངས་པས། མདོར་ན་སྤེན་པས་བདག་བྱས་པའི་ཉིན་ཞག་གཅིག་པོ་དེས་ཚེས་ཞག་གསུམ་གྱི་ངོ་མཐོང་བར་སོང་ཞིང༌། དེའི་ཚེ་ཚེས་གཉིས་ཆད་དུ་བཅུག་སྟེ། ཉིན་ཚེས་གཉིས་ཁ་མ་བྲལ་བར་བྱས་པའོ། ཡང་ལྷག་པའི་ཚེ་ཚེས་བཅུ་གཉིས་ལྟ་བུར་གཟའ་བཞི། ཆུ་ཚོད་ང་དྲུག སྲང་བཅུ་གསུམ། ཚེས་བཅུ་གསུམ་ལ་གཟའ་དྲུག ཆུ་ཚོད་ཐིག སྲང་གཉིས་ལྟ་བུ་བྱུང་བའི་ཚེ། ཚེས་བཅུ་གཉིས་ཀྱི་མིང་ཅན་གྱི་ལྷག་པས་བདག་བྱས་པའི་ཉིན་ཞག་དེའི་སྟེང་ནས་ཆུ་ཚོད་ང་དྲུག་སོགས་རྫོགས་པ་དང༌། ཚེས་ཞག་བཅུ་གསུམ་པའི་སྟེང་ནས་ཆུ་ཚོད་བཞི་བག་མེད་ཅིག་བླངས། ཚེས་བཅུ་གཉིས་ཀྱི་མིང་ཅན་དེ་ལ་གཟའ་པ་སངས་བྱུང་སྟེ་མཆོངས་པས། དེ་གཉིས་ཀྱི་བར་ན་གཟའ་ཕུར་བུས་བདག་བྱས་པའི་ཉིན་ཞག་རིལ་པོ་གཅིག་དང་འགྲོགས་པའི་ཚེས་ཞག་ཆུ་ཚོད་དྲུག་ཅུ་པ་ཞིག་འབྱུང་ཞིང༌། པ་སངས་ཀྱིས་བདག་བྱས་པ་དེ་ལ་ཚེས་བཅུ་བཞི་པའི་སྟེང་ནས་ཆུ་སྲང་གཉིས་བླངས་པས་དོན་ལ་སྐབས་འདིའི་ཚེས་ཞག་གི་ཚད། ཆུ་ཚོད་དྲུག་ཅུ་རེ་བཞི་ལ་སྲང་བརྒྱད་ཆད་པ་གཅིག་བྱུང་བར་སོང་ཞིང་ཚེས་ཞག་དེའི་ཡུན་ལ་ཉིན་ཞག་རིལ་པོ་གཅིག་དང་ངོ་གཉིས་སྣང་བར་མཐོང་བས། དེའི་ཚེ་ཚེས་བཅུ་གསུམ་པ་དེ་ལྷག་ཏུ་བཅུག་ནས་ཉིན་ཚེས་ཁ་མ་བྲལ་བར་བྱས་པ་སྟེ། དོན་ལ་ཆད་ལྷག་མ་བཏོན་ན་མཚམས་དེ་དང་དེར་ཉིན་ཚེས་ཁ་བྲལ་བར་འགྱུར་ལ། དེ་ལྟར་གྱུར་ན་ཚེས་ཞག་གི་གྲངས་འཛིན་བྱེད་ཉིན་ཞག་མེད་པའི་ཕྱིར་རོ། གསུམ་པ་ནི། དེ་ན་ཆད་པ་མང་བ་དང༌། ཞེས་སོགས་སོ། བཞི་པ་ནི། ལྷག་པའི་སྔ་མའི་ཞེས་སོགས་ཏེ། ཆད་ལྷག་གི་སྐོར་འདི་རྣམས་ཀྱང་གཞུང་བཀླགས་པ་ཉིད་ཀྱིས་གོ་བའི་ཕྱིར་དཔེར་བརྗོད་བཞག་པ་ཙམ་ལས་གཞན་མ་བཀྲོལ་ལོ། དྲུག་པ་ནི། དེ་ལྟར་ཟླ་བཤད་རྫོགས་པའི་རྗེས། གཟའ་ཡི་སོགས་ཏེ། གཟའི་དར་གུད། གྱོད། ཞུད་རྣམས་འགོད། བདུན་པ་ནི། ཟླ་འཕོའི་རི་མོ་དང་བསྟུན་ནས། ཞེས་སོགས་ཀྱིས་དབྱངས་འཆར་བ་ལ་གྲགས་པའི་དབང་ཕྱུག་མཇལ་འཕྲད་ཀྱང་འདྲི་བར་མཛད་དོ། སྐབས་འདིར་མཆོག་དགའ་ལས། འདི་ལ་དེང་སང་གི་ལག་ལེན་པ་ཕལ་ཆེ་བ་གཟའི་གྲངས་མང་བ་དང༌། ཉུང་བ་དང༌། མཉམ་པ་ཁོ་ན་ལ་རྩི་བར་སྣང་མོད་ཀྱང༌། ལོངས་སྤྱོད་ཅེས་པ་ལ་བརྟགས་ན་ཆུ་ཚོད་ལ་སོགས་པ་ལའང་རྩི་དགོས་པར་མངོན་ཏེ། བློ་དང་ལྡན་པ་རྣམས་ཀྱིས་དཔྱད་པར་བྱའོ། ཞེས་གསུངས་པ་ལྟར་ཤེས་པར་བྱའོ། བརྒྱད་པ་ནི། དེ་དག་གི་རྗེས་སུ་ཉ་སྟོང་གི་གཟའ་ལྔའི་མྱུར་དག་དང༌། བྱེད་གྲུབ་ཀྱི་དྷྲུ་ལྦ། ཉ་སྟོང་གི་སྒྲ་གཅན་རྣམས་ས་རིས་བཞིན་དུ་བཤུ་བའང་མཁས་དབང་ལྡུམ་པོ་བའི་ཕྱག་ལེན་དུ་སྣང་ཞིང༌། དེའི་ཞལ་སློབ་རྒྱ་སྟོན་ནུབ་རི་བ་ནི་མཇུག་རིང་གི་ལོངས་སྤྱོད་དལ་མྱུར་གྱི་རྒྱུ་བ་གང་ཡིན་དེའི་རི་མོའང་འགོད་པར་མཛད་དོ། གསུམ་པ་ཕྱེད་བཀྲོལ་དངོས་ནི། ད་ནི་ཕྱེད་བཀྲོལ་ཞེས་སོགས་ཏེ། འདི་ལ་གཉིས། འཆར་གཞིའི་ཚེས་བཤད་པ་དང༌། དེ་ལ་འཆར་བའི་དབྱངས་དང་གཟའ་སྐར་ལ་སོགས་པ་བཤད་པའོ། དང་པོ་ནི། ཟླ་བ་རེ་རེ་ལ་རེའུ་མིག་སུམ་ཅུ་པ་རེ་བྱས་ལ། དང་པོ་རེའུ་མིག་རེ་ལ་གཅིག་ནས་གནམ་གང་གི་བར་གྱི་ཚེས་ཀྱི་ཨང་ཀི་རེ་རེ་བཀོད་དོ། གཉིས་པ་ལ་གཉིས་ཏེ། དབྱངས་འཆར་ཚུལ་དང༌། གཟའ་སྐར་ལ་སོགས་པ་འཆར་ཚུལ་ལོ། དང་པོ་ནི། དེ་ནས་དབྱངས་ཡིག་སོགས་ཀྱིས་གོང་མའི་ཕྱག་ལེན་ལྟར། འདིར་ལྷ་ཆེན་གྱི་བཞེད་པའི་དབྱངས་འཆར་ཚུལ་བཀོད་པ་ཡིན་ལ། རྒྱུད་འགྲེལ་ལས་གསུངས་པའི་དབྱངས་འཆར་ཚུལ་ནི། འོག་ཏུ་འབྲས་བུའི་སྐབས་སུ་འཆད་དོ། འོ་ན་འདིར་དཀར་ཕྱོགས་ལ་དབྱངས་ཐུང་ངུ་ལྔ་དང༌། ནག་ཕྱོགས་ལ་དབྱངས་རིང་པོ་ལྔ་བཀོད་པ་འདི་ཉིད། དབྱངས་འཆར་རྒྱུད་ལས། རིང་པོ་ལྔ་རྣམས་དཀར་ཕྱོགས་ལ། ལན་གསུམ་དུ་ཡང་འགྱུར་བ་ཡིན། ཞེས་སོགས་ཀྱི་རྣམ་གཞག་དང་འགལ་ལོ་སྙམ་ན། སྐྱོན་མེད་དེ། དཀར་ཕྱོགས་ནག་པྱོགས་ཀྱི་ཐ་སྙད་གོ་ལྡོག་པ་རྒྱུད་འདི་པའི་ལུགས་ཡིན་པའི་ཕྱིར་ཏེ། དེ་ཉིད་ལས། དཔྱིད་ཟླ་འབྲིང་སོགས་ཟླ་བ་ཡི། བཅུ་དྲུག་ནས་བཟུང་སྟོང་གི་བར། དཀར་ཕྱོགས་ཞེས་བྱ་རི་སྲས་མ། དེ་ཡི་ཚེས་གཅིག་ནས་བརྩམས་ཏེ། ཉ་ཡི་བར་ནི་ནག་ཕྱོགས་འདོད། ཅེས་འབྱུང་བས་སོ། གཉིས་པ་ལ་བསྟན་བཤད་གཉིས་ལས། དང་པོ་ནི། དེ་ནས་རི་མོ་དང་བསྟུན་ཏེ། ཞེས་སོགས་སོ། གཉིས་པ་ནི། དེ་ཡང་ཅུང་ཟད་བཤད་པར་བྱ། ཞེས་ཁས་བླངས་ཏེ། འདི་ལ་གཉིས། སྐར་རྩིས་པའི་ལུགས་དང༌། ནག་རྩིས་པའི་ལུགས་སོ། དང་པོ་ལ་བརྒྱད་དེ། རེས་གཟའ། ཟླ་སྐར། འཕྲོད། སྒྲ་གཅན། སྦྱོར་བ། བྱེད་པ། སྲེག་ཚེས། རྟེན་འབྲེལ་ལོ། དང་པོ་ནི། རི་མོར་གང་ཤར་སོགས་ཀྱིས་གཟའ་ད་ལྟར་བས་ཉིན་ཞག་རེ་ལ་སྤྱོད་པ་བསྟན། དེ་ཡི་ལོངས་སྤྱོད་སོགས་ཚེས་ཀྱིས་འཕོ་མཚམས་བསྟན། དཔེར་ན་ཚེས་གཅིག་སོགས་ཀྱིས་ཚེས་འཕོ་མཚམས་ཀྱི་དཔེར་བརྗོད་བཤད་པའོ། གཉིས་པ་ནི། ཟླ་སྐར་གྱི་ནི་སོགས་ཀྱིས་སྐར་མ་ད་ལྟར་བ་དེས་སྤྱད་ཟིན་པའི་ལོངས་སྤྱོད་དང༌། དེ་ཡིས་མཁའ་རོར་སོགས་ཀྱིས་ཟ་རྒྱུའི་ལོངས་སྤྱོད་བསྟན། དེ་ནས་ཕྱི་མའི་སོགས་ཀྱིས་ལོངས་སྤྱོད་ཟ་རྒྱུ་དེ་རྫོགས་པ་ན་ཕྱི་མའི་ཟླ་སྐར་ཚང་བས། དེའི་ཕྱིར་སླེབ་མཚམས་སོགས་ཀྱིས་ལི་ཐུར་འགོད་ཚུལ་དང་བཅས་བསྟན་ནོ། གསུམ་པ་ནི། རེས་གཟའ་ཉི་མ་དབྱུག་པ་དང༌། ཞེས་སོགས་ཀྱིས་གཟའ་སྐར་གྱི་འཕྲོད་རྣམས་འདྲི། བྱེ་བྲག་སྐར་མ་ཉིས་སྤྱོད་འདུག་ན་གཟའ་གཅིག་པོ་དེ་དང་སྐར་མ་གཉིས་འཛོམ་པའི་འཕྲོད་གཉིས་འབྲིའོ། བཞི་པ་ནི། སྒྲ་གཅན་སོགས་སོ། ལྔ་པ་ནི། དེ་རྗེས་སྦྱོར་བ་སོགས་ཀྱིས་ལི་ཐུར་འགོད་ཚུལ་སྦྱོར་བ་དུས་སོགས་ཞལ་ལུང་མཁན་པོའི་བཞེད་པ་ཡིན་ལ། དེང་སང་གི་རྩིས་པ་རྣམས་ནི་རི་མོར་གང་ཤར་སྦྱོར་བའི་ལྷ་རྟོགས་བྱེད་དུ་བཞེད་དེ། ལེའུ་ལྔ་པར་སྨོས་པ་ལྟར་རྟོག་དཔྱོད་ཕྲོ་ཅན་ནོ། དྲུག་པ་ནི། དེ་ན་བྱེད་པ་ངན་པ་ཡི། ཞེས་སོགས་ཀྱིས་བིཥྚི་འཆར་ཚེས་ལོངས་སྤྱོད་ལི་ཐུར་འགོད་ཚུལ་དག་མ་དག་གི་ལག་ལེན་དགག་བཞག་འདིས་བྱེད་པ་གཞན་རྣམས་ཀྱི་འཆར་ཚད་ལ་འགྲེ་བར་གདམས་པ་དང་བཅས་པའོ། གོང་མའི་ཕྱག་ཐོར་བྱེད་པ་གཞན་རྣམས་འགོད་པར་མ་མཛད་པ་ནི་འབྲས་བུ་ངན་པ་མེད་པའི་དབང་དང༌། རི་མོའི་བྱ་བར་རྟོགས་སླ་བས་ཕྲལ་སྒྲུབ་བྱེད་པའི་དབང་དུ་མཛད་པ་སྟེ། གཞན་དུ་ན་ཡན་ལག་ལྔ་པོ་ཚང་བར་འགྱུར་བ་དང༌། སྒེར་འབྲས་སོ་སོར་སྟོན་དུ་ཡོད་པའི་ཕྱིར་བཀོད་ན་ལེགས་པ་ཡིན་ནོ། བདུན་པ་ནི། ཉི་མ་བཅུ་གཉིས་སོགས་ཀྱིས་སྲེག་ཚེས་འགོད་ཚུལ་ལོ། དེ་ལྟར་ན་གོང་གི་འགྲུབ་སྦྱོར་འཆི་སྦྱོར་གཉིས་དང་བཅས་པ་གསུམ་པོ་འདི་ནི་རྒྱུད་འགྲེལ་ལས་གསུངས་པའི་འཕྲོད་ཡིན་མོད་ཀྱི། འདི་ལྟར་གོང་མའི་ཕྱག་ཐོ་རྣམས་སུ་སྲེག་ཚེས་ཟུར་དུ་མཛད་པ་ནི་གཞན་རྣམས་གཟའ་སྐར་འཕྲད་པའི་འཕྲོད་སྦྱོར་ལ་དགོངས་ནས་སྡེ་ཚན་སྒྲིགས་པའོ། བརྒྱད་པ་རྟེན་འབྲེལ་ནི། དེ་ནས་རྟེན་འབྲེལ་འཆར་ཚུལ་ནི། ཞེས་སྨོས་ཏེ། དེའང་མགོ་ཟླར་མ་རིག་པ་སོགས་ཟླ་བར་འཆར་བ་རྣམས་འདིར་བཤད་པ་ལས་རེ་རེས་སྔ་ནུར་ཞིང༌། དེ་ཉིད་སྒང་ལ་བཀོད་པ་ནས་བརྩམས་ཏེ་ཞག་གི་རྟེན་འབྲེལ་འདོད་པ་སོགས་སྔར་གྱི་ལག་ལེན་འདི་ནི་དཔལ་མགོན་འཕྲིན་ལས་པའི་ཕྱག་ལེན་ཐུན་མོང་མ་ཡིན་པ་ཡིན་མོད་ཀྱི་འོན་ཀྱང་ལེའུ་གཉིས་པའི་འགྲེལ་པར་བཤད་པ་ལྟར། ལུགས་འདི་མདོ་རྒྱུད་བསྟན་བཅོས་གང་གི་དགོངས་པ་ཡིན་དཔྱད་མཐའ་མ་རྙེད་པས་དཔྱོད་ལྡན་རྣམས་ཀྱིས་ཆོས་ལ་བསྟེན་པའི་སྒོ་ནས་དཔྱོད་ཅིག་གོ། འདིར་རང་གི་གོ་ཚོད་དང་སྦྱར་ནས་རྒྱུད་འགྲེལ་ལས་གསུངས་པའི་རྟེན་འབྲེལ་འཆར་རྩིས་ཅུང་ཟད་ཅིག་བཤད་པ་སྟེ། དེ་ལ་གསུམ། ཐོག་མར་རགས་པ་ཟླ་བ་ལ་རྟེན་འབྲེལ་རེ་རེ་འཆར་བ་དང༌། འབྲིང་པོ་ཕྱོགས་རེ་ལ་རེ་རེ་འཆར་བ་གཉིས་འཕྲོས་དོན་དུ་བཤད་རྗེས། ཕྲ་བ་ཞག་རེ་ལ་རེ་རེ་འཆར་བའི་དོན་དགྲོལ་བའོ། །དང་པོ་ནི། རྒྱལ་ཟླ་ཆུ་སྲིན་གྱི་ཁྱིམ་ལ་མ་རིག་པའི་ཟླ་བ་སོགས་ལེའུ་གཉིས་པར་བཤད་པ་ལྟར་ཡིན་མོད་ཀྱི། འོན་ཀྱང་ཆུ་སྲིན་གྱི་ཁྱིམ་ཟླ་དེ་གང་ཞེ་ན། རགས་པ་ལུག་ཁྱིམ་ནག་ཟླ་དང་འབྱོར་བ་བཞིན་དུ་ཆུ་སྲིན་རྒྱལ་ཟླ་དང་འབྱོར་ཡང༌། རྒྱལ་གྱི་ཟླ་བར་ཉི་མ་ཆུ་སྲིན་ལ་སོན་ཞེས་སོགས་ཀྱི་འགྲེལ་ཆེན་ལས། རྒྱལ་འདས་ཤིང་མཆུ་འཇུག་པའི་ཉིན་ཞག་ལ་མ་རིག་པའོ། ཞེས་པ་ལྟར་ན། མར་ངོ་སྔོན་འགྲོར་བྱས་ཏེ་ཧོར་ཟླ་བཅུ་གཉིས་པའི་བཅོ་ལྔས་རྒྱལ་རྫོགས་ནས་བཅུ་དྲུག་པ་ནས་མཆུ་འཇུག་པས། དོན་ལ་མཆུ་ཟླ་དང་ཆུ་སྲིན་གྱི་ཁྱིམ་སྦྱར་བར་སོང་ལ། དེ་ལྟར་ན་འོག་ཏུ་ཞག་ལ་འཆར་བའི་སྐབས་སུ་ཡང་རྒྱལ་དང་མཆུ་ཡི་མཚམས་སུ་ཆུ་སྲིན་དག་ལ་ཉི་མ་གནས་པའི་གཟའ་དེ་ལ་ནི་མ་རིག་པའོ། ཞེས་སོགས་ཀྱིས་ཟླ་བ་རྣམས་ཀྱི་ནག་པོའི་ཕྱོགས་ལ་འཆར་བའི་རྟེན་འབྲེལ་རྣམས་བསྟན་ལ། ཡར་ངོའི་རྟེན་འབྲེལ་རྣམས་ནི་འོག་ཏུ་རྒྱལ་གྱི་ཟླ་བའི་དཀར་པོའི་ཕྱོགས་ཀྱི་ཚེས་གཅིག་ལ་མ་རིག་པའོ། ཞེས་སོགས་ཀྱིས་བསྟན་པས། དེ་ལྟར་ན་རྒྱལ་ཟླའི་ཕྱོགས་གཉིས་ཀ་ལ་མ་རིག་པ་དང་མཆུ་ཟླའི་ཕྱོགས་གཉིས་ཀ་ལ་འདུ་བྱེད་ཀྱིས་འགོ་འཛུགས་པ་སོགས་ཀུན་ལ་འགྲེ་བས་ཡར་ངོ་སྔོན་འགྲོའི་རྒྱལ་ཟླ་རིལ་པོ་ལ་མ་རིག་པ་དང༌། མཆུ་ཟླ་རིལ་པོ་ལ་འདུ་བྱེད་སོགས་སུ་བརྗོད་པ་ཡིན་ནོ། གཉིས་པ་ནི། རྒྱལ་ཟླའི་མར་ངོར་མ་རིག་པ་དང༌། མཆུ་ཟླའི་ཡར་ངོ་འདུ་བྱེད་དང༌། མཆུ་ཟླའི་མར་ངོའི་རྣམ་ཤེས་སོགས་སྦྱར་ཏེ་ལོ་གཅིག་ལ་རྟེན་འབྲེལ་བཅུ་གཉིས་ཚར་གཉིས་རྫོགས་པའོ། གསུམ་པ་ལ། གང་ལ་འཆར་བའི་གཞི་ངོས་བཟུང་བ། དེ་ལ་ཇི་ལྟར་འཆར་ཚུལ། ཟླ་ལྷག་གི་རྟེན་འབྲེལ་བཤད་པའོ། དང་པོ་ནི། འཆར་གཞི་ཟླ་བ་ཞེས་སོགས་ཏེ། རྒྱུད་འགྲེལ་དུ་ངོ་གཉིས་ལ་བསྐྱེད་བསྡུད་ཀྱི་འཆར་ཚུལ་གསུངས་པས་འཁྲུལ་ནས། ཁ་ཅིག་རྟེན་འབྲེལ་ཚེས་ཞག་ལ་འགོད་པ་དང༌། ཁྱིམ་དང་སྦྱར་ཏེ་གསུངས་པས་འཁྲུལ་ནས་ཁ་ཅིག་རྟེན་འབྲེལ་ཁྱིམ་ཞག་ལ་འགོད་པ་སོགས་ནི་རྒྱུད་འགྲེལ་ཉིད་ལས་ཉིན་ཞག་བཅུ་དྲུག་པའི་རྟེན་འབྲེལ་གསུངས་པ་ལ་སོགས་པས་བཀག་པའི་ཕྱིར་དོར་བར་བྱ་ཞིང༌། འདིར་རང་ལུགས་ནི། ཁྱིམ་དང་སྦྱོར་བ་ཟླ་བཤོལ་གྱི་རྟེན་འབྲེལ་གཞན་དུ་མི་འཆུག་པ་དང༌། ངོ་དང་སྦྱར་བས་དེ་ཁྱིམ་སླེབས་ནས་འགོད་དགོས་སམ་སྙམ་པའི་དོགས་པ་བཅད་པའི་ཆེད་ཡིན་པས་ན་གང་ལ་འཆར་བའི་གཞི་རང་ནི་གཟའ་དང་སྦྱར་ཞིང་ཉིན་ཞག་བཅུ་དྲུག་པའི་རྟེན་འབྲེལ་གསུངས་པའི་གནད་ཀྱིས་ཉིན་ཞག་ལ་འཆར་བ་རྒྱུད་ཀྱི་དགོངས་པར་གྲུབ་བོ། དེའང་ཟླ་བ་བཅུ་གཉིས་ལ་ཉིན་ཞག་སུམ་ཅུའམ། ཞག་མི་ཐུབ་པའི་ཆ་དོར་དུས་ཉེར་དགུ་སྟེ། དེའི་ངོ་རེ་རེར་ཡང་ཞག་བཅོ་ལྔའམ། ཞག་མི་ཐུབ་པའི་དབང་གིས་བཅུ་བཞི་འབྱུང་བ་དང༌། གཞན་དུ་རེ་འགའ་ཆད་ལྷག་མ་འགྲིག་པའི་མཚམས་འགའ་ཞིག་ཏུ་ཉིན་ཞག་བཅུ་དྲུག་པའང་སྲིད་པ་ཡིན་ནོ། །གཉིས་པ་ནི། རྒྱལ་ཟླ་ཧོར་ཟླ་བཅུ་གཉིས་པའི། ཞེས་སོགས་ཏེ། རྒྱལ་ཟླ་སོགས་མཉམ་ཁྱིམ་དང་འབྱོར་བའི་ཟླ་བ་དྲུག་ལ་ཡར་ངོ་ལུགས་འབྱུང་དང་མར་ངོ་ལུགས་ལྡོག མཆུ་ཟླ་སོགས་མི་མཉམ་པ་དྲུག་ལ་ཡར་ངོ་ལུགས་ལྡོག་དང་མར་ངོ་ལུགས་འབྱུང་གིས་སོ་སོའི་ཞག་བཅུ་གཉིས་པར་སྦྱར་ནས། བཅུ་གསུམ་སོགས་གསུམ་ལ་རང་གི་གསུམ་བཞི་ལྔ་པ་དང༌། རེས་བཅུ་དྲུག་པར་ཉིན་ཞག་དྲུག་པའི་རྟེན་འབྲེལ་སྦྱོར་བ་དང༌། སྐབས་འགར་བཅོ་ལྔ་པ་འདོར་བའི་ཚུལ་རྣམས་ངེས་པར་བྱས་ཏེ། རྒྱུད་འགྲེལ་དུ་ཐོག་མར་མར་ངོའི་རྟེན་འབྲེལ་རྣམས་གསུངས་ནས། དེ་ནས་ཡར་ངོའི་རྟེན་འབྲེལ་རྣམས་སྡེབས་སུ་གསུངས་ནའང༌། འདིར་གོ་སླ་བའི་ཕྱིར་ཡར་ངོ་སྔོན་འགྲོའི་ཧོར་ཟླ་དང་སྦྱར་ཏེ་ཐོག་མར་རྒྱལ་ཟླ་དང་མཆུ་ཟླ་གཉིས་ཀྱི་ཞག་སོ་སོར་རྟེན་འབྲེལ་བཀོད་རྗེས། རྒྱལ་ཟླས་མཚོན་ཏེ་དབོ་ཟླ་སོགས་མཉམ་པ་རྣམས་དང༌། མཆུ་ཟླས་མཚོན་ཏེ་ནག་ཟླ་སོགས་མི་མཉམ་པའི་ཟླ་བ་རྣམས་ལ་སྦྱོར་ཚུལ་རིགས་འགྲེ་བར་བྱས་པའོ། གསུམ་པ་ནི། ཟླ་ལྷག་ཡོད་ཚེ་ཞེས་སོགས་བསྟན་ཏེ་གོ་སླའོ། རྟེན་འབྲེལ་འདི་དག་འདིར་དགུན་འབྲིང་ནས་འགོ་བརྩམས་ཤིང་མཁའ་འགྲོ་རྒྱ་མཚོ་དང༌། རྡོ་རྗེ་མཁའ་འགྲོའི་དཔེ་ཕལ་ཆེ་བར་དཔྱིད་ར་དང་དཔྱིད་འབྲིང་ལ་མ་རིག་པ་འཆར་བ་ནས་བརྩམས་པ་ནི་དོན་ལ་མི་འགལ་སྟེ། དཔྱིད་ར་དང་དཔྱིད་འབྲིང་སོགས་ལོ་ཙཱ་བའི་ཞེ་འདོད་ཀྱིས་སོ་སོར་བསྒྱུར་གྱི་རྒྱ་དཔེ་ལ་པོ་ཥྱ་ཞེས་ཡོད་པར་གསུངས་པས་རྒྱལ་ཟླ་ལས་མ་འདས་པའི་ཕྱིར་དང༌། མཁའ་འགྲོ་རྒྱ་མཚོར། ཐོག་མར་མ་རིག་ཆུ་སྲིན་དང༌། རོ་ཧི་ཏའོ་དེ་བཞིན་གཞན། ཞེས་སོགས་གསུངས་པས་ཀྱང་གྲུབ་པའི་ཕྱིར་རོ། དེས་ན་འདིར་འགྲེལ་ཆེན་ལས། རྟེན་འབྲེལ་འཆར་ཚུལ་རྟོགས་སླ་བའི་ཕྱིར་ཁྱིམ་ཟླ་བཅུ་གཉིས་ཀྱི་འཁོར་ལོ་བྱ་བར་གསུངས་པ་ལྟར་བྱ་ཞིང་དེས་མཚོན་ནས་ཞག་ལ་འཆར་ཚུལ་ལའང་འཁོར་ལོའི་རེའུ་མིག་བཀོད་ན་བྱིས་པ་དག་ལ་མཁོ་བར་འགྱུར་རོ། གཉིས་པ་རྒྱ་རྩིས་པའི་ལུགས་ལ་གཉིས་ཏེ། ཟླ་བ་སོ་སོའི་བརྟན་ལི་དང་ཟླ་ལྷག་གི་ལི་ཐུའོ། དང་པོ་ནི། དེ་རྗེས་ཉི་མ་བཅུ་གཉིས་དང་ཞེས་སོགས་ཏེ་ཤོག་ཁྲ་ལས་བཤུས་པ་རང་གིས་ཆོག་གོ། གཉིས་པ་ནི། ཟླ་ལྷག་ཡོད་ཚེ་ཞེས་སོགས་ཏེ་ཟླ་བ་དང་ཚེས་ཀྱི་བརྟན་ལེ་རྣམས་གང་ལྷག་པའི་སྔ་མ་དེ་ག་ལྡབ་སྟེ་བྲིའོ། གསུམ་པ་བསྡུ་བ་ནི། དེ་ལྟར་སྐར་ནག་ཟུང་སྦྱོར་གྱི་ཞེས་སོགས་ཏེ་གཞུང་འདིར་བརྐྱང་མོ་རིག་འཛིན་པའི་ཞུ་ལན་དང༌། མཁས་དབང་ལྡུམ་པོ་བའི་ཕྱག་ལེན་བསྟུན་པའི་སྟེང་རང་བློས་ཀྱང་ཅུང་ཟད་དཔྱད་ནས་བློ་དམན་རྣམས་ལ་ཕན་པའི་ཕྱིར་བཀོད་པའོ། དེ་ལས་གཞན་དུ་སྐར་ནག་སོགས་ཏེ་འདིར་སྐར་རྩིས་ཀྱི་བསྟན་བཅོས་སུ་ནག་རྩིས་སོགས་བསྲེས་ཏེ་རྣམ་གྲངས་བསགས་པ་འདི་འདྲ་མི་ལེགས་མོད་ཀྱི། འོན་ཀྱང་གཞུང་ཆེན་རྣམས་བལྟ་བར་མི་ནུས་པའི་བྱིས་པ་རྣམས་ལ་ཕན་པར་འགྱུར་བའི་ཕྱིར་སྐྱོན་མེད་དོ། རྩིས་ཀྱི་མན་ངག་ཉིན་བྱེད་སྣང་བ་ལས། མགྱོགས་རྩིས་ལ་བརྟན་ནས་ལི་ཐུ་སྦྱོར་དགྲོལ་བཤད་པའི་སྐབས་ཏེ་ཉེར་གཉིས་པའི་འགྲེལ་པའོ། །ཞེས་སྐབས་བསྡུས་སོ།།

མཐའ་མའི་འདོན་ཐེངས་།: 17.12.2013 ཉིན། 9:51 AM