༄༅།། སངས་རྒྱས་སྨན་བླ་དངོས་སུ་མཇལ་བའི་སྨོན་ལམ་མཐོང་གྲོལ་བདེ་བ་ཆེན་པོ་བཞུགས་པའི་དབུའོ།།

ནམོ་བྷཻཥཛྱཻ༔ བཅོམ་ལྡན་རྒྱལ་བ་བཻཌཱུརྱ་ཡི་མདོག། མཚན་དཔེས་རབ་བརྒྱན་ཆོས་གོས་གསུམ་གྱིས་བཀླུབས།། པད་ཟླའི་གདན་སྟེང་རྡོ་རྗེ་སྐྱིལ་ཀྲུང་བཞུགས།། རྣམ་རྒྱལ་ལྷུང་བཟེད་འཛིན་ལ་ཕྱག་འཚལ་བསྟོད།། གང་ཞིག་སེར་སྣའི་ལས་ཀྱིས་རབ་བསྐྱེད་ནས།། ཡི་དྭགས་གནས་སུ་སྐལ་མེད་གནས་གྱུར་ན།། གང་ཞིག་ཁྱེད་ཀྱི་མཚན་ཙམ་ཐོས་པ་ཡིས།། བཀྲེས་སྐོམ་གནས་ནས་ཐར་མཛད་རྒྱལ་ལ་བསྟོད།། ལོག་ལྟའི་དབང་གིས་དམྱལ་བར་ལྷུང་གྱུར་ཀྱང་།། ཁྱེད་ཀྱི་མཚན་ཙམ་ཐོས་པའི་བསོད་ནམས་ཀྱིས།། མིར་སྐྱེས་ཡང་དག་ལྟ་བ་འཛིན་གྱུར་ནས།། ཡང་དག་ལམ་སྟོན་སྨན་གྱི་བླ་ལ་བསྟོད།། ཕྲག་དོག་ཞེ་སྡང་དབང་གིས་དུད་འགྲོའི་ལུས།། ཤིན་ཏུ་མནར་མེད་སྐྱེས་ནས་སྡུག་བསྔལ་བས།། ཁྱེད་ཀྱི་མཚན་ཐོས་དབང་གིས་མཁས་པར་སྐྱེས།། མ་རིག་མུན་སེལ་སྨན་གྱི་བླ་ལ་བསྟོད།། གཞན་གྱིས་ཕྲག་དོག་དབང་གིས་སྡིག་བསགས་པ།། བྱད་གཏད་སྦྱོར་སོགས་བསམ་ངན་བྲེལ་བ་ཡིས།། ཁྱེད་ཀྱི་མཚན་ཐོས་ཙམ་གྱིས་གནོད་མི་ནུས།། བདུད་འཇོམས་རྒྱལ་པོ་ཁྱོད་ལ་ཕྱག་འཚལ་བསྟོད།། ཚུལ་ཁྲིམས་ལྡན་པ་ཁྱེད་ཀྱི་མཚན་ཐོས་ནས།། བདེ་བ་ཅན་སོགས་གང་དུ་སྨོན་པ་ཡི།། དག་པའི་ཞིང་དུ་བརྫུས་ཏེ་སྐྱེ་བར་ཤོག། ཐར་པའི་ལམ་སྟོན་ཁྱོད་ལ་ཕྱག་འཚལ་ལོ།། མགོན་མེད་དབུལ་ཕོངས་ནད་ཀྱིས་འཐབ་པ་ལ།། ཁྱེད་ཀྱི་མཚན་ཐོས་ནད་རྣམས་རབ་ཏུ་ཞི།། མགོན་མེད་མགོན་གྱུར་བཅོམ་ལྡན་བཻཌཱུརྱ།། སྨན་གྱི་རྒྱལ་པོ་ཁྱོད་ལ་ཕྱག་འཚལ་བསྟོད།། བཅོམ་ལྡན་ཁྱོད་ལ་བསྟོད་པའི་བསོད་ནམས་ཀྱིས།། བདག་ཅག་དཔོན་སློབ་འཁོར་དང་བཅས་པ་ཡི།། འདུ་བ་རྣམ་བཞིའི་ནད་རྣམས་ཞི་བ་དང་།། རྒྱལ་པོ་ལ་སོགས་འཇིགས་པ་ཀུན་ལས་ཐར།། དགོས་འདོད་ཐམས་ཅད་འབད་མེད་ལྷུན་གྲུབ་ནས།། ནམ་ཞིག་འཕོས་ཚེ་བྱང་ཆུབ་སེམས་དཔའ་བརྒྱད།། རྫུ་འཕྲུལ་སྟོབས་ཀྱིས་མཁའ་ལ་གཤེགས་ནས་ཀྱང་།།  ནུབ་ཕྱོགས་བདེ་བ་ཅན་དུ་ལམ་བསྟན་ཅིང་།། པདྨ་མཆོག་ལ་བརྫུས་ཏེ་སྐྱེས་གྱུར་པའི།། ཐར་པའི་ལམ་སྟོན་ཁྱོད་ལ་ཕྱག་འཚལ་བསྟོད།། མགོན་མེད་དབུལ་ཕོངས་ནད་ཀྱིས་ཐེབས་པ་ལ། ཁྱེད་ཀྱི་མཚན་ཐོས་ནད་རྣམས་རབ་ཞི་ཞིང་།། མགོན་མེད་མགོན་གྱུར་ཁྱེད་ཀྱིས་བསྐྱབ་ཏུ་གསོལ།། ཚེ་དཔག་མེད་མགོན་མཆོད་པས་མཉེས་བྱེད་ཤོག། ཉིན་རེ་དུས་གསུམ་ཁྱེད་ལ་གསོལ་བཏབ་པས།། སྡིག་ཅན་བཤན་པ་ཡིན་ཀྱང་མཐོ་རིས་བགྲོད།། བདེ་བ་ཅན་དུ་བརྫུས་ཏེ་སྐྱེ་བར་ཤོག། སྨོན་ལམ་གདབ་བོ།། ཅེས་པ་འདི་ཡང་རཱ་ག་ཨ་སྱས་སྦྱར་བའོ།། འདི་ཡང་དགོངས་གཏེར་ཐུགས་ཀྱི་ཀློང་གསལ་ལས། ཟུར་རྒྱན་གནམ་ཆོས་ཉིད་ནས་ཟུར་དུ་བསྒྲིགས་པའི་སྨན་བླའི་སྨོན་ལམ་སྡུག་བསྔལ་ཀུན་སེལ་རྫོགས་སོ།། །།

མཐའ་མའི་འདོན་ཐེངས་།: 04.07.2024 ཉིན། 2:25 PM