༄༅།།ཤམ་བྷ་ལའི་ཞིང་མཆོག་ཏུ་སྐྱེ་བའི་སྨོན་ལམ་བཞུགས་སོ།།

༄༅།། ན་མོ་གུ་རུ། དཔལ་ལྡན་དང་པོའི་སངས་རྒྱས་རིང་ལུགས་ཆེ།། ཤམ་བྷ་ལ་ཡི་གྲོང་དུ་རྒྱས་མཛད་པ།། རྗེ་བཙུན་བླ་མ་ཁྱེད་ལ་གསོལ་འདེབས་ཀྱི།། བདག་གི་བདེན་པའི་ཚིག་འདི་འགྲུབ་པར་མཛོད།། བྱང་སེམས་དུས་འཁོར་སོགས་ཀྱིས་རྟག་བརྟན་ཅིང་།། དམ་པའི་ཆོས་རྣམས་མཆོག་ཏུ་རྒྱས་པའི་ས།། བྱང་ཕྱོགས་ཀ་ལྭ་པ་ཞེས་བྱ་བའི་གྲོང་།། བརྒྱ་བྱིན་ཁང་བཟང་ལས་ཀྱང་ཆེས་ལྷག་པའི།། ཕོ་བྲང་མཆོག་ནི་དཔག་ཚད་བཅུ་གཉིས་ཚད།། གྲུ་བཞི་ལྷམ་ཞིང་རིན་ཆེན་དུ་མས་བརྒྱན།། བྱེ་བ་ཕྲག་ནི་དགུ་བརྒྱའི་གྲོང་གིས་བསྐོར།། སྐྱེད་མོས་ཚལ་མཆོག་ལྷ་ཡུལ་ལས་ལྷག་པར།། དང་པོའི་སངས་རྒྱས་དཀྱིལ་འཁོར་ཆེ་ཆུང་གཉིས།། མཐོང་བའི་མོད་ལ་དངོས་གྲུབ་མཆོག་སྩོལ་གྱི།། རྒྱུ་ནི་རིན་ཆེན་རིན་ཐང་བྲལ་ལས་གྲུབ།། དེ་ཡི་གཡས་གཡོན་ཡིད་འོང་མཚོ་ཆེན་ནི།། ནོར་བུས་གང་ཞིང་དཔག་ཚད་བཅུ་གཉིས་པ།། མི་རྣམས་ནོར་ཕྱུག་ཆོས་ཀྱི་དུས་འདའི་ཕྱུག། བླ་མ་མཆོག་ཁྱེད་དེང་དུས་ནས་བཟུང་བའི།། ལོ་ནི་བདུན་བརྒྱ་ཙམ་ཞིག་རྫོགས་པ་ན།། རིགས་ལྡན་དྲག་པོར་གྱུར་ནས་ཀླ་ཀློའི་དཔུང་།། བཅོམ་ནས་རྫོགས་ལྡན་བཞིན་དུ་མཛད་པའི་དུས།། སྔོན་གྱི་ཞལ་བཞེས་དམ་བཅའ་མ་གཡེལ་བར།། བདག་ཀྱང་འཁོར་གྱི་ཐོག་མར་རྗེས་འཛིན་མཛོད།། རྗེ་བཙུན་བླ་མ་དམ་པ་མཆོག་ཁྱེད་ཉིད།། རླུང་གི་ཤུགས་ཅན་རྡོ་ཡི་རྟར་ཆིབས་ནས།། ཕྱག་གི་མདུང་ཐུང་བྱིས་པའི་བློར་བསྣུན་ནས།། ངེས་པར་འཇོམས་ཚེ་བདག་ཀྱང་རྗེས་སུ་བཟུང་།། དམག་དཔུང་བྱེ་བ་ཁ་དོག་སྣ་ཚོགས་པ།། གླང་ཆེན་རིག་བྱེད་ཆང་དྲེགས་བཞི་འབུམ་དང་།། གླང་ཆེན་མྱོས་པ་འབུམ་ཕྲག་བཞི་འབུམ་དང་།། གསེར་གྱི་ཤིང་རྟ་མཚོན་ལྡན་དཔུང་བུ་ཆུང་།། འཇིགས་རུང་དམག་ཚོགས་དབུས་སུ་རབ་ཞུགས་ནས།། རང་གིས་བྱིས་པའི་བློ་ལ་བསྣུན་མཛད་ཅིང་།། རྟར་གནས་ཟླ་བ་ཆེན་པོའི་བུ་ལ་ནི།། ཧ་ནུ་མནྡ་རྣོན་པོའི་མཚོན་གྱིས་བསྣུན།། དྲག་པོ་ལ་སོགས་ལྷ་ཆེན་བཅུ་གཉིས་ཀྱིས།། ལྷ་མིན་ལ་སོགས་ཐམས་ཅད་ཚར་གཅོད་ཅིང་།། གླང་པོ་ཆེ་ཡིས་གླང་པོ་རྣམ་པར་འཇོམས།། རྡོ་ཡི་རྟ་ཡིས་རྟ་རྣམས་གསོད་བྱེད་ཅིང་།། གསེར་གྱི་ཤིང་རྟས་ཤིང་རྟ་ཕྱེ་མར་བྱེད།། ས་སྐྱོང་རྣམས་ཀྱིས་ས་སྐྱོང་འདུལ་བར་མཛད།། ཀླ་ཀློའི་རྒྱུན་ནི་རབ་ཏུ་བཅད་བྱས་ནས།། དང་པོའི་སངས་རྒྱས་ཀྱིས་མཚོན་ཆོས་ཚུལ་ཀུན།། རྒྱས་པར་མཛད་ཚེ་བདག་ཀྱང་རྗེས་སུ་བཟུང་།། དེ་ལྟར་ལོ་ནི་མང་པོ་ཆོས་བསྟན་ནས།། རྟ་ཡི་ལོ་ནི་ཧོར་ཟླ་གཉིས་པ་ཡི།། ཉི་ཤུ་གཉིས་ཉིན་དཔའ་བོ་དཔའ་མོ་ཡིས།། རོལ་མོའི་སྒྲ་བཅས་འཁོར་ནི་འབུམ་ཕྲག་བཅས།། བདེ་དུས་ལམ་ལས་འོག་མིན་གནས་སུ་ནི།། ལོངས་སྤྱོད་རྫོགས་སྐུ་མངོན་དུ་མཛད་པའི་ཚེ།། བདག་ཀྱང་སངས་རྒྱས་གོ་འཕང་ཐོབ་པར་མཛོད།།

          སྨོན་ལམ་འདི་བཀའ་དྲིན་གསུམ་ལྡན་གྱི་པཎ་ཆེན་ཐམས་ཅད་མཁྱེན་གཟིགས་ཆེན་པོ་རྗེ་བཙུན་བློ་བཟང་དཔལ་ལྡན་ཡེ་ཤེས་དཔལ་བཟང་པོས་མཛད་པའི་བཀའ་རྒྱ་མ་ཡིན་ནོ།། །།

མཐའ་མའི་འདོན་ཐེངས་།: 24.09.2021 ཉིན། 4:26 PM