ལྷོ་ཨ་རིར་སྨན་རྩིས་སྐོར་སྐྱོད་ལེགས་གྲུབ།

ཕྱི་ལོ་ ༢༠༢༢ ཟླ་ ༦ ཚེས་ ༡༠ ནས་ཟླ་ ༧ ཚེས་ ༣༡ སྟེ་ཉིན་ཞག་ལྔ་བཅུ་ལྷག་གི་རིང་སྨན་རྩིས་ཁང་ནས་ལྷོ་ཨ་མེ་རི་ཀའི་ཨར་ཇིན་ཊི་ན་(Argentina)དང་། བ་ར་ཛིལ་(Brazil) རྒྱལ་ཁབ་གཉིས་སུ་སྨན་རྩིས་སྐོར་སྐྱོད་ལས་གཞི་ཞིག་གོ་སྒྲིག་ཞུས་གནང་ཡོད། སྐོར་སྐྱོད་ཚོགས་ཁག་འདིའི་ནང་སྐར་རྩིས་པ་བསྟན་འཛིན་ལྷ་མོ་ལགས་དང་། སྨན་པ་ལྷུན་གྲུབ་རྡོ་རྗེ་ལགས་གཉིས་གཙོས་ལས་རོགས་གཉིས་བཅས་ཁྱོན་ལས་བྱེད་བཞི་ཕེབས་ཡོད།

ཐོག་མར་ཨར་ཇིན་ཊི་ནའི་རྒྱལ་ཁབ་ཏུ་ཟླ་ ༦ ཚེས་ ༡༢ ནས་ ༣༠ བར་སྐོར་སྐྱོད་སྐབས་ས་གནས་ཀྱི་བཀའ་བརྒྱུད་ཐེག་ཆེན་ཆོས་གླིང་ཆོས་ཚོགས་ཀྱི་བླ་མ་རིན་ཆེན་མཆོག་ནས་མཐུན་འགྱུར་གནང་ཡོད། དེ་ནས་ཟླ་ ༧ ཚེས་ ༡ ནས་ ༢༨ བར་དུ་བ་ར་ཛིལ་གྱི་གྲོང་ཁྱེར་ Sao Paulo  དང་ Cabreuva, Rio de Janeiro  བཅས་སུ་བ་ར་ཛིལ་བོད་ཁང་གི་སྐུ་ཚབ་དོན་གཅོད་འཛིགས་མེད་ཚེ་རིང་མཆོག་གི་གཙོས་ས་སྐྱ་ཆོས་སྒར་གྱི་བླ་མ་རིན་ཆེན་མཆོག་དང་། ཞི་བ་ལྷ་བོད་ཀྱི་ནང་ཆོས་ཤེས་ཡོན་བསྟི་གནས་ཁང་གི་བཙུན་པ་རྣམ་གྲོལ་མཆོག་གིས་མཐུན་འགྱུར་རམ་འདེགས་གནང་ཡོད།

ལྷག་པར་རང་རེ་སྨན་པ་དང་སྐར་རྩིས་པ་གཉིས་ Sao Paulo  གྲོང་ཁྱེར་གྱི་ Sírio-Libanês ཞེས་པའི་སྨན་ཁང་དུ་ཕྱི་ལུགས་སྨན་གྱི་སྡེ་ཚན་སྣ་ཚོགས་ཀྱི་སྨན་པ་ལྔ་བཅུ་ཙམ་ལྷན་འཛོམས་སར་བོད་ཀྱི་གསོ་བ་རིག་པ་དང་སྐར་དཔྱད་རྩིས་རིག་པ་ངོ་སྤྲོད་སོགས་ཀྱི་གཏམ་བཤད་ཆེད་དུ་འགྲོན་འབོད་གནང་ཡོད། དེ་ལྟར་ས་གནས་ཁག་ཏུ་གཏམ་བཤད་རིམ་པ་གནང་སྐབས་བོད་ཀྱི་གསོ་རིག་གཏམ་བཤད་ཉན་མཁན་དོན་གཉེར་བ་ ༣༦༥ དང་བོད་ཀྱི་སྐར་རྩིས་རིག་པར་དོ་སྣང་ཡོད་མཁན་མི་སྣ་ ༢༩༠ ལྷག་ཕེབས་ཡོད།

ད་ཐེངས་ཀྱི་སྐོར་སྐྱོད་འདི་ལ་ཁྱོན་ནད་པ་ ༡༦༧ ལ་བོད་ལུགས་གསོ་རིག་བརྟག་དཔྱད་སྨན་བཅོས་དང་ཟས་སྤྱོད་ལམ་སྟོན་ཞུས་ཡོད་པ་མ་ཟད། དོན་གཉེར་ཅན་མི་སྣ་ ༡༤༡ ལ་ངག་ཐོག་རྩིས་འབྲས་འདོན་གནང་ཡོད། དེ་བཞིན་འགྲོ་ཕན་སྨན་རྩིས་ཁང་ནས་བཟོ་སྐྲུན་ཞུས་པའི་གསོ་རིག་ཐོན་དངོས་སྣ་མང་ཚོང་སྒྱུར་ཡང་བྱས་ཡོད།

འགྲོ་ཕན་སྨན་རྩིས་ཁང་ནས་ལྷོ་ཨ་རིའི་སྨན་རྩིས་སྐོར་སྐྱོད་འདི་ལ་མཐུན་འགྱུར་གནང་མཁན་ཚང་མར་སྙིང་དབུས་ནས་ཐུགས་རྗེ་ཆེ་ཞུ་བ་དང་སྦྲགས། འབྱུང་འགྱུར་ཡང་འགྲོ་ཕན་སྨན་རྩིས་ཁང་གི་སྐོར་སྐྱོད་ལས་གཞི་འདི་ལྟ་བུར་མུ་མཐུད་རམ་འདེགས་གནང་རྒྱུའི་རེ་བ་བྱེད་བཞིན་ཡོད་པར་གསུངས་སོ།།

མཐའ་མའི་འདོན་ཐེངས་།: 31.03.2023 ཉིན། 11:38 AM