སྨན་རྩིས་ཁང་དབུ་བརྙེས་པའི་དུས་དྲན་སྲུང་བརྩི།

ཕྱི་ལོ་ ༢༠༡༩ ཟླ་ ༣ ཚེས་ ༢༩ ཉིན་བཞུགས་སྒར་སྨན་རྩིས་ཁང་གི་མཐོ་སློབ་ཚོགས་ཁང་དུ་རྒྱལ་མཆོག་ྋསྐུ་ཕྲེང་བཅུ་གསུམ་པ་ཆེན་པོས་ ༡༩༡༦ ལོར་བོད་ཀྱི་རྒྱལ་སར་ལྷ་ལྡན་སྨན་རྩིས་ཁང་ཕྱག་བཏབ་ནས་ལོ་ངོ་ ༡༠༣ དང་། དེ་བཞིན་ྋགོང་ས་སྐྱབས་མགོན་ྋསྐུ་ཕྲེང་བཅུ་བཞི་པ་ཆེན་པོ་མཆོག་གིས་དྷ་སར་བོད་ཀྱི་སྨན་རྩིས་ཁང་བསྐྱར་འཛུགས་མཛད་དེ་ལོ་ངོ་ ༥༨ འཁོར་བའི་དུས་དྲན་མཛད་སྒོ་སྲུང་བརྩི་ཞུས་གནང་ཡོད།

མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་། དམིགས་བསལ་སྐུ་མགྲོན་ཧིམྰཅལ་མངའ་སྡེ་ཀང་ར་རྫོང་གི་སྨན་པ་གཙོ་བོ་ Dr. Gurdarshan Gupta  མཆོག་གི་གཙོས་སྐུ་མགྲོན་རྣམ་པ་དང་།  སྨན་རྩིས་ཁང་གི་འགོ་ལས་དང་དགེ་སློབ་བཅས་ལྷན་འཛོམས་སྟེང་། ཐོག་མར་སྨན་རྩིས་སློབ་མ་རྣམས་ནས་ཆོལ་གསུམ་གཞས་སྣ་འཁྲབ་སྟོན་གཟིགས་འབུལ་ཞུས། དེའི་རྗེས་སུ་སྨན་རྩིས་ཁང་གིས་དཔར་བསྐྲུན་ཞུས་པའི་དཔེ་དེབ། སྐྱེམ་པ་ཚེ་དབང་གི་རྒྱུད་བཞིའི་འགྲེལ་པ། འགྲེལ་པ་མེས་པོའི་ཞལ་ལུང་སྟོད་ཆ། ཙ་ར་ཀ་བསྡུ་བ་དེབ་ཕྲེང་དང་པོ་སོགས་དེབ་རིགས་ཁག་གཅིག་དབུ་འབྱེད་གནང་བ་དང་། སྐུ་མགྲོན་གཙོ་བོའི་ཕྱག་ནས་སྨན་རྩིས་ཁང་དུ་ཞབས་ལོ་ ༢༠ སོན་པའི་ལས་བྱེད་གྲངས་ ༡༣ དང་། ཞབས་ལོ་ ༣༠ སོན་པའི་ལས་བྱེད་ ༡༠ རྣམས་ལ་ཆེ་བསྟོད་གཟེངས་རྟགས་གསོལ་བསྩལ་གནང་། དེ་ནས་དམིགས་བསལ་སྐུ་མགྲོན་མཆོག་ནས་སྐབས་ ༡༨ པའི་སྨན་སློབ་གྲངས་ ༢༩ དང་། རྩིས་སློབ་སྐབས་ ༩ སློབ་མ་ ༦ ལ་སློབ་ཐོན་ཕྱག་འཁྱེར་དང་། དེ་བཞིན་སྐབས་ ༡༣ པའི་སྨན་པ་གྲངས་ ༡༥ ལ་སྨན་རམས་པ་ཆུང་བའི་ཕྱག་འཁྱེར་བསྩལ་གནང་ཡོད།

འགན་འཛིན་མཆོག་གིས་གསུང་བཤད་ནང་དུ་སྨན་རྩིས་ཁང་གི་ངོ་སྤྲོད་དང་ད་ལྟའི་ལས་གཞི་འགྲོ་བཞིན་པ། འབྱུང་འགྱུར་གྱི་འཆར་གཞི། འདས་ལོའི་ནང་ལས་རིམ་ཚགས་ཚུད་བསྒྲུབས་པ་ཁག་སོགས་ཀྱི་སྐོར་རྒྱས་པར་གསུངས་པ་དང་། དེ་མཚུངས་འཕྲོད་བསྟེན་བཀའ་བློན་མཆོག་ནས་ཀྱང་སྨན་རྩིས་རིག་པ་ཡར་རྒྱས་གཏོང་ཕྱོགས་སོགས་ཀྱི་སྐོར་གསུང་བཤད་གནང་སོང་། མཛད་སྒོ་དེ་བཞིན་སྨན་རྩིས་ཁང་ནས་དྲ་རྒྱའི་བརྒྱུད་ཐད་ཀར་རྒྱང་སྲིང་ཞུས་གནང་བ་རེད།

མཐའ་མའི་འདོན་ཐེངས་།: 03.04.2019 ཉིན། 3:39 PM