ལེའུ་སོ་དྲུག་པ།  མཆིན་པའི་ནད་གསོ་བ།

གློ་བ་བཅོས་པའི་ལེའུ་གསུངས་ཚར་ནས་བྱ་བ་གཞན་གྱིས་བར་མ་ཆོད་པའི་མཇུག་ཐོག་དེ་མ་ཐག་དེ་ནས་ཡང་དྲང་སྲོང་ཆེན་པོ་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་ཞེས་བོས་ནས་དྲང་སྲོང་ཆེན་པོ་ཉོན་ཅིག་ཅེས་གདམས་ཏེ། བཙུན་མོ་ལྟ་བུ་མཆིན་པའི་ནད་གསོ་བའི་ཐབས་ལ་ཇི་ལྟར་བྱ་དགོས་སྙམ་ན། རྒྱུ་དང༌། དབྱེ་བ་དང༌། རྟགས་དང༌། བཅོས་པའི་ཐབས་བཞིའི་སྒོ་ནས་བསྟན་ཏེ།

རྒྱུ་ནི་རོ་ཚ་བ་དང་སྐྱུར་བའི་ཁ་ཟས་དང་སྤྱོད་ལམ་དྲག་ཤུལ་བྱས་པའི་རིགས་ཀྱིས་ནད་སྐྱེད་པར་བྱེད་ལ།

ནད་དེ་ཡང་དབྱེ་བ་ཕྱེ་ན་ལེ་བརྒན་རྒྱས་དང་ལྡེམ་བུ་དང༌། དུག་ཐབས་དང༌། ཆུ་ཤོར་དང༌། རྐུན་བུ་དང༌། འོར་ལྷུང་དང༌། ཁ་ལུད་དང༌། གཞུང་རེངས་དང༌། མཆིན་གྲུམ་ནག་པོ་དང༌། མཆིན་ནད་ཧལ་སྐེམ་དང༌། མཆིན་དྲི་དཀར་པོ་དང༌། ནག་པོ་དང༌། གནད་མཆིན་རྩ་ལ་བྱེར་བ་དང༌། མཆིན་རླུང་དང༌། མཆིན་རྒུད་དང༌། རླན་གྲང་དང༌། གླང་སྒུར་དང༌། གྲང་སྦོས་དང་བཅོ་བརྒྱད་ཡོད་དོ། །

དེ་སོ་སོ་ངོས་འཛིན་པར་བྱེད་པའི་རྟགས་ནི་མཆིན་ནད་ལེ་བརྒན་རྒྱས་པ་དེའི་ནད་རྟགས་སུ་མཆིན་སྟེང་གི་རྩིབ་ཐུང་གཡས་གཡོན་གཉིས་སྦོ་ཞིང་ན་ལ་ལུས་སྤྱི་དང་མཚོག་མ་ལྕི་ཞིང་རོ་སྟོད་ལ་གཟེར་འབྱུང་བ་དང༌། ན་ངོས་དེ་སྟེང་དུ་བཏོན་པའི་ཚེ་ན་རྡིབ་པ་སྙམ་དུ་སེམས་ཤིང་འོག་ཏུ་བཅུག་ན་བུག་པ་འབུགས་པ་སྙམ་པའི་ན་ཚ་བྱེད་ཅིང་ཙོག་པུར་འདུག་ན་ཐུར་ལ་འཐེན་པ་འདྲ་བ་དང༌། ཤ་མདོག་སེར་ལ་མཁལ་རྐེད་མི་བདེ་ཞིང་སྒྱིད་པ་འཁུམས་སོ། །མཆིན་ནད་ལྡེམ་བུ་ནི་འཕྲལ་དུ་ན་བ་མི་ཚོར་བར་ན་རྒྱུ་གང་ཡང་མི་འདུག་སྙམ་ཀྱང་གཉིད་མེད་ཅིང་ཁོང་སྙོམ་པ་སྟེ་སྒྱིད་ལུག་པ་དང་ལུས་ལྕི་ལ་ཟས་མི་འདོད་ཅིང་ཁྲག་འབྲོས་ཤ་དང་རུས་པ་ཁད་ཀྱིས་ཞེས་ཆ་ཆ་ནས་རིམ་གྱིས་སྐམ་འགྲོ། དུག་ཐབས་ནི་མིག་དམར་ཞིང་གདོང་པ་སྔོ་ལ་རྩིབ་སྟེང་དུ་ཟུག་དང་ཕོ་མཆིན་གང་བ་སྙམ་དུ་སེམས་ཤིང་ཁ་ཟས་འཇུ་བར་དཀའ་ལ་ཟོས་པའི་ཚེ་ན་ན་ཞིང་བྲུན་སྐམ་ལ་བོལ་གོང་གཡོ་བ་སྟེ་སྐྲངས་ཤིང་མུར་གོང་དང་མཐིལ་བཞི་སེར་པོར་འོང༌། ཡུན་ལོན་ཚེ་གཞུག་ཏུ་མཆིན་པ་རུལ་ནས་དུད་ཁུ་ལྟ་བུར་ལུ་བ་འབྱུང༌། ཆུ་ཤོར་ནི་ཁོང་པ་སྦོ་ཞིང་རོ་སྟོད་གཞན་གྱིས་བརྫིས་ན་ཕན་སྙམ་བྱེད་ཅིང་སྒལ་ཚིགས་རེངས་ཏེ་མཆིན་པ་དཔྱང་ལ་འཕྱོངས་འདུག་སྙམ་པ་སེམས་ཤིང་གཡལ་མི་ཐོན་པ་དང༌། ཕོ་མཆིན་གཉིས་སྟོང་པར་སོང་ངམ་སྙམ་སེམས་ཤིང་ཉི་མ་སོགས་ཀྱིས་དྲོས་དྲགས་པའི་ཚེ་ན་མགོ་བོ་ན། རྐུན་བུ་ནི་རྐང་པར་དྲོད་མེད་ཅིང་གྲང་ལ་རོ་སྟོད་གཟེར་ཞིང་མིག་གིས་ཡས་ལྕིབས་མི་ཐེག་ཅིང་ཉམ་ཆུང་ལ་སྙ་བ་དང༌། སྟོད་བརྒྱངས་པ་ལྟར་གང་ཞིང་དཔུང་མགོ་གཟེར་ལ་སྐེ་རྩ་རེངས་ཏེ་དགྱེ་དགུ་དཀའ་བ་དང་ཁ་ཟས་ཟོས་པའི་ཚེ་ན་བག་རེ་ཕན་སྙམ་བྱེད། འོར་ལྷུང་ལ་རྐེད་པར་ལྷུང་བ་དང་རྐང་པར་ལྷུང་བ་གཉིས་ཡོད་པ་ལས། མཆིན་ཁྲག་རྐེད་པར་ལྷུངས་ན་རྐེད་པ་འཁོར་ཞིང་འགུལ་བསྐྱོད་བྱེད་པའི་དུས་ན་ཟུག་ཆེ་ལ་གཟེར་བ་དང༌། རྐང་པར་ལྷུངས་པས་ན་དཔྱི་མགོ་སྦྲིད་ཅིང་སྐམ་ཁོལ་བྱེད་པ་དང་རྐེད་པ་ཚ་ལ་ཆུ་རྒྱུས་ཐམས་ཅད་ན་བར་འོང༌། ཁ་ལུད་ལ་གློ་བ་དང་ཕོ་པར་ལུད་པ་གཉིས་ཡོད་པ་ལས། གློ་བར་ལུད་ན་སྟོད་རྫིངས་ཞེས་ཁེངས་ལ་མིག་དམར་ཞིང་མཆན་ཁུང་འོག་གཟེར་བ་དང༌། ལུད་པ་ཁྲག་ཏུ་ལུ་ཞིང་སྐབས་སུ་རྣག་ཁྲག་དུ་འདྲེས་པའང་འཛགཕོ་བར་ལུད་ན་ཕོ་བ་བསྡམས་སྙམ་སེམས་ཤིང་གཟེར་ནས་ན་བ་དང༌། དགྱེ་དགུ་བྱེད་མི་ཤེས་པར་ཚ་ཙེག་བྱེད་པ་དང་སྒྲེག་པ་འོང་ཞིང༌། ལྡང་དུབ་ཆེ་ལ་བལྟས་པའི་ཚེ་ན་གསུས་པ་སྟེ་ཕོ་བ་བལྟར་མི་མངོན། གཞུང་རེངས་ནི་རྐང་པ་དང་ལག་པ་གཉིས་རེངས་པར་འགྲོ་ལ་ཡན་ལག་གི་ལྷུ་ཚིགས་ན་ཞིང་དགྱེ་དགུ་བྱེད་མི་ཤེས་པ་ལྟ་བུའི་སྟོད་གཟེར་ཞིང་ལྟག་པ་དགྱེ། མཆིན་གྲུམ་ནག་པོ་ནི་ལུས་ཀུན་བརྡུངས་པ་སྙམ་དུ་བྱེད་ཅིང་རྐང་པ་བཤལ་བ་དང་འགུལ་བསྐྱོད་བྱས་ན་ཚིགས་པ་དོན་ཏེ་མི་བཟོད་པའི་ནད་ཟུག་འབྱུང་ཞིང་རྒུར་པོར་འགྲོ། ཧལ་སྐེམ་ནི་ལུས་པོ་ཟ་འཕྲུག་བྱེད་ཅིང་འདར་བ་དང་གཞོགས་གཡས་པ་ལྕི་ལ་མིག་གི་མདངས་ཆུང་ཞིང་མིག་མི་ཆགས་པར་འཛུར་བ་སྟེ་ཤེད་ཉམས་ལ་སྐོམ་དད་ཆེ། མཆིན་དྲི་དཀར་པོ་ནི་ལྷེན་སྣའི་གཡས་གཡོན་གཉིས་ན་ཞིང་གཉིད་ཆེ་ལ་ཁ་སྐོམ་པ་དང་རྩིབ་ལོགས་གཉིས་གཟེར་ནས་ན། མཆིན་དྲི་ནག་པོ་སྲོག་རྩ་དང་སྙིང་མི་བདེ་ཞིང་ཁོང་པ་སྟོང་སྦོས་བྱེད་ལ་ལྷེན་སྣར་འདྲིལ་ནས་ན། གནད་མཆིན་རྩར་བྱེར་བ་ནི་སྟོད་གཟེར་ཞིང་ཐལ་གོང་སྟེ་དཔུང་འཛུམ་ནས་རྩེ་ནག་བར་དེ་ན་ལ་རོ་སྟོད་གང་བ་སྙམ་དུ་སེམས་ཤིང་ཕོ་བ་དང༌། མཆིན་པ་མི་བདེ་ལ་རྩེ་ཆུང་རེངས་པ་དང༌། གློ་བྱུང་ན་མཆིན་པ་འཕྱོངས་ཉམས་བྱེད་ལ་ན་ཚ་བཟོད་ཐབས་མེད་པ་འབྱུང་ཞིང་བྱད་ཀྱི་མདོག་སྨུག་ལ་སྣ་ཁྲག་འཛག་ཅིང་ཁ་ཟས་ཅི་ཟོས་ཀྱང་གནོད། མཆིན་རླུང་ནི་གཡལ་བྱུང་བའི་རྗེས་ལ་མཆི་མ་འཛག་པ་དང༌། ཕོ་མཆིན་གཉིས་འདྲེས་སམ་སྙམ་པ་བྱེད་ཅིང་ན་ལ་འཕྱོངས་ཤིང་ཁྱད་པར་དགོངས་དང་ཐོ་རངས་ཀྱི་དུས་ན་ཞིང་གྲང་པ་སྟེ་འཁྱགས་ན་སྐྱིག་པ་འབྱུང༌། མཆིན་རྒུད་ནི་ཟས་ཟོས་པའི་རྗེས་ལ་མཆིན་པ་ན་ཞིང་ཉམས་པ་ཆུང་བ་དང་ཆུ་དྲོན་སྐྱུགས་ལ་གཡལ་མི་ཕྱིན་པ་སྟེ་འོང་གྲབས་ལ་མི་འོང་ཞིང༌། མཆིན་པའི་ནད་རླན་གྲང་ནི་པུས་མོ་གྲང་ཞིང་ཟ་ལ་རོ་སྟོད་གང་སྙམ་བྱེད་ཅིང་གློ་བྱུང་བའི་ཚེ་ལུད་པ་སྐམ་པོ་ལུ་ཞིང་དགྱེ་དགུ་དཀའ། གླང་སྒུར་ནི་ལུས་པོ་ཀུན་སྐྲངས་ལ་ཁྱད་པར་བྱད་སྦོས་ཤིང་ལྕེ་མཆུ་གཉིས་ཀྱི་མདོག་སྐྱ་ལ་མགོ་བོ་འཁོར་ཞིང་སྐྲ་དང་སྨིན་མ་ཟ་བ་དང་སྣ་ལ་ཤུ་བ་འབྱུང༌། གྲང་སྦོས་ནི་ཁོང་པ་གྲང་སྟོང་སྟོང་ཡོད་སྙམ་པ་ལ་བྱད་ཤ་སྦོས་པ་འབྱུང་བ་ཡིན་ནོ། །

དེ་དག་རྣམས་ཀྱི་བཅོས་པའི་ཐབས་རིམ་བཞིན་བསྟན་པའི་ཐོག་མར་མཆིན་ནད་ལེ་བརྒན་རྒྱས་པ་ལ་གི་ཝཾ་སྐྱུ་རུ་རའི་ཐང་ནི་གསེར་མཆན་དུ་འབྲས་བུ་ཨ་བར་སྐྱུར་གསུམ་དང་གི་ཝཾ་གི་ཐང་ངམ། སྐྱུ་རུ་དང་བ་ལེ་བ་ཤ་ཀ་རྣམས་ཀྱི་ཐང་བཏང་ཞེས་པ་ལྟར་གང་རུང་དང༌། ར་ས་ཡ་ནཱི་ཞེས་སྤྱིར་རོ་མཆོག་རོའི་ཐེག་པ་ཞེས་ཏེ་ཆོས་སྨན་དུ་བཞེད་ཀྱང་འདི་སྐབས་དོང་ག་དུར་བྱིད། ཧོང་ལེན། ཁྲོན་བུ། ལྕུམ་རྩ། ཐར་ནུ། རེ་ལྕག སྐྱེར་པ། ཨ་རུ་བཅས་པའི་བཤལ་བཏང་རྗེས་སུ་རུ་ཐུང་གཏར་ཞིང༌། མཁྲིས་ཆེ་ན། དོམ་མཁྲིས། བྲག་ཞུན། ཨ་རུ། མར་གསར་བཅས་པའི་སྦྱོར་བ་རྒུན་འབྲུམ་གྱི་ཐང་གིས་དབུལ། ཚ་བ་ཞེན་ཆེ་ན་ག་བུར་བདུན་པ་ཕྱི་རྒྱུད་ལྟར་སྦྱར་ལ་ཉལ་བའི་སྔས་སྨད་ཅེས་པ་མཐོན་པོ་མིན་ཅིང་ཁ་ཟས་བསིལ་དུ་ཞེས་ཞོ་དཀྲུགས་གངས་ཆུ་ཡོས་དྲལ་སོགས་བསྟེན། མཆིན་ནད་ལྡེམ་བུར་ཨ་རུ་བ་སྐྱུར། སླེ་ཏྲེས། ཏིག་ཏ། བོང་ང་དཀར་པོ། ཧོང་ལེན། ལྕུམ་རྩ། དོང་གདུར་བྱིད་སྦྱར་བའི་ཐང་ཁྲུས་བྱ་ཞིང༌། གཡུ་རྙིང་པ་དང༌། ག་བུར། ལི་ཤི། ཙནྡན་དཀར་པོ། དོམ་མཁྲིས། གླ་རྩི། རྒུན་འབྲུམ། གསེར་མེ་བཅས་ཀྱི་ཅུར་ནིས་ཞེས་ཕྱེ་མ་དང༌། བྲག་ཞུན། གུར་ཀུམ། བ་ལེ། ཨ་རུ། པྲི་ཡངྐུ་བཅས་པའི་བྲག་ཞུན་ལྔ་པ་སྦྱར། དུག་ཐབས་ལ་སྨྱུང་བར་བྱས་རྗེས་གསེར་ཕུད་བསྡུས་ཁུར་བུལ་ཏོག་བཏབ་པའི་སྐྱུགས་ཀྱིས་དྲངས་ཤིང༌། གཡུ་རྙིང༌། གུར་ཀུམ། ལི་ཤི། ཨུཏྤལ། ནཱ་ག་པདྨ་པུཥྤ་སྟེ་གེ་སར་གསུམ་དང་བདུན་པ་སྦྱར་བ་སྙི་བའི་མེ་ཏོག་སུམ་ཅུ་ཏིགསེང་ལྡེང༌། ཤིང་ཚ་བཅས་པའི་ཐང་གིས་དབུལ་ལ་གཏོང༌། རྗེས་གཅོད་གི་ཝཾ། ཙནྡན་དཀར་དམར། རེ་རལ། སྔོན་བུ། མཚལ། བཅད་འབྱོར་གཉིས་ཞེས་པ་སྟག་ཤ་དང་རྒུ་དྲུས་བཅས་བརྒྱད་པ་སྦྱར་བ་བ་འོས་དེད་པ་སྟེ་དབུལ་ལ་བཏང༌། མཆིན་པ་ཆུ་ཤོར་ལ་ར་ཨ་བར་སྐྱུར་གསུམ། བ་ལེ་ཀ་བཅས་པའི་ཐང་བཏང་རྗེས་ལ་རུ་ཐུང༌། རྩེ་ཆུང༌། མཆིན་མཁྲིས་འདོམ་རྩ་བཅས་གཏར་ཞིང༌། གློ་དང་བསྡོངས་ན་གློ་ནད་ཐེས་པོའི་སྐབས་བཤད་པའི་ཅུ་གང་གི་ལྡེ་གུ་སྦྱར་རྗེས་ལ། ཚིགས་པ་ལྔ་པ་དང་དགུ་པ་བསྲེགམཆིན་ནད་རྐུན་བུ་ལ་ཨ་སོ་གཡས་གཡོན་གཉིས་ལ་གཏར་རྗེས་བ་ལེ་ཀ སླེ་ཏྲེས། ཨ་རུ་ར། རྒུན་འབྲུམ། བོང་ང་དཀར་པོ། ཧོང་ལེན། ཏིག་ཏ། གླ་སྒང༌། དུག་ཉུང༌། ཀྱི་ལྕེ། དུར་བྱིད། ཁྲོན་བུ་རྣམས་སྦྱར་བའི་བཤལ་བཏང་ལ་རྒྱབ་རྩ་ཕྲན་བུ་གཏར། མཆིན་པའི་ཁྲག་རྐེད་པ་དང་རྐང་པར་འོར་དུ་ལྷུང་བ་གཉིས་ཀ་ལ་འབྲས་བུ་ཨ་བར་སྐྱུར་གསུམ། དུར་བྱིད། ཧོང་ལེན། ཁྲོན་བུ་བཅས་ཀྱི་བཤལ་བཏང་རྗེས་བྱིན་གཞུག་དང་ལོང་རྩ་སྐབས་དང་སྦྱར་ནས་གཏར་ལ་དམར་པོ་བཙོད། འབྲི་མོགརྒྱ་སྐྱེགས་གསུམ་གྱི་ཕྱེ་མ་སྦྱར་བ། དར་ཡ་ཀན། མི་དོམ་གྱི་མཁྲིས་པ། བྲག་ཞུན་བཅས་ཀྱི་ཐང་གིས་དབུལ་ལ་བཏང༌། མཆིན་ཁྲག་གློ་བ་ལ་ལུད་ན། བ་ལེ་ཀཨ་རུ། སྐྱུ་རུ། ལྕུམ་རྩ། དུར་བྱིད། དོང་ག་རྣམས་ཀྱི་ཐང་ཁྲུས་བྱ་ཞིང་གློ་རྩ་དྲུག་འགོ་དང་རུ་ཐུང་གཏར་ཞིང༌། བསིལ་སྨན་ཙནྡན་བརྒྱད་པ་ཕྱི་རྒྱུད་ལྟར་སྦྱོར་བ་བྱས་ལ་བཏང༌། ཕོ་བར་ལུད་ན་རུ་ཐུང་དང་མཆིན་མཁྲིས་འདོམ་རྩ་གཏར་རྗེས། ར་གསུམ་ཨ་བར་སྐྱུར་གསུམ་དང༌། དུར་བྱིད། ཧོང་ལེན་བཅས་ཀྱི་བཤལ་དང༌། བ་ལེ་ཀགླ་སྒང༌། རྒུན་འབྲུམ། ཧོང་ལེན། ཨ་བི་ཥ་རྣམས་ཀྱི་ཐང་བཏང༌། མཆིན་པ་གཞུང་རེངས་ལ་དུར་ནས་ཐོན་པའི་ལྕགས་བཙའ་ཞུགས་པ་དང༌། ཨ་རུ་ར་བསྡུས་པ་དང་ཐང་དུ་བཏང་ཞིང་རུ་ཐུང་དྲུག་འགོ་ལག་པའི་གུང་མོའི་ལྗོངས་ན་མཆིན་པ་ཕོ་གདུང་གི་རྩ་ཡོད་པ་གཏར་བར་བྱ་ཞིང༌། བྱ་གང་རུང་གི་བྲུན་དང་སྦང་སྐམ་གྱི་དུགས་ཀྱིས་སྒལ་པའི་གཞུང་དང་བཤུལ་ཤ་ལ་བདུག་ཅིང༌། བ་ལེ་ཀའི་ཐང་བཏང་རྗེས། བྲག་ཞུན། གླ་རྩི། གུར་ཀུམ། སུག་སྨེལ། དོམ་མཁྲིས། བོང་དཀར། པྲི་ཡངྐུ། ཨ་རུ་ར། ག་དུར་ཏེ་བྲག་ཞུན་དགུ་པའི་ཅུར་ནིས་ཞེས་ཕྱེ་མ་བཏང༌། མཆིན་གྲུམ་ནག་པོ་ལ་འབྲས་བུ་ཨ་བར་སྐྱུར་གསུམ་གྱི་ཐང་བཏང་ཞིང་རྔུལ་དབྱུང་ལ་རྩེ་ཆུང་ལ་གཏར་ག་བྱ་ཞིང༌། དེ་རྗེས་སྔོན་བུ། ཨ་རུ་མཆུ་སྙུང༌། ཟངས་རྩི། རྒུན་འབྲུམ་རྣམས་ཀྱིས་སྦྱང༌། ཡང་ན་མར་གསར་ལ་སོ་མ་རཱ་ཛ། བསིལ་ཅུ་གུར་ལི་གསུམ། ཨ་རུ། འདམ་བུ། ཤིང་མངར། ལྕགས་ཕྱེ་རྣམས་སྦྲང་དང་སྦྱར་བའི་ལྡེ་གུ་བཏང༌། རྗེས་ལ་ཤའི་སྲུབས་དང་ཚིགས་དམིགས་གར་བབས་རྣམས་སུ་མེས་བསྲེག མཆིན་ནད་ཧལ་སྐེམ་ལ་ཨ་བི་ཥ། པར་པ་ཏ། ཀྱི་ལྕེ་དཀར་པོ་བཅས་པའི་ཐང་དང༌། སྔོན་བུའི་བཤལ་གོང་བཞིན་བཏང་རྗེས་རུ་ཐུང་དང་རྒྱབ་རྩ་ཕྲན་བུ་གཏར་ཞིང༌། རང་བྱུང་ཆུ་ཚན་ནམ་བཟོས་པའི་རླངས་ལུམས་བྱས་པའི་རྗེས་སུ་བའི་རྣམ་ལྔའི་སྨན་མར་ཕྱི་རྒྱུད་ལྟར་སྦྱར་ལ་ཚིགས་པ་དགུ་པ་བསྲེག མཆིན་དྲི་དཀར་པོའི་ནད་ལ་མཆིན་མཁྲིས་འདོམ་རྩ་གཏར་ཞིང༌། བ་ལེ་ཀ་དང༌། ཀྱི་ལྕེ་གཉིས་དང༌། པར་པ་ཏའི་གྲང་ཐང་བཏང༌། གུར་ཀུམ། ལི་ཤི། སུག་སྨེལ། ཀ་ཀོ་ལ། ད་བྱིད། པར་པ་ཏ། སྤང་སྤོས། ཤུ་མོ་ཟ། སྦྲང་དང་བཅས་གུར་ཀུམ་བརྒྱད་པའི་ལྡེ་གུ་སྦྱར་བར་བྱ། མཆིན་དྲི་ནག་པོར་བྲག་ཞུན་གྱི་ཐང་ཕྱི་རྒྱུད་ལྟར་བཏང་བའི་རྗེས་ལ་རུ་ཐུང་གཏར་ཞིང༌། ཚ་བ་ཆོགས་པའི་རྗེས་སུ་ཚིགས་པ་བརྒྱད་པ་བསྲེག གནད་མཆིན་རྩར་བྱེར་བ་ལ་རུ་ཐུང་རྩེ་ཆུང་གཏར་བ་དང་མཆིན་མཁྲིས་འདོམ་རྩ། ཨ་སོ་བྱིན་གཞུག་ལོང་རྩ་རྣམས་གཏར་ཞིང༌། བ་ལེའི་ཐང་བཏང་འབྲས་བུ་ཨ་བར་སྐྱུར་གསུམ་གྱིས་གོང་བཤད་ལྟར་སྦྱང་ཞིང༌། དེ་ལྟར་དུ་བཤད་པའི་མཆིན་པའི་ནད་ཚ་བ་ལས་གྱུར་པ་དེ་རྣམས་ལ་ཁ་ཟས་ཀྱི་རིགས་བསིལ་བ་བསྟེན་དགོས་ཤིང་རུལ་སྐྱུར་དྲོད་བག་སོགས་སྤང་དགོས་པ་དང་ཚ་བ་ཆོམས་ནས་གསར་བཅུད་དྲོད་ལ་དབབ་ཅིང༌། རྗེས་ལ་ཚིགས་པ་བརྒྱད་པ་དགུ་པ་གར་བབས་བསྲེག མཆིན་རླུང་ལ་ལུག་ཐོང་ཚེར་གྱི་མཆིན་པ་ལ་སྒ་པི་ཕོ། རྒྱམ་ཚྭ། ཤིང་ཀུན་བཅས་པའི་སྤོད་བྲན་ལ་བཏང་ཞིང༌། བུར་དཀར་མར་གསར་ཏིང་ཁྲོལ་ཞེས་པ་ཆུ་ཐག་ཆོད་ཅིང་འདྲེས་པར་བསྐོལ་བའི་མིང་ཡིན་པ་ལྟར་བསྐོལ་བར་གོང་བཤད་ཀྱི་སྤོད་དང་ལྡན་པ་མུར། ར་ཨ་བར་སྐྱུར་གསུམ་གྱི་སྨན་མར་དང་སྦྱར་ཞིང་ཚིགས་པ་དགུ་པ་ཁ་གསུམ་བསྲེག མཆིན་རྒུད་ཀྱང་མཆིན་རླུང་གི་བཅོས་དེ་དང་འདྲ་བ་ལ། སེ་འབྲུ། ཤིང་ཀུན། བཅའ་སྒ། ཁ་རུ་ཚྭ། སྟར་བུ་བཅས་པ་ལྔ་པ་དང༌། བད་ཀན་གྲང་བ་སེལ་བའི་ད་ལིས་བརྒྱད་པ་ཕྱི་རྒྱུད་ལྟར་སྦྱར་ལ་བཏང་ཞིང༌། ཨ་རུ་འབྲི་རྐང་ཕྱི་རྒྱུད་ལྟར་གྱི་སྟེང་གཟེ་མ་བསྣན་པའི་སྨན་མར་སྦྱར་བ་ཟ། མཆིན་ནད་རླན་གྲང་ལ་ཡང་བཅོས་གོང་མ་དེ་བཞིན་བྱས་རྗེས་མཆིན་གསང་ཚིགས་པ་དགུ་པ་བསྲེག མཆིན་པ་གླང་སྒུར་ལ་འབྲས་བུ་རྒྱུད་ཕྱི་མའི་ཐོར་བུའི་ནད་ཀྱི་སྒོས་བཤལ་གྱི་སྐབས། ཨ་རུ་མཆུ་རིང་བ་རུ་སྐྱུ་རུ་ར། །ཞེས་པ་ནས། རྙོགས་ཚད་རྙིངས་ཚད་ལུས་ལ་ཞེན་པ་སྦྱོང༌། །ཞེས་པ་དེའི་རྒྱུན་བཤལ་བཏང་ཞིང་ཕྱི་རྒྱུད་ཀྱི་གུར་ཀུམ་བསྣན་པའི་སེ་འབྲུ་ལྔ་པའི་སྟེང་ཕྱི་རྒྱུད་ཐལ་སྨན་རྣོན་པོ་བསྣན་པས་སྐེམ་སྨན་སྦྱར་བ་བསྟེན་ལ་ཁ་ཟས་ཁྲེའུ་ཞེས་པ་བསིལ་དྲོད་སྤེལ་མར་བཏང་བའི་རྗེས་ལ་ཚིགས་པ་དགུ་པ་མེས་བསྲེགས་ལ་རྗེས་བཅད། མཆིན་པ་གྲང་སྦོས་ལ་གོང་བཞིན་ཕྱི་རྒྱུད་ལྟར་གྱིས་ད་ལིས་བརྒྱད་པ་དང་སེ་འབྲུ་ལྔ་པ་སྦྱར་ལ་ཚིགས་པ་ལྔ་པ་དང་དྲུག་པ་ལྷེན་སྣ་ཁ་གསུམ་རྣམས་བསྲེག་དགོས་ཤིང༌། དེ་ལྟར་དུ་བཤད་པའི་མཆིན་ནད་གྲང་བ་ལས་གྱུར་པ་རྣམས་དྲོད་ཀྱིས་བཅོས་དགོས་པའི་སྨན་སྦྱོར་དེ་ཕྱི་རྒྱུད་ལྟར་དགོས་ཤིང་གསར་འཇམ་ལུག་ཤ་དང་མར་ལ་སོགས་དྲོད་བཅུད་དང་ལྡན་པའི་ཟ་མ་ལ་བསྒོར་དགོས་ཞེས་གསུངས་སོ།།

          བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཅེས་བྱ་བ་ལས་དོན་ལྔའི་ནང་ཚན་བཙུན་མོ་ལྟ་བུ་མཆིན་པའི་ནད་གསོ་བའི་ལེའུ་སྟེ་སོ་དྲུག་པའོ།། །།

མཐའ་མའི་འདོན་ཐེངས་།: 29.11.2023 ཉིན། 2:19 PM