ལེའུ་སོ་གསུམ་པ། ལྦ་བ་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག མགུལ་ནད་ལྦ་བ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་རུ་བསྟན།།

རྒྱུ་རྐྱེན་ཟས་དང་སྤྱོད་ལམ་གདོན་ལ་སོགས། །འདུ་བ་འཁྲུགས་པས་ལྦ་བ་སྐྱེད་པར་བྱེད།།
དབྱེ་བ་རླུང་མཁྲིས་ཁྲག་དང་བད་ཀན་ཚིལ། །འདུས་པའི་ལྦ་བ་གཡང་ལྦ་བྱུར་ལྦ་བརྒྱད།།

དེ་རྟགས་རླུང་གྱུར་མགོ་མང་ཁོང་སྟོང་ཞིང༌། །མཁྲིས་པའི་ལྦ་བ་ཕུར་ཚེ་ཆུང་ལ་སྙི། །ཁྲག་ལྦ་དྲོད་བཅུད་དྲག་ཤུལ་རྐྱེན་གྱིས་སྐྱེ། །བད་ཀན་སྲ་མཁྲེགས་དལ་དུས་སྐྱེ་བར་བྱེད། །ཚིལ་ལྦ་སྐྱེ་འགག་སྐྱེ་འབྲི་ཆེ་བ་སྟེ། །འདུས་པའི་ལྦ་བ་དབུགས་བསུབ་ངར་ངར་འབྱུང༌། །གཡང་ལྦ་བདེ་ལ་དབྱིབས་ལེགས་བཀྲ་ཤིས་ལྡན། །བྱུར་ལྦ་མི་བདེ་མི་སྡུག་བཀྲ་མི་ཤིས།།

བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་ཚ་བ་སྨན་ཆང་ཕྱེ་མ་དང༌། །དཔྱད་དང་སྔགས་དང་ལོག་གནོན་དྲུག་གིས་བཅོས། །དང་པོ་གཡག་རྒོད་ཨོལ་མདུད་ལ་སོགས་པའི། །ཨོལ་པ་སྣ་ཚོགས་མ་རུལ་མ་བམ་པ། །ཚྭ་སྣ་སུག་སྨེལ་ཟི་ར་སླེ་ཏྲེས་རྣམས། །ཞིབ་བརྡུངས་བཙོས་ཏེ་ལྟོ་རུ་བསྟེན་པས་འཇོམས། །སྨན་ཆང་ཨོལ་མདུད་རྣམ་པ་སྣ་ཚོགས་དང༌། །སྨན་སྒ་ཉ་ཤ་བཟང་དྲུག་ཤིང་ཚ་དང༌། །ལྦ་ཚྭ་རུ་རྟ་ཨུཏྤལ་ཆུ་ལ་བསྡུས། །ཆང་སྦྱར་མནན་ཏེ་ལངས་ནས་སྐོམ་དུ་བསྟེན། །ཕྱེ་མ་ཨོལ་མདུད་སྣ་ཚོགས་བཟང་པོ་དྲུག  །ཝ་ཚྭ་ཤིང་ཚ་རྒྱམ་ཚྭ་ཚ་བ་གསུམ། །ཨ་རུ་ཀར་བུར་རྟས་བསྒྱུར་ཆུ་སྐོལ་དབུལ། །ཡང་ན་ཨོལ་མདུད་རྙིང་པ་རྒྱ་ཚྭ་དང༌། །ལྦ་ཚྭ་ཏིག་ཏ་སྤང་རྒྱན་བ་ཤ་ཀ །ཀ་ར་སྦྱར་བ་ལྟོ་སྟོང་བསྟེན་པར་བྱ། །གོ་བོའི་སྟོད་ཁོག་གཡག་རྒོད་རྟ་དང་རྐྱང༌། །སྤྱང་ཀི་སོ་བྱ་ལ་སོགས་གྲེ་སྣ་ཚོགས། །ཚ་བ་གསུམ་དང་བྲག་ཞུན་ལྦ་ཚྭ་དང༌། །བུར་དཀར་སྦྱར་བ་ལྟོ་སྟོང་ཆུ་སྐོལ་དབུལ། །ཟླ་ཕྱེད་བསྟེན་པས་ལྦ་བ་རྩད་ནས་འབྱིན། །དཔྱད་དུ་དཔུང་སྐེ་རྣ་རྒྱབ་ལྦ་རྩ་གཏར། །རྣ་ཤལ་འོག་དང་ལྦ་མགོ་ཨན་སྟོང་བསྲེག །སྔགས་བཅོས་སྨྲ་བཅད་བཟླས་ཏེ་ཕྱི་ནས་གདབ། །ཨོཾ་ནག་ཏ་རག་ཏ་པུས་པཏ་སྭཱཧཱ། །ཆུ་ལ་བཟླས་ཏེ་ཁོང་དུ་བཏང་བར་བྱ།  ཨོཾ་མི་ཏི་མི་ཏི་ཤག་ཀྲུག་སྭཱ་ཧཱ། །ཨོཾ་ཁ་ཁུ་ག་མ་ལ་རཀྟ་ནན། །ཨོཾ་དམར་མོ་ཛིན་དུ་ཛིན་དུ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། །ཐོག་མར་དགུ་པ་ལྔ་བརྒྱད་དེ་རྗེས་སྦྲེལ། །བཟླས་ཤིང་བཏབ་པས་ལྦ་བ་ཐམས་ཅད་འཇོམས། །ལོག་གནོན་ལྦ་བ་ཤིན་ཏུ་བཅོས་དཀའ་སྲ། །ཚ་ཐུར་རྒྱབ་ལ་རུལ་བཅད་འབྲས་ལྟར་གསོ། །བྱེ་བྲག་རླུང་ལྦ་མེ་བཙའ་སྣུམ་དུགས་བྱ། །མཁྲིས་པའི་ལྦ་བ་ཕུག་པས་འཚོ་བར་འགྱུར། །ཁྲག་གི་ལྦ་བ་གཏར་དང་བསིལ་ཕྱེ་བསྟེན། །བད་ཚིལ་ལྦ་བ་སྐྱུགས་དང་རྩུབ་འཆོས་བྱ། །འདུས་པའི་ལྦ་བ་ཀུན་གྱིས་གསོ་བ་སྟེ། །གཡང་ལྦ་མི་བཅོས་གཡང་ལོན་བྱ་བར་ཤིས། །བྱུར་ལྦ་གདོན་བཅོས་རིམ་གྲོ་རྒྱ་ཆེར་གྱིས། །ཚོགས་བསག་དེ་འོག་གང་ལ་འཚམ་པས་བཅོས།།

ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལྦ་བ་བཅོས་པའི་ལེའུ་སྟེ་སོ་གསུམ་པའོ།། །།

མཐའ་མའི་འདོན་ཐེངས་།: 20.12.2022 ཉིན། 4:14 PM