ལེའུ་རེ་ལྔ་པ། མེ་དབལ་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག མེ་དབལ་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

སྤྱི་དོན་དང་པོ་རྒྱུ་རྐྱེན་ཟས་སྤྱོད་གདོན་གྱིས་ཁྲག་མཁྲིས་འཕེལ། །ཆུ་སེར་ཚ་བ་རླུང་གིས་བུས་པའོ།།

སྤྱི་དོན་གཉིས་པ་དབྱེ་བ་རླུང་མཁྲིས་བད་ཀན་མཚོན་ལས་བྱུང༌། །གནས་ནི་པགས་པ་དོན་སྙིང་རྣམས་ལ་གནས།།

སྤྱི་དོན་གསུམ་པ་དེ་རྟགས་དང་པོ་རླུང་གྱུར་རླུང་རིམས་འདྲ་འདར་བརྩེ་སྐྲངས་གཟེར་སྐྱུག །གཉིས་པ་མཁྲིས་གྱུར་མཁྲིས་རིམ་འདྲ་ཚ་དམར་མྱུར་མཆེད་ཁ་ཁ་སྐམ། །གསུམ་པ་བད་གྱུར་བད་རིམས་འདྲ་གཡའ་འཇམ་མགོ་རྐང་ཚིགས་གཞི་ན། །བཞི་བ་མཚོན་བྱུང་རིམས་འདྲ་མགོ་ལུས་རྐང་ལག་འབྲུམ་དམར་ཚ་བས་ཁྱབ། །ལྔ་བ་ཕྱིར་བྱུང་མེས་ཚིག་རྨ་དང་འདྲ་ཞིང་མཆེད། །དྲུག་པ་ནང་གནས་གློ་སྙིང་ཚ་གདུང་མྱོས་པར་འགྱུར། །སྟོབས་ཉམས་དོན་སོ་སོའི་གནས་དེར་ཚ་གཟེར་སྐོམ་དད་ཆེ།།

སྤྱི་དོན་བཞི་བ་བཅོས་ཐབས་སྤྱི་དང་བྱེ་བྲག་གཉིས་ལས་དང་པོ་ཐོག་མར་གང་ཉེའི་རྩ་གཏར་ཕྱི་རྒྱུད་ལྟར་སྦྱང་ནང་སྐྱོན་བསལ། །དེ་འོག་བྱུག་པས་མེ་དབལ་ཞི་བར་བྱེད། །ཤིང་མངར་དུག་ཉུང་སོ་ཆ་བྱུག་པ་སྟོད་དུ་བྱུང་ན་རློན་སྐྱུགས་འདྲེན་པར་བྱ། །ར་ཨ་བར་སྐྱུར་གསུམ་ཀྱི་ལྕེ་དུར་བྱིད་ཀྱིས་སྨད་དུ་བྱུང་ན་སྦྱོང༌བྱ། །སྲན་ཆུང་ནིམ་པ་ཧོང་ལེན་ཀྱི་ལྕེ་དཀར། །ཤིང་མངར་སྐྱེར་པའི་ཁུ་བ་ཁོང་དུ་བླུད། །སྣུམ་བཅུད་མི་བཏང་ཁྲག་འཕེལ་བས་གང་ཉེ་རྩ་ལ་ཡང་ཡང་གཏར། །ནང་སྐྱོན་དག་ནས་མུ་ཟི་ནག་པོ་དང༌། །ར་དུག་ཐར་ནུ་ལྡོང་རོས་ལྡེ་གུ་བྱུག །སྣག་ཚ་རུ་རྟ་གླ་རྩིའི་ཆུ་ངན་ནི་འདོད་པས་འཁྲིག་པ་སྤྱད་དུས་ཀྱི་ཁམས་ཡིན་པའི་ཆུ་ཉག་རིང་པོི་བ་ལང་གི་ཁ་ཆུ་འདྲ་བ་དེ་ཡིན་མ་རྙེད་ན་དྲི་ཆུའོ་བྱུག །གཉིས་པའི་དང་པོ་རླུང་གྱུར་ཤུ་ཏི་འུ་སུ་ནག་པོ་གླ་སྒང་པི་པི་ལིང༌། །ཤི་ཀྲུ་ཕོ་བ་རིལ་དཀར་པོ་འུ་སུ་སྒྲོན་ཤིང་རུ་རྟ་དང༌། །འོ་མ་མར་དང་སྦྱར་ལ་བྱུག་པར་བྱ། །གཉིས་པ་མཁྲིས་གྱུར་པད་རྩ་ཆུ་ལས་སྐྱེས་པའི་པདྨ་དངོས་ཀྱི་རྩ་བ་ཡིན་མ་རྙེད་ན་པུཎ་རཱི་ཀའི་རྩ་བ་ཨུཏྤལ་བ་ལེ་ཀ །རྒུན་འབྲུམ་ཙན་དན་ཤུག་པ་ཤེལ་ཏ་མདུང་ཤིང་གི་ཐང་ཆུ་དང༌། །ཤིང་མངར་གསེར་ཡུག་རྡོ་བཙག་འོ་མར་ཀ་ར་བྱུག །གསུམ་པ་བད་ཀན་འབྲས་བུ་ཨ་བར་སྐྱུར་གསུམ་དང་པུ་ཤེལ་རྩེ། །འདམ་བུ་ཀ་ར་རྩ་བུ་རམ་ཤུག་པ་བཙོད་ཁུ་བྱུག །བཞི་བ་མཚོན་བྱུང་བསིལ་བས་བྱུག་ཅིང་གཏར་ག་བྱ།། ཞེས་གསུངས་སོ།།
          བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མེ་དབལ་བཅོས་པའི་ལེའུ་སྟེ་དྲུག་ཅུ་རྩ་ལྔ་པའོ།།  །།

མཐའ་མའི་འདོན་ཐེངས་།: 23.02.2021 ཉིན། 3:25 PM