ལེའུ་རེ་ལྔ་པ་མེ་དབལ་གྱི་ནད་གསོ་བ་ལ་གསུམ། ཉན་པར་གདམས་པ་དང༌། གཞུང་དོན་བཤད་པ་དང༌། ལེའུའི་མཚན་བསྟན་པའོ། །དང་པོ་ནི། དེ་ནས་ཞེས་རྐང་པ་གཉིས་ཀྱིས་བསྟན་ནོ། །གཉིས་པ་ལ་གཉིས། མདོར་རྒྱས་སོ། །དང་པོ་ནི། མེ་དབལ་ཞེས་རྐང་པ་གཉིས་ཀྱིས་བསྟན་ཏེ། དེ་ཡང་མེ་དབལ་ནད་ཀྱི་རྒྱུ་རྐྱེན་སྤྱིར་བསྟན་པ་དང༌། དེ་བཞིན་དུ་དབྱེ་བ་དང༌། རྟགས་དང༌། བཅོས་ཐབས་ཏེ་བཞིར་བསྟན་པའོ། །གཉིས་པ་རྒྱས་པར་བཤད་པ་ལའང་བཞི་ལས། དང་པོ་ནི། རྒྱུ་རྐྱེན་ཞེས་རྐང་པ་གཉིས་ཀྱིས་བསྟན་ནོ། །གཉིས་པ་དབྱེ་བ་བཤད་པ་ལ་གཉིས། ནད་གཞིའི་དབྱེ་བ་དང་གནས་པའི་དབྱེ་བ་བསྟན་པ་གཉིས། དང་པོ་ནི། དབྱེ་བ་ཞེས་རྐང་པ་གཅིག་གིས་བསྟན་པ་ལ་བཞི། རླུང་དང༌། མཁྲིས་པ་དང༌། བད་ཀན་དང༌། མཚོན་བྱུང་བ་སྟེ་བཞིའོ། །གཉིས་པ་ནི། གནས་ནི་ཞེས་རྐང་པ་གཅིག་གིས་བསྟན་ཏེ། པགས་པ་དང་དོན་གཉིས་ཏེ་དྲིལ་བས་དྲུག་གོ

གསུམ་པ་རྟགས་བཤད་པ་ལ་གཉིས། ནད་གཞི་སོ་སོའི་རྟགས་བཤད་པ་དང༌། གནས་སུ་ཞུགས་པའི་རྟགས་བཤད་པའོ། །དང་པོ་ནི། དེ་རྟགས་ཞེས་རྐང་པ་བཞིས་བསྟན་ཏེ། དེ་ཡང་རླུང་ལས་གྱུར་པའི་རྟགས་དང༌། མཁྲིས་པ་ལས་གྱུར་པའི་རྟགས་དང༌། བད་ཀན་ལས་གྱུར་པའི་རྟགས་དང༌། མཚོན་ལས་གྱུར་པའི་རྟགས་བཞིའོ། །གཉིས་པ་ནི། ཕྱིར་འབྱུང་ཞེས་རྐང་པ་གསུམ་གྱིས་བསྟན་པ་ལ་གཉིས་ལས་ཕྱིར་གནས་པའི་རྟགས་དང༌། ནང་དོན་སྣོད་ལ་གནས་པའི་རྟགས་རྣམས་སོ། །བཞི་པ་བཅོས་ཐབས་བཤད་པ་ལ་གཉིས་སྤྱིའི་བཅོས་དང༌། བྱེ་བྲག་གི་བཅོས་ཐབས་གཉིས། དང་པོ་ནི། བཅོས་ཐབས་ཞེས་རྐང་པ་བཅུས་བསྟན་ཏེ། གཏར་བ་ནི་གང་ཉེའི་རྩ་ལ་གཏར་ལ་གཏར་ག་བྱ་སྦྱང་བ་ནི་ཕྱི་རྒྱུད་ལྟར་རོ། །སྟོད་བྱུང་རློན་ཞེས་པ་ནི་སྐྱུགས་འདྲེན་པའི་དོན་ནོ། །ཆུ་ངན་བྱུག་ཅེས་པའི་ཆུ་ངན་ནི་འཁྲིག་པ་སྤྱད་དུས་ཀྱི་ཁམས་མིན་པའི་ཆུ་ཉག་རིང་པོ་བ་གླང་གི་ཁ་ཆུ་འདྲ་བ་དེ་ཡིན་ལ་མ་རྙེད་ན་དྲི་ཆུའོ། །གཉིས་པ་བྱེ་བྲག་གི་བཅོས་བཤད་པ་ལ་བཞི་ལས། དང་པོ་ནི། རླུང་གྱུར་ཞེས་རྐང་པ་གསུམ་གྱིས་བསྟན་ནོ། གཉིས་པ་ནི། མཁྲིས་གྱུར་ཞེས་རྐང་པ་གསུམ་གྱིས་བསྟན་ཏེ། བད་རྩ་ཞེས་པ་ཆུ་ལ་སྐྱེས་པའི་པདྨ་དངོས་ཀྱི་རྩ་བ་ཡིན་ལ་མ་རྙེད་ན་པུནྜ་རི་ཀའི་རྩ་བ་ཞེས་པས་ཀྱང་ཚབ་རུང༌། ཤེལ་ཏ་ཞེས་པ། མདུང་ཤིང་ནགས་ལ་སྐྱེ་ཞེས་པ་དེའི་ཐང་ཆུའོ། །གསེར་བཙག་ནི་བཙག་ཡུག་གོ་ །གསུམ་པ་ནི། བད་ཀན་ཞེས་རྐང་པ་གཉིས་ཀྱིས་བསྟན་ནོ། བཞི་པ་ནི། མཚོན་འབྱུང་ཞེས་རྐང་པ་གཅིག་དང་འབྲུ་གསུམ་གྱིས་བསྟན་ནོ། །གསུམ་པ་ལེའུའི་མཚན་ནི་བདུད་རྩི་ཞེས་པ་ནས་དྲུག་ཅུ་རྩ་ལྔ་པའོ། །ཞེས་པས་བསྟན་ནོ།།

མཐའ་མའི་འདོན་ཐེངས་།: 24.08.2011 ཉིན། 2:12 PM