སྨན་རྩིས་དྲ་བ། - མན་ངག་རྒྱུད།

ལེའུ་རེ་བརྒྱད་པ། རླིག་རླུགས་གསོ་བ།
བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 23.02.2021
མན་ངག་རྒྱུད། >>

ལེའུ་རེ་བརྒྱད་པ། རླིག་རླུགས་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག རླིག་རླུགས་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

སྤྱི་དོན་དང་པོ་རྒྱུ་རྐྱེན་ཟས་སྤྱོད་གདོན་དང་ཐུར་སེལ་འཁྲུགས། །ལམ་ལོག་རྒྱུ་སྨད་ནས་སྣེ་ས་རྩ་དང་རླིག་པར་ཞུགས་ཏེ་སྐྲངས་པར་བྱེད།།

སྤྱི་དོན་གཉིས་པ་དབྱེ་བ་རླུང་མཁྲིས་བད་ཀན་ཚིལ་གྱུར་དང༌། །གཅིན་ལས་གྱུར་དང་རྒྱུ་རླུགས་དྲུག་ཏུ་བཤད།།

སྤྱི་དོན་གསུམ་པ་དེ་རྟགས་དང་པོ་རླུང་གྱུར་གློ་བུར་གང་རྒྱས་ན། །གཉིས་པ་མཁྲིས་གྱུར་དམར་ཞིང་ཚ་ལ་དྲོད་ཆེ་རྣག །གསུམ་པ་བད་ཀན་ཟུག་ཆུང་གྲང་ཞིང་ལྕི་ལ་སྲ། །བཞི་བ་ཚིལ་གྱུར་གྲང་ཞིང་འཇམ་ལ་རྣག་པ་དཀའ། །ལྔ་བ་གཅིན་གྱུར་རླིག་འོག་འཁོར་སྐྲངས་རྐྱལ་ཆུ་འདྲ། །དྲུག་པ་རྒྱུ་རླུགས་རླུང་གིས་རྒྱུ་མ་དཀྲུགས་གྱུར་ཏེ། །སྣེ་ས་རླིག་པར་འཕུལ་ལ་སྦོ་ཞིང་གཟེར། །སྒྲ་དང་བཅས་ཤིང་བཅུག་ཀྱང་སླར་འབྱུང་འགྱུར།།

སྤྱི་དོན་བཞི་བ་བཅོས་ཐབས་དང་པོ་རླུང་གྱུར་ཤིང་མངར་འཇམ་རྩི་བཏང༌། །འབའ་ཆའི་སྣུམ་དུགས་འབྲུ་མར་བསྐུ་མཉེ་ཕྱི་རྒྱུད་ལྟར་རྩ་བ་ལྔའི་སྨན་མར་རྗེས་ལ་སྦྱར། །གཉིས་པ་མཁྲིས་གྱུར་སྐྲངས་འདུལ་བསིལ་སྨན་སྣ་ཚོགས་ཀྱིས་ལུམས་ལོང་རྩ་གཏར་སྨིན་གྱུར་རྨ་ལྟར་གསོ། །གསུམ་པ་བད་ཀན་ལས་གྱུར་སྐྱེར་པ་བ་གཅིན་སྦྲང་བླུད་བཅོ་བརྒྱད་བསྲེག །དྲོད་ཀྱི་ལུམས་རྡོ་བསྲོས་པའི་དུགས་ཀྱིས་སྨིན་བྱ་རྣག་ནས་ནག་ཚུར་རྒྱ་ཚྭ་སྦྲང་རྩིས་རྨ་ཁྲུས་བྱ། །བཞི་བ་ཚིལ་གྱུར་བྱེ་རུག་སྤང་སྤོས་བྲག་ཞུན་ཡུང་སྐྱེར་ཨར་བར་སྐྱུར་གསུམ་བརྒྱད་པའི་ལུམས་ཀྱིས་བདུག །རླིག་པ་སྲུབས་མེད་པར་ལྤགས་པ་དྲལ་ལ་ཚིལ་ཕྱུང་རྨ་བཀྲུས་བཙེམ་ཡན་ལག་བརྒྱད་པར། རྨ་ནི་སྦྲང་རྩི་ནག་མཚུར་དང་། །རྒྱམ་ཚས་ངེས་པར་བསྐུལ་ལ་བཅོས་ཞེས་སོ། །ལྡོང་རོས་སུག་སྨེལ་སྤོས་དཀར་པི་པི་ལིང༌། །གོ་བྱེ་མ་ནུ་ཁྲག་ཅན་ཏིལ་མར་བྱུག་ཅིང་འབའ་ཆའམ་འོལ་སྐོམ་སྣུམ་དུགས་བྱ། །ལྔ་བ་གཅིན་གྱུར་ལྷུང་སར་ཕུག་ལ་རྨ་ལྟར་གསོ། །སྒོ་ང་སྐྲངས་ནས་རྩ་ཡི་ཐག་པ་སྤུ་ནག་སང་གི་རྩ་བསྲེག །དྲུག་པ་རྒྱུ་རླུགས་ཕྱི་རྒྱུད་ལྟར་རྩ་བ་ལྔ་ཡིས་སྨན་མར་སྦྱར། །འཇམ་རྩི་དུགས་བསྟེན་ནང་བཅུག་རྒྱུ་ལམ་བསྲེག་ཡན་ལག་བརྒྱད་པར། དེ་ནས་ཆུ་སོར་གནས་པ་ནི། །ཟླ་བ་ཁམ་པའི་ཁ་འདྲ་བ། །རླུང་ལམ་བགག་ཕྱིར་བསྲེགས་པར་བྱ། །ཞེས་གསུངས་སོ། སྐྲངས་པ་མ་ཞི་རྐང་པའི་སྲིན་ལག་རྒྱུས་པ་བཅད་ལ་ཡན་ལག་བརྒྱད་པར། མཐེ་བོ་ང་སྟེང་གི་རྒྱུས་པ་ནི། །སེར་པི་སྣལ་མ་འདྲ་བ་གང་། །ཁབ་ཀྱིས་བཏེག་ལ་ཐད་ཀ་རུ། །གང་ན་ཡོད་པ་དེ་བཅད་དེ། །གཞན་དག་དེ་ལས་ལོགས་གཞན་ནི། །སྲིན་ལག་སོར་མོ་བསྲེག་ཅེས་ཟེར། །ཞེས་གསུང་བསྲེག །ཅེས་གསུངས་སོ།།