ལེའུ་རེ་བརྒྱད་པ། རླིག་རླུགས་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག རླིག་རླུགས་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

རྒྱུ་རྐྱེན་ཟས་སྤྱོད་གདོན་དང་ཐུར་སེལ་འཁྲུགས། །ལམ་ལོག་རླིག་པར་ཞུགས་ཏེ་སྐྲངས་པར་བྱེད།།

དབྱེ་བ་རླུང་མཁྲིས་བད་ཀན་ཚིལ་གྱུར་དང༌། །གཅིན་ལས་གྱུར་དང་རྒྱུ་རླུགས་དྲུག་ཏུ་བཤད།།

དེ་རྟགས་རླུང་གྱུར་གློ་བུར་གང་རྒྱས་ན། །མཁྲིས་གྱུར་དམར་ཞིང་ཚ་ལ་དྲོད་ཆེ་རྣག །བད་ཀན་ཟུག་ཆུང་གྲང་ཞིང་ལྕི་ལ་སྲ། །ཚིལ་གྱུར་གྲང་ཞིང་འཇམ་ལ་རྣག་པ་དཀའ། །གཅིན་གྱུར་རླིག་འོག་འཁོར་སྐྲངས་རྐྱལ་ཆུ་འདྲ། །རྒྱུ་རླུགས་རླུང་གིས་རྒྱུ་མ་དཀྲུགས་གྱུར་ཏེ། །སྣེ་ས་རླིག་པར་འཕུལ་ལ་སྦོ་ཞིང་གཟེར། །སྒྲ་དང་བཅས་ཤིང་བཅུག་ཀྱང་སླར་འབྱུང་འགྱུར།།

བཅོས་ཐབས་རླུང་གྱུར་ཤིང་མངར་འཇམ་རྩི་བཏང༌། །སྣུམ་དུགས་བསྐུ་མཉེ་སྨན་མར་རྗེས་ལ་སྦྱར། །མཁྲིས་གྱུར་ལུམས་གཏར་སྨིན་གྱུར་རྨ་ལྟར་གསོ། །བད་ཀན་སྐྱེར་པ་སྦྲང་བླུད་བཅོ་བརྒྱད་བསྲེག །ལུམས་དུགས་སྨིན་བྱ་རྣག་ནས་རྨ་ཁྲུས་བྱ། །ཚིལ་གྱུར་བྱེ་རུག་བརྒྱད་པའི་ལུམས་ཀྱིས་བདུག །སྲུབས་མེད་ལྤགས་དྲལ་ཚིལ་ཕྱུང་རྨ་བཀྲུས་བཙེམ།  །ལྡོང་རོས་སུག་སྨེལ་སྤོས་དཀར་པི་པི་ལིང༌། །གོ་བྱེ་ཏིལ་མར་བྱུག་ཅིང་སྣུམ་དུགས་བྱ། །གཅིན་གྱུར་ལྷུང་སར་ཕུག་ལ་རྨ་ལྟར་གསོ། །སྒོ་ང་སྐྲངས་ནས་རྩ་ཡི་ཐག་པ་བསྲེག །རྒྱུ་རླུགས་རྩ་བ་ལྔ་ཡིས་སྨན་མར་སྦྱར། །འཇམ་རྩི་དུགས་བསྟེན་ནང་བཅུག་རྒྱུ་ལམ་བསྲེག །མ་ཞི་སྲིན་ལག་རྒྱུས་པ་བཅད་ལ་བསྲེག །ཅེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རླིག་རླུགས་གསོ་བའི་ལེའུ་སྟེ་དྲུག་ཅུ་རྩ་བརྒྱད་པའོ།། །།


 

མཐའ་མའི་འདོན་ཐེངས་།: 21.12.2022 ཉིན། 9:51 AM