ལེའུ་རེ་བདུན་པ། རྨེན་བུ་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག རྨེན་བུའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

རྒྱུ་རྐྱེན་དྲག་ཤུལ་རྐྱེན་གྱིས་འགྲམས་པའམ། །རླུང་ཁྲག་འཁྲུགས་པ་རྨེན་བུ་ལ་བརྟེན་སྐྲངས། །ཕལ་ཆེར་སྐེ་མཇིང་མིག་ཟུར་སྣེ་ས་མང༌།།

དབྱེ་བ་རླུང་མཁྲིས་ཁྲག་དང་བད་ཀན་དང༌། །ཤ་ཚིལ་རྩ་དང་འབྲས་དང་བརྒྱད་དུ་བཤད།།

དེ་རྟགས་རླུང་གྱུར་རྒྱ་ཆེ་བུས་འདྲར་གཡོ། །མཁྲིས་གྱུར་དམར་སེར་དྲོད་ཆེ་ཚ་ལ་རྣག །ཁྲག་གྱུར་དྲོད་ཆེ་ཚ་དམར་རྩ་ཐོག་འབྱུང༌། །བད་ཀན་ཟུག་ཆུང་སྲ་བསིལ་སྐྱ་བ་ཡིན། །ཤ་རྨེན་སྲ་ལ་རྒྱ་ཆེ་འཇམ་ཞིང་སྣུམ། །ཚིལ་རྨེན་མདོག་དཀར་བསིལ་ཞིང་འཕེལ་འབྲི་ཆེ། །རྩ་རྨེན་རྩ་སྟེང་སྙི་ལ་འགུལ་བའོ། །འབྲས་མཁྲང་སྲ་འདྲིལ་གཏིང་ཟུག་འཕེལ་འབྲི་ཆུང༌། །ཁ་ཅིག་རང་བཞིན་ཞི་འམ་འཕེལ་རྒྱས་བྱེད། །ཁ་ཅིག་ཟུག་མེད་ཁ་ཅིག་ཟུག་གཟེར་ཆེ། །ལ་ལ་སྨིན་དཀའ་ལ་ལ་མྱུར་དུ་རྣག །སྲ་ལ་སྨིན་དཀའ་ཉུང་གཤེར་འཁྱགས་འདྲ་དང༌། །འབྲོས་ཤིང་འཕེལ་སྐྱེན་འགས་པ་སྤང་བར་བྱ།།

བཅོས་ཐབས་གསར་དུས་ནད་སྟོབས་ཆུང་བ་ལ། །སྤྲ་ཚིལ་ཤོག་བུ་ལ་བསྐུས་བསྲོས་པ་གླན། །རྒྱམ་ཚྭ་བཅའ་སྒ་ཚན་དོས་བདུག་ཅིང་མཉེ། །མ་ཞི་སྟེང་དུ་མེ་ཡིས་འཚོས་པར་བསྲེག །ནད་སྟོབས་འབྲིང་ལ་བྲག་ཞུན་དྲི་ཆུ་བྱུག །ཡང་ན་ཀླད་རུལ་ཚྭ་དང་སྦྱར་བ་བྱུག །ཨ་རུ་གུ་གུལ་སྐྱེར་པ་བ་ཆུ་བཏུང༌། །མ་ཞི་འབམ་པོ་བྱ་བྲས་རྣག་ཏུ་དགུག །རྙིངས་ཤིང་རྒྱས་ནས་སྣུམ་འཆོས་དུགས་བྱས་ལ། །ལྟོ་དང་རྩས་སྦྱང་གང་ཉེའི་རྩ་ལ་གཏར། །ཆུ་མ་རྩི་དང་སྒོང་ཐོག་བྲག་ཞུན་དང་། །བུལ་ཏོག་དྲི་ཆུ་སྦྱར་བས་བྱུག་པར་བྱ། །མ་ཐུབ་བསྲེགས་སྟེང་ཁྲ་བོའི་ལུམས་ཀྱིས་གདུལ། །རྣག་ཏུ་ཁུགས་ནས་འབྲས་ལྟར་བཅོས་པར་བྱ། །ཟུག་ཆུང་རབ་འཕྱང་རྩ་བར་བཅད་ལ་བསྲེག །བད་རླུང་སྟག་ཚེར་སེང་ཚེར་ཙི་ཏྲ་ཀ །པི་པི་ལིང་གི་སྨན་མར་སྣུམ་རྗེས་སྦྱང༌། །རྒྱམ་ཚྭ་སྒ་མར་བྱུགས་སྟེང་ཨ་སས་བདུག །ཁྲག་མཁྲིས་ཨ་རུ་རྒྱ་སྐྱེགས་ཙན་དན་དང༌། །ཧོང་ལེན་ཤུ་དག་སྦྲང་དང་སྦྱར་ལ་བཏང༌། །ཀྱི་ལྕེ་བྲག་ཞུན་ཧོང་ལེན་དྲི་ཆུ་བྱུག །ཤ་རྨེན་གཅན་གཟན་ཤ་སྣ་བཙོས་ལ་བདུག །ཚིལ་གྱུར་གུ་གུལ་བཟའ་ཞིང་བྱེ་རུག་བདུག །རྩ་རྨེན་གོང་འོག་བསྲེག་ཅིང་གང་ཉེ་གཏར། །འབྲས་མཁྲང་ལུམས་ཀྱིས་བཏུལ་ལ་དེ་རྗེས་བསྲེག །ཅེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྨེན་བུ་བཅོས་པའི་ལེའུ་སྟེ་དྲུག་ཅུ་རྩ་བདུན་པའོ།། །།

མཐའ་མའི་འདོན་ཐེངས་།: 21.12.2022 ཉིན། 9:49 AM