ལེའུ་རེ་གཅིག་པ། ལྤགས་པའི་ནད་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག ལྤགས་ནད་རྒྱུ་རྐྱེན་དབྱེ་བ་བཅོས་ཐབས་གསུམ།།

སྤྱི་དོན་དང་པོ་རྒྱུ་ནི་སྲིན་དང་ཆུ་སེར་འཕེལ་བ་ལ། །གདོན་དང་འདུ་བ་འཁྲུགས་པས་ལྤགས་ནད་སྐྱེད།།

སྤྱི་དོན་གཉིས་པ་དབྱེ་བ་ཤ་བཀྲ་ཤ་མདོག་ཁྲ་བོར་བྱེད་པ་གླང་ཤུ་དཀྱིལ་སྲབ་ལ་འཇམ་མཐའ་རྩུབ་ལ་མཐུག་པ་མཆེད་པར་བྱེད་པས་བས་ལྡག་ཀྱང་ཟེར་མཛེར་པ་རང་བཞིན་བ་དཀར་པོ་དང༌རྐང་མཐིལ་སོགས་སུ་འབྱུང་བ་རྒྱ་མཛེར་རམ་ནག་དང་།  །ཟ་རྐོང་སྤུ་ཕྱི་མདོག་སྔོ་འགོས་མཆེད་རྐྱེན་འདི་ལ་སྔོ་དང་ཟ་འཕྲུག་འབྱུང་ཤུ་བ་ཐོར་ཆུ་སེར་འོང་པ་དང་སྲིན་ཐོར་ཐོར་པ་རྩེ་དཀར་ལ་སྣག་ཆོ་ལེ་བ་དང་ངོ་ཤིག་གདོང་པ་སྨེ་བ་ནག་པོས་ཁྱབ་པ་སྟེ་ཕྱེ་མའམ་གྲོ་ཤིག་ཅེས་བྱ་དང༌། །ཁབས་དང་ཁྱེ་མ་གཉིས་ནི་སྐྱ་ལ་རྩུབ་པ་བྱུང་རྗེས་གློག་པ་ཅན་ལ་སོགས་སྒྲ་ཡིས་བརྟག་རླུང་ལས་གྱུར་པ་སྨུག་ནག་རྩུབ་མཁྲིས་པར་སྤུ་འབྱི་དམར་ལ་ཚ་འབྲབ་བྱེད་བད་ཀན་ལ་གཡའ་ཞིང་སྐྱ་ལ་མཐུག།།

སྤྱི་དོན་གསུམ་པ་བཅོས་ཐབས་སྦྲུལ་ནག་པགས་པ་ནུས་ལྡན་བསྲེགས། །བ་རུའི་མར་སྦྱར་བྱུགས་ཉི་མར་བསྲེགས་གླང་ཤུ་ཤ་བཀྲ་སེལ། །སོ་མ་ར་ཛ་ཆ་གཅིག་ལྡོང་རོས་སིང་བླང་བ་ཆ་གཅིག་སྦྱར་བ་བ་ཆུ་བྱུག །ཕག་ཚིལ་མུ་ཟི་སེར་པོ་གླང་ཤུ་ཤ་བཀྲ་སེལ། །མཛེར་པ་ལྤགས་ལ་དྲངས་ཏེ་བཙོད་ཤེལ་གྱིས་བསྲེག །ཟ་རྐོང་གང་ཉེ་བའི་རྩ་གཏར་ལ་ཆུ་ལུམས་བྱ། །ཟ་འཕྲུག་རྩབས་འབྲས་སམ་ནས་རླན་ལ་བཞག་རྩ་སྐྱེས་པ་དེ་ཆུས་བསྲིངས་ནས་བསྒྱུར་བ་གདར་ལས་ཞེས་པ་མངར་སྐྱུར་གང་ཞིག་ཡིན་ཡང་མཆན་མང་པོར་ཆུ་རྩ་ཞེས་བཏབ་འདུག་གོ་བཀྲུས་པའི་རྗེས་སུ་ནིམ་པ་ནག་མཚུར་ཏིལ་ནག། །གི་ཝཾ་རྩབས་དང་སྦྱར་བའི་ལྡེ་གུ་བྱུག །སོ་མ་ར་ཛ་ཤུ་དག་ཙི་ཏྲ་ཀ །ལི་ཤི་ཟོ་མར་ཤུ་བ་ཟ་རྐོང་ཟ་འཕྲུག་སེལ། །ཤུ་བ་ཐང་ཤིང་རུ་རྟ་ལྡོང་རོས་མར༌། །ཡང་ན་མུ་ཟི་སེར་པོ་ལན་ཚ་ཕབས་དུ་བ་རལ་པ་བྱུག །སྔོ་ཡི་ཚ་བ་ལྕེ་དབྱི་སྲུབ་གསུམ་དང་ར་དུག་པ་བོང་ང་མེ་ཏོག་སྔོ་ནག་ཅན། །ཐར་ནུ་ཆུ་རྩ་མར་དཀར་བྱུགས་པ་ཏིལ་མར་བསྲེག་ཤུ་བ་སེལ། །སྲིན་ཐོར་དྭ་བའི་རྩ་བ་ཙི་ཏྲ་ཀ །བྱི་ཏང་ག་དང་བཙན་དུག་སྦྱར་བ་བྱུག  ངོ་ཁབས་ཤིག་དང་ཁྱེ་མ་རྣམས་སྦྲང་བཙོད་ལྡེ་གུ་བྱུག །རྟ་དཀར་པོའི་རྨིག་པ་བསྲེགས་ཐལ་མར་གསར་རམ། །ཟི་ར་དཀར་ནག་ཡུངས་དཀར་འོ་མ་ཏིལ། །ཡང་ན་སྐྱེར་པ་སེང་ཕྲོམ་བྲི་ཧ་ཏི་ཀཎྚ་ཀ་རི་སྨུག་པོ། །སེང་ཕྲོམ་སྤྲ་ཚིལ་སྤོས་དཀར་པུ་ཤེལ་རྩེ། །བུ་རམ་སྦྲང་མར་བ་གཅིན་བསྐོལ་བ་བྱུག །རྨེ་བ་ངོ་ཁབས་ཁྱེ་མ་སེལ་བར་བྱེད། །གདོང་པ་པད་མ་ཟླ་བ་ལྟ་བུར་འགྱུར། །སེར་པོ་ཡུངས་བ་སྐྱེར་པ་གཉིས་དང་ཀཎྚ་ཀ་རི་རུ་རྟ་དུག་མོ་ཉུང༌། །དུད་པའི་ལྡེ་གུས་ཤུ་བ་ཤ་བཀྲ་དང༌། །གཡན་པ་ལྤགས་ནད་མ་ལུས་སེལ་བར་འགྱུར། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལྤགས་པའི་ནད་གསོ་བའི་ལེའུ་སྟེ་དྲུག་ཅུ་རྩ་གཅིག་པའོ།། །།

མཐའ་མའི་འདོན་ཐེངས་།: 23.02.2021 ཉིན། 2:31 PM