ལེའུ་ཞེ་བརྒྱད་པ། དབུགས་མི་བདེ་བ་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག དབུགས་མི་བདེ་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

སྤྱི་དོན་དང་པོ་རྒྱུ་རྐྱེན་མ་ཞུ་བད་ཀན་འཕེལ་བས་དྭངས་མའི་ལམ་བཀག་པ་དང༌། །ལུད་པ་འཕེལ་བས་དབུགས་རྒྱུའི་ལམ་བཀག་ལས་འབྱུང༌།།

སྤྱི་དོན་གཉིས་པ་དབྱེ་བ་ཕྲན་ཚེགས་མུན་ཅན་དབུགས་ཆད་དང༌། །ཆེན་པོ་གྱེན་འབྱུང་ཞེས་བྱ་རྣམ་པ་ལྔ།།

སྤྱི་དོན་གསུམ་པ་ལ་སྤྱི་དང་བྱེ་བྲག་གཉིས་ལས་དང་པོ་དེ་རྟགས་སྙིང་ག་རྩིབ་ལོགས་རྒྱང་ངམ་གཟེར། །ལྟོ་སྦོ་དབུགས་རྒོད་ཡང་ན་དབུགས་དལ་བ་ལྟར་བག་ལ་ཉལ་ལམ་གབ་པའི་གཞའ་བར་འགྱུར། །གཉིས་པའི་དང་པོ་ཕྲན་ཚེགས་འགྲངས་ངོམས་འདུག་རྗེས་དྲག་ཤུལ་བྱས་པས་འབྱུང༌། །གཉིས་པ་མུན་ཅན་གློ་མིག་བད་ཀན་འགགས་པ་ཡིས། །ལུད་པ་མང་ལ་གྲེ་བ་ངར་ཞིང་འཛེར། །ཉལ་ན་མི་བདེ་རོ་སྟོད་གཟེར་སྙམ་བྱེད། །དབུགས་ཆད་བད་ཀན་གློ་མིག་འགགས་པ་ལས་འབྱུང་བ་ཡིས། །གྱེན་རྒྱུའི་མཐུ་ཉམས་དབུགས་འབྱིན་མི་བདེ་ཞིང༌། །ཁ་སྐམས་པས་སྐད་དམའ་གཞུག་ཆད་གསང་གཏམ་ལྟར་སྨྲ་བ་ཡིན། །བཞི་བ་ཆེན་པོ་སྐད་འཛེར་མགུལ་སྐམ་ང་རོ་ཆེ། །བསྐྱོད་ཚེ་དབུགས་རྒོད་ལུད་པ་མང་དུ་འབྱུང༌། །ལྔ་བ་གྱེན་འབྱུང་བད་ཀན་དབུགས་རྒྱུའི་ལམ་བཀག་པས། །ཕྱིར་འབྱིན་བདེ་ཞིང་ནང་དུ་དབུགས་རྔུབ་དཀའ།།

སྤྱི་དོན་བཞི་བ་བཅོས་པའི་ཐབས་ལ་སྤྱི་དང་བྱེ་བྲག་གཉིས། །དང་པོ་སྤྱི་བཅོས་རྒྱམ་ཚྭ་ཏིལ་མར་ལུས་ཀུན་བྱུག །ཚ་བ་ཤས་ཆེ་དེ་སྤང་ཆུ་དྲོན་བླུད། །ཕྱི་བརྒྱུད་ལྟར་བཀྲུ་སྨན་སྐྱུགས་སྨན་རྩུབ་ན་རླུང་འཁྲུགས་རུ་རྟ་རྒྱམ་ཚ་དན་ད་སྤང་ཚེར་རི་ཤོའི་ཪྩ་རྒྱ་ཚ་པི་པི་ལིང་འཇམ་པོས་བུ་ག་སྦྱང་། །སྦྱངས་པས་མ་དག་ནད་ལྷག་(ཨ་ག་རུ་གུ་གུལ་དཀར་ནག་གླ་སྒང་རྡོ་དྲེག་སྤང་སྤོས་ཤིང་ཚ་ཧ་རེ་ཎུ་ཀ་བྱི་ཏང་ག་གླ་རྩི་སྤྲ་ཚིལ་དུ་བ་མེད་པའི་མེར་བསྲེགས་ལ་བདུག་པའམ།  ཡང་ན་སྤོས་དཀར་དང་ལྡོང་རོས་ཀྱི་བདུག།  ཡང་ན་ཨ་གར་མར་སྦྱར་གྱི་)དུད་པས་བསལ། །རྟ་འམ་བ་གསར་ལྕི་ཁུ་སྦྲང་སྦྱར་བླུད། །ཤིང་མངར་པི་པི་ལིང་གི་རྩ་བ་དང་། །བ་ལྕི་སྦངས་ཁུར་བུ་རམ་སྦྲང་སྦྱར་བྱིན། །མར་གསར་ཞོ་སྤྲིས་རླན་གནས་ཤ་རྣམས་བཟའ། །ཉེས་པ་གང་ཆེའི་ཤས་དང་སྦྱར་(རླུང་ཤས་ཆེ་ན་སྣུམ་འཆོས་བྱས། རི་བོང་གི་ཤ་ཁུ་མར་པི་ལིང་སྦྱར་བ་བླུད། སྐེ་སྟོང་དང་པོ་བསྲེག །མཁྲིས་གྱུར་དུར་བྱིད་གསེར་མེ་ཧོང་ལེན་གྱིས་སྦྱང༌།  འབྲས་ཆན་པི་ལིང་ཅུ་གང་སྒ་མར་སྦྱར་བ་བླུད།  བད་གྱུར་སྐྱུགས་བྱ་མ་ནུ་ཟུར་པའམ་སྒ་རྒོད་པ་སྐྱུ་རུ་སྦྲང་སྦྱར་བླུད།  ཁྲག་གྱུར་རྩེ་ཆུང་ཐོང་རྩ་གཏར་)ལ་བཅོས། །གཉིས་པ་བྱེ་བྲག་དང་པོ་ཕྲན་ཚེགས་ནད་ལ་བཅོས་མི་དགོས། །ཕྱི་མ་བཞི་པོ་ལ་ལ་སྟར་བུ་སྐྱུ་རུ་ར། །རུ་རྟ་ཤིང་མངར་ཞོ་སྦྱར་བད་ཀན་དྲང༌། །གཉིས་པ་དེ་འོག་མུན་ཅན་ཙན་དན་གོར་ཙན་ནམ་དཀར་པོ་ཅུ་གང་དང༌།  །ཤིང་མངར་ཀ་ར་དྲི་ཆུ་བར་པས་དབུལ། །གསུམ་པ་དབུགས་ཆད་ཅུ་གང་ཤིང་ཚ་སུག་སྨེལ་དང༌། །པི་པི་ལིང་དང་ཀ་ར་སྦྲང་སྦྱར་བཏང༌། །ཡང་ན་ཨ་ཀྲོང་སྦྲང་རྩི་སྦྱར་བ་བྱིན། །བཞི་པ་ཆེན་པོ་སྒོང་ཐོག་སྲོ་ལོ་དཀར་པོའི་ཐང༌། །ལོ་བརྒྱད་དྲི་ཆུ་ཀ་རས་རོ་བསྒྱུར་བཏང༌། །ལྔ་བ་གྱེན་འབྱུང་མ་ནུ་སྦྲང་གི་ལྡེ་གུ་བྱིན། །ཀུན་ལ་སྐྱོར་གོང་རྩ་དང་ཨོལ་གོང་ཐོང་རྩ་གཏར། །གོ་ཆེན་གོ་ཆུང་སྐེ་སྟོང་ཐུར་མས་གསེང༌། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དབུགས་མི་བདེ་བ་གསོ་བའི་ལེའུ་སྟེ་བཞི་བཅུ་རྩ་བརྒྱད་པའོ།། །།

མཐའ་མའི་འདོན་ཐེངས་།: 23.02.2021 ཉིན། 2:19 PM