ལེའུ་ཞེ་བཞི་པ། གཉན་ནད་འཁྱམ་པོ་བཅོས་པ།

གཉན་ནད་འཁྱམ་པོ་ཉག་གཅིག་ཅེས་བྱ་བ། །ངོ་བོ་གཉན་ཚད་སྤྱི་དང་འདྲ་བ་ལ། །རྟགས་བཅོས་གཉིས་ལས་དང་པོ་དེ་རྟགས་ནི། །སྐེ་དང་ལྐོག་མ་མཇིང་པའི་ལྡེབས་སོགས་ལ། །སྒོ་ང་འདྲ་བའི་སྐྲངས་འབྱུང་རྐྱེན་ཕྲད་ན། །ཟུག་གཟེར་ཆེ་ལ་སྲོག་ལ་རྒོལ་བ་འབྱུང༌། །མ་ཕྲད་ཟླ་བ་འགོར་ནས་འབྲས་སུ་འགྱུར། །སྨན་པ་ཕལ་ཆེར་རྩ་ཕྲེང་ཁྲག་ཕྲེང་དང༌། སེ་ར་རུས་སོགས་མིང་འདོགས་དུ་མ་བྱེད། །བཅོས་པའི་ཐབས་ལ་སྨན་དཔྱད་ཟས་སྤྱོད་བཞི། །སྨན་ནི་ཁྱུང་ལྔའི་སྟེང་དུ་གུ་གུལ་བསྣན། །ཆེར་ཆེ་མཁས་པའི་ཁྱུང་དྲུག་འདི་རང་གཅེས། །ཕྱིར་འབྱུག་སེར་པོ་ཟབ་ལག་གཙོར་སྨོས་ལ། །ནུ་ཞོ་འཛག་པའི་བཙུན་མོ་མཛེས་མ་ལ། །ཆུ་རླུང་འཐབ་པའི་དཔའ་བོ་བསྐྱོན་བྱས་ལ། །བ་འོར་སྐྱོ་མ་ཙམ་བསྐོལ་ལུམས་སུ་གཞུག །ནད་རླངས་ཕྱིར་ཐོན་འབར་འབུར་བྱུང་ན་འཚོ། །མ་ཐུབ་དྲག་པོ་བཅུ་གསུམ་བཤལ་གྱིས་སྦྱང༌། །ཟས་སྤྱོད་ཕྱི་རྗེས་གཉན་ཚད་སྤྱི་དང་མཐུན། །ཞེས་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་ཡོན་ཏན་རྒྱུད་ཀྱི་ལྷན་ཐབས་ཟུག་རྔུའི་ཚ་གདུང་སེལ་བའི་ཀཏྤཱུ་ར་དུས་མིན་འཆི་ཞགས་གཅོད་པའི་རལ་གྲི་ཞེས་པ་ལས་གཉན་ནད་འཁྱམ་པོ་བཅོས་པ་ལེའུ་སྟེ་ཞེ་བཞི་པའོ།།

མཐའ་མའི་འདོན་ཐེངས་།: 11.11.2020 ཉིན། 10:40 AM