ལེའུ་ཞེ་བཞི་པ། རྨ་གསོ་བའི་གདམས་པ།

རྨ་ལ་སྔགས་སྨན་གང་བྱས་ཀྱང་ཡི་དྭགས་ཀྱིས་འཚོ་རུ་མ་སྟེར་ན་བྱ་རོག་གི་བྲུན་བཏགས་ལ། མེ་དུ་བ་མེད་པ་ལ་བསྲེགས་པའི་དུད་པས་རྨ་ལ་བདུག་ན་འཚོ་བར་འགྱུར་རོ། །རབ་ཏུ་གསང་བའི་གདམས་ངག་གོ། མགོའི་གདམས་ངག་མདོར་བསྡུ་ན། དང་པོ་མཁན་པ། སྦང་མ། གཡེར་མ། སྤོང་རྣམས་སྦྱར་བས་ཤ་གདུལ། སྐྲ་བཞར་ལ་ཆིངས་བྱ། ཞག་གསུམ་ཁ་ཟས་བསིལ་དུ་གཏང་། དྲག་ཤུལ་མི་བྱ། ཁ་མི་སྒུལ། ཞག་གསུམ་ནས་རྩ་ཐོག་དེར་སྲུབ་ཁར་ཚ་ལྟོ་བྱ། རྨ་རྒྱས་ན་གཏར་ག་བྱ། མེ་རྩ་ཚོང་དང་སྦྱར། རྨ་ལ་གཏིང་སྐྱོན་མེད་ན་རྨ་སྨན་བཏབ་ལ་ཤ་ཆིངས་ཀློད། རུས་པ་ལ་སྐྱོན་ཡོད་ན་ཁྲག་གཅོད་ལ་སོགས་པ་གྲབས་སུ་བཅུག་ལ། བཅུད་ལ་བཏབ་ནས་གཡས་གཡོན་མདུན་རྒྱབ་སྐྱོན་གང་ཡོད་ངོས་དྲས། རུས་སྐྱོན་གསལ། སྲིན་བལ་གྱིས་ལྡིང་ཐེམ་བྱ། དེ་ནས་སྤངས་ཆས་གཏང་། རྨ་རྩི་རྨ་དང་ཁོང་པ་གཉིས་ཀ་ནས་གཏང་། རྩ་སྒོ་མེས་བསྲུངས། མགོ་བོ་ལག་ཏུ་བླང་བ་དེ་ལས་མེད་དོ། །བྱང་ཁོག་གི་མན་ངག་མདོར་བསྡུ་ན། དང་པོ་ཁྲག་གི་དུས་སུ་རྒྱས་མ་ཐོག་ཁུག་བྱ། དེ་ནས་བསིལ་ཐང་གཏང་། ཆུ་སེར་གྱི་དུས་སུ་ཆུ་སེར་ནག་པོ་རོལ་དུ་གསོད་པ་ཞེས་བྱ་བ། བསེ་རུ་དང་། ཤ་བའི་གྭ་དོར་བཞུར་བ་དང་། ག་པུར། ཅུ་གང་། བ་ལེ་ཀ ཏིག་ཏ། རྒུན་འབྲུམ། སུག་སྨེལ། མཚལ། དོམ་མཁྲིས། ཙནྡན་དཀར་པོ་རྣམས་ཀ་ར་དང་སྦྱར་ནས་ལྟོ་སྟོང་ལ་གཏང་ངོ་། །དེ་ནི་ཆུ་སེར་རོལ་དུ་གསོད་པའི་མཆོག སྟོད་སྨད་ཀྱི་རྩ་བ་བག་རེ་གཏར་རོ། །བཟང་དྲུག་དང་། ཁ་ཟས་བསིལ་དུ་གཏང་ངོ་། །དེས་མ་བཟློག་ན་རྣག་ཏུ་འགྲོ་བས་བཀྲོག་ཐབས་གསུམ་བྱ། དབྱེ་རན་ན་གསང་དུ་བསུས་ལ། ཕྱིའི་ཤ་གཙག་གིས་དྲ། ནང་ཤ་སེན་མོས་དགག རྣག་རྒྱངས་ཀྱིས་བྱུང་ན་ལེགས། མ་བྱུང་ན་སྦུ་གུས་འཇིབ། རྣག་སླ་བ་དང་། ཞག་གསུམ་ན་འཆད་དུས་ཡིན་ནོ། །ལག་ལེན་དྲིལ་ན་དེ་ལས་མེད་གསུང་ངོ་། །ཡན་ལག་དང་པོ་བཅོས་སྟེ། ལྕི་བ་། སྤང་མ། མཁན་པ། བྱ་བྲ། དྲི་ཆུས་ལུམས་བྱ། གནད་ལ་ཕོག་ནས་ལྷོག་ཐབས་སུ་སྐྲངས་ནས་ཅིས་ཀྱང་མ་ཐུབ་ན་ར་ལུག་གི་སློ་དྲོན་མོ་བཙན་དུག་དང་། དྲི་ཆུས་བྲན་ལ་དྲོད་མ་ཡལ་བ་ལ་ལུམས་བྱས་ནས་སྐྲངས་པའི་རིགས་ཐམས་ཅད་ལ་ཕན་ནོ། །ཆུ་བ་དང་རྒྱུད་པ་ཐམས་ཅད་འཁུམས་སུ་སོང་ན། བ་ལྕི་དྲོན་མོ་ལ་ཚ་དང་ཕབས་བཏབ་ནས། ཐོག་ཏུ་ལུམས་བྱ། དེས་ཁད་ཀྱིས་བདེ་བར་འགྱུར་རོ། །མདེའུ་ནང་དུ་ཡོད་པའི་ཕྱི་རུ་ཆུས་ཁ་བཀྲུ་བཏབ་པས་གཞན་རློན་པར་བྱས་ནས། མཐེ་བོང་གང་ཙམ་མེ་ལ་སྐམ། དེའི་འོག་ཏུ་མདེའུ་ཡོད་དོ། །ཡན་ལག་གི་རྨ་བཅོས་པས་རེད་ན་ཁྱིའི་ཀླད་པས་བདུགས་ན་ཕན་ནོ། །ཚིགས་གཞི་ལྕིབས་ཀྱིས་མི་འདུལ། སྐམ་ཆས་བྱ། རྨ་རེད་པ་ཐམས་ཅད་ལ་ཤུག་པ། བ་ལུ། མཁན་པ་གསུམ་ཞིབ་པར་བྱས་སྟེ། དྲོ་བྱས་ལ་མནན། དེས་ཀྱང་མ་ཐུབ་ན་སྤྱང་ཀིའི་བྲུན་དཀར་པོ་དང་། ཁྱི་ལུད་གཉིས་བསྙམས་ལ་ཞོ་ལ་ལྡེ་གུ་བྱས་ནས་ཚན་ཆེ་བར་བསྐུས་ན་མི་འཆོར་ངེས་སོ། །རྐང་མཐིལ་དང་། ལག་མཐིལ་ལ་ལྕིབས་མི་གཏང་། རྩ་ཆད་ན་མེ་གདབ། སྤྱིར་ནད་ཐམས་ཅད་ཆུ་སེར་ལས་བྱུང་བ་ཡིན་ནོ། །ལག་ལེན་དྲིལ་ན་དེ་ལས་མེད་དོ།། །།

མཐའ་མའི་འདོན་ཐེངས་།: 18.07.2019 ཉིན། 3:21 PM