ལེའུ་བརྒྱད་པ། ནད་ཀྱི་རྒྱུ་བསྟན་པ། 

གྲུབ་པ་ལུས་ཀྱི་གནས་གསུངས་ཟིན་པའི་རྗེས་དེ་ནས་ཡང་བྱ་བ་གཞན་གྱིས་བར་མ་ཆོད་པར་དྲང་སྲོང་ཡིད་ལས་སྐྱེས་ཀྱིས་འདི་ཅེས་ཞུས་སོ། །དེ་ཡང་ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །ཞེས་མཚན་ནས་བོས་ཏེ། གནས་བཅུ་གཅིག་གི་ནང་ནས་གསུམ་པ་འཕེལ་འགྲིབ་ནད་ཀྱི་གནས་ལ་བདག་ཅག་ཚུལ་ཇི་ལྟར་བསླབ་པར་བགྱི་ཞེས་འདྲི་ན། འཚོ་མཛད་སྨན་པའི་རྒྱལ་པོས་གསལ་བར་བཤད་དུ་གསོལ་ཞེས་ཞུས་པའོ། །ལས་ཞེས་བྱ་བ་ནི་འབྱུང་ཁུངས་ཀྱི་དོན་ཡིན་ནོ། །དྲང་སྲོང་ཆེན་པོ་ཡིད་ལས་སྐྱེས་ཀྱིས་ཇི་ལྟར་ཞུས་པའི་ལན་སྟོན་པས་འདི་སྐད་ཅེས་གསུངས་པ། དེའང་ཀྱེ་དྲང་སྲོང་ཆེན་པོ་ཉོན་ཅིག །ཅེས་གདམས་ནས་ལན་དངོས་ནི། གང་ཞེས་བྱ་བ་སྤྱིའི་སྒྲ་སྟེ། སྤྱིར་གསོ་བར་བྱ་བའི་ཡུལ་ཕུང་པོ་ལྔ་ལས་གྲུབ་པའི་ལུས་དེ་ལས་བྱུང་བ་ཡི་རེས་འགའ་འཕེལ་བ་དང༌། རེས་འགའ་འགྲིབ་པས་གནོད་པར་བྱེད་པ་ནད་ཀྱི་གནས་ལ་བསླབ་པར་བྱ་བ་ན་འདི་ལྟར་ཤེས་དགོས་ཏེ། ནད་ཇི་ལྟར་འབྱུང་བའི་རྒྱུ་དང༌། དེ་འཕེལ་ཟད་འཁྲུགས་པའི་རྐྱེན་དང༌། ཇི་ལྟར་ཞུགས་པའི་ཚུལ་དང༌། གང་དུ་གནས་པའི་གཞི་དང༌། སོ་སོར་ངེས་པའི་མཚན་ཉིད་དང༌། རྒྱ་ཆེན་པོར་དབྱེ་བ་དང༌། སོ་སོའི་དོན་གཏན་ལ་དབབ་པ་དང༌། རྣམ་པ་བདུན་དུ་བདག་རིག་པའི་ཡེ་ཤེས་ཀྱིས་བཤད་པ་ཡིན་ཞེས་བྱ་བའི་དོན་ཏོ།།

གོང་དུ་སྤྱི་དོན་རྣམ་པ་བདུན་བཤད་པའི་དང་པོ་ནད་ཐམས་ཅད་ཀྱི་རྒྱུ་བཤད་པ་ལ། རིང་བའི་རྒྱུ་དང༌། ཉེ་བའི་རྒྱུ་གཉིས་སུ་ངེས་སོ། །དེ་ལས་དང་པོ་རིང་བའི་རྒྱུ་དེ་ལའང་ནད་སྤྱིའི་རྒྱུ་དང༌། ཁྱད་པར་གྱི་རྒྱུ་གཉིས་ཡོད་དོ་ཞེས་པའོ།།

ནད་ཐམས་ཅད་ལ་རིང་རྒྱུ་གཉིས་སུ་བཤད་པའི་དང་པོ་སྤྱིའི་རྒྱུ་ལ་ཕྱི་ནང་གི་རྒྱུ་རྐྱེན་ལས་ནད་འཁྲུགས་ཤིང་འཕེལ་བས་རྣམ་པ་མི་འདྲ་བ་སྣ་ཚོགས་པའི་ཚུལ་ཅན་གྱི་སྒོ་ནས་བརྩི་བ་ལས་འདས་ཤིང་གྲངས་མེད་དུ་གྱུར་པ་ལུས་འདི་ཉིད་ཉེ་བར་གཟིར་བར་གྱུར་པ་དེ་དང༌། དེ་འདྲ་བའི་རྒྱུ་མཐའ་དག་རེ་རེ་ནས་འདིའི་རྒྱུ་ནི་འདི་ཡིན་ནོ་ཞེས་བདག་རིག་པའི་ཡེ་ཤེས་ཀྱིས་ཀྱང་བསྟན་པར་མི་ནུས་པས་ན་ཁྱོད་རྣམས་ཀྱིས་ལྟ་སྨོས་ཀྱང་ཅི་དགོས། དེ་བས་ན་ལུས་སེམས་ལས་བྱུང་བའི་ནད་ཀྱི་རྣམ་པ་མི་འདྲ་བ་ཀུན་གྱི་སྤྱིའི་རྒྱུ་ཐུན་མོང་བ་དེ་ཉིད་བརྗོད་པས་བྱེ་བྲག་ནི་ནད་ཕལ་ཆེར་ཡང་ཞར་ལ་ཤེས་པར་འགྱུར་བའི་ཕྱིར་འདིར་བརྗོད་པ་ནི་འདི་ལྟ་སྟེ། བརྗོད་པར་མི་ནུས་པའི་ནད་ཀྱི་རྣམ་གྲངས་དེ་རྣམས་ཀུན་གྱི་ཐུན་མོང་བའི་རྒྱུ་ནི་གཅིག་པུ་ཉིད་ཡིན་ཏེ། རྒྱུའི་གཙོ་བོ་ཞེས་བྱ་བའི་དོན་ཏོ། །གཅིག་པུ་དེ་ཡང་གང་ཞེ་ན། དོན་དམ་པར་དངོས་པོ་ཐམས་ཅད་བདག་མེད་པའི་རང་བཞིན་ཅན་ཁོ་ན་ཡིན་ཡང་ཀུན་རྫོབ་ཏུ་འཁྲུལ་བས་བསླད་པ་ལ་བརྟེན་ནས་བདག་ཏུ་བཟུང་བས་དེའི་དོན་མ་ཤེས་ཤིང༌། དེ་ལྟར་མ་རྟོགས་པས་བདག་འཛིན་དང་ལྷན་ཅིག་ཏུ་སྐྱེས་པའི་མ་རིག་པ་ཞེས་བྱ་བ་སེམས་ཅན་ཐམས་ཅད་ཀྱི་རྒྱུད་ལ་ཐོག་མ་མེད་པ་ནས་ཡོངས་སུ་གྲུབ་པའི་མི་དགེ་བ་དེ་ཉིད་གཅིག་པུ་ཡིན་ནོ། །དཔེར་ན་འདབ་ཆགས་ཀྱི་བྱ་གཤོག་རྩལ་དང་ལྡན་པ་རྣམས་ནི་ཉིན་པར་སྐད་ཅིག་ཀྱང་ས་ལ་མི་འབེབས་པར་ནམ་མཁའ་ཁོ་ནའི་ལམ་ལ་འཕུར་ཞིང་ལྡིང་བར་གྱུར་དུ་ཟིན་ཀྱང་བྱ་རང་བཞིན་གང་དུ་འགྲོ་བའི་རྗེས་དེ་དང་དེར་རང་གི་གྲིབ་མ་དེ་ཡང་ངེས་པར་འབྲང་ཞིང་དེ་དང་སྐད་ཅིག་ཀྱང་མི་འབྲལ་བ་བཞིན་དུ་འགྲོ་བ་སེམས་ཅན་འདི་དག་ཀུན་ཀྱང་རེ་ཞིག་ལུས་སེམས་ནད་མེད་བདེ་བར་ཐ་མལ་དུ་གནས་ཤིང་རང་རང་གི་ཕུན་ཚོགས་ལ་ལོངས་སྤྱོད་པ་དེའི་ཚེ་ན་ཡང་མ་རིག་པ་རྒྱུད་ལ་ལྡན་པའི་སྟོབས་ཀྱིས་ནད་རླུང་མཁྲིས་བད་ཀན་དང་འདོད་ཁྲོ་གཏི་མུག་རྣམས་དང་འབྲལ་བར་མི་སྲིད་པ་ཡིན་ནོ། །དེའི་དོན་གྱིས་རྐྱེན་སྣ་ཚོགས་པ་དང་ཕྲད་པའི་ཚེ་ཟུག་རྔུ་གློ་བུར་དུ་འབྱུང་བ་ཡིན་ལ། མདོར་ན་མ་རིག་པ་དང་མ་བྲལ་བ་དེ་སྲིད་དུ་ནད་ཅེས་བྱ་བ་དང་ཡང་མི་འབྲལ་ཞེས་བྱ་བའི་དོན་ཏོ། །ནད་རླུང་མཁྲིས་བད་ཀན་གསུམ་ཁྱད་པར་གྱི་རྒྱུ་ནི་མ་རིག་པ་ལས་བྱུང་བའི་འདོད་ཆགས་དང༌། ཞེ་སྡང་དང༌། གཏི་མུག་སྟེ་དུག་གསུམ་དུ་གྲགས་པ་རྣམས་ཡིན་ལ། རྒྱུ་དེ་ལས་རིམ་པ་བཞིན་དུ་འབྲས་བུ་རླུང་མཁྲིས་བད་ཀན་ཏེ་ཉེས་པ་གསུམ་པོ་སྐྱེད་པར་བྱེད་པ་ཡིན།

སྐྱེད་གཞིའི་ཉེས་གསུམ། དེ་ཡང་ཇི་སྐད་དུ། རླུང་ལྷའི་རླུང་སྨན་སྦྱོར་བྱས་པའི། །རླུང་རྐྱལ་ཞགས་པའི་རླུང་ནད་འབྱུང༌། །དེ་གསོ་བ་ལ་ཏིལ་མར་མཆོག །ཅེས་པ་ལྟར། སྔོན་གྱི་དུས་སུ་རླུང་ལྷ་འབར་བས་ཕྱིའི་རྒྱ་མཚོ་ལ་ཁྲུས་ལ་ཕྱིན་པས་རླུང་སྨན་མོ་ནོར་བུ་འཛིན་པ་ཞེས་བྱ་བ་ལུས་རྒྱན་སྣ་ཚོགས་པས་བརྒྱན་པ་ཡིད་དུ་འོང་བ་དང་ཕྲད་པས་འདོད་ཆགས་སྐྱེས་ཏེ་རླུང་ལྷས་སྦྱོར་བ་བྱས་པས་རླུང་གི་རྐྱལ་པ་ཞགས་པའི་རླུང་ཤོར་ནས་རླུང་གི་ནད་བྱུང་བར་བཤད་ལ། དེ་བཞིན་དུ་མཁྲིས་པ་ནི། བདུད་རྩི་མཆོག་གི་ལུང་ལས། རྒྱལ་པོ་ཤེས་བརྟན་ཅན་ཞེས་པས། །ལྷ་དང་དྲང་སྲོང་རྣམས་ལ་ནི། །མཆོད་སྦྱིན་རྒྱ་ཆེན་བྱས་པ་བས། །ལྷ་ཆེན་དབང་ཕྱུག་དྲག་པོ་དེ། །ཀུན་གྱི་གྲལ་གཞུག་སྤྱན་དྲངས་པའི། །ལྷ་ཆེན་དྲག་པོ་དེ་ཁྲོས་ནས། །ལྷ་ཆེན་དེ་ཡི་དཔྲལ་བ་ལས། །མེ་འབར་མིག་དེ་རབ་ཁྲོས་ཁྲོས་ཏེ། །ཁྲག་མིག་གཟིར་བས་བལྟས་པ་ཡིས། །མཁྲིས་པ་ཚ་བའི་ནད་སྣ་དར། །ཞེས་པ་ལྟར། སྔོན་བསྐལ་པ་ལྔ་ཁྲི་ལྔ་སྟོང་འདས་པ་ན་སྐྱེ་དགུའི་བདག་པོས་ལྷ་ཆེན་དྲག་པོ་མཆོད་སྦྱིན་ལ་སྤྱན་དྲངས་པས་ལྷ་ཆེན་ལྷ་ཀུན་གྱི་གྲལ་གཞུག་ལ་བཞག་པས་ལྷ་ཆེན་ཁྲོས་ཏེ་སྐྱེ་དགུའི་བདག་པོའི་མཆོད་སྦྱིན་མ་བཞེས་པར་བརླག་པར་བྱས་སོ། །ཞེ་སྡང་གིས་ལྷ་དྲག་པོའི་དཔྲལ་བའི་མིག་དྲག་ཏུ་བསྒྲིལ་བ་ལས་མཁྲིས་པ་ཚ་བའི་ནད་རིགས་སྣ་ཚོགས་བྱུང་བ་དང༌། དེ་ལྟར་དུ་བད་ཀན་ནི། སེ་སྒྲོམ་སྨུག་པོ་ལས། སྔོན་གྱི་བསྐལ་པ་དང་པོ་ལ། །ནུབ་ཕྱོགས་སྲིན་པོའི་གྲོང་ཁྱེར་དུ། །སྲིན་པོ་རྒྱལ་བའི་མིང་ཅན་ལ། །བཙུན་མོ་ར་ཡི་མིང་ཅན་བྱུང༌། །བཙུན་མོ་བློན་པོ་སྦྱོར་བྱས་པས། །རྒྱལ་པོ་ཁྲོས་ཏེ་མཚོ་ལ་བསྐྱུར། །སྨོན་ལམ་ལོག་པས་བྱད་དུ་ཆུག །བྱད་ནད་བད་ཀན་ནད་ཀྱིས་ཐེབས། །རྒྱལ་པོ་ཁྲོས་པས་བཤང་གཅི་གཏོར། །བྱ་ཆེན་ཁྱུང་གི་སྤུ་གསེབ་འཐུམས། །བྱ་ཆེན་མི་ཡུལ་བབས་པ་ཡིས། །མི་ལ་བད་ཀན་ནད་བྱུང་ངོ༌། །ཞེས་པ་ལྟར། སྔོན་རྒྱལ་པོ་རྒྱལ་བའི་མིང་ཅན་བྱ་བ་ལ་བཙུན་མོ་ར་མ་ཡ་བྱ་བ་ཡོད་པས། བཙུན་མོས་བློན་པོ་རྟ་མགོ་ཅན་དང་འགྲོགས་པས་རྒྱལ་པོ་ཁྲོས་ཏེ། བཙུན་མོ་དང་བློན་པོ་གཉིས་མཚོ་ལ་བསྐྱུར་བས་ཁོང་གཉིས་ཀྱིས་སྨོན་ལམ་བཏབ་པ་ནི། རྒྱལ་ངན་རྒྱལ་བའི་མིང་ཅན་དེར། །ཀླུ་དང་བྱད་ཀྱི་ནད་ཐོབ་ལ། །ཐར་མེད་མཚོ་དང་འདྲ་བ་ཡི། །བྱད་ནད་བད་ཀན་ནད་ཀྱིས་ཐོབ། །བྱས་པས་ཁོང་གཉིས་ཀྱི་སྨོན་ལམ་འགྲུབ་སྟེ། རྒྱལ་པོ་བད་ཀན་གྱི་ནད་ཀྱིས་ཐེབས་སོ། །དེ་ནས་རྒྱལ་པོ་ཁྲོས་ཏེ་འདོམས་ཀྱི་བཤང་གཅི་གཏོར་བས་བྱའི་སྤུ་གསེབ་ཏུ་འཐུམས་ནས་མི་ཡུལ་དུ་བྱ་བབས་པ། མིས་བྱ་ཁྱུང་རྙི་ལ་བཟུང་ནས་ཁྱུང་ཤ་ཟོས་པས་བད་ཀན་གྱི་ནད་བྱུང་ངོ༌། །དེ་ལྟར་གོང་དུ་ནད་ཀྱི་རིང་བའི་རྒྱུ་དང་ཉེས་གསུམ་གྱི་རྩ་བ་འབྱུང་ཚུལ་བཤད་མོད།

འདིར་ནད་ཀྱི་དངོས་ཀྱི་རྒྱུའམ་ཉེ་རྒྱུ་བཤད་པ་ནི། ལུས་ལ་རང་བཞིན་གྱིས་གནས་པའི་རླུང་དང་མཁྲིས་པ་དང་བད་ཀན་གསུམ་པོ་རང་རང་གནས་དང་ལྡང་ཚད་སོགས་ལས་རྣམ་པར་མ་གྱུར་པ་རང་བཞིན་ཐ་མལ་དུ་གནས་པ་དེ་ནི་ནད་མངོན་གྱུར་པ་རྣམས་ཀྱི་རྒྱུའི་གཙོ་བོར་འགྱུར་ལ། གལ་ཏེ་རྣམ་པར་གྱུར་ནས་ཆ་མ་སྙོམས་པར་འཕེལ་ཟད་འཁྲུགས་པ་གང་ཡང་རུང་བར་གྱུར་ན་རླུང་མཁྲིས་བད་ཀན་གསུམ་པོ་དེ་ཉིད་ནད་ཀྱི་ངོ་བོ་ཡིན་ཏེ། དེ་ནི་ལུས་དང་སྲོག་ལ་ལྷག་པར་གནོད་ཅིང་གདུང་བ་བསྐྱེད་པར་འགྱུར་བས་སོ། །རླུང་མཁྲིས་བད་ཀན་གསུམ་གྱིས་ནད་ཀྱི་རྒྱུ་བྱེད་པའི་ཚུལ་དངོས་ནི། དུས་གདོན་ལ་སོགས་པའི་རྐྱེན་འགའ་ཞིག་གིས་བྱེད་པ་ལ་བརྟེན་ནས་མཁྲིས་པའི་རང་བཞིན་འཁྲུགས་པར་གྱུར་པས་ནི་ལུས་ཟུངས་བདུན་དང་ཤུགས་ལས་དྲི་མ་རྣམས་ཀྱང་སྲེག་པར་བྱེད་པ་ཡིན་ཏེ། རྒྱུ་གང་གི་སྒོ་ནས་ཞེ་ན་མཁྲིས་པ་ཞེས་བྱ་བའི་ནད་འདི་ནི་ངོ་བོ་མེའི་རང་བཞིན་ཅན་ཚ་བར་གནས་པས་ན་ལུས་ཀྱི་སྨད་ཀྱི་ཆ་རྒྱུ་མ་ལ་སོགས་པ་རྣམས་ན་གནས་ཤིང་ཞུགས་པར་གྱུར་ཀྱང་སྟོད་དུ་འབར་བར་བྱེད་པའི་ཕྱིར་ཚ་གྲང་གཉིས་ཀྱི་ཟླས་ཕྱེ་བའི་ཚ་བའི་ནད་ཀུན་ཀྱང་མཁྲིས་པ་འདི་ལས་མ་སྐྱེས་པ་མེད་དེ། ཆ་ཙམ་ཡང་སྲིད་པ་མ་ཡིན་ནོ། །དེ་བཞིན་དུ་མི་མཐུན་པའི་རྐྱེན་གྱིས་བད་ཀན་གྱི་རང་བཞིན་ཉེ་བར་འཁྲུགས་པས་ནི་ལུས་ཀྱི་མེ་དྲོད་སྤྱི་དང༌། ཁྱད་པར་ཕོ་བའི་མེ་དྲོད་འཇོམས་པར་བྱེད་པ་ཡིན་ཏེ། ཅིའི་ཕྱིར་ཞེ་ན། བད་ཀན་ཞེས་བྱ་བའི་ནད་འདི་ནི་ས་དང་ཆུའི་རང་བཞིན་ཅན་ལྕི་ལ་བསིལ་བའི་མཚན་ཉིད་དང་ལྡན་པས་ན་ལུས་ཀྱི་སྟོད་ཀྱི་ཆ་མགོ་བོ་ལ་སོགས་པའི་ཡུལ་ན་གནས་ཤིང་ཞུགས་པར་གྱུར་ཀྱང་སྨད་དུ་ངང་གིས་ལྷུང་བར་བྱེད་པ་ཡིན་པའི་ཕྱིར། གྲང་བའི་ནད་ཀུན་ཀྱང་བད་ཀན་འདི་ལས་མ་སྐྱེས་པ་གཅིག་ཀྱང་མེད་དོ། །དེ་ལྟར་མཁྲིས་པ་དང་བད་ཀན་གཉིས་ཚ་གྲང་གི་ནད་སོ་སོའི་རྒྱུའི་གཙོ་བོ་ཡིན་ལ། རླུང་ནི་དེ་ལྟར་ཕྱོགས་སུ་མ་ཆད་པར་ནད་ཚ་གྲང་གཉིས་ཀའི་སྤྱི་ལ་ཁྱབ་བྱེད་ཀྱི་ཚུལ་དུ་འཇུག་སྟེ། དེ་ཡང་ཉི་མ་སྟེ་ཚ་བའི་ནད་དང་ལྷན་ཅིག་པར་ལྡན་ན་ལུས་སེམས་ཟུངས་རྣམས་བསྲེག་པའི་གྲོགས་བྱེད་ཅིང་ཟླ་བ་སྟེ་གྲང་བའི་ནད་དང་ལྷན་ཅིག་པར་ལྡན་ན་བསིལ་བའི་གྲོགས་བྱས་ནས་མེ་དྲོད་ལ་སོགས་པ་འཇོམས་པར་བྱེད་ལ། མདོར་ན་ལུས་ཀྱི་སྟོད་སྨད་ཕྱི་ནང་མ་ལུས་པ་ཀུན་ཏུ་ཁྱབ་པར་རྒྱུ་ཞིང་ཚ་གྲང་གཉིས་ཀ་རང་བཞིན་དུ་གནས་པའི་དབང་མེད་པར་འཁྲུགས་ཤིང་སློང་བར་བྱེད་པ་སྟེ། དེ་བས་ན་རླུང་ཞེས་བྱ་བའི་ཉེས་པ་འདི་ནི་ཚ་གྲང་གཉིས་ལས་གྱེས་པའི་ནད་ཀྱི་རྣམ་གྲངས་མང་པོར་བཤད་པ་ཀུན་གྱི་ནང་ཚན་མ་ལུས་པ་མེད་པ་ཐམས་ཅད་ཀྱི་རྒྱུའི་གཙོ་བོ་གཅིག་པུ་ཉིད་ཡིན་ནོ་ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་ནད་ཀྱི་རྒྱུ་བསྟན་པའི་ལེའུ་སྟེ་བརྒྱད་པའོ།། །།


 

མཐའ་མའི་འདོན་ཐེངས་།: 05.09.2023 ཉིན། 9:58 AM