ལེའུ་བཞི་པ། བད་ཀན་གྱི་ནད་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག བད་ཀན་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་ལྔ་ཡིས་བསྟན།།

རྒྱུ་ནི་མ་རིག་གཏི་མུག་ལས་བྱུང་བའི། །བད་ཀན་ཐ་མལ་མཚན་ཉིད་བདུན་ལྡན་དེ། །སློང་རྐྱེན་ཁ་མངར་ལྕི་བསིལ་སྣུམ་བསྟེན་དྲགས། །འགྲངས་རྗེས་དལ་བར་བསྡད་དང་ཉིན་གཉིད་ལོག །རླན་སྟེང་ཉལ་དང་ཆུར་ཞུགས་གོས་སྲབ་འཁྱགས། །གྲོ་སྲན་གསར་ཐོག་སེར་ཅན་སུངས་པ་དང༌། །ར་སྐོམ་ཤ་རིད་ཚིལ་བུ་འབྲུ་མར་དང༌། །རྩི་མར་རུལ་པ་ལོ་ཤུར་ལ་ཕུག་རས། །རི་སྒོག་ལ་སོགས་རྗེན་ཟས་མཐའ་དག་དང༌། །མ་ཚོས་པ་དང་ཚིག་པོ་ཁེངས་པོའི་ཟས། །བ་རའི་འོ་མ་ཞོ་དར་ཆུ་གྲང་ཇ། །བཟའ་བཏུང་ཆེས་ཏེ་ཚད་ལས་འདས་པའམ། །སྔ་མ་མ་ཞུ་ཕྱི་མ་ཟོས་པ་ཡི། །རྐྱེན་དེ་རྣམས་ཀྱིས་བད་ཀན་གྲང་ནད་སློང༌།།

དབྱེ་བ་རང་རྒྱུད་ཅན་དང་གཞན་རྒྱུད་ཅན། །རང་རྒྱུད་ཅན་ལ་སྤྱི་དང་བྱེ་བྲག་གཉིས། །སྤྱི་ལ་རིགས་དང་གནས་ཀྱི་དབྱེ་བ་གཉིས། །རིགས་ཀྱི་སྒོ་ནས་དབྱེ་ན་བད་ཀན་ལྷེན། །བད་ཀན་ལྕགས་དྲེག་མེ་དྲོད་ཉམས་པ་དང༌། །བད་ཀན་མགུལ་འགགས་གྲུམ་བུ་དཀར་པོ་དང་། །བད་ཀན་འཇུ་སྐེམ་ནད་དང་རྣམ་པ་དྲུག །གནས་ཀྱི་དབྱེ་ན་ལྤགས་གྲམ་ཤ་ལ་རྒྱས། །རྩར་རྒྱུ་རུས་ཞེན་དོན་བབས་སྣོད་དུ་ལྷུང༌། །དབང་པོ་ལྔ་ལ་མེ་ཏོག་ཤར་བའོ། །དོན་ནི་གློ་སྙིང་མཆིན་མཆེར་མཁལ་མ་ལྔ། །སྣོད་ནི་ཕོ་ལོང་རྒྱུ་མ་མཁྲིས་པ་དང༌། །ལྒང་པ་མངལ་དུ་ཞུགས་དང་རྣམ་པ་དྲུག །དབང་པོ་མགོ་མིག་རྣ་བ་སྣ་ལྕེའོ། །བྱེ་བྲག་ནང་ཚེགས་རྟེན་བྱེད་མྱག་བྱེད་དང༌། །མྱོང་བྱེད་ཚིམ་བྱེད་འབྱོར་བྱེད་རྣམ་པ་ལྔ། །རླུང་དང་མཁྲིས་པར་འདྲེས་པས་བཅུ་རུ་འགྱུར། །བཞི་བཅུ་རྩ་གཅིག་རང་རྒྱུད་དབྱེ་བར་འདོད། །གཞན་རྒྱུད་ཅན་ལ་སེར་པོ་སྨུག་པོ་གཉིས།།

དེ་ཡི་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་སློང་བ་རྒྱུ་ལ་བརྟག་པ་དང༌། །མཚན་ཉིད་རྟགས་ཀྱི་སྒོ་ནས་བརྟག་པ་དང༌། །ཕན་གནོད་གོམས་པའི་སྒོ་ནས་བརྟག་པ་གསུམ། །དང་པོ་སློང་བྱེད་རྒྱུ་ལས་བརྟག་བྱ་ན། །གོང་གི་བད་ཀན་སྐྱེད་པའི་ཟས་སྤྱོད་རྣམས། །བསྟེན་རྗེས་ན་ན་བད་ཀན་ཡིན་པར་བཤད། །ནད་རྟགས་རྩ་ནི་བྱིང་གུད་ཞར་བ་དང༌། །ཆུ་ཡི་མདོག་དཀར་དྲི་དང་རླངས་པ་ཆུང༌། །ཁ་མངལ་ལྕེ་རྙིལ་སྐྱ་ལ་མིག་དཀར་སྐྲངས། །སྣབས་ལུད་མང་ཞིང་མགོ་འཐོམ་ལུས་སེམས་ལྕི། །དང་ག་མི་བདེ་དྲོད་མེད་འཇུ་སྟོབས་ཆུང༌། །མཁལ་རྐེད་མི་བདེ་ལུས་སྦོ་ལྦ་བ་སྐྱེ། །རྩམ་པ་བད་ཀན་སྐྱུག་ཅིང་འཁྲུ་བ་དང༌། །གཏར་ན་ཁྲག་མདོག་དམར་སྐྱ་འབྱར་བག་དང༌། །དྲན་པ་མི་གསལ་གཉིད་ཆེ་སྒྱིད་པ་སྐྱུར། །གཡའ་མཁྲང་ཚིགས་དམ་ཤ་རྒྱས་ལས་མཐའ་རིང༌། །ནམ་ཞོད་སྲོད་དང་སྔ་དྲོ་ཟོས་ཐོག་ལྡང༌། །ཕན་གནོད་ཟས་སྤྱོད་རྩུབ་ཡང་དྲོ་བ་འཕྲོད། །ལྕི་བསིལ་བསྟེན་པས་ཁྱད་པར་ན་ལས་གསལ། །བྱེ་བྲག་རིགས་ཀྱི་སྒོ་ནས་བརྟག་པ་ལ། །དང་པོ་བད་ཀན་ལྷེན་ཞེས་བྱ་བ་ནི། །རྟེན་དང་མ་གོམས་མི་འཕྲོད་ངོ་བོ་བཞིའི། །རྐྱེན་གྱིས་མ་ཞུ་བད་ཀན་བེ་སྣབས་འཕེལ། །བེ་སྣབས་ལྷེན་སྣའི་འོག་ཏུ་ཚོགས་པ་ལ། །ལྷེན་ཞེས་བྱ་སྟེ་ཉམས་ལ་འདྲིལ་སྙམ་བྱེད། །ལྟོང་ངེ་ན་ལ་མནན་ན་འདྲིལ་བ་མེད། །དང་ག་མི་བདེ་ཁ་ཟས་འཇུ་བ་དཀའ། །ཟོས་དུས་ན་ཞིང་ལྟོགས་ན་བདེ་བར་མངོན། །ལྕགས་དྲེག་ཅེས་བྱ་གོང་ལྟར་མ་ཞུ་བས། །བེ་སྣབས་འཕེལ་ཏེ་ཕོ་བའི་ནང་སུལ་ལ། །ལྕགས་དྲེག་ཆགས་པས་ཕོ་བའི་མེ་དྲོད་ཉམས། །སྒྲེག་འཚིང་ཕོ་བ་ཐམས་ཅད་ཧྲེམ་མེ་ན། །དང་ག་མི་བདེ་ཤ་སྐམ་སྡོད་སྙིང་འདོད། །བེ་སྣབས་བད་ཀན་ཁ་ཟས་ཟོས་ཚད་སྐྱུག །བད་ཀན་མེ་ཉམས་གྲང་རླུང་ཤས་ཆེ་ལ། །ཁ་ཟས་འཇུ་དཀའ་བསིལ་ཕྱོགས་ཚད་ལས་ཐལ། །གོས་སྲབ་ལུས་གྲང་ཆུ་ཡི་ལས་མང་བྱས། །ཚད་གཞུག་བསིལ་ཐལ་སྦྱོངས་གཏར་དྲགས་པ་ཡིས། །མཁྲིས་པ་འཇུ་བྱེད་མེ་མཉམ་རླུང་མཐུ་ཉམས། །ལུས་ཀྱི་དྲོད་ཆུང་ཁ་ཟས་འཇུར་མི་འདོད། །སྦོ་འཁྲོག་འཚིང་སྒྲེག་ཁ་ཟས་མ་སྨིན་འཁྲུ། །སྟོབས་ཆུང་ཤ་སྐམ་མཇུག་ཏུ་དམུ་སྐྲན་འགྱུར།  །བད་ཀན་མགུལ་འགགས་ཞེས་པ་ཕོ་བ་དང༌། །བྲང་དང་གློ་བར་བད་ཀན་རྒྱས་པ་ཡིས། །བད་ཀན་རླངས་པ་གློ་ཡུ་མིད་པར་ཆགས། །དཔེར་ན་དོང་བའི་ལོགས་ལ་ཟོ་ཆགས་འདྲ། །དེས་རྐྱེན་མིད་པ་འཆུས་ནས་ཟས་མིད་དཀའ། །དབུགས་རྔུབ་མི་བདེ་ཤ་སྐམས་ལུས་སྟོབས་འཆོར། །ཟས་སྐོམ་མེད་པས་ཕོ་བ་ཆ་ནས་རུབ། །མཇུག་ཏུ་མིད་པ་འགགས་ནས་འཆི་བ་ཡིན། །བད་ཀན་གྲུམ་བུ་དཀར་པོ་ཞེས་བྱ་བ། །མ་ཞུ་རང་གནས་བད་ཀན་འཕེལ་བ་ཡིས། །ཕོ་བ་མཆིན་པ་གང་ཡིན་ཆ་མེད་ན། །ཁ་ཟས་ཅི་ཟོས་མི་ཞིམ་འཁྲུ་སྐྱུག་བྱེད། །ཉྭ་གཞི་མིག་རུས་ན་ཞིང་ཆུ་ཚན་འབྱུང༌། །མཇུག་ཏུ་ཡན་ལག་ལ་བྱེར་གྲུམ་བུར་འགྱུར། །བད་ཀན་འཇུ་སྐེམས་ཞེས་བྱ་འགྲངས་པ་མེད། །སྟོབས་ཆུང་ཤ་སྐམ་གསུས་པ་ཤིན་ཏུ་ཆེ། །བྱིན་པ་འདར་ལ་སྒྱིད་པ་སྐྱུར་བ་ཡིན། །བད་ཀན་ལྤགས་གྲམ་དྲོད་བྲལ་བས་ལྡགས་གཡའ། །ཤ་རྒྱས་དྲོད་མེད་སྦོ་གསོབ་དྲེག་པ་ཆགས། །གཉིད་ཆེ་ལུས་ལྕི་སྒྱིད་སྐྱུར་རྨེན་བུ་འོང༌། །རྩར་ཞུགས་རྩ་རྒྱུད་གྲང་བསིལ་གྱོང་ལ་ལྕི། །རུས་ལ་ཞེན་ན་རུས་པ་གྲང་ཞིང་ན། །ཚིགས་ཁ་གཡོ་ཞིང་བརྐྱང་བསྐུམ་འགྲོ་འདུག་གྱོང༌། །སྙིང་ལ་བབས་ན་དྲན་པ་རྨོངས་པར་བྱེད། །དང་ག་མི་བདེ་སྟོད་རྒྱངས་ལུས་སེམས་ལྕི། །གློར་བབས་སྟོད་རྒྱངས་མགོ་འཁོར་ཟས་མི་འདོད། །བེ་སྣབས་སྔོ་ལྗོབ་མང་དུ་ལུ་བར་བྱེད། །མཆིན་པར་བབས་ན་ཟོས་རྗེས་མཆིན་པ་ན། །སྲིན་བུ་ལྡོག་ཅིང་ཁ་ནས་ཆུ་སྔོན་འཛག །མཆེར་བབས་གཉིད་ཆེ་དབུགས་རྒོད་ཁོང་པ་སྦོ། །རྨྱ་ཞིང་སྒྱིད་པ་སྐྱུར་ལ་ཟས་མདོག་འཁྲུ། །མཁལ་བབས་མཁལ་རྐེད་ན་ཞིང་དྲི་ཆུ་སྲི། །རྣ་བ་འཐིབ་ཅིང་རླན་གྲང་ཁྱད་པར་གནོད། །ཕོ་བར་ལྷུང་ན་ཕོ་བ་མི་བདེ་ལྕི། །བྲང་ཚ་ཆུ་ཚན་འབྱུང་ཞིང་ཟས་མི་འཇུ། །ལོང་ལྷུང་སྦོ་འཁྲོག་བྱེད་ཅིང་ཟོས་ཚེ་ན། །རྒྱུ་མར་ལྷུང་ན་བེ་སྣབས་འཁྲུ་ཞིང་ལྕི། །མཁྲིས་པར་ལྷུང་ན་མིག་སེར་འཇུ་བ་དཀའ། །ལུས་ལྕི་སྒྱིད་པ་སྐྱུར་ལ་གཉིད་དུ་འབྱིང་། །ལྒང་པར་ལྷུང་བས་བད་ཀན་ཟ་ཁུར་འགྱུར། །མངལ་ལྷུང་སྨད་གྲང་ཟླ་མཚན་གཅིན་བག་འཛག །བད་ཀན་མགོ་ལ་ཞུགས་ན་མགོ་བོ་ལྕི། །གཉིད་ཆེ་དང་ག་མི་བདེ་ཡི་ག་འགག །མིག་ལ་ཞུགས་ན་སྐྲངས་ཤིང་མཆི་མ་འཛག །རྣ་བར་ཞུགས་ན་གྲང་ཞིང་ལྕི་ལ་འཐིབ། །སྣ་ལ་ཞུགས་ན་སྣ་འགག་མཚུལ་པ་ལྕི། །ལྕེ་ལ་ཞུགས་ན་ལྕེ་གྱོང་རོ་མི་ཚོར། །བྱེ་བྲག་བད་ཀན་རྟེན་བྱེད་ནད་གྱུར་ན། །དང་ག་མི་བདེ་སྟོད་རྒྱངས་མདུན་རྒྱབ་གཟེར། །བྲང་ཚ་ཆུ་སྐྱུར་འབྱུང་ཞིང་དང་ག་འགག །བད་ཀན་མྱག་བྱེད་འཇུ་དཀའ་བཅུད་མི་ལེན། །ཁ་ཟས་མི་འཇུ་སྒྲེག་ཅིང་ཕོ་བ་གྱོང༌། །མྱོང་བྱེད་ཁ་ཟས་བྲོ་མེད་སྐོམ་དད་ཆུང༌། །ལྕེ་གྲང་མཆུ་ན་སྐད་འཛེར་ཟས་མི་ལེན། །ཚིམ་བྱེད་མགོ་འཁྱོམ་མིག་ཟི་རྣ་བ་འགག །སྦྲིད་པ་སྣབས་མང་ཆམ་འདེབས་མཚོག་མ་ལྕི། །འབྱོར་བྱེད་བརྐྱང་བསྐུམ་དཀའ་ཞིང་ཚིགས་མགོ་སྦོམ། །རྐང་ལག་ལྷུ་ཚིགས་ན་ཞིང་ཚིགས་ཁ་གཡོ། །རླུང་དང་མཁྲིས་པར་གང་འདྲེས་དེ་རྟགས་སྟོན། །བད་ཀན་སེར་པོ་མཁྲིས་པའི་ཁ་ལུད་ཡིན། །རྩ་ནི་དལ་ལ་སྟོང་ཞིང་ཆུ་མདོག་སེར། །ཕོ་བ་ལྟེམ་ཞིང་ཟས་ལ་དང་ག་ཞན། །ཆང་འཐུངས་དྲོས་ཚེ་མཚོག་མ་མིག་རུས་ན། །བྲང་ཚ་ཆུ་སྐྱུར་འབྱུང་ཞིང་མཁྲིས་པ་སྐྱུག །ས་རླན་རུལ་སྐྱུར་ཟོས་རྗེས་འཁྲུ་ཡང་སྲིད། །གྲོ་ཡོས་ར་ཤ་མར་རྙིང་ཆང་སྐྱུར་གནོད། །མཇུག་ཏུ་སྨུག་པོའམ་མཁྲིས་པའི་ནད་དུ་འགྱུར། །བད་ཀན་སྨུག་པོ་ཁྲག་གི་སྙིགས་མ་ཡིན། །ཕོ་མཆིན་རོ་སྟོད་ན་ཞིང་རྒྱ་བཤལ་སྐྱུག །ལུས་ལྕི་སྒྱིད་པ་སྐྱུར་ལ་སྙིང་མི་དགའ། །འགྲངས་ལྟོགས་གྲང་དང་དྲོ་བ་གང་ཡང་གནོད། །དོན་མེད་ན་ཞིང་བྱས་མེད་བདེ་བར་མངོན།།

བཅོས་པའི་ཐབས་ལ་སྤྱི་དང་བྱེ་བྲག་གཉིས། །དང་པོ་བད་ཀན་ངོ་བོ་བསིལ་བའི་ཕྱིར། །སྨན་དཔྱད་ཟས་སྤྱོད་རྣམ་བཞི་དྲོད་དུ་སྤྲུག །ས་འདྲ་གཉེན་པོའི་ཁ་ན་ལྕི་བའི་ཕྱིར། །ལན་རེས་མི་སེལ་ཡུན་དུ་བསྟེན་པ་གཅེས། །དང་པོ་ཟས་ཀྱི་སྒོ་ནས་བཅོས་པ་ནི། །འབྲུ་རྙིང་ཟན་དྲོན་ཆང་ནར་སྨིན་པ་དང༌། །ཆུ་སྐོལ་སྒ་ཆུ་ལུག་དང་ཉ་ཤ་དང༌། །གཡག་རྒོད་བྱ་རྒོད་གཡི་དང་སྤྱང་ཀིའི་ཤ །དྲོ་ཞིང་ཡང་ལ་རྩུབ་པའི་ཟས་སྐོམ་རྣམས། །འགྲངས་ཆེས་མ་ཡིན་འཇུ་སླ་ཉུང་ཟད་བསྟེན། །སྤྱོད་ལམ་མེ་ཉི་དྲོ་ཞིང་གོས་དྲོར་བགོ །སྐམ་སར་ལུས་ངག་རྩོལ་བཅག་གཉིད་མི་ལོག །སློང་བར་བྱེད་རྐྱེན་ཟས་སྤྱོད་དུས་ཀུན་སྤང་། །སྨན་དུ་རྒྱམ་ཚྭ་གསུམ་དང་བཞི་ཐང་བཏང༌། །རྒྱམ་ཚྭ་བྲེ་ག་པི་པི་ལིང་གི་ཐང༌། །ཚ་བ་གསུམ་དང་རྒྱམ་ཚྭའི་ཐང་ལ་སོགས། །བསྡུས་པའི་ཁུ་བ་ཚན་མོ་བཏང་བར་བྱ། །ཕྱེ་མ་སེ་འབྲུ་བཞི་དང་བརྒྱད་པ་དང༌། །ད་ལིས་བདུན་དང་རྒོད་མ་ཁ་རྣམས་སྦྱར། །ཚ་བ་ལྔ་དང་ཁ་རུ་ཚ་ཡི་ཕྱེ། །མ་ཞུ་ལྷེན་དང་ལྕགས་དྲེག་དང་ག་འགྲིབ། །མེ་དྲོད་ཉམས་དང་གྲང་ནད་སྟོང་ལ་ཕན། །སེ་འབྲུ་བཞི་སྟེང་ཟི་ར་ཁ་རུ་ཚྭ། །བཅའ་སྒའི་ཕྱེ་མས་དྲོད་སྐྱེད་ཡི་ག་འབྱེད། །ཟས་འཇུ་སྒྲེག་དང་ཕོ་བའི་ཟུག་གཟེར་འཇོམས། །ཚ་བ་ལྔ་དང་སེ་འབྲུ་བཞི་པ་དང༌། །བྱི་ཏང་ག་དང་རྒྱམ་ཚྭ་ཁ་རུ་ཚྭ། །ཕྱེ་མས་བད་ཀན་གྲང་བ་མ་ལུས་འཇོམས། །ཀུན་ལ་བུར་དཀར་རྟ་སྦྱར་ཆུ་སྐོལ་དབུལ། །སྨན་གྱིས་མགོ་ནོན་རྩ་བ་མ་ཐོན་ན། །གྱེན་ཐུར་གང་ཉེའི་ལམ་ནས་སྦྱང་བར་བྱ།  །དེ་རྗེས་ནད་ལྷག་གང་འཕྲོད་ཕྱེ་མས་གདོན། །དཔྱད་དུ་ཚྭ་དང་བོང་བ་སྤུ་དུགས་བསྟེན། །གྲང་བ་ཤིན་ཏུ་རྒྱས་ན་མེ་ཐུར་བྱ། །བྱེ་བྲག་བཅོས་ཐབས་རིགས་གནས་ནང་ཚེགས་དང༌། །གཞན་དབང་བཞི་ལས་རིགས་ཀྱིས་བཅོས་པ་ནི། །དང་པོ་བད་ཀན་ལྷེན་ལ་ཚ་བ་གསུམ། །རྒྱམ་ཚྭ་ཁ་རུ་ཚྭ་ཡི་བསྐོལ་ཐང་བཏང་། །ཚྭའམ་བོང་བ་བསྲེགས་པའི་དུགས་ཀྱིས་བདུག །དེས་མ་སེལ་ན་ཚྭ་བསྲེག་སྦྱོར་བ་བྱ། །སྨན་རྗེས་སྐྱུགས་དྲང་ལྷེན་གསང་ཁ་གསུམ་བསྲེག །གལ་ཏེ་ལྷེན་དེ་རྒྱ་ཆགས་འདྲིལ་བ་ན། །མནན་ན་སྲ་ཞིང་འཕར་ལ་བཟོད་པ་ཆུང༌། །ཁ་ཟས་ལེན་དུ་མི་སྟེར་ཟོས་ཚད་སྐྱུག །འདི་ཉིད་བད་ཀན་ལྷེན་སྐྲན་ཞེས་བྱ་སྟེ། །ཅོང་ཞི་སོལ་བའི་མེ་ལ་འཚོས་པར་བསྲེག །དར་བར་ངད་བསད་ཐལ་བ་བྱ་རྒོད་བྲུན། །ཨ་རུ་ར་དང་པི་པི་ལིང་དུ་སྦྱར། །ཀ་རས་རྟ་བྱས་ཆུ་སྐོལ་འཕུལ་ལ་བཏང༌། །མ་ཞུ་ལྷེན་སྐྲན་ཐལ་བར་རློག་པར་བྱེད། །ཡང་ན་ཐུན་གསུམ་ཚ་བའི་རིལ་བུས་བཤིག །ཞིག་ནས་ནད་རོ་བཤལ་ལམ་སྐྱུགས་ཀྱིས་སྦྱང༌། །ལྕགས་དྲེག་ཆགས་ན་ཅོང་ཞིའི་ཐལ་སྨན་སྦྱར། །ཡང་ན་ཐལ་སྨན་རྣོན་པོ་བསྟེན་ལ་བརྐོ། །དེ་འོག་བཤལ་སྐྱུགས་སྦྱངས་རྗེས་སེ་འབྲུ་སྦྱར། །ཞི་དཀའ་ཕོ་གསང་མདུན་རྒྱབ་མེ་ཡིས་བསྲེག །མེ་ཉམས་རྒོད་མ་ཁ་ཡི་ཕྱེ་མ་སྦྱར། །སེ་འབྲུ་ཚ་བ་ལྔ་དང་བཟང་པོ་གསུམ༌།  བྱི་ཏང་ག་དང་སྲུབ་ཀ་ཀ་རཉྫ། །རྒྱམ་ཚྭ་ཁ་རུ་ཚྭ་དང་བུ་རམ་སྦྱར། །ཆུ་སྐོལ་འཕུལ་བས་ཕོ་བའི་མེ་དྲོད་སྐྱེད། །རྒྱམ་ཚྭ་ལ་ལ་ཕུད་དང་ཨ་ཟ་མོ། །པི་པི་ལིང་དང་སྒ་རྣམས་རིམ་པས་བསྐྱེད། །ཀུན་དང་མཉམ་པའི་ཨ་རུའི་ཐལ་སྨན་སྦྱར། །མེ་ནི་མངོན་སུམ་ཉིད་དེ་དྲོད་སྐྱེད་མཆོག །ཤིང་ཀུན་ཁ་རུ་ཚྭ་དང་ཚ་བ་གསུམ། །སྒོག་སྐྱ་མར་རྙིང་རེང་བུས་མེ་དྲོད་སྐྱེད། །བཅུ་གཉིས་མེ་མཉམ་གསང་ལ་མེ་ཐུར་བྱ། །བད་ཀན་མགུལ་འགགས་ནད་ལ་ཚ་བ་ལྔ། །བཟང་པོ་བཞི་དང་ཤིང་ཀུན་བྱི་ཏང་ག །རྒྱམ་ཚྭས་སྣ་དྲངས་ཚྭ་སྣ་ཚོགས་ཚད་དང༌། །སྲུབ་ཀ་ལྕེ་ཚའི་ཕྱེ་མ་སྦྲང་རྒོད་སྦྱར། །ཅོང་ཞི་རྒོད་བཏུལ་ཐལ་སྨན་རྣོན་པོ་དང༌། །ནང་ནུབ་ལྟག་པ་སྤྲད་ལ་ཆུ་སྐོལ་དབུལ། །ཉ་ཤ་ཨོལ་གོང་ཚ་བ་ཁོང་དུ་བསྟེན། །སྨན་རྗེས་བཤལ་སྐྱུགས་སྦྲགས་ལ་སྦྱང་བར་བྱ། །ལྷེན་གསང་སྐེ་སྟོང་ཚིགས་པ་བཞི་པ་བསྲེག །བད་ཀན་གྲུམ་བུ་དཀར་པོ་བཅོས་པ་ནི། །རྡོ་འམ་བྱ་བྲ་བསྲོས་པའི་དུགས་ཀྱིས་བདུག །ཤིང་ཀུན་རྒྱ་ཚྭ་དབྱི་མོང་བསྐོལ་ཐང་བཏང༌། །སུག་སྨེལ་རུ་རྟ་རྒྱམ་ཚྭ་པི་པི་ལིང༌། །གླ་རྩི་བྱི་ཏང་ག་ཡི་ཕྱེ་མ་བསྟེན། །སེ་འབྲུ་ཚ་བ་གསུམ་དང་ཨ་རུ་ར། །རྒྱམ་ཚྭ་མ་ནུ་འུ་སུ་ད་ཏྲིག་དང༌། །མ་རུ་ཙེ་དང་བུ་རམ་སྦྲང་སྦྱར་བཏང༌། །ཁྱད་པར་རླན་མེད་དྲོ་སར་བཅག་པ་བསྔགས། །བད་ཀན་འཇུ་སྐེམས་བཅའ་སྒ་ཁ་རུ་ཚྭ། །ཨ་རུ་སྐྱུ་རུ་བུར་དཀར་སྦྱར་ལ་བཏང༌། །སྤྱང་ཚེར་སྐྱུགས་བྱ་ལྷེན་གསང་མེ་ཡིས་བསྲེག །ཀུན་ལ་ཟས་སྐོམ་ཡང་དྲོ་ཆུང་བས་བཅོས། །ལྤགས་གྲམ་ཚ་བ་གསུམ་དང་ཟོ་མར་སྦྱར། །ཉི་མས་བསྲེག་ཅིང་མཉེ་བྱུག་འཐེམ་པར་བྱ། །ཤར་རྒྱས་ཨོལ་གོང་པ་ཡི་ཚ་བ་བཏང༌། །སེ་འབྲུ་བརྒྱད་སྦྱར་ལྟོ་དགུག་རྩོལ་བ་སྤྱད། །རྩར་རྒྱུ་ཚྭ་སྣའི་ཐང་བཏང་མེ་དུགས་བསྟེན། །རུས་ཞེན་བུར་ཆང་ཚ་བ་གསུམ་སྦྱར་བཏང༌། །བྱ་བྲ་བསྲོས་པའི་དུགས་བྱ་བོང་ཤ་བཟའ། །ཟོ་མར་བྱུགས་མཉེ་ཚིགས་དམིགས་གྲང་སར་བསྲེག །གློ་སྙིང་གང་ལ་བབས་ཀྱང་སྐྱུགས་ཀྱིས་དྲངས། །དེ་རྗེས་སེ་འབྲུ་བཞི་པ་གཙོ་བོ་ལ། །སྙིང་ལ་ཛཱ་ཏི་ཤིང་ཀུན་ཁ་རུ་ཚྭ། །གློ་ལ་སྟར་བུ་རུ་རྟ་ཅུ་གང་སྟེ། །སྦྲང་དང་བུར་དཀར་རྟ་བྱས་ཆུ་སྐོལ་དབུལ། །ཡང་ན་སྙིང་ལ་ཛཱ་ཏི་ཚ་བ་གསུམ། །སུག་སྨེལ་ཟི་ར་ནག་པོ་ཀ་ཀོ་ལ། །བུར་དཀར་སྦྱར་བཏང་གློ་ལ་སེ་འབྲུ་དང༌། །ཚ་བ་གསུམ་དང་ཟི་ར་དཀར་ནག་གཉིས། །ཤིང་ཚ་སུག་སྨེལ་བུ་རམ་སྦྱར་ལ་བཏང༌། །དེ་རྗེས་ཚིགས་པ་བཞི་ལྔ་དྲུག་བདུན་བསྲེག །མཆིན་བབས་ཚ་བ་གསུམ་དང་སེ་འབྲུ་དང༌། །ཤིང་ཚ་ཁ་རུ་ཚྭ་དང་གུར་ཀུམ་དང༌། །ཀ་ར་སྦྱར་བཏང་དགུ་པ་མེ་ཡིས་བསྲེག །མཆེར་བབས་སེ་འབྲུ་རྒྱམ་ཚྭ་ཚ་བ་གསུམ། །ཐལ་ཚྭ་ཁ་རུ་ཚྭ་དང་ལྕེ་མྱང་ཚྭ། །བུར་དཀར་སྦྱར་བཏང་བཅུ་གཅིག་མེ་ཡིས་བསྲེག །མཁལ་བབས་ཚྭ་དང་བྱེ་མ་སྤུ་དུགས་བསྟེན། །ཚ་བ་གསུམ་དང་སུག་སྨེལ་རྒྱ་ཚྭ་དང༌། །ལྕམ་པ་སྡིག་སྲིན་གསེར་གྱི་བྱེ་མ་དང་། །འབྲས་སྣ་གསུམ་དང་བུ་རམ་ཆང་གིས་དབུལ། །གསའ་དང་སྤྱང་ཀི་སྲམ་དང་བོང་ཤ་བསྟེན། །རྗེས་ལ་ཚིགས་པ་བཅུ་བཞི་སྤྲ་བས་མནན། །ཕོ་བར་ལྷུང་ན་སེ་འབྲུ་ལྔ་པའམ། །ཁ་རུ་ཚྭ་དང་ད་ཏྲིག་ཤིང་ཀུན་སྦྱར། །རྗེས་ལ་མདུན་རྒྱབ་གང་བབས་གསང་དུ་བསྲེག །རྒྱུ་ལོང་ལྷུང་ན་ཤིང་ཚ་ཚ་བ་ལྔ། །བྱི་ཏང་ག་དང་ཤིང་ཀུན་ཁ་རུ་ཚྭ། །བུ་རམ་སྦྱར་བཏང་མདུན་རྒྱབ་གསང་ལ་བསྲེག །མཁྲིས་པར་ལྷུང་ན་སེ་འབྲུ་བཞི་པ་དང༌། །རྒྱམ་ཚྭ་གསེར་གྱི་མེ་ཏོག་སྒ་སྐྱ་སྦྱར། །སྦྱོངས་བྱ་ཚིགས་པ་དགུ་དང་བཅུ་པ་བསྲེག །ལྒང་པར་ལྷུང་ན་རྒྱམ་ཚྭ་ཚ་བ་གསུམ། །སུག་སྨེལ་ལྕམ་པ་ཆང་དང་སྦྱར་ལ་བཏང༌། །མངལ་ལྷུང་ཐུན་གསུམ་ཚ་བའི་རིལ་བུ་སྦྱར། །དྲོད་དུགས་མེ་བཙའ་ཆང་དང་བོང་ཤ་བསྟེན། །མགོར་ཞུགས་སྐྱུགས་བྱ་སེ་འབྲུ་བརྒྱད་པ་སྦྱར། །མིག་ལ་ར་གན་དུད་བྱུགས་ཉ་ཤ་བཏང༌། །རྣ་བར་ཞུགས་ན་ཤིང་ཀུན་རྒྱ་ཚྭ་བླུག །སྣ་ལ་སྣ་སྦྱོང་དུད་པ་རྣོན་པོས་བདུག །ལྕེ་ལ་ཞུགས་ན་ཚ་བའི་མཁུར་བཀང་བཅང༌། །བྱེ་བྲག་ནང་ཚེགས་བད་ཀན་རྟེན་བྱེད་ལ། །སྤྱང་ཚེར་སྐྱུགས་བྱ་སེ་འབྲུ་ལྔ་པའམ། །ཅོང་ཞི་དྲུག་སྦྱར་ཚིགས་པ་བརྒྱད་པ་བསྲེག །མྱག་བྱེད་སེ་འབྲུ་རྒྱམ་ཚྭའི་ཏྲེས་སམ་སྦྱར། །བཅུ་གསུམ་དགུ་པ་ཕོ་གསང་གང་རིགས་བསྲེག །མྱོང་བྱེད་ནད་ལ་འབྲས་བུ་གསུམ་ཐང་བཏང།། །སྟར་བུ་སྒེ་གཤེར་ཤིང་མངར་འབྲས་བུ་གསུམ། །སྦྲང་དང་སྦྱར་བཏང་སྐེ་སྟོང་དང་པོ་བསྲེག །ཚིམ་བྱེད་སྐྱུགས་བྱ་སྣ་སྨན་བཞི་པ་བཏང༌། །མཚོག་མའི་གསང་དབྱེ་འདུས་སོ་གསུམ་དུ་བསྲེག །འབྱོར་བྱེད་ཨ་རུའི་(གླ་རྩི་སྒ་བོ་ཆེ་བོང་ཁྲག་)ཕྱེ་མ་བཏང་བར་བྱ། །ཐལ་ཀ་རྡོ་རྗེ་ཟོ་མར་བསྐུ་མཉེ་དང༌། །ཆུ་སེར་མེར་སར་རྔབས་རུ་མེ་ཐུར་བྱ། །རླུང་མཁྲིས་གང་འབྲེལ་དེ་ཡི་གཉེན་པོ་བསྟེན། །གཞན་དབང་ཅན་གྱི་བད་ཀན་སེར་པོ་ལ། །ཆ་མཉམ་བཞི་ཐང་སེ་འབྲུ་བརྒྱད་པ་སྦྱར། །གསེར་ཕུད་སྐྱུགས་དང་མ་ནུའི་(ཨ་རུ་སླེ་ཏྲེས་ཀཎྜ་ཀ་རི་སྒ་དོང་ག་ལྕུམ་རྩ་)དྲོད་བཤལ་བཏང༌། །གསེར་མདུང་གཏར་ཞིང་ཅོང་ཞི་དྲུག་པ་སྦྱར། །ཤ་གསར་མར་གསར་བ་མཛོའི་འོ་མ་བསྟེན། །བད་ཀན་སྨུག་པོ་སེ་འབྲུ་བསེ་ཡབ་དང༌། །སྟར་བུ་སྐྱུ་རུ་ར་དང་སྒ་སྐྱ་དང༌། །མ་ནུ་འུ་སུ་ཨུཏྤལ་པི་པི་ལིང༌། །ཀ་ར་སྦྱར་ལ་ཆུ་སྐོལ་འཕུལ་ལ་བཏང༌། །སྤྱིར་ན་བད་ཀན་ལྕི་རྟུལ་བསིལ་བའི་ཕྱིར། །ཁོང་ནད་ཀུན་གྱི་རྩ་བ་བད་ཀན་བྱེད། །ཤ་ལྤགས་རྩ་ཚིགས་ཕྱི་རུ་བྱེར་བ་ཉུང༌། །རང་གི་གནས་ལས་གཞན་དུ་ཞུགས་པ་དཀོན། །ཕལ་ཆེར་མ་ཞུ་ཕོ་བར་རྒྱས་པའི་ས། །དེ་ཕྱིར་ཕོ་བའི་ཁ་འཛིན་གཅེས་པ་ཡིན། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བད་ཀན་གྱི་ནད་བཅོས་པའི་ལེའུ་སྟེ་བཞི་པའོ།། །།


 

མཐའ་མའི་འདོན་ཐེངས་།: 20.12.2022 ཉིན། 2:59 PM