ལེའུ་བདུན་པ། ལུས་ཀྱི་འཇིག་ལྟས་བསྟན་པ།

ལུས་ཀྱི་ལས་དང་དབྱེ་བ་བསྟན་ཟིན་པའི་རྗེས་ཐོག་དེ་མ་ཐག་པ་དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །དེ་ཡང་ཀྱེ་ཞེས་བོས་ནས། དྲང་སྲོང་ཆེན་པོ་ཡིད་ལས་སྐྱེས་ལེགས་པར་ཉོན་ལ་ཡིད་ལ་ཟུངས་ཤིག་དང་ངས་བཤད་པར་བྱའོ་ཞེས་གདམས་ནས། མངལ་དུ་ཆགས་པ་ལ་སོགས་པ་ལུས་ཀྱི་གནས་སྐབས་ཕལ་ཆེར་བརྗོད་ཟིན་ནས། །ད་ནི་ལུས་འདི་ཉིད་ཀྱི་མཐར་འཇིག་པའི་ལྟས་བསྟན་པ་ལ་རྣམ་པ་བཞིར་ངེས་པ་ཡིན་ཏེ། གང་ཞེ་ན་རིང་བའི་ལྟས་དང༌། ཉེ་བའི་ལྟས་དང༌། མ་ངེས་པའི་ལྟས་དང༌། ངེས་པའི་ལྟས་རྣམས་སོ། །དེ་ཡང་ལུས་འཇིག་པའི་ལྟས་ལ་རྣམ་པ་གསུམ་དུ་ཡོད་པ་ལས། 

དང་པོ་རིང་བའི་ལྟས་ལའང་ཕོ་ཉའི་ལྟས་དང༌། རྨི་ལམ་གྱི་ལྟས་དང༌། རྣམ་འགྱུར་གྱི་ལྟས་ཏེ་རྣམ་པ་གསུམ་དུ་ཡོད་པའོ།།

སྨན་པས་ནད་པ་བལྟ་བ་ལ་འགྲོ་བའི་ཐོག་མར་རྟེན་ཅིང་འབྲེལ་བ་བྱུང་གི་སྔ་ལྟས་བཟང་ངན་འདི་རྣམས་ཤེས་པར་བྱ་དགོས་ཏེ། དེ་ཡང་ནད་པའི་ས་ནས་ཕོ་ཉ་ཡ་མཚན་ཅན་ཞེས་བྱ་བ་མུ་སྟེགས་ཕྱི་རོལ་པའི་བརྟུལ་ཞུགས་ལ་གནས་པའི་མིང་ཡིན་ཡང་ཕྱོགས་འདིར་དེ་ལྟར་མི་འབྱུང་ལ་འོན་ཀྱང་དེ་དང་ཕྱོགས་འདྲ་བའི་རིགས་ཅན་འབྲུག་ལུགས་ཀྱི་རྟོག་ལྡན་རྦད་མགོ་དང་དྲྭ་ཕད་རྐང་གླིང་རུས་རྒྱན་སོགས་ཐོགས་པ་རྣམས་དང༌། དགེ་སྦྱོང་སྟེ་ཤཱཀྱ་ཐུབ་པའི་རྗེས་སུ་སྤྱོད་པའི་རབ་ཏུ་བྱུང་བ་དང༌། བོད་འདིར་མངའ་བདག་ཁྲི་སྲོང་ལྡེ་བཙན་གྱི་དུས་མཆོད་གནས་སྡེ་གཉིས་ཀྱི་གོས་དཀར་ལྕང་ལོའི་སྡེ་རྣམས་དང༌། གལ་ཏེ་དེ་གཉིས་མིན་ཡང་དེ་དང་རིགས་མཐུན་པ་ཆ་ལུགས་བཙུན་པར་བཅོས་པའི་རང་ཉིད་དད་པ་འདྲེན་པ་རྣམས་དང༌། སྐྱེ་བོ་ཡིན་ཡང་གཟུགས་དང་ལང་ཚོ་སྐྱོན་མེད་ཅིང་གཙང་སྦྲ་དང་ལྡན་པ་རྣམས་དང༌། བཞོན་པ་ཡོད་པའི་ཚེ་ནའང་ཁ་དོག་དང་རྒྱན་ཕུན་སུམ་ཚོགས་ཤིང་ཆ་ཤས་ལ་སྐྱོན་མེད་པར་བྱུང་བ་རྣམས་ནི་དགེ་སྟེ། ནད་པ་དེ་ཉིད་ཚེགས་མེད་པར་གསོས་པའི་རྟགས་ཡིན་ལ། དེ་ལས་ལྡོག་པའི་བུད་མེད་མ་ནིང་དང་དམེ་ཅན་དང༌། ལུས་ཀྱི་ཡན་ལག་དང་དབང་པོ་ཉམས་པ་ལ་སོགས་པ་དང༌། བོང་བུ་དང་དྲེའུ་རྔ་མོ་མ་ཧེ་སོགས་ཞོན་ནས་འོངས་པ་རྣམས་ཀྱིས་ནད་པ་གསོ་བའི་དོན་འགྲུབ་པར་མི་འགྱུར་ཏེ་མི་དགེ་ཞིང༌། གོང་གི་ཡ་མཚན་ཅན་ལ་སོགས་པ་རྣམས་དང་རིགས་མཐུན་པའི་ཕོ་ཉ་དང་ལྡན་ཡང༌། འཇིགས་ཤིང་སྐྲག་པས་ཉེན་པ་དང༌། རིང་བས་རྟབ་རྟབ་པོར་གྱུར་པ་དང༌། དེ་བཞིན་དུ་དངངས་ཤིང་དབུགས་ཀྱིས་བརྩེགས་པ་དང༌། ལག་ཏུ་རྡོ་དང་ཤིང་དང་བོང་བ་ལ་སོགས་པ་དོན་མེད་བཞིན་དུ་ཉེད་པ་དང༌། ཐག་རིང་པོ་ནས་འབོད་ཅིང་མི་དགེ་བ་བཅུ་ལས་གང་ཡང་རུང་བའི་སྡིག་པའི་ལས་ལ་ལོངས་སྤྱོད་ཅིང་འོང་བ་དང༌། གཞན་ཡང་ཕོ་ཉ་དེ་ཉིད་ཀྱི་མིང་བཀྲ་མི་ཤིས་པའི་རིགས་དང་མཚོན་ཆ་དང་དབྱུག་པ་ལ་སོགས་པ་ལག་ཏུ་ཐོགས་ཤིང་མེ་ཏོག་དམར་པོ་དང༌། ལུང་མ་བསྟན་གྱི་རྒྱན་སྣ་ཚོགས་པས་བརྒྱན་པ་དང༌། ངག་གི་སྨྲ་བརྗོད་དང་གཞན་ལ་སྨོད་ཅིང་ངུ་དངང་ལ་སོགས་པ་བྱེད་པ་སྟེ། དེ་ལྟ་བུའི་ཕོ་ཉ་བ་ནི་མི་ཤིས་པའི་ལྟས་ཡིན་པས་ནད་པ་གསོ་བའི་ལས་མི་འགྲུབ་སྟེ་འགྲོ་བར་མི་བྱའོ།།

གཞན་ཡང་ཟླ་ཟེར་ལས། ཡ་མཚན་ཅན་ནི་བརྟུལ་ཞུགས་ཀྱི་བྱེ་བྲག་ལ་གནས་པའི་ཕྱི་རོལ་པའོ། །དགེ་སྦྱོང་ནི་རབ་ཏུ་བྱུང་ཞིང་ཚངས་པར་སྤྱོད་པའོ། །རིགས་མཐུན་པ་ནི་རིགས་འདྲ་བ་སྟེ་དེ་ལྟ་བུའི་ཕོ་ཉ་འོང་བར་གྱུར་ན་གསོ་བའི་ལས་འགྲུབ་པར་འགྱུར་བ་ཡིན་ནོ། །དེ་ལས་གོ་ལྡོག་པ་སྟེ་ཡ་མཚན་ཅན་ལ་སོགས་པའི་ཕོ་ཉ་དེ་ལས་གོ་ལྡོག་ཅིང༌། རིགས་མི་མཐུན་པ་ཡིན་ན་གསོ་བའི་ལས་མི་འགྲུབ་ཅིང༌། དོན་མེད་པའི་མཚན་མ་ཡིན་ནོ། །དམན་དང་འཇིགས་རིང་དངངས་པ་དང༌། །རྩུབ་དང་བཀྲ་མི་ཤིས་སྨྲ་དང༌། །མཚོན་ཆ་དབྱུག་ཏོ་མགོ་རེག་དང༌། །མ་ནིང་སྨ་ར་རལ་པ་ཅན། །བཀྲ་མི་ཤིས་པའི་མིང་དང་ལྡན། །སྡིག་ལས་བུད་མེད་དྲི་མ་ཅན། །མང་པོ་ནད་པ་མི་སྡུག་དང༌། །ཕྲེང་བ་བྱུག་པ་དམར་པོས་བརྒྱན། །ཏིལ་དམར་འདམ་བསྐུས་གོས་རྙིང་དང༌། །མདོག་ངན་རླན་ཅན་གོས་གཅིག་གྱོན། །བོང་བུ་རྔ་མོ་མ་ཧེ་ཞོན། །ཤིང་དང་བོང་བ་ཉེད་པ་དང༌། །རིང་ནས་འབོད་ཅིང་ཕོ་ཉ་འོངས། །སྨན་པས་ཡོངས་སུ་སྤང་བར་བྱ། །ཞེས་བྱ་བ་ལ་ཕོ་ཉ་རིགས་མཐུན་པ་ཡིན་དུ་ཟིན་ཀྱང༌། འདི་ལྟར་དམན་པ་དང་འཇིགས་པ་ལ་སོགས་པའི་ཁྱད་པར་གྱིས་ཕྱེ་བ་ཡིན་ན། སྨན་པས་འགྲོ་བར་མི་བྱ་སྟེ། །དེ་དག་ནི་གསོ་བ་དོན་མེད་པར་འགྱུར་བའི་ལྟས་ཡིན་ནོ། །དེ་ལ་དམན་པ་ནི་ཞུམ་ཞིང༌། ཡི་མུག་པ་དང་བཅས་པ་ཡིན་ནོ། །འཇིགས་པ་ནི་སྐྲག་པའོ། །རིང་བ་ནི་དྲག་ཏུ་འོངས་པའོ།  །དངངས་པ་ནི་སྦྲུལ་ལ་སོགས་པས་དངངས་ཤིང་བྲེད་པའོ། །རྩུབ་པ་ནི་སྙིང་རྗེ་མེད་པར་སྨྲ་བའོ། །བཀྲ་མི་ཤིས་པར་སྨྲ་བ་ནི་ཡིད་དུ་མི་འོང་བའི་ཚིག་མི་ཤིས་པར་སྨྲ་བའོ། །མཚོན་ཆ་ཐོགས་པ་ནི་དགྲ་ཆ་ཐོགས་པའོ། །དབྱུག་ཏོ་ཐོགས་པ་ནི་དབྱུག་པ་འཆང་བའོ། །མགོ་རེག་ནི་སྐྲ་བྲེགས་པའོ། །མ་ནིང་ནི་བུ་ཚ་མེད་པའོ། །སྨ་ར་དང་རལ་པ་ཅན་ནི་སྨ་ར་འཆང་བ་དང་རལ་པ་སྐྲ་བཅིངས་པ་དང་ལྡན་པའོ། །བཀྲ་མི་ཤིས་པའི་མིང་དང་ལྡན་པ་ནི་སྡིག་ཅིང་མི་ཤིས་པའི་མིང་དང་ལྡན་པའོ། །སྡིག་པའི་ལས་ཅན་ནི་ཉེས་པར་སྤྱོད་པའི་ལས་བྱེད་པའོ། །བུད་མེད་ནི་མོ་རིགས་སོ། །དྲི་མ་ཅན་ནི་གོས་དྲི་མ་ཅན་གྱོན་པའོ། །མང་པོ་ནི་ཅིག་ཅར་དུ་མ་འོངས་པའོ། །ནད་པ་ནི་ནད་ཀྱིས་ཉམ་ཐག་པའོ། །མི་སྡུག་པ་ནི་ཡན་ལག་མི་མཛེས་པའོ། །ཕྲེང་བ་དང་བྱུག་པ་དམར་པོས་བརྒྱན་པ་ནི་མེ་ཏོག་དམར་པོའི་ཕྲེང་བ་དང་བྱུག་པ་དམར་པོས་ལུས་བརྒྱན་པའོ། །ཏིལ་མར་འདམ་བསྐུས་ནི་ཏིལ་མར་གྱི་ལྡེ་གུ་འདམ་འདྲ་བས་ལུས་ལ་བྱུགས་པའོ། །གོས་རྙིང་པ་ནི་དེངས་པའོ། །མདོག་ངན་པ་ནི་ཁ་དོག་ངན་པའོ། །རླན་ཅན་ནི་ཆུས་བངས་པའོ། །གོས་གཅིག་གྱོན་པ་ནི་སྟོད་གཡོགས་སམ་སྨད་གཡོགས་གཅིག་གྱོན་པའོ། །བོང་བུ་དང་རྔ་མོ་མ་ཧེ་ཞོན་པ་ནི་དེ་ལ་ཞོན་ཏེ་འོངས་པའོ། །ཤིང་དང་བོང་བ་ལ་སོགས་པ་ཉེད་ཅིང་འཇིགས་པ་དང༌། དེ་བཞིན་དུ་ཐག་རིང་བ་ནས་འབོད་ཅིང་ཀུ་ཅོས་འབོད་པའི་ཕོ་ཉ་འོང་ན་སྨན་པས་འགྲོ་བར་མི་བྱའོ། །དེ་སྤང་ཞིང་དོར་བར་བྱའོ་ཞེས་དང༌། ཡ་མཚན་ཅན་ཞེས་པ་མུ་སྟེགས་པ་ལ་ཟེར་བའི་རྒྱུ་མཚན་ཡང༌། དེ་ཁོ་ན་ཉིད་རབ་ཏུ་མི་གནས་པའི་རྒྱུད་ལས། རྟག་པ་དང་ནི་ཆད་སྨྲ་བ། །དཔྱོད་པ་དང་ནི་བྱེ་བྲག་པ། །གཟེགས་ཟན་པ་དང་ཀུན་དུ་རྒྱུ། །ཞི་བ་དང་ནི་ཡ་མཚན་ཅན། །ཐོས་པ་པ་དང་ཕྱུགས་བདག་པ། །གོས་མེད་གཅེར་བུ་ཟད་བྱེད་པ། །མཆོད་འོས་བརྟུལ་ཞུགས་ཆེན་པོ་པ། །རེངས་བྱེད་བུ་ཡི་བརྟུལ་ཞུགས་དང༌། །ཤ་རུའི་བརྟུལ་ཞུགས་རི་བོང་བདག །རྨ་བྱའི་བརྟུལ་ཞུགས་དབྱུ་གུ་གསུམ། །གང་གྷ་ཏ་ཡི་བུ་ཀུན་རྒྱུ། །སྨྲ་འདོད་བུ་མོ་རྒྱལ་བ་ཅན། །མི་ཕམ་སྐྲ་ཡི་རལ་བ་དང༌། །ཀཏྱྰ་དང་ནི་ནག་ནོག་ཅན། །གཅེར་བུ་དབྱིག་གཉེན་གྱི་བུ་དང༌། །འདི་དག་ཕྱི་རོལ་འགྲོ་བར་བལྟ། །ཞེས་གསུངས་པ་ལྟར་རོ།།

དུས་ཀྱི་རྟགས་ནི་སྨན་པ་དེ་ཉིད་སེམས་རྩུབ་ཅིང་ཁོང་ཁྲོ་སྐྱེས་པ་དང༌། །ངག་ནས་མི་ཤིས་པའི་གཏམ་སྨྲ་བ་དང༌། ཤིང་ལ་སོགས་པ་དུམ་བུར་གཅོད་ཅིང་དངོས་པོའི་གཟུགས་འགའ་ཞིག་བཤིག་སྟེ་ཉམས་པར་བྱེད་པ་དང༌། །མཚུན་གཏོར་ཞེས་པ་ཕ་མེས་ཤི་བའི་དོན་དུ་གཏོར་མ་འབའ་ཞིག་གཏོང་བ་དང༌། དེའི་དོན་དུ་སྦྱིན་སྲེག་བྱེད་པ་སྟེ་དེ་རྣམས་སྨན་པས་བྱེད་པའི་དུས་སུ་ཕོ་ཉ་འོངས་པའང་ནད་པ་འཆི་བའི་ལྟས་ཡིན་ལ། གཞན་ཡང་ཚེས་དྲུག་དང་བཞི་དང་དགུ་དང་ཉི་ཟླ་གཟས་ཟིན་དུས་སུ་དང༌། སྒྲ་གཅན་དང་མཇུག་རིང་ཞེས་གདོང་མཇུག་གནས་པའི་སྐར་མ་འཆར་བ་དང༌། བྲ་ཉེ་སྐག་ལ་སོགས་པ་གཟའ་སྐར་ངན་པའི་ཉིན་ཞག་གི་དུས་དང༌། མཚན་མོ་དང་དེ་མིན་ཀྱང་ནམ་ཉིན་ཕྱེད་ལྟ་བུ་ལ་ནད་པ་གསོ་བའི་ཕྱིར་ལམ་དུ་འཇུག་པ་ངན་པ་ཡིན་པས་སྤང་བར་བྱའོ།།

གཞན་ཡང་ཟླ་ཟེར་ལས། སྨན་པས་ཕོ་ཉ་འོང་བའི་ཚེ་བཀྲ་མི་ཤིས་པའི་དངོས་པོ་ཡིད་ལ་སེམས་སམ། ཁ་ནས་སྨྲ་བའམ། གཅེར་བུར་འདུག་ཅིང་གོས་མེད་པར་འདུག་པའམ། རྩྭ་ལ་སོགས་པ་གཅོད་པའི་སྐབས་སུའམ། བོང་བ་ལ་སོགས་པ་འཇིག་པའི་སྐབས་སུའམ། མཚུན་གཏོར་མེ་ལ་བསྲེག་ཅིང་གནས་པའམ། ཡང་ཤི་བ་རྣམས་ལ་མཚུན་གཏོར་སྟེར་ཞིང་གཏོང་བའི་སྐབས་སམ། ས་ལ་ཉལ་ཞིང་གནས་པ་དང༌། སྐྲ་བཤིག་ཅིང་བཀྲོལ་བའམ། མར་གྱིས་ལུས་བསྐུད་ཅིང་འཇུག་པའམ། ངུ་ཞིང་མྱ་ངན་བྱེད་པའམ། མ་བསྡམས་ཤིང་མི་གཙང་བར་གནས་པའི་སྐབས་སུ་ཕོ་ཉ་འོངས་པར་གྱུར་ན་ནད་པ་དེ་འཆི་ཞིང་སྲོག་འདོར་བར་སྟོན་པའི་ལྟས་ཡིན་ནོ། །ནད་དང་མཚན་ཉིད་མཚུངས་པ་ཡི། །ཡུལ་ལམ་དུས་སུ་སྨན་པ་གནས། །བང་ཆེན་འབོད་དུ་འོངས་པ་ན། །ནད་པ་དེ་ནི་གསོ་མི་བྱ། །ཞེས་བྱ་བ་ལ་ནད་པ་རིམས་ལ་སོགས་པ་གང་དག་གིས་ན་བ་དང༌། ཡོན་ཏན་ནམ་མཚན་ཉིད་འདྲ་ཞིང་མཚུངས་པའི་ཡུལ་ཁམས་དུས་ཏེ། དེ་ལྟ་བུའི་ཡུལ་ལམ་དུས་དེའི་དུས་སུ་སྨན་པ་གནས་ཤིང་འདུག་པ་ན་བང་ཆེན་ནམ་ཕོ་ཉ་སྨན་པ་ལ་འབོད་ཅིང་སྦྲོན་དུ་འོངས་པ་མཐོང་ན་ནད་པ་དེ་སྨན་པས་བཅོས་ཤིང་གསོ་བར་མི་བྱའོ། །ནད་དང་ཡུལ་དུས་མཚུངས་པའི་ཚུལ་ནི་འདི་ལྟར་བད་ཀན་ལས་བྱུང་བའི་རིམས་ལ་སོགས་པའི་ནད་ཀྱིས་བཏབ་པའི་ཕོ་ཉ་སྨན་པ་ཆུ་མང་ཞིང་རླན་ཅན་གྱི་ཡུལ་ན་གནས་པའམ། ནང་པར་གྱི་དུས་སྐབས་སུ་ཕོ་ཉ་འོངས་ན་མི་ཤིས་པ་ཡིན་ནོ། །མཁྲིས་པའི་ནད་ལ་མེ་ལ་སོགས་པ་ཚ་བའི་ཡུལ་དང་ཉི་མ་ཕྱེད་ཙམ་དུས་སུ་ཕོ་ཉ་འོངས་ན་མི་ཤིས་པ་ཡིན་ནོ། །རླུང་གི་ནད་ལ་ནི་རྩུབ་པ་དང་གྲང་བ་དང་རྡོ་དང་བྱེ་མ་དང་གསེག་མ་ལ་སོགས་པའི་ཕྱོགས་སུ་དགོང་ག་ཕོ་ཉ་འོངས་ན་མི་ཤིས་པ་ཡིན་ནོ། །ལྟེ་བ་ཁ་དང་སྣ་རེག་དང༌། །སྐྲ་དང་སྤུ་དང་སེན་མོ་སོ། །མཚན་རྒྱབ་ནུ་མ་མགྲིན་པ་དང༌། །ལྟོ་དང་སྲིན་ལག་དག་དང་ནི། །རས་བལ་ཕུབ་མ་ཞ་ཉེ་རྩྭ། །རུས་པ་གཏུན་བརྡུང་ཕྱགས་མ་རྡོ། །ཞིབ་མ་གོས་ཀྱི་ཐ་མ་དང༌། །ཐལ་བ་སོལ་བ་ཁ་ཚར་སོབ། །ཐག་པ་གཏུན་དང་ཞགས་པ་སྲང༌། །གཞན་ཡང་ཐོག་གི་ཆག་པ་ཐོགས། །ཕོ་ཉ་དེ་འདྲ་མངོན་དུ་མཐོང༌། །འཆི་བ་དག་ཏུ་སྟེན་པ་ཡིན། །ཞེས་བྱ་བ་ལ་ཡང་ཕོ་ཉ་དེ་ཉིད་མཚན་ཉིད་འདི་དག་དང་ལྡན་པ་ཡང་མི་ཤིས་ཤིང་འཆི་བའི་མཚན་མ་ཡིན་པར་སྟོན་ཏེ། དེས་ན་དེའི་ཚེ་ཕོ་ཉ་གང་དག་འོངས་པ་ལྟེ་བ་ལ་སོགས་པ་ལ་རེག་པ་ནི་མི་ཤིས་པ་ཡིན་པས་དེ་སྤང་བར་བྱའོ། །དེ་བཞིན་མཚན་ཕྱེད་ཉི་མ་གུང༌། །ཐུན་མཚམས་དང་ནི་དུས་ཚིགས་དང༌། །ཚེས་དྲུག་ཚེས་བཞི་ཚེས་དགུ་དང༌། །སྒྲ་གཅན་མཇུག་རིངས་འཆར་དུས་སོགས། །བྲ་ཉེ་སྨིན་དྲུག་སྐག་ཆུ་སྟོད། །གྲེ་དང་ཁྲུམས་སྟོད་སྣྲུབས་དང་ནི། །གང་དུ་ཕོ་ཉ་ནད་པ་ཡི། །མཚན་ཉིད་ལ་ནི་བརྟེན་པའི་ཚིག །མི་དགེ་སྨྲ་དང་མི་ཤིས་མཐོང༌། །དེར་ནི་སྨན་པ་འགྲོ་མི་བྱ། །ཞེས་བྱ་བ་ལ་ཡང་དེ་བཞིན་དུ་སྨན་པ་ནད་པའི་གམ་དུ་འགྲོ་བ་ན་མཚན་ཕྱེད་ལ་སོགས་པའི་དུས་དང༌། །ཚེས་དྲུག་ལ་སོགས་པའི་ཚེས་གྲངས་གསུམ་དང༌། སྒྲ་གཅན་མཇུག་རིང་འཆར་བའི་དུས་དང༌། སོགས་པ་ཞེས་བྱ་བ་ནི་ཉི་མ་དང་ཟླ་བ་གཟས་ཟིན་པ་མཐོང་བའི་དུས་དང༌། བྲ་ཉེ་ལ་སོགས་སྐར་མ་ལ་བབ་པའི་ཞག་ལ་སྨན་པས་འགྲོ་བར་མི་བྱའོ། །ཡང་གནས་གང་དུ་ཕོ་ཉ་འོངས་པ་དེ་ནད་པའི་མཚན་ཉིད་དམ་རང་བཞིན་ལ་བརྟེན་པའི་ཚིག་གཟུགས་སྒྲ་ལ་སོགས་པ་མི་ཤིས་པའི་རྣམ་པར་སྨྲ་བ་དང༌། མི་ཤིས་པ་མཐོང་བར་གྱུར་ན་སྨན་པས་ནད་པ་གསོ་བའི་ཕྱིར་འགྲོ་བར་མི་བྱའོ་ཞེས་པ་ལྟར།

ནད་པ་འགའ་ཞིག་གསོ་བའི་དོན་དུ་ཕོ་ཉ་དང་བཅས་ཏེ་འགྲོ་བའི་ཚེ་ལམ་དུ་ཐག་པ་སོགས་ཆད་པ་དང༌། དངོས་པོ་འགའ་ཞིག་མེས་ཚིག་པ་དང༌། རྫ་ལ་སོགས་པ་ཁ་ཅིག་ཆག་པ་དང༌། མི་འགའ་ཞིག་ངུ་བ་དང༌། བསད་དོ་བཅོམ་མོ་ཞེས་སོགས་ཀྱི་སྨྲེ་སྔགས་སྨྲ་བ་ཐོས་པ་དང་མཐོང་བ་དང༌། བྱི་ལ་དང་སྤྲེའུ་དང་སྲམ་དང་སྦྲུལ་ལ་སོགས་པས་ལམ་བཅད་ཅིང༌། གཞན་ཡང་བཀྲ་མི་ཤིས་པའི་མཚན་མ་ཅན་གང་མཐོང་བར་གྱུར་ཀྱང་ངན་ཏེ་ནད་པ་མི་འཚོ་བའི་ལྟས་ཡིན་ནོ།།
གཞན་ཡང་ཟླ་ཟེར་ལས། དབང་པོ་མ་ཚང་བ་ལ་སོགས་པའི་ཚིག་མི་ཤིས་པ་འདི་དག་གམ། གཞན་ཡང་འདི་དང་ཆ་འདྲ་བ་དག་དང༌། ཀྱི་ཧུད་ཀྱི་ཧུད་ཅེས་བྱ་བ་ལ་སོགས་འོག་ནས་བཤད་པའི་ཚིག་འདི་དག་གམ། མདོར་ན་ནད་པ་ལ་བརྟེན་པའི་ཚིག་མི་ཤིས་པ་སྟོན་པར་བྱེད་པ་མདུན་དུ་སྨྲ་ཞིང་འོངས་པའམ། ཡང་ན་ནད་པའི་ཚིག་གླེང་བའི་སྐབས་མི་ཤིས་པ་ཟེར་བའི་ཕོ་ཉ་འོངས་ཤིང་དེ་ཉིད་ཀྱི་ཚེ་བང་ཆེན་ལྷགས་ན་བང་ཆེན་དེའི་བདག་པོ་ནད་པ་གསོ་བར་མི་བྱ་སྟེ། དེ་ལ་འདིར་དབང་པོ་མ་ཚང་བ་ནི་མིག་ལ་སོགས་པའི་དབང་པོ་གང་ཡང་རུང་བ་ཉམས་པ་སྟེ་ཞར་བ་དང་ཞ་བོ་ལ་སོགས་པའོ། །མི་རོ་ནི་མི་ཤི་བའོ། །མི་རུས་ཀྱིས་བརྒྱན་པ་ནི་མི་རུས་དང་དེའི་ཁྲག་དང་གོས་ལ་སོགས་པས་བརྒྱན་པའོ། །ཆད་པ་ནི་ཐག་པ་ལ་སོགས་པའོ། །ཚིག་པ་ནི་གོས་ལ་སོགས་པའོ། །ཉམས་ཤིང་ཆག་པ་ནི་སྣོད་སྤྱད་ལ་སོགས་པའོ། །དེའི་ཚིག་ཏུ་སྨྲ་བ་ནི་ཆད་དོ་ཚིག་གོ་ཉམས་སོ་ཞེས་བྱ་བ་ལ་སོགས་པ་སྨྲ་བའོ། །རོ་ཚ་བ་ནི་ན་ལེ་ཤམ་ལ་སོགས་པའོ། །རུལ་པ་ནི་མི་རོ་ལ་སོགས་པའི་དྲིའོ། །དེ་བཞིན་དུ་རེག་བྱ་ནི་རྒྱ་ཆེ་ཞིང་ཡངས་པ་དང༌། མི་བཟད་ཅིང་བཟོད་པར་དཀའ་བ་དང༌། གཞན་ཡང་དེ་དང་ཆ་འདྲ་བའི་ཚིག་དག་སྨྲ་ན་དེ་གསོ་བར་མི་བྱ་ཞིང་སྨན་པ་འགྲོ་བའི་ཚེ་ལམ་དུ་ཀྱི་ཧུད་ཅེས་སྨྲ་བ་ལ་སོགས་པ་ཐོས་ཤིང་མཐོང་ན་ཡང་མི་ཤིས་པ་ཡིན། དེ་ཡང་ཀྱི་ཧུད་ཀྱི་ཧུད་ཅེས་ཟེར་ཞིང་ངུ་བ་ནི་ཀྱི་ཧུད་ཀྱི་ཧུད་ཀྱི་ང་རོ་འབོད་པའོ། །འོ་དོད་འབོད་པ་ནི་མི་སྙན་པར་ཟེར་བའམ། ཅེ་སྤྱང་ལ་སོགས་པའི་སྒྲའོ། །དམོད་མོ་ནི་དམོད་མོས་འདེབས་པ་སྟེ་དེ་དག་གི་སྒྲ་ཐོས་པ་དང༌། ཡང་འགྱེལ་ཞིང་ཆག་པ་དང༌། སྦྲིད་པའི་སྒྲ་ཐོས་པ་དང༌། གོས་ལ་སོགས་པ་རལ་ཞིང་འཇིག་པ་དང༌། དེ་བཞིན་དུ་སྡུག་བསྔལ་ཞིང་ཕོངས་པར་གནས་པ་མཐོང་བ་དང༌། དེ་བཞིན་དུ་ཤིང་ཆེན་པོ་དང་རྒྱལ་མཚན་ལ་སོགས་པ་དང་འབྲས་བུས་གང་བའི་སྣོད་ཆུའི་ནང་དུ་ནུབ་ཅིང་བྱིང་བ་མཐོང་བ་དང༌། དེ་བཞིན་དུ་གསོད་ཅེས་པ་ལ་སོགས་པའི་ཚིག་ཡིད་དུ་མི་འོང་ཞིང་བཀྲ་མི་ཤིས་པ་སྨྲ་བ་སྟེ། གསོད་དོ་བཅོམ་མོ་ལྷུང་ངོ་ཞིག་གོ །ཚིག་གོ་ཞེས་བྱ་བ་ལ་སོགས་པའི་ཚིག་གསང་མཐོན་པོར་སྨྲ་བ་དང༌། དེ་བཞིན་དུ་སྨན་པ་ལམ་དུ་འགྲོ་བ་ན་ཐལ་བ་དང་ཕྱག་དར་ལ་སོགས་པ་གཏོར་ཞིང་གོས་པ་དང༌། ཡང་དེ་བཞིན་དུ་འབར་བའི་ཕྱོགས་ཏེ་ཉི་མ་གང་ན་གནས་པའི་ཕྱོགས་དེ་ནས་རི་དྭགས་དང་བྱ་དང་སྟག་དང་ཁྲ་ལ་སོགས་པ་གདུག་པའི་སྒྲ་སྒྲོག་པ་དང༌། འབྲུ་ནག་པོ། བུ་རམ་བསྒོར་བ་དང་རྩྭ་དང་འདམ་ལ་སོགས་འཁུར་བ་དང་གཅིན་དང་བཤང་བ་གཏོང་བ་དང༌། ཕོ་མོ་འཁྲིག་པ་སྤྱོད་པ་སོགས་མཐོང་བ་དང༌། རས་བལ་ལ་སོགས་པ་ནི། རས་བལ་ཕུབ་མ་ཞ་ཉེ་རྩྭ། །ཞེས་བྱ་བ་ལ་སོགས་པ་ཕོ་ཉ་འོང་བའི་སྐབས་སུ་བསྡུས་ཏེ། དེ་དག་མཐོང་བ་དང་དགྲ་བོ་མཐོང་བ་ནི་ཡིད་དུ་མི་རུང་བའི་དགྲ་བོ་མཐོང་བ་དང༌། ཡང་མལ་སྟན་ཁ་ཕུབ་པ་སྣོད་ཆག་པ་ལ་སོགས་ངན་པ་མཐོང་ཡང་མི་ཤིས་པ་ཡིན་པས་མཚན་མ་དེ་དག་མཐོང་ན་ཡང་གསོ་བའི་ལས་མི་བརྩམ་མོ།།

དེ་རྣམས་ལས་ལྡོག་པ་དགེ་བ་དང་ཤིས་པའི་ལྟས་འབྲུ་དང་ཞོ་ལ་སོགས་པའི་སྒྲས་ཆང་དང་རིན་པོ་ཆེ་ལ་སོགས་པས་སྣོད་ཡོངས་སུ་གང་བ་དང༌། དྲིལ་བུ་དང་མར་མེ་དང་མེ་ཏོག་དང་འབྲས་ཡོས་དང་ཟན་དང་ལྷའི་སྐུ་དང་ལུས་ཀྱི་རྒྱན་གོས་དཀར་པོ་དང༌། ཆོས་ལ་སྤྱོད་པ་དང་རྒྱལ་མཚན་བསྒྲེང་བ་དང༌། མེ་འབར་བ་དང༌། རྟ་ལུག་དང་བ་ལ་སོགས་པའི་སྒྲས་བུད་མེད་མཛེས་མ་རྣམས་ཕྲུ་གུ་དང་བཅས་པར་གནས་སམ་འགྲོ་བ་དང༌། དེ་ལ་སོགས་པའི་ཡིད་དུ་འོང་ཞིང་བཀྲ་ཤིས་པའི་སྒྲའམ་བཟའ་བ་དང་བཏུང་བ་དང་རྒྱན་རྣམ་པ་སྣ་ཚོགས་པ་སྟེ། དེ་དག་རྣམས་ལམ་དུ་འགྲོ་བའི་ཚེ་མཐོང་བའམ་ཐོས་པའམ། ཡང་ན་ནད་པའི་ཁྱིམ་དུ་འཇུག་པ་ལ་ཉེ་བའི་ཚེ་ན་ཡང་རུང་སྟེ་མཐོང་ཐོས་སུ་གྱུར་པ་དེ་དག་ནི་དགེ་ཞིང་བཀྲ་ཤིས་པའི་ལྟས་བཟང་པོ་ནད་པ་བདེ་བླག་ཏུ་སོས་པར་འགྱུར་བའི་མཚན་ཉིད་ཅན་ཡིན་ནོ།།

གཞན་ཡང་ཟླ་ཟེར་ལས་བྱ་སྐྱེས་པའི་མིང་ཅན་ནི་ངང་པ་དང༌། ཏི་ཏི་ར་ཞེས་ཏི་ཏིག་དང༌། བ་ཏ་ག་དེང་སང་གུ་ལིང་པ་སོགས་ཏེ། དེ་ནི་གཡོན་ཕྱོགས་ན་གནས་ཤིང་སྐད་སྒྲོག་པ་བཟང་ལ། བུད་མེད་ཀྱི་མིང་ཅན་ཤཱ་རི་མ་ཞེས་དེང་སང་ཟས་ཆེན་མ་དང༌། འཇོལ་མོ་ལ་སོགས་པ་ནི་གཡས་ན་འདུག་ཅིང་སྒྲ་འབྱིན་པ་བཟང་ངོ༌། །བྱ་དང་རི་དྭགས་གཡས་སྐོར་བཟང༌། །ཁྱི་དང་ཝ་ནི་དེ་ལྟར་མིན། །ཞེས་བྱ་བ་ལ་བྱ་དང་རི་དྭགས་རྣམས་ནི་གཡོན་གཡས་སུ་བསྐོར་ནས་འགྲོ་བ་བཟང་སྟེ། བྱ་ནི་ཙ་ཤ་ཀ་ཞེས་གོ་བོ་དང་ཁུ་བྱུག་ལ་སོགས་པའོ། །རི་དྭགས་ནི་ཤ་ཀ་ལ་སོགས་པའོ། ཁྱི་དང་ཝ་ནི་དེ་ལྟར་འགྲོ་བར་སྔགས་པ་མ་ཡིན་ཏེ། གཞན་དུ་གཡས་ནས་གཡོན་དུ་བསྐོར་ཏེ་འགྲོ་བར་བཟང་ངོ༌། །རི་དྭགས་རྣམས་ནི་ཟུང་དུ་མ་མཆིས་གཅིག་དང་གསུམ་དང་ལྔ་དང་བདུན་ལ་སོགས་པར་འགྲོ་བར་བཟང་ངོ༌། ཙ་ཤ་བྱ་རྒོད་ཁ་ཛ་རི། །ཞེས་བྱང་བོན་དང༌། ནེའུ་ལེ་དང་རྨ་བྱ་རྣམས། །མཐོང་བ་རྟག་ཏུ་ཤིས་པ་ཡིན། ཞེས་བྱ་བ་ལ་ཙ་ཤ་དང་བྱ་རྒོད་ལ་སོགས་པ་མཐོང་བ་ནི་རྟག་ཏུ་ཤིས་ལ། གཞན་ཡང་ཞོ་ལ་སོགས་པའི་བཀྲ་ཤིས་ཀྱི་རྫས་མཐོང་བ་དང༌། རེག་པ་དང་མིང་ཐོས་པ་དག་ལམ་དུ་ཐོགས་ཤིང་རྒྱུ་བ་དང༌། ཁྱིམ་དུ་འཇུག་ཅིང་ནང་དུ་འགྲོ་བ་ཡོད་ན་ནད་པ་དེ་ནད་ལས་སོས་པའི་མཚན་ཉིད་ཡིན་པར་ཤེས་པར་བྱའོ། །འབྲུ་ཞེས་ནས་འབྲས་ཁྲེ་ལ་སོགས་པ་དང༌། ཆུ་སྐྱེས་ཞེས་པདྨ་ལ་སོགས་དང༌། ཉ་དང་ཤ་རློན་པ་དང་ཁ་བས་གང་ཡང་རུང་བ་དང༌། རིན་པོ་ཆེ་བཻ་ཌཱུརྱ་ལ་སོགས་པ་དང༌། མིའི་གོ་འཕང་མཐོ་བ་ནི་ཤེས་རབ་དང་ཐོས་པ་དང་གཏོང་བ་དང་དཔའ་རྩལ་དང་རྒྱལ་པོས་བཀུར་བ་ལ་སོགས་པ་ཉིན་རེ་བཞིན་འཕེལ་ཞིང་རྒྱས་པའི་སྐྱེས་བུ་མཐོང་བ་དང༌། དེ་བཞིན་དུ་ལྷའི་སྐུ་གཟུགས་མཐོང་བ་དང༌། རྒྱལ་པོ་མཐོང་བ་དང༌། གོས་དཀར་པོ་གྱོན་པ་དང༌། སུ་མ་ལ་སོགས་པའི་མེ་ཏོག་དཀར་པོ་མཐོང་བ་དང༌། དམ་པ་ཞེས་དམ་པའི་ཆོས་དང་ལྡན་པའི་སྐྱེས་བུ་དང༌། གཙུག་ཏོར་མགོ་ལ་ཐོགས་པ་དང༌། །རྟ་བབས་ནི་ལྷ་ཁང་ལ་སོགས་པའི་མདུན་དུ་ཤིང་རྒྱན་ཅན་བསྒྲེང་བ་དང༌། གཡུང་དྲུང་བཀྲ་ཤིས་པ་ཞེས་པའི་མཚན་མ། ཤིང་རྟ་ལེགས་པར་གང་བ་ནི་མི་བཀྲ་ཤིས་པ་གནས་པ། ཕྱུགས་གཅིག་ཏུ་བཏགས་པ་ར་ལ་སོགས་པའི་ཕྱུགས་གཅིག་བརྟོད་པ་དང༌། གདུ་བུ་ཞེས་རྒྱན་གྱི་རྣམ་པ་དང༌། ཁྱུ་མཆོག་དང༌། བ་ལང་རྣམས་རྗེས་སུ་མཐུན་པའི་ཁྲོས་ཤིང་འཁྲུགས་པའི་སྒྲ་མ་ཡིན་པའི་སྐད་འབྱིན་པའོ། །ཡང་དེ་བཞིན་དུ་རི་དྭགས་ལ་སོགས་པ་ཡིད་དུ་འོང་བའི་སྐད་སྒྲ་སྒྲོག་པ་དང༌། གདུགས་ལ་སོགས་པ་བསྒྲེང་ཞེས་གྱེན་དུ་འདེགས་པ་དང༌། བ་དན་ནི་རྣམ་པར་རྒྱལ་བའི་བ་དན་དང༌། དེ་བཞིན་དུ་མངོན་པར་བསྟོད་པ་ནི་གང་རྒྱལ་པོ་ལ་སོགས་པར་འཁོར་གྱི་ཚོགས་ཀྱིས་བཀྲ་ཤིས་སྨྲ་བ་ལ་སོགས་པས་རྒྱལ་བར་གྱུར་ཅིག་ཅེས་བྱ་བ་ལ་སོགས་པ་སྨྲ་བའི་སྐད་དང༌། རྫ་རྔ་ལ་སོགས་པའི་སྒྲ་སྒྲོག་པ་དང༌། དེ་བཞིན་དུ་བྲམ་ཟེ་རིག་བྱེད་འདོན་པའི་སྒྲ་དང༌། དེ་བཞིན་དུ་རླུང་རྩུབ་ཅིང་རྡུལ་འཚུབ་མ་ཡིན་པ་བདེ་བ་བསྐྱེད་པ་ལྡང་ཞིང་རྗེས་སུ་མཐུན་པར་རྒྱུ་ཞིང་ལྡང་བ་སྟེ་བཟང་ཞིང་སོས་པའོ། །གཞན་ཡང་ཐུན་མོང་བ་ནི། འགྲོ་བའི་ཚེ་སྲོག་ཆགས་གོ་ད་ཞེས་དོམ་ལ་སོགས་པའི་མིང་སྒྲོགས་པ་ཐོས་པ་ནི་དགེ་བ་ཡིན་གྱི། མཐོང་བ་དང་སྒྲ་སྒྲོག་པ་ཐོས་པ་ནི་དེ་ལྟ་མ་ཡིན་ནོ། །དྲེད་དང་སྤྲེའུ་ནི་གོང་མ་དེ་ལས་ལྡོག་པ་སྟེ་མཐོང་བ་དང་སྒྲ་སྒྲོག་པ་ནི་དགེ་བ་ཡིན་ནོ། །འགྲོ་བའི་ཚེ་འཇའ་ཚོན་དཔྲལ་བའི་ཕྱོགས་ཀྱི་ཐད་དྲང་ན་མདུན་ན་གནས་པ་ནི་མི་ཤིས་པ་ཡིན་ལ། མདུན་དུ་ཕྱོགས་པ་མ་གཏོགས་པ་རྒྱབ་ཏུ་གནས་ཤིང་འཆར་བ་ནི་དགེ་ཞིང་ཤིས་པ་ཡིན་ལ། ལྟས་ངན་པ་བྱུང་ཟིན་ཀྱང་བཟང་བ་སླར་བྱུང་ན་བཀྲ་མི་ཤིས་པ་རྣམས་བསལ་ཞིང་སྤངས་ནས་ནད་པ་སོས་པ་སོགས་ཡོན་ཏན་གྱི་ཚོགས་སྟོན་པ་ཡིན་ནོ།།

སྨན་པ་དེ་ཉིད་ནད་པའི་ནང་དུ་འཇུག་པའི་ཚེ་ཞོ་ཕྲུམ་ལ་སོགས་པ་བཀྲ་ཤིས་རྫས་དང་ནས་དང་འབྲས་སོགས་འབྲུ་སྣ་ཚོགས་དང༌། སོགས་པའི་སྒྲས་རིན་པོ་ཆེ་དང་རྒྱན་བཟང་པོ་ལ་སོགས་པ་རྣམས་ཁྱིམ་ནས་ཕྱིར་འབྱུང་བ་དང༌། དྲི་ཞིམ་པོ་དང་ལྡན་པའི་རླུང་འཇམ་པོ་དལ་གྱིས་རྒྱུ་བ་མེད་ཅིང་མེ་ཤི་བའི་ཤུལ་གྱི་ཐལ་བ་དང༌། རྫ་ལ་སོགས་པའི་སྣོད་འགའ་ཞིག་ཆག་པའི་རྣམ་པ་མཐོང་བ་ཡང་ངན་ཞིང་མི་དགེ་སྟེ། ནད་པ་དེ་ཉིད་མི་འཚོ་བའི་སྔ་ལྟས་ཡིན་པས་སྤང་བར་བྱ་ཞིང༌། དེ་ཡང་ཟླ་ཟེར་ལས། དུས་དེ་ཉིད་ཀྱི་ནད་པའི་ཁྱིམ་ནས་ཞོ་དང་འབྲུ་ལ་སོགས་པས་གང་བའི་སྣོད་འོག་ནས་འབྱུང་བའི་བཀྲ་ཤིས་ཀྱི་རྫས་གང་ཡང་རུང་བ་ཕྱིར་འབྱུང་བ་མཐོང་ན་ཡང་མི་ཤིས་པ་ཡིན། ཕོ་ཉ་ལ་སོགས་པ་ཇི་སྐད་སྨོས་པ་ལྟ་བུ་བཀྲ་མི་ཤིས་པ་མཐོང་ན་ནད་པ་སྨན་པས་སྤང་ཞིང་གསོ་བར་མི་བྱ་ཞེས་དང༌། དེ་ཡང་མི་གང་ཞིག་ནད་པའི་སར་སྨན་པ་འགྲོ་བ་མིན་པའི་རང་བཞིན་དུའང་བཟང་ངན་ཡིན་ལ་ཞིབ་པ་ནི་བཻ་ཌཱུར་དཀར་པོ་མ་བུ་ལས་བཤད་པ་ལྟར་རོ།།

དེ་ནས་རྨི་ལམ་སྟེ་དེ་དག་འབྱུང་རྒྱུ་ཟླ་ཟེར་ལས། རླུང་དང་མཁྲིས་པ་དང་བད་ཀན་གྱི་ནད་རྣམས་ཀྱི་དྲི་མ་སྟོབས་དང་ལྡན་ཞིང་ཤིན་ཏུ་ཤས་ཆེ་བར་གྱུར་པས་ཡིད་ཅེས་བྱ་བ་སེམས་གང་དུ་འཇུག་ཅིང་རྒྱུ་བའི་བུ་གའི་རྒྱུན་སྲང་ནད་ཀྱིས་བཀག་ཅིང་གང་བའི་ཕྱིར་མི་བཟད་ཅིང་གནོད་པ་བསྐྱེད་ལ་བཀྲ་མི་ཤིས་པར་འགྱུར་བའི་རྨི་ལམ་མཐོང་བར་འགྱུར་ལ། དེ་ལྟ་བུ་གང་ཞིག་མཐོང་བ་དེས་ནད་ཀྱིས་ཉམ་ཐག་པའི་ནད་པ་ནི་འཆི་བར་འགྱུར་ལ། གང་ཞིག་ནད་མེད་ཅིང་ཐ་མལ་པར་གནས་པས་རྨི་ལམ་དེ་ལྟ་བུ་མཐོང་བར་གྱུར་ན་དུས་གཞན་ཞིག་ན་ནད་ཀྱིས་བཏབ་ནས་འཆི་བའམ། འཚོ་བ་གཏོལ་མེད་པའི་ཐེ་ཚོམ་དང་བཅས་པར་འགྱུར་ལ། དེ་ལས་ཀྱང་འགའ་ཞིག་གིས་ནི་རྨི་ལམ་ངན་པ་ཞི་བར་འགྱུར་བའི་རྒྱུ་བསྟན་པའི་ཤུགས་ཀྱིས་འཆི་བ་ལས་ཐར་བར་འགྱུར་ཞིང་འཚོ་བར་འགྱུར་བ་ཡིན་ནོ། །དེ་ལ་རྨི་ལམ་གྱི་དབྱེ་བ་ནི་མཐོང་བ་ལ་སོགས་པའི་དབྱེ་བས་རྣམ་པ་བདུན་ཡོད་དེ། དེ་ལ་མཐོང་བའི་རྨི་ལམ་ནི་གཉིད་ཀྱིས་མ་ལོག་པའི་གནས་སྐབས་སུ་མིག་གིས་མཐོང་ཞིང་ཉམས་སུ་མྱོང་བ་དེ་རྨི་ལམ་གྱི་གནས་སྐབས་སུ་དེ་འདྲ་བའི་རྣམ་པ་རྨིས་ཤིང་མཐོང་བའོ། །ཐོས་པ་ནི་རྣ་བའི་དབང་པོས་སྒྲ་ཙམ་དུ་ཐོས་པའོ། །ཉམས་སུ་མྱོང་བ་ནི་རང་རིག་པའི་ཚུལ་གྱིས་བློས་ཉམས་སུ་མྱོང་བའོ། །གསོལ་བ་བཏབ་པ་ནི་དོན་དུ་གཉེར་ཞིང་ཡིད་ལ་འདོད་པའི་དོན་གསོལ་བ་བཏབ་པའོ། །བརྟགས་པ་ནི་ཡིད་ཀྱིས་ཇི་ལྟར་འདོད་པ་བཞིན་དུ་བརྟགས་ཤིང་ཡིད་ལ་བྱེད་པའོ། །འབྱུང་བར་འགྱུར་བ་ནི་ཕྱིས་ངེས་པར་འབྱུང་བར་འགྱུར་བའོ། །ནད་ལས་བྱུང་བ་ནི་རླུང་དང་མཁྲིས་པ་དང་བད་ཀན་ལས་འབྱུང་བར་འགྱུར་བའོ། །རྨི་ལམ་དེ་དག་གི་ནང་ནས་དང་པོའི་རྨི་ལམ་ལྔ་པོ་མཐོང་བ་ལ་སོགས་པ་ནི་འབྲས་བུ་མེད་ཅིང་མི་བདེན་པའོ། །དེ་བཞིན་དུ་རང་བཞིན་གྱི་ནད་གཞི་ལས་བྱུང་བའི་རང་དང་རྗེས་སུ་མཐུན་པ་དེ་ཡང་འབྲས་བུ་མེད་པ་ཡིན་ཏེ། རླུང་གི་རང་བཞིན་ཅན་ལ་རླུང་གི་རང་བཞིན་ཅན་དང་མཐུན་པར་རྨིས་པའི་རྨི་ལམ་དང༌། མཁྲིས་པའི་རང་བཞིན་ཅན་ལ་མཁྲིས་པ་དང་རྗེས་སུ་མཐུན་པའི་རྨི་ལམ་ནས། ཆ་འདྲེས་པའི་རང་བཞིན་ཅན་ལ་ཆ་འདྲེས་པའི་རང་བཞིན་ཅན་ཞེས་པའི་བར་གྱིས་རྨི་ལམ་རྨིས་པ་ཡང་དོན་མེད་པ་ཡིན་ནོ། །དེ་བཞིན་དུ་ཉིན་མོ་རྨིས་པ་དང༌། རྨིས་ནས་བརྗེད་པ་དང༌། ཤིན་ཏུ་ཡུན་ཐུང་བ་ཡང་འབྲས་བུ་མེད་པ་ཡིན་ནོ། །མཚན་སྟོད་ཅེས་པ་ནམ་ཕྱེད་ཡན་ཆད་དུ་རྨི་ལམ་རྨིས་པ་ནི་དེའི་འབྲས་བུ་ཐག་རིང་བ་ཡིན་ལ། མཐོང་བ་དེ་ཡང་ཤས་ཆུང་ཞིང་མཐོང་བཞིན་པ་ཡིན་ནོ། ནང་པར་བ་ལང་བཟས་ལ་གཏོང་བའི་ཚེ་རྨི་ལམ་མཐོང་བ་དེ་ནི་དེའི་ཉིན་པར་ཉིད་འབྲས་བུ་ཆེན་པོ་མཐོང་བ་ཡིན་ནོ། །ཡང་རྨི་ལམ་དེ་མཐོང་ནས་གཉིད་ཀྱིས་མ་ལོག་ཅིང༌། རྨི་ལམ་གཞན་གྱིས་བར་མ་ཆོད་པ་དང༌། དེ་བཞིན་དུ་དེ་དག་མི་མཐུན་པའི་ཚིག་གིས་ཆོད་པར་མ་གྱུར་ན་དེ་ནི་ཉིན་པར་མཐོང་ཞིང་འབྲས་བུ་དང་བཅས་པ་ཡིན་ནོ། །གལ་ཏེ་རྨི་ལམ་ངན་པ་ཞིག་རྨིས་ན་དེའི་རྗེས་ལ་ཞི་བར་བྱ་བའི་ཕྱིར་སྦྱིན་པ་དང་སྦྱིན་སྲེག་ལ་སོགས་པ་བྱས་ན་རྨི་ལམ་ངན་པ་དེའི་འབྲས་བུ་ཆུང་བར་འགྱུར་རོ། །སོགས་པ་སྨོས་པས་ནི་བརྟུལ་ཞུགས་དང་གཙང་སྦྲ་དང་སེམས་ནང་དུ་སྡུད་ཅིང་བསམ་གཏན་ལ་སྙོམས་པར་འཇོག་པ་དང༌། ཏིང་ངེ་འཛིན་དང་བཀྲ་ཤིས་པའི་ཆོ་ག་བྱས་པ་ལ་སོགས་པ་བསྡུ་བའོ། །གང་ཞིག་རྨི་ལམ་ངན་པ་མི་དགེ་བ་མཐོང་ཞིང་རྨིས་ནས་ཡང་གནས་སྐབས་དེ་ཉིད་དུ་རྨི་ལམ་ངན་པའི་རྗེས་ལ་རྨི་ལམ་བཟང་ཞིང་དགེ་བར་འགྱུར་བ་མཐོང་ན་སྐྱེས་བུ་དེས་འབྲས་བུ་བཟང་པོ་ཉིད་ཐོབ་པར་འགྱུར་གྱི། རྨི་ལམ་ངན་པའི་དབང་དུ་མི་འགྱུར་རོ། །འདིར་ཡིད་འཇུག་བུ་ག་ནད་ཀྱིས་བཀག་ཕྱིར་མཐོང༌། །ཞེས་བཤད་པའི་དོན་ཕལ་ཆེར་ནད་པའི་དབང་དུ་བྱས་པ་ཡིན་པས། གོང་དུ་སྲིད་རྩ་འཆད་པའི་སྐབས་སུ་སྙིང་ག་ནས་ཕྱོགས་བཞིར་རྣམ་པར་ཤེས་པ་ཚོགས་བརྒྱད་རྒྱུ་བའི་རྩ་ཡོད་པར་བཤད་པ་དེའི་བུ་ག་རྣམས་རླུང་མཁྲིས་བད་ཀན་ཤས་ཆེ་བ་དེས་བཀག་པའི་དབང་གིས་འཆི་བ་ལ་མངོན་དུ་ཕྱོགས་པར་འགྱུར་ཞིང་དེ་དང་འདྲ་བའི་ལྟས་རྣམས་ཀྱང་རྨི་ལམ་དུ་འཆར་བ་ལ་དགོངས་པ་ཡིན་ནོ། །ནད་མེད་ཀྱི་དབང་དུ་བྱས་པ་རྣམས་ཀྱི་རྨི་ལམ་འབྱུང་ཚུལ་ནི། འདིར་ཐོག་མར་གཉིད་མཐུག་པོའི་གནས་སྐབས་ནི་རྣམ་པར་ཤེས་པ་ཚོགས་བརྒྱད་ཀྱི་ནང་ནས་ཀུན་གཞི་ནི་གཙོ་བོ་ཡིན་ཞིང༌། གནས་ནི་སྙིང་ག་ཆོས་ཀྱི་འཁོར་ལོ་ལ་གནས་ལ། ངོ་བོ་ནི་རྣམ་པར་ཤེས་པ་ཚོགས་དྲུག་གི་གསལ་བ་གཅིག་ཏུ་བསྡུས་པ་སྟེ། འདི་ནི་སེམས་ཅན་གྱི་གནས་སྐབས་སོ། །འདི་ཉིད་ཀྱི་འཁྲུལ་པ་དག་ན་འོད་གསལ་བའི་འབྲས་བུ་མངོན་དུ་བྱེད་པར་འགྱུར་ཏེ། ཡེ་ཤེས་ཀྱི་ནང་ནས་མེ་ལོང་ལྟ་བུའི་ཡེ་ཤེས་ཀྱང་ཡིན་ནོ་ཞེས་དང༌། བག་ཆགས་ཉོན་མོངས་ཅན་གྱི་ཡིད། །སྲོག་རླུང་འདུ་བྱེད་བཅས་ཏེ་ལངས། །རྩ་གནས་བརྒྱུད་དེ་གཟུང་དང་འཛིན། །གཉིས་སྣང་འཁྲུལ་པར་བྱེད་པ་ཡིན། །ཞེས་པ་ལྟར། འདི་ནི་ཀུན་གཞིའི་རྣམ་པར་ཤེས་པའི་སྟེང་ནས་དྲུག་པ་ཡིད་ཀྱི་རྣམ་པར་ཤེས་པ་བག་ཆགས་དང་བཅས་པ་ཉོན་མོངས་པ་ཅན་གྱི་ཡིད་སྲོག་གི་རླུང་གིས་བསྐྱོད་ནས་ཡིད་ཀྱི་འདུ་བྱེད་ལངས་པ་ནི་རྨི་ལམ་གྱི་ངོ་བོ་ཡིན་ལ། རྩ་གནས་རྣམས་ནས་བརྒྱུད་དེ་གཟུང་འཛིན་གྱི་སྣང་བ་སྐྱེ་བ་ནི་འོག་ནས་རྒྱས་པར་བཤད་པ་བཞིན་ནོ། །དེ་ལྟར་ཀུན་གཞི་ལ་གནས་པའི་ཡིད་དང༌། དྲུག་པ་ཡིད་ཀྱི་ཆ་ཤས་ཡིན་པས་ཞེས་དང༌། རྨི་ལམ་དེར་ཇི་ལྟར་མ་དག་པ་དང་འཁྲུལ་པའི་སྣང་བ་འབྱུང་བར་གྱུར་ན། ཐོག་མར་སྙིང་གར་ཀུན་གཞིའི་སྟེང་དུ་ཚོགས་དྲུག་པོ་ཐམས་ཅད་སྡུད་དོ། །དེ་ནས་སྲོག་གི་རླུང་དང་ལྷན་ཅིག་ལངས་ནས་ལུས་ཀྱི་སྟེང་གི་ཕྱོགས་སྤྱི་བོར་སོང་ན་ལྷ་དང་ལྷ་མིན་གྱི་ཡུལ་རྣམས་ཀྱི་སྣང་བ་དང༌། ནམ་མཁའ་ལ་ཕྱིན་པ་དང༌། རི་མཐོན་པོ་སོགས་གྱེན་དུ་འཛེག་པ་དང༌། མིག་གི་རྩ་ལ་སོང་ན་གཟུགས་ཀྱི་རྣམ་པ་ཤིན་ཏུ་གསལ་བར་མཐོང་བ་དང༌། དེ་བཞིན་དུ་སྒྲ་དང་དྲི་དང་རོ་ལ་སོགས་པ་མ་འདྲེས་པར་འཆར་རོ། །གང་གི་ཚེ་ཡིད་སྲོག་གི་རླུང་དང་ལྷན་ཅིག་སྙིང་གའི་འོག་གི་ཕྱོགས་གསང་བ་ལ་སོགས་པར་སོང་ན་དམྱལ་བ་དང་ཡི་དྭགས་དང་དུད་འགྲོ་ལ་སོགས་པའི་སྣང་བ་དང༌། ཐུར་དང་བྲག་རོང་དང་ནགས་མཐུག་པོ་ལ་སོགས་པར་འགྲོ་བ་དང༌། མུན་ཁུང་དང་དངོས་པོ་ཐམས་ཅད་མི་གསལ་བའི་རྣམ་པ་འཆར་བར་འགྱུར་རོ། །ལུས་ཀྱི་བར་གྱི་རྩ་རྣམས་སུ་ཡིད་སྲོག་གི་རླུང་དང་ལྷན་ཅིག་ཏུ་འགྲོ་བ་དེའི་ཚེ་གླིང་བཞི་ལ་སོགས་པ་སྟེང་གི་སྣང་བ་འཆར་རོ། །དེ་ཡང་མདུན་གྱི་རྩ་རྣམས་ལ་སོང་བའི་ཚེ་ཤར་ཕྱོགས་ཀྱི་སྣང་བ་འབྱུང་ངོ༌། །གཡས་ཀྱི་རྩ་ལ་སོང་ན་ལྷོ། རྒྱབ་ཀྱི་རྩ་ལ་སོང་ན་ནུབ་བོ། །གཡོན་གྱི་རྩ་ལ་སོང་ན་བྱང་ཕྱོགས་ཀྱི་སྣང་བ་འབྱུང་སྟེ། རྩ་གནས་ཡངས་པ་ལ་ཡུལ་ཡངས་པ་དང༌། རྩ་གནས་དོག་པ་ལ་ཡུལ་ཤིན་ཏུ་དོག་པའི་སྣང་བ་འཆར་ཏེ། དེའི་ཕྱིར་སྲོག་རླུང་གཡས་པར་རྒྱུ་བའི་འཆི་ལྟས་འབྱུང་བའི་ཚེ་རྨི་ལམ་ན་ཡང་ལྷོ་ཕྱོགས་སུ་ཡང་ནས་ཡང་དུ་ཕྱིན་པར་རྨི་བས། ལྷོར་འགྲོ་བ་འཆི་ལྟས་སུ་བཤད་པའི་དོན་ཡང་དེ་ཡིན་པར་གོའོ། །རྨི་ལམ་དེར་དངོས་པོ་ཇི་ལྟར་སྣང་བའི་རྐྱེན་ཡང༌། སྲོད་ལ་བད་ཀན་ཤས་ཆེ་སྟེ། །ནམ་ཕྱེད་དུས་སུ་མཁྲིས་པར་བརྗོད། །ཐོ་རངས་རླུང་གི་དུས་ཉིད་དེ། །དེ་ཚེ་ཁམས་ཀྱི་རང་བཞིན་གྱིས། །རྨི་ལམ་ཡུལ་དུ་སྣང་བར་འགྱུར། །ཞེས་བྱ་བ་ལ་སོགས་པ་རྒྱུད་ནས་མང་དུ་གསུངས་པའི་ཕྱིར། ཁམས་ཀྱི་རྐྱེན་གྱི་ཡུལ་དེར་ཡང༌། །ཞེས་འདིར་སྨོས་ནས་རླུང་གི་རྨི་ལམ་གྱི་སྡེ་ཚན་ནི་འདི་ཡིན་ཏེ། ས་ཕྱོགས་ནེའུ་གསིང་ལ་སོགས་པ་རྫས་ཐམས་ཅད་སྔོན་པོ་དང༌། གོས་སྔོན་པོ་དང༌། ནག་པོ་དང༌། བྱ་ནག་དང༌། ནམ་མཁར་འཕུར་བ་དང༌། རྟ་ཞོན་པ་དང༌། ནོར་བུ་སྔོན་པོ་དང༌། རིག་པ་དྭངས་པ་དང༌། རྨི་ལམ་གྱི་དངོས་པོ་རྣམས་མི་རྟག་ཅིང་འགྱུར་ཡང་ཡུད་དུ་སྣང་བ་ལ་སོགས་པ་རྣམས་ཡིན་ནོ། །མཁྲིས་པའི་ཁམས་ཀྱི་རྨི་ལམ་གྱི་སྡེ་ཚན་ནི་མེ་འབར་བ་དང༌། གོས་དམར་པོ་དང༌། སེར་པོ་དང༌། ས་གཞི་སེར་པོ་དང༌། དམར་པོ་དང༌། གསེར་དང་བཙུན་པ་ལ་སོགས་པ་གོས་སེར་པོ་ཅན་སྣང་བ་དང༌། སེམས་ཅན་དང་རྫས་ལ་སོགས་པ་ཐམས་ཅད་ཀྱང་སེར་པོ་ཤས་ཆེ་བ་དང༌། དལ་ཞིང་རྟེན་པ་དང༌། རིག་པ་ཡང་སྐྲག་པ་ལ་སོགས་པ་དང་འབྲེལ་པ་རྣམས་སྣང་བ་ཡིན་ནོ། །བད་ཀན་གྱི་ཁམས་ཀྱི་རྨི་ལམ་གྱི་སྡེ་ཚན་ནི། ཆུ་དང༌། ཁ་བ་དང༌། ཕྱོགས་ཐམས་ཅད་དཀར་པོ་དང༌། གོས་དཀར་པོ་དང༌། བུད་མེད་དང༌། གླང་པོ་ཆེ་དང༌། དངུལ་དང༌། མུ་ཏིག་ལ་སོགས་པའི་ནོར་བུ་དཀར་པོ་དང༌། རེག་པ་དང་བདེ་བ་དང་རྟེན་པ་ལ་སོགས་པ་དུ་མ་སྣང་སྟེ། ཇི་ལྟར་ཁམས་ཀྱི་རིམ་པ་བཞིན་དུ་རྨི་ལམ་གྱི་སྣང་བ་དཔག་ཏུ་མེད་པ་འབྱུང་བར་བཤད་དོ། །འཇམ་དཔལ་རྩ་རྒྱུད་ལས་ཀྱང༌། དང་པོ་ཐུན་གྱི་རྨི་ལམ་གང༌། །བད་ཀན་ལས་བྱུང་ཤེས་པར་བྱ། །གཉིས་པར་གང་བྱུང་མཁྲིས་པ་ཡིན། །འཇིག་རྟེན་ལ་ཡོད་སྨད་པ་ཡིན། །གསུམ་པ་རླུང་འབྱུང་ཤེས་པར་བྱ། །བཞི་པ་བདེན་པར་འབྱུང་བ་ཡིན། །ཞེས་བྱ་བ་ལ་སོགས་པ་ཤིན་ཏུ་རྒྱས་པར་གསུངས་པ་རྣམས་མངས་ཀྱིས་དོགས་པས་མ་དྲངས་སོ། །དེ་ལྟར་བཤད་པའི་རྨི་ལམ་གྱི་སྣང་བ་རྣམས་ནི་སོ་སོ་སྐྱེ་བོ་རྣམས་ཀྱི་དབང་དུ་བྱས་པ་ཡིན་ལ། ཉོན་མོངས་པའི་ཡིད་ཀྱི་དབང་ལས་མ་བྱུང་བའི་རྨི་ལམ་བྱང་ཆུབ་སེམས་དཔའ་ས་དང་པོ་ནས་བཅུ་པ་ལ་གནས་པའི་བར་རྣམས་ལ་འབྱུང་བར་འཕགས་པ་དཀོན་མཆོག་བརྩེགས་པ་ལས་གསུངས་པ་ཡང་ཡོད་དོ།།

སྐབས་འདིར་མི་གང་ཞིག་ནད་ཀྱིས་མནར་བའི་རྨི་ལམ་དུ་བྱི་ལ་དང་སྤྲེའུ་དང་སྟག་དང་ཝ་དང༌། རོ་ལ་སོགས་པ་ལ་རང་ཉིད་ཀྱིས་ཞོན་པར་རྨིས་ན་འཆི་བདག་གི་ཞགས་པས་ཟིན་པའི་རྟགས་ཡིན་ལ། དེ་བཞིན་དུ་མ་ཧེ་དང་རྟ་དང་ཕག་དང་བོང་བུ་དང་རྔ་མོང་རྣམས་ལ་གཅེར་བུར་ཞོན་ནས་གཤིན་རྗེ་གནས་པའི་ས་ལྷོའི་ཕྱོགས་སུ་འགྲོ་བར་རྨིས་ན་ཡང་འཆི་བར་འགྱུར་ཞིང་ནད་པ་རང་ཉིད་ཀྱི་སྤྱི་བོར་འོད་མ་ལ་སོགས་པའི་ལྕུག་མའམ། སྡོང་པོའི་རིགས་སྐྱེས་ཏེ་བྱ་ཚང་བཅས་སམ། ཏཱ་ལའི་སྡོང་པོ་དང་ཚེར་མ་ཅན་གྱི་ཤིང་ལ་སོགས་པ་སྙིང་གར་སྐྱེས་པའམ། སྙིང་ག་ནས་པདྨ་ཕྱི་རོལ་དུ་ཕྱུང་བ་དང༌། ཡང་ན་གཡང་དུ་ལྷུང་བ་དང༌། དུར་ཁྲོད་དུ་ཉལ་བ་དང༌། མགོ་བོ་ཆག་པ་དང༌། བྱ་རོག་དང༌། ཡི་དྭགས་དང༌། སྨེ་ཤ་ཅན་རྣམས་ཀྱིས་ཡོངས་སུ་བསྐོར་བ་དང༌། རྐང་ལག་གི་པགས་པ་ས་ལ་ལྷུང་བ་དང༌། སླར་ཡང་མའི་མངལ་དུ་ཡར་འཇུག་པ་དང༌། ཆུས་ཁྱེར་བ་དང༌། འདམ་དུ་བྱིང་བ་དང༌། ཉ་ཆེན་པོའི་ཁར་མིད་པ་དང༌། ལྕགས་དང་གསེར་དངུལ་མང་པོ་རྙེད་པ་དང༌། ཚོང་དང་འཐབ་མོ་གཉིས་ཀ་ཕམ་པ་དང༌། བྲོ་བའི་ཁྲལ་འདེད་པ་དང༌། བག་མ་ལེན་པ་དང༌། གཅེར་བུར་འདུག་པ་དང༌། སྐྲ་དང་ཁ་སྤུ་བྲེགས་པ་དང༌། རང་གི་གཉེན་བཤེས་སྔར་ཤི་བའི་གཤིན་པོ་རྣམས་དང་ལྷན་ཅིག་ཏུ་ཆང་འཐུང་ཞིང་ཡང་ན་དེས་ཐུར་ལ་འདྲུད་པར་བྱེད་པ་དང༌། ལུས་ལ་གོས་དམར་པོ་དང༌། ཕྲེང་བ་དམར་པོས་བརྒྱན་པ་ཡི། དེ་དང་འདྲ་བའི་གཤིན་པོ་དག་དང་ལྷན་ཅིག་ཏུ་གར་བྱེད་པ་སྟེ། དེ་ལ་སོགས་པ་བཀྲ་མི་ཤིས་པའི་མཚན་མ་རྨི་ལམ་དུ་བྱུང་བའི་ནད་པ་དེ་དག་ནི་འཆི་བདག་གི་དབང་དུ་སོང་བའི་ལྟས་ཡིན་ལ།

དེ་ཡང་ཟླ་ཟེར་ལས། སྔོན་ཆད་ཤི་བའི་མི་རྣམས་དང་ལྷན་ཅིག་ཆང་འཐུང་ཞིང༌། ཁྱིས་དྲངས་པ་དང་དྲུད་པར་རྨིས་པའི་མི་དེ་ནི་རིང་པོར་མི་ཐོགས་པར་རིམ་གྱིས་གཟུགས་ཅན་འཆི་བདག་གིས་ཁྱེར་ཞིང་དབང་དུ་འགྱུར་རོ། །མི་གང་ཞིག་ལུས་ཀྱི་མདོག་དམར་བ་དང༌། གོས་དམར་བ་དང༌། ཕྲེང་བ་དམར་ཞིང་བུད་མེད་དགོད་པས་དབང་མེད་དུ་དྲངས་པར་རྨི་ན་མི་དེ་ནི་ཁྲག་དང་མཁྲིས་པའི་འཆི་བདག་གིས་ཁྱེར་བར་འགྱུར་རོ། །མི་གང་ཞིག་མ་ཧེ་ལ་སོགས་པ་གང་ཡང་རུང་བ་ཞོན་ཏེ། ལྷོ་ཕྱོགས་གཤིན་རྗེའི་གནས་སུ་འགྲོ་ན་དེ་ནི་གཅོང་ཆེན་པོའི་འཆི་བདག་གིས་ཁྱེར་ཞིང་འཆི་བར་འགྱུར་རོ། །མི་གང་ཞིག་ལྕུག་མ་ཚེར་མ་ཅན་སྙིང་གར་སྐྱེས་པ་རྨིས་པའམ། འོད་མའམ་ཏཱ་ལ་སྙིང་གར་སྐྱེས་པ་རྨི་ན་སྐྲན་གྱི་གཟུགས་ཅན་གྱི་འཆི་བདག་གིས་འཆི་བར་འགྱུར་རོ། །མི་གང་ཞིག་མེ་མི་འབར་བ་སྟེ་མེ་ལྕེ་མེད་པ་ལ་སྦྱིན་སྲེག་བྱེད་པར་རྨིས་པ་དང༌། མར་གྱིས་ལུས་བསྐུས་ཤིང་གཅེར་བུར་འདུག་པ་ལ་པདྨ་སྙིང་ག་ནས་བྱུང་ཞིང་སྐྱེས་པ་རྨི་ན་དེ་མཛེ་ནད་ཀྱིས་འཆི་བའི་དུས་བྱེད་པར་འགྱུར་རོ། །མི་གང་ཞིག་རིགས་ངན་སྨེ་ཤ་ཅན་དང་ལྷན་ཅིག་མར་དང་ཏིལ་མར་ལ་སོགས་པའི་སྣུམ་མང་པོ་འཐུང་བར་རྨི་ན་གཅི་ནད་ཀྱི་གཟུགས་ཅན་གྱི་འཆི་བདག་གིས་ཁྱེར་ཞིང་དབང་དུ་འགྱུར་རོ་ཞེས་པ་དང༌། གཞན་ཡང༌། སྲིན་པོ་ལྷན་ཅིག་གར་བྱེད་ཅིང༌། །ཆུ་ལ་བྱིང་རྨིས་སྨྱོ་བྱེད་འཛིན། །ར་རོ་གར་བྱེད་ཤི་བ་ཡི། །མིས་ཁྱེར་རྨི་བ་བརྗེད་བྱེད་འཛིན། །བོང་བུ་རྔ་མོ་བྱི་ལ་སྤྲེའུ། །སེང་གེ་སྟག་དང་ཁྭ་དག་དང༌། །ཝ་འམ་མི་རོ་ལ་ཞོན་རྨིས། །དེ་ནི་འཆི་བདག་ཁར་སོང་ཡིན། །སྣུམ་ཁུར་ཤ་ཁུ་ལི་ཟོས་རྨིས། །སད་ནས་དེ་འདྲ་སློན་གྱུར་པ། །གང་ཡིན་དེ་ནི་འཚོ་མི་འགྱུར། །ཉི་ཟླ་གཟས་ཟིན་རྨིས་མིག་ན། །ཉི་མ་ཟླ་བ་ལྷུང་བ་ཡི། །རྨི་ལམ་མཐོང་ན་ལོང་བར་འགྱུར། །སྤྱི་བོར་འོད་མའི་ལྕུག་སོགས་སྐྱེས། །དེ་བཞིན་བྱ་རོག་ཚང་འཆའ་དང༌། །མགོ་བོ་བཅད་པར་རྨིས་པ་དང༌། །ཝ་དང་བྱ་རྒོད་སོགས་ཀྱིས་བསྐོར། །དེ་བཞིན་ཡི་དྭགས་ཤ་ཟ་མོ། །བྱད་མ་སྨེ་ཤ་ཅན་གྱིས་བསྐོར། །འོད་མའི་ཚལ་དང་ཚེར་མ་དང༌། །རྩྭ་ཡི་ཚང་ཚིང་ནང་དུ་ཆུད། །གཡང་སར་ལྷུང་དང་དུར་ཁྲོད་ཉལ། །ཕྱག་དང་ཐལ་བའི་ནང་དུ་ལྷུང༌། །ཆུ་དང་འདམ་ལ་སོགས་པར་ནུབ། །ཆུ་རྒྱུན་གྱིས་ནི་མྱུར་དུ་ཁྱེར། །གླུ་གར་དང་ནི་རོལ་མོ་བྱེད། །གོས་དང་ཕྲེང་བ་དམར་པོ་འཆང༌། །ལུས་འཕེལ་ན་ཚོད་རྒས་པ་དང༌། །བག་མ་ལེན་ཞིང་ཁ་སྤུ་འབྲེག །ཟས་བཅོས་སྣུམ་ཟ་ཆང་འཐུང་དང༌། །སྐྱུག་དང་འཁྲུ་བ་རྨི་བ་དང༌། །ལྕགས་དང་གསེར་དག་རྙེད་པ་དང༌། །ཚོང་དང་རྩོད་པ་ཕམ་པ་དང༌། །མཆིལ་ལྷམ་གཉིས་ནི་དོར་བ་དང༌། །རྐང་ལྤགས་ལྷུང་བ་རྨི་བ་དང༌། །ཤིན་ཏུ་དགའ་དང་རབ་ཁྲོས་པའི། །ཤི་བའི་གཉེན་གྱིས་སྤྱོས་པ་དང༌། །མར་མེ་གཟའ་དང་སྐར་མ་དང༌། །སོ་མིག་ལྷ་ཡི་གཟུགས་རྣམས་ནི། །ལྷུང་དང་འཇིགས་པ་རྨི་བ་དང༌། །རི་བོ་རལ་བར་གྱུར་པ་དང༌། །ནགས་ཚལ་དམར་བའི་ནང་དང་ནི། །སྡིག་ཆེན་ཁྱིམ་དུ་འཇུག་པ་དང༌། །རོ་བསྲེག་པ་དང་མུན་པར་ཞུགས། །མ་ཡི་མངལ་དུ་ཞུགས་པ་དང༌། །བྲག་དང་ཁང་པ་ས་ལྷུང་དང༌། །དེ་བཞིན་ཉ་ཡིས་མིད་པ་དང༌། །ཆོས་གོས་གྱོན་པའི་མི་སྲུན་དང༌། །གཅེར་བུ་བ་དང་དབྱུག་ཐོགས་དང༌། །མིག་དམར་ཁ་དོག་གནག་པ་དང༌། །མཐོང་བ་ནམ་ཡང་ཤིས་མ་ཡིན། །བུད་མེད་སྡིག་ཅན་གདོང་ནག་དང༌། །སྐྲ་དང་སེན་མོ་ནུ་མ་རིང༌། །གོས་དང་ཕྲེང་བ་དམར་པོ་ཐོགས། །རྨིས་པ་དུས་མཚན་ཡིན་པར་འདོད། །ཅེས་པ་ལྟར་རོ། །དེ་དག་རྣམས་ནི་ནད་མེད་ལ་རྨིས་ཀྱང་མི་ཤིས་པ་སླད་ནས་འབྱུང་བས་ཤེས་པར་བྱའོ།།

གོང་དུ་མི་དགེ་བའི་རྨི་ལམ་འབྱུང་བར་བཤད་པ་ནད་པ་དཔེར་མཚོན་དེ་ལ་སོགས་ཏེ་རྨི་ལམ་གྱི་རྣམ་པ་མི་བཟད་པ་དེ་དྲག་པོ་འཇིགས་སུ་རུང་ཞིང་བཀྲ་མི་ཤིས་པར་མཐོང་བ་དེ་དག་ཐམས་ཅད་ཀྱང་གང་ལས་འབྱུང་སྙམ་ན་ཡིད་ལ་སོགས་པའི་རྣམ་པར་ཤེས་པའི་ཚོགས་བརྒྱད་རྣམས་སྙིང་གར་འཇུག་ཅིང་གཞན་དུ་རྒྱུ་བའི་བུ་ག་ཡོད་པ་དེ་རྣམས་རླུང་ལ་སོགས་པའི་ནད་ཀྱིས་བཀག་པའི་ཕྱིར་མ་རུངས་པ་མཐོང་བར་འགྱུར་ཞིང༌། དེ་འདྲ་བའི་རྨི་ལམ་རྒྱུན་དུ་རྨི་བའི་ནད་པ་རྣམས་ནི་རིང་པོ་མ་ལོན་པར་འཆི་བར་འགྱུར་ཏེ་ཡིད་འཇུག་པའི་བུ་ག་ནད་ཀྱིས་བཀག་པའི་ཕྱིར་རོ། དེས་ན་རྨི་ལམ་མི་བཟང་བ་དེ་ལྟ་བུ་ནད་པ་རྣམས་ལ་ལྟ་ཅི་སྨོས། ནད་མེད་པ་རྣམས་ལ་རྨིས་ཀྱང་མི་ཤིས་པར་འགྱུར་ཞིང༌། དེའི་རྗེས་ཐོག་དེ་མ་ཐག་པར་བཟང་པོ་འགའ་ཞིག་རྨིས་ན་མཐའ་གཅིག་ཏུ་ངན་པར་མ་ངེས་ལ། དཀར་ཕྱོགས་ཀྱི་རིམ་གྲོ་དང་བསམ་གཏན་སྒོམ་པ་ལ་སོགས་པའི་དབང་གིས་ཉེས་པ་ལས་ཐར་བར་འགྱུར་བ་ཡང་ཡིན་ནོ། །དེ་ལྟར་བཤད་པའི་རྨི་ལམ་ངན་པ་ཕལ་ཆེ་བ་རྣམས་དང༌། འཆད་འགྱུར་གྱི་རྨི་ལམ་འདི་དག་ཀུན་ཀྱང་རྣམ་པ་དྲུག་གི་སྒོ་ནས་ངེས་པར་བྱ་བ་སྟེ། དེ་ཡང་ཉིན་གུང་མིག་གིས་མཐོང་བ་དང༌། རིགས་མཐུན་དུ་རྨིས་པ་དང༌། རྣ་བས་ཐོས་པའི་སྒྲ་དང་མཚུངས་པར་རྨིས་པ་དང༌། བདེ་བ་ལ་སོགས་པ་འགའ་ཞིག་རང་རིག་པའི་ཚུལ་གྱིས་ཉམས་སུ་མྱོང་བ་དང་མཐུན་པར་རྨིས་པ་དང༌། ལྷ་ལ་འདོད་པའི་དོན་གྲུབ་པར་གསོལ་བ་བཏབ་པ་དང་རྗེས་སུ་མཐུན་པར་རྨིས་པ་དང༌། གང་རྨིས་པ་དེ་ཉིད་ཕྱི་ནས་ངེས་པར་གྲུབ་པར་འགྱུར་བ་དང༌། ཡིད་འཇུག་པའི་བུ་ག་ནད་ཀྱིས་བཀག་པ་ལས་བྱུང་བ་དང་རྣམ་པ་དྲུག་ཡིན་ནོ། །དེ་དག་ཐམས་ཅད་ལས་གང་ཡང་རུང་བ་མཚན་སྟོད་དེ་སྲོད་ལ་རྨི་ལམ་རྨིས་ན་ནི་གཉིད་གཞན་གྱིས་བར་མ་ཆོད་ཅིང་བརྗེད་ངས་སུ་འགྱུར་བའི་ཕྱིར། བཟང་ངན་གང་གི་འབྲས་བུ་འབྱུང་བ་མེད་ཅིང་ནམ་ཕྱེད་ལའང་དེ་དང་ཆ་མཐུན་ལ། ཐོ་རངས་ཀྱི་མཇུག་ཏུ་རྨི་ལམ་གང་ཡང་རུང་བ་མཐོང་བ་དང༌། དེ་ནས་སླར་གཉིད་ཀྱིས་བར་མ་ཆོད་པ་དང༌། རྗེས་སུ་མ་གྱུར་པར་ཡིད་ལ་གསལ་བར་གནས་ན་གང་དམིགས་ཀྱི་འབྲས་བུ་ངེས་པ་ཉིད་དུ་འབྱིན་པའོ།།

བཟང་བའི་རྨི་ལམ་ནི། མི་གང་གི་རྨི་ལམ་དུ་ཚངས་པ་དང་བརྒྱ་བྱིན་ལ་སོགས་པའི་ལྷ་དང༌། མ་ཧེ་ཁྱུ་རྣམས་ཀྱི་མཆོག་ཏུ་གྱུར་པ་དང༌། དམ་པའི་ཆོས་ཀྱི་ངང་ཚུལ་ལ་གནས་པའི་སྐྱེས་བུ་དམ་པ་རྣམས་དང༌། སྙན་གྲགས་ཀྱིས་ཕྱོགས་ཀུན་ཁྱབ་པ་དང་ལྡན་པའི་རྒྱལ་པོ་ལ་སོགས་པ་རྣམས་དང༌། མེ་ཆེན་པོ་འབར་བཞིན་པ་དང༌། དྲི་མ་མེད་པའི་མཚོ་དང་ལུས་ལ་ཁྲག་དང་མི་གཙང་བའི་རང་བཞིན་བྱུགས་པ་དང༌། གོས་དཀར་པོ་དྲི་མ་མེད་པ་གྱོན་པ་དང༌། འཕན་དང་གདུགས་དང་རྒྱལ་མཚན་བསྒྲེང་བ་དང༌། ཤིང་གི་འབྲས་བུ་ཁམ་བུ་སྟར་ག་སོགས་རྙེད་པ་དང༌། རི་བོ་མཐོན་པོ་དང་ཁང་བཟང་གི་རྩེ་དང༌། འབྲས་བུ་དང་བཅས་པའི་ཤིང་ལ་འཛེགས་པ་དང༌། སེང་གེ་དང་གླང་ཆེན་དང་རྟ་དང་བ་ལང་སོགས་ལ་ཞོན་པ་དང༌། ཆུ་བོ་ཆེན་པོ་དང་རྒྱ་མཚོ་ལས་བརྒལ་བ་དང་བྱང་དང་ཤར་གྱི་ཕྱོགས་སུ་འགྲོ་བ་དང༌། ཉམ་ང་བའི་ས་བཙོན་རའམ་མུན་པའི་གནས་ལས་ཐར་བ་དང༌། རང་གི་དགྲ་བོ་ཕམ་པར་བྱས་པ་དང༌། ལྷ་དང་ཕ་མ་ལ་སོགས་པས་བསྟོད་ཅིང་མཆོད་པར་བྱེད་པ་སྟེ། དེ་ལ་སོགས་པ་བཀྲ་ཤིས་པའི་རྨི་ལམ་རྣམས་ཀྱི་ནང་ནས་གང་ཡང་རུང་བ་རྨིས་ཤིང་མཐོང་བའི་མི་དེ་ནི་ཚེ་རིང་ཞིང་ནད་མེད་པ་དང༌། ནོར་དང་ལོངས་སྤྱོད་མང་དུ་རྙེད་པར་འགྱུར་བའི་ལྟས་ཡིན་པར་ཤེས་པར་བྱ། ཟླ་ཟེར་ལས། ལྷ་ལ་སོགས་པའི་རྨི་ལམ་བཟང་པོ་འདི་ལྟ་བུ་གང་གིས་མཐོང་བར་གྱུར་པ་དེའི་ཚེ་རིང་བ་ལ་སོགས་པའི་ཡོན་ཏན་ཐོབ་པར་འགྱུར་རོ། །ལྷ་ནི་བརྒྱ་བྱིན་དང་ཆུ་ལྷ་ལ་སོགས་པའོ། །མཛའ་བཤེས་ནི་མཛའ་བོ་སྟེ་དེ་ཡང་གསོན་པའོ། །སྐྱེས་བུ་དམ་པ་ཆོས་དང་ལྡན་པའི་ངང་ཚུལ་ཅན་ནོ། །གྲགས་ལྡན་ནི་སྙན་པས་ཀུན་དུ་ཁྱབ་པའི་མིའོ། །མེ་འབར་བ་ནི་ཤིང་མང་པོ་དང་བཅས་ཏེ་ཤིང་འབར་བའོ། །དྭངས་པའི་མཚོ་ནི་རྙོག་པ་མེད་པའི་མཚོའོ། །བུ་མོ་དང་ཁྱེའུ་ནི་ན་ཚོད་དང་པོ་ལ་གནས་པ་སྟེ། དེ་ཡང་ཁ་དོག་སེར་བ་དང་གོས་དཀར་པོ་གྱོན་པ་མདངས་དང་ལྡན་ཞིང་གཟུགས་བཟང་བའོ། །སྐྱེས་བུ་ཟ་བ་ནི་མི་ཟས་ཟ་བའོ། །ལུས་འབར་བ་ནི་ལུས་མེའི་ཕུང་པོ་ལྟར་འབར་བའོ། །ཁྲག་གིས་ལུས་ཀུན་བགོས་པ་ནི་ཁྲག་གིས་བགོས་ཤིང་བྱུགས་པ་སྟེ། དེ་ལྟ་བུའི་རྣམ་པ་གང་གི་རྨི་ལམ་དུ་མཐོང་བ་དེ་ནི་དགེ་བ་ཡིན་ནོ། །སྐྱེས་བུ་གང་ཞིག་རྨི་ལམ་གྱི་ནང་དུ་གདུགས་དང་དུག་དང་སྣ་མའི་མེ་ཏོག་དང་འབྲས་བུ་སོགས་སྙེད་པར་རྨི་བ་དེས་ཀྱང་ཚེ་རིང་བ་ལ་སོགས་པ་ཐོབ་པར་འགྱུར་རོ། །དུག་ཧ་ལ་ཧ་ལ་འམ། བཙན་དུག་ལ་སོགས་པའོ། །སྣ་མའི་མེ་ཏོག་དཀར་པོ་ནི་བར་བར་ན་ཁ་དོག་རྣམ་པ་བཞི་དང་ལྡན་པའོ། །མི་གཙང་བས་བྱུགས་པ་ནི་བཤང་བས་ལུས་ལ་བྱུགས་པའོ། །འབྲས་བུ་ནི་ཨ་མྲའི་འབྲས་བུའི་ཤིང་ཏོག་དང་སྐྱུ་རུ་ར་དང་སྟར་གའི་འབྲས་བུ་ལ་སོགས་པའོ། །རྨི་ལམ་ན་རི་བོ་ལ་སོགས་པ་ལ་འཛེགས་པར་རྨི་བ་དེ་ཡང་བདེ་བ་ཐོབ་པར་འགྱུར་རོ། །རི་བོ་ནི་བྲག་རིའོ། ཁང་བཟང་ནི་ཁང་པ་བརྩེགས་པ་སྟེ། འབྲས་བུར་བཅས་པའི་ཤིང་ནི་ཤིང་ཏོག་ཕུན་སུམ་ཚོགས་པ་དང་ལྡན་པ་སྟེ། དེ་དག་ལ་འཛེགས་པ་དང༌། རྨི་ལམ་དུ་ཆུ་བོ་བརྒལ་ཞིང་ཐར་བར་རྨི་བ་དེ་ཡང་བདེ་བ་ཐོབ་པར་འགྱུར་རོ། །མི་གང་ཤར་རམ་བྱང་གི་ལམ་དུ་རྨི་ལམ་ན་འགྲོ་བ་རྨི་བ་དང༌། བགྲོད་མིན་འགྲོ་བ་སྟེ། རང་རང་རིགས་མཐུན་པའི་གདོལ་པ་ལ་སོགས་པ་སྤྱོད་པར་རྨིས་པ་དང༌། བདག་ཉིད་ཤི་བར་རྨི་བ་དེ་ཡང་ཚེ་རིང་བ་ལ་སོགས་པ་ཐོབ་པར་འགྱུར་རོ། །མི་གང་ཞིག་ཉམ་ང་ཞིང་དོག་པའི་གནས་ལས་ཐར་ཞིང་བྱུང་བ་དང༌། དེ་བཞིན་དུ་ལྷ་དང་ཕ་མ་ལ་སོགས་པས་རྨི་ལམ་གྱི་ནང་དུ་བསྟོད་པ་དང་བཀུར་བ་རྨི་བ་དང༌། ཡང་གང་ཞིག་ངུ་ཞིང་མཆི་མ་འབྱིན་པ་དང༌། དེ་བཞིན་དུ་ས་ལ་ལྷུང་ཞིང་འགྱེལ་བ་ལས་ལྡང་བ་དང༌། དེ་བཞིན་དུ་སྡང་བར་སེམས་པའི་དགྲ་བོ་ཕམ་པར་བྱས་པའི་རྨི་ལམ་སྐྱེས་བུ་གང་གིས་རྨི་བར་བྱས་པ་དེ་ཚེ་དང་སྲོག་གནས་པ་དང༌། ནད་མེད་པ་སྟེ་བདེ་བར་གནས་པ་དང༌། ནོར་དང་འབྱོར་པ་མང་པོ་རྙེད་ཅིང་ཐོབ་པར་འགྱུར་རོ། །དེ་རྨི་ལམ་གྱི་འབྱུང་རྒྱུ་འབྲས་བུ་དང་བཅས་པ་གསོ་བ་རིག་པ་དང་མཐུན་པར་གང་ཟག་ཐ་མལ་པ་རྒྱུན་གྱི་སྤྱོད་པ་ལ་གནས་པའི་དབང་དུ་བགྱིས་ཏེ་བཤད་པ་ཡིན་ལ། བཟང་ངན་སོགས་ཞི་རྒྱས་དབང་དྲག་གི་ལས་བྱེད་པ་དང༌། རྣལ་འབྱོར་པ་བསྲུང་བཟློག་བསད་མནན་ཡི་དམ་དང་ལྷ་འདྲེ་བསྙེན་པ་སོགས་ལ་ཅུང་ཟད་བཟང་ངན་མི་འདྲ་བ་ཟུར་དུ་བཤད་པ་ལས་ཤེས་པར་བྱའོ།།

རྣམ་འགྱུར་གྱི་ལྟས་མི་འགའ་ཞིག་ནད་མེད་ཐ་མལ་དུ་གནས་པ་ཞིག་ཡིན་ཡང་ལུས་ངག་གི་རྣམ་པར་འགྱུར་བ་ལས་རྗེས་སུ་དཔག་ནས་རིང་པོ་མ་ལོན་པ་ནས་འཆི་བར་འགྱུར་བའི་སྔ་ལྟས་གསལ་པོར་བསྟན་པར་བྱ་སྟེ། དེ་ཡང་རྒྱུ་མེད་དུ་སྨན་པ་དང་སྨན་དང་བླ་མ་མཛའ་བཤེས་རྣམས་ལ་སྡང་བར་བྱེད་པའམ། དེ་བཞིན་དུ་རྒྱུ་ཅི་ཡང་མེད་པར་སྐབས་སུ་ཡིད་གཞུངས་པ་སྟེ་རང་བཞིན་དང་སྤྱོད་པ་བཟང་ཞིང༌། ལུས་དང་བཞིན་རས་གློ་བུར་དུ་མཛེས་ཤིང་རྒྱས་པ་དང༌། དཔལ་ཕུན་སུམ་ཚོགས་པ་ཚེགས་མེད་དུ་ཐོབ་བམ། ཡང་ན་དེ་ལས་གོ་ལྡོག་པ་སྟེ་གློ་བུར་དུ་དཔལ་དང་མཛེས་པ་སྤོང་ཞིང་ཡིད་མ་རུངས་པར་འགྱུར་བའམ། སྔར་མཛའ་བཤེས་སོགས་ལ་སྡང་བར་བྱེད་བཞིན་པ་ལ་ཡང་རྒྱུ་མེད་དུ་མཛའ་གཅུགས་བྱེད་པ་རྣམས་ནི་མྱུར་དུ་འཆི་བར་འགྱུར་བའི་ལྟས་ཡིན་ནོ། །དེ་བཞིན་དུ་རྟག་ཏུ་ལུས་དང་བཞིན་རས་ཀྱི་མདངས་ནད་དྲག་པོས་བཏབ་པ་ལྟར་ངན་པ་བློ་སེམས་མི་བདེ་བ་འབའ་ཞིག་འབྱུང་ཞིང༌། རང་གི་གཏོར་མ་ལ་སོགས་བྱ་རོག་ལ་བྱིན་པ་ན་ཡང་དེས་མི་ཟ་བ་དང༌། ཆུར་འཇུག་པའམ་ཁྲུས་བྱས་པའི་ཚེ་ལུས་ཀྱི་ཆ་ཤས་ཕལ་ཆེར་གཤེར་བར་གནས་ཀྱང་སྙིང་ག་མྱུར་དུ་སྐམ་པའམ། ཆུ་མི་ཆགས་པར་འདྲེད་པ་དང༌། ལག་པ་གང་ཡང་རུང་བ་ཅིག་གིས་ཅིག་ཤོས་དེའི་སོར་མོའི་ཚིགས་ལས་དྲངས་པས་ཏོག་ཅེས་པའི་སྒྲ་མི་འབྱུང་བ་དང༌། ཟས་བཟང་པོ་ཟོས་ཀྱང་སྟོབས་ཆུང་དུ་འགྲོ་ཞིང་ལུས་ཀྱི་དྲི་མ་སྔར་ལས་གོ་ལྡོག་ཏུ་འགྱུར་བ་དང༌། ཤིག་དང་སྲོ་མ་སྔར་ལས་མང་བར་འདུ་བའམ། ཡང་ན་སྤོང་བར་འགྱུར་ན་དེ་ཡང་རིང་པོར་མ་ལོན་པར་འཆི་བའི་ལྟས་ཡིན་ལ། མདོར་ན་གཟུགས་ལ་སོགས་པ་འདོད་པའི་ཡོན་ཏན་རྣམས་ལ་སྔར་བས་འདོད་ཆགས་ལྷག་པར་ཆེར་སོང་བའམ། ཡང་ན་ཆུང་དུ་སོང་བས་ཡུལ་རྣམས་ལ་ལོངས་སྤྱོད་པར་རྨོངས་ཏེ་ཞེན་པ་འདོར་བ་དང༌། ངང་རྒྱུད་བཟང་པོ་རྣམས་ཀྱང་རྒྱུ་མེད་དུ་ཁྲོ་བ་དང༌། ཡང་ན་ཤིན་ཏུ་སྤྲོ་ཐུང་བ་ཡང་རྒྱུ་མེད་པར་ངང་རིང་བར་སོང་བ་ལ་སོགས་པ་སྔར་གྱི་ལུས་ངག་གི་རྣམ་འགྱུར་ལས་གོ་ལྡོག་ཅིང༌། ཡང་ན་ནི་མི་དེ་ཉིད་ཀྱི་སྔར་གྱི་སྤྱོད་པ་སྐྱོན་གྱི་རང་བཞིན་དུ་ཡོད་པ་ཡོན་ཏན་གྱི་རྣམ་པ་གཞན་དུ་འགྱུར་བའམ། ཡོན་ཏན་ཅན་དུ་གནས་པ་སྐྱོན་གྱི་རྣམ་པ་གཞན་དུ་རྒྱུ་མེད་གློ་བུར་བར་འགྱུར་ན་ཡང་མི་དེ་མྱུར་དུ་འཆི་བདག་གི་དབང་དུ་སོང་བའི་ལྟས་ཡིན་ཞེས་བྱའོ། །གཞན་ཡང་ཉི་མ་ལ་བསྡད་པའི་ཚེ་གྲིབ་མ་མེད་པ་དང༌། མེ་ལོང་དང་ཆུ་དྭངས་པའི་ནང་དུ་གཟུགས་བརྙན་མི་འཆར་བ་དང༌། ཉིན་པར་ནམ་མཁའ་ཤིན་ཏུ་དྭངས་པའི་སྐབས་སུ་ཐོག་མར་རང་གི་གྲིབ་མ་ལ་མ་ཡེངས་པར་རྩེ་གཅིག་ཏུ་རིང་ཞིག་བལྟས་ནས་སླར་ནམ་མཁའ་ལ་ཡུད་ཀྱིས་བལྟས་པ་ན་དུ་བའི་མདོག་ཅན་གྱི་གཟུགས་བརྙན་འཆར་བ་ཞིག་ཡིན་པ་ལ་མི་འཆར་བ་དང༌། གྲིབ་མ་དང་མེ་ལོང་སོགས་ལ་གཟུགས་བརྙན་ཤར་དུ་ཟིན་ཀྱང་མགོ་བོ་ཆད་པ་དང༌། ཡན་ལག་གཞན་འགའ་ཞིག་མེད་པའམ། ཁ་མིག་སོགས་ལ་སྐྱོན་ཡོད་པ་དང༌། མདངས་མེད་ཤིན་ཏུ་རིད་པར་མཐོང་ཡང་རིང་པོར་མ་ལོན་པ་ནས་འཆི་བར་འགྱུར་བའི་སྔ་ལྟས་མེ་ཏོག་དང་འབྲས་བུའི་རིམ་པ་ལྟར་འབྱུང་བ་གོར་མ་ཆག་གོ།

དེ་ཡང་ཟླ་ཟེར་ལས། ཇི་ལྟར་འབྲས་བུའི་མེ་ཏོག་དང༌། །མེ་ཡི་དུ་བ་ཆར་གྱི་སྤྲིན། །ཕྱིས་འབྱུང་མཚན་མ་ཡིན་པ་ལྟར། །དེ་བཞིན་འཆི་ལྟས་ལས་ངེས་འཆི། །ཞེས་བྱ་བ་ལ་ཚུལ་ཇི་ལྟར་འབྲས་བུ་འབྱུང་བའི་སྔོན་དུ་མེ་ཏོག་འབྱུང་བ་དང༌། མེ་འབྱུང་བའི་སྔོན་དུ་དུ་བ་འབྱུང་བ་དང༌། ཆར་འབབ་པར་འགྱུར་བའི་སྔོན་དུ་སྤྲིན་འདུས་པ་དག་ནི་རྒྱུ་སྔར་འབྱུང་བ་འབྲས་བུ་ཕྱིས་འབྱུང་བའི་མཚན་མ་ཡིན་པ་ལྟར་ཚུལ་དེ་བཞིན་དུ་རང་བཞིན་ལས་གཞན་དུ་འགྱུར་བ་ནི་འཆི་བར་ཤེས་པར་འགྱུར་བའི་ལྟས་སམ་མཚན་མ་ཡིན་པས། དེ་ལས་ཕྱིས་ངེས་པར་འཆི་བར་འགྱུར་བར་སྟོན་པ་ཡིན་ནོ། །གང་ལ་སྔར་འཆི་བར་འགྱུར་བའི་མཚན་མའམ་ལྟས་མེད་ན་ལྟས་ཀྱིས་མཚོན་པའི་འཆི་བ་ཡང་མེད་པས་མི་འཆི་ལ། དེ་བཞིན་དུ་འཆི་ལྟས་སྣང་བ་ལས་ཀྱང་འཚོ་བར་འགྱུར་བ་མ་ཡིན་ནོ། །འཆི་ལྟས་འཆི་ལྟས་མི་ཤེས་པས། །མི་མཁས་འཆི་ལྟས་མེད་མིན་ཤེས། །ཞེས་བྱ་བ་ལ་ཡང་དག་པར་ན་གང་འཆི་ལྟས་ཉིད་དུ་སྟོན་པར་འོས་པ་དེ་ལ་ཡང་འཆི་ལྟས་མ་ཡིན་པར་ཤེས་ལ། འཆི་ལྟས་མེད་པ་དག་ལའང་འཆི་ལྟས་མེད་པར་མི་ཤེས་ཏེ། ཅིའི་ཕྱིར་ཞེ་ན་མི་མཁས་ཤིང་འཆི་ལྟས་དང་འཆི་ལྟས་མ་ཡིན་པར་ཤེས་པ་ལ་མ་བྱང་བར་འཆི་ལྟས་ཡོད་མེད་མི་ཤེས་པ་ཡིན་ནོ། །ཡང་སྨན་པ་གཞན་དག་ནི་འཆི་ལྟས་དེ་རྟེན་གྱི་ལུས་དང་བརྟེན་པ་པོའི་ནད་ལ་སོགས་པའི་ཁྱད་པར་གྱིས་དེ་རྣམ་པ་གཉིས་སུ་འདོད་ལ། དེ་ཡང་རླུང་ལ་སོགས་པའི་ནད་ཀྱི་ཚུལ་རྣམ་པ་མང་པོ་ལས་འཆི་ལྟས་ཀྱི་ཚུལ་དུ་སྣང་ཞིང་འབྱུང་བར་འགྱུར་བ་དང༌། དེ་དག་ལས་རླུང་ལ་སོགས་པའི་ནད་ཞི་བར་གྱུར་ན་དེ་ལས་བྱུང་བའི་མཚན་མ་ཡང་ཞི་བར་འགྱུར་ལ། དེ་ཞི་ན་ཡང་བརྟེན་པར་གནས་ན་ནི་ངེས་པར་འཆི་བ་ཉིད་དུ་འགྱུར་བས་འཆི་ལྟས་ཡིན་ནོ་ཞེས་ཟེར་རོ། །གཟུགས་ནི་ཁ་དོག་དང་དབྱིབས་ཀྱི་རྣམ་པའོ། །དབང་པོ་ནི་མིག་ལ་སོགས་པའོ། །སྐད་ནི་ང་རོའོ། །མདོག་ནི་འབྱུང་བ་ཆེན་པོ་ལྔའི་རང་བཞིན་རྣམ་པ་ལྔའོ། །གཟུགས་ཅན་ནི་ཉི་མ་དང་ཆུ་དང་མེ་ལོང་ལ་སོགས་པ་གང་ཞིག་སྣང་བའི་གཟུགས་དང་མཐུན་པར་འབྱུང་བའོ། །བྱ་བ་ནི་ལུས་དང་ངག་དང་ཡིད་ཀྱི་ལས་སུ་བྱ་བའི་རྣམ་པ་མང་པོའོ། །སོགས་པ་ཞེས་སྨོས་པས་ནི་ལུས་སུ་རྟོགས་པའི་དངོས་པོ་གཞན་དག་ཀྱང་བསྡུ་བའོ། །དེ་ལྟར་ན་གཟུགས་ལ་སོགས་པའི་དངོས་པོར་རྟོགས་པ་དེ་དག་དང༌། འདིར་སྨོས་པ་གཞན་དག་སྟེ། བློ་དང་དྲན་པ་རང་བཞིན་བརྟན་པ་ལ་སོགས་པའི་སེམས་ཀྱི་སྤྱོད་པ་མཐའ་དག་ཐ་མལ་པ་སྟེ་རང་བཞིན་དུ་གནས་པ་ལས་རྒྱུ་མེད་པ་སྟེ་འགྱུར་བ་གང་ཡང་མེད་བཞིན་དུ་གློ་བུར་དུ་འགྱུར་ཞིང་སྣང་བ་མདོར་བསྡུ་ན། དེ་ལྟ་བུ་གང་ཡིན་པ་དེ་ནི་འཆི་ལྟས་ཡིན་པར་ཤེས་པར་བྱ་ཡི། རྒྱུ་གང་ཡང་རུང་བ་ལས་གཞན་དུ་འགྱུར་བ་ལ་ནི་འཆི་ལྟས་སུ་མི་བཟུང་ངོ༌། །རྣམ་འགྱུར་དང་རླུང་ལྟས་སོགས་ཀྱི་འཆི་ལྟས་ཞིབ་པ་ནི་བཻ་དཀར་བུ་དཔེ་ལས་ཤེས་པར་བྱའོ།།

རྣམ་འགྱུར་གྱི་འཆི་ལྟས་བཤད་ཟིན་པ་དེ་ནས་ཉེ་བའི་འཆི་ལྟས་བཤད་པར་བྱ་བ་ལས་རྣམ་པ་གཉིས་སུ་ཡོད་དེ། ཉེ་བ་ཙམ་གྱི་འཆི་ལྟས་དང་ནི་ཤིན་ཏུ་ཉེ་བའི་འཆི་ལྟས་བསྟན་པའོ། །ཉེ་བའི་འཆི་ལྟས་ལ་ནི་འདི་ལྟ་བུ་འབྱུང་སྟེ། ཁོང་དུ་དུག་མ་སོང་ཞིང་རྡོ་ལ་སོགས་པའི་མཚོན་མ་ཕོག་པར་མིག་ལ་སོགས་པའི་བུ་ག་དགུ་ནས་ཁྲག་འཛག་པ་དང༌། ངག་ནས་སྨྲས་པ་དེ་འཕྲལ་དུ་བརྗེད་པར་གྱུར་པ་དང༌། མཇེ་ཕུག་ཏུ་ནུབ་བམ་རླིག་པ་རིང་དུ་འཕྱང་ངམ། ཡང་ན་དེ་ལས་གོ་ལྡོག་པ་མཇེ་རིང་དུ་འཕྱང་བའམ། རླིག་པ་ཕུག་ཏུ་བྲོས་པ་དང༌། ལུད་པ་འགོག་པ་དང༌། སྦྲིད་པ་འབྱིན་པའི་ཚེ་སྔོན་མེད་པའི་སྒྲ་འབྱུང་བ་དང༌། མར་མེ་ཤི་མ་ཐག་པའི་དྲི་མ་མི་ཚོར་བ་དང༌། སྐྲ་ཕྱི་བའི་ཚེ་ཚོར་བ་མེད་ཅིང་སྤྱི་བོར་སྣུམ་ལ་སོགས་པ་མ་བསྐུས་ཀྱང་སྣུམ་བཅས་སུ་སྣང་བ་དང༌། སྐྲ་དང་སྨིན་མ་ལ་སྔར་མེད་གསར་དུ་མཚམས་བྱེ་ཞིང༌། རྟ་དྲེལ་གྱི་རྩུབ་ཀྱི་རྣམ་པ་འཁྱིལ་བ་དང༌། དཔྲལ་བ་དང་མཆུ་སོར་ཟླ་བ་ཚེས་པ་སྟེ་ཚེས་གཉིས་གསུམ་གྱི་ཟླ་བ་ལྟ་བུ་འཁྱོག་པོའི་རི་མོ་རྩ་རིས་སུ་སྣང་བ་དང༌། མིག་ལ་སོགས་པའི་དབང་པོ་ལྔ་དང་གཟུགས་སོགས་ཡུལ་ལྔ་པོ་རྣམས་གང་གིས་ཀྱང་མ་བསླད་པ་ཐ་མལ་དུ་གནས་པ་ལ་སྔགས་དང་རྫས་ལ་སོགས་པ་འཁྲུལ་པའི་རྒྱུ་མེད་པར་ལོག་པའི་རྣམ་པར་འགྱུར་ཏེ། ཡོད་མེད་གོ་ལྡོག་པ་སྔར་ཡོད་པའི་གཟུགས་སྒྲ་དྲི་རོ་རེག་བྱ་རྣམས་མེད་པར་གྱུར་ཅིང་གཟུགས་སོགས་སྔར་མེད་པ་རྣམས་ལས་ཡོད་པ་ལྟར་སྣང་བ་དང༌། རང་གི་ལག་ངར་སྨིན་མའི་དབྲག་ཏུ་གྱེན་ལ་བསླང་ནས་ཆེད་དུ་གཏད་པ་མིག་གིས་མི་མཐོང་བ་སྟེ་ཆད་པ་ལྟར་སྣང་བ་དང༌། རང་གི་མིག་བཙིར་ནས་བལྟས་པའི་ཚེ་འོད་ཟེར་གྱི་དྲ་བ་མེད་ཅིང་མིག་འབྱེད་འཛུམ་ཆེར་མི་བྱེད་པ་རི་བོང་འབོས་ནོན་པ་ཞེས་བྱ་བའི་དུས་ཀྱི་མིག་དང་འདྲ་བར་འབྱུང་བ་དང༌། དེ་བཞིན་མིག་སྔར་བས་ཁུང་དུ་བྲོས་པའམ། རྒྱལ་མོའི་མདངས་གློ་བུར་དུ་ཉམས་པ་རྣམས་ནི་རིང་པོ་མ་ལོན་པར་འཆི་བའི་དུས་བྱེད་པར་འགྱུར་རོ། །གཞན་ཡང་རྣ་བ་ཧྲིད་འབྱར་བ་ཞེས་པ་རྣ་བ་ལྟག་པ་ཕྱོགས་སུ་འབྱར་བ་དང༌། ཨུཏྟ་ཆད་པ་ཞེས་པ་རྣ་བའི་བུ་ག་བཀག་པའི་ཚེ་འུར་འུར་ཞེས་པའི་སྒྲ་མེད་པ་དང༌། ཉི་མ་ལ་གནས་པའི་ཚེ་མགོ་བོའི་རླངས་པའི་གྲིབ་མ་མེད་པ་ན་ཡང་འཆི་བར་འགྱུར་ལ། དེ་བཞིན་དུ་སྣ་བུག་ཆེར་གདངས་ཤིང་སྣ་སྒོར་བ་སྐྱ་ཆགས་པ་དང༌། ལྕེ་གཞུང་ནག་ལ་སྐམ་པ་དང༌། ལྕེ་ཤིན་ཏུ་ཐུང་ངུར་གྱུར་ཅིང་སྨྲ་མི་ཤེས་པ་དང༌། མ་མཆུ་ཐུར་དུ་འཕྱང་བ་དང༌། ཡ་མཆུ་གྱེན་དུ་བརྫེས་པ་དང༌། གདོང་ལ་འཕྲལ་དུ་རྡུལ་ཆགས་ཤིང་དབུགས་ཀྱི་འགྱུ་བ་གྲང་ལ། སོ་དྲེག་ནག་པོ་ཡང་ཆགས་པར་འགྱུར་བ་དང༌། གྱེན་དུ་དབུགས་བརྩེག་ཅིང་ནང་དུ་སྡུད་མི་ཐུབ་པ་དང༌། ལུས་ཀྱི་དྲོད་ཡལ་བར་འགྱུར་བ་དེ་རྣམས་ཀྱང་འཆི་བའི་ལྟས་ཡིན་ལ། གཞན་ཡང་ལུས་པོ་ཕྱིའི་རེག་བྱ་གྲང་ལ་ནང་དུ་ཚ་བའི་ནད་སྐྱེ་བ་དང༌། གྲང་བའི་ནད་ཀྱིས་གདུངས་ནས་གནས་པའི་རིགས་ལ་མེ་ཉི་སོགས་ཚ་བ་མི་འདོད་པར་སྤོང་བ་དང༌། དེ་བཞིན་དུ་ཚ་བའི་ནད་ཀྱིས་གདུངས་ནས་གནས་པ་ལ་གྲང་བའི་རེག་བྱ་སོགས་སྤོང་བ་དང༌། གསོ་བ་རིག་པའི་གཞུང་ལུགས་མན་ངག་དང་བཅས་པ་ལས་བཤད་པའི་ཆོ་ག་སྨན་དཔྱད་ཟས་སྤྱོད་སོགས་ཇི་ལྟ་བ་བཞིན་བྱས་ཀྱང་ནད་ལ་དྲག་སྐྱེད་མེད་ཅིང༌། ཚ་བའི་ནད་ལ་དྲོད་བཅོས་དང་གྲང་བའི་ནད་ལ་བསིལ་བཅོས་སོགས་ཆོ་ག་ལོག་པར་བྱས་པས་བདེ་བར་གནས་པ་སྙམ་བྱེད་པ་དེ་དག་རྣམས་ནི་འཆི་བདག་གི་དབང་དུ་འགྲོ་བའི་ལྟས་སུ་བཤད་པ་ཡིན་ནོ།།

ཡན་ལག་བརྒྱད་པ་ལས། དུག་དང་སྣད་པ་མེད་པར་ནི། །བུ་ག་རྣམས་ལས་ཁྲག་འབྱུང་དང༌། །གང་ཞིག་ཕོ་མཚན་ནུབ་པ་དང༌། །རླིག་པ་རབ་ཏུ་འཕྱང་བ་འམ། །དེ་ལས་གོ་ལྡོག་གྱུར་པ་རྣམས། །ཐམས་ཅད་འཆི་བདག་དབང་གྱུར་ཡིན། །གང་གི་རྩ་རིས་སྔོན་མེད་དང༌། །ཟླ་བ་ཚེས་པ་ལྟ་བུར་ནི། །དཔྲལ་བའམ་མཆུ་སོའི་སྟེང་ན་སྣང༌། །དེ་ནི་ཟླ་དྲུག་ལས་མི་འཚོ། །ལུས་ཅན་གང་གི་ལུས་ལ་ཆུ། །པདྨའི་འདབ་མ་ལྟ་བུར་ནི། །རྐྱལ་ཚེ་ཆུ་ནི་མི་ཆགས་ན། །དེ་ནི་ཟླ་བ་དྲུག་ལ་འཆི། །སྤྱི་བོར་དུ་བའམ་སྣུམ་བཅས་སྣང༌། །དེ་ནི་ཟླ་བ་གཅིག་ན་འཆི། །སྤྱི་བོའམ་སྨིན་མཚམས་གསར་དུ་ནི། །མཚམས་བྱེ་བ་འམ་གཙུག་འཁྱིལ་སྣང༌། །ནད་མེད་ཞག་ནི་དྲུག་གིས་འཆི། །ནད་པ་ཞག་གསུམ་ནས་འཆི་འགྱུར། །ལྕེ་ནག་ཁ་ནི་མནམ་པ་དང༌། །མིག་གཡས་ཕུགས་སུ་བྲོས་པའམ། །བྱ་ནི་མགོ་ལ་བབས་པ་དག །གང་ཡིན་དེ་ནི་ཡོངས་སུ་སྤང༌། །གང་ཞིག་ཁྲུས་བྱས་བྱུགས་པ་དང༌། །ལུས་ཀུན་གཤེར་བར་གནས་བཞིན་དུ། །སྙིང་ག་ཤིན་ཏུ་མྱུར་བར་སྐེམ། །དེ་ནི་ཟླ་ཕྱེད་ལས་མི་འཚོ། །གློ་བུར་དུ་ནི་ལུས་ཀུན་མདོག །ཅིག་ཅར་ཐ་མལ་པ་ལས་ཉམས། །དེ་བཞིན་ནད་ནི་སོགས་པ་དང༌། །རྩུབ་དང་སྣུམ་འགྱུར་འཆི་བ་ཡིན། །གང་གིས་སོར་མོ་དྲངས་པ་དང༌། །སྒྲ་མི་འབྱུང་ན་དེ་མི་འཚོ། །དེ་བཞིན་ལུད་པ་སྦྲིད་སོགས་ལ། །གང་ཞིག་སྔོན་མེད་སྒྲ་འབྱུང་བའམ། །དབུགས་འབྱིན་རིང་དང་ཐུང་བ་འམ། །དྲི་མ་མནམ་པའམ་དྲི་ཞིམ་འགྱུར། །ལུས་ནི་ཁྲུས་བྱས་མ་བྱས་རུང༌། །མི་མ་ཡིན་པའི་དྲི་འབྱུང་ངམ། །གོས་སྨྲ་དྲི་མར་གྱུར་ན་ཡང༌། །དེ་ནི་ལོ་གཅིག་ནང་དུ་འཆི། །གང་ཞིག་ཤིག་དང་སྦྲང་མ་སོགས། །དྲི་ཞིམ་འདུ་བའམ་དྲི་སངས་སྤངས། །དེ་ནི་ལོ་གཅིག་ལས་མི་འཚོ། །གང་ཞིག་རྟག་ཏུ་ལུས་ཚ་བ། །གྲང་བ་ཉིད་དུ་སྣང་བ་དང༌། །བསིལ་བ་ཤིན་ཏུ་ཚ་བར་སྣང༌། །རྒྱུ་མེད་པར་ནི་རྔུལ་དང་རེངས། །གང་ཞིག་གྲང་བའི་ཆུ་བུར་འབྱུང༌། །ལུས་གྲང་བ་ལས་ཚ་བ་སྐྱེད། །གྲང་གདུངས་ཐན་པ་ལ་མི་དགའ། །དེ་ནི་གཤིན་རྗེའི་དབང་གྱུར་ཡིན། །གང་གི་སྙིང་ག་དྲོད་གྱུར་ལ། །ལྟོ་བ་ཤིན་ཏུ་གྲང་གྱུར་ཅིང༌། །བཤང་བ་འཁྲུ་ཞིང་སྐོམ་དད་ཆེ། །དེ་ནི་རོ་དང་འདྲ་བ་ཡིན། །བཤང་བ་གཅི་བ་མཆིལ་སྣབས་སམ། །ཁུ་ཆུ་ཆུ་ནང་འགྱུར་བ་འམ། །མཆིལ་མ་ཁ་དོག་སྣ་ཚོགས་པ། །གང་ཡིན་དེ་ནི་ཟླ་གཅིག་འཆི། །ས་ནི་ནམ་མཁར་མཐོང་བ་དང༌། །ནམ་མཁའ་སར་ནི་མཐོང་གྱུར་དང༌། །གཟུགས་མེད་གཟུགས་ཅན་ལྟ་བུ་དང༌། །གཟུགས་ཡོད་གཟུགས་མེད་ལྟར་གནས་མཐོང༌། །དེ་བཞིན་འོད་ཅན་འོད་མེད་དང༌། །དཀར་པོ་ནག་དང་ཡོད་པ་མེད། །མིག་ནད་མེད་པར་ཟླ་བ་ནི། །གཟུགས་མང་ར་རི་མེད་མཐོང་དང༌། །གཉིད་མ་ལོག་པར་དྲི་ཟ་སྲིན། །ཡི་དྭགས་གཞན་ཡང་དེ་འདྲ་བའི། །གཟུགས་མི་སྡུག་པ་མཐོང་གྱུར་པ། །གང་ཡིན་དེ་ན་འཆི་བར་འགྱུར། །སྨིན་བདུན་དང་ནི་ཉེར་གནས་པའི། །སྐར་མ་སྒྲིབ་མེད་མ་མཐོང་དང༌། །དགུ་ཚིགས་གུང་ཚུགས་མ་མཐོང་བ། །དེ་ནི་ལོ་གཅིག་ལས་མི་འཚོ། །འབྲུག་སྒྲ་ཆུ་བོའི་སྒྲ་དང་ནི། །གླིང་བུ་པི་ཝང་རྔ་ཡི་སྒྲ། །སྒྲ་གཞན་མེད་ཀྱང་ཐོས་པ་དང༌། །ཡོད་པའང་ཐོས་པར་མ་གྱུར་དང༌། །རྣ་བའི་བུ་ག་བཀག་པ་ན། །འུར་འུར་པོ་ཡི་སྒྲ་མི་ཐོས། །དེ་བཞིན་དྲི་དང་རོ་དང་རེག །གང་ཞིག་ལོག་པར་ཤེས་པ་དང༌། །ཡང་ན་ཡོད་པ་མི་ཚོར་དང༌། །མར་མེ་ཤི་བའི་དྲི་མི་ཚོར། །ཆོ་ག་བཞིན་བྱས་ནད་བསྐྱེད་ལ། །ཆོ་ག་ལོག་པས་བདེར་གནས་དང༌། །གང་གི་ལུས་ནི་རྡུལ་གཡོགས་འདྲ། །ལུས་ལ་བསྣད་པར་མི་ཚོར་དང༌། །དཀའ་ཐུབ་དྲག་དང་ཆོ་ག་ནི། །སྔོན་འགྲོའི་རྣལ་འབྱོར་མེད་པ་རུ། །དབང་པོ་ལས་འདས་ཤེས་པ་སྐྱེ། །དེ་རྣམས་འཆི་བར་ཤེས་པར་བྱ། །སྐད་འགགས་དམན་ཞིང་མི་གསལ་དང༌། །གང་ཞིག་སྐད་ནི་འཛེར་གྱུར་དང༌། །སྨྲ་འདོད་པ་ན་འཕྲལ་དུ་ནི། །བརྗེད་འགྱུར་དེ་ནི་མི་འཚོ་སྤང༌། །སྐད་གསང་ཤིན་ཏུ་ཉམ་ཆུང་འགྱུར། །མདོག་དང་སྟོབས་ནི་ཉམས་པ་དང༌། །རྒྱུ་མེད་པར་ནི་ནད་འཕེལ་བར། །སྣང་བ་དག་ཀྱང་འཆི་བར་བཤད། །སྐད་མདངས་ཉམས་པར་གྱུར་པ་དང༌། །བདག་ཉིད་འཆི་བར་སྨྲ་བ་དང༌། །དེ་འདྲའི་སྒྲ་ནི་ཐོས་པ་དག །རིང་དུ་ཡོངས་སུ་སྤང་བར་བྱ། ལུས་དབྱིབས་དང་ནི་ཚད་དང་ནི། མདོག་གམ་གཟི་མདངས་གང་དག་གི། །གཟུགས་བརྙན་འགྱུར་རམ་རྨི་ལམ་དུ། །མཐོང་ནའང་དེ་ནི་འཆི་བར་འགྱུར། །ཉི་མ་མེ་ལོང་ཆུ་སོགས་ལ། །གང་ཞིག་དབྱིབས་དང་ཚད་དང་ནི། །ལུས་ཀྱི་རྣམ་པར་སྣང་གྱུར་པ། །གཟུགས་བརྙན་ཞེས་ནི་དེ་ལ་བཤད། །མདོག་དང་གཟི་མདངས་ལ་བརྟེན་གང༌། །ལུས་སྟོབས་གཟུགས་བརྙན་ལྟ་བུ་ཡིན། །གང་ཞིག་གཟུགས་བརྙན་བཅད་པ་དང༌། །གྱེས་དང་ལྷག་དང་འཁྲུགས་པ་དང༌། །མགོ་མེད་མགོ་གཉིས་ཡོན་པོ་དང༌། །མི་སྡུག་གཞན་དུ་གྱུར་པ་སྣང༌། །མཚན་ཉིད་ལས་བྱུང་མ་ཡིན་ན། །དེ་ནི་ཚེ་ཟད་ཡིན་ཞེས་བྱ། །གང་གི་མིག་གི་རྒྱལ་མོར་ནི། །གཟུགས་བརྙན་སྣང་བར་མ་གྱུར་དང༌། །ནམ་མཁའ་ལ་སོགས་ལྔ་པོ་ཡི།  །གཟུགས་བརྙན་རྣམ་པ་སྣ་ཚོགས་ལྔ། །ནམ་མཁའ་དྭངས་ཤིང་སྔོ་བ་དང༌། །སྣུམ་བཅས་མདོག་དང་བཅས་པ་ཡིན། །རླུང་ལས་རྡུལ་ཅན་དམར་དང་ནག །ཐལ་མདོག་རྩུབ་ཅིང་མདོག་ཉམས་ཡིན། །མེ་ནི་དམར་ཞིང་དྭངས་པར་སྣང༌། །མདངས་ལྡན་ལྟ་ན་སྡུག་པ་ཡིན། །ཆུ་སྐྱེས་བཻ་ཌཱུརྱ་འདྲར་སྣང༌། །དག་ཅིང་རབ་སྣུམ་བདེ་བ་ཡིན། །ས་ཡི་བརྟན་སྣུམ་དག་པ་ཡིན། །མཐུག་ཅིང་དཀར་དང་སྔོ་བསངས་ཡིན། །རླུང་གི་ནད་འཆི་སྡུག་བསྔལ་སྐྱེད། །གཞན་དག་བདེ་བ་སྐྱེད་པ་ཡིན། །མེ་ཡི་ཐམས་ཅད་མདོག་ཅན་ཡིན། །དེ་ནི་རྣམ་པ་བདུན་དུ་བཤད། །དམར་དང་སེར་དང་དཀར་ནག་པོ། །ལྗང་དང་སྐྱ་དང་གནག་པ་འོ། །དེ་རྣམས་ལས་ནི་གང་གསལ་འགྱུར། །སྣུམ་དང་དྲི་མ་མེད་དེ་དགེ། །དྲི་མ་ཅན་དང་རྩུབ་པ་དང༌། །ཞུམ་པ་སྡུག་བསྔལ་སྐྱེད་པ་ཡིན། །མདངས་ཀྱི་མདོག་ནི་ཟིལ་གྱིས་གནོན། །འོད་ནི་ཁ་དོག་གསལ་བྱེད་ཡིན། །མདངས་ནི་ཉེ་བས་སྣང་བ་དང༌། །འོད་ནི་རིང་ནས་སྣང་བ་ཡིན། །གང་ཞིག་མདངས་དང་ཁ་དོག་ནི། །མཚན་མའི་ཁྱད་པར་མེད་མིན་ཏེ། །མི་རྣམས་མཚན་མ་བཟང་ངན་འབྱུང༌། །དུས་སུ་མདངས་ལ་བརྟེན་པ་ཡི། །གང་ཞིག་རྐང་པ་དྲུག་པ་དང༌། །ཕྲག་པ་ཕོ་བས་འགྲོ་བ་དང༌། །གང་ཞིག་ཕན་ཟས་མང་ཟོས་ཀྱང༌། །གང་ཞིག་སྟོབས་ནི་ཉམས་འགྱུར་དང༌། །གང་ཞིག་ཉུང་ཟོས་བཤང་གཅི་མང༌། །མང་ཟོས་བཤང་གཅི་ཉུང་བ་དང༌། །ཉུང་ཟོས་བད་ཀན་གྱིས་ཉེན་ཅིང༌། །དབུགས་རིང་འབྱིན་ཞིང་ས་ལ་འགྲེ། །གང་ཞིག་དབུགས་ནི་བྱུང་ནས་ནི། །ཐུང་ངུ་དབུགས་ཏེ་ཤུགས་འབྱིན་དང༌། །ཐུང་ངུ་དབུགས་འབྱིན་སྣུམ་པ་ལྟར། །ཤིན་ཏུ་འདར་བར་བྱེད་པ་ཡང༌། །གང་ཞིག་ལག་ངར་བསྐུམས་ནས་ནི། །མགོ་བོ་ལག་པས་འདེགས་པ་དང༌། །གང་ཞིག་དཔྲལ་བ་ལ་རྔུལ་འཛག །ཚིགས་མཚམས་ལྷོད་པར་གྱུར་པ་དང༌། །ཉམས་ཆེའམ་ཉམ་ཆུང་གྱུར་པ་དང༌། །ལྡང་བའི་ཚེ་ན་མི་དྲན་འགྱུར། །གང་ཞིག་གན་རྐྱལ་ཉལ་ནས་ནི། །རྐང་པ་རྣམ་པར་བསྐྱོད་པ་དང༌། །རྩིག་པ་མལ་སྟན་ལ་སོགས་པར། །གང་ཞིག་རྟག་ཏུ་བསྙེས་པ་དང༌། །རྒྱུ་མེད་པར་དགོད་མྱོས་ཚུལ་གྱིས། །མཆུ་ལ་ལྡག་པར་བྱེད་པ་དང༌། །སྒྲ་བཅས་པར་ཡང་གང་བྱེད་དང༌། །ལུས་མདོག་ནག་པོ་སེར་པོ་དང༌། །དམར་པོའི་གཟུགས་བརྙན་སྣང་བ་དང༌། །སྨན་པ་སྨན་དང་ཁ་ཟས་དང༌། །བླ་མ་མཛའ་བཤེས་ལ་སྡང་གང༌། །འདི་དག་ཐམས་ཅད་གཤིན་རྗེ་ཡི། །དབང་འགྱུར་ཡིན་པར་ཤེས་པར་བྱ། །གང་ཞིག་དྲོད་ཆུང་སེམས་གཡེང་དང༌། །རྟག་ཏུ་མདངས་ངན་ཡིད་མི་བདེ། །གང་ཞིག་གཏོར་མ་བྱ་རོག་ལ། །བྱིན་ཀྱང་ཟ་བར་མི་བྱེད་དང༌། །གང་ཞིག་རྒྱུ་མེད་ཡིད་གཞུངས་དང༌། །མཛེས་ཤིང་ལུས་རྒྱས་དཔལ་ཐོབ་བམ། །དེ་ལས་ཉམས་པར་གྱུར་པ་དག །དེ་ནི་གཤིན་རྗེའི་ཁྱིམ་དུ་འཇུག །ཐ་མལ་པ་འམ་ནད་པ་ཡིས། །གང་ཞིག་ཡོན་ཏན་སྐྱོན་རང་བཞིན། །སྔར་ལས་གཞན་དུ་འགྱུར་བར་སྣང༌། །དེ་ནི་ཟླ་དྲུག་ལས་མི་འཚོ། །དད་དང་ཚུལ་ཁྲིམས་དྲན་དང་སྦྱིན། །བློ་གྲོས་སྟོབས་ནི་རྒྱུ་མེད་པར། །འདི་དྲུག་ལས་ནི་ལྡོག་འགྱུར་བ། །ཟླ་བ་དྲུག་ན་འཆི་བར་འགྱུར། །འགྲོ་དང་ཚིག་ནི་སྨྱོན་པ་འདྲ། །འདར་རྨོངས་ཟླ་བ་གཅིག་ན་འཆི། །སྐྲ་ཕྱི་བ་ན་ཚོར་བ་མེད། །ཞག་དྲུག་ནས་ནི་འཆི་བར་འགྱུར། །གང་ཞིག་ལྐོག་ནད་མེད་པ་རུ། །མིད་པར་ཁ་ཟས་མི་ཆུད་དང༌། །བྲན་གཡོག་ལོག་པར་བྱེད་འགྱུར་བ། །དེ་ནི་འཆི་བ་དང་འདྲར་བཤད། །གང་ཞིག་རྟག་ཏུ་གཉིད་པ་འམ། །གཉིད་མེད་དེ་ཡང་མི་འཚོ་འོ། །མཆི་མས་གདོང་ནི་ཁེབས་པ་དང༌། །རྐང་པ་ཤིན་ཏུ་རྔུལ་བ་དང༌། །མིག་ནི་མི་སྡུག་པར་སྣང་བ། །གཤིན་རྗེའི་གནས་སུ་འགྲོ་བར་འགྱུར། །སྔོན་ཆད་དགའ་བའི་དངོས་པོ་གང༌། །དགའ་མི་འགྱུར་བ་དེ་མི་འཚོ། །གང་ཞིག་འཕྲལ་དུ་གྱུར་པ་ཡི། །མཚན་ཉིད་ཐམས་ཅད་སྣང་བ་དང༌། །འཕྲལ་དུ་ལྡོག་པར་གྱུར་པ་དག །དེ་ནི་མོད་ལ་འཆི་བར་འགྱུར། །ཞེས་རྒྱས་པར་བཤད་པ་འབྲེལ་བ་དང་བཅས་པའི་དོན་རྣམས་ཀྱང་རབ་ཏུ་རྟོགས་པར་བྱའོ།།

ཤིན་ཏུ་ཉེ་བའི་འཆི་ལྟས་ལ་འབྱུང་བ་རྣམ་པ་ལྔ་ཐིམ་པའི་ཚུལ་དང༌། དབང་པོ་ལྔ་པོ་རིམ་པས་ཐིམ་པའི་ཚུལ་གཉིས་ཏེ། དེ་ལ་དང་པོ་འབྱུང་བ་ལྔའི་རང་བཞིན་ཅན་གྱི་ལུས་འདི་ཉིད་འཆི་བ་ལ་མངོན་དུ་ཕྱོགས་པ་དེའི་ཚེ་ས་ཆུ་མེ་རླུང་ནམ་མཁའ་རྣམས་རིམ་པས་སྔ་མ་སྔ་མ་དག་ཕྱི་མ་ཕྱི་མ་ལ་ཐིམ་པར་འགྱུར་ཏེ། དེ་ཡང་སའི་ནུས་པ་ཆུ་ལ་ཐིམ་པའི་རྟགས་སུ་གཟུགས་ཀྱི་རྣམ་པ་ཕྲ་རགས་རྣམས་མི་མཐོང་ཞིང༌། དེ་བཞིན་དུ་ཆུའི་ནུས་པ་མེ་ལ་ཐིམ་པའི་རྟགས་སུ་བུ་ག་སྒོ་དགུ་ལ་སོགས་པ་རྣམས་སྐམས་པར་འགྱུར་ལ། མེའི་ནུས་པ་དེ་ཡང་རླུང་གི་རང་བཞིན་ལ་ཐིམ་པའི་རྟགས་སུ་ལུས་ཀྱི་དྲོད་རྣམས་སྡུད་པ་དང༌། རླུང་ནུས་དེ་ཡང་ནམ་མཁའ་ལ་ཐིམ་པའི་རྟགས་སུ་ཕྱི་དབུགས་ཀྱི་འགྱུ་བ་ཆད་པར་འགྱུར་བ་ཡིན་ནོ། གཉིས་པ་འབྱུང་བ་ལྔས་བསྐྱེད་པའི་དབང་པོ་ལྔ་པོ་འདི་ཡང་ཐིམ་པའི་ཚུལ་སྔ་མ་དང་མཚུངས་པར་འགྱུར་ཏེ། ཇི་ལྟར་ཞེ་ན། ཐོག་མར་མིག་གི་དབང་པོ་ཉམས་པར་གྱུར་པའི་དབང་གིས་ཕྱི་རོལ་གྱི་གཟུགས་རྣམས་མི་གསལ་ཞིང་འགག་པར་འགྱུར་ཏེ། ཅིའི་ཕྱིར་ཞེ་ན་གཟུགས་དེ་ཡང་སྒྲའི་རང་བཞིན་ལ་དབྱེར་མེད་དུ་ཐིམ་པར་འགྱུར་བའི་ཚུལ་དང༌། དེ་བཞིན་དུ་རྣ་བའི་དབང་པོ་ཉམས་པར་གྱུར་པ་ཡིས་ནི་སྒྲ་མི་གསལ་ཞིང༌། སྒྲ་དེ་ཡང་དྲི་ལ་ཐིམ་པར་འགྱུར་ལ། སྣའི་དབང་པོ་ཉམས་པར་གྱུར་པ་ཡིས་ནི་དྲི་མི་གསལ་ཞིང་དྲི་དེ་ཡང་རོ་ལ་ཐིམ་པར་འགྱུར་བ་དང༌། ལྕེའི་དབང་པོ་ཉམས་པར་གྱུར་པ་ཡིས་ནི་རོ་མི་གསལ་ཞིང་རོ་དེ་ཡང་རེག་བྱ་ལ་ཐིམ་པར་འགྱུར་བ་དང༌། ལུས་ཀྱི་དབང་པོ་ཉམས་པར་གྱུར་བ་ཡིས་ནི་རེག་བྱ་མི་ཚོར་ཏེ། མཐར་སྲོག་གི་རླུང་ཉིད་ལ་ཐིམ་པ་དང༌། དེ་ཡང་ཡིད་ཀྱི་རྣམ་པར་ཤེས་པ་ལ་ཐིམ་པར་གྱུར་ནས་སྲིད་པ་གཞན་ཉམས་སུ་མྱོང་བར་འགྱུར་བ་ཡིན་ནོ།།

རྒྱུད་སྡེ་རིན་པོ་ཆེ་རྣམས་ལས་རྩ་རླུང་ཐིག་ལེ་སྡུད་རིམ་གྱི་སྒོ་ནས་འཆི་ལྟས་གསལ་བར་བྱེད་པ་དང༌། འབྱུང་བ་ལྔ་ཐིམ་པའི་ཚུལ་ཤིན་ཏུ་རྒྱས་པར་བཤད་ཡོད་ནའང་དེ་དག་ཕལ་ཆེར་ལོ་བརྒྱ་ཐུབ་པའི་དབང་དུ་བྱས་ནས་ལོ་གསུམ་ཕྱོགས་གསུམ་གྱི་འཆི་ལྟས་གཙོ་བོར་མཛད་པ་ཡིན་ལ། འདིར་ཤས་ཆེར་ནད་པའི་དབང་དུ་བྱས་པ་ཡིན་པས་སྡུད་རིམ་རྣམས་གོ་རིམ་བཞིན་མི་འབྱུང་སྟེ། རྣ་བའི་སྒྲ་དོར་ཞག་དྲུག་སྟེ། །ལྕེ་ཡི་རོ་དོར་ཞག་ལྔ་ཡིན། །མིག་དབུས་རི་མོ་ཞག་བཞིའི་ཚེ། །སྣ་ཞོམ་དྲི་དོར་ཞག་གསུམ་མོ། །རེག་བྱ་དོར་བ་ཞག་གཉིས་ཏེ། །ཆོས་ཁམས་ཁུ་བ་ཉམས་པ་ནི། །ཞག་གཅིག་ནས་ནི་ཕ་རོལ་འགྲོ། །དཀར་ཆ་འོག་ཏུ་ལྷུང་བ་སྟེ། །དམར་ཆ་གྱེན་དུ་འགྲོ་བ་ཡིན། །རླུང་རྣམས་སྣ་སྒོ་ནས་འགྲོ་སྟེ། །ཞེས་གསུངས་པ་ལྟར་རོ།།

མཐའ་གཅིག་ཏུ་འཆི་བར་མ་ངེས་པའི་འཆི་ལྟས་ཀྱང་འབྱུང་བར་སྲིད་དེ། རླུང་མཁྲིས་བད་ཀན་གྱིས་བསྡུས་པའི་ནད་ཀྱི་ཚུལ་མི་འདྲ་བ་ཤིན་ཏུ་མང་པོ་ཡོད་པ་དེ་རྣམས་ལས་གང་ཡང་རུང་བ་ལ་བརྟེན་པའི་འཆི་བའི་ལྟས་གོང་དུ་བཤད་པ་རྣམས་ལས་འགའ་ཞིག་མངོན་སུམ་དུ་སྣང་བར་གྱུར་པ་མཐོང་ན་ཡང་སྒྱིད་མི་ལུག་པར་གསོ་བ་ལ་བསྒྲིམས་པས་ནད་རབ་ཏུ་ཞི་བར་འགྱུར་ལ། ནད་དེ་དག་ཞི་བས་ནི་འཆི་ལྟས་ཡང་ཞི་བར་འགྱུར་བའི་ཕྱིར་རོ། །འཆི་ལྟས་འགའ་ཞིག་ཁོ་ནའི་རྗེས་སུ་འབྲངས་ནས་འདོར་བར་མི་བྱའོ། །གོང་དུ་བཤད་པ་ལྟར་ཕལ་ཆེར་ལ་ནད་ཞི་བར་གྱུར་ན་འཆི་ལྟས་ཀྱང་ཞི་བར་འགྱུར་མོད་དུ་ཟིན་ཀྱང༌།

གལ་ཏེ་ནད་ཞི་ན་ཡང་འཆི་བའི་ལྟས་རྣམས་མི་ཞི་བར་བརྟན་པར་གནས་པར་བྱེད་ན་ངེས་པར་འཆི་བར་འགྱུར་ཞིང༌། དེ་བཞིན་དུ་ཕྱི་དང་ནང་དང་གསང་བ་སྲོག་དང་གསུམ་གྱི་ཟུངས་ནི་རིམ་པ་བཞིན་དུ་ཤ་དང་ཟས་དང་རྩ་དང་གསུམ་ཡིན་པས་དེ་གསུམ་ཤོར་བ་སྟེ་ཉམས་པའི་ནད་པ་གང་ཡིན་པ་དེ་ཡང་འཆི་བའི་དུས་བྱེད་པར་འགྱུར་བར་ངེས་ལ་གཞན་ཡང་འགྲོ་བ་ཉམ་ཐག་པའི་ནད་པ་དེ་ཉིད་ལ་གསོ་བ་རིག་པའི་གཞུང་ལུགས་མན་ངག་དང་བཅས་པའི་སྒོ་ནས་སྨན་དཔྱད་ཟས་སྤྱོད་ཀྱི་ཆོ་ག་རྣམ་པ་སྣ་ཚོགས་པ་འབད་པས་བསྒྲུབས་ཤིང་གང་ལ་གང་འཚམ་པའི་བྱ་བ་བྱས་ཀྱང༌། བཅོས་སྐྱེད་མེད་པ་གང་ཡིན་པ་དེ་རྣམས་ནི་འཆི་བདག་གི་དབང་དུ་འགྲོ་བར་ངེས་པ་ཡིན་ནོ།།

ཡན་ལག་བརྒྱད་པ་ལས་ཀྱང༌། སྨན་པས་ནད་པ་གང་ཞིག་ལ། །སྨན་གྱི་བྱ་བ་བྱས་གྱུར་པ། །འབད་ཀྱང་སོས་པར་མ་གྱུར་ན། དེ་ཡི་སྲོག་ནི་རྙེད་པར་དཀའ། །མཁས་ཤིང་མང་དུ་བསྒྲུབས་པ་དང༌། །ཆོ་ག་བཞིན་དུ་སྦྱིན་གྱུར་ཀྱང༌། །སྨན་གྱི་བྱ་བ་མ་གྲུབ་གང༌། །དེ་ལ་གསོ་བའི་ཐབས་མེད་དོ། །གང་ཞིག་སྨན་ནི་སྦྱོར་བའི་ཚེ། །རྒྱུ་མེད་པར་ནི་ཕྱིན་ཅི་ལོག །མདོག་དང་རོ་སོགས་སྤོང་གྱུར་ན། །ནད་མེད་ཡིན་ཡང་དེ་མི་འཚོ། །ཞེས་དང༌། ཉེ་དུ་མཛའ་བོ་རྣམས་ཀྱིས་ནི། །དྲིས་ཀྱང་མཉན་པར་མི་བྱ་བ། །སྨན་པས་སྨྲ་བར་མི་བྱ་ཞིང༌། །དེ་ཡི་གསོ་བ་ཁས་མི་བླང༌། །གཤིན་རྗེའི་ཕོ་ཉ་ཤ་ལ་སོགས། །གཞན་གྱིས་ཉེ་བར་བརྟེན་པ་གང༌། །སྨན་གྱི་སྟོབས་ནི་འཇོམས་པས་ན། །དེ་ཕྱིར་དེ་ནི་ཡོངས་སུ་སྤངས།།

དེ་ལྟར་བཤད་མ་ཐག་པའི་དོན་འབྱུང་བ་ལྔའི་རང་བཞིན་གྱི་ལུས་ཀྱི་ཕུང་པོ་འདི་ཉིད་ངེས་པར་འཇིག་པའི་འཆི་ལྟས་རྣམས་ཤར་བ་དེའི་ཚེ་ནད་དང་ལུས་ཟུངས་དང་དྲི་མ་རྣམས་རང་རང་གི་གནས་དང་ལྡང་ཚད་སོགས་ལས་འཆོལ་བར་འཁྲུགས་པར་གྱུར་ནས་ཕན་ཚུན་གཅིག་གི་གཤེད་གཅིག་གིས་བྱ་སྟེ། སྲོག་གི་དབང་པོ་ལུས་དང་བཅས་པ་འདོར་བའམ་འཇོམས་པར་བྱེད་པའི་ཕྱིར་ཏེ། འདི་ནི་དཔེར་ན་འབྱུང་བ་རྣམས་ཀྱི་བྱ་བ་བྱེད་ལས་དང་བཅས་པ་གཞན་དུ་འགྱུར་བའི་དུས་ཀྱི་རི་རབ་ལ་སོགས་པ་སྣོད་ཀྱི་འཇིག་རྟེན་འཇིག་པར་བྱེད་པའི་ཚུལ་དང་མཚུངས་པ་ཡིན། དེ་ཡང་དོན་མངོན་པ་མཛོད་ལས། དེ་ཡི་སྐྱོན་དང་ཆོས་མཐུན་ཕྱིར། །བཞི་པ་ན་མེད་མི་གཡོའི་ཕྱིར། །མི་རྟག་དེ་ཡི་གཞལ་མེད་ཁང༌། །སེམས་ཅན་བཅས་ཏེ་འབྱུང་འཇིག་བྱེད། བསམ་གཏན་གཉིས་སོགས་གསུམ་པོ་ནི། །མེ་ཡིས་བདུན་ནོ་ཆུ་ཡི་གཅིག །དེ་ལྟར་ཆུ་བདུན་ཐལ་ནས་ཀྱང༌། །མེ་ཡིས་བདུན་ནོ་དེ་ནས་ནི། །མཇུག་ཏུ་རླུང་གིས་འཇིག་པ་ཡིན། །ཞེས་གསུངས་ཤིང་དེ་དག་ཀྱང་སེམས་ཀྱི་ཆོ་འཕྲུལ་འབའ་ཞིག་ལས་འབྱུང་བ་སྟེ། བསམ་གཏན་གྱི་སྐྱོན་རྟོག་དཔྱོད་མེ་ལྟ་བུ་དང༌། དགའ་བདེ་ཆུ་ལྟ་བུ་དང༌། རྣམ་རྟོག་གཡོ་བ་རླུང་ལྟ་བུ་གསུམ་གྱི་བྱེད་པ་ལ་བརྟེན་ནས་འཇིག་པར་བྱེད་པ་ཡིན། སྣོད་ཀྱི་འཇིག་རྟེན་འདི་ཡང་ཐོག་མར་ཆགས་པའི་ཚེ་འབྱུང་བ་ལྔ་པོ་གཅིག་གྲོགས་གཅིག་གིས་བྱེད་ཅིང༌། བར་དུ་གནས་པའི་དུས་ཤེད་མཉམ་དུ་གནས་ལ། མཐར་འཇིག་པའི་ཚེ་གཅིག་གི་དགྲ་གཅིག་གིས་བྱས་ནས་འཇིག་པར་བྱེད་པའི་ཚུལ་ལས་ཀྱི་ནུས་པའམ། རྟེན་ཅིང་འབྲེལ་བར་འབྱུང་བའི་ཚུལ་བསམ་གྱིས་མི་ཁྱབ་པར་མངོན་ནོ།།

དེ་ལྟར་བཤད་པའི་ཉེ་རིང་ལ་སོགས་པའི་འཆི་བའི་ལྟས་རྣམས་མི་ཤེས་པའི་སྨན་པར་ཁས་འཆེ་བ་རྣམས་ཀྱིས་ནི་གསོ་བར་བྱ་བའི་ཡུལ་ནད་པ་སོས་པར་ཁས་བླང་བ་དང་མི་སོས་པར་དོར་བར་བྱ་བའི་ཚུལ་འགག་པར་འགྱུར་ཏེ། ཁ་དམར་འདོགས་མི་ཤེས་ལ། གསོན་གཤིན་གང་དུ་འགྱུར་བའི་ལྟས་དེ་ལས་བླང་དོར་མ་ཤེས་པས་ནི་མཁས་པ་ཞེས་པའི་སྙན་གྲགས་ཐོབ་པ་མ་ཡིན་ཏེ། འཚོ་བར་ཁས་བླངས་པ་དང་འཆི་བར་དུས་བཏབ་པའི་ཐོག་ཏུ་མ་བབས་ན་ས་སྟེང་གཏམ་ངན་པས་ཁྱབ་པར་འགྱུར་ཞིང་སྨན་པ་ཞེས་པའི་མིང་ལས་ཀྱང་ལོག་པར་འགྱུར་བ་དེའི་ཕྱིར་མཁས་པ་ཞེས་བྱ་བའི་མིང་དོན་མཐུན་པར་འདོད་པའི་སྨན་པ་རྣམས་ཀྱིས་གོང་དུ་རྒྱས་པར་བཤད་པའི་འཆི་ལྟས་རྣམས་དང༌། ཁྱད་པར་དུ་ངེས་པ་དང་མ་ངེས་པའི་འཆི་ལྟས་ནི་ཞིབ་ཏུ་རྟོགས་པར་བྱ་དགོས་སོ་ཞེས་བརྩེ་བས་གདམས་པར་མཛད་དོ།།

དེ་བཞིན་དུ་ཡན་ལག་བརྒྱད་པར། ཚེ་ཡི་རིག་བྱེད་འབྲས་བུ་ཀུན། །ཚེ་ཤེས་པ་ལ་གནས་པ་ཡིན། །དེ་བས་འཆི་ལྟས་རྣམ་པ་ཀུན། །སྨན་པས་འབད་དེ་ཤེས་པར་བྱ། །ཚེ་དང་བསོད་ནམས་གཉིས་ཀ་ཟད། །དེ་གཉིས་ཟད་པར་མ་གྱུར་ཀྱང༌། །ཡ་ང་བ་ནི་མ་སྤངས་པས། །སྲོག་ཆགས་རྣམས་ནི་འཆི་བར་བཤད། །ཅེས་བཤད་དོ།།

གོང་དུ་བཤད་པའི་རིང་བ་ལ་སོགས་པའི་འཆི་ལྟས་སྣ་ཚོགས་པ་རྣམས་ཀྱི་ནང་ནས་རྨི་ལམ་དང་རྣམ་འགྱུར་དང་རིང་བ་དང་མ་ངེས་པའི་ལྟས་རྣམས་ནི་མཐའ་གཅིག་ཏུ་འཆི་བ་ཁོ་ནར་མ་ངེས་པ། དེ་རྣམས་སྦྱིན་པ་ལ་སོགས་པའི་བསོད་ནམས་ཀྱི་ཚོགས་དང༌། སྟོང་པ་ཉིད་སྒོམ་པ་ལ་སོགས་ཡེ་ཤེས་ཀྱི་ཚོགས་གསོག་སོགས་རང་གཞན་གྱིས་བགྱིས་པ་དང༌། རྒྱལ་བའི་བཀའ་དྲི་མ་མེད་པ་ཀློག་ཅིང་ཡི་གེར་འདྲི་བ་དང༌། གསང་སྔགས་གསར་རྙིང་ལས་ཇི་ལྟར་འབྱུང་བའི་ལྷག་པའི་ལྷ་སྒྲུབ་ཅིང་གསོལ་བ་གདབ་པ་དང༌། འཆི་ལྟས་དེ་ཉིད་ཕ་རོལ་པོའི་བྱད་དམ་ལྷ་འདྲེ་དྲག་པོའི་འཕྲུལ་ལས་བྱུང་གང་ཡིན་གྱི་གཉེན་པོར་འགྲོ་བའི་སྲུང་བཟློག་སོགས་མདོས་གཏོར་གྱི་རིགས་དང༌། གཞན་ཡང་འཇིག་རྟེན་གྱི་ཡུལ་ལུགས་རང་རང་དང་མཐུན་པའི་རིམ་གྲོ་སོགས་སྔར་ཡི་དམ་དུ་བཅས་པ་རྣམས་ལས་སུམ་འགྱུར་གྱིས་ལྷག་པར་བྱས་ན་འཆི་བ་ལས་བཟློག་པར་འགྱུར་ལ། ཉེ་བ་དང་ངེས་པའི་འཆི་ལྟས་གོང་དུ་བཤད་པ་དེ་རྣམས་ལས་གང་ཡང་རུང་བ་མངོན་སུམ་དུ་སྣང་བ་རྣམས་ལ་ནི་འཆི་བར་ངེས་པའི་སྲོག་བསླུ་བ་ཚེ་ཆོག་ཚེ་སྒྲུབ་ལ་སོགས་པ་ཚེའི་ཆོ་ག་མང་དུ་བྱ་དགོས། དེས་འཆི་བ་ལས་བཟློག་ནུས་པ་སྲིད་པ་ཡིན་ཡང་ཤིན་ཏུ་ཉེ་བའི་འཆི་ལྟས་འབྱུང་བ་རིམ་གྱིས་ཐིམ་པའི་རིམ་པ་དངོས་སུ་མཐོང་བ་རྣམས་ལ་འཆི་བ་ལས་བཟློག་པའི་ཐབས་ཅི་ཡང་མེད་དེ། སེམས་ཅན་གཅིག་གི་ཚེ་ཟད་ན་སངས་རྒྱས་སྟོང་གི་མཐུ་རྡུགས་ཞེས་པ་ལྟར་འཆི་བའི་དུས་བྱེད་པ་ལས་གཞན་དུ་ཐབས་ཡོད་པ་མ་ཡིན་ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་ལུས་ཀྱི་འཇིག་ལྟས་བསྟན་པའི་ལེའུ་སྟེ་བདུན་པའོ།། །།

མཐའ་མའི་འདོན་ཐེངས་།: 05.09.2023 ཉིན། 9:55 AM