ལེའུ་བདུན་པ། ལུས་ཀྱི་འཇིག་ལྟས་བསྟན་པ། 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག ལུས་ཀྱི་འཇིག་ལྟས་རྣམ་པ་བཞི་ཡིན་ཏེ། །རིང་དང་ཉེ་བ་མ་ངེས་ངེས་པའོ།།

རིང་ལྟས་ཕོ་ཉ་རྨི་ལམ་རྣམ་འགྱུར་གསུམ། །ཕོ་ཉ་ཡ་མཚན་ཅན་དང་དགེ་སྦྱོང་དང༌། །རིགས་མཐུན་པ་ནི་ནད་པ་སོས་པའི་རྟགས། །དེ་ལས་ལྡོག་པ་འགྲུབ་པར་མི་འགྱུར་ཏེ། །འཇིགས་རིངས་དངངས་ཤིང་རྡོ་དང་བོང་བ་ཉེད། །རིང་ནས་འབོད་ཅིང་སྡིག་པའི་ལས་ལ་སྤྱོད། །བཀྲ་མི་ཤིས་པའི་རྒྱན་དང་སྨྲ་བརྗོད་བྱེད། །དེ་ལྟ་བུ་ཡི་ཕོ་ཉས་ལས་མི་འགྲུབ། །སྨན་པ་སེམས་རྩུབ་མི་ཤིས་སྨྲ་བ་དང༌། །གཅོད་བཤིག་མཚུན་གཏོར་སྦྱིན་སྲེག་བྱེད་པའི་དུས། །ཕོ་ཉ་འོངས་པ་ནད་པ་འཆི་བའི་ལྟས། །ཚེས་དྲུག་བཞི་དགུ་ཉི་ཟླ་གཟའ་ཟིན་དང༌། །གཟའ་སྐར་ངན་དང་མཚན་མོ་ལམ་འཇུག་ངན། །འགྲོ་ཚེ་ལམ་དུ་ཆད་ཚིག་ཆག་པ་དང༌། །ངུ་བསད་སྨྲ་བ་ཐོས་དང་མཐོང་བ་དང༌། །བྱི་ལ་སྤྲེ་འུ་སྲམ་སྦྲུལ་ལམ་བཅད་ཅིང༌། །བཀྲ་མི་ཤིས་པ་གང་མཐོང་ངན་པའི་ལྟས། །དགེ་བ་འབྲུ་དང་ཞོ་སོགས་སྣོད་གང་དང༌། །དྲིལ་བུ་མར་མེ་མེ་ཏོག་འབྲས་ཡོས་ཟན། །ལྷ་ཡི་སྐུ་དང་ལུས་ཀྱི་རྒྱན་དཀར་པོ། །ཆོས་སྤྱོད་པ་དང་རྒྱལ་མཚན་བསྒྲེང་བ་དང༌། །མེ་འབར་རྟ་ལུག་བ་སོགས་ཕྲུག་གུར་བཅས། །ཡིད་དུ་འོང་བའི་སྒྲ་འམ་བཟའ་བཏུང་རྒྱན། །དེ་དག་ལམ་དུ་མཐོང་ངམ་ཁྱིམ་དུ་འཇུག །དགེ་ལྟས་ནད་པ་སོས་པའི་མཚན་ཉིད་ཡིན། །ཞོ་ཕྲུམ་ལ་སོགས་ཁྱིམ་ནས་ཕྱིར་འབྱུང་དང༌། །རླུང་མེད་མེ་ཤི་སྣོད་ཆག་ངན་པའི་ལྟས། །རྨི་ལམ་བྱི་ལ་སྤྲེའུ་སྟག་དང་ཝ། །རོ་ལ་ཞོན་རྨིས་འཆི་བདག་ཟིན་པའི་རྟགས། །མ་ཧེ་རྟ་ཕག་བོང་བུ་རྔ་མོ་ལ། །གཅེར་བུར་ཞོན་ནས་ལྷོ་ཕྱོགས་འགྲོ་རྨིས་འཆི། །སྤྱི་བོར་ལྕུག་མ་སྐྱེས་ཏེ་བྱ་ཚང་བཅས། །ཏཱ་ལ་ཚེར་མ་ཅན་ཤིང་སྙིང་གར་སྐྱེས། །པདྨ་ཕྱུང་དང་གཡང་ལྷུང་དུར་ཁྲོད་ཉལ། །མགོ་ཆག་བྱ་རོག་ཡི་དྭགས་རྨེ་ཅན་བསྐོར། །རྐང་ལྤགས་ལྷུང་དང་མ་ཡི་མངལ་དུ་འཇུག །ཆུས་ཁྱེར་འདམ་བྱིང་ཉ་ཡིས་མིད་པ་དང༌། །ལྕགས་གསེར་རྙེད་དང་ཚོང་དང་འཐབ་མོ་ཕམ།།བྲོ་བའི་ཁྲལ་དེད་བག་མ་ལེན་པ་དང༌། །གཅེར་བུར་འདུག་དང་སྐྲ་དང་ཁ་སྤུ་བྲེགས། །གཤིན་དང་ལྷན་ཅིག་ཆང་འཐུང་དེས་འདྲུད་དང༌། །གོས་དང་ཕྲེང་བ་དམར་པོས་བརྒྱན་པ་ཡི། །གཤིན་པོ་དག་དང་ལྷན་ཅིག་གར་བྱེད་པ། །དེ་དག་འཆི་བདག་དབང་དུ་སོང་བའི་ལྟས། །དེ་ལ་སོགས་ཏེ་རྨི་ལམ་མི་བཟང་བ། །ཡིད་འཇུག་བུ་ག་ནད་ཀྱིས་བཀག་ཕྱིར་མཐོང༌། །རྒྱུན་དུ་རྨི་བའི་ནད་པ་འཆི་འགྱུར་ཏེ། །ནད་མེད་མ་ངེས་རིམ་གྲོས་ཐར་བར་འགྱུར། །མཐོང་ཐོས་མྱོང་དང་གསོལ་བ་བཏབ་པ་དང༌། །གྲུབ་པ་ནད་ལས་བྱུང་དང་རྣམ་པ་དྲུག །མཚན་སྟོད་རྨི་ལམ་བརྗེད་ངས་འབྲས་བུ་མེད། །ཐོ་རངས་མཐོང་དང་གསལ་ན་འབྲས་བུ་འབྱིན། །ལྷ་དང་ཁྱུ་མཆོག་སྐྱེས་བུ་གྲགས་པ་ལྡན། །མེ་འབར་མཚོ་དང་ལུས་ཁྲག་མི་གཙང་བྱུགས། །གོས་དཀར་གྱོན་དང་འཕན་གདུགས་ཤིང་འབྲས་རྙེད། །རི་བོ་ཁང་བཟང་འབྲས་བཅས་ཤིང་ལ་འཛེག །སེང་གེ་གླང་ཆེན་རྟ་དང་བ་ལང་ཞོན། །ཆུ་བོ་མཚོ་རྒལ་བྱང་ཤར་འགྲོ་བ་དང༌། །ཉམ་ང་ལས་ཐར་དགྲ་བོ་ཕམ་པ་དང༌། །ལྷ་དང་ཕ་མས་མཆོད་པ་བྱེད་པ་རྣམས། །གང་རྨིས་ཚེ་རིང་ནད་མེད་ནོར་རྙེད་འགྱུར། །ཐ་མལ་རྣམ་འགྱུར་འཆི་བའི་ལྟས་བསྟན་པ། །སྨན་པ་སྨན་དང་བླ་མ་མཛའ་བཤེས་སྡང༌། །རྒྱུ་མེད་ཡིད་གཞུངས་མཛེས་རྒྱས་དཔལ་ཐོབ་བམ། །དེ་ལས་གོ་ལྡོག་འཆི་བར་འགྱུར་བའི་ལྟས། །རྟག་ཏུ་མདངས་ངན་བློ་སེམས་མི་བདེ་ཞིང༌། །གཏོར་མ་བྱ་རོག་བྱིན་ན་མི་ཟ་དང༌། །ཁྲུས་བྱས་སྙིང་ག་མྱུར་སྐམ་ཆུ་མི་ཆགས། །གང་གི་སོར་མོ་དྲངས་པས་སྒྲ་མི་འབྱུང༌། །ཟས་ཟོས་སྟོབས་ཆུང་ལུས་ཀྱི་དྲི་མ་འགྱུར། །ཤིག་སྲོ་འདུ་འམ་ཡང་ན་སྤོང་འགྱུར་འཆི། །འདོད་རྨོངས་ཁྲོ་བ་སྔར་ལས་གོ་ལྡོག་ཅིང༌། །སྔར་སྤྱོད་སྐྱོན་ཡོན་རྣམ་པ་གཞན་འགྱུར་ན། །མི་དེ་འཆི་བདག་དབང་དུ་སོང་ཞེས་བྱ། །ཉི་མ་མེ་ལོང་ཆུ་དང་ནམ་མཁའ་ལ། །གཟུགས་བརྙན་མགོ་བཅད་ཡན་ལག་མེད་ན་འཆི།།

དེ་ནས་ཉེ་བའི་ལྟས་ལ་རྣམ་གཉིས་ཏེ། །ཉེ་བ་དང་ནི་ཤིན་ཏུ་ཉེ་བའོ། །ཉེ་བའི་ལྟས་ལ་དུག་མཚོན་མ་ཕོག་པར། །བུ་ག་དགུ་ནས་ཁྲག་འཛག་སྨྲས་འཕྲལ་བརྗེད། །མཇེ་ནུབ་རླིག་པ་འཕྱང་ངམ་གོ་ལྡོག་དང༌། །ལུད་པ་སྦྲིད་པ་སྔོན་མེད་སྒྲ་འབྱུང་དང༌། །མར་མེ་ཤི་བའི་དྲི་མ་མི་ཚོར་དང༌། །སྐྲ་ཕྱིས་ཚོར་མེད་སྤྱི་བོར་སྣུམ་བཅས་སྣང༌། །སྐྲ་སྨིན་གསར་དུ་མཚམས་བྱེ་རྩུབ་འཁྱིལ་དང༌། །དཔྲལ་བ་ཆུ་སོར་ཟླ་ཚེས་རྩ་རིས་སྣང༌། །དབང་པོ་ཡུལ་ལྔ་ཐ་མལ་རྒྱུ་མེད་པར། །རྣམ་པར་འགྱུར་ཏེ་ཡོད་མེད་གོ་ལྡོག་སྣང༌། །ལག་ངར་སྨིན་དབྲག་གཏད་པ་མི་མཐོང་དང༌། །མིག་བཙིར་འོད་མེད་རི་བོང་འབོས་ནོན་འདྲ། །ཁུང་དུ་བྲོས་སམ་རྒྱལ་མོའི་མདངས་ཉམས་འཆི། །རྣ་བ་ཧྲིད་འབྱར་ཨུཏྟ་ཆད་པ་དང༌། །མགོ་བོའི་རླངས་པའི་གྲིབ་མ་མེད་ན་འཆི། །སྣ་བུག་གདངས་ཤིང་བ་སྐྱ་ཆགས་པ་དང༌། །ལྕེ་གཞུང་ནག་ལ་སྐམ་ཐུང་སྨྲ་མི་ཤེས། །མ་མཆུ་འཕྱངས་དང་ཡ་མཆུ་བརྫེས་པ་དང༌།།གདོང་ལ་རྡུལ་ཆགས་དབུགས་གྲང་སོ་དྲེག་ཆགས། །གྱེན་དུ་དབུགས་བརྩེག་དྲོད་ཡལ་འཆི་བ་ཡིན། །ལུས་པོ་གྲང་ལ་ཚ་བ་སྐྱེ་བ་དང༌། །གྲང་བས་གདུངས་ནས་ཚ་བ་སྤོང་བ་དང༌། །དེ་བཞིན་ཚ་བས་གདུངས་ནས་གྲང་བ་སྤོང༌། །ཆོ་ག་བཞིན་བྱས་ནད་ལ་སྐྱེད་མེད་ཅིང༌། །ཆོ་ག་ལོག་པས་བདེ་བར་གནས་སྙམ་བྱེད། །དེ་དག་འཆི་བའི་ལྟས་སུ་བཤད་པ་ཡིན། །ཤིན་ཏུ་ཉེ་བ་འབྱུང་བ་རྣམ་པ་ལྔ། །དབང་པོ་ལྔ་པོ་རིམ་པས་ཐིམ་པ་སྟེ། །ས་ནུས་ཆུ་ལ་ཐིམ་པས་གཟུགས་མི་མཐོང༌། །ཆུ་ནུས་མེ་ལ་ཐིམ་པས་བུ་ག་སྐམ། །མེ་ནུས་རླུང་ལ་ཐིམ་པས་དྲོད་རྣམས་སྡུད། །རླུང་ནུས་མཁའ་ལ་ཐིམ་པས་ཕྱི་དབུགས་ཆད། །མིག་གི་དབང་པོ་ཉམས་པར་གྱུར་པ་ཡིས། །གཟུགས་མི་གསལ་ཞིང་སྒྲ་ལ་ཐིམ་པར་འགྱུར། །རྣ་བའི་དབང་པོ་ཉམས་པར་གྱུར་པ་ཡིས། །སྒྲ་མི་གསལ་ཞིང་དྲི་ལ་ཐིམ་པར་འགྱུར། །སྣ་ཡི་དབང་པོ་ཉམས་པར་གྱུར་པ་ཡིས། །དྲི་མི་གསལ་ཞིང་རོ་ལ་ཐིམ་པར་འགྱུར། །ལྕེ་ཡི་དབང་པོ་ཉམས་པར་གྱུར་པ་ཡིས། །རོ་མི་གསལ་ཞིང་རེག་ལ་ཐིམ་པར་འགྱུར། །ལུས་ཀྱི་དབང་པོ་ཉམས་པས་རེག་མི་ཚོར།།

མ་ངེས་འཆི་ལྟས་ནད་ཚུལ་མང་པོ་ལས། །འཆི་བའི་ལྟས་རྣམས་སྣང་བར་གྱུར་ན་ཡང༌། །ནད་ཞི་བས་ནི་འཆི་ལྟས་ཞི་འགྱུར་རོ།།

ཞི་ཡང་ལྟས་བརྟན་གནས་ན་ངེས་པར་འཆི། །ཕྱི་ནང་སྲོག་ཟུངས་ཤ་ཟས་རྩ་དང་གསུམ། །ཤོར་བའི་ནད་པ་གང་ཡིན་འཆི་བར་ངེས། །ནད་ལ་ཆོ་ག་སྣ་ཚོགས་བསྒྲུབས་བྱས་ཀྱང༌། །བཅོས་སྐྱེད་མེད་པ་འཆི་བར་ངེས་པ་ཡིན། །དེ་ལྟར་ཕུང་པོ་འཇིག་པའི་འཆི་ལྟས་རྣམས། །ནད་དང་ལུས་ཟུངས་དྲི་མ་འཁྲུགས་གྱུར་ནས། །གཅིག་གཤེད་གཅིག་གིས་བྱས་ཏེ་སྲོག་འདོར་ཕྱིར། །འབྱུང་འགྱུར་དུས་ཀྱི་རི་རབ་འཇིག་དང་མཚུངས། །འཆི་ལྟས་མི་ཤེས་གསོ་བ་བླང་དོར་འགག །དེ་མ་ཤེས་པས་སྙན་གྲགས་ཐོབ་མ་ཡིན། །དེ་ཕྱིར་མཁས་འདོད་འཆི་ལྟས་རྟོགས་པར་བྱ། །རྨི་ལམ་རྣམ་འགྱུར་རིང་དང་མ་ངེས་ལྟས། །ཚོགས་གསོག་ཀློག་སྒྲུབ་ཡི་དམ་སུམ་འགྱུར་བཟློག །ཉེ་དང་ངེས་པའི་ལྟས་ལ་འཆི་བསླུ་བྱ། །ཤིན་ཏུ་ཉེ་བའི་ལྟས་ལ་ཟློག་ཐབས་མེད། །ཅེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་འཇིག་ལྟས་བསྟན་པའི་ལེའུ་སྟེ་བདུན་པའོ།། །།

མཐའ་མའི་འདོན་ཐེངས་།: 14.12.2022 ཉིན། 10:55 AM