ལེའུ་བཅོ་ལྔ་པ། གནས་སྐབས་ཀྱི་སྤྱོད་ལམ་བསྟན་པ།

དེ་ནས་འཚོ་མཛད་སྨན་པའི་རྒྱལ་པོས་བཀའ་སྩལ་(བསྩལ་)པ། དཔྱད་བུ་ལ་སོགས་གསོ་བ་འཛིན་པ་ཀུན། །གསུམ་པ་གནས་སྐབས་སྤྱོད་པ་བསྟན་པ་ནི། །

བཀྲེས་བཀག་ལུས་ཞིག་ཉམ་ཆུང་ཡི་ག་འཆུས། །མགོ་འཁོར་དེ་ཟས་ཡང་སྣུམ་དྲོ་ཆུང་སྦྱར། །སྐོམ་བཀག་ཁ་སྐམ་མགོ་འཁོར་སྙིང་ནད་འབྱུང༌། །མྱོས་(སྨྱོ་)འགྱུར་དེ་བསལ་ཆོ་ག་ཐམས་ཅད་ཕན། །སྐྱུགས་བཀག་དང་ཁ་འགག་དང་དབུགས་མི་བདེ། །སྐྱ་སྦབ་(རྦབ་)མེ་དབལ་གཡན་པ་འབྲས་དང་མཛེ། །མིག་ནད་ལུད་པ་རིམས་ནད་འབྱུང་བར་འགྱུར། །སྙུང་(སྨྱུང་)གནས་དུད་རྣོན་ཁ་བཀང་དབོ་བར་བྱ། །སྦྲིད་བཀག་དབང་པོ་མི་གསལ་མགོ་བོ་ན། །གཉའ་བ་རེངས་དང་ཁ་ཡོ་འགྲམ་ཆག་འགྱུར། །དུར་(དུད་)རྣོན་སྣ་སྨན་ཉི་མ་ལྡ་(བལྟ་)བས་གསལ(བསལ)། །གཡལ་བཀག་དེ་འདྲ་ཆོ་ག་རླུང་འཇོམས་ཕན། །ངལ་དུབ་དབུགས་བཀག་སྐྲན་དང་སྙིང་ནད་འབྱུང༌། །མྱོས་(སྨྱོ་)འགྱུར་དེར་ནི་ངལ་གསོ་རླུང་སེལ་ཕན། །གཉིད་བཀག་ལུས་རྙོང་(སྙོམ་)གཡལ་མང་མགོ་བོ་ལྗི(ལྕི)། །མིག་འགྲིབ་ཁ་ཟས་མི་འཇུ་ཤ་ཁུ་དང༌། །ཆང་འཐུང་བསྐུ་མཉེ་བྱ་ཞིང་གཉིད་ལོག་ཕན། །ལུད་པ་བཀག་པས་ལུས་(ལུད་)འཕེལ་དབུགས་མི་བདེ། །ཤ་སྐེམ་སྐྱེགས་(སྐྱིགས་)བུ་སྙིང་ནད་ཡི་ག་འཆུས། །དེར་ནི་ལུད་པ་བསལ་བའི་ཆོ་ག་བྱ། །མཆི་མ་བཀག་པས་སྙིང་དང་མགོ་བོ་ན། །སྣ་ཆུ་འཛག་ཅིང་མགོ་འཁོར་ཡི་ག་འཆུས། །དེ་ལ་ཆང་འཐུང་གཉིད་ལོག་གཏམ་སྙན་ཕན། །ཕྱེན་བཀག་(རྟུག་སྐམས་ཕྱེན་དང་བཤང་བ་འགག །སྐྲན་གཟེར་མིག་རྟུལ་དྲོད་ཆུང་སྙིང་ནད་འགྱུར། །བཤང་བ་བཀག་པས་ཁ་རུ་མི་གཙང་འབྱུང༌། །ཀླད་པ་ན་ཞིང་ཉ་(ཉྭ་)འགྱུར་ཆམ་པས་འདེབས། །སྔར་བཤད་ནད་འབྱུང་གཅིག་(གཅིན་)བཀག་རྡོལ་(རྡེའུ་)ནད་འབྱུང༌། །ཆུ་སོ་ཕོ་མཚན་དཀུ་ན་སྔར་ནད་འབྱུང༌། །དེ་སྨན་རེང་བུ་མས་བཏང་ལུས་བཅིང་དང༌། །བསྐུ་བྱུག་དུགས་དང་སྨན་མར་བསྟན་(བསྟེན་)པར་བྱ། །ཁུ་བ་བཀག་པས་དེད་(དེ་)འཛག་ཕོ་མཚན་ན། །ཆུ་འགག་རྡེའུ་འཕེལ་དང་མ་ནིང་འགྱུར། །མས་གཏོང་ལུས་བཅིང་བུད་མེད་སྤྱད་པར་བྱ། །ཏིལ་མར་འོ་མ་ཁྱིམ་བྱའི་ཤ་ཆང་གཏང༌། །དེ་ལྟར་ཤུགས་དང་བཀག་དང་རྩིར་(བཙིར་)བ་ཡིས། །ནད་ཀུན་འབྱུང་འགྱུར་འཕྲལ་དུ་རླུང་འཁྲུག་(འཁྲུགས་)པས། །དེ་ཕྱིར་དེ་ཡི་ཟས་དང་སྨན་སྐོམ་སྦྱར། །ནད་གང་སྙུང་(སྨྱུང་)དང་ཞི་བས་གཞུ་(བཞུ་)བྱས་ཀྱང༌། །རོ་ནི་ལྡང་སྲིད་ལེགས་སྦྱང་སླར་མ་(མི་)འབྱུང༌། །དེ་ཕྱིར་དགུན་བསགས་གྲང་ནད་དཔྱིད་དུ་(དུས་)སྦྱངས། །སོས་བསགས་དབྱར་སྦྱང་དབྱར་བསགས་སྟོན་དུས་སྦྱང༌། །ལེགས་པར་སྦྱངས་པས་རོ་ཐོན་ནད་མེད་འགྱུར། །རྟག་ཏུ་ཕན་པའི་ཟས་དང་སྤྱོད་ལམ་རྣམས། །ཉམས་ལྡན་བསྟེན་པར་བྱེད་ན་ནད་མི་འབྱུང༌། །ནད་ཀུན་མི་སྐྱེ་སྐྱེས་པ་ཞི་བྱའི་ཕྱིར། །གནས་སྐབས་སྤྱོད་པའི་ཆོ་ག་འདི་ཉིད་བསྔགས། །ཞེས་གསུངས་སོ། །

གསོ་བྱེད་དཔྱད་འབུམ་ཁྲ་བོ་ལ་(ལས་)གནས་སྐབས་སྤྱོད་པ་བསྟན་པའི་ལེའུ་སྟེ་བཅོ་ལྔ་པའོ།། །།

མཐའ་མའི་འདོན་ཐེངས་།: 30.05.2023 ཉིན། 11:19 AM