ལས་ལྔ་ནི་རུ་ཧ་ལ་སྤང་ཡུལ་དང༌། །ཕན་ཡོན་དང་སྦྱོར་བ་དང་ཇི་ལྟར་བཏང་བའི་ཚུལ་ལོ། །སྤང་ཡུལ་ནི་གཞང་ལུག་འཁྲུ་བ་འབྱམས་པ་དང༌། །ཚད་པ་གསར་བ་དང་མེ་དྲོད་ཉམས་པ་ས་བོན་འཛག་ལ་སྤང༌ངོ་།།

ཕན་ཡོན་ནི་སྤྱི་དང་བྱེ་བྲག་རྣམ་པ་གཉིས་ལས། །དང་པོ་སྨད་དུ་མཚོན་ཕོག་རྟུག་སྐམས་དང༌། །གླང་ཐབས་སྨད་ཚད་དྲི་ཆུ་བསྡམ་པ་དང༌། །ལྟོ་སྦོས་སྲིན་ནད་སྐྲན་གསར་རིམས་རྙིང་དང༌། །ཁྱད་པར་ནད་སྟོབས་ཆེ་ལ་རྣོན་པོ་བསྔགས།།

གཅིན་སྙི་ཚད་པས་འཁྲུ་དང་གསོ་དཀའི་རིམས། །དྲེག་འོར་ཁུ་བ་ཟད་པ་འཇམ་པོས་སེལ།།

སྦྱོར་བ་བར་མ་དང་རྣོ་བ་དང་འཇམ་པ་དང་རྣམ་པ་གསུམ་ཡིན་པའི། །བར་མ་རྣོ་བ་ནི་དུར་བྱིད་ལུག་སུག་པ་བུལ་ཏོག་ཕབས། །བྱང་པ་དམར་ཁྲ་དུད་པ་གདུང་གསེབ་ཀྱི་ས་མ་འདྲེས་པ་བ་ཆུ་ཆང་བསིངས་ཀྱི་སྙིགས་མ་རྣམས་སྦྱར། །མཚོན་ཕོག་མཁྲིས་པ་ཉྭ་ལོག་དང་གླང་ཐབས་རྣམས་ལ་དབྱི་མོང་དཀར། །སྨད་ཚད་ལ་ལྕུམ་རྩ་ལྟོ་བ་སྦོས་པ་ལ་ཨུག་ཆོས་དམར་པོ་སྡེབ། །སྲིན་ལ་སྒོག་སྐྱ་དང་གྲང་བ་ལ་པི་པི་ལིང༌། །ནད་སྟེང་ཁ་བསྒྱུར་ནི་རྣོན་པོ་བྱེད་ན་རེ་ལྕག་པ་ཐམས་ཅད་ལ་བསྣན། །འཇམ་པོ་བྱེད་ན་ཐམས་ཅད་ལ་ཨ་རུ་ར་དང་སེང་ཕྲོམ་བཙོད། །ཀྱི་ལྕེ་དུར་བྱིད་ལྕུམ་རྩ་བའི་འོ་མ་དང་བ་ཆུའོ།།

བཏང་ཐབས་བྲེ་ཕྱེད་ཕུལ་བཞི་ཕུལ་ལུ་དོ། བཞོས་ཐོག་འོ་མའི་དྲོད་ཙམ་བསྲོས་འབྲུ་མར་ཅོར་ཅིག་བླུག །གྲོད་པ་བཀང་ལ་དེའི་ཁར་གཅེ་འུ་ཚད་ལྡན་རྩེ་མོའི་སྦུབས་སྲན་མ་ཤོང་ཙམ་ལ་རྩ་བའི་སྦུབས་མཐེ་བོང་ཤོང་བ་དང་རྩ་བ་ནས་མཐོ་གང་རྩེ་མོ་ནས་སོར་བརྒྱད་ཀྱི་མཚམ་དུ་འཕང་ལོ་ཡོད་པ་གཞུག །ནད་པ་སྔས་སྨད་སྒུར་ལ་གསེང་བཤང་ལམ་བུག་སར་སྣུམ་བྱུགས་ཏེ། །གྲོད་པའི་དབུགས་བཏོན་ནས་རྐུབ་བམ་བཤང་ལམ་མ་སྣད་པར་དལ་བུས་སོར་བཞི་རྐུབ་ཀྱི་ནང་དུ་གཞུག །སླར་ཐུར་མ་དེ་ཅུང་ཟད་ཅིག་ཕྱིར་ལ་འཐེན་བསྣུར་ནས་གྲོད་པ་དལ་བུར་བཙིར་ལ་ཡར་བཏང༌། །གལ་ཏེ་འགྲོར་མ་འདོད་ན་གཡས་དང་གཡོན་དང་སྟེང་དང་འོག་ཏུ་གཅུ། །གྲོད་པའི་ནང་གི་སྨན་ལྷག་མ་ཅུང་ཟད་རླུང་ཡོད་པས་རྫོགས་པར་མི་བཏང་ལྷག་མ་ཅུང་ཟད་བཞག །དེ་མ་ཁད་གཅེ་འུ་བཏོན་ལ་འཕོངས་སུ་རས་ལྟོ་བརྡིག་རས་བསྒྲིལ་བས་རྐུབ་ལ་ཐེམས་ཚངས་བརྒྱག་པ་ཡིན། །གཞོགས་གཡོན་འོག་བཅུག་ནས་སྨན་མར་འགྲེམས་པ་དེ་ཡར་ལ་ལན་ཉིས་སམ་ལན་གསུམ་ཙམ་བཟློག །མ་བཟློགས་ན་མི་ཐེབས་ལོག་དྲགས་ན་ལ་རྒལ་འགྱུར། །གལ་ཏེ་སྨན་ཁོང་པར་འཛིན་མི་ཐུབ་ན་ཙོག་པུར་འདུག་ལ་སྣོད་དུ་སྨན་ཕྱིར་བཏང་། །སྨན་ཕྱིར་བཏང་བ་དེ་བཙོག་པ་དང་འདྲེས་པའི་སྐྱོ་མའདུར་རེའམ་གོང་བུའམ་ཁུ་བ་དང་སྦྲགས་པ་ཅོལ་ལེ་བྱུང་ན་ཐེབས། །མ་ཐེབས་པར་མར་བཏང་བ་དེ་ཆུ་རུ་ལོག་ན་སླར་བསྐྱར་ལ་བཏང༌། །སྨན་རོ་བདའ་ཕྱིར་རྒྱམ་ཚྭའི་ཆུ་སྐོལ་ཁ་ནས་བཏུང༌། །ཞག་གཅིག་ལྟོ་མི་ཟ་བར་སྐྱུང་དེས་ནི་སྨད་ནད་ཀུན་འདྲེན་པའི་མཆོག་ཡིན་ནོ། །ཅེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལས་ལྔ་ནི་རུ་ཧའི་ལེའུ་སྟེ་བཅོ་བརྒྱད་པའོ།། །།

མཐའ་མའི་འདོན་ཐེངས་།: 23.02.2021 ཉིན། 4:13 PM