ལེའུ་བཅུ་བདུན་པ། ལས་ལྔ་འཇམ་རྕི་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག།

ལས་ལྔ་འཇམ་རྩི་ནི་རུང་བ་དང་མི་རུང་བ་དང༌། །སྦྱོར་བ་དང་བཏང་ཐབས་དང་ཕན་ཡོན་དང་ཉེས་དམིགས་སོ།།

འཇམ་རྩི་རུང་བ་ནི་རླུང་སྐྲན་ལྟོ་སྦོས་རྩམ་པ་འཁྲུ། །ཁུ་བ་ཟད་པ་དང་ཟླ་མཚན་འབྱམས་པ་དང༌། །རྒྱུ་ལོང་མཁལ་རྐེད་གྲང་བ་རྒྱས་པ་དང༌། །སྟོབས་ཆུང་སྨད་སྲིན་རླུང་ནད་ཀུན་ལ་བཏང༌།།

འཇམ་རྩི་མི་རུང་བ་ནི་དམུ་འོར་ནད་དང་ཡི་ག་འཆུས། །དུག་ནད་མཆིན་པ་རྒྱུ་ལོང་སྣོད་ཚད་དང༌། །ཚིལ་ཆེས་མ་ཞུ་བད་ཀན་རྒྱས་ལ་སྤང༌།།

སྦྱོར་བ་སླེ་འཇམ་དང་བཀྲུ་འཇམ་དང་བཀྲུ་མ་སླེན་གསུམ། །དེ་གསུམ་པོ་རླུང་རྐྱང་པ་དང་མཁྲིས་པ་ལྡན་པ་དང་རླུང་དང་བད་ཀན་ལྡན་པ་ལ་རིམ་པས་སྦྱར།།

དང་པོ་རླུང་རྐྱང་པ་ལ་ལུག་ཤ་དང་འབྲི་ཡི་འོ་མ་དང་དེའི་མར། །རུ་རྟ་དེ་བ་དཱ་རུ་གཙང་འགྲམ་སྟུག་པོར་སྒྲོན་ཤིིང་དང་པི་པི་ལིང༌། །རྒྱམ་ཚྭ་ཨ་རུ་ར་སྦྱར་སླེ་འཇམ་ཡིན།།

གཉིས་པ་རླུང་མཁྲིས་ལྡན་ལ་ཆུར་གནས་ཉ་སྦལ་ལྕོང་སོགས་ཀྱི་ཤ་ཁུ་དང་བའི་འོ་མ་དང་དེའི་མར། །གོང་གི་སྨན་གྱི་སྟེང་དུ་དུར་བྱིད་སྦྱར་བ་བཀྲུ་འཇམ་མོ།།

གསུམ་པ་བད་རླུང་བ་ལ་མེད་པའི་སྐམ་སའི་ཤ་ཁུ་རའི་འོ་མ་དང་མར། །གོང་གི་སྨན་གྱི་སྟེང་དུ་སོ་ཆ་སྦྱར་བ་བཀྲུ་མ་སླེན་ཡིན་ནོ།།

བཤད་མ་ཐག་པ་དེ་རྣམས་ཀྱི་མར་རབ་ཡིན་ཤ་ཁུ་འབྲིང་ཡིན་ལ་འོ་མ་ཐ་མ་ཡིན་ནོ། །ཤ་གྲོགས་འོ་མ་དང་འོ་གྲོགས་ལ་མར་ཉིད་གཅེས་པར་བཤད།།

དེ་ནས་ཁ་འཛིན་རླུང་རྐྱང་པ་ལ་ཤིང་ཀུན་ཁ་རུ་ཚྭ། །རླུང་དང་བད་ཀན་ལྡན་པ་ལ་བཅའ་སྒ་དང་པི་པི་ལིང།། །རླུང་དང་མཁྲིས་པར་ལྡན་པ་ལ་སླེ་ཏྲེས་ཀྱི་ལྕེ་བ། །སྐྲན་ལ་རྒྱ་ཚྭ་སྲིན་ལ་བྱི་ཏང་ག །ཕོ་ལོང་སྦོས་ལ་རུ་རྟ་སྡེབ་པར་བྱ།།

བཏང་ཐབས་ཁྱོར་གང་ཕུལ་གང་ཕུལ་ལུ་ཕྱེད། །བཞོས་ཐོག་གི་འོ་མའི་དྲོད་ཙམ་བསྲོས་ལ་གྲོད་པར་བླུག་ཐུབས་ཐུར་གཅེ་འུ་ཡིས། །དགོང་དུས་རྐུབ་ནང་གི་བཤང་བ་བསལ་ལ་ལུས་ཀྱི་བཅས་སྟོད་དམའ་སྨད་མཐོ་ཁ་སྦུབ་བྱས་ལ། །ཡན་ལག་བརྒྱད་པར། མཐོ་དམན་མེད་པར་མགོ་སྨད་ཉལ། གློ་གཡོན་གྱིས་ནི་ཕབ་ནས་སུ། །རྐང་པ་གཡས་པ་བཀུག་ནས་ནི། །རྐང་པ་གཡོན་པ་བརྐྱང་བར་བྱ། །དེ་ནས་དེ་ལ་གཅེའུ་ཁ་དང་། །གཞང་སྒོ་སྣུམ་གྱིས་བསྐུས་ནས་ནི། །གཅེའུས་ལྒང་པའི་དབུགས་བཏོན་ལ། །ཞེས་ཀྱང་འབྱུང་ངོ། །གྲོད་པའི་ནང་གི་དབུགས་ཕྱིར་བཏོན་ལ་རྐུབ་མ་སྣད་གཅེའུ་བཅུག་ལ་གྲོད་པ་བརྩིར་ཞིང་བཏང༌། །དེ་འཕྲལ་ལུས་གན་རྐྱལ་དུ་ཉལ་ལ་སྟོད་དམའ་སྨད་མཐོ་བར་རྐུབ་བཅོས་རྐང་མཐིལ་གྱིས་བརྡུང༌། །གལ་ཏེ་སྨན་རྐུབ་ནས་འཛག་ན་རྐང་མཐེབ་ནས་བཟུང་གནམ་དུ་བཏེག་ལ་གསིག །སྔས་སྨད་འཕོངས་སྟོད་གན་རྐྱལ་དུ་མ་གྲང་པར་གོས་དྲོ་བར་གྱོན་ལ་བསྙལ། །དེ་ཡང་སླེ་འཇམ་དབྱུང་བའི་དུས་ཚོད་ནི་ཉི་ནུབ་ལ་བཏང་བས་སྲོད་དུས་འབྱུང་བ་ཡིན། །དེ་བར་མ་བྱུང་ན་ནི་རུ་ཧ་ཡིས་བསུ། །རླུང་ཤས་མེ་དྲོད་ཆེ་ལ་སྨན་བསྟུད་ལ་བཏང༌། །དེ་མ་ཡིན་ན་ལྕག་ལན་བཏང་བར་བྱ།།

ཕན་ཡོན་ནི་རླུང་ཁ་གནོན་ཅིང་བད་ཀན་དང་མཁྲིས་པའི་ནད་ཞེན་པ་སློང༌བར་བྱེད་དོ། །བཏང་དྲགས་ན་ཡི་ག་འགག་ཅིང་མེ་དྲོད་འཆི།།

ནི་རུ་ཧ་དང་སྤེལ་ན་གནོད་མེད་ཅིང་ནད་ཀུན་འདྲེན། །དེ་ཕྱིར་ལུས་ཟུངས་ངན་པ་དང་ནད་རྙིང་གསོ་བ་དཀའ་བ་ལ། །འཇམ་རྩི་གཅིག་དང་ནི་རུ་ཧ་གཉིས་སྤེལ་གྱིན་ལན་མང་པོ་བཏང་བས་ཆོག་པ་ཡིན་ནོ། །ཅེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལས་ལྔ་འཇམ་རྩིའི་ལེའུ་སྟེ་བཅུ་བདུན་པའོ།།  །།

མཐའ་མའི་འདོན་ཐེངས་།: 23.02.2021 ཉིན། 4:11 PM