ལེའུ་བཅུ་བདུན་པ། ཁ་ཟས་བསྡམ་པར་བྱ་བ་བསྟན་པ།

དེ་ནས་འཚོ་བྱེད་སྨན་པའི་རྒྱལ་པོས་བཀའ་བསྩལ་པ། དཔྱད་བུ་ལ་སོགས་གསོ་བ་འཛིན་པ་ཀུན། །ཟས་སྐོམ་བསྡམ་བྱ་དུག་ལྡན་མི་འཕྲོད་ཟས། །འཕྲལ་དུ་སྲོག་འདོར་ཉེས་པ་འཁྲུག་ཕྱིར་བསྲུང༌། །རྒྱལ་པོའི་ཕོ་བྲང་སྲོག་འཚོའི་སློབ་དཔོན་བཞག །དེས་ནི་ཟས་སྐོམ་དུག་ལས་ཐར་བར་འགྱུར། །དུག་ལྡན་ཟས་དེ་ཁ་དོགས་(དོག་)དྲི་རོ་ལྡོག །མེས་བསྲེག་དུ་བ་རྨ་བྱའི་མགྲིན་འདྲར་བཤད། །མེ་ལྕེ་གཅིག་ཏུ་འཁྱིལ་ཞིང་མེ་སྟག་གལ(བརྒལ)། །མཐོང་ན་བྱ་རོག་སྐད་འདོན་རྨ་བྱ་དགའ། །ཁྱི་ལ་བྱིན་ན་ལྟོ་བ་དྲོས་ན་(ནས་)སྐྱུག །ཤ་ལ་དུག་ཡོད་དམར་ལ་ལྕགས་མི་ལེན། །སྦོས་ཤིང་ཆང་སྦྱར་མིག་བདུག་ཚ་ཞིང་འཁྲུག(འཁྲུགས)། །དུག་སྟེ་ཕྱག་ཚངས་(ཆག་ཚང་)མི་དེ་ཁ་སྐམ་ཞིང༌། །རྔུལ་ཞིང་འདར་ལ་སྐྲག་ཅིང་འདུག་མི་ཚུགས། །གནོང་བག་གིན་(གིས་)ནི་ཕྱོགས་ལ་ལྟ་བར་བྱེད། །ཤེས་ནས་ཀུན་ལ་གནོད་པར་མི་འགྱུར་རོ། །ཁ་ཟས་མི་འཕྲོད་ཟོས་པས་སྦྱར་དུག་མཚུངས། །ཞོ་མ་ལོངས་(ལངས་)དང་ཆང་གསར་མི་འཕྲོད་དེ། །ཉ་ཡི་ཤ་དང་འོ་མ་འཕྲོད་པ་ཡིན(མིན)། །དེ་བཞིན་འོ་མ་ཤིང་ཐོག་གཉིས་མི་འཕྲོད། །བྱ་ཡི་སྒོ་ང་ཉ་ཡི་ཤ་མི་ཕྲོད(འཕྲོད)། །སྲན་མའི་ཚོད་མ་བུ་རམ་ཞོ་མི་འཕྲོད། །ཤ་མོ་ཉུངས་དཀར་མར་ལ་བརྔོས་པ་དང༌། །ཁྱིམ་བྱའི་ཤ་དང་ཞོ་བསྲེས་ཟ་བ་དང༌། །སྦྲང་རྩི་མར་ནག་ཆ་སྙོམས་ཕྲོད་(འཕྲོད་)མི་འགྱུར། །མར་གསར་འཁར་བའི་སྣོད་དུ་ཞག་བཅུ་ལས(ལུས)། །སྐྱེར་པའི་མི་(མེ་)ལས་(ལ་)ཧ་རི་ཏྲ་ཤ་བསྲེགས། །ཅོང་ཞི་ཟོས་རྗེས་ཤ་མོ་ཁུར་བ་ཟོས། །ཞུན་མར་ཟོས་རྗེས་ཆུ་གྲང་འཐུང་བ་དང༌། །ཤ་ལ་དཀར་སྐྱུར་ཙམ་རྩམ་དྲིས་ཕོག་པའམ། །བཙོས་པའི་རླངས་སུབ་(བསྲུབས་)ཞག་བདུན་ལོན་པ་དང༌། །སྐྱུར་དང་འོ་མ་ལྷན་ཅིག་ཟ་བ་རྣམས། །སྔ་མ་མ་ཞུ་ཕྱི་མ་ཟོས་པ་ཡིས། །ཁ་ཟས་མི་འཕྲོད་འཐབ་པས་དུག་ཏུ་གྱུར(འགྱུར)། །མ་གོམ་(གོམས་)དུས་མིན་ནད་དུ་འགྱུར་བ་ཡོད། །རྩོལ་བྱས་སྣུམ་བསྟེན་དྲོད་ཆེ་དར་ལ་བབས། །སྟོབས་ལྡན་གོམ་(གོམས་)པས་ཟོས་ལ་གནོད་མི་འགྱུར། །མི་འཕྲོད་ཕྲོད་(འཕྲོད་)པར་བརྟེན་(བསྟེན་)ནས་སྤོངས་(སྤོང་)བྱེད་ན། །འདྲིས་གོམ་(གོམས་)སྒོ་ནས་ཆ་ཡིས་བླང་པ་ལས། །ཕྲལ་དུ་སྤངས་བརྟེན་(བསྟེན་)ཉེས་པ་མྱུར་དུ་འཁྲུགས། །གནོད་པ་གནོད་བྱའི་བདག་ཉིད་ཉེར་(ཉེས་)གྱུར་པས། །ཕན་མེད་གནོད་པར་བྱེད་པ་མཁས་པས་སྤང༌། །ཞེས་གསུངས་སོ། །

གསོ་བྱེད་དཔྱད་འབུམ་ཁྲ་བོ་ལ་(ལས་)ཁ་ཟས་བསྡོམ་པའི་ལེའུ་སྟེ་བཅུ་བདུན་པའོ།། །།

མཐའ་མའི་འདོན་ཐེངས་།: 30.05.2023 ཉིན། 11:12 AM