ལེའུ་བཅུ་དགུ་པ། རོ་དང་ཞུ་རྗེས་བསྟན་པ། 

འཚོ་བ་ཟས་ཀྱི་གནས་བསྟན་ཟིན་པའི་མཇུག་དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་སྟོན་པ་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་ཞུས་སོ། །དེ་ཡང་ཀྱེ་སྟོན་པ་དྲང་སྲོང་ཆེན་པོ་རིག་པའི་ཡེ་ཤེས་ལགས་ཞེས་ཞེ་ས་དང་བཅས་ཏེ་སྙན་པའི་གདངས་ཀྱིས་མཚན་ནས་བོས་ཏེ་གནས་དྲུག་པ་སྦྱོར་བ་སྨན་གྱི་གནས་ཞེས་བྱ་བ་ལ་ཇི་ལྟར་བསླབ་པར་བགྱི་ཞེས་འདྲི་ན་འཚོ་མཛད་སྨན་པའི་རྒྱལ་པོས་གསལ་པོར་བཤད་དུ་གསོལ་ཞེས་གུས་པ་དང་བཅས་ཏེ་ཞུས་པ་ལས། སྟོན་པས་འདི་ལྟར་གསུངས་པ། དེ་ཡང་ཀྱེ་ཞེས་བོས་ནས་དྲང་སྲོང་ཆེན་པོ་ཡིད་ལས་སྐྱེས་ལེགས་པར་ཉོན་ལ་ཡིད་ལ་ཟུངས་ཤིག་དང་ངས་བཤད་པར་བྱའོ་ཞེས་མཚམས་སྦྱར་ནས། ནད་ལ་གསོ་བར་བྱེད་པའི་གཉེན་པོ་སྤྱོད་ལམ་ལ་སོགས་པ་བཞི་ཡོད་པའི་ནང་ནས་གསུམ་པ་སྦྱོར་བ་སྨན་གྱི་གནས་ལ་བསླབ་པར་བྱ་ན། དེ་ལ་རོ་དང་ཞུ་རྗེས་དང་ནུས་པ་དང་སྦྱར་བའི་ཐབས་བསྟན་པ་སྟེ་རྣམ་པ་བཞི་ཡོད་པར་ཤེས་པར་བྱའོ།།

སྦྱོར་བ་སྨན་གྱི་གནས་ལས་རོ་ལ་སོགས་པ་རྣམས་ཀྱི་ནང་ནས་དང་པོ་རོ་བཤད་པ་ལའང་རོའི་རྟེན་དང་དབྱེ་བ་དང་ངོ་བོ་དང་སྡེ་ཚན་དང་ལས་དང་རྣམ་པ་ལྔའི་སྒོ་ནས་རྟོགས་པར་བྱའོ། །མངར་བ་ལ་སོགས་པའི་རོ་རྣམས་ཀྱི་རྟེན་དུ་གྱུར་པའི་སྨན་དུ་གཏོགས་པ་ཀུན་ཀྱང་ནི་ས་ལ་སོགས་པའི་འབྱུང་བ་ཆེན་པོ་ལྔ་ཆར་འདུས་པ་ཁོ་ན་ལས་ངེས་པར་སྐྱེ་བར་འགྱུར་བ་ཡིན་ཏེ། དེའང་ཚུལ་ཇི་ལྟར་ཞེ་ན། སྨན་ཡིན་ནོ་ཅོག་རང་རང་གི་རྒྱུ་འམ་ས་བོན་ཉིད་སས་གཞི་བརྟེན་ནས་ཆགས་པར་གྱུར་པ་ལ་ཆུས་བརླན་ཞིང་མེས་དྲོད་སྐྱེད་པ་དང༌། རླུང་གིས་བསྐྱོད་དེ་འཕེལ་བར་བྱེད་ཅིང་ནམ་མཁས་ཆེར་སྐྱེ་བའི་གོ་སྐབས་ཕྱེ་བ་ལས་ཏེ། དེ་ལྟར་ན་ཡང་སྨན་ཀུན་ཀྱང་རྐྱེན་དེ་ལྟ་བུས་བསྐྱེད་པར་འགྱུར་བའི་ཚུལ་མཚུངས་ཀྱང་ས་བོན་ཉིད་ཀྱི་རང་བཞིན་དང་འབྱུང་བ་ཕན་ཚུན་ཤས་ཆེ་ཆུང་གི་དབང་གིས་རོ་གཅིག་ཁོ་ནར་ངེས་པ་ནི་མ་ཡིན་ནོ། །རོ་དྲུག་གི་རྟེན་དུ་གྱུར་པའི་སྨན་ཀུན་ཀྱང་འབྱུང་བ་ཆེན་པོ་ལྔ་ཚོགས་པ་ལས་འབྱུང་བ་ཡིན་ནོ་ཞེས་སྔར་བསྟན་མོད་ཀྱང༌། ཤས་ཆེར་རོ་གཅིག་མིན་ཞེས་པའི་དོན་གྱིས་ན་འབྱུང་བ་ཆེན་པོ་ཕན་ཚུན་གཅིག་ཏུ་འདུས་པའི་ཚེ་ཤས་ཆེ་ཆུང་གི་དབང་གིས་རོ་གཅིག་ཏུ་མ་ངེས་པ་དེ་ཡང་ཇི་ལྟ་བུ་ཞེ་ན། འདི་ལྟར་ས་དང་ཆུ་ཤས་ཆེ་བ་ལས་རོ་མངར་བ་དང༌། མེ་དང་ས་ཤས་ཆེ་བ་ལས་སྐྱུར་བ་དང༌། ཆུ་དང་མེ་ཤས་ཆེ་བ་ལས་ལན་ཚྭ་དང༌། ཆུ་དང་རླུང་ཤས་ཆེ་བ་ལས་ཁ་བ་དང༌། མེ་དང་རླུང་ཤས་ཆེ་བ་ལས་ཚ་བ་དང༌། ས་དང་རླུང་ཤས་ཆེ་བ་ལས་བསྐ་བ་སྟེ། དེ་ལྟར་ན་འབྱུང་བ་གཉིས་གཉིས་ཤས་ཆེ་བའི་དབང་ཤུགས་ཀྱིས་རོ་དྲུག་པོ་དེ་དག་སོ་སོར་སྐྱེད་པར་བྱེད་པ་ཡིན་ནོ། །འབྱུང་བ་ལྔ་ལས་རེ་རེ་ཤས་ཆེ་བའི་བདག་ཉིད་ཅན་གྱི་སྨན་དེ་དག་ཀུན་ཀྱང༌། ཡོན་ཏན་དང་ལས་གཉིས་ཀྱི་སྒོ་ནས་སྟོན་ཞིང༌། དེ་ཡང་འབྲས་བུ་ནི་རྒྱུ་དང་མཚུངས་ལྡན་དུ་འབྱུང་བའི་ཕྱིར་ན་རྒྱུ་འབྱུང་བ་དང་འབྲས་བུ་གཉིས་ཀའི་ཡོན་ཏན་རྣམས་རྐང་པ་སྔ་མ་སྔ་མས་སྟོན་ལ། ལས་རྣམས་ཕྱི་མ་ཕྱི་མས་གསལ་པོར་སྟོན་པ་ལས། སའི་རང་བཞིན་ཤས་ཆེ་བའི་སྨན་རྣམས་ཀྱི་ཡོན་ཏན་ནི། ལྕི་བརྟན་རྟུལ་འཇམ་སྣུམ་ལ་སྐམ་པ་དང་ལྡན་ཞིང་དྲི་ཤས་ཆེ་བ་ཡིན་ལ། ལས་ནི་ཡན་ལག་ལ་སོགས་པ་བརྟན་ཞིང་མཁྲང་ལ། ལུས་བརྟས་པ་དང་མི་མཐོང་བ་གཅིག་ཏུ་སྡུད་པར་བྱེད་ཅིང་གཙོ་བོར་རླུང་གི་ནད་སེལ་བ་ཡིན་ནོ། །དེ་བཞིན་དུ་ཆུའི་རང་བཞིན་ཤས་ཆེ་བའི་སྨན་གྱི་ཡོན་ཏན་ནི། སླ་བསིལ་ལྕི་རྟུལ་སྣུམ་འཇམ་ལ་མཉེན་པ་དང་ལྡན་ཞིང་རོའི་ཤས་ཆེ་བ་ཡིན་ལ། ལས་ནི་ཁོང་པ་ལ་སོགས་པ་བརླན་ཞིང་གཤེར་བ་དང༌། ལུས་འཇམ་ལ་ཕྱོགས་གཅིག་ཏུ་སྡུད་པར་བྱེད་ཅིང་གཙོ་བོར་མཁྲིས་པའི་ནད་སེལ་བ་ཡིན་ནོ། །མེའི་རང་བཞིན་ཤས་ཆེ་བའི་སྨན་རྣམས་ཀྱི་ཡོན་ཏན་ནི་ཚ་རྣོ་སྐམ་རྩུབ་ཡང་སྣུམ་གཡོ་བ་དང་ལྡན་ཞིང་གཟུགས་ཀྱི་ཤས་ཆེ་བ་ཡིན་ལ། ལས་ནི་ལུས་ཀྱི་དྲོད་སྐྱེད་པ་དང་ཁ་ཟས་དང་ལུས་ཟུངས་ལ་སོགས་སྨིན་ཅིང་མདོག་གསལ་བར་བྱེད་ལ། གཙོ་བོར་བད་ཀན་གྱི་ནད་སེལ་བ་ཡིན་ནོ། །རླུང་གི་རང་བཞིན་ཤས་ཆེ་བའི་སྨན་རྣམས་ཀྱི་ཡོན་ཏན་ནི་ཡང་གཡོ་གྲང་རྩུབ་སྐྱ་ལ་སྐམ་པ་དང་ལྡན་ཞིང་རེག་བྱའི་ཤས་ཆེ་བ་ཡིན་ལ། ལས་ནི་ལུས་སྲ་ཞིང་བསྒུལ་བསྐྱོད་དང་དྭངས་མ་ལ་སོགས་པ་ལུས་ལ་ཁྱབ་པར་བྱེད་ཅིང་གཙོ་བོར་བད་མཁྲིས་ལྡན་པའི་ནད་སེལ་བ་ཡིན་ནོ། །ནམ་མཁའ་ནི་འབྱུང་བ་གཞན་བཞི་གས་བསྐྱེད་པའི་སྨན་ཀུན་ལ་སྤྱིར་རིས་སུ་མ་ཆད་པར་ཁྱབ་པ་ཡིན་མོད་དེ། འོན་ཀྱང་དེ་ཉིད་རང་བཞིན་ཤས་ཆེ་བའི་སྨན་ཡང་མང་དུ་སྲིད་པས་ན་དེའི་ཡོན་ཏན་ནི་ཁོང་སྟོང་པ་དང་སྒྲའི་ཤས་ཆེ་བ་ཡིན་ལ། ལས་ནི་ཡངས་པའི་གོས་འབྱེད་པར་བྱེད་ཅིང་ཉེས་པ་གསུམ་ག་འདུས་པ་ལས་བྱུང་བའི་ནད་སེལ་བ་ཡིན་ནོ། །དེ་ཡང་ཟླ་ཟེར་ལས། དེ་ལ་སྨན་ནི་གྱེན་དུ་འགྲོ། །ཕལ་ཆེར་མེ་དང་རླུང་ཤས་ཆེ། །ཞེས་བྱ་བ་ལ། དེ་ལ་སྨན་གྱི་རིགས་དེ་རྣམས་ཀྱི་ནང་ནས་གྱེན་དུ་འགྲོ་ཞིང་སྟོད་དུ་རྒྱུ་བའི་སྨན་རློན་པར་བྱེད་པ་ནི་ཕལ་ཆེར་ཞེས་པ་མང་དུ་མེ་དང་རླུང་གི་ཤས་ཆེ་བ་སྟེ་མེ་དང་རླུང་གི་བདག་ཉིད་ཅན་ཡིན་ནོ། །དེའང་གང་གི་ཕྱིར་གྱེན་དུ་འགྲོ་བས་མེ་ཡིན་པ་དང་ཡང་བས་རླུང་ཡིན་པར་ཤེས་པར་བྱའོ། །ཐུར་དུ་འགྲོ་བ་ཕལ་ཆེར་ནི། །ས་ཆུའི་ཡོན་ཏན་ཤས་ཆེ་ཡིན། །ཞེས་བྱ་བ་ལ། སྨན་ཐུར་དུ་འགྲོ་ཞིང་འོག་ཏུ་རྒྱུ་བས་འཁྲུ་བར་བྱེད་པའི་ཚུལ་ཅན་གང་ཡིན་པ་དེ་ནི་ས་དང་ཆུའི་ཤས་ཆེ་བ་ཡིན་ཏེ། དེ་གཉིས་ནི་ས་ལྕི་བ་དང་ཆུ་གཞོམ་ཕྱོགས་སུ་འགྲོ་བ་ཡིན་པའི་ཕྱིར་རོ། །འོན་ཀྱང་རི་ཤོ་ལ་སོགས་པའི་བཀྲུ་སྨན་ཕལ་ཆེར་ཡང་མེ་རླུང་གིས་བསྐྱེད་པའི་རོ་ཚ་བར་མི་འབྱུང་ཞིང༌། དུར་བྱིད་ལ་སོགས་པའི་བཤལ་སྨན་ཕལ་ཆེར་ཡང་ས་ཆུས་བསྐྱེད་པའི་རོ་མངར་བ་མ་མཐོང་ལ། ཁྱད་པར་དུ་སྐྱུག་སྨན་བཏང་བས་འཁྲུ་བ་དང༌། འཁྲུ་སྨན་གྱིས་སྐྱུག་པའང་མང་དུ་སྣང་བའི་ཕྱིར་བཤད་པ་འདི་ནི་གྱི་ན་ཙམ་དུ་ཟད་དོ་ཞེ་ན་བདེན་མོད། འོན་ཀྱང་སྐབས་འདིར་སྤྱིར་བཏང་བ་རོ་ནུས་ཞུ་རྗེས་མཐུན་པ་གཞིར་གཞག་གི་དབང་དུ་བྱས་པ་དང༌། བྱེ་བྲག་ཏུ་སྐྱུག་འཁྲུས་པའི་སྨན་རྣམས་ཀྱི་རོ་ཇི་ལྟར་འདུག་ཀྱང་ནུས་པ་གོ་རིམ་བཞིན་དུ་མེ་རླུང་དང་ས་ཆུའི་ཡོན་ཏན་ཤས་ཆེ་བ་ཞིག་ལས་ནམ་ཡང་མ་འདས་ཤིང་དམིགས་བསལ་དུ་དུར་བྱིད་ལ་སོགས་པ་འགའ་ཞིག་བཤལ་སྐྱུག་ཐུན་མོང་གི་སྨན་ཡིན་པའི་དོན་དང༌། བཤལ་སྨན་གྱིས་སྐྱུགས་པ་ནི། སྐྱུག་སྨན་དངོས་སུ་ཡོད་པ་མ་ཡིན་ཡང་དུས་སུ་མ་བརྐོས་ཤིང་འདུལ་ལེགས་མ་བྱུང་བ་སོགས་ཀྱི་སྐྱོན་ཡིན་ནོ། །དུར་བྱིད་སྐྱུག་སྨན་ལ་གཏོང་བའི་རྒྱུ་མཚན་མ་བཏུལ་བ་དེ་ལ་ཤིན་ཏུ་རྩུབ་པའི་ནུས་པ་ཡོད་པས་ན་ནད་སློང་ཞིང་སྐྱུག་པར་བྱེད་པ་ཡིན་པས་བཤལ་སྨན་ལ་གཏོང་བའི་ཚེ་འདུལ་ཞིང་སྐྱུགས་ལ་གཏོང་དུས་མི་འདུལ་བའི་ཤེས་བྱེད་དང་བཅས་པའོ། །མངར་བ་ལ་སོགས་པའི་རོ་དང་ལྡན་པའི་སྨན་ཀུན་ཀྱང་འབྱུང་བ་འདུས་པ་ལས་སྐྱེ་ཞིང༌། འབྱུང་བ་སོ་སོ་བ་རྣམས་ཀྱང་ལྕི་བ་སོགས་ཀྱི་ཡོན་ཏན་དང་ལྡན་པས་མཁྲང་བ་ལ་སོགས་པའི་བྱེད་ལས་ཅན་ཁོ་ན་ཡིན་པ་དེ་བས་ན་སྨན་དངོས་ཡིན་པ་རྣམས་དང༌། དངོས་མིན་པའི་བཙན་དུག་ལ་སོགས་པ་རྣམས་ཀྱང་གཉེན་པོ་དང་བཅས་ཏེ་ཕན་ཚུན་སྦྱར་བའི་དབང་དུ་གྱུར་པ་ལས་ཀྱང་སྨན་དུ་འགྱུར་བ་དེའི་ཕྱིར་ས་སྟེང་འདི་ན་སྨན་མ་ཡིན་པའི་དངོས་པོ་ཅི་ཡང་ཡོད་པ་མ་ཡིན་ཏེ། ཧ་ལ་ཧ་ལ་ལ་སོགས་པའི་དུག་ཀུན་ཀྱང་སྨན་དུ་བསྒྱུར་ནུས་ན་གཞན་རྣམས་ལྟ་སྨོས་ཀྱང་ཅི་དགོས། དེ་ལྟ་བས་ན་ལུས་ཀྱི་སྟོད་ནད་སེལ་ཞིང་གྱེན་དུ་སྐྱུགས་འདྲེན་པར་བྱེད་པའི་སྨན་རྣམས་ནི་འཐུ་དུས་ལ་སོགས་པའི་དབང་གིས་མེ་དང་རླུང་གི་ཡོན་ཏན་དང་ལྡན་པ་ཡིན་ཏེ། དེ་གཉིས་ཀའང་གྱེན་དུ་འགྲོ་བའི་རང་བཞིན་དུ་དངོས་པོའི་སྟོབས་ཀྱིས་གྲུབ་པ་ཡིན་ལ། དེ་བཞིན་དུ་ཐུར་ཕྱོགས་སུ་གཞོལ་ཞིང་འགྲོ་བ་ནི་ས་དང་ཆུའི་རང་བཞིན་ལས་བྱུང་བ་དེའི་ཕྱིར་སྨན་གྱིས་ནད་སེལ་ཞིང་ཉེས་པ་བཀྲུ་བའི་སྨན་ཨ་རུ་ར་མཆུ་རིང་གི་མཆུ་ལ་སོགས་པ་ཕལ་ཆེར་ནི་བཏུ་དུས་ལ་སོགས་པའི་དབང་གིས་རོ་དྲུག་གི་དང་པོ་མངར་བའི་རོ་ལས་བྱུང་བ་ཡིན་ནོ།།

སྨན་གྱི་རོ་ལ་དབྱེ་ན་ནི་དྲུག་སྟེ། མངར་བ་དང༌། སྐྱུར་བ་དང༌། ལན་ཚྭ་བ་དང༌། ཁ་བ་དང༌། ཚ་བ་དང༌། བསྐ་བའོ། །དེ་ལས་འཕྲོས་ནས་རོ་སྦྱོར་ལྔ་བཅུ་རྩ་བདུན་སོགས་མང་དུ་འབྱུང་ཞིང་སྨན་གྱི་རྣམ་པ་གྲངས་མེད་པ་ཀུན་ཀྱང༌། དྲུག་པོ་འདིར་འདུ་བས་དེ་ལས་མང་མི་དགོས་ཤིང༌། འབྱུང་བ་ལྔས་བསྐྱེད་པར་ཀུན་མཐུན་ཀྱང་རོ་གཅིག་དང་ལྔ་ལ་སོགས་པར་མི་འདུ་བའི་ཕྱིར་གྲངས་ངེས་ཀྱང་གྲུབ་ལ། དེ་བཞིན་དུ་རྒྱུའི་ཡོན་ཏན་གྱི་དབང་གིས་མངར་བ་སོགས་གོ་རིམ་ཇི་ལྟ་བ་བཞིན་དུ་ཁམས་འཚོ་བར་བྱེད་པའི་སྟོབས་ཀྱང་སྔ་མ་སྔ་མ་རྣམས་ཆེ་བ་དང་ལྡན་པ་ཡིན་པས་གོ་རིམ་ཡང་གྲུབ།

འབྱུང་བ་ལྔའི་བདག་ཉིད་ཅན་གྱི་རྫས་རགས་པ་སྨན་ཞེས་གྲགས་པ་རྣམས་ལ་བརྟེན་ཅིང་གནས་པའི་རོའི་ངོ་བོ་ནི་གང་ཞེ་ན། ལྕེའི་དབང་པོ་དང་ཕྲད་པའི་ཚེ་དེ་ལ་བྱེ་བྲག་དང་བཅས་པ་གསལ་བར་འགྱུར་བས་ན་རོ་ཞེས་བྱའོ། །དེ་ཡང་རྣམ་པ་དྲུག་ལས། མངར་བའི་རོ་དེ་ལྕེ་དང་ཕྲད་ཅིང་མྱངས་པའི་ཚེ་ན་ཁ་ལ་ཡུན་རིང་དུ་ཆགས་ཤིང་ཞིམ་པས་སླར་ཡང་སྲེད་པ་སྐྱེད་པར་བྱེད་པ་དེ་ཉིད་ཡིན་ཞིང་སྐྱུར་བ་ནི་ཟོས་པའི་ཚེ་སོ་བརྩེ་ཞིང་བཞིན་གྱི་ཆ་ཤས་ཕལ་ཆེར་སྡུད་པ་དང་ཁ་ཆུ་འཛག་པར་བྱེད་པ་དག་ཡིན་ལ། ལན་ཚྭ་ནི་ལྕེ་དང་རེག་པ་ན་ཚ་ཞིང་མཆིལ་མ་འདུ་བར་བྱེད་པ་ཉིད་དང༌། ཁ་བ་ནི་གང་དག་ཁའི་དྲི་མ་རྣམས་སྦྱོང་ཞིང་ཡི་ག་ཟློག་པར་བྱེད་པ་དག་དང༌། ཆེས་ཚ་བ་དག་ནི་ཟོས་མ་ཐག་ཏུ་ཁ་ལྕེ་བསྲེག་ཅིང་མིག་ཆུ་ལ་སོགས་པ་འཛག་པར་བྱེད་པ་དང༌། བསྐ་བ་ནི་ཟོས་པས་ལྕེ་རྐན་ལ་ཡུན་རིང་དུ་ཆགས་ཤིང་མངར་བས་རྩུབ་པ་སྙམ་བྱེད་པ་གང་ཡིན་པ་རྣམས་སོ།།

མངར་བ་ལ་སོགས་པའི་རོ་དྲུག་སོ་སོར་བསྟན་པའི་སྨན་རྣམས་ཀྱི་སྡེ་ཚན་བསྟན་པ་ནི་འདི་ལྟ་སྟེ། ཤིང་མངར་དང༌། རྒུན་འབྲུམ་དང༌། གུར་ཀུམ་དང༌། ཅུ་གང་དང༌། དོང་ག་དང༌། ར་མཉེ་དང༌། ཉེ་ཤིང་པ་དང༌། ལྕ་བ་དང༌། ཀ་ར་དང༌། བུ་རམ་དང༌། སྦྲང་དང༌། ཤ་དང་མར་ལ་སོགས་པ་རྣམས་དང༌། གཞན་ཡང་རོ་དེ་དང་དེ་འདྲ་བ་ཇི་སྙེད་ཅིག་ཡོད་པ་ཀུན་ཀྱང་མངར་བའི་སྨན་གྱི་སྡེ་ཚན་ཡིན་ནོ། །སེ་འབྲུ་དང༌། སྟར་བུ་དང༌། སེ་ཡབ་དང༌། སྐྱུ་རུ་ར་དང༌། རྒྱ་ཤུག་གི་ཚི་གུ་དང༌། ད་ཏྲིག་དང༌། ཞོ་དང༌། དར་བ་དང༌། ཆང་དང་རྩབས་ནི་ཟུར་མཁར་བས་འོ་མ་རྩབས་པར་བཞེད། སྐྱེམས་པས་ཟན་སྐྱུར་འཕྲལ་སྐད་ཟན་ཆང་ལངས་པ་ཞེས་པར་བཞེད། གཞན་སྦང་མ་རྩབས་པར་བཞེད་པ་སོགས་སྣ་ཚོགས་ཀྱང་འདི་ནི་གཡོར་པོ་ཕྱོགས་ཡུལ་སྐད་དུ་ཞོའི་རུ་མར་རྩབས་ཞེས་ཡོངས་གྲགས་ཡིན་འདུག་པར་མ་ཟད་དཔལ་ཁང་ལོ་ཙཱ་བས་ངག་སྒྲོན་དུ། ཞོ་རྩབས་རྩབ་མོ་སེར་རྩའི་གོས། །ཞེས་ཞོའི་རུ་མ་རང་རོ་དང་མན་རྒྱུད་ནུས་པའི་དབང་སོགས་ནས་འཐད་པ་དེ་དང་གཞན་ཡང་དེ་དང་དེ་འདྲ་བ་ལ་སོགས་པ་ཀུན་ཀྱང་སྐྱུར་བའི་སྨན་གྱི་སྡེ་ཚན་ཡིན་ནོ། །རྒྱམ་ཚྭ་དང་རྒྱ་ཚྭ་དང་ལྕེ་མྱང་ཚྭ་དང་ནི་ར་ཚྭ་དང་ཁ་རུ་ཚྭ་དང་ཙབས་རུ་ཚྭ་དང་ཟེ་ཚྭ་དང་ལྦ་ཚྭ་དང་མཛེ་ཚྭ་དང་ཐལ་ཚྭ་དང་ཤིང་ཚྭ་དང་ཡ་བཀྵ་ར་དང་བུལ་ཏོག་རྣམས་དང་རོ་དེ་དང་དེ་འདྲ་བ་ལ་སོགས་པ་གཞན་ཡང་ཇི་སྙེད་ཅིག་མཚོན་པ་རྣམས་ནི་ལན་ཚྭའི་སྡེ་ཚན་ཡིན་ནོ། །ནིམ་པ་དང་ཏིག་ཏ་དང་བོང་ང་དཀར་པོ་དང་ཧོང་ལེན་དང་གསེར་གྱི་མེ་ཏོག་དང་དུག་མོ་ཉུང་དང་གླ་རྩི་དང་མཁྲིས་པ་ཀུན་དང་སྐྱེར་པ་དང་བ་ཤ་ཀ་དང་བྲག་ཞུན་དང་ཀྱི་ལྕེ་དང་རེ་སྐོན་པ་ལ་སོགས་པ་དེ་དང་དེ་འདྲ་བའི་སྨན་ཇི་སྙེད་ཅིག་ཡོད་པ་རྣམས་ནི་ཁ་བའི་སྨན་གྱི་སྡེ་ཚན་ཡིན་ནོ། །ན་ལེ་ཤམ་དང་བཅའ་སྒ་དང་པི་པི་ལིང་དང་སྒེའུ་གཤེར་དང་ཤིང་ཀུན་དང་སྲུབ་ཀ་དང་ལྕེ་ཚ་དང་དྭ་བ་དང་བཙོང་དང་སྒོག་སྐྱ་ལ་སོགས་པ་དེ་དང་དེ་འདྲ་བ་ཀུན་རོ་ཚ་བའི་སྨན་གྱི་སྡེ་ཚན་ཡིན་ནོ། །ཙནྡན་དཀར་དམར་དང་ཨ་རུ་ར་དང་བ་རུ་ར་དང༌། ཨུཏྤལ་སྔོན་པོ་དང༌། ལི་ག་དུར་དང༌། སྨག་དང༌། མོན་ཆ་ར་དང༌། འོམ་བུ་ལ་སོགས་པ་དེ་དང་འདྲ་བ་གཞན་རྣམས་དང་བཅས་ཏེ་བསྐ་བའི་སྡེ་ཚན་ཡིན་ནོ། །དེ་ལྟར་རྐྱང་པའི་སྡེ་ཚན་རྣམས་ཀྱི་ཚིག་དངོས་བསྟན་ཉིད་ལས་མ་རྟོགས་པར་བྱ་བ་ཆེར་མེད་ཅིང༌། འདི་སྐབས་ཀྱི་ཟླ་ཟེར་སོགས་སུ་ཡང་སྨན་མིང་རྣམས་སྐད་སོར་བཞག་པ་སོགས་ཀྱིས་རྟོགས་པར་ནི་ཤིན་ཏུ་དཀའ་བས་བཏང་སྙོམས་སུ་བཞག་པ་ཡིན་ནོ། ཁ་བའི་ཁ་བ་ཚ་བ་བསྐ་བ་སྟེ་རོ་བཞི་དང་ལྡན་པའི་ག་བུར་དང༌། སྐྱུར་བའི་མངར་བ་བསྐ་བ་གསུམ་དང་ལྡན་པའི་ཆུ་མ་རྩི་དང་ལ་སོགས་པའི་སྒྲས་མངར་སྐྱུར་ཁ་བ་གསུམ་དང་ལྡན་པའི་ཆང་ལ་སོགས་པའི་སྨན་རོ་གཉིས་ནས་དྲུག་གི་བར་དུ་ལྡན་པ་འམ། དེ་ལས་ཀྱང་ཤིན་ཏུ་མང་བར་ལྡན་པའི་རོ་རྣམས་ནི་རྐྱང་པའི་རོ་དེ་རྣམས་ལས་རིག་པས་བསྒྲེས་ཏེ་ཞིབ་ཏུ་དཔྱད་པར་བྱ་བ་ཡིན་གྱི། མཐའ་དག་པ་ཀུན་ཀྱང་འདིར་བཤད་པར་བྱ་བ་མ་ཡིན་ནོ།།

རླུང་ལ་སོགས་པའི་ནད་གང་ཡིན་པ་དེ་རྣམས་སེལ་བར་བྱེད་པའི་སྨན་གྱི་རོའི་བྱེད་ལས་བསྟན་པར་བྱ་སྟེ། དེ་ཡང་རོ་མངར་བ་དང་སྐྱུར་བ་དང་ལན་ཚྭ་བ་དང་ཚ་བ་བཞིས་རླུང་འཇོམས་ཤིང༌། དེ་བཞིན་དུ་ཁ་བ་དང་མངར་བ་དང་བསྐ་བ་གསུམ་གྱིས་མཁྲིས་པ་སེལ་བར་བྱེད་ལ། ཚ་བ་དང་སྐྱུར་བ་དང་ལན་ཚྭ་གསུམ་གྱིས་བད་ཀན་སེལ་བར་བྱེད་པ་ཡིན་ནོ། །རོ་རྣམས་ཀྱི་བྱེད་ལས་སོ་སོར་བཤད་པ་ལས་ཁྱད་པར་དུ་མངར་བའི་བྱེད་ལས་ནི་ཁམས་ལ་ལྷག་པར་དུ་འཕྲོད་ཅིང་ལུས་ཟུངས་དང་སྟོབས་སྐྱེད་པར་བྱེད་པ་དང༌། རྒས་པ་དང་བྱིས་པ་དང་ཤ་སྐེམ་པོ་དང་གྲེ་བ་འགགས་པ་དང་གློ་རྡོལ་གྱི་ནད་རྣམས་ལ་ཕན་ཞིང་བསྔགས་པ་དང༌། ལུས་བརྟས་པར་བྱེད་པ་དང༌། རྨ་འབྱོར་ཞིང་མྱུར་དུ་འཚོ་བར་བྱེད་པ་དང༌། ལུས་ཀྱི་མདངས་དང་སྐྲ་དང་དབང་པོ་རྣམས་གསལ་བར་བྱེད་པ་དང༌། དེ་བཞིན་དུ་ཚེ་རིང་ཞིང་ལུས་འཚོ་བར་བྱེད་པ་དང༌། དུག་ལས་གྱུར་པའི་ནད་དང་རླུང་དང་མཁྲིས་པ་སེལ་བར་བྱེད་པ་ཡིན་ལ། ཡང་མངར་བ་དེ་ཉིད་ཧ་ཅང་བསྟེན་དྲགས་ན་བད་ཀན་དང་ཚིལ་བུ་སྐྱེད་ཅིང་མེ་དྲོད་འབྲི་བ་དང༌། ལུས་ཀྱི་ཤ་ལྷག་པོ་སྦོམ་པོར་བྱེད་པ་དང༌། གཅིན་ནད་དང་ལྦ་བ་དང་རྨེན་བུ་ལ་སོགས་པའི་ནད་སྐྱེད་པར་བྱེད་པ་ཡིན་ནོ། །རོ་སྐྱུར་བས་ནི་ལུས་ཀྱི་དྲོད་སྐྱེད་ཅིང་ཡི་ག་འབྱེད་པར་བྱེད་པ་དང༌། ཡིད་ཚིམ་པར་བྱེད་པ་དང༌། ཁ་ཟས་འདྲུལ་ཞིང་སླ་བར་བྱེད་པ་དང༌། བད་ཀན་ལ་སོགས་པ་གཅོད་པར་བྱེད་པ་དང༌། ཟས་འཇུ་བར་བྱེད་ཅིང་སྨིན་པར་བྱེད་པ་དང༌། ལུས་ལ་བསྐུས་ན་རེག་པ་སེལ་བར་བྱེད་པ་དང༌། རླུང་འགགས་ནས་འཁྱིལ་བར་བྱེད་པ་དག་བདེ་བར་རྒྱུ་ཞིང་འབྱུང་བར་བྱེད་པ་དང༌། ཡང་སྐྱུར་པ་དེ་ཉིད་ཧ་ཅང་བསྟེན་དྲགས་པར་གྱུར་ན་ཁྲག་དང་མཁྲིས་པ་སྐྱེད་པར་བྱེད་ཅིང་ལུས་ལྷོད་པ་སྟེ་མཁྲང་བ་ལས་ཟློག་པར་བྱེད་པ་དང༌། མིག་གི་རབ་རིབ་དང་མགོ་འཁོར་དང་སྐྱ་རྦབ་དང་འོར་དང་མེ་དབལ་དང་གཡན་པ་དང་ཐོར་བུ་དང་སྐོམ་དད་དང་རིམས་ཀྱི་ནད་རྣམས་བསྐྱེད་པར་འགྱུར་རོ། །ལན་ཚྭའི་རོས་ནི་ལུས་སྲ་བར་རེངས་ཤིང་འགྱུར་མི་ཤེས་པར་འབྱིན་པ་དང༌། བཤང་བ་དང་རླུང་འཁྱིལ་བ་དང་རྩ་སྦུབས་རྣམས་འགགས་པ་འབྱིན་པར་བྱེད་པ་དང༌། བསྲོས་པའི་དུགས་ཀྱིས་རྔུལ་འབྱིན་པ་དང་མེ་དྲོད་སྐྱེད་ཅིང་ཡི་ག་འབྱེད་པར་བྱེད་པ་དང༌། དེ་ཡང་མང་དུ་བསྟེན་ཞིང་སྤྱད་དྲགས་ན་སྐྲ་དང་བ་སྤུ་འབྱི་ཞིང་སྐྲ་དཀར་དང་གཉེར་མ་མང་དུ་འཕེལ་བར་བྱེད་པ་དང༌། ལུས་ཀྱི་ཟུངས་སྟོབས་རྣམས་འབྲི་ཞིང་སྐོམ་དད་དང་མཛེ་དང་མེ་དབལ་དང་ཁྲག་དང་མཁྲིས་པའི་ནད་ལ་སོགས་པ་སྐྱེད་པར་བྱེད་དོ། །རོ་ཁ་བས་ནི་ཡི་ག་འཆུས་པ་དང་སྲིན་བུའི་ནད་དང་སྐོམ་དད་དང་དུག་དང་མཛེ་དང་དྲན་མེད་དུ་བརྒྱལ་པ་དང་རིམས་ནད་དང་རློན་པ་སྟེ་སྐྱུག་པ་དང་མཁྲིས་པ་རྣམས་འཇོམས་པར་བྱེད་ཅིང་འདྲུལ་བ་དང་ཚིལ་དང་ཞག་དང་རྐང་མར་དང་བཤང་གཅི་ལ་སོགས་པ་སྐེམ་པར་བྱེད་པ་དང༌། ཡིད་གཞུངས་པར་བྱེད་ཅིང་ནུ་མའི་ནད་དང་སྐད་འགགས་པ་སེལ་བ་དང༌། ཧ་ཅང་བསྟེན་དྲགས་ན་ལུས་ཟུངས་འཛད་ཅིང་རླུང་དང་བད་ཀན་སྐྱེད་པ་སོགས་བྱེད་དོ། །རོ་ཚ་བས་ནི་ལྐོག་མའི་ནད་དང་གག་པ་དང་མཛེ་དང་འོར་ལ་སོགས་པ་སེལ་ཞིང་རྨ་འཇིག་པ་དང་དྲོད་སྐྱེད་པ་དང་ཁ་ཟས་འཇུ་བར་བྱེད་པ་དང༌། ཡི་ག་འབྱེད་པ་དང་ཚིལ་དང་འདྲུལ་བག་སྐེམ་པ་དང༌། ཐུར་དུ་སྦྱོང་ཞིང་རྩ་སྦུབས་འབྱེད་པར་བྱེད་པ་ཡིན་ལ། ཆེར་བསྟེན་དྲགས་ན་ཁུ་བ་དང་ལུས་སྟོབས་ཟད་ནས། ལུས་འཁུམས་ཤིང་འདར་བ་དང༌། བརྒྱལ་བར་བྱེད་ཅིང་རྐེད་པ་དང་རོ་རྒྱབ་ལ་སོགས་པ་ན་བར་བྱེད་པ་སོགས་ཡིན་ནོ། །དེ་ཡང་རོ་བསྐ་བས་ནི་ཁྲག་མཁྲིས་དང༌། ཚིལ་བུ་དང་འདྲུལ་བག་སྐེམ་པ་དང༌། རྨ་འཚོ་ཞིང་ཚིལ་དང་པགས་པའི་མདོག་དྭངས་པར་བྱེད་ལ་ཤིན་ཏུ་བསྟེན་དྲགས་ན་བེ་སྣབས་འཁྱིལ་བ་དང་བཤང་བ་སྲི་བ་དང་ལྟོ་བ་སྦོས་པ་དང་སྙིང་གི་ནད་རྣམས་སྐྱེད་ཅིང་དྭངས་མ་ལ་སོགས་སྐེམ་པ་དང་རྩ་སྒོ་འགག་པར་བྱེད་པ་ཡིན་ནོ།།

གོང་དུ་བཤད་པ་དེ་རྣམས་ཀྱི་དོན་མདོར་ཧྲིལ་གྱིས་བསྡུས་ནས་འཆད་ན་འདི་ལྟ་སྟེ། མངར་བའི་རོ་ཕལ་ཆེར་གྱིས་རླུང་མཁྲིས་གཉིས་སེལ་བར་བྱེད་མོད་ཀྱང་ནད་རྙིང་པ་དང་སྐམ་ས་ལ་གནས་པའི་སྲོག་ཆགས་ཀྱི་ཤ་ལ་སོགས་པ་རྣམས་འགའ་ཞིག་ཙམ་མ་གཏོགས་པ་ཕལ་ཆེར་གྱིས་བད་ཀན་སྐྱེད་པར་བྱེད་པ་ཡིན་ན་ཡང༌། མངར་བའི་རོ་དང་ལྡན་པ་གཡག་རྒོད་དེ་བྱང་འབྲོང་གི་ཤ་དང་ཉ་ཤ་དང་ལུག་ཤ་དང་སྦྲང་རྩི་རྣམས་ནི་འབྱུང་བའི་རྟེན་སྟབས་དང་ངོ་བོའི་ནུས་པས་བད་ཀན་ལ་ལྷག་པར་དུ་ཕན་པ་ཡིན་ལ། དེ་བཞིན་དུ་སྐྱུར་བས་བད་ཀན་དང་རླུང་གཉིས་སེལ་ཞིང་མཁྲིས་པ་སྐྱེད་པར་བྱེད་པ་ཡིན་མོད་ཀྱང༌། སྐྱུ་རུ་རས་ནི་རྟེན་སྟོབས་ངོ་བོའི་ནུས་པས་ཁྲག་མཁྲིས་དང་ཚ་བའི་ནད་སེལ་ཞིང༌། ལན་ཚྭ་ཕལ་ཆེར་གྱིས་རླུང་དང་བད་ཀན་སེལ་བར་བྱེད་ཅིང་ལྕེ་མྱང་ཚྭ་དང་རྒྱམ་ཚྭ་གཉིས་ཞུ་རྗེས་ཆེས་མངར་བས་རོ་བཞིན་དུ་མི་གནོད་པ་མ་གཏོགས་གཞན་རྣམས་ཀྱིས་མཁྲིས་པ་སྐྱེད་པར་བྱེད་པ་དང༌། དེ་གཉིས་ཀྱང་ཧ་ཅང་ཐལ་དྲགས་ན་ནུས་པ་ལྕི་བས་བད་ཀན་སྐྱེད་པར་བྱེད་པ་དང༌། ཁ་བ་ཕལ་ཆེར་གྱིས་མཁྲིས་པ་སེལ་ཞིང་བད་རླུང་སྐྱེད་པར་བཤད་མོད་ནའང་ངོ་བོའི་ནུས་པ་དྲོ་བ་དང་རྟེན་སྟོབས་ཀྱི་ཀརཉྫ་དང་སླེ་ཏྲེས་གཉིས་ཀྱིས་བད་རླུང་སེལ་བར་བྱེད་པ་དང༌། དེ་བཞིན་དུ་ཚ་བས་ནི་རླུང་དང་བད་ཀན་སེལ་བར་བྱེད་ལ། དེའི་ནང་ནས་སྒོག་སྐྱ་དང་པི་པི་ལིང་གཉིས་ཀ་ཞུ་རྗེས་ཆེས་ཁ་བ་དང་སྒོག་སྐྱ་ངོ་བོའི་ནུས་པ་ཡོད་པ་གཉིས་མ་ཡིན་པ་གཞན་རྣམས་ཀྱིས་མཁྲིས་པ་སྐྱེད་པར་བྱེད་པ་དང༌། ཚ་བ་དེའང་ཧ་ཅང་ཐལ་དྲགས་ན་ནུས་པ་ཡང་རྩུབ་དང་ལྡན་པས་རླུང་ཡང་ཅུང་ཟད་སྐྱེད་པར་བྱེད་པ་དང༌། བསྐ་བས་ནི་མཁྲིས་པ་སེལ་ཞིང་དེའི་ནང་ནས་ཨ་རུ་ར་དང་བ་རུ་ར་གཉིས་ངོ་བོའི་ནུས་པས་མ་གཏོགས་པ་ཕལ་ཆེར་ནི་བད་རླུང་གཉིས་ལ་གནོད་པར་བྱེད་པ་ཡིན་ནོ།།

ཅུང་ཟད་དམིགས་ཀྱིས་བསལ་བ་སྨན་གྱི་ཞུ་རྗེས་ནི། སྨན་ཟོས་པ་རྣམས་ཕོ་བའི་མེ་གསུམ་པོ་དང་ཕྲད་པ་དེའི་ཚེ་ལས་བད་ཀན་མྱག་བྱེད་དང༌། མཁྲིས་པ་འཇུ་བྱེད་དང༌། རླུང་མེ་མཉམ་གསུམ་པོ་དེ་དག་གིས་རིམ་པར་ཞུ་བ་ལས་རྗེས་ལའང་འདི་ལྟར་འབྱུང་སྟེ། སྨན་རོ་མངར་བ་དང་ལན་ཚྭ་ཤས་ཆེ་བ་ཟོས་པའི་ཞུ་རྗེས་ནི་རང་རང་གི་རྒྱུ་དང་རྗེས་སུ་མཐུན་པའི་གནས་ཀྱི་ཁྱད་པར་གྱིས་ཐོག་མའི་སྐབས་སུ་མངར་བར་ཞུ་ཞིང༌། དེ་བཞིན་དུ་རོ་སྐྱུར་བ་བར་གྱི་དུས་སུ་རོ་དང་མཚུངས་པ་སྐྱུར་བར་འཇུ་ལ། རོ་ཁ་ཚ་བསྐ་གསུམ་ནི་གནས་སྐབས་ཐ་མར་བབ་པའི་ཚེ་ཁ་བར་ཞུ་བ་སྟེ། དེས་ན་ཉེས་པ་གསུམ་པོ་ཞུ་རྗེས་མངར་བས་ནི་རླུང་མཁྲིས་སེལ། སྐྱུར་བས་བད་རླུང་གཉིས་སེལ། ཁ་བས་བད་མཁྲིས་གཉིས་ཏེ་གཉིས་གཉིས་ཞུ་རྗེས་རེ་རེས་སེལ་བར་བྱེད་དོ་ཞེས་པ་འདི་ནི་ཞུ་རྗེས་ཀྱི་ལས་བྱེད་པའི་དབང་དུ་བྱས་ནས་གསུངས་སོ། །འདི་ལ་དགག་སྒྲུབ་དང་རྣམ་གཞག་གི་སྤྲོས་བཤད་རྒྱས་པར་ཡོད་ཀྱང་དེ་ཙམ་མོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་རོ་དང་ཞུ་རྗེས་བསྟན་པའི་ལེའུ་སྟེ་བཅུ་དགུ་པའོ།། །།

མཐའ་མའི་འདོན་ཐེངས་།: 05.09.2023 ཉིན། 11:08 AM