ལེའུ་བཅུ་གསུམ་པ། འཇམ་རྩི་བདུད་རྩི་འཕེལ་བྱེད།

འཇམ་རྩི་བདུད་རྩི་འཕེལ་བྱེད་ཅེས་བྱ་བ་འདི་ནི། གཞང་ལུག་པ་དང་། སྨད་དྲོད་ཆད་པ་དང་། མཁལ་མ་འོར་དུ་ལྷུང་བ་ལ་གཏང་ངོ་། །སྔོན་འགྲོ་ལུས་པོ་བརྡལ། ལྟོ་ཆས་བྱ། སྤྱོད་ལམ་གཟབས། དུགས་དང་བསྐུ་མཉེ་བྱ། བཤང་གཅི་བདེ་བར་བསལ། ཆུ་དྲོན་གྱིས་ཁྲུས་བྱའོ། །སྨན་ནི་མར་སྲང་གཉིས་བཙག་བཅད་ལ། ཨ་འབྲས་ས་འབྲས་འཇམ་འབྲས་གསུམ། སུག་སྨེལ་ལྕམ་པ་སྲིན་བུ་གསུམ། རྒྱ་ཚ་རྒྱམ་ཚ་ཁ་རུ་ཚ་གསུམ་དགུ་པོ་ཞིབ་པར་བྱས་ལ་མར་ལ་གདབ། མར་འཇམ་པོ་ལ་ཕོ་བའི་ནང་དུ་བླུགས་ལ། ཕོ་བའི་ཁར་གཅེའུ་ཆུང་བཅུག་ལ། སྐུད་པས་སོར་བཞིའི་མཚམས་སུ་བཀྱིགས། སོར་བཞི་ནང་དུ་བཏང་ལ་གློ་བ་བརྒྱངས་པ་བཞིན་བྱའོ། །དེ་ནས་བལ་ལམ་འཕྱིང་པས་འཕང་དགག ནད་པ་གཡས་འོག་ཏུ་བཅུག་ལ་ཟུར་ལ་ཉལ་དུ་གཞུག གན་རྐྱལ་དུ་མི་ཉལ། སྔས་སྨད། སྐབས་སུ་བཅད། རྗེས་བཤལ་དང་འདྲའོ། །ཕན་པ་འདྲ་ན་ཡང་ཟླ་བ་ཕྱེད་ཙམ་ན་གཏང་། དེས་ཁོང་པ་འཇམ་ཞིང་སྣུམ་པར་བྱེད་དོ། །འཇམ་རྩི་་བདུད་རྩི་འཕེལ་བྱེད་ཀྱི་ལེའུའོ། །ས་མཱ་པྟ་མིཐི།། །།

མཐའ་མའི་འདོན་ཐེངས་།: 18.07.2019 ཉིན། 10:58 AM