ལེའུ་བཅུ་གཅིག་པ། ནད་ཀྱི་མཚན་ཉིད་བསྟན་པ། 

ནད་འཇུག་པའི་ཚུལ་བསྟན་ཟིན་པ་དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །དེ་ཡང་ཀྱེ་ཞེས་བོས་ནས་དྲང་སྲོང་ཆེན་པོ་ཡིད་ལས་སྐྱེས་འཁོར་དང་བཅས་པ་རྣམས་ལེགས་པར་ཉོན་ལ་ཡིད་ལ་ཟུངས་ཤིག རྣམ་པར་གྱུར་པ་ཉེས་པ་དངོས་འབྱུང་བར་འགྱུར་བའི་མཚན་ཉིད་ནི་རང་རང་གི་ལྡང་ཚད་ལས་མང་དུ་འཕེལ་བ་དང༌། དེ་ལས་ཉུང་དུ་ཟད་པ་དང༌། ཕན་ཚུན་འཁྲུགས་པ་དེ་རྣམ་པ་གསུམ་གྱིས་བསྡུས་སོ། །འཕེལ་ཟད་འཁྲུགས་གསུམ་པོ་དེ་ཡང་རླུང་ལ་སོགས་པའི་ནད་དང་དྭངས་མ་ལ་སོགས་པའི་ལུས་ཟུངས་དང༌། བཤང་གཅི་ལ་སོགས་པའི་དྲི་མ་དང་རྣམ་པ་གསུམ་པོ་ཁོ་ན་ལས་འབྱུང་བར་འགྱུར་ཏེ། དེ་གསུམ་པོ་ལའང་འཕེལ་ཟད་ཀྱི་རྒྱུ་རེ་རེ་དང༌། དེའི་མཚན་མའམ་རྟགས་རེ་རེ་སྟེ་རྣམ་པ་གཉིས་གཉིས་ཀྱི་སྒོ་ནས་གསལ་པོར་བསྟན་པར་བྱའོ།།

ནད་ཟུངས་དྲི་མ་གསུམ་ལས་དང་པོ་ཉེས་པ་རླུང་ལ་སོགས་པ་འཕེལ་བ་དང་ཟད་པར་འགྱུར་བའི་རྒྱུའི་གཙོ་བོ་ནི་གང་གིས་བྱེད་པར་འགྱུར་སྙམ་ན། འདི་ཡང་དུས་ལ་ལྟོས་པ་སྟེ། མི་གང་ཞིག་ནད་འཕེལ་བ་དང་ཟད་པ་གང་ཡང་རུང་བ་ལ་མངོན་དུ་ཕྱོགས་པ་དེའི་ཚེ་ཟས་དང་སྤྱོད་ལམ་ལོག་པ་ཡིད་ལ་བྱེད་པར་འགྱུར་ཏེ། དེ་ཡང་ལོགས་སུ་བཀར་ནས་དམིགས་ཀྱིས་བསལ་ན་རླུང་ལྟ་བུ་འཕེལ་བ་དང༌། ཟད་པ་ལ་མངོན་དུ་ཕྱོགས་པ་དེའི་ཚེ་ཤ་ཆང་ལ་སོགས་པ་མངར་བའི་ཟས་རྣམས་ཡི་གར་མི་འདོད་ཅིང༌། དེའི་དབང་གིས་སྤངས་ཤིང་མ་ཟོས་པ་དང༌། སྐྱབས་ཁུར་དང་ཇ་ལ་སོགས་པ་ཁ་བསྐའི་བཟའ་བཏུང་སྙིང་ལ་འདོད་པས་སློང་ཞིང་དེ་ལ་བྱིན་ནས་ཟོས་པ་དང༌། དེ་བཞིན་དུ་དྲོ་ཞིང་དལ་བའི་སྤྱོད་ལམ་མི་འཕྲོད་དོ་སྙམ་པ་དང༌། ཡང་རྩུབ་ཀྱི་སྤྱོད་ལམ་འཕྲོད་དོ་སྙམ་ནས་དེ་གཉིས་རིམ་པ་ལྟར་སྔ་མ་སྤང་བ་དང་ཕྱི་མ་གཞན་གྱིས་གནང་བ་བྱིན་ཞིང་བསྟེན་པ་དེ་དང་དེ་ལྟ་བུས་རླུང་ནད་འཕེལ་ཞིང་ཡང་ན་ཟད་པར་འགྱུར་བ་ཡིན་ནོ། །དེ་ཡང་ཟས་མི་འདོད་པ་དང་སྤྱོད་ལམ་མི་འཕྲོད་དོ་སྙམ་པ་སྤངས་པས་འཕེལ་ཞིང་ཟས་འདོད་ནས་སློང་བ་དང༌། སྤྱོད་ལམ་འདི་ནི་འཕྲོད་དོ་སྙམ་པ་གཞན་གྱིས་བྱིན་པའམ་རང་གི་བློས་བརྟགས་ནས་སྤྱད་ཀྱང་རུང་ཟད་པར་འགྱུར་ཏེ་གཞན་ལའང་ཤེས་པར་བྱའོ།།

གཉིས་པ་ལུས་ཟུངས་འཕེལ་བ་དང་ཟད་པ་ཉེ་བར་བསྐྱེད་པའི་རྒྱུའི་གཙོ་བོ་ནི་ལུས་ཀྱི་མེ་དྲོད་མཁྲིས་པ་འཇུ་བྱེད་དེ་ཉིད་རང་གི་གནས་ཞུ་བ་དང་མ་ཞུ་བའི་བར་ན་འདུག་པ་དེའི་ཆ་ཤས་ལུས་ཟུངས་རེ་རེ་ཀུན་ལ་སོ་སོར་གནས་པ་དེ་རྣམས་ཀྱི་སྟོབས་བྲི་བ་དང་ཆེས་ཆེར་འབར་བས་ལུས་ཟུངས་རྣམས་རིམ་པ་བཞིན་དུ་འཕེལ་བ་དང་ཟད་པར་འགྱུར་ཏེ། དེ་ཡང་དང་པོ་འཕེལ་བས་ནི་ཕྱི་མ་རྣམས་ཀྱང་འཕེལ་ཞིང་རྒྱས་པར་བྱེད་པ་དང༌། དང་པོ་ཟད་པས་ནི་ཕྱི་མ་རྣམས་ཀྱང་ཟད་ཅིང་འགྲིབ་པར་བྱེད་པར་འགྱུར་བ་ཡིན་ཏེ། དཔེར་ན་ཕོ་བའི་མེ་དྲོད་དང་ཁྲག་ལ་སོགས་པ་རང་རང་གི་མེ་དྲོད་བྲི་ཞིང་ཉམས་པ་ན་ཕོ་བར་ཁ་ཟས་མ་ཞུ་བས་དྭངས་མའི་ཉེས་པ་ཆེར་འཕེལ་ཏེ་འོག་ནས་འབྱུང་བའི་ནད་རྟགས་རྣམས་སྟོན་ཞིང༌། དྭངས་མ་མ་ཞུ་བ་དེས་རྒྱུ་བྱས་ནས་ཁྲག་དང་ཤ་ལ་སོགས་པ་རྣམས་ཀྱང་རང་རང་གི་མེ་དྲོད་ཀྱིས་མ་སྨིན་པས་ན་ཕྱི་མ་ཕྱི་མ་རྣམས་ཀྱི་ཉེས་པ་ཚབས་ཆེར་འཕེལ་ཞིང་རྒྱས་ཏེ། སོ་སོའི་ནད་རྟགས་སྟོན་པར་བྱེད་ལ། དེ་བཞིན་དུ་ཕོ་བའི་མེ་དྲོད་སོགས་སྟོབས་ཆེར་འབར་དྲགས་ན་ཁ་ཟས་ཀྱི་དྭངས་མ་སྐེམ་པར་འགྱུར་ཞིང་དེ་སྐེམས་པས་ནི་ཟུངས་ཕྱི་མ་རྣམས་ཀྱང་ཟད་ཅིང་འགྲིབ་པར་གྱུར་ནས་རང་རང་གི་ནད་རྟགས་འོག་ནས་འབྱུང་བ་ལྟར་སྟོན་པར་བྱེད་པ་ཡིན་ནོ།། 

གཞན་ནས་བཤད་ཀྱང་དྲི་མ་འཕེལ་བའི་རྒྱུ་ནི། ནད་ཟུངས་གཉིས་འཕེལ་ཟད་དུ་གྱུར་པ་དེ་ཉིད་ཡིན་ལ། དེས་དྲི་མ་ལ་གནོད་ནས་འཕེལ་བའམ་ཟད་པར་འགྱུར་ཏེ། དེ་ཡང་དྲི་མ་རྣམས་རང་རང་གི་གནས་ལས་མི་འབྱུང་བར་ཐོགས་པ་དང་ཤིན་ཏུ་འབྱུང་བའི་མཚན་ཉིད་གཉིས་ལས་ཤེས་ཤིང་གོ་བར་བྱའོ།།

གོང་དུ་ཉེས་པ་ལ་སོགས་འཕེལ་ཟད་ཀྱི་རྒྱུ་དང་རྟགས་དེ་གཉིས་སུ་ཡོད་པའི་དང་པོ་རྒྱུ་བཤད་ཟིན་ནས། གཉིས་པ་རྟགས་འཆད་པར་བྱེད་པ་ལ་འཕེལ་བའི་རྟགས་རྣམས་ཀྱི་ནང་ནས་རླུང་འཕེལ་བའི་རྟགས་སུ་ལུས་ཀྱི་ཆ་སྐེམ་ཞིང་ནག་པ་དང༌། དྲོད་ལ་དགའ་ཞིང་ལུས་འདར་བ་དང༌། ལྟོ་བ་སྦོ་ཞིང་བཤང་བ་སྲི་བ་དང༌། ཤིན་ཏུ་སྨྲ་བ་མང་ཞིང་མགོ་བོ་ཟི་ཐོམ་དུ་འཁོར་བ་དང༌། ལུས་སྟོབས་དང་གཉིད་དང་མིག་ལ་སོགས་པའི་དབང་པོ་རྣམས་ཀྱི་བྱ་བ་ཉམས་ཏེ་རང་རང་གི་ཡུལ་ལ་མི་འཇུག་པ་ཡིན་ནོ། །དེ་བཞིན་དུ་མཁྲིས་པ་འཕེལ་བའི་རྟགས་སུ་རང་གི་བཤང་གཅི་དང་པགས་པ་དང་མིག་རྣམས་སེར་པོར་འགྱུར་ཞིང༌། གསུས་ཀྱང་བཀྲེས་ཤིང་སྐོམ་པ་དང༌། ལུས་དྲོད་ཚ་ཞིང་གཉིད་ཆུང་བ་དང༌། ཐུར་དུ་འཁྲུ་བར་བྱེད་པ་རྣམས་འབྱུང་ལ། བད་ཀན་འཕེལ་བས་ཀྱང་ལུས་ཀྱི་དྲོད་ཉམས་ཤིང་ཁ་ཟས་མི་འཇུ་བས་སྦོ་བ་དང༌། ལུས་ལྕི་ཞིང་པགས་མདོག་དཀར་བ་དང༌། ཁོང་སྙོམ་ཞེས་པ་བརྡ་རྙིང་སྟེ། ཟླ་ཟེར་ལས། ཁོང་སྙོམ་པ་ནི་སྤྲོ་བ་ཆུང་ཞིང་སྒྱིད་ལུག་པའོ་ཞེས་པ་ལྟར་བྱ་བ་ལ་མི་དགའ་བའི་ཁོང་སྙོམ་ཞིང་ཡན་ལག་གི་ཚིགས་པ་རྣམས་ལྷོད་པ་དང༌། མཆིལ་མ་དང་ལུད་པ་མང་ཞིང་གཉིད་ཆེ་བ་དང་དབུགས་མི་བདེ་བ་རྣམས་འབྱུང་བ་ཡིན་པས་དེ་ལྟར་ཤེས་པར་བྱའོ།།

  ལུས་ཟུངས་རྣམས་ཀྱི་དང་པོ་དྭངས་མ་འཕེལ་བའི་རྟགས་ནི་བད་ཀན་འཕེལ་རྟགས་དང་འདྲ་སྟེ་མེ་དྲོད་ཉམས་པ་ལ་སོགས་པ་འབྱུང་ལ། ཁྲག་འཕེལ་བའི་རྟགས་སུ་གདོང་ལ་སོགས་པ་རྣམས་ལ་མེ་དབལ་ལམ་བྱང་གྱ་ཞེས་པའི་ནད་འབྲུམ་པ་དམར་ཙམ་ཀོ་ལེར་འབྱུང་བ་དང༌། ཁོང་པའི་ནད་འབྲས་དང་མཆེར་པའི་ནད་དང༌། མཛེ་སྐྲན་དང་ཁྲག་མཁྲིས་ཀྱི་ནད་དང༌། མིག་སེར་ཞེས་བྱ་བའི་ནད་དང༌། སོ་རྙིལ་སྐྲངས་པ་ལ་སོགས་པའི་ནད་དང༌། ལུས་བསྐྱོད་པར་དཀའ་ཞིང་མིག་དང་གཅིན་དང་པགས་པ་རྣམས་དམར་པོར་འགྱུར་བ་དང༌། ཤ་འཕེལ་བའི་རྟགས་སུ་ལྦ་བ་དང་རྨེན་བུ་དང་ཤ་ཀུན་ནས་རྒྱས་པར་འགྱུར་བ་དང༌། ཚིལ་འཕེལ་བའི་རྟགས་སུ་ལུས་སེམས་དལ་ཞིང་འཐིབས་པ་དང༌། ནུ་མ་དང་གསུས་པའི་ཚིལ་བུ་སྐྱེ་སྟེ་ཆེས་ཆེར་འགྲོ་བ་དང༌། རུས་པ་འཕེལ་བའི་རྟགས་སུ་རུས་པའི་སྟེང་དུ་རུས་ལྷག་དང་སོའི་གྲངས་ཚང་ནས་ཀྱང་སླར་སོ་ལྷག་འབྱུང་བ་ཡིན་ལ། རྐང་མར་འཕེལ་བའི་རྟགས་སུ་ལུས་ལྕི་ཞིང་མིག་གཡུང་བ་སྟེ་མིག་སྟངས་ཞན་པ་དང༌། རུས་ཚིགས་ཀྱི་ཁ་སྦོམ་པོར་འབྱུང་བ་དང༌། ལུས་ཟུངས་ཀྱི་ཐ་མ་ཁུ་བ་འཕེལ་བའི་རྟགས་སུ་ཁུ་བ་རང་ཉིད་ལ་བརྟེན་པའི་རྡེ་འུའི་ནད་དུ་འགྱུར་ཞིང་བུད་མེད་ལ་ཤིན་ཏུ་དད་དེ་རོ་ཙ་བའི་ནུས་པ་དག་འབྱུང་བ་ཡིན་ནོ།།

དྲི་མ་རྣམས་ཀྱི་ནང་ནས་བཤང་བ་འཕེལ་བའི་རྟགས་སུ་ལུས་ལྕི་ཞིང་ལྟོ་བ་སྦོ་བ་དང༌། རྒྱུ་མ་གཟེར་ཞིང་ཀྲུག་ཀྲུག་ཅེས་པའི་སྐད་འབྱུང་བ་དང༌། ལུས་བསྐྱོད་དཀའ་བར་འབྱུང་བ་ཡིན་ལ། གཅིན་འཕེལ་བའི་རྟགས་སུ་ཆུ་སོར་ཟུག་ཅིང་ན། གཅིས་ཞེས་པ་བརྡ་རྙིང་པ་སྟེ་ཡང་ཡང་བཏང་བའི་དོན་ཡིན་ལ། འདིར་མ་གཅིས་ཞེས་པ་ཡང་ཡང་བཏང་ཡང་དེ་མ་ཐག་ཏུ་མ་བཏང་བ་ཡིན་ནམ་སྙམ་དུ་སེམས་པ་དག་འབྱུང་བ་དང༌། རྔུལ་འཕེལ་བའི་རྟགས་སུ་རྔུལ་ཕྱིར་དོན་ལ་ཤིན་ཏུ་ཆེ་ཞིང་དྲི་ཞིམ་པ་ལས་ལྡོག་སྟེ་དྲི་མི་ཞིམ་པ་སྐྱེ་བ་དང༌། གཡན་པ་ལ་སོགས་པ་པགས་པའི་ནད་འབྱུང་བ་དང༌། ཕྲ་མོ་སྟེ་མིག་གི་རྔུ་མ་དང་སྣབས་དང་རྣ་སྤབས་དང་མཆིལ་མ་རྣམས་འཕེལ་བའི་རྟགས་སུ་རང་རང་གི་གནས་རྣམས་ལྕི་ཞིང་གཡའ་བའམ་རྩེ་ལ་འདྲུལ་བར་བྱེད་པ་དག་འབྱུང་བ་ཡིན་ནོ།།

རླུང་ཟད་པའི་རྟགས་སུ་ལུས་ཀྱི་འབད་རྩོལ་ཆུང་ཞིང་སྨྲ་བའི་སྤྲོ་བ་ཉམས་པ་དང༌། ལུས་མི་བདེ་ཞིང་དྲན་པ་མི་གསལ་བ་དང༌། གོང་དུ་བཤད་པའི་བད་ཀན་འཕེལ་བའི་རྟགས་རྣམས་འབྱུང་བ་ཡིན་ལ། མཁྲིས་པ་ཟད་པའི་རྟགས་སུ་ལུས་ཀྱི་དྲོད་དང་པགས་པའི་མདོག་ཉམས་པས་རེག་བྱ་གྲང་བ་དང་ཁ་དོག་ནག་པོར་འབྱུང་ལ། བད་ཀན་ཟད་པའི་རྟགས་སུ་བད་ཀན་རང་གི་གནས་དྭངས་མ་དང་ཤ་ལ་སོགས་པ་སྟོང་ཞིང་ཀླད་པའི་ཆ་ལའང་གནོད་པས་མགོ་བོ་འཁོར་བ་དང་སྙིང་འདར་ཞིང་རུས་ཚིགས་ཀྱི་མཚམས་མི་སྦྱོར་བར་ལྷོད་ལྷོད་པོར་འགྱུར་བ་དག་འབྱུང་བ་ཡིན་ནོ།།

ལུས་ཟུངས་བདུན་གྱི་དང་པོ་དངས་མ་དེ་ཉིད་ཟད་པའི་རྟགས་སུ་ཤ་སྐེམ་ཞིང་ཁ་ཟས་མིད་པར་དཀའ་བ་དང༌། པགས་པ་རྩུབ་ཅིང་སྒྲ་ཆེར་བསྒྲགས་པ་རྣམས་ལ་མི་བཟོད་པའི་ནད་ལྡང་བར་འགྱུར་བ་དང༌། ཁྲག་ཟད་པའི་རྟགས་སུ་རྩ་ལྷོད་པ་སྟེ་སྟོང་སྟོང་པོར་གནས་ཤིང༌། པགས་པ་རྩུབ་པ་དང་བསིལ་བའི་རེག་བྱ་དང་སྐྱུར་བའི་ཁ་ཟས་ལ་དད་པ་དང༌། ཤ་ཟད་པའི་རྟགས་སུ་ལྷུ་ཚིགས་རྣམས་བཅག་པ་ལྟར་ན་ཞིང་རུས་པ་ལ་པགས་པ་འབྱར་བས་ཤིན་ཏུ་སྐེམ་པོར་འགྲོ་བ་དང༌། ཚིལ་ཟད་པའི་རྟགས་སུ་གཉིད་ཆུང་ཞིང་ཤ་སྐམས་པ་དང༌། པགས་མདོག་སྔོ་སྐྱར་འགྱུར་བ་དང༌། རུས་པ་ཟད་པའི་རྟགས་སུ་སྐྲ་འབྱི་ཞིང་སོ་དང་སེན་མོ་ཕྱུང་བ་སྟེ་བུད་འགྲོ་བ་དང༌། རྐང་མར་ཟད་པའི་རྟགས་སུ་རུས་རྐང་གི་སྦུབས་སྟོང་པ་དང༌། མགོ་བོ་འཁོར་ཞིང་མིག་འགྲིབ་པར་འགྱུར་ལ། ཁུ་བ་ཟད་པའི་རྟགས་སུ་གསང་གནས་ལས་ཁྲག་འབྱུང་ཞིང་བདེ་བ་ཉམས་པས་ཤེས་པ་དང་གསང་སྒྲོ་དང་བཅས་པ་ཚིག་གམ་སྙམ་དུ་སེམས་པ་དག་འབྱུང་བ་ཡིན་ནོ།།

དྲི་མ་རྣམས་ཀྱི་ནང་ནས་བཤང་བ་ཟད་པའི་རྟགས་སུ་རྒྱུ་མའི་ནང་དུ་རླུང་སྒྲ་དང་བཅས་ཤིང་འཁྱིལ་བ་དང༌། སྐབས་སུ་རླུང་གྱེན་དུ་འགྲོ་ཞིང་རྩིབ་ལོགས་དང་སྙིང་ག་ན་ཞིང་གཟེར་བ་དང༌། གཅིན་ཟད་པའི་རྟགས་སུ་གཅིན་མདོག་གློ་བུར་དུ་འགྱུར་ཞིང་སྲི་བ་ཞེས་པ་ཟླ་ཟེར་ལས། གཅིན་ཡུན་རིང་ཞིག་བཀག་ཅིང་བརྣགས་པར་འགྱུར་བ་ནི་ཕྱིས་གཏོང་བའི་ཚེ་སྲི་ཞིང་བདེ་བླག་ཏུ་འབྱུང་བར་མི་འགྱུར་ལ། གཅིན་བཀག་ཅིང་བརྣགས་པའི་སྐྱོན་གྱིས་ནད་དུ་གྱུར་པ་ནི་གང་གི་ཚེ་རླུང་གིས་གྱེན་དུ་ལྡོག་པར་གྱུར་ལ་དེའི་ཚེ་ལྟེ་བའི་འོག་ནས་ལྟོ་བའི་བར་དུ་གཅིན་གྱིས་གང་བར་གྱུར་ལ་དེའི་ཚེ་རབ་ཏུ་ན་བ་ལ་སོགས་པའི་ནད་བསྐྱེད་པར་འགྱུར་རོ་ཞེས་སོགས་གསུངས་པས་དོན་གཏོང་བུལ་བའམ་དཀའ་བ་དང༌། ཡང་ན་ཉུང་ངུར་འབྱུང་བར་འགྱུར་བ་དང༌། རྔུལ་ཟད་པའི་རྟགས་སུ་པགས་པ་འགས་ཤིང་བ་སྤུའི་བུ་ག་རྣམས་བྱེ་སྟེ་འགྲེང་བ་དང་རང་འབྱི་སྟེ་ལྷུང་བར་འགྱུར་བ་དང༌། ཕྲན་བུ་སྟེ་སྣོད་མཁྲིས་དང་མིག་གི་རྔུ་མ་སོགས་ཟད་པའི་རྟགས་སུ་རང་རང་གི་གནས་སྟོང་པ་དང་ཡང་བ་ལས་གཅོང་ཆེན་ཟད་བྱེད་སོགས་ཤེས་པར་བྱའོ། །མདོར་ན་ལུས་ཟུངས་བདུན་པོ་ནི་རང་རང་གི་དྲི་མ་རྣམས་ལ་ནི་བརྟེན་ཏེ་གནས་པའི་ཕྱིར་དྲི་མ་རྣམས་འཕེལ་བས་ནད་བསྐྱེད་པ་ཡིན་དུ་ཟིན་ཀྱང༌། དེ་ལས་ཟད་པས་ལུས་ཀྱི་ཟུངས་སྟོབས་ལ་གནོད་པ་ཚབས་ཆེ་བ་ཡིན་ནོ།།

ལུས་ཟུངས་དྭངས་མ་རྣམས་ཀྱི་མཐར་ཐུག་པའི་མདངས་ཞེས་བྱ་བའི་སྲོག་གི་རྟེན་དེ་ནི་སེམས་ལ་སྡུག་བསྔལ་ཆེན་པོ་སྐྱེ་བའི་དབང་གིས་ཟད་པར་འགྱུར་བ་ཡིན་ཏེ། དེའི་རྟགས་སུ་ཡང་ཡང་དངངས་ཤིང་སྐྲག་པ་སྐྱེ་བ་དང༌། ལུས་རིད་ཅིང་ཉམ་ཆུང་བ་དང༌། གང་ལའང་མི་དགའ་བའི་བློ་སྐྱེས་ཤིང་གཟི་མདངས་ཉམས་པར་འགྱུར་བ་དེའི་ཕྱིར་མངར་བའི་སྡེ་ལ་སོགས་པ་འཚོ་བྱེད་ཀྱི་སྨན་སྤྱི་དང༌། བྱེ་བྲག་ཏུ་བཀའ་བསྟན་བཅོས་མན་ངག་དང་བཅས་པ་རྣམས་ལས་འབྱུང་བའི་བཅུད་ལེན་དང་རོ་ཙ་བར་བྱེད་པའི་སྨན་གྱི་སྦྱོར་བ་དང༌། བཞོས་ཐོག་གི་འོ་མ་དང༌། ཤ་བཟང་པོ་གསར་པ་བཙོས་པའི་ཁུ་བ་ལ་སོགས་པ་རྣམས་མདངས་ཟད་པ་དེ་གསོ་བར་བྱེད་པའི་སྨན་ཡིན་པས་ན་སྲོག་ཡུན་རིང་དུ་འཚོ་བར་བྱེད་པའི་ཐབས་སུ་འབད་དེ་བསྟེན་པར་བྱའོ། །གོང་དུ་འཕེལ་ཟད་ཀྱི་རྟགས་བསྟན་ཟིན་ནས།

ད་ནི་འཁྲུགས་པའི་རྟགས་བསྟན་པ་ལས། ཐོག་མར་རླུང་འཁྲུགས་པའི་རྟགས་ལ། རླུང་གི་རྩ་ནི་ཁོང་ཤིན་ཏུ་སྟོང་ཞིང་ཁ་ལ་རྐྱལ་བ་དང་ཆུ་ནི་ལུ་མའི་ཆུ་དང་འདྲ་བར་སྔོ་ལ་དྭངས་ཤིང་ཕལ་ཆེར་མི་ལྡོག་ལ། གལ་ཏེ་ལོག་ཀྱང་དེའི་རྗེས་སླ་བ་དང༌། འགྲོ་འདོད་ཅིང་ཐང་ཆད་པའི་སྐབས་ལྟར་ཤུས་འདེབས་པ་དང༌། ཤེས་པ་ཡང་ལ་གཏད་མེད་དུ་འཕྱོ་བ་དང༌། མགོ་བོ་ཟི་འཁོར་བྱེད་ཅིང་རྣ་བ་འུར་ལ་འཁྲོག་པ་དང༌། ལྕེ་སྐམ་ཞིང་དམར་ལ་རྩུབ་པ་དང༌། ཅི་ཡང་མ་ཟོས་ཀྱང་ཁ་ལ་རོ་བསྐ་བ་བྲོ་བ་དང༌། གཟེར་བ་ངེས་མེད་དུ་འཕོ་ཞིང་ལུས་གྲང་ལ་བརྩེ་འདར་བྱེད་པ་དང༌། ལུས་འགུལ་བསྐྱོད་བྱས་པའི་ཚེ་ཀུན་ལ་ཁྱབ་པའམ། ཡང་ན་ཀོ་ལེར་ཟུག་པ་དང༌། སྙོམ་པ་སྟེ་སྒྱིད་ལུག་པ་དང༌། ལུས་ཡན་ལག་དང་བཅས་པ་རེངས་པའམ་ཡང་ན་བརྐྱང་བསྐུམ་མི་ཤེས་པར་འཁུམས་པ་དང༌། ཤ་ལྤགས་བྱེ་བ་དང་རུས་རྐང་ཆག་པ་སྙམ་དུ་བྱེད་པ་དང༌། མིག་ལ་སོགས་པ་ཕྱིར་འབྱིན་པ་དང༌། ཡན་ལག་གཞན་གྱིས་དཀྲིས་སྙམ་བྱེད་པ་དང༌། འགུལ་ན་ཟུག་ལྷག་པར་དུ་ཆེ་ཞིང་བ་སྤུ་བརྩེ་ལ་ཕྲུམ་སེར་ཁྱེར་བ་དང༌། མཚན་མོ་ཡང་གཉིད་མེད་ཅིང་གཡལ་དང་འདར་བ་དང་རྐང་ལག་རྐྱོང་བར་འདོད་པ་དང༌། ཚིག་པ་ཟ་བ་རྣམས་འབྱུང་ལ། དཔྱི་རྐེད་དང་རུས་ཚིགས་མ་ལུས་པ་བརྡུངས་པ་སྙམ་དུ་བྱེད་པ་དང༌། ལྟག་པ་དང་བྲང་དང་མུར་འགྲམ་ལ་ལྷག་པར་དུ་ཟུག་ཅིང་གཟེར་བ་དང༌། ཨན་སྟོང་ཚིགས་པ་དང་པོ་ལ་སོགས་པའི་རླུང་གསང་རྣམས་ནི་ཁ་བྱེ་ཞིང་མནན་ན་ན་བ་དང༌། སྟོང་སྐྱུགས་བྱེད་ཅིང་ཐོ་རངས་ཀྱི་དུས་སུ་ལྦུ་སོབ་ཅན་ལུ་བ་དང༌། ཁོང་པ་སྦོ་འཁྲོག་བྱེད་ཅིང་དགོང་དང་ཐོ་རངས་ཀྱི་དུས་དང་ཞུ་བའི་རྗེས་རྣམས་སུ་ལྷག་པར་ན་བ་དག་འབྱུང་བ་ཡིན་ནོ།། 

མཁྲིས་པ་འཁྲུགས་པའི་རྟགས་ལ་རྩ་སྟོང་པ་མ་ཡིན་པར་མནན་མི་བཟོད་པར་རྒྱས་ཤིང་རྟ་རྔ་བསྒྲིལ་བ་ལྟར་ཕྲ་ལ་གྲིམས་པ་དང༌། མགྱོགས་པར་འཕར་བ་དང༌། ཆུའི་མདོག་དམར་སེར་ཡིན་པ་ལ་དྲི་མ་དུགས་ཆེ་ཞིང་རླངས་པ་ཆེ་བ་དང༌། མགོ་བོ་ན་ཞིང་ཤ་དྲོད་ཚ་ལ་ཁའི་རོ་སྐྱུར་ལ་ཁ་བ་བྲོ་བ་དང༌། ལྕེའི་སྟེང་དུ་བད་ཀན་གྱི་རྣམ་པ་སྐྱ་སེར་འབྱར་བག་ཅན་ཆེ་ལ་སྣའི་སྒོ་སྐམས་པ་དང༌། མིག་སྤྲིན་དམར་སེར་དུ་འབྱུང་ཞིང་གཟེར་བའི་གནས་གཅིག་ཏུ་འདྲིལ་བ་དང༌། ནུབ་གཉིད་ཆུང་ལ་ཉིན་པར་གཉིད་མི་ཐུབ་པ་དང༌། ལུད་པ་དམར་སེར་བག་རེ་འབྱུང་ཞིང་ཁ་ལ་ཚ་བྲོ་བ་ལ་སྐོམ་དད་ཤིན་ཏུ་ཆེ་བ་དང༌། ཁྲག་གམ་མཁྲིས་པའི་རང་བཞིན་ཅན་ཐུར་དུ་འཁྲུ་བའམ། ཡང་ན་གྱེན་དུ་སྐྱུགས་པ་དང༌། ལུས་ལ་རྔུལ་ཆེ་ཞིང་དྲི་མ་ང་བ་མནམ་པ་རྣམས་དང༌། མིག་དང་བཞིན་ལ་སོགས་པ་ཁ་དོག་དམར་སེར་དུ་འབྱུང་ཞིང་ལུས་ཀྱི་ཆ་ཤས་རྣམས་སྨིན་ཅིང་འདྲུལ་བར་བྱེད་པ་དང༌། ཉིན་གུང་དང་མཚན་གུང་དང་ཟས་ཞུ་བའི་དུས་ན་ལྷག་པར་དུ་ན་བར་བྱེད་པ་ཡིན་ནོ།། 

བད་ཀན་འཁྲུགས་པའི་རྟགས་ལ་རྩ་ནི་གཏིང་དུ་བྱིང་ཞིང་འཕར་ཚུལ་ཡང་གུད་ལ་དལ་བ་དང༌། ཆུ་ནི་མདོག་དཀར་ཞིང་དྲི་དང་རླངས་པ་ཆུང་བ་དང༌། ཁ་མངལ་བ་སྟེ་རོ་མི་གསལ་ཞིང་ལྕེ་དང་སོ་རྙིལ་སྐྱ་ལ་མིག་ཀྱང་དཀར་ཞིང་བྱད་བཞིན་སྐྲངས་པ་དང༌། སྣབས་དང་ལུད་པ་ཤིན་ཏུ་མང་ཞིང་མགོ་བོ་འཐོམ་ལ་ལུས་སེམས་གཉིས་ཀ་ལྕི་བ་དང༌། དང་ག་མི་བདེ་ཞིང་ཕོ་བའི་མེ་དྲོད་མེད་ཅིང་ཟས་འཇུ་བའི་སྟོབས་གཉིས་ཀ་ཆུང་བ་དང༌། མཁལ་རྐེད་ན་ཞིང་ལུས་ཀུན་སྦོས་ལ་ལྦ་བ་ལྷག་པར་དུ་སྐྱེ་བ་དང༌། ཁ་ཟས་གང་ཟོས་ཀྱང་སྐྱ་སོབ་དང་རྩམ་པ་སྟེ་རང་མདོག་དང་བད་ཀན་གྱི་རྣམ་པ་སྐྱུག་ཅིང་ཡང་ན་དེ་ལྟར་འཁྲུ་བ་དང༌། དྲན་པའི་དབང་པོ་མི་གསལ་ཞིང་གཉིད་ཆེ་ལ་སྒྱིད་པ་ཤིན་ཏུ་སྐྱུར་བ་དང༌། པགས་པ་རྣམས་གཡའ་ཞིང་ཡན་ལག་དང་ཉིང་ལག་སྲ་ཞིང་མཁྲང་བ་དང༌། དེའི་ཚིགས་མཚམས་རྣམས་དམ་ཞིང་ཤ་འཕྲལ་དུ་རྒྱས་ལ་ལས་ཀྱི་མཐའ་རིང་བ་སྟེ་ངང་རིང་བ་དང༌། ནམ་ཟླ་ཆར་ཞོད་འབབ་པའི་དུས་དང་སྲོད་དང་སྔ་དྲོ་དང་ཟས་ཟོས་མ་ཐག་ཏུ་ལྡང་བ་བྱེད་པ་ཡིན་ནོ།།

དེ་ལྟར་ན་ཉེས་པའི་མཚན་ཉིད་འཕེལ་བ་དང་ཟད་པ་དང་འཁྲུགས་པ་གསུམ་གྱི་ཚུལ་དུ་ཇི་ལྟར་བཤད་པའི་རྟགས་དེ་རྣམས་ཀྱིས་རྐྱང་པའི་ནད་ཀུན་ལ་ཁྱབ་ཅིང་གསལ་བར་འགྱུར་ལ། ལྡན་པ་གསུམ་དང་འདུས་པ་གཅིག་གི་རྟགས་རྣམས་ནི་རྐྱང་པའི་ནད་རྟགས་གོང་དུ་བཤད་པའི་ཚུལ་ཕན་ཚུན་གཉིས་སམ་གསུམ་ག་འདྲེས་པའི་རྟགས་ལས་ཤེས་པར་བྱ་སྟེ་རྟོགས་པར་བྱའོ། །དེ་ལྟར་ཤེས་པར་བྱས་ནས་རྐྱང་པ་དང་ལྡན་འདུས་བདུན་པོ་འདིར་མ་འདུས་པའི་ནད་ཀྱི་རྟགས་གཞན་གཅིག་ཀྱང་ཡོད་པར་མི་སྲིད་དེ། ནད་རྟགས་ཀྱི་རིགས་གཙོ་ཆེ་བ་ཀུན་ཕྱོགས་གཅིག་ཏུ་བསྡུས་པ་ཡིན་པའི་ཕྱིར་ཞེས་གསུངས་སོ། །དེས་ན་རྐྱང་པ་དང་འདྲེས་པ་ལ་སོགས་པའི་ནད་རྟགས་ཕྲ་མོ་དང་བཅས་པ་རྒྱས་པར་མན་ངག་རྒྱུད་ཀྱི་ལེའུ་རང་རང་གི་སྐབས་སུ་རྟོགས་པར་བྱའོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་ནད་ཀྱི་མཚན་ཉིད་བསྟན་པའི་ལེའུ་སྟེ་བཅུ་གཅིག་པའོ།། །།

མཐའ་མའི་འདོན་ཐེངས་།: 05.09.2023 ཉིན། 10:04 AM