ལེའུ་དྲུག་པ། ལྡེ་གུའི་སྡེ་ཚན་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག

ལྡེ་གུ་དང་སྐྱོ་མ་མིང་གི་རྣམ་གྲངས་ཏེ། ལག་ལེན་པོད་ཆུང་དུ། གང་ཞིག་སྨན་རྣམས་ཕྱེ་མར་བཏགས། །མངར་དང་སྦྱར་བའི་སྐྱོ་མ་བྱ། །དེ་ནི་ལྡེ་གུ་ཞེས་བྱའོ། །ཞེས་གསུངས་སོ། ལྡེ་གུའི་སྡེ་ཚན་ལ་ཚ་སེལ་དང་གྲང་སེལ་གཉིས་ལས། །ཚ་སེལ་ནི་རྒྱའི་སོ་མ་ར་ཛ་ཨ་རུ་ར། །བསིལ་ཅུ་གུར་ལི་གསུམ་འདམ་བུ་ཤིང་མངར་ལྕགས་ཀྱི་ཕྱེ་མའམ་ལྕགས་དྲེག། །ཀ་ར་མར་གསར་ལྡེ་གུ་བྱས་པ་ཡིས། །གློ་མཆིན་ཚ་བ་རྙིངས་རྙོགས་སེལ་བར་བྱེད། །ཏིག་ཏ་རིགས་གང་རུང་གསེར་གྱི་མེ་ཏོག་བོང་ང་དཀར་པོ་དང་། །མ་ནུ་པ་ཏྲ་པི་པི་ལིང་དང་བ་ལེ་ཀ །སྦྲང་རྩིའི་ལྡེ་གུས་མཁྲིས་པའི་གློ་ནད་དང༌། །ཆང་ནད་མཁྲིས་པར་སྐྱུག་དང་མགོ་ནད་སེལ། །ཁ་ཆེའི་གུར་ཀུམ་མཚལ་དང་མཁྲིས་པ་སྣ་ཚོགས་དང༌། །གེ་སར་ནཱ་པ་ཨུ་གསུམ་དང་མར་གསར་སྦྲང་ལ་སྦྱར། །གློ་མཆིན་ཟླ་མཚན་རྨ་རྙིངས་སྣ་ཁྲག་གཅོད། །བྲག་ཞུན་ཨ་རུ་ར་དང་བ་ཤ་ཀ །ཁ་ཆེའི་གུར་ཀུམ་སྦྲང་རྩིས་མཆིན་ཁྲག་དྲེག་ནད་སེལ། །ཙན་དན་དཀར་པོ་ཨུཏྤལ་སྔོན་པོ་ཁ་ཆེའི་གུར་གུམ་སྐྱུ་རུ་ར། །ཀ་ར་སྦྲང་སྦྱར་མཁྲིས་སྐྱུག་གློ་ནད་སེལ། །རླུང་ལྡན་མར་གསར་བད་ལྡན་ག་དུར་སྡེབ། །ཨ་རུ་རྒྱ་སྐྱེགས་བཙོད་དང་འབྲི་མོག་རྩི་ཕྲ་ཞིང་རྩི་འཐུག་པ་བཟང་། །བསིལ་ཅུ་གུར་ལི་གསུམ་འདམ་བུ་ཀ་ར་ཤིང་མངར་ལི་ག་དུར། །ཀ་ར་མར་གསར་སྦྲང་གི་ལྡེ་གུ་ཡིས། །ལུད་པ་ཤེ་རུལ་རྣག་ཁྲག་གློ་རྡོལ་ཁྲག་ཤོར་བ་སེལ། །འབྲས་བུ་ཨ་བར་སྐྱུར་གསུམ་དང་རྩ་ཨ་བ་ལྕགས་ཕྱེ་དང༌། །གོ་སྙོད་ཤིང་མངར་མར་གསར་ཀ་ར་སྦྲང༌འདིའི་མིང་ལ་གསལ་བྱེད་བདུན་པ་ཡིན། །ལྡེ་གུས་མིག་ནད་དམར་ཚག་རབ་རིབ་འཇོམས། །བསེ་རུ་དཀ་ར་པོ་དང་དོམ་ལ་སོགས་པའི་མཁྲིས་པའི་ལྡེ་གུས་གློ་རྣག་སྐེམ། །ཙན་དན་དམར་པོ་སྐྱེར་པ་ཨ་རུ་རའི། །ལྡེ་གུས་ཚད་རྙིང་ཆུ་སེར་ལྡན་པ་སེལ། །མཚལ་དང་རྒྱ་སྐྱེགས་དོམ་མཁྲིས་ལྡེ་གུ་ཡིས། །རྟག་ཏུ་ཟླ་མཚན་འཛག་པ་གཅོད་པར་བྱེད། །ཅུ་གང་གུར་ཀུམ་ལི་ཤི་ཨ་རུ་ར། །སུག་སྨེལ་མར་གསར་ལྡེ་གུས་རབ་རིབ་སེལ། །ཚད་ནད་རྙིངས་རྙོགས་དུག་ནད་ཞི་བར་བྱེད། །བསིལ་ཁ་ལི་སུག་བཞི་ཙན་དན་དཀར་དམར་རུ་རྟ་སྦྲང༌། །མར་གསར་ལྡེ་གུས་བུ་ཆུང་གློ་ནད་སེལ། །དུག་གིས་ཤི་བ་དང་རི་བོང་གི་མ་གཏོགས་པ་མཆིན་པ་སྣ་ཚོགས་མ་རུལ་ཁ་ཆེའི་གུར་ཀུམ་དང༌། །མར་གསར་སྦྲང་སྦྱར་མིག་ནད་མཆིན་ནད་སེལ།།

གཉིས་པ་གྲང་སེལ་ཚ་བ་སྒ་པི་ཕོ་གསུམ་དང་འབྲས་བུ་ཨ་བར་སྐྱུར་གསུམ། །ཙི་ཏྲ་ཀ་དང་བྱི་ཏང་ག་དང་ལི་ག་དུར། །དང་་པོ་ནས་མཐའ་མའི་བར་རིམ་པས་ཆ་བསྐྱེད་ལྕགས་ཕྱེ་དང་སྤོས་དཀར་ཆ་བརྒྱད་སྦྱར་ལ། །སྦྲང་སྦྱར་མིག་སེར་སྐྱ་རྦབ་གཞང་འབྲུམ་འཇོམས། །རྒྱ་ཚྭ་གླ་རྩི་སྡིག་སྲིན་ཚ་བ་སྒ་པི་ཕོ་གསུམ། །མཐིང་ཤུན་མཐིང་གི་དྭངས་མ་དངོས་རང་ཡིན་མོའི་རྡེའུ་བཏོན་པ་དང་ཉི་དགའ་ལྕམ་པ་འབྲས་སྣ་ཨ་སྲ་རྩ་གསུམ། །བུ་རམ་མར་སྦྱར་མཁལ་ནད་ཆུ་སྲི་སེལ། །ཤིང་ཚ་སུག་སྨེལ་དྲོད་སྨན་པི་པི་ལིང་དང་ཤིང་ཅུ་གང་དང༌། །ཀ་ར་ལ་རིམ་བཞིན་བསྐྱེད་ནས་མར་གསར་སྦྲང་ལྡེ་གུ། །བད་ཀན་གློ་ནད་ལུད་པ་འཇབ་འཇིབ་ལུ་ལ་བསྔགས། །མ་ནུ་པ་ཏྲ་རུ་རྟ་སྒེ་གཤེར་སྒ་རློན་པ་འབྲས་བུ་ཨ་བར་སྐྱུར་གསུམ། །ལི་ག་དུར་པི་པི་ལིང་དང་སྦྲང་རྩི་སྦྱར། །དབུགས་མི་བདེ་དང་བད་རླུང་གློ་ནད་སེལ། །སེ་འབྲུ་ཤིང་ཚ་སུག་སྨེལ་ཚ་བ་སྒ་པི་ཕོ་གསུམ། །ཁ་རུ་ཚྭ་དང་རུ་རྟ་ཙི་ཏྲ་ཀ །གཟེ་མ་བུར་སྦྱར་སྐྱ་རྦབ་དང་མོ་ནད་རླུང་ཚབས་དང༌། །མཁལ་མ་ཕོ་བ་རྒྱུ་ལོང་གྲང་བ་སེལ།།

དེ་སོགས་ལྡེ་གུའི་སྦྱར་ཐབས་གང་བྱེད་ཀྱང་ཐོག་མར་སྦྲང་ཆུ་བཅད། །བུ་རམ་ནི་ཆུར་བསྡུས་མར་གྱི་ལྦུ་བ་དང་སྙིགས་མ་ཕྱིར་ཕྱུངས། །སྨན་ཀུན་ཞིབ་པར་བཏགས་ལ་མར་ཁུ་ངད་ཡལ་བ་ན་བསྲེས་ལ་འདྲེས་པར་བཀྲུག །ཀ་ར་ལ་སྦྱོར་བ་ཞིབ་ཏུ་བཏགས་ལ་གདབ། །འཇུ་ཚོད་ལོན་ཙམ་ཁྱིའུ་སུས་ཐོ་རངས་ཀྱི་དུས་སུ་བསྟེན་པར་བྱ་ཡང་བྲང་ཏི་པ་འཇམ་དཔལ་བཟང་པོས་སྡེ་ཚན་ལྔ་འགྲེལ་དུ་ཁྱེའུ་སུས་ཞེས་པ་ནི་ལྟོ་སྟོང་ལ་བྱའོ་ཞེས་གསུངས། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལྡེ་གུའི་སྡེ་ཚན་བསྟན་པའི་ལེའུ་སྟེ་དྲུག་པའོ།།  །།

མཐའ་མའི་འདོན་ཐེངས་།: 23.02.2021 ཉིན། 3:54 PM