ལེའུ་ཉེར་ལྔ་པ། ངན་གཡོ་སྐྱོན་གྱི་སྒོ་ནས་བརྟག་པ། 

ཉེས་པ་དངོས་སུ་བརྟག་པ་བཤད་ཟིན་པའི་མཇུག་དེ་མ་ཐག་པ་དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །དེ་ཡང་ཀྱེ་དྲང་སྲོང་ཆེན་པོ་ཡིད་ལས་སྐྱེས་ལེགས་པར་ཉོན་ལ་ཡིད་ལ་ཟུངས་ཤིག་དང་ངས་བཤད་པར་བྱའོ་ཞེས་གདམས་ནས་སྨན་པས་ནད་ཀྱི་བརྟག་ཐབས་གོང་དུ་བཤད་པ་དེ་ཙམ་དུ་མ་ཟད་རྣམ་པ་དུ་མའི་སྒོ་ནས་གང་ལའང་མ་རྨོངས་པའི་ཐབས་ཀྱི་སྒོ་ནས་བརྟག་ཅིང་ངེས་པར་བྱ་དགོས་པ་ལས་འདི་ལྟར་རང་ཉིད་ལ་སྐྱེ་བོ་ཀུན་གྱིས་མཁས་པའི་མཆོག་ཏུ་གྱུར་པའོ་ཞེས་སྙན་གྲགས་ཀྱང་འབྱུང་བའི་ཆེད་དུ་ངན་གཡོ་སྐྱོན་ཐབས་ཀྱི་སྒོ་ནས་ནད་བརྟག་པའི་ཚུལ་འདི་ལྟ་བུ་ཡང་ཅི་ནས་ཤེས་ཤིང་ཁོང་དུ་ཆུད་པར་བྱ་དགོས་སོ། །དེ་ལ་ནི་ནད་སྤྱི་བྱེ་བྲག་གི་མཚན་ཉིད་ཤེས་པར་བྱ་བ་དང་ཕོ་ཉ་བ་སོགས་ལ་མཚང་འབྲུ་བའི་ཚུལ་དང་ནད་པའི་མདུན་དེར་ཡང་དུས་བསྲིང་བ་དང༌། སྔར་གྱི་རྗེས་བཅད་པའི་ཚུལ་དང༌། བཅུད་ལ་བོར་བའི་ལན་དང༌། ཁ་བཅིང་བར་བྱ་བ་དང༌། སྤོ་ལ་གདོན་པར་བྱ་བ་དང་ཐབས་ཀྱིས་འོག་ཏུ་གཞུག་པའི་ཚུལ་བཤད་པ་དང་རྣམ་པ་བརྒྱད་ཀྱི་སྒོ་ནས་བརྟག་པའོ།།

ངན་གཡོ་སྐྱོན་བརྟག་གི་ནང་ནས་དང་པོ་ནད་གང་ཡིན་གྱི་མཚན་ཉིད་ཤེས་པར་བྱ་བ་ནི། ནད་ཀུན་གྱི་སྤྱི་དང་ཁྱད་པར་གྱི་རྟགས་རྒྱུ་རྐྱེན་ཞུགས་ཚུལ་མཚན་ཉིད་སོགས་གོང་དུ་ནད་གནས་དང༌། འོག་ནས་མན་ངག་རྒྱུད་ནས་འབྱུང་བ་ལྟར་སོ་སོར་འབྱེད་ཤེས་དགོས་པ་དེ་དག་གིས་ནི་ནད་པའི་ལུས་ཀྱི་ཆ་ཤས་འདི་ལྟ་བུ་ཞིག་ན་ཞེས་སྨོས་པ་ཙམ་ལས་དེ་ནི་ནད་འདི་འདྲ་ཞིག་འོང་སྙམ་དུ་འཁྲུལ་མེད་རྟོགས་པར་འགྱུར་བ་དེའི་ཕྱིར་ན་བཤད་མ་ཐག་པའི་ནད་ཀྱི་རྒྱུ་རྐྱེན་སོགས་དང༌། སློབ་དཔོན་གྱིས་འདི་ནི་འདིའོ་ཞེས་བྱ་བ་ལ་སོགས་པའི་སྒོ་ནས་ནད་པ་གསོ་བ་མང་དུ་མཐོང་བ་ལྟར་གཞུང་བཤད་དང་ངོ་སྤྲོད་གཉིས་ཀ་ལ་གོམས་ཤིང་འདྲིས་པ་ནི་ཤིན་ཏུ་གཅེས་པ་ཡིན་ཏེ། དཔེར་ན་བཻ་ཌཱུརྱ་ལ་སོགས་རིན་ཆེན་གྱི་རིགས་དང༌། ལ་སོགས་པའི་ཁོང་ནས་དཀར་ཡོལ་དང་གོས་དར་སོགས་དང༌། རྟ་དང༌། གླང་པོ་དང་སྨན་ལྟ་བུའི་བཟང་ངན་ཤེས་པར་བྱ་བ་དེ་ཡང་སོ་སོའི་མཚན་ཉིད་སྟོན་བྱེད་ཀྱི་བསྟན་བཅོས་ཁོ་ན་མཐོང་བས་ཀྱང་རྟོགས་པ་མ་ཡིན་ཞིང༌། བསྟན་བཅོས་དེ་མེད་པར་མཐོང་བ་བརྒྱུད་པའི་ངོ་སྤྲོད་ཁོ་ནས་ཀྱང་མཐའ་མི་ཆོད་ཅིང༌། ཇི་ལྟ་བ་ཁོང་དུ་ཆུད་པར་ནུས་པའང་མིན་པ་དེས་ན་འདི་གཉིས་པོ་གང་ཡང་རུང་བ་ཞིག་མེད་ན་མཁས་པ་མི་འབྱུང་བས་ཟུང་འབྲེལ་དུ་བསླབ་པ་ལ་ནན་ཏན་གྱིས་ཤིག ནད་པ་དང་མ་ཕྲད་པའི་སྔ་རོལ་དུ་མཚང་འབྲུ་བ་ནི་ཕོ་ཉ་བ་ནད་པ་དང་འབྲེལ་ཞིང་རྒྱུས་ཡོད་པ་ཞིག་ལ་གཡོ་ཐབས་མཁས་པའི་ངག་གིས་བརྟག་པར་བྱ་བའི་ཕྱིར་རྐང་སྐྱ་ཅི་རིགས་སྣ་ཚོགས་དང་སྤེལ་ནས་ནད་པ་དེའི་ལུས་ཀྱི་ཆ་ཤས་ཅི་ན། ན་ལུགས་ཇི་ལྟར་ན། ཟས་སྨན་གང་འདྲ་བཏང༌། སྨན་པ་སུ་ཡིན་དང༌། ཞག་གྲངས་དུ་ཙམ་སོང་ཞེས་སོགས་དྲི་བའི་སྒོ་ནས་ལེགས་པར་དཔྱད་པས་ནད་པ་དེ་ཉིད་ཀྱིས་མི་སྨྲ་བའི་སྔ་རོལ་ནས་ཆ་ཙམ་མངོན་པར་ཤེས་པར་འགྱུར་རོ། །ནད་གང་ཡང་ལྟ་རེག་ཙམ་གྱིས་འཁྲུལ་མེད་དུ་མ་ཤེས་ན་རེ་ཞིག་ནད་པའི་རྩར་དུས་བསྲིང་ཞིང་རིང་སྟབས་མ་ཡིན་པ་ཐང་གཅིག་གཉིས་ཕབ་ལ་གནས་ནས། སྡོད་རིང་དེ་བར་ལ་ལུས་ངག་གི་བྱ་བ་མ་ཡེངས་གཏམ་གྱི་སྒོ་ནས་འདྲི་ཞིང་རྣམ་འགྱུར་ལ་དཔྱད་པས་རྟོགས་པར་འགྱུར་རོ། །སྔར་སྨན་པ་གཞན་གྱིས་ཇི་ལྟར་བཅོས་པ་རྗེས་བཅད་པའི་ཚུལ་གྱིས་བརྟག་པ་ནི། གཏར་བསྲེག་སོགས་དཔྱད་དང་བསིལ་དྲོད་ཀྱི་སྨན་སྦྱོར་ཅི་ལྟ་བུ་བྱས་ཞེས་ཐབས་མཁས་ཀྱིས་བཙལ་བས་དཔྱད་འདི་བཞིན་བྱས། སྨན་འདི་དང་འདི་འདྲ་སྦྱར་ཞེས་པའི་ཚིག་རྙེད་པ་ཙམ་གྱིས་སྦྱོར་བ་སྨན་གནས་དང་སྦྱར་ནས་བརྟགས་པས་ཚ་གྲང་གི་རིགས་ཕྱོགས་མཐུན་རྟོགས་པར་ནུས་པའོ། །བཅུད་ལ་བོར་བ་ཞེས་བྱ་བ་ནད་པ་ལ་ན་ལུགས་སོགས་དྲིས་པས་གསལ་པོར་མི་སྨྲ་བ་ལས་ཚུལ་བཞིན་གལ་ཏེ་མ་རྟོགས་ན་འོལ་ཚོད་ཀྱི་དབང་གིས་ནད་འདི་ཡིན་ཞེས་སྨྲ་བར་མི་བྱ་སྟེ། ཅིའི་ཕྱིར་ཞེ་ན། མི་མཁས་ཞེས་པའི་གཏམ་ངན་པ་སྒྲོག་ཏུ་འབྱུང་བའི་ཕྱིར། ངན་པའི་ཟས་སྤྱོད་འདི་དང་འདི་ལྟ་བུ་མི་བྱ་ཞིང་ཐོག་མར་གདོན་བཅོས་དགོས་པ་འདུག་ལ། དེ་ནས་སྨན་ཞིག་སྦྱར་ན་ངེས་པར་ཕན་ནོ་ཞེས་ངག་བྱིང་པོར་སྨྲས་པས། ནད་པ་དེའི་ངང་གིས་མི་ཐུབ་པར་གནས། འདི་ན་ཚུལ་འདི་ལྟར་ན་རྐྱེན་འདི་འདྲ་བྱུང༌། བཅོས་འདི་ལྟ་བུ་ཞིག་བྱས་ཞེས་གསལ་པོར་འབྱིན་པར་འགྱུར་བས་སླར་ཡང་དེ་ལྟ་བུའི་ཚིག་ལ་བརྟག་པར་བྱའོ། ཁ་བཅིང་ཞེས་པ་ནད་པ་ཁ་ཅིག་དང་ཕྲད་པ་དེའི་ཚེ་ཐོག་མར་རང་ཉིད་ཀྱིས་མ་དྲིས་ནའང་དེ་ཉིད་ཀྱིས་ཕལ་ཆེར་སྨྲ་བར་བྱེད་ལ། དེའང་ན་ལུགས་འདི་ལྟ་བུ་ཞིག་ནའོ་ཞེས་པའི་འགོ་སྨོས་པ་ཙམ་གྱིས་ནད་གང་ཡིན་ཁོང་དུ་ཆུད་པར་བྱ་སྟེ། དེའི་ཚེ་ནད་གང་ཡིན་དང་ཅི་ན་བ་སོགས་སྨན་པས་ཤེས་ཀྱི་ཁྱོད་རང་བཤད་མི་དགོས་ཞེས་གསལ་བར་བརྗོད་པས་སྐྱེ་བོ་ཕལ་ཆེར་རྣམས་ངོ་མཚར་ཟེར་ཞིང་དགའ་བར་འགྱུར་རོ། །རི་བོའི་སྤོ་ལ་འདོན་པ་ཞེས་བྱ་བའི་ཚུལ་ནི། གོང་དུ་བཤད་པའི་བརྟག་ཐབས་སྣ་ཚོགས་པ་དེ་རྣམས་ཀྱི་སྒོ་ནས་ནད་འཁྲུལ་མེད་དུ་རྟོགས་པར་གྱུར་ན་སྨན་པ་གཞན་དག་རྣམས་ནི་རྩ་དང་ཆུ་དང་ན་ལུགས་དྲི་བ་སོགས་མང་པོའི་སྒོ་ནས་བརྟག་དགོས་པ་ཡིན་གྱི། ང་ལ་ནི་དེ་ལྟ་བུ་མ་ཡིན་ཏེ་རྩ་བལྟ་བའམ་ཆུ་དང་དྲི་མ་ལ་བརྟག་པ་སོགས་གང་ཡང་རུང་བ་ཞིག་ལ་བརྟགས་པས་ཤེས་ཤིང་འདི་ཡིན་ནོ་ཞེས་སོགས་ཁ་དམར་གདགས་པར་བྱའོ། །དེའི་ཚེ་སྨན་པ་དེས་ནི་ནད་པ་ལ་མིག་གིས་བལྟས་པ་ཙམ་གྱིས་ཆོག་གོ་ཞེས་སྙན་པའི་གྲགས་པ་འབྱུང་ལ། ཡང་ན་ནི་གཞན་རྣམས་ལས་ཆེས་ཞིབ་ཏུ་བརྟགས་ཤིང་དཔྱད་པས་དེ་ནི་སྨན་པ་གཞན་སུ་ལས་ཀྱང་བརྟག་པའི་ཚུལ་ལ་མཁས་པའི་ཕུལ་དུ་བྱུང་བའོ་ཞེས་ཟེར་བའི་གཏམ་སྒྲོག་པར་འགྱུར་རོ། །སྨན་པས་ཐབས་མཁས་ཀྱིས་རང་སྐྱོན་འོག་ཏུ་གཞུག་པའི་ཚུལ་ནི། གོང་དུ་རྒྱས་པར་བཤད་པའི་བརྟག་ཚུལ་དེ་དག་ཀུན་གྱིས་ཀྱང་གསལ་པོའི་སྐད་མི་སྟེར་བ་སྟེ་གལ་ཏེ་རྟོགས་པར་མ་ནུས་ན་རྣམ་པ་ཙམ་མཚུངས་པའི་ཁ་དམར་བཏགས་ལ་རྫོང་ལྟ་བུའི་བཙན་ས་ལ་བྲོས་པར་བྱའོ། །ཐབས་འོག་ཏུ་གཞུག་པ་ལ་རྣམ་པ་གཉིས་ཀྱི་དང་པོ་རྣམ་པའི་ཁ་དམར་ནི་འདི་ལྟར་གདགས་པར་བྱ་སྟེ། དེ་ཡང་ཟས་སྤྱོད་མི་འཕྲོད་པ་དང༌། གདོན་གྱི་རྐྱེན་གྱིས་བསྐྱེད་ཅིང་ཁྱད་པར་དུ་རུལ་སྐྱུར་དང་དྲག་ཤུལ་རྗེན་ཟས་སོགས་གནོད་འདུག་ཅེས་བྱས་ལ། དེ་བཞིན་དུ་གཉེན་པོ་ཡང་ཚ་གྲང་གཉིས་ཀ་ལ་ཕན་གནོད་མེད་པའི་བསིལ་དྲོད་སྙོམས་པ་ཤས་ཆེར་དབོག་པར་བྱའོ། །ཐབས་སྣ་ཚོགས་ཀྱི་སྒོ་ནས་ལེགས་པར་བརྟགས་ཀྱང་གསལ་བར་མ་རྟོགས་པ་དེའི་ཚེ་བཙན་ས་རྫོང་ལྟ་བུ་ལ་འབྲོས་པར་བྱ་དགོས་ཏེ། དེ་ལ་ནད་དང་སྨན་གྱི་མིང་དེ་སྔ་ན་མ་གྲགས་པའི་ངོ་མཚར་མཁས་ཁྱད་བཞི་སྤྲུགས་ནས་འབྱུང་བ་ལྟ་བུ་གཞན་གྱིས་མི་ཤེས་པའི་ངོ་མཚར་ཅན་བརྗོད་པ་དེ་འདྲ་བའི་སྒོ་ནས་ཚུལ་བཞིན་མ་རྟོགས་པར་གྱུར་ཀྱང་མཁས་ཁྱད་འབྱིན་པར་འགྱུར་རོ་ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་ངན་གཡོ་སྐྱོན་གྱི་སྒོ་ནས་བརྟག་པའི་ལེའུ་སྟེ་ཉི་ཤུ་རྩ་ལྔ་པའོ།། །།

མཐའ་མའི་འདོན་ཐེངས་།: 05.09.2023 ཉིན། 11:23 AM