གཞན་ཡང་ནད་དེ་འདི་ལྟ་བུ་ཞིག་ཡིན་ནམ་སྙམ་པ་གང་ཡིན་པ་དེ་དང་དེའི་གཉེན་པོའི་སྦྱོར་བ་ཆུང་ངུའི་སང་མདའ་ལ་བསྟན་ནས་ཡིད་ཁུ་འཁྲིག་དང་ལྡན་པའི་ལྟར་སྣང་ཀུན་ཕན་ཚུན་བསྡུར་ལ་གཉེན་པོ་ལེན་ན་གང་ལེན་དེ་ཉིད་ཀྱི་སྦྱོར་བས་གཙོ་བོར་བཅོས་པ་གཅེས་ཤིང༌།  དེ་རྣམས་གང་གི་དུས་སུའང་ཁ་དམར་མི་སྨྲ་སྟེ། ཐོག་ཏུ་མ་ཁེལ་ན་ཁ་བཅོལ་ཆུང་བར་འགྱུར་བའི་ཕྱིར། དེས་ན་འདིའི་དུས་སུ་ལྟར་སྣང་གི་རྗེས་སུ་འབྲངས་ནས་ཁ་གསལ་པོར་མི་བསྒྲག་པར་བྱིང་པོར་སྨྲ་བ་ཉིད་ལེགས་པ་ཡིན་ནོ། །གཉིས་པ་སྤོ་ལ་དར་འཕྱར་ལྟ་བུའི་བཅོས་ཚུལ་ནི། ནད་ལ་ཞེས་པ་ནས་གོ་བར་སྨྲ་ཞེས་པའི་བར་གྱིས་བསྟན་ཏེ། སྨན་པས་ནད་དེའི་ངོ་བོ་ལ་སོགས་པའི་ཕྲ་ཞིབ་གསལ་བར་རྟགས་ནས་རང་གི་ཡིད་ལ་ངེས་པ་རྙེད་ཅིང་གདེངས་ཐོབ་པར་གྱུར་ན་ཁ་དམར་འདི་ལྟར་གདགས་པར་བྱ་སྟེ། ད་རེས་ཀྱི་ནད་དེ་ནི་ངོ་བོ་འདི་ལྟ་བུ་ཞིག་ཡིན། རྒྱུ་རྐྱེན་འདི་དང་འདི་འདྲས་བསྐྱེད། ད་ལྟ་འདིའི་ཐད་ན་ན། མཐའ་གཞུག་ནི་ཚུལ་འདི་བཞིན་དུ་འགྱུར། བཅོས་ཀ་འདི་དང་འདི་འདྲ་བྱེད། མཐར་དུས་ཚོད་འདི་ཙམ་ན་སོས། ཡང་ན་རྒྱུ་མཚན་འདི་འདྲའི་སྒོ་ནས་མི་ཐུབ་ཅེས་འཆི་བའི་དུས་ཚིགས་འབོར་བ་སྟེ། དེ་ལྟ་བུ་སྤོ་ལ་དར་འཕྱར་བ་བཞིན་དུ་ཀུན་གྱིས་གོ་བར་སྨྲའོ། །གསུམ་པ་རྟ་རྒོད་དཀྱུས་འཛུད་ལྟ་བུའི་བཅོས་ཚུལ་ནི། གཉེན་པོ་ཞེས་པ་ནས་ཆུ་འབེབས་འདྲ་ཞེས་པའི་བར་གྱིས་བསྟན་ཏེ། ནད་གང་ཞིག་གཉེན་པོ་ཐོག་ཏུ་མི་འབབ་པར་ལམ་ལ་གཞུག་པར་དཀའ་བ་རྣམས་ལ་འདི་ལྟར་བྱ་སྟེ། དཔེར་ན་མ་སྨིན་པའི་ཚ་བ་ལྟ་བུ་ལ་ཐོག་མ་ནས་ཚ་བའི་གཉེན་པོ་བསིལ་སྨན་བཏང་ན་ཚ་བའི་གྲོགས་པོ་བད་རླུང་གི་ཐོག་ཏུ་འབབ་ཅིང་འཕེལ་བར་འགྱུར་ལ། གྲོགས་བད་རླུང་འཕེལ་བས་ནི་ཚ་བ་ཉིད་ཆེར་འཕེལ་བར་བྱེད་པ་དེའི་ཕྱིར་བད་རླུང་ཚབས་ཆེ་བའི་གྲོགས་པོ་དེ་མ་ནུ་བཞི་ཐང་ལ་སོགས་པས་དབྱེ་ནས་དོད་ཚ་བའི་གཉེན་པོས་གསོད། དེ་བཞིན་དུ་ཁྲག་འཁྲུགས་ཀྱི་རིགས་ལ་ནད་ཁྲག་དང་ཟུངས་ཁྲག་གཉིས་འོ་མ་དང་ཆུ་འདྲེས་པ་འདྲ་བར་དབྱེར་མི་ཕྱེད་པ་དེ་ཉིད་འབྲས་བུ་གསུམ་གྱི་ཐང་གིས་ཁྲག་བཟང་ངན་སོ་སོར་ཕྱེ་ལ་གཏར་དགོས་ཏེ། དེ་ཅིའི་ཕྱིར་ཞེ་ན། ཐང་གིས་ཁྲག་བཟང་ངན་མ་ཕྱེ་བར་གཏར་ན་ནད་དང་ལུས་ཟུངས་གཉིས་ཀ་ལ་གནོད་པའི་ཕྱིར་རོ། །དེ་དང་མཐུན་པར་བད་ཀན་སྨུག་པོ་དང་དུག་ཚད་ཀྱི་རིགས་རྣམས་བྱེར་བ་བསྡུས་ལ་བསད་དགོས་ཏེ། མ་འདུས་གོང་དུ་གཉེན་པོས་མི་གསོད་ཅིང་སླར་ཡང་ལུས་ལ་འགྲམས་པར་འགྱུར་བ་དང༌། གབ་པའི་ཚད་པ་གྲང་བའི་ནད་ཀྱི་མགོ་ཕུར་བ་དེ་ཐོག་མར་དྲོད་བཅོས་ཀྱིས་བཤུ་དགོས་ཏེ། ཅིའི་ཕྱིར་ཞེ་ན། གྲང་བའི་མགོ་ཕུར་དེས་གཉེན་པོ་བླངས་ནས་ཚད་པས་ལེན་པར་མི་འགྱུར་བ་དང༌། མ་ཞུ་བའི་ནད་ཀུན་ལ་སྨིན་བྱེད་དང་དྲོད་བསྐྱེད་པའི་སྨན་གྱིས་རྩེ་བཅིལ་ལ། རྩེ་ཞི་བའི་རྟགས་ཐོབ་ནས་སྟོད་སྨད་གང་ཉེའི་ལམ་ནས་སྦྱང་དགོས་ཏེ། དེ་ལྟར་མ་བྱས་ན་བྱེར་བར་འགྱུར་བ་དང༌། དེ་དང་མཚུངས་པར་བཤལ་གྱི་སྔོན་འགྲོའི་སྐབས་སུ་བཤད་པའི་སྨན་དེ་རྣམས་ཀྱིས་ནད་ཀུན་སློང་བ་ཡིན་ཏེ། གལ་ཏེ་མ་བསློངས་པར་བཤལ་སྨན་བཏང་ཡང་ནད་མི་འདག་པར་འཁྱགས་ཐོག་ཏུ་ཆུ་འབེབས་པ་དང་འདྲ་བ་དེའི་ཕྱིར་ལམ་དུ་འཇུག་ཚུལ་འདི་ཤིན་ཏུ་གཅེས་སོ།།

བཞི་པ་སྐྱར་མོ་ཉ་ལེན་ལྟ་བུའི་བཅོས་ཚུལ་ནི། སྨན་པ་ཞེས་པ་ནས་གང་ལངས་མནན་ཞེས་པའི་བར་གྱིས་བསྟན་ཏེ། ནད་པ་འགའ་ཞིག་སྨན་པ་གཞན་གྱིས་སྔར་བཅོས་ནད་དེ་ལ་སྨན་དཔྱད་སོགས་དམན་པའམ་ལོག་པའམ་ལྷག་པའམ་གང་ཡིན་ལེགས་པར་བརྟགས་ལ། སྨན་པས་ནད་མ་ཞི་བ་ཡིན་འདུག་ན་གཉེན་པོ་ཆེར་བསྐྱེད་ལ་གཏང༌། སྦྱོར་བ་ལོག་ནས་ནད་ཀྱི་སྟོབས་བསྐྱེད་པ་ཡིན་འདུག་ན་སྦྱོར་བ་གོ་བསྒྱུར། གཉེན་པོ་ལྷག་ནས་ནད་གཞན་ལངས་པ་ཡིན་འདུག་ན་གང་ལངས་དེ་ཉིད་ཀྱི་གཉེན་པོས་མནན་པ་བསྔགས་སོ། །ལྔ་པ་མི་ཤ་ཕྲང་འཕྲད་པ་ལྟ་བུའི་བཅོས་ཚུལ་ནི། ཚ་བ་ཞེས་པ་ནས་སྲོག་ལ་གཏོད་ཅེས་པའི་བར་གྱིས་བསྟན་ཏེ། །རྒྱས་ཚད་ལ་སོགས་པ་ཤིན་ཏུ་སྟོབས་ཆེ་བའི་ནད་ལ་གཉེན་པོ་ཆུ་བཞི་དབབ་དགོས་ཏེ། ག་བུར་ཆང་སྦྱར་དང་རྩེ་ཆུང་གཏར་བ་གཉིས་ནི་རིམ་པ་ལྟར་སྨན་གྱི་ཆུ་དང་དཔྱད་ཀྱི་ཆུ་ཡིན་ལ། དེ་བཞིན་དུ་ཁ་ཟས་མི་ཟ་བར་ཡན་ལ་གཏད་པ་ནི་ཟས་ཀྱི་ཆུ། བསིལ་སར་སྡོད་པ་སྤྱོད་ལམ་གྱི་ཆུ་སྟེ། དེ་ལྟར་ཆུ་བཞིས་བཅོས་པ་དང༌། ཚུལ་དེ་བཞིན་དུ་གྲང་བ་སྟོབས་ཅན་གྱི་ནང་ལ་མེ་བཞི་སྤོར་དགོས་ཏེ། དྲོད་དུ་གཏོགས་པའི་སྨན་ཡོད་དགུ་ཙོག་སྦྱར་བ་ནི་སྨན་གྱི་མེ་ཡིན་ཏེ། དེ་དང་མཐུན་པའི་མེ་བཙའ་ནི་དཔྱད་ཀྱི་མེ་དང༌། དྲོད་བཅུད་མཐའ་དག་བཟའ་བ་ཟས་ཀྱི་མེ་དང༌། གནས་དང་གོས་དྲོ་བ་ནི་སྤྱོད་ལམ་གྱི་མེ་སྟེ་མེ་རྣམ་པ་བཞིས་བཅོས་པར་བྱའོ། །དེ་ལྟར་བཞི་ག་མ་སྤུགས་ན་ནད་རྒྱས་ནས་སྲོག་ལ་གནོད་པ་ཡིན་ནོ། །དྲུག་པ་སྐས་གདང་ཡས་འཛེག་ལྟ་བུའི་བཅོས་ཚུལ་ནི། སྟོབས་ཆུང་ཞེས་པ་ནས་ནད་ཡུལ་དབྱུང་ཞེས་པའི་བར་གྱིས་བསྟན་ཏེ། ཚ་གྲང་གང་ཡིན་ཡང་སྟོབས་ཆུང་གི་ནད་ལ་དང་པོ་སྤྱོད་ལམ་གཟབས་པས་ཕལ་ཆེར་འཚོ་ལ། གལ་ཏེ་དེས་མ་ཞི་ན་ཕན་གནོད་ཟས་ཀྱི་སྒོ་ནས་བཅོས་པར་བྱའོ། །དེས་ཀྱང་མ་ཞི་ན་བསིལ་དྲོད་སྨན་གྱི་སྒོ་ནས་བཅོས་པས་འཚོའོ། །དེ་དག་གསུམ་གས་མ་ནོན་ན་དཔྱད་འཇམ་རྩུབ་ཀྱིས་ནད་ཡུལ་དབྱུང་བར་བྱ་དགོས་སོ། །དེ་ལྟ་བུ་མི་ཤེས་པར་སྟོབས་ཆེན་གྱི་ནད་ལ་སད་མདའ་འབྲིད་པའམ་གཉེན་པོ་ཆུང་ངུ་གཏོང་བ་དང༌། སྟོབས་ཆུང་གི་ནད་ལ་ཐོག་མར་སྨན་དཔྱད་དྲག་པོ་སྦྱོར་བ་ནི་དེང་སང་གི་དུས་ན་ཤིན་ཏུ་མང་སྟེ། དམན་ལྷག་ལོག་གསུམ་འབད་པས་སྒྲུབ་པ་ཡིན་ནོ། །བདུན་པ་དཔའ་བོ་དགྲ་འདུལ་ལྟ་བུའི་བཅོས་ཚུལ་ནི། རླུང་དང་ཞེས་པ་ནས་བད་རླུང་སྐྱེད་ཅེས་པའི་བར་གྱིས་བསྟན་ཏེ། རང་རྒྱུད་ཅན་རླུང་དང་མཁྲིས་པ་དང་བད་ཀན་གྱི་ནད་རྐྱང་པ་རྣམས་ལ་གང་ལངས་པ་དེ་ཉིད་ཞི་བར་བྱ་ཞིང་གཞན་མ་ལངས་པའི་སྦྱོར་བས་བཅོས་དགོས་པ་ལ་དེ་ལྟར་མ་ཤེས་ན་ལྡོག་རྒྱུ་བཅུ་གཉིས་སུ་འགྱུར་ཞིང༌། ལོག་པས་རང་མ་ཞི་བར་ནད་གཞན་བསྐྱེད་པར་འགྱུར་ཏེ། དཔེར་ན་རླུང་གི་ནད་རྐྱང་པ་ལ་ཁ་བ་དང་ཚ་བའི་རོ་དང་ལྡན་པའི་ཟས་སྨན་བསྟེན་ན་རླུང་དེ་ཉིད་མ་ཞི་བའི་ཁར་རིམ་པ་བཞིན་དུ་བད་ཀན་དང་མཁྲིས་པ་གཉིས་ལྡོག་གོ །དེ་ཡང་རླུང་ནད་ལ་ཁ་བའི་རོ་བསྟེན་ལ་བད་ཀན་ལ་ཚ་བའི་རོ་བསྟེན་ན་མཁྲིས་པར་ལྡོག་ཅེས་པའི་དོན་ཏོ། །དེ་བཞིན་དུ་མཁྲིས་པ་རྐྱང་པའི་ནད་ལ་ལན་ཚྭ་དང་ཚ་བའི་རོ་བསྟེན་ན་མཁྲིས་པ་མ་ཞི་བའི་ཁར་རིམ་པ་བཞིན་བད་ཀན་དང་རླུང་གཉིས་སུ་ལྡོག་ལ། བད་ཀན་རྐྱང་པའི་ནད་ལ་རོ་ཁ་བ་དང་ལན་ཚྭ་བསྟེན་ན་བད་ཀན་མ་ཞི་བའི་སྟེང་དུ་རིམ་པ་ལྟར་རླུང་དང་མཁྲིས་པ་གཉིས་སུ་ལྡོག་པ་དང༌། རིག་པ་དེས་མཚོན་ནས་མི་འཕྲོད་པའི་རྐྱེན་ཤས་ཆེ་ན་འདུས་པར་ལྡོག་པའང་ཡོད་ཅེས་པའོ། །དེ་བཞིན་དུ་གཉེན་པོ་ཟས་སྨན་ལྷག་པས་ནད་དེ་ཉིད་ཞི་ནས་གཞན་སློང་བར་བྱེད་དེ། དཔེར་ན་རོ་མངར་བ་དང་ལན་ཚྭ་བའི་ཟས་སྨན་གྱིས་རླུང་ཞི་ནས་རིམ་པ་ལྟར་བད་ཀན་དང་མཁྲིས་པ་བསྐྱེད་ཅིང༌། རོ་ཚ་བ་སྐྱུར་བ་གཉིས་ཀྱིས་བད་ཀན་ཞི་ནས་རིམ་པ་བཞིན་རླུང་དང་མཁྲིས་པ་བསྐྱེད་ཅིང༌། རོ་ཚ་བ་སྐྱུར་བ་གཉིས་ཀྱིས་བད་ཀན་ཞི་ནས་རིམ་པ་བཞིན་རླུང་དང་མཁྲིས་པ་བསྐྱེད་ལ། མངར་བ་དང་ཁ་བའི་རོས་མཁྲིས་པ་ཞི་ནས་བད་ཀན་དང་རླུང་སྐྱེད་པར་བྱེད་པ་དེས་ན། ལྡོག་རྒྱུ་བཅུ་གཉིས་སུ་འགྱུར་བའི་རྒྱུ་དེ་རྣམས་སྤངས་ནས་གསོ་བར་བྱའོ།།

བརྒྱད་པ་གཙོ་བོས་འཁྲུག་བཟླུམས་ལྟ་བུའི་བཅོས་ཚུལ་ནི། ལྡན་འདུས་ཞེས་པ་ནས་སྨན་པར་འགྱུར་ཞེས་པའི་བར་གྱིས་བསྟན་ཏེ། རྐྱང་བའི་ནད་དེ་ལས་ལྡོག་པའི་ལྡན་འདུས་ཀྱི་ནད་རྣམས་ལ་གཙོ་བོར་འདུ་བ་ཆ་མཉམ་པའི་སྒོ་ནས་བཅོས་དགོས་ཏེ། དེ་ཡང་ཨ་རུ་ར་དང་བྲག་ཞུན་གཉིས་ནི་རྣམ་པ་ཐམས་ཅད་དུ་འདུ་བ་སྤྱི་རུ་སྙོམས་པར་བྱེད་པའི་སྨན་མཆོག་ཡིན་ལ། དེའི་སྟེང་དུ་བབས་པའི་གནས་དང་ནད་གཞི་སོ་སོའི་དབང་གིས་ཁ་འཛིན་གྱི་རིམ་པ་ནི། སྙིང་གི་ནད་ལ་ཛཱ་ཏི། གློ་བའི་ནད་ལ་ཅུ་གང་སྦྱར་བར་བྱ་སྟེ། དེ་བཞིན་དུ་མཆིན་པ་ལ་གུར་གུམ་དང༌། སྲོག་རྩ་ལ་ལི་ཤི་གཏང་ཞིང༌། མཁལ་མར་སུག་སྨེལ་དང༌། མཚེར་བ་ལ་ཀ་ཀོ་ལ་དང༌། ཕོ་བའི་ཁ་འཛིན་ལ་སེ་འབྲུ་དང་པི་པི་ལིང་གཉིས། མཁྲིས་པའི་ཁ་འཛིན་ལ་ཏིག་ཏ་དང་གསེར་གྱི་མེ་ཏོག རླུང་གི་ནད་ཀྱི་ཁ་འཛིན་ལ་སླེ་ཏྲེས་རུས་བཅུད་སྲེ་ལོང་གཞུག་ཏོ་སོག་ཡུ་གསུམ། བད་ཀན་གྱི་ནད་ལ་མ་ནུ་དང༌། འུ་སུ་དང༌། བསེ་ཡབ་རྣམས་གཏང་ཞིང༌། ཁྲག་ལ་བ་ཤ་ཀ་དང་ཧོང་ལེན་གྱིས་ཁ་འཛིན་ཏེ། ཆུ་སེར་ལ་སྤོས་དཀར་དང་ཐལ་ཀ་རྡོ་རྗེ་དང་སོ་མ་རཱ་ཛ་རྣམས་དང༌། གཉན་དང་གདོན་གྱི་ཁ་འཛིན་ལ་རིམ་པ་ལྟར་གླ་རྩི་དང༌། གུ་གུལ་ནག་པོ་རྣམས་གཏང་བར་བྱའོ། །དེ་དག་རྣམས་ཀྱང་གང་ལ་གང་དགོས་ནད་ཀྱི་རྟགས་སོ་སོ་དང་སྦྱར་ལ་དངོས་གཞིའི་སྦྱོར་བའི་སྟེང་དུ་བསྣན། བཤད་མ་ཐག་པའི་ནད་སྣ་དེ་དག་ཐམས་ཅད་འདུས་ན་ཀུན་ལ་ཁ་གནོན་སོ་སོར་གཏང་ཞིང༌། ལྡན་པ་དང་འདུས་པ་དང་རང་རང་ཆ་མཉམ་དུ་འདུག་ན་གཉེན་པོའང་བསིལ་དྲོད་ཆ་མཉམ་དང་གང་ཡང་རུང་བ་ཞིག་ཤས་ཆེ་ཞིང་ཅིག་ཤོས་ཆུང་བར་འདུག་ན་དེའི་གཉེན་པོའང་ནད་ཀྱི་ཚུལ་དེ་དང་བསྟུན་ན་ནད་མགོ་གང་མཐོ་བ་དེ་ཐོག་མར་བསྣན། ཡང་ན་ཉི་མ་སྔ་ཕྱི་བྱས་ནས་རེ་མོས་ཀྱི་སྒོ་ནས་སོ་སོར་བཅོས་པའམ། ཡང་ན་གཉེན་པོའི་སྨན་གཉིས་པོ་ལྟག་པ་སྤྲད་ནས་དུས་གཅིག་ལ་གཞོམ་པར་བྱའོ། །བྱེ་བྲག་ཏུ་ཉིན་གུང་མཚན་གུང་གི་སྐབས་སུ་མཁྲིས་པའི་ཚ་བ་བསད་པའི་སླད་དུ་བསིལ་སྨན་དང་བསིལ་ཟས་ཚ་བའི་དུས་གུང་གཉིས་པོ་དེར་བསྟེན་པར་བྱ་ཞིང༌། སྲོད་དང་སྔ་དྲོའི་དུས་སུ་ཕོ་བའི་མེ་དྲོད་གསོ་བའི་དོན་དུ་དྲོད་སྨན་དང་དྲོད་ཟས་ཀྱིས་བད་ཀན་གྲང་བའི་རང་བཞིན་གཞིལ་བ་དང༌། དགོང་དང་ཐོ་རངས་ཀྱི་སྐབས་སུ་རླུང་ལ་རྔན་པ་བྱིན་པའི་ཕྱིར་དུ་དྲོད་བཅུད་ཀྱི་ཟས་དང་སྨན་གྱིས་ཐོར་བུའི་རླུང་སྣ་མནན་པར་བྱའོ། །མདོར་ན་ཉེས་པ་གསུམ་པོ་གང་རུང་གཅིག་ལྷག་པ་དེ་ཉིད་གཞན་གཉིས་པོའི་དགྲར་ལྡང་སྟེ། དཔེར་ན་ཕ་སྤུན་མགོ་མཐོ་དམན་ཞུགས་པ་དང་འདྲ་བས་གང་མཐོ་གཉའ་ནས་གནོན་པ་དཔོན་པོ་ལྟ་བུའི་སྒོ་ནས་བཅོས། དེ་གསུམ་པོ་ལས་གང་ཡང་རུང་བ་ཞིག་ཆད་ན་གང་ཆད་པ་དེས་གཞན་གཉིས་ཀྱི་རམ་མི་ཐེག་པས་སྐྱོང་དགོས་ཏེ། དཔེར་ན་མི་གཅིག་གཞིས་གསུམ་གྱི་ཐོག་ཏུ་བུད་མེད་རེ་རེ་ཡོད་པའི་ཚེ་གང་མོ་ངན་པ་དེ་རྣམས་འབད་ནས་མ་བསྐྱངས་ན་དེ་ཉིད་ཀྱི་གཞིས་སྟོངས་འགྲོ་བ་ལྟར། ནད་ཟད་པ་དེས་ལུས་ཟུངས་ལ་གནོད་པ་དེས་ན་ནད་འདུ་བ་ལྷག་ཆད་མེད་པར་མགོ་མཉམ་དུ་གསོ་དགོས་པ་ཡིན་ནོ། །

གཞན་ཡང་སྤྱི་ཁྱབ་ཏུ་ལུས་ཟུངས་རྣམས་བཟོ་རྒྱུ་དང་འདྲ་བས་མི་འཕྲོད་པའི་སྨན་དཔྱད་ཟས་སྤྱོད་ཀྱིས་ཆུད་མི་གཟན་ཅིང༌། ཕོ་བ་ནི་ལུས་ཟུངས་ཀྱི་ལོ་ཏོག་འབྱུང་བའི་ཞིང་ས་དང་འདྲ་བས་མེ་དྲོད་གསོ་བའི་ཆོ་ག་ལ་སོགས་པ་དེ་ལྟར་བཤད་མ་ཐག་པའི་དོན་རྣམས་གང་ལ་གང་འཚམ་པའི་བཅོས་ཚུལ་སོ་སོར་ཤེས་ན་འཚོ་བྱེད་སྨན་པ་ཞེས་བྱ་བའི་གྲངས་སུ་འགྱུར་བ་ཡིན་ནོ། །དགུ་པ་མཛོ་ཁལ་ལུག་ཁལ་ལྟ་བུའི་བཅོས་ཚུལ་ནི། གནོད་བྱ་ཞེས་པ་ནས་ཞེས་གསུངས་སོ་ཞེས་པའི་བར་གྱིས་བསྟན་ཏེ། འདིར་སྨན་པ་གང་གི་ལུས་ཟུངས་བདུན་དང་དྲི་མ་གསུམ་ལ་སོགས་པ་གནོད་བྱ་རྣམས་དང༌། སྐམ་ས་དང༌། རླན་ཅན་དང༌། འདྲེས་པའི་ཡུལ་དང༌། གྲང་བ་དང༌། ཚ་བ་དང༌། ཆར་གྱི་དུས་དང༌། རྐྱང་བ་གསུམ་དང༌། ལྡན་པ་གསུམ་དང༌། འདུས་པ་གཅིག་གི་རང་བཞིན་རྣམས་དང༌། བྱིས་པ་དང༌། དར་མ་དང༌། རྒན་པོའི་ན་ཚོད་དང༌། རླུང་ལ་སོགས་པ་ནད་ཀྱི་ཁམས་དང༌། ལུས་ཀྱི་ཕྱི་ནང་བར་གསུམ་སྟེ་ནད་ཀྱི་གནས་དང༌། འཇུ་སྟོབས་ཆེ་བ་དང༌། ཆུང་བ་དང༌། སྙོམས་པ་དང༌། མ་སྙོམས་པའི་མེ་དྲོད་དང༌། ལྷན་ཅིག་སྐྱེས་པ་དང༌། དུས་ཀྱིས་བསྐྱེད་པ་དང༌། སྦྱོར་བས་བསྐྱེད་པའི་ཉམས་སྟོབས་དང༌། མཆོག་དང༌། བར་མ་དང༌། ཐ་མར་གོམས་པ་སྟེ་རྣམ་པ་འདི་བཅུའི་སྒོ་ནས་ནད་ཀྱི་རྣམ་པ་ཤིན་ཏུ་ཕྲ་མོ་ཡན་ཆད་ཞིབ་ཏུ་བརྟག་པར་བྱའོ། །དེ་ཡང་གནོད་བྱ་ལ་སོགས་པ་བཅུ་པོ་ཐམས་ཅད་མཚུངས་པའི་ནད་ཅིག་བྱུང་ན་དེ་སྟོབས་དང་ལྡན་པ་ཡིན་པས་གཉེན་པོས་ཀྱང་ནོན་ངེས་ཤེས་པར་གཏང་ལ། དེ་ལྟ་བུ་ཐམས་ཅད་མཚུངས་པ་མ་ཡིན་པར་འགའ་ཞིག་མཚུངས་ལ་འགའ་ཞིག་མི་མཚུངས་ན་ཤས་གང་ཆེ་སོགས་གང་ལ་གང་འཚམ་པའི་ཚད་བཞིན་དུ་གཉེན་པོའང་མཛོ་ཁལ་མཛོ་དང་ལུག་ཁལ་ལུག་ལ་འགེལ་བ་ལྟ་བུར་བསྟེན་པར་བྱ་སྟེ། མཛོ་ཁལ་ལུག་དང་ལུག་ཁལ་མཛོ་ལ་བཀལ་བ་ལྟར་ནད་དང་གཉེན་པོ་སྟོབས་མི་མཚུངས་པར་སྤྲད་ན་དམན་ལྷག་ལོག་པའི་སྦྱོར་བར་འགྱུར་བས་ལེགས་པར་རྟོགས་ཤིག ཅེས་གསུངས་སོ། །གཞན་ཡང་འགྲེལ་པ་ཟླ་ཟེར་ལས། ཅི་དེ་ཙམ་ཞིག་ལས་སུ་བྱ་བ་ཉམས་སུ་བླངས་ནས་སྨན་པ་དག་གསོ་བར་བྱེད་པ་ན་ཉེས་པ་མེད་པར་འགྱུར་བ་ཡིན་ནམ་འོན་ཏེ་གཞན་ཞིག་ལའང་བལྟོས་པར་བྱ་དགོས་ཤེ་ན། དེའི་ཕྱིར་སྨྲས་པ་ནི། གནོད་བྱ་ཡུལ་དང་ཉམས་སྟོབས་དུས། །མེ་དྲོད་རང་བཞིན་ན་ཚོད་དང༌། །སྙིང་སྟོབས་གོམས་དང་ཟས་རྣམས་ཀྱི། །གནས་སྐབས་རྣམ་པ་ཐ་དད་པ། །འདི་དག་ཕྲ་མོ་ཡན་ཆད་བརྟག །ནད་དང་སྨན་གྱི་ཚུལ་བརྟགས་པས། །གང་ཞིག་གསོ་བ་ལ་འཇུག་པ། དེ་ནི་ནམ་ཡང་འཁྲུལ་མི་འགྱུར། །ཞེས་བྱ་བ་ཡིན་ཏེ། འདི་དག་གི་མཚམས་སྦྱོར་མ་བྱས་པས། གནོད་བྱ་ལ་སོགས་པ་རེ་རེ་བཞིན་རང་རྒྱུད་དུ་སོ་སོར་མ་ལུས་པར་བརྟགས་ལ་ཇི་ལྟ་བ་བཞིན་དུ་ཤེས་པར་བྱ་བ་དང༌། །དེ་བཞིན་དུ་ནད་ཀྱང་ཤེས་པར་བྱ་བ་དང༌། གནོད་བྱ་ལ་སོགས་པ་དེ་དང་དེ་རྣམས་ཕྲ་བ་དང་ཕྲ་བའི་ཡང་ཕྲ་བ་དང་ཤིན་ཏུ་ཕྲ་ཞིང་ཤེས་པར་དཀའ་བ་ཡན་ཆད་ཀྱི་གནས་སྐབས་ལེགས་པར་བརྟགས་པའི་ཚུལ་སྣ་ཚོགས་པ་དང༌། ནད་དང་སྨན་གྱི་ཚུལ་བརྟག་ཅིང་ཡོངས་སུ་ཤེས་པར་བྱ་བས་ངེས་པར་བྱས་ནས་སྨན་པ་གང་ཞིག་གསོ་ཞིང་ནད་བསལ་བ་ལ་འཇུག་པ་དེ་ནི་དུས་ནམ་ཡང་གསོ་བ་དང་སྨན་གྱི་སྦྱོར་བ་དེ་ལ་འཁྲུལ་ཞིང་ཉེས་པ་དང་ལྡན་པར་མི་འགྱུར་ཏེ་འདོད་པའི་དོན་རྫོགས་པར་བྱེད་པར་འགྱུར་རོ། །ཞེས་བྱ་བའི་དོན་ཏོ། །ཡུལ་དེ་ལ་ལོག་པར་བསྒྲུབ་པར་མི་འགྱུར་བའོ། །དེ་ལ་གནོད་བྱ་ནི་ལུས་ཟུངས་དང་དྲི་མ་རྣམས་སོ། །ཡུལ་ནི་ས་ཕྱོགས་ཀྱི་ཡུལ་དང་ལུས་ཀྱི་ཡུལ་ལོ། །དེའང་སྐམ་ས་དང་བརླན་ཅན་དང་གཉིས་ཀ་འདྲེས་པའི་དབྱེ་བས་ཕྱེ་བའོ། །ཉམས་སྟོབས་ནི་རྣམ་པ་གསུམ་སྟེ། ལྷན་ཅིག་སྐྱེས་པ་དང༌། དུས་ཀྱིས་བསྐྱེད་པ་དང༌། སྦྱོར་བས་བསྐྱེད་པའོ། །དུས་ནི་རྣམ་པ་གསུམ་སྟེ། གྲང་བ་དང་ཚ་བ་དང་ཆར་གྱི་དུས་སོ། །མེ་དྲོད་ནི་རྣམ་པ་བཞི་སྟེ། སྙོམས་པ་དང་མ་སྙོམས་པ་དང༌། དྲག་པ་དང་ཞན་པའོ། །རང་བཞིན་ནི་བདུན་ཏེ་ནད་གཞི་རེ་རེ་དང་གཉིས་གཉིས་དང་ཆ་མཉམ་པའོ། །ན་ཚོད་ནི་གསུམ་སྟེ། བྱིས་པ་དང་དར་ལ་བབ་པ་དང་རྒན་པོའོ། །སྙིང་སྟོབས་ནི་རྣམ་པ་གསུམ་སྟེ། སྙིང་སྟོབས་དང་རྡུལ་དང་མུན་པའི་དབྱེ་བས་སོ། །གོམས་པ་ནི་གསུམ་སྟེ། མཆོག་དང་བར་མ་དང་ཐ་མའི་དབྱེ་བས་སོ།།

ཟས་ནི་རྣམ་པ་གཉིས་ཏེ། ཕན་པ་དང་གནོད་པ་ཉིད་ཀྱིས་སོ། །དེ་ལྟ་བུའི་གནས་སྐབས་རྣམ་པ་བཅུ་པོ་སོ་སོར་བརྟགས་པས་བརྟག་པ་དང༌། དེ་བཞིན་དུ་བཅུ་པོ་འདི་དག་ཉིད་ཀྱིས་ཕྲ་མོ་སྟེ་ཤིན་ཏུ་ཤེས་པར་དཀའ་བའི་གནས་སྐབས་ཡན་ཆད་བརྟགས་པས་ཤེས་པར་བྱས་ན་དེ་གསོ་བ་ལ་ནམ་ཡང་འཁྲུལ་པར་མི་འགྱུར་གྱི་གལ་ཏེ་གནས་སྐབས་དེ་དག་སྨན་པས་མ་བརྟགས་པར་བྱེད་ན་ནི་ནད་པ་གསོད་པར་འགྱུར་བ་ཡིན་ནོ། །ནད་དཀྱེལ་ཆེའམ་ཆུང་བ་དག །ཕོག་རྨྱ་ལུས་ཉམས་ཆེ་ཆུང་ལས། །གནོད་པར་བྱེད་པར་སྣང་འགྱུར་བས། །དེ་ལའང་མ་ཡེངས་ཉིད་དུ་གྱིས། །ཞེས་བྱ་བ་ལ། ཕོག་རྨྱ་ཆེ་བ་དང་ལུས་ཀྱི་ཉམས་ཆེ་བ་ལ་དང་པོར་ནད་དཀྱེལ་ཆེ་ཞིང་སྟོབས་དང་ལྡན་པར་བྱུང་དུ་ཟིན་ཀྱང་སྟོབས་ཆུང་ལྟ་བུར་ཤེས་པར་བྱ་སྟེ། ཅིའི་ཕྱིར་ཞེ་ན། སྙིང་སྟོབས་དང་ལུས་ཀྱི་ཉམས་གཉིས་ཤིན་ཏུ་ཆེ་བ་ཡིན་པའི་ཕྱིར་རོ། །དེ་བཞིན་དུ་ཕོག་རྨྱ་ཆུང་བ་དང་ལུས་ཀྱི་ཉམས་ཤིན་ཏུ་ཆུང་བ་ལ་ནད་ཡང་བ་ཞིག་བྱུང་དུ་ཟིན་ཀྱང་ཆེ་བ་ལྟ་བུར་ཤེས་པར་བྱ་སྟེ། སྙིང་སྟོབས་དང་ལུས་ཀྱི་ཉམས་ཆུང་བ་ཉིད་ཡིད་པའི་ཕྱིར་རོ། །དེ་ལྟར་ཕོག་རྨྱ་དང་ལུས་ཀྱི་ཉམས་ཆེ་བ་དང་ཆུང་བ་ལས་ནད་ཀྱི་དཀྱེལ་ཆེ་བའམ་ཆུང་བ་གནོད་པར་བྱེད་པ་གཞན་དང་གཞན་དུ་སྣང་བར་འགྱུར་གྱི། ནད་ཀྱི་མཚན་ཉིད་ཇི་ལྟ་བ་བཞིན་མ་ཡིན་ནོ། །འདི་ཞེས་བྱ་བའི་སྒྲས་ནི་ནད་ཀྱི་དཀྱེལ་ཆེ་ཆུང་གཅིག་ཁོ་ནར་སྣང་བ་མ་ཡིན་ནོ། །དེ་བས་ན་ནད་ཀྱི་གནས་སྐབས་འདིར་དང་པོ་ནད་གཞི་ནས་བཟུང་སྟེ་གནས་སྐབས་ཀུན་ཏུ་སྨན་པས་མ་ཡེངས་པ་ཉིད་དུ་བྱ་དགོས་སོ། །ཞེས་བྱ་བའི་དོན་ཏོ། །སྨན་པ་ངན་པས་ནད་རྣམས་ནི། །ལྕི་བ་ཡང་བར་ཡོངས་རྟོག་ཅིང༌། །ནད་ཉུང་དག་ཏུ་བརྟགས་པ་ཡིས། །གསོ་བ་བཟློག་པ་དག་ཏུ་འགྱུར། །ཞེས་བྱ་བ་ལ། གང་སྨན་པ་ངན་ཞིང་མི་ཤེས་པ་དེས་ནད་ཀྱི་དབྱིབས་ཙམ་མཐོང་བ་ལས་ནད་ལྕི་བ་ཡང་བ་ལྟ་བུར་རྟོགས་ཤིང་ངེས་པར་བྱེད་དོ། །ནད་ཉུང་བར་བརྟགས་པས་ནད་ཀྱི་ཚད་ཆུང་བར་ངེས་པར་བྱ་བའི་ཕྱིར་གསོ་བ་ལོག་པར་བྱེད་པར་འགྱུར་ལ། ནད་ཆུང་ངུ་དག་ཆེ་བ་དང་ནད་ཚབས་ཆེ་བའི་ཉེས་པ་ལྟ་བུར་བྱེད་དེ། དེ་ལྟར་ནད་ཡང་བ་ནི་ལྕི་བ་ལྟ་བུར་ཉེས་པ་མང་བར་རྟོགས་ལ། ལྕི་བ་ནི་ཡང་བ་ལྟ་བུར་རྟོགས་པས་ནད་ཆུང་ངུ་ལ་ནད་ལྕི་བ་ལ་འོས་པའི་སྨན་སྟེར་བར་བྱེད་ལ། ནད་ལྕི་བ་ལ་ནི་ནད་ཡང་བ་ལ་འོས་པའི་སྨན་སྟེར་བས་གསོ་བ་ལོག་པ་དག་ཏུ་འགྱུར་རོ། །དེ་བས་ཆུང་བའམ་སྟོབས་ཆུང་བ། །དཀྱེལ་ཆེན་ནད་ལ་རབ་ཏུ་སྦྱོར། །སྦྱང་བ་ཆུང་ངུར་སྦྱར་བ་ཡིས། །ནད་ནི་ཤིན་ཏུ་སློང་བ་ཡིན། །ཞེས་བྱ་བ་ལ། །གང་གིས་ཕྱིར་དེ་ལྟར་བྱེད་པ་དེ་བས་ན་ཚད་ཆུང་བས་ཆུང་བའམ་སྟོབས་ཆུང་བའམ། ནད་ཀྱི་དཀྱེལ་ཆུང་བར་བརྟགས་པས་ནད་ཀྱི་དཀྱེལ་ཆེན་པོ་སྟོབས་དང་ལྡན་པ་ལ་སྨན་དེ་རབ་ཏུ་སྦྱོར་ཞིང་སྟེར་བར་བྱེད་པས་སྦྱང་བ་ཆུང་ངུར་སྦྱར་ཞིང་བཏང་བས་ནད་དེ་ཤིན་ཏུ་སློང་ཞིང་དཀྲུགས་པས་སླར་ཐུ་བ་བྱེད་པར་འགྱུར་རོ། །སྦྱོང་བའང་ལྷག་པར་སྦྱོང་བ་དང༌། །ལོག་པར་སྦྱོང་བས་ཕྱིན་ཅི་ལོག །དྲི་མ་འབྱུང་བར་མ་ཟད་ཀྱི། །ལུས་ཀྱང་ཤིན་ཏུ་མ་རུངས་འགྱུར། །ཞེས་བྱ་བ་ལ། ཡང་སྦྱོར་བར་བྱེད་པས་ན་ནད་ཤས་ཆེ་བར་བརྟགས་པས་ལྷག་པ་ཤས་ཆེ་བའི་སྦྱོར་བ་བྱེད་པ་དང༌། ལོག་པར་སྦྱོར་བ་སྟེ། ནད་ཆུང་ངུ་ལ་ཕྱིན་ཅི་ལོག་ཏུ་སྦྱོང་བ་ལ་སྦྱོར་བར་བྱེད་པའོ། །ཅིའི་ཕྱིར་ཕྱིན་ཅི་ལོག་ཡིན་ཞེ་ན། རང་བཞིན་ཆུང་ཞིང་སྟོབས་ཆུང་བ་ལས་ཚད་ཆེ་བ་དང་སྟོབས་ཆེ་བའི་སྦྱོང་བ་ལ་སྦྱོར་བ་ནི་ལྷག་པར་སྦྱོར་བ་ཡིན་པས་དེས་དྲི་མ་འབའ་ཞིག་འབྱུང་ཞིང་ཟད་པར་འགྱུར་བ་མ་ཟད་ཀྱི། ལུས་ཀྱང་ཤིན་ཏུ་འཇིག་ཅིང་མ་རུངས་པ་ཉིད་དུ་འགྱུར་རོ།།

དེ་བས་རྟག་ཏུ་བརྩོན་པ་དང༌། །ཐམས་ཅད་ཀུན་ཏུ་ལེགས་བརྟགས་ནས། །ཅི་ནས་ནད་མེད་བརྟན་འགྱུར་བ། །དེ་ལྟར་སྨན་དཔྱད་སྦྱར་བར་བགྱིས། །ཞེས་བྱ་བ་ལ། གང་གི་ཕྱིར་ཚུལ་དེ་ལྟར་ནད་རྣམས་ཀྱི་མཚན་ཉིད་རྟོགས་པ་ཤེས་པར་དཀའ་བ་ཡིན་པའི་རྒྱུ་དེ་བས་ན་སྨན་པ་ཤེས་རབ་དང་ལྡན་པས་བརྩོན་ཞིང་འབད་པ་དང་ལྡན་པའི་སྒོ་ནས་དངོས་པོ་ཐམས་ཅད་དུས་ཐམས་ཅད་དུ་གནོད་བྱ་ལ་སོགས་པའི་དངོས་པོ་རྣམས་ལ་ལེགས་པར་དཔྱད་ཅིང་བརྟགས་ནས་རྣམ་པ་ཐམས་ཅད་དུ་ཅི་ནས་ཀྱང་ཚེའི་རིག་བྱེད་ཀྱི་རྗེས་སུ་འབྲང་བའམ། དེའི་བསྟན་བཅོས་ལས་བཤད་པ་བཞིན་དུ་བྱས་ལ་ནད་མེད་པ་བརྟན་པར་བྱ་བའི་སྨན་དཔྱད་དག་མཁས་ཤིང་གསལ་བ་སྦྱར་བར་བྱ་སྟེ། རྣམ་པ་དེ་ལྟ་བུའི་ནད་དང་ལུས་ཟུངས་ལ་སོགས་པ་དང་རྗེས་སུ་མཐུན་པའི་རྣམ་པ་གང་གི་སྨན་དེ་བྱིན་པ་ན་ནད་མེད་པ་ཉིད་དུ་འགྱུར་བ་དེ་ལྟར་བྱའོ། །ཞེས་ཞིབ་ཏུ་བཤད་པ་ལྟར་རྟོགས་པར་བྱ་དགོས་སོ། །གསུམ་པ་ལེའུའི་མཚན་ནི། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་ཁྱད་པར་གྱི་གསོ་ཚུལ་རྒྱས་པར་བསྟན་པའི་ལེའུ་སྟེ་ཉི་ཤུ་རྩ་བརྒྱད་པའོ། །ཞེས་བྱ་བའི་དོན་ཏོ།། །

མཐའ་མའི་འདོན་ཐེངས་།: 22.08.2011 ཉིན། 11:59 AM