ལེའུ་ཉེར་བཞི་པ། འབྲུམ་པའི་རིམས་བཅོས་པ། 

        དེ་མ་ཁད་དེ་ནས་སྟོན་པ་དྲང་སྲོང་རིག་པའི་ཡེ་ཤེས་ལ་དྲང་སྲོང་ཡིད་ལས་སྐྱེས་ཀྱིས་ཡང་འདི་སྐད་ཅེས་ཞུས་སོ། །འབྲུམ་བུའི་རིམས་ཞེས་བྱ་བ་ལ་རྒྱུ་རྐྱེན་དང་མཚན་ཉིད་དང་དབྱེ་བ་དང་རྟགས་དང་བཅོས་པའི་ཐབས་རྣམས་ཇི་ལྟར་དུ་བགྱི་ཞེས་འདྲི་ཞིང་ལུས་ཅན་གྱི་ཚེ་སྲོག་འཚོ་བར་མཛད་པ་སྨན་པའི་རྒྱལ་པོས་བཤད་དུ་གསོལ་ཞེས་དེ་སྐད་དུ་ཞུས་པའི་དོན་ལ་ལན་གསུངས་པ།          འབྲུམ་བུའི་རིམས་འདི་ནི་རྒྱུ་རྐྱེན་རིམས་རྒྱུ་གོང་དུ་བཤད་པ་ལྟར་སྤྱི་དང་འདྲ་བ་ལ་ངོ་བོ་ནི་ཚ་བ་ཆུ་སེར་ལ་བབས་ནས་ལུས་ཀུན་ཏུ་ཁྱབ་ཅིང་ཁྱད་པར་འབྲུམ་པ་རྣམས་རུས་པ་དང་རྐང་དང་ལྷ་བ་ཞེས་པ་རུས་པ་བརྡར་ཚེ་ཁྲག་རྩིས་འབྱུང་བ་དེའི་གཏིང་སོགས་ཐམས་ཅད་ནས་སྐྱེ་བར་བྱེད་ཅིང༌། ལུས་ཟུངས་ཐམས་ཅད་དུ་རྫོགས་པར་ཁྱབ་པས་ཐར་རྒྱུ་འོང་བ་ཡིན་ཅིང༌། ཐོར་པའམ་འབྲུམ་བུ་འོང་བས་དེའི་ཕྱིར་འབྲུམ་བུ་ཞེས་མིང་དུ་བརྗོད་ཅིང་བཏགས་སོ། །

        དེ་ལ་དབྱེ་བ་ཕྱེ་ན་སྤྱིར་ནག་པོ་དང་དཀར་བོ་སྟེ་རིགས་གཉིས་ཡོད་པ་ཡིན་ཏེ་དེའི་ནང་ནས་ནག་པོའི་རིགས་ལའང་གསུམ་ཡོད་དེ་སྐྲངས་པ་གླང་གི་གཉའ་བ་ལྟ་བུ་སུལ་ལམ་གཉེར་མ་ཅན་དང༌། ཁྲག་སྐམ་རྩེལ་ཏེ་ཞེས་དང༌། ཟངས་གཟེར་གྱི་དབྱིབས་ལྟ་བུ་སྦུ་གུ་ཅན་དང་གསུམ། དཀར་པོའི་རིགས་ལའང་གསུམ་ཡོད་དེ་ཤ་ར་སྐྱ་ཤར་དང༌། རྨོག་མགོ་སྤྱི་ཟླུམ་དང༌། སིབ་བུ་ཀོབ་རྩེ་སྟེ་ཡོངས་བསྡོམས་དྲུག་གོ། །དེ་ཡང་སིབ་བུ་ཞེས་པ་འདིའི་མིང་ཚོ་འདྲ་ལ་བརྟེན་འགྲེལ་ཞིག་གིས་ད་ལྟ་ཡོངས་གྲགས་ཀྱི་སི་བུའམ་བེ་གེ་ཡིན་ཟེར་བ་མི་འཐད་དེ་གང་ཞེ་ན་ཐེར་སིབ་དང་སི་བུ་གཉིས་གཅིག་ཐར་ཡང་གཅིག་མི་ཐར་བར་མཇུག་ཏུ་གང་མ་ཐར་བ་དེ་སླར་འགོ་བས་མངོན་སུམ་དུ་འགལ་ཞིང༌། ཡང་ལ་ལ་ནི་ཐོར་ཡན་ཞེས་པ་དང་སི་བུ་ཞེས་པའམ་བེ་གེ་གཉིས་གཅིག་ཟེར་ཡང་དེ་གཉིས་ཀྱང་ནི་ནམ་ཡང་མི་གཅིག་སྟེ་ཐོར་ཡན་ནི་ཡམས་ཐབས་སུ་ཡང་ཡང་འབྱུང་ལ་ཐར་རྒྱུ་ཡང་མེད་ཅིང༌། སི་བུ་ནི་གཅིག་ཐར་རྗེས་ཐར་གོའང་ཆོད་ཅིང་སི་བུའི་མིང་གི་རྣམ་གྲངས་ལ་ཡང་སེ་གེ། བེ་གེ། རྩེ་གེ། བེམ་པོ། བེམ་རྩེགརྩེག་གེ།  མེལ་གེ་ཞེས་དང༌། འདི་ལའང་དཔའ་བོས་རིགས་གཉིས་དང་ཀླུ་སྒྲུབ་ཀྱིས་བརྒྱད་སོགས་འོང་བར་བཤད་ཅིང༌།  ཁྱད་པར་དུ་ཟུར་སྨན་ལེགས་བཤད་འཚོལ་གྱིས་མཛད་པའི་གཉན་རིམས་ཀྱི་བཅོས་སུ། སེ་བུ་ཞེས་པ་ངོ་བོ་སེ་གེ་ཡིན།  ཞེས་དང༌།  དཔལ་ལྡན་དཔའ་བོའི་ཡན་ལག་བརྒྱད་པ་ཆེན་པོ་ལས་ཀྱང༌། འབྲུམ་རིགས་གྲངས་ལས་འདས་མོད་ཀྱང༌།  །བསྡུས་ན་རིགས་ནི་དྲུག་ཏུ་འདུས།  །ཞེས་པའི་ཁོངས་སུ་མ་འདུས་པའི།  །སེ་བུ་ཞེས་པ་སེ་གེ་སྟེ།  །འདུ་བའི་དབང་གིས་རིགས་གཉིས་འབྱུང༌།  །དེ་ཡིས་མི་འཆི་བཟློག་གིས་འཆི།  །མཇུག་རྒྱན་འོང་བས་གཟབ་པ་གཅེས།  །ཞེས་དང༌། སེ་གེ་ལ་ཡང་རིགས་གཉིས་ཏེ།  །ཞེས་སོགས་རྒྱ་ཆེར་གསུངས་ཤིང༌།

          དེ་དག་རྣམས་དངོས་སུ་དཀར་ནག་གི་རིགས་དྲུག་སྨོས་པ་དེ་དང་མི་གཅིག་པ་སེ་གེའམ་སེ་བུ་ལ་རིགས་གཉིས་འབྲུམ་ཡན་དང་བཅས་པ་རྣམས་ཁོངས་འདིར་བསྡུས་པའི་དེའི་རྟགས་ལ་ཡང་སྤྱི་དང་བྱེ་བྲག་ཏུ་ཕྱེ་བ་གཉིས་ལས་སྤྱི་རྟགས་ནི་ཚིགས་གཞི་ན་གྲང་ཤུམ་བྱེད་ཅིང་ལུས་པོ་སྤྱིར་སྙོམ་པ་སྟེ་བྱ་བ་གང་ཡང་བྱེད་མི་འདོད་ཅིང་བརྗེད་ངས་ཆེ་ལ་ཟས་ཀྱི་དང་ག་མི་བདེ་ཞིང༌། ཁ་ཁ་ཟ་ཟི་འོང་ལ་སྒྱིད་པ་སྐྱུར་བ་དང་ཁྱད་པར་དུ་མགོ་བོ་ན་ཞིང་གློ་བ་དང་སྙིང་བརྡུང་བ་སྟེ་འཕར་བ་དང་ལུས་ཀྱི་ཤ་མདངས་དམར་ལ་མཐུག་ཅིང་ལུས་ཀུན་བརྩེ་བའི་ཉམས་བྱེད་པ་དང་མཁྲིས་པ་སྐྱུག་ཅིང་རུས་པ་དང་རྐང་འཆག་པ་སྙམ་སེམས་ཤིང༌། དེ་ཡང་དང་པོ་མ་སྨིན་པའི་མངོན་ཚུལ་དེ་ལྟར་དུ་འབྱུང་ཞིང་བར་དུ་འབྲུམ་པ་རྣམས་ཕྱིར་ཐོན་པའི་སྐབས་ལ་བདེ་སྙམ་བྱེད་དོ། །

          ཐ་མ་བྱེ་བྲག་གི་རྟགས་ལ་དཀར་ནག་གཉིས་ལས་ནག་པོའི་རིགས་ལ་ཡང་སྐྲངས་པ་གླང་གཉའ་ནི་འབྲུམ་པ་ཕྱི་རུ་མི་ཐོན་པར་ནང་དུ་ཟུག་ཆེ་ཞིང་ལུས་ཀུན་སྐྲངས་པ་ལ་ཆུ་སེར་ནག་པོ་ཉེས་ཀུན་ཏེ་འདུས་པ་ལས་བསྐྱེད་པའོ། །ཁྲག་སྐམ་རྩེལ་ཏེའི་འབྲུམ་དབྱིབས་ལུས་ལ་ཤིག་སྦྱར་བ་འདྲ་ལ་མདོག་ནི་དམར་ཞིང་ནག་ལ་མཐུག་པ་དང༌། ཟངས་ཀྱི་གཟེར་འདྲ་བ་རྩེ་མོ་ཀྱོང་བའི་སྦུ་གུ་ཅན་ནི་འབྲུམ་པའི་དཀྱིལ་དུ་ཀྱོང་ཡོད་པ་དེ་གཉིས་ཀ་ཁྲག་དང་མཁྲིས་པ་ལས་གྱུར་པ་ཡིན་ཅིང་ཁྱད་པར་དུ་མགོ་ན་ལ་རྩ་དང་ཆུ་དང་ཕྱི་ཡུལ་རྣམས་ཚའོ། །དཀར་པོའི་ནང་ཚན་རྨོག་མགོ་སྤྱི་ཟླུམ་ནི་ཆེ་ལ་འཆོལ་བ་དང༌། ཤ་ར་སྐྱ་ཤར་ནི་འབྲུམ་མདོག་དཀར་ལ་མཐུག་པ་འབྱུང་བ་ཡིན་ཏེ་དེ་དང་སིབ་བུ་ཀོབ་རྩེ་ནི་ཙེམ་ཙེམ་མཐུག་ཀོབ་ཏུ་འབྱུང་ཞིང་དཀར་པོ་གསུམ་པོ་དེ་བད་རླུང་ལས་གྱུར་པ་ཡིན་ཏེ་ནད་ཟུག་ནི་ཆམ་པ་དང་འདྲ་ལ་ཚད་པའི་རྟགས་ཆུང་བས་ཟས་སྤྱོད་སོགས་ཀྱིས་མ་ལོག་ན་བཅོས་མི་དགོས་སོ། །

        དེ་དག་རྣམས་བཅོས་པའི་ཐབས་ལ་སྤྱི་དང་བྱེ་བྲག་ཏུ་ཕྱེ་བ་གཉིས་ལས་སྤྱི་བཅོས་དེ་ལ་ཡང་དང་པོ་མ་སྨིན་པའི་དུས་སུ་སྤུ་རྣམས་ཀྱི་སྒོ་དབྱེ་བ་དང༌། ནད་རྒྱས་ནས་ཚ་བ་ཁོང་ནས་ཕྱིར་ལ་དབུལ་བ་དང་འབྲུམ་པ་ཁོང་དུ་ཤོར་ན་ཕྱིར་ལ་དྲངས་བ་དང་ཐ་མ་འབྲུམ་པའི་རྗེས་བསུབ་པ་དང་བཞིར་ངེས་དགོས་ཏེ་དང་པོ་སྒོ་དབྱེ་བ་ནི་སླེ་ཏྲེས་དང་འབྲས་བུ་ཨ་བར་སྐྱུར་གསུམ་ཏིག་ཏ་དང་བ་ཤ་ཀ་དང་ལི་ག་དུར་རྣམས་བསྡུས་པའི་ཐང་དྲོན་མོ་ཕུལ་གང་ཙམ་ཉི་ཕྱེད་ལ་བཏང་བ་དང༌། སྨན་ཞུ་བ་དང་རྔུལ་གདོན་ལ་བལ་དང་ཕྱེས་ཕྱིས་པས་སྤུའི་སྒོ་ཕྱེད་པས་འབྲུམ་པ་ཕྱིར་མྱུར་དུ་སྐྱེ་ལ། དེ་ཡང་ནད་ཀྱི་སྟོབས་ཆེ་བ་རྣམས་ལ་ཐེངས་གཅིག་མིན་པའི་འགའ་ཡང་བསྔགས་ཤིང་འདི་དུས་སུ་དཔྱད་ཀྱི་མཆོག་ལ་རྔུལ་འདོན་པ་ལས་ལྷག་པ་གཞན་མེད་ཅིང་ཡོས་བརྡུངས་པའི་ཆག་ཚེ་དང་ཕྱེ་ཐུག་ཅེས་རྩམ་ཐུག་ལ་འོ་མ་བཏབ་པ་དང༌། འོ་མའི་ཟན་དང་དར་བ་གསར་པ་དང་ཆུ་བསྐོལ་དང་ཆབ་ཚ་སྟེ་ཇ་འཇམ་སྡོར་ཆུང་བསྟེན་ལ་ཉིན་དང་ནུབ་མོ་མ་ལུས་པ་གྱོན་པ་སོགས་མི་གསེང་བར་དྲོད་ལ་སྒོར་དགོས་ཤིང་གྲང་མོ་དང་བསེར་བུས་ཐོག་ན་འབྲུམ་པ་དེ་ནང་ལ་མྱུར་དུ་ལྡོག་པར་འགྱུར་ཞིང་བཅུད་ཀྱི་རིགས་ཤོར་ན་འབྲུམ་པ་ཕྱིར་མི་སྐྱེ་བར་ནང་དུ་དོན་ལ་བབས་པས་སྲུང་བ་གཅེས་ཤིང་གལ་ཏེ་ནང་དུ་ཤོར་བ་ན་སྲན་མའི་ཁུ་བ་དང་སྲན་མའི་ཚོད་མ་སྦྱིན་ཞིང་དེ་རྗེས་ལ་ཚ་བ་ཕྱིར་འཕུལ་བ་ལ་ཐང་དང་ཕྱེ་མ་གཉིས་ཡོད་པ་ལས་དང་པོ་མེ་ཏོག་ལུག་ཆུང་དང༌། སྒོང་ཐོག་པ་ཞེས་འདྲེ་པད་ཁ་དང་ལུག་ཤོ་རྐྱང་སེལ་དུ་བཤད་པ་ལྟར་དང་གཡེར་ཤིང་གཙོར་སྨོས་བཞི་ཐང་གིས་འབྲུམ་པ་ཕྱིར་ལ་འཕུལ་བ་དང་ཕྱེ་མས་ཚ་བ་རྣམས་ཕྱིར་འཕུལ་བ་ལ་རྡོ་སྦྱོར་དང་རྩི་སྦྱོར་གཉིས་ལས་རྩི་སྦྱོར་ལ་ཙནྡན་དཀར་པོ་དང་གི་ཝཾ་དང་ཨ་རུ་ར་དང་ཛཱ་ཏི་དང་ཅུ་གང་དང་གུར་ཀུམ་དང་གླ་རྩི་དང་བསེ་རུ་དཀར་པོ་དང་ཀ་ར་རྣམས་སྦྱར་ལ་གངས་ཀྱི་ཆུའམ་བསྐོལ་གྲང་གིས་དབུལ། རྡོ་སྦྱོར་རྒྱལ་པོ་སྡེ་བཞི་ནི་བརྡ་སྤྲོད་དང་ཟུར་མཁར་བའི་བཞེད་པ་སྦལ་རྒྱབ་དཀར་སྨུག་གཉིས། ཆིག་ཐུབ་དཀར་སྨུག་གཉིས་ཏེ་བཞི་བཞེད་ནའང་ཆིག་ཐུབ་མདུང་རྩེར་བཞེད་དགོས་དང་བཅས། ཕྱི་རྒྱུད་དུ། སྦལ་རྒྱབ་མདུང་རྩེ་གངས་ཐིགས་ཅོང་ཞི་དང༌། །ཞེས་པ་ལྟར་བྱང་ལུགས་སུའང་འདུག་པས་དམིགས་བསལ་རེ་གཉིས་མ་གཏོགས་འདི་སྐབས་སོགས་ཕྱི་རྒྱུད་ལྟར་འཐད་པ་དང་མཚལ་ཅོག་ལ་མར་དཀར་པོའི་མིང་བཏགས་པ་དང༌། གླ་རྩི་དང་ཚ་ལ་དང་ཀ་ར་རྣམས་སྦྱར་ལ་ཆང་གིས་དབུལ་བ་ཐུན་གྲངས་དང་ཐུན་ཚད་རྣམས་ཚ་བའི་ནད་ཀྱི་སྟོབས་དང་དཔགས་ཏེ་བཏང་བ་དེ་ལྟར་གྱི་རྩིས་དོན་དང་སྣོད་ཀྱི་ཚ་བ་རྣམས་སེལ་བར་བྱེད་ཅིང་རྡོ་ཡིས་ཆུ་སེར་རྣམས་སྐེམས་ཤིང་ནད་ཕྱིར་ལ་ཕུལ་ལ་ནད་སྟོབས་ཆེ་ན་རྡོ་དང་རྩི་གཉིས་ལྟག་སྤྲོད་དུ་བཏང་ན་མཆོག་ཏུ་འགྱུར་ཞིང་ཕྱིར་འབྲུམ་བུ་མ་ཐོན་པར་ལུས་སྐྲངས་ཤིང་གྲངས་ཤུམ་བྱེད་ན་ནད་འབྲས་ཞེས་ནད་མའི་འབྲུར་ངོས་འཛིན་པའང་མཆིས་རུང་འབྲུམ་སྐོགས་དང་ཤིང་མངར་གཉིས་འོ་མར་བསྐོལ་བ་བྱུག་ཅིང་འབྲུམ་པ་སྐྱེ་འཕྲོ་ལ་ནང་དུ་ལོག་པའམ་འབྲུམ་པ་རྫོགས་ནས་སླར་ལོག་པ་ཁོང་ནས་ཕྱིར་དྲངས་བ་ལ་འཛིམ་པ་དཀར་པོ་ནས་ཙམ་དང་ཀ་ར་སྦྱར་བ་ཁོང་དུ་བཏང་ལ་རྔུལ་དབྱུང་ཞིང་དེ་རྗེས་ལ་རྡོ་སྦྱོར་དང་རྩི་སྦྱོར་གང་རུང་ལ་དངུལ་ཆུ་མུ་ཟིས་བཤིག་པ་བཞི་ནམ་ཞེས་སྦྱོར་སྡེ་ཁྱོན་གྱི་བཞི་ཆའི་རྩིས་བསྣན་ལ་རྡོ་སྦྱོར་གྲོ་ཆང་གིས་དབུལ་བ་དང་རྩི་སྦྱོར་གཡེར་ཤིང་ཆིག་ཐང་གིས་དབུལ་བ་གཉིས་ལྟག་པ་སྤྲད་དེ་ཐུན་ཆེར་བསྐྱེད་ལ་སྔ་དྲོ་དང་དགོངས་མོ་སྲོད་ཐོ་རངས་གུང་གཉིས་ཏེ་དྲུག་ཡར་བཏང་བས་ཕྱིར་ཕུལ་བར་བྱེད་ཅིང་འབྲུམ་པ་དོན་འཕྲོ་རྫོགས་ནས་ཤི་བ་ཕལ་ཆེར་དུ་མེད་དོ། ། ཐ་མར་ནད་ཀྱི་འགོ་ཆོགས་ནས་འབྲུམ་རྗེས་བསུབ་པ་ལ་འབྲུམ་པའི་ཤུ་བ་རྣམས་རྣག་བསག་ཅིང་རླན་ཆེ་བ་ན་ཤ་རུ་དང་ཕུར་མོ་དང་ཡོག་མོ་དྲེས་མ་བཅས་པའི་ཐལ་བ་དང་ལྕི་བ་སེར་ཀ་མའི་ཐལ་བ་བཏབ་པས་སྐེམ་ཞིང་རྐང་ལག་གི་མཐིལ་བཞིར་ཕྱིར་ཐོན་པ་དང་དོན་པ་སྔོན་མ་ཕལ་ཆེར་སྐམས་པ་དང་གཉིད་ཆུང་ལ་གཡལ་མང་ཞིང་ལུས་འདར་ལ་ཤེས་པ་ཡང་བ་དང་རྩ་དང་ཆུའི་ཚ་བ་བྲི་ནས་འདུག་ན་ཁ་ཟས་རྣམས་གློད་དགོས་ཏེ་ཞུན་མར་གསར་འཇམ་དང་ཤ་གསར་པ་དང་མར་གསར་པ་སྦྲང་རྩི་སོགས་དང་པོ་བྲིད་པ་སྟེ་ཆ་ཆུང་ངུ་ནས་རིམ་པས་བསྐྱེད་ལ་ཐ་མར་ལྷུག་པར་བཏང་ཞིང༌། ཆང་ནི་མངས་ན་རྣགས་ཏེ་འབྲུམ་པའི་ཤུལ་ཟ་བས་ན་ཁ་ངོམས་ཙམ་ལས་བག་མེད་དུ་ཡོག་འཐུང་སྤང་བར་བྱ་ཞིང༌། འདི་མན་ནས་ཁ་ཟས་བཟང་ན་ལུས་ཤེད་བསྲོངས་པ་སྐྱེན་པས་བསྟེན་པར་བྱ་བ་དང༌། གདོང་པའི་ཤུ་བ་གོགས་ནས་རང་གི་དྲི་ཆུས་བཀྲུ་ཞིང་ར་དང་ཕག་པའི་ཚིལ་བུ་ཚེར་སྔོན་དང་སྦྱར་བ་བྱུག་གོ། །

        བྱེ་བྲག་ཏུ་བཅོས་པའི་ཐབས་ལ་རིགས་དང་བབས་པའི་སྒོ་རྣམས་སྦྱར་དགོས་ཏེ། རིགས་ཀྱིས་བཅོས་པ་ནི་སྐྲངས་པ་གླང་གཉའི་འབྲུམ་པ་ལ་རི་དྭགས་བསེ་རུའི་ཀོ་བ་དང་གླང་འོག་ཅན་གྱི་གཉའི་ཀོ་བ་མེར་སེར་ཙམ་བསྲེགས་པ་སྲན་ཕྱེ་དང་བསྲེས་པ་སྤྱི་སྨན་རྡོ་རྩི་གཉིས་གང་རུང་དང་ལྟག་པ་སྤྲད་པས་སྐེམ་ཞིང་སྐྲངས་པ་ཆེ་ན་སྐྲངས་པོ་དང་གང་ཉེ་བའི་རྩ་ལ་གཏར་བ་དང༌། དུར་བྱིད་དང་ཧོང་ལེན་དང་སྤོས་དཀར་དུག་པུས་པ་སྟེ་ར་དུག་པའི་མེ་ཏོག་རྣམས་ཀྱི་རིལ་བུ་བའི་ཆུས་ཕུལ་བའི་བཤལ་གྱིས་སྦྱངས། ཁྲག་སྐམ་རྩེལ་ཏེ་ཤིག་འདྲ་བ་དང་ཟངས་གཟེར་གཉིས་འདྲ་བ་ལ་ཅུ་གང་གུར་ཀུམ་ལི་ཤི་ཛཱ་ཏི་སུག་སྨེལ་ཀ་ཀོ་ལ་སྟེ་བཟང་དྲུག་དང་གླ་རྩི་ཕག་རིལ་སོགས་ཀྱི་ཁུ་བ་དང་རའི་ཁྲག་དང་སྦྱར་བའི་ལྕག་གི་མདའ་བཏང་བའམ་ཏིག་ཏ་དང་དུག་མོ་ཉུང་ཧོང་ལེན་དང་བ་ཤ་ཀ་སོགས་གོང་གི་རྩི་སྦྱོར་གྱི་སྦྱོར་སྡེ་སྤྱི་སྟེང་ལ་བསྣན་པ་བཏང་བ་དང་ཤིན་ཏུ་ཚ་བ་ཆེ་ན་དེ་སྟེང་དུ་ག་བུར་ཡང་བསྣན་ནོ། ། དཀར་པོའི་རིགས་གསུམ་ཀ་ལ་སེ་འབྲུ་དང་སྐྱུ་རུ་ར་རྣམས་རྡོ་སྦྱོར་གོང་བཤད་ལ་བསྣན་ནས་དང་པོ་ཆང་དེ་ནས་ཆུ་བསྐོལ་གྱིས་དབུལ་ལ་བཏང་ཞིང་དེ་དག་རྣམས་བྱས་ཀྱང་ནག་པོའི་རིགས་ལུས་སྐྲངས་ཤིང་སྨན་གྱིས་ཕྱིར་མ་ཐོན་ན་ཞག་བདུན་ན་འཆི་བ་དང་ལུས་ལ་དམར་ཐིག་ཤར་བ་འབྲུམ་པར་མ་སོང་ན་ལྔ་ན་འཆི་ཞིང༌། ནག་ལེབ་ལེབ་རྣག་ཏུ་མ་སོང་ན་དགུ་ན་འཆི་བ་དང༌། དཀར་པོ་སྐྱ་ཤར་དེ་ལའང་ཟས་བསྡམས་ཆེས་པའམ་དྲགས་ན་འཆི་བ་ཡིན་ཞིང་འབྲུམ་བུ་ཕྱིར་རྫོགས་ནས་ཁོང་དུ་སླར་ལོག་པ་ནི་ལས་ཀྱིས་འཆི་ཞེས་བྱའོ། །

        བབས་ས་གནས་དང་སྦྱར་ཏེ་བཅོས་པ་ལ་ནི་དོན་སྙིང་ལ་བབས་པ་ན་སྨྱོ་ཞིང་འདར་ལ་དངངས་པ་ཆུང་ངུ་འབྱུང་བས་དེ་ལ་རྩི་སྦྱོར་སྤྱིའི་སྟེང་དུ་ག་བུར་བསྣན་ལ་བཏང་ཞིང་དེས་མ་ཐུབ་པར་སྨྱོ་ཞིང་འཚིག་ན་འཆི་བ་ཡིན། གློར་བབས་པའི་གློ་མང་ལ་གཟེར་ཞིང་ལུད་པ་རྣག་ཏུ་འབྱུང་ན་སྲོ་ལོ་དང་ཤིང་མངར་གཉིས་རྩི་སྦྱོར་ལ་བསྣན་པ་བཏང་ཞིང་དེས་མ་ཐུབ་པར་མིད་པ་འགགས་ན་འཆི་བ་ཡིན། མཆིན་པར་བབས་པ་ན་མིག་དམར་ལ་མཆིན་སྟེང་གཟེར་བ་འབྱུང་བས་དོམ་མཁྲིས་དང་བྲག་ཞུན་དང་ཁ་ཆེའི་གུར་ཀུམ་རྣམས་བསྣན་པ་གཏོང་ཞིང་དྲན་པ་འཐིབས་ཀྱིན་དུ་ཁྲག་ཏུ་འཁྲུ་བའམ་སྐྱུགས་ན་འཆི་བ་ཡིན། རྒྱུ་མར་བབས་པ་ན་མཁྲིས་པ་འཁྲུ་ཞིང་སྐྱུག་པར་བྱེད་པས་བཙོད་དང་སྙ་ལོ་དང་དུག་མོ་ཉུང་རྣམས་བསྣན་ལ་བཏང་ཞིང་ཁྲག་ཏུ་འཁྲུ་བ་ན་སྣོད་བརྡོལ་ཏེ་འཆི་བ་ཡིན། དེ་དག་ཀུན་གྱི་འདྲེད་དམ་གཉེན་པོ་ཉིད་དུ་དངུལ་ཆུ་རྒོད་བཏུལ་ལམ་ཚ་བཏུལ་ཤིས་ཤིང་མིག་ཏུ་འབྲུམ་པ་བྱུང་ན་ག་བུར་དང་གླ་རྩི་བྱུག་ཅིང༌། ཡང་ན་འོལ་མོ་སེ་དང་མིའི་ནུ་ཞོ་བྱུགཡང་ན་དོམ་མཁྲིས་དང་ཏི་ཚ་བཏུལ་བ་དང་སྐྱེར་པའི་ཁཎྜ་དང་ར་གན་དང་མིའི་ནུ་ཞོར་སྦྱར་ལ་བྱུགས་ཤིང་མིག་གི་རྣག་དང་འཇབ་འཇིབ་ཕུག་རོན་གྱི་སྒྲོས་བྱབ་པ་དང་ག་བུར་རམ་གུར་ཀུམ་གྱི་ཆུས་བཀྲུ་ཞིང་གྲོད་པའི་ནང་ཆུ་བླུགས་པས་བདུགགྲེ་བར་བབས་པ་ན་ཕྱེ་ཚོད་ཚ་མོས་ཡང་དུ་བདུག་པ་སྟེ་བཏུང་བ་དང༌། ཤུ་དག་དང་རུ་རྟ་དང་རྒྱ་ཚའི་ཕྱེ་མ་རྣམས་གདབ་པ་དང༌། ཚར་བོང་གི་ཐང་བཏང་ལ་རྟ་གསེབ་སྔོན་པོའི་སྦངས་ཀྱི་ཁུ་བའང་བཏུང་དེས་ཀྱང་མ་ཐུབ་ན་འབྲུམ་པ་ཀྱོང་བུས་བཞར་རྗེས་སྨན་ཤུ་དག་དང༌། རྒྱ་ཚྭའི་ཕྱེ་མ་བཏབ། ལྒང་པར་བབས་པ་ན་རྒྱ་ཚྭ་དང་རུ་རྟ་དང་ཉི་དགའ་སྟེ་ལྕམ་པ་དང་གླ་རྩི་རྣམས་བསྡུས་པའི་ཐང་གཏང་བར་བྱ་ཞིང༌། རྒྱ་ཚྭ་དང་གླ་རྩི་དང་ཤུ་དག་དང་རུ་རྟ་བཞི་ཆུས་ཁུ་བ་བྱས་སྦྱར་བ་ཆ་བྱད་ཆུ་འགགས་ལ་བཤད་པའི་གསང་བའི་གཅེའུས་ལྒང་པར་བསྐྱལ་བ་སོགས་དེ་དག་རྣམས་ཀྱིས་གདུག་པ་འབྲུམ་པའི་ནད་རྣམས་འཇོམས་པར་བྱེད་དོ་ཞེས་གསུངས་སོ། །

          བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འབྲུམ་པ་རིགས་དྲུག་དངོས་སྨོས་ཏེ་ཞར་ལ་འབྲུམ་ཕྲན་གྱི་རིམས་བཅོས་པའི་ལེའུ་སྟེ་ཉི་ཤུ་རྩ་བཞི་པའོ།། །།

མཐའ་མའི་འདོན་ཐེངས་།: 24.11.2023 ཉིན། 11:37 AM