ལེའུ་ཉེར་བདུན་པ། ཆམ་རིམས་བཅོས་པ།

དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། །ཆམ་པའི་རིམས་ལ་རྒྱུ་རྐྱེན་དབྱེ་བ་དང༌། །དེ་ཡི་རྟགས་དང་བཅོས་ཐབས་བཤད་དུ་གསོལ། །དེ་སྐད་ཞུས་པའི་དོན་ལ་ལན་གསུངས་པ།།

ཆམ་པའི་རྒྱུ་ནི་རིམས་སྤྱི་འདྲ་བ་ལ། །ཁྱད་པར་མི་གཙང་ཟས་སྤྱོད་ཁ་ཟས་འདྲེས། །རྡུལ་འཚུབ་གྲིབ་ཕོག་རྐྱེན་ལས་འབྱུང་བ་ཡིན།།
དབྱེ་བ་གྲེ་ཆམ་གློ་ཆམ་རིམས་ཆམ་དང༌། །སྣ་ཆམ་དག་དང་རྣམ་པ་བཞི་ཡིན་ནོ།།

དེ་རྟགས་དང་པོ་གྲེ་བ་རྐན་མཚུལ་ཚ། །བར་དུ་སྣ་ཆུ་འཛག་ཅིང་མཚུལ་པ་འགགས། །ཐ་མ་སྦྲིད་པ་མང་དུ་བསྟུད་ཅིང་འོང༌། །གློ་ཆམ་དང་པོ་གྲེ་བ་ཚ་ཞིང་འཛེར། །བར་དུ་གློ་མང་མགོ་དང་བྲང་རྒྱབ་ན། །ཐ་མ་རྣག་ཏུ་ལུ་ཞིང་གློ་གཅོང་འགྱུར། །རིམས་ཆམ་མགོ་དང་ཚིགས་གཞི་བྱིན་ཉྭ་ན། །རོ་སྟོད་མི་བདེ་བརླ་རྐེད་བརྡུངས་སྙམ་བྱེད། །ཁ་ཁ་དང་ག་མི་བདེ་གྲང་ཤུམ་བྱེད། །སྲོད་ལ་ཤ་ཚ་རྨི་ལམ་ཟ་ཟི་མང༌། །དེ་ལ་དྲག་ཤུལ་བཅུད་ཤོར་རྒྱས་གྱུར་ན། །ཆམ་པ་སྐྱུར་ཤོར་ཞེས་བྱ་ཤི་བ་མང༌། །སྣ་ཆམ་སྣ་ཚ་གཡའ་ལ་སྣ་ཆུ་མང༌།།

བཅོས་ཐབས་གྲེ་ཆམ་ཟས་སྤྱོད་གཟབ་པས་འཚོ། །གློ་ཆམ་ཨ་རུ་ར་ཡི་ཁམ་མུར་བྱ། །སྲོ་ལོ་ཤིང་མངར་སྤང་རྒྱན་གྲང་ཐང་བཏང༌། །གྲེ་བ་ཚ་འཛེར་ལི་ཤི་དྲུག་པ་སྦྱར། །མཇུག་ཏུ་ཆམ་རྒན་ལུད་པ་མ་ཆོད་ན། །ཉི་ཤུ་རྩ་ལྔས་ཚ་བའི་གཏིང་བཏོན་ལ། །བུར་དཀར་གསར་འཇམ་བསིལ་བཅུད་གློ་རླུང་གསོ། །ཆམ་རིམས་སྨྱུང་བར་འདུག་ལ་ཆུ་སྐོལ་བཏུང་། །འབྲས་བུ་གསུམ་དང་སླེ་ཏྲེས་ཏིག་ཏ་དང་། །མ་ནུ་ཧོང་ལེན་ཐང་བཏང་རྔུལ་དུ་དབྱུང་། །ཚ་བ་སྨིན་གསོད་དུས་གཅིག་བྱེད་པ་ཡིན། །དྲི་བཟང་བཞི་དང་ཞོ་སྦྱར་ཆམ་པ་སེལ། །སེ་འབྲུ་སྐྱུ་རུ་ཞོ་སྦྱར་དེ་བཞིན་ནོ། །བ་ལུ་ད་ཏྲིག་སྟར་བུ་ཚ་བ་གསུམ། །ཟི་ར་དབྱི་མོང་ཙི་ཏྲ་ཀ་ཆ་གཉིས། །དྲི་བཟང་བཞི་ལ་ཆ་ཕྱེད་ཀ་ར་སྦྱར། །ལུད་པ་ཆམ་པ་རྒྱས་དང་དབུགས་མི་བདེ། །འཇོམས་པར་བྱེད་ཅིང་སྐད་སྙན་ཡི་ག་འབྱེད། །སྣ་ཆམ་ཡོས་ཀྱི་རླངས་པས་བདུགས་ན་ཕན། །ཆུ་འཕྲུལ་ཆབ་ཚ་ཕྱེ་ཚོད་ཞོ་དར་བསྟེན། །དྲག་ཤུལ་ཉིན་གཉིད་དྲོད་བཅུད་སྤང་བར་བྱ། །འགྲམས་ནས་རིམས་སམ་འཁྲུགས་སུ་ཤོར་བ་ན། །བརྩོན་པས་རང་རང་གཞུང་བཞིན་བཅོས་པར་བྱ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཆམ་རིམས་བཅོས་པའི་ལེའུ་སྟེ་ཉི་ཤུ་རྩ་བདུན་པའོ།། །།


 

མཐའ་མའི་འདོན་ཐེངས་།: 20.12.2022 ཉིན། 4:02 PM