ལེའུ་ཉེར་དགུ་པ། གསོ་ཐབས་གཉིས་བསྟན་པ།

དེ་ནས་ཡང་འཚོ་མཛད་སྨན་པའི་རྒྱལ་པོས་བཀའ་བསྩལ་པ། དཔྱད་བུ་ལ་སོགས་གསོ་བ་འཛིན་པ་ཀུན། །གང་གིས་གསོ་བའི་གསོ་ཐབས་མང་ཡད་(ཡོད་)ཀྱང༌། །ཐུན་མོང་བ་དང་ཁྱད་པར་གཉིས་ཀྱིས་གསོ། །ཐུན་མོང་གསོ་ཡུལ་གཉིས་ཕྱིར་གསོ་ཐབས་གཉིས། །སྟོབས་བྱེད་(སྐྱེད་)བརྟ་བྱ་ཉམས་སྨད་སྙུང་(སྨྱུང་)པའོ། །

བརྟ་བར་བྱ་ལ་ཡུལ་དང་གང་གིས་བལྟ། །ཕན་ཡོན་དྲག་(དྲགས་)སྐྱོན་དེ་ཡི་བཅོས་ཐབས་ལྔ། །དེ་ཡུལ་རླུང་ཆེ་ཟུངས་ཟད་ཁྱིམ་གསར་དུབ། །སྦྲུམ་མ་བཙས་རྗེས་ཁྲག་ཟགས་གློ་རྡོལ་རྒས། །གཉིས་(གཉིད་)མེད་མྱ་ངན་དཀའ་ཐུབ་རྩོལ་བས་དུབ། །སོ་གའི་དུས་རྣམས་ཕལ་ཆེར་བརྟ་བས་གསོ། །དེ་ཟས་ལུག་ཤ་བུ་རམ་ཀ་ར་མར། །འོ་མ་ཞོ་ཆང་ལ་སོགས་བཅུད་ཀྱིས་བརྟ། །སྨན་སྦྱོར་ནད་དང་གང་འཕྲོད་སྨན་མར་བརྟེན(བསྟེན)། །དཔྱད་དུ་འཇམ་རྩི་ཁྲུས་དང་བརྙེད་བཞ་(བསྐུ་མཉེ་)བྱ། །སྤྱོད་ལམ་གཉིད་ལོག་དལ་དང་སེམས་དགའ་བརྟན་(བསྟེན་)། །དེ་ཡིས་སྟོབས་འཕེལ་ནད་ཀུན་ཟིལ་གནོན་ནུས། །དཔེར་ན་ཁས་ཉེན་པོ་ཡིས་ནུས་བརྙེད་(རྙེད་)བཞིན། །ཐ་ས་དྲག་(ཐལ་དྲགས་)ཚོ་ཆེས་(འབྲས་དང་རྨེན་བུ་དང༌། །རྨོངས་བག་གཅིན་སྙི་ལུད་པ་བད་ཀན་འཕེལ། །དེ་ལ་བད་ཚིལ་ཟད་བྱེད་ཟས་སྨན་ཕན། །གུ་གུལ་བྲག་ཞུན་སྐྱེར་པའི་ཁཎྜ་དང༌། །སྦྲང་སྦྱར་འཚོ་ཆེས་ནད་ཀུན་སེལ་བར་བྱེད། །འབྲས་བུ་གསུམ་དང་སྦྲང་རྩི་སྦྱར་བའམ། །བཅའ་སྒ་ཡ་བཀྵ་ར་བྱི་ཏང་ག །སྐྱུ་རུ་ནས་ཕྱེ་སྦྲང་སྦྱར་འཚོ་ནད་སེལ། །འཚོ་བས་སྐེམ་བཟང་བརྟ་བ་ཚོད་ཟིན་བྱ། །

སྨྱུང་བར་བྱ་ལ་ཡུལ་དང་གང་གིས་དམད། །ཕན་ཡོན་དྲགས་སྐྱོན་དེ་ཡི་བཅོས་ཐབས་ལྔ། །དེ་ཡུལ་མ་ཞུ་སྣུམ་ཟོས་བརླ་རེངས་ནད། །རིམས་དང་གཅིན་སྙི་ཁོང་འབྲས་དྲེག་གྲུམ་མཆེར། །ལྐོག་ཀླད་སྙིང་ནད་ཚད་འཁྲུ་སྐྱུག་པ་དང༌། །ལུས་ལྕི་དང་ག་མི་བདེ་བཤང་གཅི་འགགས། །འཚོ་ཆེས་ཆུ་སེར་བད་མཁྲིས་རྒྱས་པའི་ནད། །སྟོབས་ལྡན་དར་བབ་དགུན་དུས་སྨྱུང་བས་བཅོས། །དེ་ཡི་སྨན་དུ་ཞི་དང་སྦྱང་བ་གཉིས། །མ་སྙོམས་སྙོམས་པར་བྱེད་པ་ཞི་བ་སྟེ། །སྦྱོར་བ་ཟས་སྨན་སྤྱོད་ལམ་དཔྱད་ཀྱིས་བཅོས། །ཉམ་སྟོབས་ཆུང་ལ་ཟས་ཀྱི་བཀྲེས་སྐོམ་བྱ། །དེ་འོག་ཡང་ཞིང་འཇུ་སླ་ཅུང་ཟད་བསྟེན། །ཉམ་སྟོབས་འབྲིང་ལ་ཐང་དང་ཕྱེ་མ་སོགས། །དྲོད་སྐྱེད་སྨིན་བྱེད་སྦྱོར་བ་གང་ཡིན་བསྟེན། །སྟོབས་ལྡན་ཉིན་མཚན་རྩོལ་བཅག་རྔུལ་དབྱུང་ཞིང༌། །མེ་བཙའ་དུགས་ལུམས་གཏར་ག་དཔྱད་ཀྱིས་བཅོས། །སྦྱང་པ་ནད་སློང་ཕྱིར་འབྱིན་བྱེད་པ་སྟེ། །སྦྱོར་བ་མ་ཞུའི་གནས་ལ་སྐྱུགས་ཀྱིས་སྦྱང༌། །ཞུ་བའི་གནས་ལ་ནི་རུ་ཧ་ཡིས་དྲང༌། །ལུས་སྤྱིར་བཤལ་ལ་རྩ་ནད་རྩ་སྦྱོངས་བྱ། །ཞི་སྦྱང་ཉམ་དམད་ཕན་ཡོན་དབང་པོ་གསལ། །ལུས་ཡང་ཡི་ག་བདེ་ལ་བྱ་བྱེད་བརྩོན། །བཀྲེས་སྐོམ་དུས་འབྱུང་བཤང་རླུང་བདེ་བར་རྒྱུ། །དྲགས་ན་ཟུངས་འཛད་ཤ་སྐེམ་མགོ་བོ་འཁོར། །གཉིད་མེད་མདངས་ཤོར་སྐད་གདངས་དབང་པོ་ཉམས། །ཁ་སྐོམ་དང་ག་འགག་དང་བྱིན་པ་བརླ། །གཞུག་ཏོ་རྩིབ་ལོགས་སྙིང་ག་ཀླད་པ་ན། །རིམས་འདེབས་སྐྱུག་འདོད་རླུང་ནད་སྐྱེད་པར་བྱེད། །དེ་ལ་བརྟས་པར་བྱེད་པ་ཐམས་ཅད་ཕན། །ཁྱད་པར་ཤ་ཟའི་ཤ་དང་འཇམ་རྩི་དང༌། །ཟས་འགྲངས་གཉིད་ལོག་ཕག་འདྲར་ལུས་རྒྱས་འགྱུར། །ལུས་རྒྱས་འཚོ་བྱེད་ཤ་འདྲ་གང་ཡང་མེད། །མདོར་ན་བརྟ་བྱའི་ཡུལ་ལ་ཉམ་མི་དམད། །གལ་ཏེ་སྦྱང་བ་དགོས་ལ་འཇམ་པོས་བྱ། །ཉམ་དམན་(ཉམས་དམད་)དགོས་ལ་བརྟ་བར་བྱེད་པ་སྤོང་(སྤོངས)། །རླུང་འཕེལ་ནད་གང་ཟད་ལ་བརྟ་བས་གསོ། །རླུང་ཟད་བད་མཁྲིས་འཕེལ་ལ་སྙུང་(སྨྱུང་)བས་བཅོས། །རྟེན་དང་བརྟེན་པ་འཕེལ་ཟད་བཅོས་ཐབས་གཅིག །ཅེས་གསུངས་སོ། །

གསོ་བྱེད་ཀྱི་དཔྱད་འབུམ་ཁྲ་བོ་ལས་གསོ་ཐབས་གཉིས་བསྟན་པའི་ལེའུ་སྟེ་ཉི་ཤུ་རྩ་དགུ་པའོ།། །།

མཐའ་མའི་འདོན་ཐེངས་།: 30.05.2023 ཉིན། 10:13 AM