དཔྱད་ལྔ་ལུམས་ལ་རུང་བ་དང་མི་རུང་བ་དང༌། །བྱ་བའི་ཐབས་དང་ཕན་ཡོན་དང་རྣམ་པ་བཞི་ལས། །རུང་བ་ནི་ཡན་ལག་རེངས་པ་དང་འཁུམས་པ་དང་ཞ་བ་དང༌། །འབྲས་དང་ལྷོག་པ་དང་རྨ་རྙིང་དང་རྨ་གསར་པ་སྐྲངས་པ་དང་། །མོ་ནད་རླུང་ཚབས་དང་རྐེད་པ་སྒུར་པོ་དང་ཤ་དང་རུས་པ་ལ་ཆུ་སེར་གཡོས་པ་དང་། །ཁྱད་པར་རླུང་ནད་མ་ལུས་ཀུན་ལ་བསྔགས་པ་ཡིན་ནོ།།

མི་རུང་བ་ནི་རིམས་དང་འཁྲུགས་དང་ཚ་བ་རྒྱས་པ་དང་སྐྱ་རྦབ་དང༌། །ལུས་ཀྱི་ཉམ་ཆུང་བ་དང་ག་འགགས་པ་ལ་སྤང་བར་བཤད་དོ། །མིག་དང་མཁུར་ཚོས་དང་རྟིང་པའི་དྲེག་སོགས་བཞི་དང་རླིག་པ་དང༌། །ལྟོ་བ་དང་སྙིང་གའི་གནས་སུ་ལུམས་མི་རུང༌ངོ་།།

ལུམས་བྱ་བའི་ཐབས་ལ་ཆུ་ལུམས་དང་བཅིང་ལུམས་གཉིས་ལས། །ཆུ་ལུམས་ནི་ཐམས་ཅད་སྤྱི་མཐུན་གྱི་ལས་དང་བསོད་ནམས་ལས་གྲུབ་པའི་མཚན་ཉིད་ཆུ་ཚན་རིགས་ལྔ་པོ་ནད་རིགས་སྦྱར་བའི་ནང་དུ་ཞུགས་པ་ཡིན་ནོ། །དེས་ནི་འགྲམས་དང་དུག་རོ་དང་ཚད་རྙིང་བྱེར་ཞིང་ཞེན་པ་དང༌། །འབྲས་དང་རྨ་རྒན་དང་སུར་ཡ་དང་རྩ་ནད་ཕལ་ཆེར་དང༌། །ཡན་ལག་རེངས་པ་འཁུམས་པ་སྒུར་པོ་དང་ཤ་སྐམས་པ་སོགས་འདོན་པར་བྱེད་དོ།།

ཆུ་ཚད་དེ་མ་གྲུབ་ན་བདུད་རྩི་རྣམ་པ་ལྔ་ཤུག་ཚེར་དང་འོམ་བུ་བ་ལུ་མཚེ་མཁན་དཀར་རྣམས་ཆོམ་བརྡུངས་ཚོས་པར་བཙོས་པའི་ཁུ་ཚིག་ལ། ཕབས་བཏབ་དྲོ་བསྙལ་ལངས་ཚད་སྐྱུར་དྲི་དང་། །ལྦུ་བ་འཆིར་འབྱུང་དེ་ཚེ་དྲོད་ལྡན་པ། །ལུས་ཀྱི་ཚུགས་ཙམ་གང་དགོས་དེ་ལུམས་བྱ། །ཞེས་དངྲ། མི་ལྷ་གཉེན་ཀླུ་སྡེ་བརྒྱད་ཡང་ན་ཉིན་གྲིབ་ཆུ་སྤང་དྲག་འདུལ་ཞེས་སོ། །རླངས་ལུམས་ཆུ་ཚན་བཅིང་བས་གོང་བཞིན་འགྲུབ།།

རུས་ལུམས་ནི་མི་རུས་བཙའ་མ་ཆུ་ཚོས་པར་བཙོས་པའི་རླངས་པའི་ལུམས་དང་དེའི་ཆུ་ཚན་གྱིས། །ཚ་བའི་རེངས་པ་དང་རླུང་དང་ལྡན་པ་དང་འགྲམས་པའི་ཟུག་གཟེར་འཇོམས།།

མཁན་པ་དང་བུལ་ཏོག་ཕབས་དང་སྦྱར་བའི་ཆུ་ལུམས་ཀྱིས། །རྨ་རྒན་དང་སྐྲངས་པ་དང་ཡན་ལག་ཞ་བ་དང་རེངས་པ་སོགས་སེལ་བར་བྱེད་དོ།།

བཅིང་ལུམས་ལའང་ཚ་སེལ་དང་གྲང་སེལ་རྣམ་པ་གཉིས། །ཚ་སེལ་མགོ་ཆག་རྩ་བྱེར་འབྲུ་སྣའི་ལུམས་ནས་གྲོ་འབྲས་སོ་བ་ཏིལ་བྲ་བོ་སྲན་ཆུང་སོགས་འབྲུ་སྣ་ཐམས་ཅད་རྗེན་བཏགས་བྱས་པའི་ཏིལ་བར་རམ་འབྲུ་མར་རྙིང་པ་སྦྱར་བའི་ཟན་དྲོན་གྱིས། མགོའི་སྐྲ་བཞར་ལ་ཞ་མོ་ལྟར་གཡོག་པ་ཞག་འགའ་བྱས་པས་ཆུ་སེར་དེར་འདུས་ནས་སྐྲངས་འབྱུང་། དེ་སྟེང་འཇིབ་ཏུ་བཅུགས་ནས་ཁྲག་ངན་ཆུ་སེར་ཅི་ཐོན་ཐོན་དབྱུང་ངོ་། །ཀྱི་ལྕེ་དཀར་པོ་མཛོ་སྔོ་རོག་གི་ལྕི་བ་ཞོ་དང་སྦྱར་བའི་བཅིང་ལུམས་ཀྱིས་ཚ་བའི་སྐྲངས་པོ་འཇོམས། །ཚ་བ་རྩ་ལ་བྱེར་ན་མེ་ཏོག་སྣ་ཚོགས་བསྡུས་པའི་ལུམས་ཀྱིས་གདུལ། །རྩ་དཀར་དང་གཟའ་ཕོག་པ་དང་མཁལ་རྩ་འགྲམས་པ་དང་བྱེར་བ་ལ། །གོང་དུ་བཤད་པའི་བདུད་རྩི་ལྔ་ལུམས་འམ་ཡང་ན་གླ་རིལ་ཕྱེ་མར་བྱས་པ་ཆང་གི་ནང་དུ་བཙོས་པའི་བཅིང་ལུམས༌བྱ། རྩ་འགྲམས་པ་དང་སྐྲངས་པོ་དང་རྩ་རྒྱུས་རེངས་པ་ལ་མཁན་པ་དཀར་པོ་སྤྲུ་མ་དང་མཚེ་འམ་ཁྲུ་ད་དང་། །སྤང་སྤོས་རྣམས་ཕྱེ་མ་དྲི་ཆུར་བཙོས་པའི་ལུམས་ཀྱིས་གདུལ། །ཚད་པ་རྙོགས་པ་དང་བྱེར་བ་ལ་མཚན་སྲོ་ལོ་དམར་པོ་དང་སྲོ་ལོ་དཀར་པོའི་ལུམས་བྱ། །མཛེ་དང་དུག་ལ་རའི་རིལ་མ་དང་གླ་རྩི་དང་སྡོམ་བརྒྱད་དྲི་ཆུའི་ལུམས། །རིན་པོ་ཆེ་དབྱིག་གི་དུག་ལ་མཆོད་རྟེན་ལ་གསོལ་བའི་ས་དཀར་ན་བཟའ་དང༌། །ཐལ་ལུད་ཡོད་པའམ་དྲི་ཆུའི་རྫིང་སོགས་བ་ཚྭ་ཡོད་པའི་ཐད་ནས་ཐུར་དུ་ཁྲུ་གང་བརྐོས་པའི་འོག་གི་ས་དྲི་ཆུར་བཙོས་པའི་ལུམས་བྱ།།

གྲང་སེལ་ནི་ཡན་ལག་གི་སྐྲངས་པ་རྣག་ཏུ་འགུགས་ན། །སྦང་སྐམ་དང་བྱི་བའི་བྲུན་དང་ཆང་རྒྱ་ཚོས་ཞེས་པའང་སྣང་བཙོས་བཙོད་རྣམས་ཀྱི་ཕྱེ་མའི་སྐྱོ་མའི་ལུམས་སུ་གཞུག །མདེའུ་འབྱིན་ན་ར་དང་རིལ་མ་དང་བྱི་བའི་བྲུན་དང་དྲི་ཆུའི་ལུམས་བྱ། །ར་དུག་པ་དང་སྤྱང་ཚེར་དང་རི་ཤོ་དང་སྤྱང་ཀིའི་བྲུན་དང༌། །ཆང་གི་སྦང་རྒོད་དེ་གླུམ་གར་བཙོས་པས་དུགས་ཀྱིས་ཆུ་ལྷོག་དང་གྲང་གཉན་གྱིས་སྐྲངས་པ་ཐམས་ཅད་འདུལ། །ཡན་ལག་གི་ཆུ་སེར་དང་སྐྱ་རྦབ་ཀྱི་སྦོས་པ་ལ། །རྟ་དང་རྐྱང་དང་བོང་བུའི་སློ་བ་དང་དྲོན་མོའི་ལུམས་སུ་གཞུག །རྨེན་བུ་དང་འབྲས་ལ་ཕུག་རོན་གྱི་རིལ་མ་ཆང་ནང་དུ་བཙོས་པའི་ལུམས་བྱ། །འབྲས་འདུལ་ནི་མི་ཡི་རྐང་མར་དང་མིའི་མགོ་བོའི་ཤ་དང་མིའི་རྐང་ལག་གི་ཉྭ་བཞི་ཡི་ཤ་དང་། །སྤྲུ་མའི་རྩ་བ་དང་རེ་ལྕག་རྣམས་ཆང་དུ་བཙོས་པའི་བཅིང་ལུམས་སུ་གཞུག །རྡེའུ་རྡོ་སྐྲན་འདུལ་བ་ལ་སྤྱང་ཚེར་དང་ལྕེ་ཚ་བ་དང༌། །མཁན་པ་དཀར་པོ་དང་ལྕ་དཀར་འབྲུམ་བྱི་བའི་བྲུན་ཆང་གི་སྦང་གར་གླུམ་དང༌། །བཅའ་སྒ་དང་སྤོད་པི་པི་ལིང་སྦྱར་ཏེ་ཆུར་བཙོས་པའི་ལུམས་སུ་གཞུག །གྲུམ་བུའི་རུས་ཏྲེམ་དང་རླུང་ཚབས་ནད་ལ་མི་རུས་བ་སྤྲུ་བའི་ལུམས་བྱ། །རླུང་གི་འཕྱོས་པ་དང་སྨྱོ་བ་དང་འབོག་པ་དང་རླུང་ཚབས་དང་རླུང་ལ་སེམས་ཅན་སྣ་ཚོགས་པའི་སྙིང་སྣའི་ལུམས་བྱ། །རིམས་ཀྱི་མཇུག་ཏུ་རྐང་ལག་དང་རུས་པ་ན་བ་ལ། །སྔར་བཤད་པའི་ཁྲུ་གང་འོག་ས་དྲི་ཆུར་བཙོས་པའི་ལུམས་བྱ། །རུས་པ་དང་ཚིགས་པ་གཟེར་ན་སེམས་ཅན་སྣ་ཚོགས་པའི་རུས་སྣ་ཆང་དུ་བཙོས་པའི་ལུམས་བྱ། །རླུང་གིས་སྐྲངས་པ་ལ་འབའ་ཆ་ཆང་དུ་བཙོས་པའི་ལུམས་བྱ།།

ཕན་ཡོན་ལུམས་ཀྱིས་བཙོས་པའི་ལུས་ཚ་བའི་རླངས་པ་ཆུ་སེར་དུ་འབབ་ནས་བ་སྤུར་ཡང་ཡང་འདོན། །དེས་ནི་རླུང་འདུལ་ཞིང་སྐྲངས་པ་འཇོམས་ལ་སྐེམ་པོ་ཤ་རྒྱས་པར་བྱེད་དོ། །ཅེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་ལུམས་ཀྱི་ལེའུ་སྟེ་ཉི་ཤུ་རྩ་གསུམ་པའོ།། །།

མཐའ་མའི་འདོན་ཐེངས་།: 23.02.2021 ཉིན། 4:20 PM