ལེའུ་ང་བདུན་པ། དྲེག་ནད་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག དྲེག་གི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

སྤྱི་དོན་དང་པོ་རྒྱུ་རྐྱེན་ཁྲག་འཁྲུག་བྱེད་པའི་ཟས་སྤྱོད་བསྟེན། །ཉིན་པར་གཉིད་ལོག་ཤ་ཚིལ་སྣུམ་བག་དང་དལ་བོར་སྐྱིད་པར་འདུག་པ་དང༌། །དྲག་ཤུལ་རྐྱེན་གྱིས་རླུང་ཁྲག་འཁྲུགས་པ་ཡིས། །ཐོག་མར་རྐང་པའི་མཐེབ་མོ་དང་ལག་པའི་གྲུ་མོར་རུས་ལ་རླུང་ཁྲག་ཞེན་པ་ཡིན་པས་གནས། །དེ་ཡང་དང་པོ་ཁོལ་བུ་ཁོལ་བུར་ན་ཞིང་རྙིང་ནས་རང་འབྱུང་རྒྱ་ཇེ་ཆེར་མཆེད་པར་འགྱུར།།

སྤྱི་དོན་གཉིས་པ་དབྱེ་བ་རླུང་མཁྲིས་ཁྲག་དང་བད་ཀན་བཞི། །སྤྱི་དོན་གསུམ་པ་དེ་རྟགས་སྤྱི་དང་ཁྱད་པར་གཉིས་ལས་དང་པོ་མངོན་ཚུལ་བརླ་རྐེད་ཚིགས་དཔུས་མོ་བྱིན་པ་རྣམས་ན། །གཡའ་འཕྲིག་འགུལ་སྐྱོད་བྱས་ཚེ་ཆག་སྙམ་བྱེད་ཚོར་མེད་ལྕི་བའམ་བྱེད་པ་སྟེ། །ཡང་ཡང་ལྡང་ཞིང་རིམ་པས་སླར་ལྕི་འགྱུར་བ་ཡིན། །ནད་རྒྱས་གསར་དུས་པགས་པ་ཁྲག་ལ་གནས་པའི་དུས། །སྐྲངས་དམར་དྲོད་ཆེ་སྲ་ལ་སྔོ་ཐིག་བཅས། །ཤིན་ཏུ་ན་ཞིང་བྱ་རྨྱང་རྐང་ལག་རྐྱང་ཤད་མང་བ་སྟེ། །རྟོགས་སླའི་དུས་ཡིན་དུས་འདིར་བཅོས་པ་གཅེས། །ཐ་མ་རྙིངས་ནས་ལུས་ཀྱི་རྩ་ཆུ་རུས་ཚིགས་ཁྱབ། །ལྷག་པར་སྐྲངས་ཤིང་མི་བཟོད་སྲ་ལ་ཧྲེམ། །གཞང་ཁ་རུས་ཚིགས་ཆད་པ་སྙམ་དུ་སེམས། །ཤུགས་རྒྱས་ཞ་འཐེང་འདི་དུས་གསོ་དཀར་འགྱུར།།  གཉིས་པ་ཁྱད་པར་དང་པོ་རླུང་གྱུར་གཟེར་ན་ཟུགས་དང་སྐྲངས་པས་འཁྲིག་འཕྲིག་འཕེལ་འགྲིབ་བྱེད། །སྐྲངས་ལ་ཡན་ལག་རེངས་པ་ནག་པོ་ལས་སོར་མོ་འཁུམས་སྙིང་ལ་གྲང་མོ་འདོད་སྔོན་པོའི་ཐིག་ལེ་འོང༌། །གཉིས་པ་མཁྲིས་གྱུར་དྲོད་ཆེ་དམར་ལ་རེག་མི་བཟོད་ལུས་ལ་ཆེ་སྐྱེ་། །གསུམ་པ་ཁྲག་གྱུར་ཚ་འབྲབ་མདོག་དམར་འདྲུལ་བར་བྱེད། །བཞི་བ་བད་ཀན་ལས་གྱུར་འགུལ་དཀའ་སེམས་སམ་གཡའ་ལྕི་ཚོར་བ་མེད།།

སྤྱི་དོན་བཞི་བ་བཅོས་ཐབས་སྤྱི་བྱེ་བྲག་གཉིས་ལས་དང་པོ་སྐྱོན་གསལ་དགོངས་ཏེ་རླུང་བཅོས་ཅི་རིགས་རླུང་བསལ་ལ། །དེ་རྗེས་ཁྲག་ལན་གྲངས་མང་དུ་གཏར་ལ་ཁྲག་གི་བོངས་ཉུང་དུ་དབྱུང༌། །ཙག་ཙག་ལྷང་ལྷང་ན་སར་རྔབས་འཇིབ་རུ་གཟུགས། །སྐྲངས་ཆེ་ཁལ་ཁལ་དམར་ལ་ཐུར་མས་རྔབས་རུའི་ཤུལ་དེ་བཙག་བུས་བཙག་པར་བྱ་སྙིང་ཆུང་བ་རླུང་ཤས་ཆེ་ཁྲག་མི་འབྱུང་། །གཉིས་པའི་དང་པོ་རླུང་གྱུར་བ་གཅིན་སྤོས་དཀར་འོ་མས་སྦྱང༌། །དེ་འོག་སླེ་ཏྲེས་བསྐོལ་བའི་ཁུ་བ་དང༌། །འོ་མ་བསྐོལ་བ་ཀ་ར་བཏབ་ལ་བཏང།༌།  རྒུན་འབྲུམ་ཤིང་མངར་ཀ་ར་མར་བསྐོལ་བླུད། །གཉིས་པ་མཁྲིས་གྱུར་ཉེ་ཤིང་ཧོང་ལེན་འབྲས་བུ་ཨ་བར་སྐྱུར་གསུམ།  །སླེ་ཏྲེས་པ་ཏོལ་འོ་མ་མར་བསྐོལ་བླུད། །གུར་ཀུམ་སྐྱེར་པ་བསྐོལ་ལ་སྦྲང་སྦྱར་བྱིན། །དེ་འོག་དུར་བྱིད་རྒུན་འབྲུམ་འོ་མར་སྦྱར། །བཞི་བ་བད་གྱུར་གོང་གི་དབྱེ་བའི་སྐབས་དང་འདིར་བད་ཁྲག་གཉིས་དགོངས་པ་མཐུན་བྱུང་འབྲས་བུ་ཨ་བར་སྐྱུར་གསུམ་དང་སྦྲང་རྩི་བཏང༌། །གླ་སྒང་གུར་ཀུམ་སྐྱེར་པ་བསྐོལ་ཆུ་ལ་སྦྲང་སྦྱར་བླུད། །ནད་སྟོབས་ལྡན་ན་སྐྱུགས་རྗེས་རྩུབ་བཅོས་བྱ།  །ཀུན་ལ་འབྲས་བུ་ཨ་བར་སྐྱུར་གསུམ་དང་ཚ་བ་སྒ་པོ་ཕོ་དབྱི་ཙི་ལྔ། །གནྡྷ་པ་ཏྲ་གུ་ཡུ་ཤིང་ཚ་བ་ཤ་ཀ །པི་ལིང་མཱུ་ལ་རྩ་བ་ཅུ་གང་བྱི་ཏང་ག །ཤུ་དག་སྤང་སྤོས་ལྕགས་གཡའི་ལྡེ་གུ་ཡིས། །དྲེག་ནད་གཟེར་བཅས་མ་ལུས་སེལ་བར་བྱེད། །དུར་བྱིད་ཨ་རུ་རྒྱམ་ཚྭ་པི་པི་ལིང༌། །བཀྲུ་འཇམ་སྦྱོར་བ་དྲེག་འཇོམས་སྨན་མཆོག་ཡིན། །ནང་སྐྱོན་སེལ་ན་ཕྱི་ནས་བྱུག་པས་བཅོས། །ཏིལ་མར་སྦྲང་རྩི་གུ་གུལ་ཐལ་ཏྲེས་བ་སྤྲུ་བཙོད། །བསྐོལ་བའི་ལྡེ་གུ་བྱུགས་པས་དྲེག་ནད་སེལ། །གསུམ་པ་ཁྲག་མཁྲིས་ལས་གྱུར་སྟག་ཚེར་ཀཎྚ་ཀ་རི་ཤིང་མངར་བཙོད། །སྐྱེར་པ་ཙན་དན་དམར་པོ་རྒྱ་ཤུག་གཙང་འགྲམ་གྱི་ཤུག་སེར་ཐོག་གུ་ཁྲོ་ཞལ་ཅན་པུ་ཤེལ་རྩེ། །སྲན་ཆུང་ཀ་རའི་ལྡེ་གུ་གྲང་མོ་བྱུག །ཤུ་དག་རུ་རྟ་ཁང་པའི་དུད་པ་སེར་པོ་དཔའ་སེར་དང་ཆུ་རྩ་གཉིས། །ཤུ་ཏིའི་ལྡེ་གུས་བད་རླུང་དྲེག་ནད་སེལ། །རྙིངས་ནས་ནི་རུ་དྲག་པོས་མས་བཏང་བཀྲུ་སྨན་སྣུམ་འཆོས་བྱ། །ཀུན་ལ་བད་ཚིལ་རླུང་ཁྲག་གཙོ་བོར་བཅོས།། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དྲེག་ནད་གསོ་བའི་ལེའུ་སྟེ་ལྔ་བཅུ་རྩ་བདུན་པའོ།། །།

མཐའ་མའི་འདོན་ཐེངས་།: 23.02.2021 ཉིན། 2:27 PM